1. Ль гора Мәтта 28:18-20, Иса Мәсиһ чь тʹәми да?

ПАШИ кӧ Иса Мәсиһ жь мьрьне рʹабу, әԝ ль Щәлиле жь шагьртед хԝәрʹа хӧйа бу. Әԝи дьхԝәст тьштәки фәрз ԝанрʹа бежә. Гәло чь? Жь кʹәрәма хԝәрʹа, Мәтта 28:18-20 бьхунә.

2. Әме дәрһәԛа кʹижан пьрса хәбәр дьн?

² Гәрәке әм жи ве рʹебәрийа Иса Мәсиһ пек биньн. Хенщи ве йәке кӧ әм шагьртед хԝә һин бькьн кӧ хԝәстьна Хԝәде чь йә, гәрәке әм чь бькьн? Һʹәму мьзгинван чаԝа дькарьн али хԝәндәкʹаред Кʹьтеба Пироз бькьн кӧ әԝ дь рʹийа рʹастийеда пешда һәрʹьн? У әм чаԝа дькарьн али хушк у бьред нәактиф бькьн, ԝәки әԝана дь ише шагьрткьрьнеда диса тʹәви мә һәвкʹарийе бькьн? Ве готареда, әме дина хԝә бьдьн ван се пьрса.

3. Иса Мәсиһ чь рʹебәри дайә мә?

³ Ль гора рʹебәрийа Иса Мәсиһ, гәрәке әм мәрьварʹа зәлал шьровәкьн кӧ тʹәмийед Иса чь нә. Ле гәло әв бәс ә? Иса Мәсиһ ӧса гот: «Ԝан һʹәму тʹәмийед кӧ мьн данә ԝә мьләта һин кьн, ԝәки әԝ хԝәй кьн». Бәле, ль гора готьнед Иса Мәсиһ, лазьм ә кӧ әм мәрьва һин бькьн кӧ гәрәке әԝ чь бькьн у чаԝа (Кʹар. Шанд. 8:31).

4. Чьма фәрз ә кӧ әм мәрьва һин бькьн ԝәки әԝ тʹәмийед Иса «хԝәй кьн»?

⁴ Чьма фәрз ә кӧ әм мәрьва һин бькьн, ԝәки әԝ  тʹәмийед Иса Мәсиһ «хԝәй кьн»? Ве мәсәле бинә бәр чʹәʹве хԝә: Дәрсдаре ажованийе шагьртед хԝә чаԝа һин дькә? Йа пешьн, әԝ бәлки бь сайа дәрсед теорик ԛанунед трафике ԝана һин дькә. Ле паше, гәрәке әԝ ль сәр рʹе нишани ԝан бькә кӧ әԝ чаԝа дькарьн әʹрәбәйе ль гора ван ԛанунед трафике бажон. Әв мәсәлә чь мә һин дькә?

5. (а) Ль гора Йуһʹәнна 14:15 у 1 Йуһʹәнна 2:3, гәрәке әм хԝәндәкʹаред хԝә һин бькьн кӧ әԝ чь бькьн? (б) Әм чаԝа дькарьн али хԝәндәкʹаред хԝә бькьн кӧ әԝ ль гора принсипед Кʹьтеба Пироз бьжин?

⁵ Гава әм һинбуна Кʹьтеба Пироз тʹәви мәрьва дәрбаз дькьн, әм ԝана һин дькьн кӧ Хԝәде чь жь мә дәʹԝа дькә. Ле әв бәс нинә. Гәрәке әм ӧса жи хԝәндәкʹара һин бькьн кӧ әԝ чаԝа дькарьн ль гора Кʹьтеба Пироз бьжин (Йуһʹәнна 14:15; 1 Йуһʹәнна 2:3 бьхунә). Бь рʹабун у рʹуньштьна хԝә, әм дькарьн нишани ԝан бькьн кӧ әԝ чаԝа дькарьн принсипед сәрәкә йед Кʹьтеба Пироз һʹәму алийед жийана хԝәда пек биньн. Мәсәлә, әм дькарьн ԝанрʹа бәʹса сәрһатикә хԝә бькьн, йа кӧ нишан дькә кӧ пеканина рʹебәрийа Кʹьтеба Пироз әм чаԝа парастьнә, йан жи али мә кьрийә кӧ әм сафикьрьнәкә баш бькьн. Ӧса жи, әм дькарьн ль бәр хԝәндәкʹаред хԝә дӧа бькьн кӧ рʹӧһʹе пироз рʹебәрийа ԝан бькә (Йуһʹн. 16:13).

6. Әм чаԝа дькарьн мәрьва һин бькьн кӧ әԝ тʹәмийед Иса Мәсиһ пек биньн?

⁶ Сәва кӧ әм мәрьва һин бькьн кӧ әԝ тʹәмийед Иса Мәсиһ пек биньн, гәрәке әм чь бькьн? Гәрәке әм али хԝәндәкʹаред хԝә бькьн кӧ хԝәстьна ԝан пешда бе, ԝәки әԝана жи мәрьва бькьн шагьрт. Һьнә хԝәндәкʹар дьфькьрьн кӧ әԝ нькарьн мьзгине бәла бькьн. Ләма, гәрәке әм бь сәбьр али ԝан бькьн кӧ әԝ рʹастийа Кʹьтеба Пироз һе баш фәʹм бькьн у баԝәрийа хԝә ве биньн. Гава хәбәра Кʹьтеба Пироз дьле ԝан бьгьрә, әԝе жи бьхԝазьн кәсед дьнрʹа бәʹса ве хәбәре бькьн. Гәло әм чаԝа дькарьн хԝәстьна хԝәндәкʹаред хԝә зедә бькьн, кӧ әԝана жи мьзгине бәла бькьн?

7. Әм чаԝа дькарьн хԝәстьна хԝәндәкʹаред хԝә зедә бькьн, ԝәки әԝ кәсед дьнрʹа бәʹса мьзгине бькьн?

⁷ Жь хԝәндәкʹаре хԝә бьпьрсә: «Мьзгина Пʹадшатийе ль сәр жийана тә чаԝа һʹӧкӧм кьрийә? Бь дитьна тә, гәло кәсед дьн жи һʹәԝщә нә кӧ ве мьзгине бьбьһен? Тӧ чаԝа дькари али ԝан бьки?» (Мәтʹлк. 3:27; Мәт. 9:37, 38) Бәлавокед мә нишани хԝәндәкʹар бькә у жь ԝи бьпьрсә кʹа кʹижане бона мәрьв, һәвал йан һәвалкʹаред ԝи ԝе баш бә. Чәнд бәлавока бьдә ԝи, у ԝи һин бькә кӧ әԝ чаԝа дькарә ван бәлавока бь мәʹрифәти пʹешкʹеши мәрьва бькә. Паши кӧ хԝәндәкʹаре мә бьбә мьзгинванәки нәньхӧманди, һьлбәт лазьм ә кӧ әм тʹәви ԝи хьзмәт бькьн у али ԝи бькьн (Ԝаиз 4:9, 10; Луԛа 6:40).

8. Чьма фәрз ә кӧ хԝәндәкʹаред мә Хԝәде у инсана һʹьз бькьн? (Ӧса жи чаргошә бь наве « Дьле Хԝәндәкʹарада Һʹьзкьрьна Хԝәде Мәзьн Бькә» бьньһерʹә.)

⁸ Бир нәкә кӧ Иса Мәсиһ готьбу кӧ гәрәке әм «һʹәму тʹәмийед» кӧ әԝи дайә мә, мәрьва һин бькьн. Дь нав ван тьштада, тʹәмийед һәри мәзьн жи һьлбәт һәнә – кӧ гәрәке әм Хԝәде у инсана һʹьз бькьн. Әв һәр дӧ тʹәми жи бь ише бәлакьрьна мьзгине у ише шагьрткьрьнева гьредайи йә (Мәт. 22:37-39).  Гәло чьма? Чьмки йәк жь сәбәбед һәри мәзьн кӧ әм мьзгине бәла дькьн әв ә, кӧ әм Хԝәде у мәрьва һʹьз дькьн. Һьнә хԝәндәкʹаред Кʹьтеба Пироз дьтьрсьн мьзгине бәла бькьн. Ле бәле, әм дькарьн ԝана бьдьн баԝәр кьрьн кӧ бь аликʹарийа Йаһоԝа, әԝе ԝәʹдә шунда жь ве тьрсе бьфьльтьн (Зәб. 18:1-3; Мәтʹлк. 29:25). Чаргошә бь наве «Дьле Хԝәндәкʹарада Һʹьзкьрьна Хԝәде Мәзьн Бькә» нишан дькә, кӧ әм чаԝа дькарьн али хԝәндәкʹаред хԝә бькьн, ԝәки һʹьзкьрьна Хԝәде дьле ԝанда мәзьн бьбә. Ле щьват чаԝа дькарә али шагьртед ну бькә кӧ һʹьзкьрьна ԝан һе мәзьн бьбә?

9. Мәсәла шагьрте ажованийе чь мә һин дькә?

⁹ Мәсәла шагьрте ажованийе диса бинә бәр чʹәʹве хԝә. Гава шагьрт тʹәви дәрсдаре хԝә әʹрәбәйе дьажо, әԝ чь һин дьбә? Мәсәлә, дәрсдар дьбәкә дина ԝи бькʹьшинә сәр ажованәки дьн, йе кӧ рʹе дьдә ԝи. Йан жи, әԝ бәлки дина шагьрт бькʹьшинә сәр ажованәки кӧ шәԝԛа фаред әʹрәбәйа хԝә кем дькә, ԝәки ажованед дьн әʹщьз нәкә. Мәсәлед ӧса пʹьрʹ фәрз ьн кӧ шагьрт ажованийе рʹьнд һин бьбә.

10. Чь ԝе али хԝәндәкʹарәки бькә, кӧ әԝ рʹӧһʹанида пешда һәрә?

¹⁰ Мина ве йәке, хԝәндәкʹаред Кʹьтеба Пироз жи, йед кӧ дәстпедькьн сәр рʹийа жийане бьмәшьн, нә тʹәне жь дәрсдаре хԝә, ле жь мәсәлед хушк у бьред дьн жи һин дьбьн. Ләма, сәва кӧ хԝәндәкʹаред Кʹьтеба Пироз жь алийе рʹӧһʹанива пешда һәрʹьн, пʹьрʹ фәрз ә кӧ әԝ бен щьвина. Гәло чьма? Һинкьрьн кӧ ль щьвина те дайин ԝе занәбуна ԝан зедә бькә, баԝәрийа ԝан һе ԛәԝи бькә у али ԝан бькә кӧ әԝ һе зедә Хԝәде һʹьз бькьн (Кʹар. Шанд. 15:30-32). Ӧса жи, ль щьвина дәрсдар дькарә хԝәндәкʹаре хԝә жь хушк у бьред дьнрʹа бьдә нас кьрьн, йед кӧ рʹасти әʹйни проблема һатьбун. Гәло хԝәндәкʹар чаԝа дькарә һʹьзкьрьна шагьртед Иса Мәсиһ щьватеда бьвинә?

11. Мәсәлед хушк у бьра чаԝа дькарьн ль сәр хԝәндәкʹара һʹӧкӧм бькьн?

¹¹ Ван мәсәла бинә бәр чʹәʹве хԝә: (1) Ль щьвине, хԝәндәкʹарәк рʹасти хушкәке те, йа кӧ мина ԝе зарʹед хԝә тʹәне мәзьн дькә. Әв йәк кӧ хушка мә пʹьрʹ хирәт дькә кӧ тʹәви зарʹед хԝә йед бьчʹук бе щьвина, дьле  хԝәндәкʹаре дьгьрә. (2) Хԝәндәкʹарәки кӧ дьхԝазә щьхарә бьтʹәрькинә рʹасти бьраки те, йе кӧ ԝәк ԝи сәр хԝә дьхәбьти, у тʹәрк да. Әв бьра ԝе хԝәндәкʹаре тәрʹа бежә кӧ һʹьзкьрьна Йаһоԝа чаԝа али ԝи кьрьбу кӧ әԝ гӧһ бьдә ԛанунед Хԝәде (2 Корн. 7:1; Фили. 4:13).  Бьра хԝәндәкʹаре тәрʹа бәʹса сәрһатийа хԝә бькә у бежә: «Чаԝа кӧ мьн тʹәрка щьхарәйе дайә, тӧ жи дькари бьтʹәркини». Әв йәк ԝе мерхасийе бьдә хԝәндәкʹаре тә. (3) Хԝәндәкʹарәкә щаһьл рʹасти хушкәкә щаһьл те, йа кӧ жь жийана хԝә пʹьрʹ шабуне дьстинә. Жь бәр кӧ хушка мә һәртʹьм дьлша йә, хԝәндәкʹар дьхԝазә мәʹнийед шабуна ԝе пебьһʹәсә.

12. Ль щьвате, һәр кәс чаԝа дькарә али хԝәндәкʹаред Кʹьтеба Пироз бькә?

¹² Гава хԝәндәкʹаред Кʹьтеба Пироз щурʹә-щурʹә мьзгинванед амьн нас дькьн, мәсәлед ԝан дькарьн ԝана һин бькьн, кӧ әԝ чаԝа дькарьн ль гора тʹәмийа Иса кӧ Хԝәде у инсана һʹьз бькьн, бьжин (Йуһʹн. 13:35; 1 Тимтʹ. 4:12). Хенщи ве йәке, чаԝа әм пеһʹәсийан, хԝәндәкʹаред мә дькарьн жь мьзгинванед  кӧ мина ԝан рʹасти проблема һатьбун, мерхасийе бьстиньн. Мәсәлед ӧса нишани хԝәндәкʹара дькьн кӧ әԝ жи дькарьн жийана хԝә бьгӧһезьн у бьбьн шагьртед Иса Мәсиһ (Ԛан. Дщр. 30:11). Һʹәму хушк у бьра дькарьн щурʹә-щурʹә алийава али хԝәндәкʹара бькьн кӧ әԝ жь алийе рʹӧһʹанива пешда һәрʹьн (Мәт. 5:16). Гава хԝәндәкʹаред хушк у бьрайед дьн тен щьвина, гәло тӧ хирәт дьки кӧ ԝана һелан бьки?

13-14. Гава шандийед Иса Мәсиһ дьлтәнг бун, әԝи диса жи ль ԝан чаԝа дьньһерʹи?

¹³ Әм дьхԝазьн али хушк у бьред нәактиф бькьн, ԝәки әԝана диса дәстпекьн мьзгине бәла бькьн. Әв йәк кӧ Иса Мәсиһ чаԝа али шандийед хԝә дькьр нишани мә дькә, кӧ әм чаԝа дькарьн али кәсед нәактиф бькьн.

¹⁴ Ль хьлазийа хьзмәта Иса Мәсиһ йа ль сәр әʹрде, чәнд сьһʹәт пешийа кӧ әԝ һат кӧштьне, һʹәму шандийа әԝ «һьшт у рʹәвин» (Марԛ. 14:50; Йуһʹн. 16:32). Гава шандийед Иса Мәсиһ жь бо дәмәке сьст бун, әԝи чь кьр? Паши кӧ Иса жь мьрьне рʹабу, әԝи һьнә шагьртед хԝәрʹа ӧса гот: «Нәтьрсьн! Һәрʹьн бежьнә бьред мьн, кӧ [әз рʹабумә]» (Мәт. 28:10а). Иса һевийа хԝә жь шандийа нәбьри. Рʹаст ә ԝана Иса һиштьн, ле әԝи ԝанрʹа гот «бьред мьн». Мина Йаһоԝа, Иса Мәсиһ жи йәки рʹәʹм бу у дьбахшандә мәрьва (2 Пʹадш. 13:23).

15. Әм ль кәсед кӧ хьзмәте данә сәкьнандьне чаԝа дьньһерʹьн?

¹⁵ Мина ве йәке, һәрге жи һьнә кәс хьзмәте данә сәкьнандьне, әм диса жи бона ԝана хәм дькьн. Әԝана диса жи хушк у бьред мә нә, у әм ԝана һʹьз дькьн! Әм кʹәда ԝан бир накьн. Һьнә жь ԝан гәләк сала бь дьл у щан бона Йаһоԝа хьзмәт кьрьбун (Ибрн. 6:10). Әм бь рʹасти жи бира ԝан дькьн! (Луԛа 15:4-7) Мина Иса Мәсиһ, әм чаԝа дькарьн нишан бькьн кӧ әм бона ԝана хәм дькьн?

16. Әм чаԝа дькарьн нишан бькьн кӧ әм бона хушк у бьред нәактиф хәм дькьн?

¹⁶ Ԝана бь дьлгәрми тʹәглифи щьвина бькә. Иса Мәсиһ щурʹә-щурʹә алийада мерхаси да шандийед хԝә йед дьлтәнг. Мәсәлә, әԝи әԝана гази щьвинәкә мәхсуси кьрьн (Мәт. 28:10б; 1 Корн 15:6). Иро жи, ԝе баш бә кӧ әм кәсед нәактиф гази щьвина бькьн. Бәлки лазьм бә кӧ әм ԝана чәнд щара тʹәглиф бькьн һʹәта кӧ әԝ бьхԝазьн бен. Иса Мәсиһ бешьк ша бу кӧ шагьртед ԝи һатьн ԝе щьвине (ль Мәтта 28:16 у Луԛа 15:6 жи бьньһерʹә).

17. Гава кәсед нәактиф тен щьвина, гәрәке әм чь бькьн?

¹⁷ Ԝана жь дьл сьлав бькә. Гава Иса Мәсиһ тʹәви шагьртед хԝә тʹоп бу, әԝи гава пешьн авит кӧ ԝанрʹа хәбәр дә (Мәт. 28:18). Ԝәхта кӧ кәсәки нәактиф те Ода щьвате, гәрәке әм чь бькьн? Ԝе баш бә кӧ әм незики ԝи бьн у ԝи жь дьл сьлав бькьн. Һәгәр әм ньзаньн кӧ чь бежьн, әм дькарьн тʹәне бежьн кӧ әм чьԛас ша нә кӧ әԝ һатийә.

18. Әм чаԝа дькарьн мерхасийе бьдьн мьзгинванед нәактиф?

¹⁸ Мерхасийе бьдә ԝан. Гава Иса Мәсиһ шагьртед хԝәрʹа гот кӧ гәрәке әԝана мьзгине ль сәр тʹәмамийа дьнйайе бәла бькьн, дьбәкә әԝана дьфькьрин кӧ ԝе нькарьбьн ви иши бькьн. Ле бәле, Иса бь ван готьна мерхаси  да ԝан: «Әз ирода тʹьме . . . тʹәви ԝә мә!» (Мәт. 28:20) Гәло готьнед ԝи ль сәр ԝан чаԝа һʹӧкӧм кьр? Пʹьрʹ ԝәхт дәрбаз нәбу кӧ ԝана бәлакьрьна мьзгине дәстпекьр (Кʹар. Шанд. 5:42). Гәләк фәрз ә кӧ әм жи мерхасийе бьдьн мьзгинванед нәактиф. Әԝана бәлки дьтьрсьн кӧ диса тʹәзәда бәлакьрьна мьзгине дәстпекьн. Әм дькарьн ԝанрʹа бежьн кӧ гава әԝана бьхԝазьн дәркʹәвьн хьзмәте, әме һазьр бьн тʹәви ԝан һәрʹьн. Әԝе бешьк аликʹарийа мә ԛимәт бькьн. Һәгәр әм кәсед нәактиф ча хушк у бьред хԝә һʹәсаб кьн у һьндава ԝанда дьлгәрм бьн, әԝе бәлки диса бәлакьрьна мьзгине дәстпекьн, у щьват ԝе пʹьрʹ ша бә.

19. Хԝәстьна мә чь йә, у чьма?

¹⁹ Ише һазьркьрьна шагьрта ԝе һʹәта кʹәнге бәрдәԝам бьбә? Һʹәта хьлазийа ве систәме (Мәт. 28:20). Гәрәке әм чь жь дәсте мә те бькьн кӧ ви тʹәмийа Иса Мәсиһ биньн сери. Әм ԝәхт, ԛәԝат у пʹәре хԝә бь рʹәзәдьли хәрщ дькьн, ԝәки кәсед кӧ дьле ԝан бона жийана һәрһәйи һазьр ә бьвиньн (Кʹар. Шанд. 13:48). Бь ви аԝайи, әм Иса Мәсиһ хԝәрʹа дькьн мәсәлә. Әԝи гот: «Хԝарьна мьн әԝ ә, кӧ әз хԝәстьна ԝи йе кӧ әз шандьмә бькьм у кʹаред ԝи пек биньм» (Йуһʹн. 4:34; 17:4). Әм жи жь дьл дьхԝазьн ише кӧ мәрʹа һатийә дайин, пек биньн (Йуһʹн. 20:21). Хԝәстьна мә әв ә кӧ кәсед нәактиф жи дь ви ишида тʹәви мә бьхәбьтьн (Мәт. 24:13).

20. Ль гора Филипи 4:13, әм чаԝа дькарьн ише кӧ Иса Мәсиһ дайә мә пек биньн?

²⁰ Пеканина тʹәмийа Иса Мәсиһ һьлбәт һеса нинә. Ле бәле, әм дь ви ишида тʹәне ниньн. Иса соз дайә кӧ әԝ ԝе тʹәви мә бә. Дь ише шагьрткьрьнеда, әм тʹәви Хԝәде у Иса Мәсиһ һәвкʹарийе дькьн (1 Корн. 3:9; 2 Корн. 2:17). Бәле, әм дькарьн ви иши пек биньн. Чь ԛәдьрәки мәзьн ә кӧ әм ви шьхӧли тиньн сери у дькарьн али кәсед дьн бькьн, ԝәки әԝ жи дь ише Хԝәдеда тʹәви мә һәвкʹарийе бькьн! (Филипи 4:13 бьхунә)