1. Kuliza naMateusa 28:18-20, mpangera musinke ga geve Jesus kovarongwa vendi?

KONYIMA zapa Jesus va mu vhumbwire, age kwa monekerere varongwa vendi ava va pongere moGalireya. Koyili yininke yomulyo eyi ga here kuvatantera. Yininke musinke oyo? Nonkango edi ga uyungire kudigwana mwaMateusa 28:18-20.—Resa.

2. Mapuro musinke natu ka konakona?

² Mpangera zaJesus zokutulisa po varongwa, kuna kara simpe nomulyo naina kwankenye mukareli gwaKarunga. Yipo nye, tu konakoneni mapuro gatatu gokuhamena kosirugana esi ga tu pa Jesus. Lyokuhova, kugusa ko kuronga murongwa nompango daKarunga, yisinke hena twa hepa kurugana? Lyauvali, ngapi omu vazuvhisi navenye womombungakriste nava vatera murongwa goBibeli a kure pampepo? Lyautatu, ngapi omu natu vatera ava va tengura monyima yipo nawo va lihameke mo hena mosirugana sokutulisa po varongwa?

3. Sitwa musinke somulyo ga tumbwire Jesus mompangera ezi ga geve?

³ Mapukururo gaJesus ureru kugakwata egano. Twa hepa kuronga vantu nompangera daJesus. Nye kosili sitwa somulyo esi twa hepa kudiworoka. Jesus kapi ga uyungire asi: ‘Ka va rongeni nayinye eyi na mu rekera.’ Nye age kwa tente asi: Ka va rongeni, ‘va ka limburukwe nayinye eyi na mu rekera.’  Mokusikisa mo mpangera ozo, kapisi tu kare tupu varongi nye hena tu va vatere va sikise mo eyi vana kulironga. (Yirug. 8:31) Morwasinke natu yi ruganena?

4. Gava sifanekeso kuhamena omu natu ronga murongwa yipo a limburukwe yininke eyi ga tu pangera Kristusa.

⁴ Ngapi omu natu ronga muntu yipo a limburukwe yininke eyi ga tu pangera Kristusa? Sihonena sina kukwama ko nasi tu vatera tu dive eyi natu rugana. Ngapi omu murongi ogu a rongo vantu kusinga a rongo vantu yipo va limburukwe noveta domositaura? Pomuhowo, murongi kuronga varongwa vendi noveta domositaura edi va hepa kulimburukwa. Koyili hena ga hepa kurugana murongi yipo varongwa vendi va limburukwe noveta odo. Nsene murongwa kuna kusinga mositaura nokutura pasirugana eyi ga lironga, murongi ga hepa kuza nage yipo a mu pe ko magano. Yisinke natu lirongera ko kosihonena oso?

5. (a) Kuliza naJohanesa 14:15 ntani 1 Johanesa 2:3, yisinke natu ronga varongwa vetu woBibeli va rugane? (b) Ngapi natu vatera varongwa vetu va ture pasirugana eyi vana kulironga?

⁵ Apa atu rongo wopeke Bibeli, ose kuvaronga eyi ana hepa ko Karunga kwetu. Nye yinzi twa hepa kurugana. Twa hepa kuronga varongwa vetu woBibeli omu nava tura pasirugana meparu lyawo eyi vana kulironga. (Resa Johanesa 14:15; 1 Johanesa 2:3.) Kupitira mosihonena setu, ose kuvhura kuvatera varongwa vetu omu nava tura pasirugana nompango doBibeli nsene kosure vana kara ndi koyirugana ndi koyilihafeso. Kuvhura tu va simwitire ko sihorokwa simwe kuhamena omu kutura pasirugana nompango domoBibeli da tu popera koyininke yimwe ntani nomu da tu vatera tu ture po etokoro lyewa. Nsene novarongwa vetu tuna kara, twa hepa kuhundira Jehova mpepo zokupongoka yipo zi va vatere.—Joh. 16:13.

6. Yisinke ya hamena mo mokuronga wopeke va limburukwe nompangera daJesus?

⁶ Yisinke ya hamena mo mokuronga wopeke va limburukwe nompangera daJesus? Twa hepa kuvatera varongwa vetu va kare neharo lyokutulisa po varongwa. Varongwa vamwe, kuvhura va kare nowoma wokuzuvhisa. Yipo nye, twa hepa kulididimika ngomu twa ku va vatera va kwate egano usili womoBibeli yipo yi va twe komutjima nokuvatumangeda va zuvhise. Ngapi natu vatera varongwa vetu woBibeli yipo va kare neharo lyokuzuvhisa?

7. Ngapi omu natu vatera murongwa gwetu goBibeli yipo a kare neharo lyokuzuvhisa mbudi zongwa?

⁷ Kuvhura tu pure murongwa gwetu goBibeli mapuro ngwendi gaga asi: “Ngapi omu kutura pasirugana eyi wa lironga moBibeli ya ku vatera meparu lyoge? Omu oku gazara, ya kara hepero kwava wopeke va lironge nawo Bibeli ndi? Yisinke no rugana yipo o va vatere?” (Yis. 3:27; Mat. 9:37, 38) Likida murongwa goge yitratate eyi atu ruganesa mokuzuvhisa ntani mu pura a horore po eyi na vhura kukaruganesa kekoro lyendi, kovakaume vendi ntani kovarugani vakwawo. Mu pa yitratate oyo a horowore po. Liyomberesa nage a dive omu na ruganesa yitratate oyo monkedi zongwa. Nsene murongwa gwetu ana tameke kuzuvhisa, twa hepa kuzuvhisa kumwe nage yipo tu mu vatere.—Muud. 4:9, 10; Ruk. 6:40.

8. Morwasinke ya karera nomulyo kovarongwa woBibeli va hare unene Jehova novantu? (Tara kakende “ Omu natu vatera varongwa vetu woBibeli va hare unene Karunga.”)

⁸ Diworokeni asi Jesus kwa tu pangera tu ronge wopeke yipo va ‘limburukwe nayinye’ eyi ga tu rekera. Eyi kwa kwatera mo yipango yivali yoyinene po, kuhara Karunga  ntani kuhara vakwetu. Yipango eyi yivali, kwa likwatakana nosirugana sokuzuvhisa ntani nesi sokutulisa po varongwa. (Mat. 22:37-39) Ngapi omu ya likwatakana? Mpango ezi azi tu tumangeda tu zuvhise kuna kara eharo, eharo lyokuhara Karunga ntani novakwetu. Nye kovarongwa vamwe woBibeli, egano lyokulihameka mosirugana sokuzuvhisa kuvhura kuvatjilisa. Ose kuvhura tu korangede varongwa vangoso asi nevatero lyaJehova awo kuvhura kufunda utjirwe wokutjira vantu. (Epis. 18:1-3; Yis. 29:25) Kakende aka ka kara mosirongwa esi kwa zogera mo yininke eyi natu rugana, tu vatere varongwa vetu va hare unene Karunga. Ntani ngapi omu womombungakriste nava vatera varongwa wovape yipo va kare neharo?

9. Mosihonena somurongwa a ku lironga kusinga etuwa, yirongwa musinke ana lirongere ko murongwa?

⁹ Gazadara ko hena kosifanekeso somurongwa ogu a ku lironga kusinga etuwa. Tu tante asi age kuna kusinga, ano murongi gwendi kuna hingire konyonga zendi. Ngomu ana kusinga murongwa, mononkedi musinke dimwe na vhura hena kulironga yininke yimwe? Age kuvhura kulironga pokupurakena komurongi gwendi ntani pokunomena nawa vasingi vapeke. Pasihonena, murongi gwendi kuvhura a mu likide musingi ogu a pulisire vasingi vakwawo va mu rupuke. Ndi kuvhura a mu likide musingi ogu a goworora site sonoramba detuwa lyendi apa a singi, yipo va singi vakwawo va mone nawa. Ntani kuvhura a mu korangede nage a singe monkedi zokulifana. Koyihonena oyo, murongwa ta lirongere ko yirongwa yomulyo eyi nage nga ruganesa nsene kuna kusinga.

10. Yisinke ngayi vatera murongwa goBibeli a ture po ezokomeho?

¹⁰ Mokulifana, murongwa goBibeli ogu ana tameke kukarera Jehova, nage kuvhura a lirongere ko komurongi gwendi ntani koyihonena yoyiwa yovakareli vaJehova. Nye yisinke nayi vatera unene murongwa goBibeli a ture po ezokomeho? Nsene a wiza komapongo, ngayi mu vatera unene. Morwasinke? Morwa mavyukiso gokutunda moMatjangwa aga atu lirongo komapongo, ngaga mu vatera a dive yoyinzi nokunkondopeka epuro lyendi ntani a hare unene Karunga. (Yirug. 15:30-32) Komapongo, murongi kuvhura hena a likide murongwa gwendi vanavazinyetu ava ava ligwanekere nomaudigu gokulifana ngwendi aga a piti. Ngapi omu yihonena yovanavazinyetu nayi vatera murongwa goBibeli?

11. Yihonena musinke na vhura kudimburua murongwa goBibeli mombungakriste, ntani ngapi omu nayi mu kundama?

¹¹ Tu tareni yihonena yina kukwama ko. Sihonena sokuhova, murongwa goBibeli ogu ga kara asi age zinya gomudike a rere vana vendi, ta dimburura munazinyetu gomukadi ogu nage ga kara moukaro wokulifana. Murongwa goBibeli ta yi mu vatere sili pokumona omu munazinyetu ogo a litura mo unene yipo a wize komapongo novana vendi. Sihonena sauvali, murongwa goBibeli gomumati ogu yina kudigopera kuhageka kukoka makanya, ta tulisa po ukaume namunazinyetugara ogu ya tompoka kuhageka kukoka makanya. Munazinyetu ogo ta tantere murongwa goBibeli omu kuhara Jehova ya mu tumangeda a limburukwe nompango dendi. (2 Kol. 7:1; Fil. 4:13) Konyima zokupurakena kosihonena samunazinyetu ogo, murongwa ta yi mu pe ehuguvaro ngomu munazinyetu ana kumutantera nonkango edi asi “nove ngayi kutompoka kuhageka kukoka makanya.” Sihonena sautatu, murongwa goBibeli gomudinkantu ta dimburura asi munazinyetukadi gomudinkantu ga kara noruhafo ntani kuvatera vakwawo. Ano eyi tayi tumangeda  murongwa ogo goBibeli a hare kudiva eyi ayi ninkisa munazinyetu ogo gomudinkantu a kare noruhafo nkenye apa.

12. Morwasinke natu uyungira asi nkenye gumwe mombungakriste kwa kara nositumbukira sokuvatera murongwa goBibeli?

¹² Apa varongwa woBibeli ava ya diva vanavazinyetu wovanzi, awo kulirongera ko koyihonena yawo asi yinke nawa-nawa ayi tanta kulimburukwa mpangera zaJesus zokuhara Karunga novakwetu. (Joh. 13:35; 1 Tim. 4:12) Ngomu tuna yi zogere nare, murongwa goBibeli kuvhura a lirongere ko kovazuvhisi ava va pita moukaro wokulifana nou wendi. Yihonena oyo tayi vatere murongwa a dimburure asi nage kuvhura yi mu tompoke kukara murongwa gwaKristusa. (Deut. 30:11) Nkenye gumwe mombungakriste kuvhura kuvatera murongwa goBibeli a kure pampepo. (Mat. 5:16) Yisinke o rugana mokukorangeda varongwa woBibeli ava ava wiza komapongo?

13-14. Ngapi omu Jesus ga tekwire vapositoli vendi ava va dompere mutjima?

¹³ Twa hepa kuvatera vanavazinyetu ava va tengura monyima va sikise mo mpangera zaJesus zokuzuvhisa nokutulisa po varongwa. Monkedi omu Jesus ga tekwire vapositoli vendi ava va dompere mutjima, kulikida eyi twa hepa nose kurugana naina.

¹⁴ Komeho Jesus va ka mu dipage, vapositoli vendi “navenye tava mu sigi, tava tjira.” (Mar. 14:50; Joh. 16:32) Ngapi omu Jesus ga tekwire vapositoli vendi apa va guvire? Konyima tupu zapa va mu pindwire koufe, Jesus kwa tanterere varongwa vendi vamwe asi: “Mwa ha tjira! Zendeni mu ka tantere vamumbya vange asi [nina vhumbuka].” (Mat. 28:10a) Jesus kapi ga sigilire vapositoli vendi. Nampili ngomu va mu sigire, age simpe kwa va tumbwire asi “vamumbya vange.” Ngwendi Jehova, Jesus nage ga kere nonkenda ntani nga dongwenene po.—2 Vah. 13:23.

15. Ngapi omu atu lizuvhu kuhamena vanavazinyetu ava va hageka kuzuvhisa?

¹⁵ Mokulifana, nose twa kara nosinka sosinene kwava va hageka kuzuvhisa. Awo vanavazinyetu ntani twa va hara! Ose simpe kudiworoka yirugana yawo eyi ngava rugana nare, ano vamwe nampo ngava yi rugana nomvhura dononzi. (Heb. 6:10) Ose kwa kuvarongora sili. (Ruk. 15:4-7) Ngapi natu yi likida asi ose twa kara nosinka kwawo ngwendi moomu ga yi rugene Jesus?

16. Ngapi omu natu yi likida asi twa kara nosinka kovanavazinyetu ava va tengura monyima?

¹⁶ Va zigida komapongo. Nkedi zimwe omu Jesus ga korangedere vapositoli vendi ava va dompere mutjima kuna kara apa ga va zigidire va ka ponge kumwe nage. (Mat. 28:10b; 1 Kol. 15:6) Nose naina kuvhura tu korangede ava va tengura monyima va wize komapongo nsene asi kapi ava wiza ko. Twa hepa kuvazigida nkenye apa morwa kuvhura va dire kuwiza komapongo sikando sokuhova apa natu va zigida. Ano apa ngava wiza ose ngatu hafa ngwendi moomu Jesus ga hefe apa varongwa vendi va tambwire ezigido lyendi.—Hetakanesa Mateusa 28:16 ntani Rukasa 15:6.

17. Yisinke natu rugana nsene gumwe ogu ga tengura monyima a wiza kepongo?

¹⁷ Va tambura. Jesus kwa ninkisire varongwa vendi va lizuvhe emanguruko apa ga gwanekerere nawo ntani yige ga hovere kuvauyungisa. (Mat. 28:18) Yisinke natu rugana nsene gumwe ogu ga tengura monyima a wiza kepongo? Twa hepa kumutambura. Pomuhowo kuvhura tu kare nosinka kuhamena eyi natu uyunga nage. Nye mokumuninka a lizuvhe emanguruko, kuvhura tu mu tantere asi twa hafa mokumumona.

18. Ngapi omu natu korangeda ava va tengura monyima?

 ¹⁸ Va korangeda. Varongwa vaJesus nampo va kere nosinka asi kapi nga yi va tompoka kuzuvhisira mouzuni mudima. Jesus kwa va korangedere pokuvatumbwidira asi: “Ame neni ngani kara.” (Mat. 28:20) Ngoso nonkango odo ga va tanterere da va vaterere ndi? Nhi. Konyima, awo kwa ya litulire mo unene ‘mokuronga nokuudisa mbudi zongwa.’ (Yirug. 5:42) Vazuvhisi ava va tengura monyima nawo va hepa ekorangedo. Awo kuvhura va lizuvhe woma kuzuvhisa hena. Kuvhura tu va korangede asi ngatu zuvhisa kumwe nawo. Nsene vana hara kupwaga mokuzuvhisa, ose kuvhura tu ze nawo. Awo ngava yi hafera sili ngomu ngatu va vatera mokuzuvhisa. Nsene tu tekura nokutara ava va tengura monyima asi awo simpe vanavazinyetu, awo ngava hafa ntani womombungakriste nawo ngava hafa.

19. Yisinke tuna tokomene kurugana ntani morwasinke?

¹⁹ Siruwo sokuhura kupi ngatu zuvhisa nokutulisa po varongwa? Dogoro kouhura wouzuni. (Mat. 28:20) Nga yi tu tompoka kusikisa mo mpangera zaJesus ndi? Ose tuna tokomene kuyirugana. Ose kuhafa apa atu ruganesa siruwo nononkondo ntani yiweka yetu yipo tu papare “ava gwa tumbukira mwenyo gwanarunye.” (Yirug. 13:48) Apa atu yi rugana eyi, ose kuhonena Jesus. Age kwa tente asi: ‘Nondya dange dedi dokurugana mpango zogu ga tuma nge nedi dokusikisa mo sirugana sendi.’ (Joh. 4:34; 17:4) Eyi yiyo nose tuna tokomene kurugana. Tuna hara kumana sirugana esi va tu pa. (Joh. 20:21) Ntani tuna hara wopeke nawo va rugane sirugana esi nelididimiko kukwatera mo ava va tengura monyima.—Mat. 24:13.

20. Kuliza noVafilipi 4:13, morwasinke natu karera nehuguvaro asi ngatu sikisa mo sirugana esi ga tu pangera Jesus?

²⁰ Kapisi ureru kusikisa mo sirugana esi ga tu sigira Jesus. Nye sirugana esi, kapi tuna kusirugana nyoselike. Jesus kwa tu tumbwidira asi nga kara nose. Ose kurugana sirugana esi sokutulisa po varongwa “ngovarugani kumwe naKarunga.” (1 Kol. 3:9) Yipo nye, ose kuvhura tu si sikise mo. Ose kulizuvha mfumwa kweyi atu rugana sirugana esi ntani nokuvatera wopeke nawo va si rugane!—Resa Vafilipi 4:13.