1. Ngoku kiri omu Matayo 28:18-20, ni kihano kyahi ekyo Yesu aha?

YESU abere abirilhubuka, mwabuthukira okwa bigha biwe ababya bahindene e Galilaya. Abya awithe omwatsi mukulhu w’eribabwira. Abya mwatsiki? Ebinywe biwe biri omu Matayo 28:18-20.​—Soma.

2. Ni bibulyo byahi ebyo thukendi kaniako?

² Ekihano kya Yesu eky’eriyira abigha kikahamba n’okwa buli mughombe wa Nyamuhanga munabwire. Busana n’ekyo, thukanaye okwa bibulyo bisathu ebihambire okwa mubiiri ogho Yesu abirithuhererya. Eky’erimbere, eryongera okw’ikangirirya abigha bahyaka ebihano bya Nyamuhanga, ni byahi ebyo thutholere ithwakolha? Ekyakabiri, abathuliri abosi omwa kithunga banga wathikya bathi abigha be Biblia erikulha-kulhana bunyakirimu? Ekyakasathu, thwanga wathikya thuthi abikirirya balikyethu ababirisebebera erithasyasangira omwa mubiiri w’eriyira abigha?

3. Ekihano kya Yesu muli erikolhaki?

³ Ebihano bya Yesu bilhangirikire ndeke-ndeke. Thutholere ithwakangirirya abandu ebyo alhaghira. Aliwe, sithutholere thuk’ibirirwa enzumwa ngulhu. Yesu mwathabugha athi: ‘Mukangirirayebo ebyosi ebyo nabiribahana.’ Aliwe, mwabugha athi: Mukangirirayebo ‘bakole ebyosi ebyo nabiribahana.’ Erighendera okwa busondoli obo thukakangirirya omwigha we Biblia, thutholere ithwabya bakangirirya kandi basondoli. Busana naki ekyo kitholere?

4. Erikolha ekihano likamanyisayaki? Iha eky’erileberyako.

 ⁴ Hano ‘erikolha’ ekihano ly’erikighenderako. Eriminya ngoku thwanga kangirirya omundu erikolha, kutse erighendera okwa bya Kristo ahana, thulengekanaye okwa ky’erileberyako kino. Oyuk’eghesaya abandu erighendya ematoka angabakangirirya athi erikwama ebilhaghiro by’enguda? Anganatsuka eribakangirirya ebilhaghiro ebyo. Aliwe, hane ekindi ekyo atholere iniakolha erithoka eribakangirirya ngoku banga kwama ebilhaghiro ebyo. Atholere iniabya n’omwigha omwa matoka erisondolha omwigha akaghendya n’erighendera okwa by’ak’igha. Eky’erileberyako ekyo kikathweghesayaki?

5. (a) Ngoku kiri omu Yoane 14:15 na 1 Yoane 2:3, ni byahi ebyo thutholere erikangirirya abigha bethu erikolha? (b) Thwanga wathikya thuthi abigha erighendera okwa misingyi ye Biblia?

⁵ Thukabya thuk’eghesya abandi be Biblia, thukabakangirirya ebyo Nyamuhanga anzire ithwakolha. Aliwe ni bingyi ebyo thutholere ithwakolha. Thutholere ithwakangirirya abigha bethu be Biblia ngoku banga ghendera okwa byo bak’igha omwa ngebe yabu eya buli kiro. (Soma Yoane 14:15; 1 Yoane 2:3.) Omwa bya thukakolha, thwangana kangania abigha bethu ngoku banga ghendera okwa ebyo bak’igha ibane okwa sukuru, okwa mubiiri, kutse bakayitsemesya. Thwangana babwira okwa kyathubereko eribakangania ngoku erighendera okwa busondoli bwe Biblia mukyathutheya okwa kabi kutse ngoku mukyathuwathikya erithwamu ndeke. Ithune n’abigha bethu, thwangana saba Yehova thuthi abasondole omwa mulimu wiwe abuyirire.​—Yn. 16:13.

6. Erikangirirya abandi erikolha ebyo Yesu ahana mwamuliki?

⁶ Erikangirirya abandi erikolha ebyo Yesu ahana mwamuliki? Thutholere ithwawathikya abigha bethu be Biblia eribya n’eriyisunza ly’eriyira abigha. Abandi bigha, banganasagha erisangira omwa mubiiri w’erithulira. Neryo thutholere ithwaghumisirizya thukabaha obusondoli obukendi bawathikya lyolho-lyolho eriyitheghererya, obwanga bahika okwa mithima, n’eribahira mw’omuhwa w’eriyira eky’erikolha. Ni byahi ebyo thwanga kolha eriwathikya abigha eribya n’eriyisunza ly’eribwira abandi engulhu yuwene?

7. Thwanga wathikya thuthi omwigha eribya n’eriyisunza ly’eribwira abandi engulhu yuwene?

⁷ Ithwangana bulya abigha bethu be Biblia ebibulyo nga bino: “Eriligha omwatsi w’Obwami kyabiryuwania kithi engebe yawu? Wukalengekanaya abandi banatholere ibowa omwatsi oyu? Wanga kolhaki eribawathikya?” (Emi. 3:27; Mt. 9:37, 38) Kanganaya omwigha y’esyotrakit esiri omwa Ebya Thukakolesaya Thukakangirirya kandi leka asombole esyo akalhangira athi syangana tsemesya abahughu biwe, abanywani, kutse abakakolha nabu. Iha omwigha esyotrakit nga sy’esyo. Yibegheresaye nayu ngoku angaghaba etrakit omwa menge. Omwigha amabirilighirwa ng’omuthuliri oyuthabatizibirwe, thukanza ithwakolha nayu omw’ithulira erimuwathikya.​—Omu. 4:9, 10; Lk. 6:40.

8. Busana naki ni kikulhu abigha bethu be Biblia eryongera olhwanzo olhwa bawithire Nyamuhanga n’abaliranwa? (Lebaya n’akasanduko “ Ngoku Thwanga Wathikya Abigha Bethu be Biblia Eryongera Olhwanzo Olho Bawithire Nyamuhanga.”)

⁸ Wibuke ngoku Yesu mwathubwira athi thukangiriraye abandi ‘bakole ebyosi’ ebyo ahana. Ahathe erithika-thika, ebyo mwamuli ebihano bikulhu-bikulhu bibiri​—erianza Nyamuhanga n’abaliranwa​—ebyosi bibiri bihambire okwa mubiiri w’erithulira n’eriyira abigha. (Mt. 22: 37-39) Bihambene bithi? Enzumwa ngulhu eyikaleka ithwasangira omw’ithulira ly’eribya ithwanzire Nyamuhanga n’abaliranwa. Nomwabine, abandi bigha be Biblia bakasagha erisangira omwa mubiiri w’erithulira. Aliwe thwangana kakasya abigha ng’abo thuthi busana n’obuwathikya bwa Yehova bakendi ghenda bakahwa mw’obuba. (Esy. 18:1-3; Emi. 29:25) Akasanduko akali omo mwatsi ono kakakanaya okwa biika ebyo thwanga kolha eriwathikya omwigha we Biblia eryongera olhwanzo olhw’awithire Nyamuhanga. N’ekindi, ni byahi ebyo ekithunga kyanga kolha eriwathikya abigha bahyaka eryongera erikangania olhwanzo?

9. Omwa ky’erileberyako ky’oyuk’igha erighendya ematoka, ni byahi ebyanga muwathikya erigha erighendya?

⁹ Thasyalengekanaya okwa ky’erileberyako ky’oyuk’igha erighendya ematoka. Amaghendya iniane n’omukangirirya wiwe, ni byahi ebyanga muwathikya erigha? Erihulikirira omukangirirya wiwe n’erisamalira abandi abakaghendaya abasi ndeke. Ng’eky’erileberyako, omukangirirya anganamukangania owundi oyukaghendaya oyukakanganaya olhukeri omw’ilighira owundi erimulhabako. Kutse iniamukangania owundi omwolho oyukakehaya ekyakakalha ky’amatara w’ematoka yiwe nuku alek’ithimya-thimya abandi abakaghendaya. Eby’erileberyako ng’ebyo ibikendyeghesya omwigha y’amasomo agho angakolesya akaghendya.

10. Ni byahi ebikendi wathikya omwigha we Biblia erikulha-kulhana bunyakirimu?

¹⁰ Kuthya, omwigha we Biblia oyukatsuka erikolera Yehova syali subulira okw’ighira oko mukangirirya wiwe aliwe kandi ak’ighira n’okwa by’erileberyako bibuya by’abandi baghombe ba Yehova. Kwesi, ni kyahi ekyanga wathikya ndeke abigha be Biblia erikulha-kulhana bunyakirimu? Erihindana okwa mihindano yethu y’Ekikristayo. Busana naki? Erikangirirya eriseghemere okwa Masako erikahebawa okwa mihindano likongera eriminya lyabu, iryaghumya erikirirya lyabu, n’eribawathikya erikamathya olhwanzo olho bawithire Nyamuhanga. (Emib. 15:30-32) N’ekindi, okwa mihindano omukangirirya angana kangania omwigha y’abandi balikyethu abangabya ibane omwa mibere eyiri ng’eyiwe. Ni by’erileberyako byahi ebikakanganaya olhwanzo ebyo mwigha angalhangira omwa kithunga? Thalengekania oku bino.

11. Ni by’erileberyako byahi ebya omwigha angalhangira omwa kithunga, kandi byanga muhambako bithi?

¹¹ Omwigha we Biblia oyukalembera abaana iyuwene anganalhangira mwali wethu oyuli omwa mibere eyiri ng’eyiwe. Kikahamba okwa muthima w’omwigha akalhangira akaghalha ako mwali wethu akahiraho eriasa okwa Kisenge ky’Obwami n’abaana biwe abalere-balere. Omwigha oyo kikakalira erileka ethaba akaminya omuthuliri oyo wabya awithe ekitsibu ng’ekyo aliwe oyo wabirikisingura. Omuthuliri akabwira omwigha ngoku olhwanzo lhunene olho abya awithire Yehova mulhwaleka iniaghendera okwa bihano bya Nyamuhanga. (2 Kor. 4:7; 7:1) Omwigha akabya abirihulikirira ebya muthuliri amabugha, akasika omuthuliri akamukakasya athi, “Nawu wangana lekayo.” Omwigha we Biblia omusika akalhangira mwali wethu omulere oyunemutsemera ndeke engebe ng’Omwema kandi oyukayihayo eriwathikya abandi. Omwigha akabya akalhangira mwali wethu omulere akatsema kikaleka inianza eriminya bingyi ebikaleka mwali wethu iniabya inianatsemire.

12. Ni kyahi ekyanga leka ithwabugha thuthi obuli mundu omwa kithunga anawithe ekyo angakolha eriwathikya abigha be Biblia?

¹² Abigha bakabya bakaminya abathuliri muthina-muthina abathaleghulha, eby’erileberyako byabu bikaleka abigha ibaminya  ekya kikamanyisaya erikwama ekihano kya Kristo eky’erianza Nyamuhanga n’abaliranwa. (Yn. 13:35; 1 Tim. 4:12) Kandi ngoku kyanabiribuwa, omwigha we Biblia angan’ighira okwa bathuliri abawithe ebitsibu ebiri ng’ebiwe. Eby’erileberyako ng’ebyo bikaleka omwigha iniaminya ngoku angana thoka erikolha esyombinduka esikayithaghisibawa eribya mwigha wa Kristo. (Ebi. 30:11) Obuli mundu omwa kithunga anganayira ekyo akakolha eriwathikya omwigha erikulha-kulhana bunyakirimu. (Mt. 5:16) Ni byahi ebyo iwe wukakolha erihira omwa bigha be Biblia abakasa okwa mihindano mw’omuhwa?

13-14. Yesu mwathwalha athi abakwenda biwe ababya ibabiribbunika omuthima?

¹³ Thwanzire eriwathikya balikyethu ababirisebebera erithasyasangira omwa mubiiri w’eriberererya ekihano kya Kristo eky’eriyira abigha. Emibere Yesu athwaliramu abakwenda biwe ababya ibabiribbunika omuthima yikakanganaya ebyo thwanga kolha munabwire.

¹⁴ Okw’ihwererera ly’erithulira lya Yesu okwa kihugho kandi iniakisiya iniaholha, abakwenda “mubamutswako, mubathibitha abosi.” (Mk. 14:50; Yn. 16:32) Yesu mwakolhaki abakwenda biwe bakahwa amani habw’akathuku kake? Buthuku buke alilhubukire, Yesu mwabwira abaghuma b’okwa bigha biwe: “Simubahe; mughende muyabwire abaghalha bethu [muthi nabirilhubuka].” (Mt. 28:10a) Yesu mwathaghana abakwenda biwe. Nomwakine indi mubamusighania, mwabya iniakinabahulhamo ‘baghalha babu.’ Nga Yehova, Yesu abya w’olhukeri kandi mughanyiri.​—2 Bam. 13:23.

15. Thukayowa thuthi busana n’ababirileka erisangira omw’ithulira?

¹⁵ Kuthya nethu, thutsomene kutsibu ababirileka erisangira omw’ithulira. Ni balikyethu, kandi thubanzire! Thuk’inibukire emibiiri yosi y’olhwanzo eyo baramya balikyethu abo bakolha kera​—obundi abandi ahabw’emyaka mingyi. (Ebr. 6:10) Omo kwenene thukabakandira! (Lk. 15:4-7) Omw’igherererya Yesu, ni mwanzira syahi thwanga kangania ku thubatsomene?

16. Thwanga kangania thuthi ku thutsomene balikyethu ababirisebebera?

¹⁶ Omwa lhukeri bakokaye okwa mihindano. Enzira nguma eyo Yesu aghumirayamu abakwenda biwe ababya babbunikire omuthima lyabya iry’eribakokya okwa muhindano. (Mt. 28:10b; 1 Kor. 15:6) Namunabwire, thwangana hira omwa babirisebebera mw’omuhwa w’erihindana okwa mihindano bamabya isibakihindana. Thunasi ku thwangana yithagha eribakokya mirundi mingyi. Ahathe erithika-thika, Yesu mwatsema abigha bakaligha erikokya liwe.​—Thasyalebaya na Matayo 28:16 na Luka 15:6.

17. Thwanga kolhaki oyuwabirisebebera akasa okwa muhindano?

¹⁷ Bangirire iwunatsemire. Yesu mwaleka abigha biwe ibayowa ndeke bakahindana nayu; mwathalindabo batsuke eriasa eyo ali, mwaghenda eyo bali, amakania nabu. (Mt. 28:18) Thwanga kolhaki oyuwabirisebebera akasa okwa Kisenge ky’Obwami? Thutholere ithwamwang’irira ndeke ithunatsangire. Erimbere, thwangana bulha nga thukendi kania nabu thuthiki. Omwakanya k’erileka iniayowa nabi, ithwangana mubwira thuthi thutsemire erimulholhako.

18. Thwanga sikya thuthi emithima y’abathuliri ababirisebebera?

¹⁸ Basikaye omuthima. Abigha ba Yesu bangabya imubasagha omubiiri w’erithulira omwa kihugho kyosi. Yesu mwasikya emithima y’abakamukwama omw’ibugha athi: “Indi haghuma nenyu ebiro byosi.” (Mt. 28:20)  Ekyo mukyanabawathikya? Ee. Buthuku buke enyuma waho, mubayihwerya omwa mubiiri ‘w’erikangirirya n’erithulha engulhu yuwene.’ (Emib. 5:42) N’abathuliri ababirisebebera bakayithagha erighumibwa. Bangana sagha erithasyathulira. Thwangana basikya omuthima thuthi sibendi thulira ibobene. Bakendibya bakanza erithulira, ithwangana ghenda nabu. Ahathe erithika-thika, bakendi sima obuwathikya bwethu bakathasyatsuka erithulhughania engulhu yuwene. Thwamakolongana n’ababirisebebera n’eribalhangira ng’abalikyethu, ibakendi thasyathunga omuhwa n’ekithunga kyosi ikyatsema.

19. Thwabirithwamu erikolhaki, kandi busana naki?

¹⁹ Thukendi syalholha embere eriyira abigha erihika mughulhu wahi? Erihika okw’ihwererera ly’omughulhu mubi ono. (Mt. 28:20) Thunemwendi thoka eriberererya ekihano kya Yesu erihika okwa buthuku obo? Thwabirithwamu erikolha ekyo! Ithunatsemire thukahayo obuthuku, akaghalha, n’ebyo thuwitheko erisondekania abawithe “amalengekania awakaleka ibatholera eribana engebe y’erikotha.” (Emib. 13:48, NW) Thukabya thukakolha eki, thukagherereraya eky’erileberyako kya Yesu. Mwabugha athi: ‘Akalyo kaghe ni kolha erisonda ly’oyuwanyithuma, n’eribugha omubiiri ogho amba.’ (Yn. 4:34; 17:4) Nethu eryo ly’eriyisunza lyethu. Thwanzire erighunza omubiiri ogho thwabirihebwa. (Yn. 20:21) Kandi thwanzire n’abandi, imwamuli n’ababirisebebera, ibayiyinia omwa mubiiri oyu haghuma nethu.​—Mt. 24:13.

20. Ngoku kiri omwa 2 Abanya Korinto 4:7, busana naki thwangana berererya omubiiri ogho Yesu abirithuha?

²⁰ Ni kwenene, si kyolho eriberererya ekihano kikulhu ekya Yesu. Aliwe, si thuli kolha omubiiri oyu ithwibene. Yesu mwayilhaghanisya eribya haghuma nethu. “Nyamuhanga yo thukakolha haghuma nayu” omubiiri w’eriyira abigha kandi thukabya ithune na Kristo. (1 Kor. 3:9; 2 Kor. 2:17) Neryo, thwangana berereryagho. Ni lhusunzo kandi kikatsemesaya erikolha omubiiri oyu n’eriwathikya abandi erikolhagho!​—Soma 2 Abanya Korinto 4:7.