DISOLO YA KULONGUKA 45
Mutindu ya Kusadisa Bantu na Kuzitisa Bansiku ya Kristu
“Beno kwenda mpi beno kumisa bantu balongoki . . . , beno longa bo na kuzitisa mambu yonso ya mono songaka beno.”—MAT. 28:19, 20.
NKUNGA 89 Widikila mpi Lemfuka
MAMBU YINA DISOLO YAI KE TUBILA *
1. Mutindu Matayo 28:18-20 ke monisa yo, nki nsiku Yezu pesaka balongoki na yandi?
NA NIMA ya lufutumuku ya Yezu, yandi monanaka na balongoki na yandi yina vukanaka na Galilea. Yandi vandaka ti mambu ya mfunu ya kusonga bo. Inki mambu? Mambu yango kele na Matayo 28:18-20.—Tanga.
2. Inki bangiufula beto ta tadila na disolo yai?
2 Nsiku ya Yezu ya kukumisa bantu balongoki ke tadila mpi bansadi ya Nzambi yonso bubu yai. Yo yina, beto tadila bangiufula tatu yina ke tadila kisalu yina Yezu pesaka beto. Ya ntete, katula kulonga balongoki nsiku ya Nzambi, nki diaka beto fwete sala? Ya zole, nki mutindu bansamuni yonso na dibundu fwete sadisa balongoki ya Biblia na kuyela na kimpeve? Ya tatu, nki mutindu beto lenda sadisa bampangi yina ke samunaka diaka ve na kusala diaka kisalu ya kukumisa bantu balongoki?
BETO LONGA BO NA KUZITISA BANSIKU YA YEZU
3. Inki diambu ya mfunu Yezu tubaka na nsiku yina yandi pesaka?
3 Bansiku ya Yezu kele pwelele. Beto fwete longa bantu mambu yina yandi tubaka. Kansi, beto fwete vila ve diambu mosi ya mfunu. Yezu tubaka ve nde: ‘Beno longa bo mambu yonso yina mono songaka beno.’ Kansi yandi tubaka nde: “Beno longa bo na kuzitisa mambu yonso yina mono songaka beno.” Sambu na kulemfuka na bansiku ya Yezu, beto fwete longa balongoki ya Biblia mambu yina bo fwete sala mpi beto fwete songa bo mutindu ya kusala yo. (Bis. 8:31) Sambu na nki beto fwete sala mutindu yina?
4. Pesa mbandu ya ke monisa mutindu ya kulonga longoki ya Biblia mutindu ya kuzitisa bansiku ya Kristu.
4 Inki mutindu beto lenda longa muntu na “kuzitisa” bansiku ya Kristu? Mbandu yai lenda sadisa beto na kuzaba mutindu ya kusala yo. Beto baka mbandu ya muntu ya ke longuka kunata kamio. Inki mutindu bo ke longaka muntu na kunata kamio? Ntete, longi ke longaka longoki malongi ya kunata kamio. Na nima, sambu na kusadisa yandi na kutana kamio mbote, longi ke salaka kima ya nkaka. Bo zole ke kotaka na kamio mpi yandi ke bikilaka longoki na kutana kamio, yandi ke songaka longoki mambu yina yandi fwete sala. Mpidina longoki ke bakisaka mutindu ya kusadila mambu yina yandi longukaka. Mbandu yai ke longa beto nki?
5. (a) Mutindu Yoane 14:15; 1 Yoane 2:3 ke monisa yo, nki beto fwete longa balongoki ya Biblia? (b) Pesa bambandu ya ke monisa mutindu ya kusadisa longoki na kusadila mambu yina yandi ke longuka.
5 Ntangu beto ke longukaka Biblia ti bantu, beto ke longaka bo mambu yina Yehowa ke zolaka nde beto sala. Kansi, beto fwete sala diaka mambu ya nkaka. Beto fwete sadisa balongoki ya Biblia na kusadila mambu yina bo ke longuka. (Tanga Yoane 14:15; 1 Yoane 2:3.) Beto lenda monisa bo mutindu ya kusadila minsiku ya Biblia na nzo-nkanda, na kisalu mpi ntangu bo ke lutisa ntangu. Beto lenda songa bo diambu mosi yina kuminaka beto mpi mutindu beto sadilaka minsiku ya Biblia sambu na kununga diambu yango to mutindu minsiku ya Biblia sadisaka beto na kubaka lukanu ya mbote. Ntangu beto ke sala kisambu ti longoki, beto lenda lomba Yehowa mpeve santu na yandi sambu yo sadisa longoki.—Yoa. 16:13.
6. Kulonga balongoki na kuzitisa bansiku ya Yezu ke tendula diaka nki?
6 Kulonga balongoki na kuzitisa bansiku ya Yezu ke tendula diaka nki? Yo ke tendula mpi kukuna na ntima na bo mpusa ya kusala kisalu ya kukumisa bantu balongoki. Balongoki ya nkaka lenda wa boma ya kusala kisalu yango. Ntangu beto ke sadisa bo na kubakisa nsiku mosi ya Kristu, beto fwete vanda ntima-nda, malembe-malembe bo ta bakisa yo, yo ta simba ntima na bo mpi bo ta kuma ti mpusa ya kulemfukila yo. Inki beto lenda sala sambu na kupesa longoki mpusa ya kulonga nsangu ya mbote?
7. Inki mutindu nge lenda sadisa longoki na kukuma ti mpusa ya kusamuna nsangu ya mbote?
7 Nge lenda yula longoki bangiufula yai: “Inki mutindu kieleka me sadisaka nge na kukuma ti luzingu ya mbote? Keti nge ke mona ve nde bantu ya nkaka mpi kele ti mfunu ya kuwa nsangu yai? Inki mutindu nge lenda sadisa bo?” (Bing. 3:27; Mat. 9:37, 38) Songa longoki batrakiti yina kele na Bisadilu Sambu na Kulonga mpi bika yandi mosi kupona batrakiti yina yandi ke mona nde yo ta sepedisa bantu ya dibuta na yandi, banduku na yandi ya nkaka to banduku na yandi ya kisalu. Pesa yandi batrakiti yango mingi. Beno sala ti yandi mwa bansonga sambu na kumonisa yandi mutindu ya kukabula batrakiti yango. Kana longoki me kuma nsamuni yina me bakaka ntete ve mbotika, nge fwete samunaka ti yandi sambu na kusadisa yandi.—Lon. 4:9, 10; Luka 6:40.
MUTINDU DIBUNDU LENDA SADISA BALONGOKI YA BIBLIA NA KUYELA
8. Sambu na nki yo kele mfunu nde longoki ya Biblia kuzola mingi Nzambi mpi bantu? (Tala mpi lupangu “ Mutindu Beto Lenda Sadisa Balongoki ya Biblia na Kuzola Nzambi Mingi.”)
8 Kuvila ve nde Yezu songaka beto na kulonga bantu na “kuzitisa mambu yonso yina” yandi longaka. Bansiku yai zole ya kuluta nene, kuzola Nzambi mpi nkweno kele ti kuwakana ya ngolo ti kisalu ya kusamuna mpi ya kukumisa bantu balongoki. (Mat. 22:37-39) Inki kuwakana kele na kati ya bansiku yai zole mpi kisalu ya kusamuna? Kikuma ya ntete yina ke pusaka beto na kusamuna kele, zola sambu na Nzambi mpi sambu na bantu. Balongoki ya Biblia ya nkaka lenda wa boma ya kusamuna. Kansi beto lenda ndimisa bo nde Yehowa ta sadisa bo mpi malembe-malembe, bo ta waka diaka ve boma ya kusamuna. (Nk. 18:1-3; Bing. 29:25) Lupangu ya kele na lutiti 4 ke monisa mambu yina beto lenda sala sambu na kusadisa longoki ya Biblia na kukuma kuzola Nzambi mingi. Kansi, nki mutindu bampangi na dibundu lenda sadisa longoki na kuyedisa zola na yandi?
9. Na mbandu ya muntu yina ke longuka kunata kamio, nki mutindu longoki lenda longuka mambu ya nkaka ya mfunu?
9 Beto vutukila mbandu ya muntu yina ke longuka kunata kamio. Ntangu yandi ke pusa kamio mpi longi na yandi kele na lweka na yandi, nki mambu ya nkaka yandi lenda longuka na ntangu yina? Yandi fwete widikila mambu yina longi ke songa yandi mpi kutala mutindu bashofere ya nkaka ke nata kamio. Mu mbandu, longi lenda benda dikebi na yandi na kikalulu mosi ya mbote yina shofere mosi me monisa. Mu mbandu, shofere yina ke bikila bashofere ya nkaka nzila sambu bo luta to shofere yina ke kulumusa mwinda na yandi sambu yo yangisa ve bashofere ya nkaka. Mambu yai ta longa longoki malongi ya mfunu yina yandi ta sadila ntangu yandi ke nata kamio.
10. Inki ta sadisa longoki na kuyela mingi na kimpeve?
10 Mutindu mosi, longoki ya Biblia ya ke yantika kutambula na nzila ya luzingu, ke longukaka mambu na longi na yandi mpi na bampangi ya nkaka ya kwikama yina ke sadilaka Yehowa. Kukwenda na balukutakanu ta sadisa longoki mingi na kuyela na kimpeve. Sambu na nki? Sambu mambu yina beto ke longukaka na balukutakanu ta sadisa longoki na kuzaba mambu mingi, ta kumisa lukwikilu na yandi ngolo mpi ta sadisa yandi na kukuma kuzola Nzambi mingi. (Bis. 15:30-32) Diaka na balukutakanu, longi lenda songa longoki na bampangi ya nkaka yina me kutanaka ti mambu ya kiteso mosi ti yandi. Longoki ta mona zola ya bampangi.
11. Inki bambandu longoki ya Biblia lenda mona na dibundu mpi nki mutindu yo lenda sadisa yandi?
11 Beto tadila bambandu yai: Longoki mosi ya Biblia, ya ke sansaka bana na yandi, yandi mosi, ke mona mpangi mosi na dibundu yina ke sansaka mpi bana na yandi, yandi mosi. Longoki yina me sepela sambu yandi ke mona mutindu mpangi-nkento yina ke kwisa ti bana na yandi ya fioti na balukutakanu. Diaka, longoki ya nkaka ya Biblia yina ke sala bikesa ya kuyambula kunwa makaya, me kutana ti mpangi mosi yina vandaka mpi kunwa makaya kansi yandi me yambulaka. Mpangi yina me songa longoki ya Biblia mutindu zola na yandi sambu na Yehowa pusaka yandi na kulemfuka na nsiku ya Nzambi. (2 Bak. 7:1; Bafil. 4:13) Na nima ya kuwa disolo ya mpangi yina, longoki ya Biblia me kuma ti kivuvu nde yandi mpi ta kuka kuyambula makaya sambu mpangi yina zabisaka yandi nde: “Nge ta yambula yo.” Nkento mosi yina ke longukaka Biblia, ke mona mutindu mpangi-nkento mosi ke sepela mingi na mutindu yandi kele Mbangi ya Yehowa. Mambu yina nkento yai ya ke longuka Biblia ke mona na mpangi-nkento yina, me pesa yandi mpusa ya kusosa kuzaba kikuma yina ke sala nde mpangi-nkento kuvanda na kiese.
12. Sambu na nki beto ke tuba nde bansamuni yonso na dibundu ke sadisaka balongoki ya Biblia na kuyela?
12 Kana balongoki ya Biblia ke zabana ti bampangi ya kele ti kimpeve ya mbote, bo ta mona mutindu bampangi ke zitisa nsiku ya Kristu ya kuzola Nzambi mpi bantu, yo ta sadisa bo mingi. (Yoa. 13:35; 1 Tim. 4:12) Diaka, mutindu beto monaka yo, longoki ta baka kikesa mingi ntangu yandi ta mona bampangi ya nkaka, yina ke kutana ti bampasi bonso yina yandi ke kutana ti yo. Bambandu ya bampangi ta sadisa longoki ya Biblia na kubakisa nde yandi mpi ta kuka kusala bansoba sambu na kukuma longoki ya Kristu. (Kul. 30:11) Konso muntu na dibundu lenda sadisa balongoki na kuyela na kimpeve. (Mat. 5:16) Inki bikesa nge ke salaka sambu na kusadisa balongoki ya Biblia yina ke kwisaka na balukutakanu?
BETO SADISA BAMPANGI YINA KE SAMUNAKA DIAKA VE NA KUVUTUKILA KUSAMUNA
13-14. Inki Yezu salaka ntangu balongoki na yandi lembaka nitu?
13 Beto ke zolaka kusadisa bampangi yina ke samunaka diaka ve na kuzitisa nsiku ya Kristu ya kukumisa bantu balongoki. Mutindu Yezu sadisaka bantumwa na yandi yina lembaka nitu, ke monisa mambu yina beto lenda sala bubu yai.
14 Na ntwala nde bo fwa Yezu, bantumwa na yandi “yonso yambulaka yandi mpi tinaka.” (Mar. 14:50; Yoa. 16:32) Na dibaku yai, nki mutindu Yezu sadilaka bantumwa na yandi mambu ntangu bo lembaka nitu? Na nima ya lufutumuku na yandi, Yezu songaka balongoki na yandi ya nkaka nde: “Beno wa boma ve! Beno kwenda kupesa nsangu yai na bampangi na mono [nde mono me futumuka].” (Mat. 28:10a) Yezu yambulaka ve bantumwa na yandi. Ata bo tinaka yandi, yandi landaka kubinga bo “bampangi na mono.” Bonso Yehowa, Yezu ke wilaka bantu mawa mpi ke lolulaka bo.—2 Bant. 13:23.
15. Inki mutindu beto ke kudiwaka sambu na bampangi na beto yina ke samunaka diaka ve?
15 Beto mpi ke kudiyangisaka sambu na bansamuni yina ke samunaka diaka ve. Bo kele bampangi na beto mpi beto ke zolaka bo. Beto ke yibukaka zola mpi bikesa yina bo monisaka na bamvula me luta. (Baeb. 6:10) Bankaka sadilaka Yehowa bamvula mingi, beto kele kibeni ti mfunu na bo. (Luka 15:4-7) Bonso Yezu, nki mutindu beto lenda monisa nde beto ke kudiyangisaka sambu na bo?
16. Inki mutindu beto lenda monisa nde beto ke tudilaka bampangi yina ke samunaka diaka ve dikebi?
16 Beto bingisa bo na kiese na kukwisa na balukutakanu. Sambu na kusadisa bantumwa na yandi yina lembaka, Yezu bingisaka bo na lukutakanu. (Mat. 28:10b; 1 Bak. 15:6) Mutindu mosi bubu yai, kana mpangi mosi yina ke samunaka diaka ve ke kwisaka diaka ve na balukutakanu, beto lenda bingisa yandi na balukutakanu. Beto fwete zaba nde bantangu ya nkaka yo ta lomba kubingisa bo mbala mingi na ntwala nde bo kwisa. Ntembe kele ve nde Yezu waka kiese ntangu balongoki na yandi kwisaka na lukutakanu.—Tala mpi Matayo 28:16 ti Luka 15:6.
17. Inki beto lenda sala kana mpangi mosi yina ke samunaka diaka ve me kwisa na balukutakanu?
17 Beto yamba bo na kiese yonso. Yezu yambaka balongoki na yandi na kiese ntangu yandi kutanaka ti bo, yandi yantikaka kusolula ti bo. (Mat. 28:18) Inki beto ta sala kana mpangi mosi yina ke samunaka diaka ve me kwisa na mbala ya ntete na balukutakanu? Beto fwete yamba yandi na kiese yonso. Beto lenda konda kima ya kutubila yandi sambu na kupesa yandi kikesa. Kansi, sambu na kutuba ve diambu yina lenda yangisa yandi, beto lenda songa yandi kaka nde beto kele na kiese mutindu beto me mona yandi diaka.
18. Inki mutindu beto lenda pesa bampangi yina ke samunaka diaka ve kikesa?
18 Beto pesa bo kikesa. Yo ke monana nde balongoki ya Yezu kudiyangisaka ntangu Yezu songaka bo nde bo ta samuna na ntoto ya mvimba. Yezu pesaka bo kikesa ntangu yandi tubaka nde: “Mono kele ti beno bilumbu yonso.” (Mat. 28:20) Keti bangogo yai ya Yezu pesaka bo kikesa? Ee. Ntangu fioti na nima, balongoki kudipesaka mingi na “kulonga mpi kuzabisa nsangu ya mbote.” (Bis. 5:42) Bampangi yina me lembaka na kimpeve ke vandaka na mfunu nde beto pesa bo kikesa. Ngindu ya kuyantika diaka kusamuna lenda pesa bo boma. Beto lenda pesa bo kikesa mpi kuzabisa bo nde bo ta samuna ve bo mosi. Beto ta samunaka ti bo. Bo ta sepela mingi na lusadisu yina beto ta pesa bo na bantangu yina bo ke yantika diaka kusamuna nsangu ya mbote. Kana beto ke monisila bampangi yai zola, yo lenda buta mbuma ya mbote na dibundu.
BETO KELE NA MFUNU YA KUMANISA KISALU YINA BO ME PESAKA BETO
19. Inki kele lukanu na beto mpi sambu na nki?
19 Tii nki ntangu beto ta landa kusala kisalu ya kukumisa bantu balongoki? Beto ta landa kusala yo tii na ntwala nde nsuka kukwisa. (Mat. 28:20; tala Lexique, “période finale du monde.”) Keti beto ta landa kuzitisa nsiku yai ya Kristu? Ee, lukanu na beto kele ya kulanda kusala yo. Beto ke pesaka na luzolo yonso ntangu, ngolo mpi bima na beto sambu na kuzwa bantu ya kele ti “nkadilu ya mbote sambu na kubaka luzingu ya mvula na mvula.” (Bis. 13:48) Kana beto ke sala mutindu yina beto ta landa mbandu ya Yezu. Yandi tubaka nde: “Madia na mono kele kusala luzolo ya muntu yina tindaka mono mpi kumanisa kisalu na yandi.” (Yoa. 4:34; 17:4) Yai kele mpi lukanu na beto. Beto ke zolaka kumanisa kisalu yina bo me pesaka beto. (Yoa. 20:21) Beto ke zola nde bampangi yonso mpi bayina ke samunaka diaka ve kulanda kusala kisalu yai ti beto.—Mat. 24:13.
20. Mutindu Bafilipi 4:13 ke monisa yo, nki ta sadisa beto na kusala kisalu yina Yezu me pesaka beto?
20 Yo kele ve pete na kusala kisalu ya nene yina Yezu me pesaka beto. Ata mpidina, beto ke salaka yo ve beto mosi. Yezu tubaka nde yandi ta vanda ti beto. Diaka, beto kele “banduku ya kisalu ya Nzambi” mpi beto ke salaka “kumosi ti Kristu.” (1 Bak. 3:9; 2 Bak. 2:17) Yo yina, beto ta kuka kusala yo. Beto kele na kiese mingi ya kulanda kusala kisalu yai mpi kusadisa bantu ya nkaka na kusala yo.—Tanga Bafilipi 4:13.
NKUNGA 79 Longa Bo na Kutelama Ngolo
^ par. 5 Yezu songaka balongoki na yandi na kukumisa bantu balongoki mpi na kulonga bo na kuzitisa mambu yonso yina yandi songaka bo. Disolo yai ta tubila mutindu beto lenda zitisa bansiku ya Yezu. Bangindu ya nkaka ya disolo yai me katuka na Nzo-zulu ya nkengi ya Yuli 1, 2004 balutiti 25-30.
^ par. 66 NTENDULA YA BIFWANISU: Mpangi-nkento ke longuka Biblia ti longoki, yandi ke tendudila longoki mambu yina yandi fwete sala sambu na kuzola Nzambi mingi. Na nima, longoki ke sadila mambu tatu yina mpangi-nkento songaka yandi.
