1. Jesus okwa lombwela ovahongwa vaye va ninge shike metwokumwe naMateus 28:18-20?

KONIMA eshi Jesus a nyumuka koufi, okwa li e lihololela ovahongwa vaye ovo va li va ongala muGalilea. Okwa li a hala oku va lombwela oshinima sha fimana. Mbela oshinima osho oshike? Oshinima osho otashi hangwa muMateus 28:18-20. — Lesha.

2. Ohatu ka kundafana omapulo elipi?

² Oshipango shaJesus shoku ka ninga ovanhu ovahongwa otashi longo kovapiya aveshe vaJehova kunena. Onghee hano, natu ka kundafaneni omapulo atatu oo a pambafana noshinakuwanifwa osho twa pewa kuJesus. Lotete, kakele kokuhonga ovahongwa vape oiteelelwa yaKalunga, oshike vali twa pumbwa okuninga? Etivali, ongahelipi ovaudifi aveshe meongalo tava dulu okukwafela ovakonakonimbiibeli va kule pamhepo? Etitatu, ongahelipi hatu dulu okukwafela ovaudifi ovo inave lipyakidila vali va dule natango okukufa ombinga moilonga yokuninga ovanhu ovahongwa?

3. Moshipango shaJesus omwa kwatelwa omalombwelo okondadalunde elipi?

³ Omalombwelo aJesus okwa yela filufilu. Otwa pumbwa okuhonga ovanhu oinima oyo e tu lombwela. Onghee hano, natu kaleni tu shii kutya oshilonga osho osha fimana. Jesus ina tya: ‘Va hongeni oinima aishe oyo nde mu lombwela.’ Ndele ponhele yaasho okwa ti: “Va hongeni okudiinina oinima aishe oyo nde mu lombwela.” Opo tu dulike kelombwelo laJesus, otwa pumbwa okuhonga ovakonakonimbiibeli vetu osho ve na okuninga noku va ulikila nghee ve na oku shi ninga. (Oil. 8:31)  Mbela omolwashike twa pumbwa okuninga ngaho?

4. Osha hala okutya ngahelipi okudiinina oshipango? Shi faneka.

⁴ “Okudiinina” oshipango otashi ti okudulika kusho. Opo tu ude ko nawa kutya osha hala okutya ngahelipi okuhonga umwe a diinine ile a dulike koinima aishe oyo twa lombwelwa kuKristus, diladila koshihopaenenwa tashi shikula. Ongahelipi omunhu oo ha hongo ovanhu va shiive okushinga ha kwafele ovahongwa vaye va diinine eemhango domeendjila? Omunhu oo ha hongo ovanhu okushinga tete oku na okukundafana novahongwa eemhango domondjila. Ashike opo a honge ovahongwa vaye va dulike keemhango odo, okwa pumbwa okukatuka natango onghatu imwe. Okwa pumbwa okushinga pamwe nomuhongwa noku mu pa omayele eshi ta shingi nokukendabala okutula moilonga omayele oo. Oshike hatu lihongo moshihopaenenwa osho?

5. (a) Metwokumwe naJohannes 14:15 nosho yo 1 Johannes 2:3, oshike twa pumbwa okuhonga ovakonakonimbiibeli vetu va ninge? (b) Yandja oihopaenenwa oyo hatu dulu okuhonga ovakonakonimbiibeli vetu.

⁵ Ngeenge hatu konakona Ombiibeli navamwe, ohatu va hongo oiteelelwa yaKalunga. Ashike otwa pumbwa okuninga shihapu. Otwa pumbwa okuhonga ovakonakonimbiibeli vetu nghee ve na okutula moilonga oiteelelwa oyo monghedi yavo yokukalamwenyo yakeshe fiku. (Lesha Johannes 14:15; 1 Johannes 2:3.) Pashihopaenenwa, otwa pumbwa okuulikila ovakonakoni vetu okupitila moshihopaenenwa shetu nghee ve na okutula moilonga omafinamhango Ombiibeli ngeenge ve li kofikola, koilonga ile komalihafifo. Ohatu dulu oku va lombwela oimoniwa yomonghalamwenyo yetu yanghee okutula moilonga omayele Ombiibeli shetu amena noku tu kwafela tu ninge omatokolo e li mondjila. Ngeenge tu li novakonakoni vetu ohatu dulu okukala hatu ilikana kuJehova opo omhepo iyapuki i va wilike. — Joh. 16:13.

6. Oshike vali sha kwatelwa mo mokuhonga vamwe va diinine oipango yaJesus?

⁶ Oshike vali sha kwatelwa mo mokuhonga vamwe va diinine oipango yaJesus? Otwa pumbwa okukwafela ovakonakonimbiibeli vetu va kale ve na ehalo lokuninga vamwe ovahongwa. Ovakonakoni vamwe otashi dulika va kale va tila okukufa ombinga moilonga yokuudifa. Onghee hano, otwa pumbwa okukala ovalididimiki eshi hatu va hongo opo va ude ko oinima moule, i hange omitima davo noku ve linyengifa va katuke eenghatu. Oshike hatu dulu okuninga po tu kwafele ovakonakoni vetu va kale ve na ehalo lokuudifila vamwe onghundana iwa?

7. Ongahelipi hatu dulu okukwafela omukonakoni wetu a kale e na ehalo lokuudifila vamwe onghundana iwa?

⁷ Ohatu dulu okupula omukonakonimbiibeli wetu omapulo ngaashi: “Ombiibeli oye ku kwafela ngahelipi u xwepopaleke onghalamwenyo yoye? Mbela oto diladila kutya ope na ovanhu vamwe va pumbwa okuudifilwa etumwalaka eli? Oshike u na okuninga po opo u va kwafele?” (Omayel. 3:27; Mat. 9:37, 38) Ulikila omukonakoni oufo vomOshikefa shetu shOilongifo yOkuhonga noku mu pula a hoolole po ovo ta diladila kutya otava ka kwafela ovapambele vaye, ookaume, ile ovanailonga pamwe naye. Pa omukonakoni oufo vamwe. Liendifei po naye opo u mu honge nghee e na okuyandja oufo ovo noukeka. Oshoshili kutya ngeenge omukonakoni wetu oha udifa ofimbo ina ninga omuudifi ina ninginifwa, ohatu ka kala twa halelela oku mu kwafela. — Omuud. 4:9, 10; Luk. 6:40.

8. Omolwashike sha fimana kovakonakonimbiibeli vetu va kale ve hole Kalunga nosho yo ovanhu vakwao? (Tala yo oshimhungu “ Nghee hatu dulu okukwafela ovakonakonimbiibeli vetu va kale ve hole Kalunga.”)

⁸ Dimbuluka kutya Jesus okwe tu honga tu honge ovanhu va ‘diinine oinima aishe’ oyo e tu  lombwela. Osho osha kwatela mo oipango ivali inene, shokuhola Kalunga nosho yo ovanhu vakwetu, oyo ya pambafana nokuudifa nokuninga ovanhu ovahongwa. (Mat. 22:37-39) Oya pambafana ngahelipi? Efinamhango olo tali ke tu linyengifa tu kufe ombinga moilonga yokuudifa, ohole yetu yokuhola Kalunga nosho yo ovanhu vakwetu. Ovakonakonimbiibeli vamwe otashi dulika va kale va tila okuudifa omolwoumbada. Ashike ohatu dulu oku va shilipaleka kutya Jehova ote ke va kwafela va finde oumbada wokutila ovanhu mokweendela ko kwefimbo. (Eps. 18:1-3; Omayel. 29:25) Oshimhungu osho sha pamba oshitukulwa eshi osha popya eenghatu odo hatu dulu okukatuka, opo tu kwafele omukonakoni a kulike ohole yokuhola Kalunga. Kakele kaasho, oshike eongalo tali dulu okuninga po opo li kwafele ovahongwa vape va kulike ohole?

9. Mefaneko li na sha nomuhongwa oo ta hongwa okushinga, omeenghedi dilipi omuhongwa he lihongo oilihongomwa ya fimana?

⁹ Diladila vali kefaneko lomunhu oo ta hongwa okushinga. Omeenghedi dilipi te lihongo eshi ta shingi pamwe nomuhongi waye? Omokupwilikina komuhongi waye nokutala kovashingi vakwao. Pashihopaenenwa, omuhongi waye ota dulu oku mu ulikila kovashingi vamwe ovo tava pitike vamwe va pite komesho yaye. Ile ota dulu oku mu ulikila omushingi oo ina tema omalamba aye a pwa ko opo aha twiye ovashingi vakwao. Oihopaenenwa oyo otai ka kwafela oo ta hongwa okushinga opo a mone oilihongomwa ya fimanenena.

10. Oshike tashi ka kwafela omukonakonimbiibeli a ninge exumokomesho?

¹⁰ Sha faafana, omukonakonimbiibeli ihe lihongo ashike kwaao te mu hongo, ndele ohe lihongo yo koihopaenenwa iwa yovapiya vaJehova. Oshike tashi ka kwafela unene ovakonakonimbiibeli va ninge exumokomesho lopamhepo? Omokukala pokwoongala kwopaKriste. Omolwashike mbela? Osho have lihongo ko ohashi va kwafele va hapupalife eshiivo lavo, hashi pameke eitavelo lavo nohashi kulike ohole yavo yokuhola Kalunga. (Oil. 15:30-32) Shimwe vali, oo ha konakona naye ohe mu shiivififa kovamwatate novamwameme ovo va enda meenghalo da fa daye. Omukonakoni ota ka mona oihopaenenwa iwa yovamwatate novamwameme yokuulikilafana ohole meongalo. Natu ka taleni keenghalo edi tadi shikula.

11. Oihopaenenwa ilipi tashi dulika omukonakoni a didilika meongalo oyo tai dulu oku mu kuma?

¹¹ Omukonakonimbiibeli oo ta tekula ounona oye aeke, okwa mona omumwameme Omukriste oo e li monghalo ya fa yaye. Osha kuma omutima womukonakoni eshi a mona eenghendabala odo omumwameme ha ningi opo e uye kOlupale lOuhamba pamwe nounona vaye vanini. Omukonakoni oo ta kondjo nokweefa po okushila omakaya oha endafana pamwe nomuudifi oo a li ta kondjo nonghalo ya fa yaye, ndele okwe i finda. Omuudifi okwa lombwela omukonakoni waye nghee ohole yaye yokuhola Jehova ya enda tai kulu noye mu linyengifa a dulike koipango yaKalunga. (2 Kor. 7:1; Fil. 4:13) Konima eshi omukonakoni a pwilikina koshimoniwa shopaumwene shomuudifi, oshe mu twa omukumo neenghono. Opo nee omuudifi okwe mu shilipaleka ta ti: “Naave oto dulu okweefa po okushila omakaya.” Omukainhu omunyasha, oo e li omukonakonimbiibeli, okwa didilika omumwameme omunyasha oo ta hafele onghalamwenyo e li Ondombwedi. Osho omukonakonimbiibeli a didilika shi na sha nehafo lomumwameme oo omunyasha oshe mu linyengifa a kale a hala okumona kutya omolwashike omumwameme oo a kala alushe a hafa.

12. Omolwashike hatu dulu okutya keshe umwe meongalo ota dana onghandangala mokukwafela ovakonakonimbiibeli?

¹² Ngeenge ovakonakonimbiibeli ova shiiva ovaudifi ovadiinini va yoolokafana, otave ke  lihonga koihopaenenwa yavo kutya osha hala kutya shike okudiinina oshipango shaKristus shi na sha nokuhola Kalunga novanhu vakwao. (Joh. 13:35; 1 Tim. 4:12) Ndele ngaashi sha popiwa metetekelo, omukonakonimbiibeli ota dulu okulihonga kovaudifi ovo tava ungaunga nomashongo oo a taalela. Omukonakoni ote ke lihonga koihopaenenwa oyo, opo a dule okuninga omalunduluko oo a pumbiwa noku ninge omuhongwa waKristus. (Deut. 30:11) Keshe umwe meongalo ota dulu okukwafela ovakonakonimbiibeli meenghedi di lili noku lili va ninge exumokomesho lopamhepo. (Mat. 5:16) Mbela eenghendabala dilipi ho ningi pauhandimwe opo u twe omukumo ovakonakonimbiibeli ovo have uya kokwoongala?

13-14. Jesus okwa li ha ungaunga ngahelipi novayapostoli vaye ovo va teka omukumo?

¹³ Otwa hala okukwafela ovamwatate novamwameme ovo inave lipyakidila vali va kale hava udifa nokuninga ovanhu ovahongwa. Onghedi yaJesus yokuungaunga novayapostoli vaye ngeenge va li va teka omukumo otai tu ulikile osho tu na okuninga kunena.

¹⁴ Pexulilo loukalele waJesus wokombada yedu diva fimbo ina fya, ovayapostoli ‘aveshe ova li ve mu fiya po, va ya onhapo.’ (Mark. 14:50; Joh. 16:32) Jesus okwa li a ungaunga ngahelipi novayapostoli vaye eshi va li va teka omukumo? Diva konima yenyumuko laye, okwa li a lombwela vamwe vomovashikuli vaye ta ti: “Inamu tila! Indeni mu ka lombwele ovamwatate [kutya onda nyumuka].” (Mat. 28:10a) Jesus ka li a efa po ovayapostoli vaye. Nonande ova li ve mu fiya po, okwa li e va ifana ‘ovamwaxe.’ Ngaashi Jehova, Jesus naye omunanghenda noha dimine po ovanhu. — 2 Eeh. 13:23.

15. Otu uditile ngahelipi ovo va efa po okuudifa?

¹⁵ Nafye otu na ko nasha neenghono naavo va efa po okuudifa. Ove li ovamwatate novamwameme, notu va hole. Ohatu dimbuluka natango oilonga youdiinini oyo ovamwatate novamwameme ovo va longela Jehova. Vamwe womuvo ova longela Jehova noudiinini oule womido. (Heb. 6:10) Otwe va djuulukwa neenghono. (Luk. 15:4-7) Ngaashi Jesus, ongahelipi hatu dulu oku va ulikila kutya otu na ko nasha navo shili?

16. Ongahelipi hatu dulu okuulika kutya otu na ko nasha novamwatate novamwameme ovo inave lipyakidila vali?

¹⁶ Va shiva pahole kokwoongala. Onghedi imwe omo Jesus a li ha tu omukumo ovayapostoli vaye ovo va wililwa po omoku va shiva kokwoongala. (Mat. 28:10b; 1 Kor. 15:6) Sha faafana, nokunena ohatu dulu okutwa omukumo ovo inave lipyakidila vali moku va shiva kokwoongala ngeenge ihave u ya ko. Omafimbo amwe otashi dulika twa pumbwa oku va shiva lwoikando opo ve uye kokwoongala. Nopehe na omalimbililo, Jesus okwa li a hafa eshi ovayapostoli va tambula ko eshivo laye. — Yelekanifa naMateus 28:16 nosho yo Lukas 15:6.

17. Ohatu ke linyenga ngahelipi ngeenge umwe oo ine lipyakidila vali okwe uya kokwoongala?

¹⁷ Natu va hambelele nohamu. Jesus okwa li ha ningifa ovahongwa vaye va kale ve udite va tambulwa ko ngeenge ve uya pokwoongala, mokukatuka eenghatu aye kuvo nokupopya navo. (Mat. 28:18) Ohatu ke linyenga ngahelipi ngeenge umwe oo ine lipyakidila vali okwe uya kOlupale lOuhamba? Otwa pumbwa okukatuka eenghatu tu mu hambelele nohamu. Potete, otashi dulika tuha kale tuhe shii kutya natu tye shike. Ndele opo tu mu kwafele a kale a manguluka, ohatu dulu ashike okutya, otwa hafa oku ku mona.

18. Ongahelipi hatu dulu okutwa omukumo ovaudifi ovo inave lipyakidila vali?

¹⁸ Va twa omukumo. Ovahongwa vaJesus otashi dulika va li va wililwa po kelombwelo laJesus loku ka udifa mounyuni aushe. Jesus okwa  shilipaleka ovashikuli vaye a ti: “Ondi li pamwe nanye alushe.” (Mat. 28:20) Mbela eladipiko laye ola li ngoo le va kwafela? Heeno. Diva konima yaasho, ova kala ve lipyakidila ‘nokuhonga ovanhu noku va udifila onghundana iwa.’ (Oil. 5:42) Ovaudifi ovo inave lipyakidila vali navo ova pumbwa etwomukumo. Otashi dulika va kale va tila okuudifa vali. Ohatu dulu oku va shilipaleka kutya itava ka udifa ovo aveke. Ngeenge ova hala vali okuudifa ohatu dulu okuya pamwe navo moukalele. Nopehe na omalimbililo, otava ka pandula ekwafo letu eshi tava ka hovela vali okuudifa onghundana iwa. Ngeenge otwa kala hatu tale ko nokuungaunga naavo inave lipyakidila vali ve li ovamwatate novamwameme, otava ka kala ve lipyakidila vali, naasho otashi ka hafifa eongalo alishe.

19. Oshike osho twa halelela okuninga, nomolwashike?

¹⁹ Otu na okutwikila okuudifa nokuninga ovanhu ovahongwa fiyo onaini? Otu na okutwikila fiyo exulilo lounyuni ou. (Mat. 28:20) Mbela ohatu ka dula okutwikila okuudifa fiyo opefimbo olo? Otwa tokola toko okuninga ngaho! Ohatu yambe po efimbo letu, eenghono detu nosho yo oiniwe yetu opo tu konge ovo “va halelela shili omwenyo waalushe.” (Oil. 13:48) Ngeenge hatu ningi ngaho, ohatu shikula oshihopaenenwa shaJesus. Okwa ti: “Oikulya yange oyo okulonga ehalo laau a tuma nge nokumanifa oshilonga shaye.” (Joh. 4:34; 17:4) Nafye otwa halelela okuninga ngaho. Otwa hala okumanifa oshilonga osho twe lineekelelwa. (Joh. 20:21) Otwa hala yo vakwetu, mwa kwatelwa ovo inave lipyakidila vali ve lididimikile oshilonga eshi pamwe nafye. — Mat. 24:13.

20. Metwokumwe nOvafilippi 4:13, omolwashike hatu dulu okumanifa oshilonga osho Jesus e tu lombwela tu ninge?

²⁰ Kashipu okuwanifa po oshilonga osho Jesus e tu lombwela tu longe. Kakele kaasho, itatu shi longo ofye atuke. Jesus okwa udaneka kutya ota ka kala pamwe nafye. Ohatu wanifa po oshilonga shokuninga ovanhu ovahongwa tu li “ovalongi pamwe naKalunga” nohatu ‘longo pamwe naKristus.’ (1 Kor. 3:9; 2 Kor. 2:17) Onghee hano, ohatu dulu okupondola. Kashi fi tuu oufemba noshihafifa okulonga oshilonga osho, nokukwafela vamwe ve shi wanife po! — Lesha Ovafilippi 4:13.