1. Tintwari na Matie 28:18-20, Yezu ntia ntumunu kahana?

HA MANIMA ma mvumbukulu’andi kwe ba fwa, Yezu wamoneka kwe milongoki miandi miavukana ku Galile. Musamu wa mfunu weri nandi mu ba têla. Ntia musamu weri? Musamu wango wena mu Matie 28:18-20.​—Tanga.

2. Ntia biyuvu tuhanina mvutu?

² Ntumunu ya Yezu ya kubika milongoki mbo yita tarila mpe bisari bia Nzambi bia mu ntangu yi. Tataluzuleno biyuvu bitatu bitariri tisalu tia tu hana Yezu. Tia ntete, ha zulu longesa mitieno mia Nzambi kwe milongoki mia môna, nti tufweti sa? Tia nzole, bwe bisamuni biabiansoni bia timvuka bilendi bakisila mulongoki wa Bibila ngatu wakula mu timpeve? Tia ntatu, bwe tulendi bakisila mpangi zeto za kota tiozi ngatu bavutu karila mu kubika milongoki?

3. Ntia musamu wa mfunu Yezu kayika mu ntumunu’andi?

³ Ntumunu za Yezu ka zena mpasi ko mu bakula. Tufweti longesa misamu mi katuma kwe bantu. Kâ, musamu we kô wa mfunu wu tufweti lembo zimbakana. Yezu ka tâ ko ti: ‘Ba longeseno misamu miamiansoni mi nalutumini.’ Kâ watâ ti: Ba longeseno ‘mu kêla misamu miamiansoni mi nalutumini.’ Mu tumamana ntumunu yo ya Yezu, tufweti longesa kwe mulongoki’eto wa Bibila nti kafweti sa mpe tufweti mu songela ka bwe kafweti wasila. (Bis. 8:31) Mu bungu dia nti tufweti sila bo?

4. Kêla ntumunu bwe wuta zolo tâ? Hana tifwani.

 ⁴ “Kêla” ntumunu wuzololo tâ tumamana yo. Mu bakula bwe tulendi longesela muntu mu kêla peleko mu tumamana ntumunu za Yezu, tabongeno tifwani’eti. Ngano muntu wulongesaka mu nata kaminio bwe wusaka mu longesa kwe mulongoki’andi mu tumamana misiku mia nzila (code de la route)? Musamu wa ntete, mulongisi mbo katoko longesaka misiku mia nzila kwe mulongoki’andi. Kâ, mu longesa kwe mulongoki’andi bwe katumamana misiku mia nzila, tima tiakaka kafweti sa. Fweti kwenda na mulongoki’andi mpe fweti mu hana malongi mu ntangu yi kata kwe nati kaminio mpe yi kata kwe yêle mu sarila mio mi kalongokele. Tifwani tio nti tita tu longesa?

5. (a) Tintwari na Za 14:15 mpe na 1 Za 2:3, ngano nti bie neto nsatu mu longesa misamu mi fweti sa milongoki mieto? (b) Hana bifwani mu mpila yi tulendi twarisila milongoki mieto.

⁵ Bu tulongokaka Bibila na bantu bakaka, mbo tubalongesaka mio mi tu lombaka Nzambi. Kâ, tima tiakaka tufweti sa. Tufweti longesa milongoki mieto mia Bibila mu sarilaka mio mi balongokaka mu luzingu lwawu. (Tanga Za 14:15; 1 Za 2:3.) Mu tifwani ti tuhanaka tulendi songela kwe milongoki mieto bwe balendi sarila matieleka ma balongokaka mu Bibila ku lukolo, ku tisalu peleko mu ntangu yi basaka nsaka. Tulendi ba zonzela musamu watuturila mu luzingu lweto mu ba songela bwe sarila mitieno mia Nzambi kwatukengerela mu mbi mpe bwe kwatubakisila mu bonga nzengolo za ndwenga. Bu tubâka na milongoki mieto tulendi lomba kwe Yehova mu lusambulu kabatwarisa mu nzila ya mpeve santu’andi.​—Za 16:13.

6. Ntia musamu wakaka we mu ntumunu ya Yezu?

⁶ Ntia musamu wakaka we mu ntumunu ya Yezu? Tufweti bakisa milongoki mieto mu kurisa nsatu ya kubika milongoki. Milongoki miakaka milendi bâ na bunkuta mu samuna. Buna tufweti bâ na luvivululu bu tubabakisaka mu tomo bakula matieleka ma Bibila masimba mutima’awu ngatu babâ na timinu tia ngolo tibatuma mu kwe samuna. Nti tulendi sa mu bakisa milongoki mieto ngatu miabâ na nsatu ya samuna nsangu za mbote?

7. Bwe tulendi bakisila mulongoki mu kurisa nsatu’andi ya samuna nsangu za mbote?

⁷ Lendi yula biyuvu ebi kwe mulongoki’aku: “Bwe luzingu lwaku lwayizi tomena bu wabatikiri mu sarila ndongosolo za Bibila? Ngano mbo banzaka ti bantu bakaka bafweti wâ nsangu zo? Nti lendi sa mu ba bakisa?” (Bin. 3:27; Mat. 9:37, 38) Mu songela trakte ze mu bisalulu bia mulongi, mpe mu bika kasola yo yilendi zolo bantu ba mu kanda diandi, ndiku zandi peleko bantu ba kasalaka na bo. * Mu hana lutangu lu kazololo lwa trakte yi kasolele. Tintwari, seno démonstration mu mpila yi kalendi hanina trakte yo kwe bantu bakaka na nsayi yayansoni. Wa matieleka, mu ntangu mulongoki’eto wukwizi bâka tisamuni tilembolo tia batusu, tufweti samunaka nandi mu mu bakisa.​—Ekl. 4:9, 10; Like 6:40.

8. Mu bungu dia nti we mfunu kwe milongoki mieto mu kurisa luzolo lwa ngolo mu Nzambi na mu bampwana’awu? (Tala mpe kaku “ Bwe tusa ngatu milongoki mieto miabâ na luzolo lwa ngolo mu Nzambi.”)

⁸ Tatamaneno mu lundaka mu mabanza meno ti Yezu watulomba talongesaka kwe bantu bakaka mu ‘kêla misamu miamiansoni’ mi katutuma. Wa matieleka, mu ntumunu yo mwe na ntumunu zole ziyôkele bunene​—ntumunu ya zolo Nzambi na ya zolo bampwana’eto​—ntumunu zo za zole nguria tintwari zena  na tisalu tia samuna na tia kubika milongoki. (Mat. 22:37-39) Ntia tintwari tie ho? Tima tia ntete titutumaka mu sala tisalu tia samuna ni luzolo lweto mu Nzambi na luzolo lweto mu bampwena’eto. Kwe milongi miakaka mia Bibila mabanza ma batika tisalu tia samuna bunkuta mabatâka. Kâ tulendi ba tindisa ti na lubakusu lwa Yehova, mbo balenda malembe malembe mu telamana bunkuta bwa bantu. (Mik. 18:1-3; Bin. 29:25) Mu timoko ti mwe na kaku tita songela mio mi tulendi sa mu bakisa mulongoki’eto mu tomo vutu zolo Nzambi. Musamu wakaka, bwe timvuka tilendi bakisila milongoki mia môna mu tomo songela luzolo?

9. Mu tifwani tia mulongoki wa kaminio, mu ntia mpila mulongoki wulongokelaka malongi ma mfunu?

⁹ Tavutueno banza tifwani tia muntu wuta longoka mu nata kaminio. Mu ntangu yi kakwe nati kaminio na mulongisi’andi ha ndeko, ngano mulongoki bwe wulongokelaka? Mbo wulongokaka bu kakwe wirikiri mulongisi’andi na bu kakwe tari bantu bakaka ba takwe nati kaminio mu mpila ya mbote. Mu tifwani, mulongisi wulendi mu songela tinati tia kaminio tita hana nzila kwe tinati tiakaka tia kaminio na nsayi yayansoni. Peleko mulongisi wulendi mu songela tinati tiakaka tia kaminio tita dimina mutsamina wa minda miandi ngatu binati biakaka biatomo mona. Bifwani bio mbo bilongesa malongi ma mbote kwe mulongoki ma kalendi sarila bu kakwe nati kaminio.

10. Nti bibakisa mulongoki wa Bibila mu kula mu timpeve?

¹⁰ Mpila mosi mpe, mulongoki wa Bibila wuta batika mu sarila Yehova ka wubakaka kwa malongi kwe mulongi’andi ko, kâ mpe kwe bifwani biakaka bia mbote bia bisari bia Yehova. Buna nti bitomo bakisa milongoki mia Bibila mu kula mu timpeve? Bafweti kwendaka ku tukutakanu tweto twa Bakristo. Mu bungu dia nti? Mu bungu ti malongi ma Bibila ma bahanaka ku tukutakanu mbo makurisa luzabu lwawu, mbo mayika ngolo timinu tiawu, mpe mbo mababakisa mu kurisa luzolo lwawu mu Nzambi. (Bis. 15:30-32) Ku tukutakanu, mulongi wulendi songela mulongoki kwe mpangi zakaka zita korela misamu mimosi na yandi. Mulongoki mbo wumona bifwani bia mbote bia bampangi basongelaka luzolo mu timvuka. Tataleno bifwani bita landa.

11. Ntia bifwani mulongoki wa Bibila wulendi mona mu timvuka, mpe ntia nsobolo bilendi mu natina?

¹¹ Mulongoki wa wukento wusansaka bala yandi kaka, wuta mona mpangi ya yikento yisansaka mpe bala yandi kaka. Musamu wo wusimbiri mutima wa mulongoki bu kata mona ngolo zita sarila mpangi ya yikento mu kwiza ku Nzo ya Nsambululu na bala bandi ba fioti. Mulongoki wa bakala wuta yêla mu bika fumu wizi zabasana na mpangi ya yibakala yalenda mu bika fumu. Tisamuni timutêlele bwe luzolo lwandi mu Yehova lwamubakisila mu tumamana mu ntumunu za Nzambi. (2 Kor. 7:1; Flp. 4:13) Tisamuni bu kameni mu têla bwe kasa mu bika fumu, mu têlele ti: “Nge mpe lendi lenda mu bika fumu.” Mulongoki wubakiri lutindusu, mpe wukwikiri ti lendi lenda mu bika fumu. Mu ntangu mulongoki wa Bibila wa wukento wa ntwenia wuta mona mpangi ya yikento ya ntwenia ye mu nsayi mu bungu ti Mbangi ya Yehova yena, dingiri mu tomo zaba nti bisaka ti kabâ na nsayi ya mpila yo.

12. Mu bungu dia nti tulendi têla ti muna muntu mu timvuka dema die nandi dia bakisa milongoki mia Bibila?

¹² Mu ntangu milongoki mikwizi zabaka bisamuni bia kwikama bia mpila na mpila, mbo mikwizi longokaka mu tifwani tiawu bwe kêla  ntumunu ya Kristo ya zolo Nzambi na bampwana’eto yita zolo tâ. (Za 13:35; 1 Tim. 4:12) Ntiana bu tutokolo watâ, mulongoki wulendi longoka mu tifwani tia bisamuni bitelamanaka mpasi zimosi na yandi. Bifwani bio mbo bilongesaka mulongoki wa Bibila ti, mbo kalenda mu sa nsobolo zifwanakane mu bâ mulongoki wa Kristo. (Lub. 30:11) Muna muntu mu timvuka lendi yika moko mu bakisa mulongoki ngatu wakula mu timpeve. (Mat. 5:16) Ntia ngolo saka nge beni mu tindisa milongoki mikwizaka ku tukutakanu?

13-14. Bwe Yezu kabongela ntumwa zandi mu ntangu yi babâ ba nôka?

¹³ Tuzololo tabakisa mpangi zeto za kota tiozi mu vutu karila mu sala tisalu tia samuna na tia kubika milongoki. Mpila ya bongela Yezu ntumwa zandi za nôka mbo yitusongelaka nti tulendi sa lumbu ti.

¹⁴ Ntete Yezu kafwa, ntumwa zandi zasa muniaka, mpe babansoni badioka. (Mak. 14:50; Za 16:32) Bwe Yezu kabongela ntumwa zandi mu ntangu yi babâ ba nôka? Ntangu fioti ha manima ma mvumbukulu’andi kwe ba fwa, Yezu watâ kwe milongoki miandi miakaka ti: ‘Ka lutînandi! Yendeno lwatâ kwe mpangi zani [ti navumbukiri kwe ba fwa].’ (Mat. 28:10a) Yezu ka yambirika ntumwa zandi ko. Ni bu sa ti bamuyambirika, Yezu mbo keri batâka kwa “mpangi zani.” Ntiana Yehova, Yezu tiari tia lemvokela tieri nandi mpe mbo keri lemvokelaka.​—2 Mi. 13:23.

15. Bwe tumonaka ku mutima mu musamu wutariri mpangi zeto zabika mu samuna?

¹⁵ Mpila mosi mpe, mbo tutomo belokelaka lwaka bô babika mu samuna. Mpangi zeto zena, mpe bawu tuzololo! Mbo tubambukilaka moyo tisalu tia sala bisambiri bio na luzolo lwalwansoni mu ntama—bakaka kampe basala tuka mvula zazingi. (Ebr. 6:10) Nsatu yayingi yibâka neto ya vutu ba mona! (Like 15:4-7) Bu tukwe landi tifwani tia Yezu, mu ntia mpila tulendi songela ti bawu tubelokelaka lwaka?

16. Bwe tulendi songela ti mpangi zeto za kota tiozi za tubelokelaka lwaka?

¹⁶ Na nsayi yayansoni ba tikisa ku tukutakanu. Mpila mosi ya tindisila Yezu ntumwa zandi, ni ya ba tikisa ku tukutakanu. (Mat. 28:10b; 1 Kor. 15:6) Mpila mosi mpe lumbu ti, tulendi tindisa mpangi zeto za kota tiozi mu vutu kwiza ku tukutakanu twa timvuka. Kampe ntete batambula mu kwiza ku tukutakanu, tufweti ba tikisa mbala zazingi. Ntembe kâni, Yezu wamona nsayi mu ntangu milongoki miandi miatambula bu kabatikisa.​—Fwanakasa Matie 28:16 na Like 15:6.

17. Ngano nti tufweti sa mu ntangu yi tumona mpangi ya kota tiozi yiziri ku lukutakanu?

¹⁷ Ba bwana na nsayi yayansoni. Yezu wasa ti milongoki miandi ka miabândi na lwaka bu bamonana. Yezu ka kêla ko ti milongoki miandi mizi kwe yandi, kâ yandi wayenda mu kwe ba zonzesa. (Mat. 28:18) Ngano nti tusa mu ntangu yi tumona mpangi ya kota tiozi yiziri ku Nzo ya Nsambululu? Tufweti bonga nzengolo ya mu bwana na tiya twatwansoni. Ha mbatukulu tulendi lembana musamu wu tutâ. Kani tamufwisa nsoni, tulendi mu têla ti nsayi yayingi ye neto mu mu mona.

18. Bwe tulendi tindisila bisamuni bia kota tiozi?

¹⁸ Ba tindisa. Kampe milongoki miamona ti ka baketi’â lenda ko mu samuna mu nza yayansoni. Yezu watindisa milongoki miandi bu kabatêla ti: ‘Mbo nibâ neno bilumbu biabiansoni.’ (Mat. 28:20) Ngano musamu wo wabakisa milongoki? Yee. Ha manima ma ntangu fioti, bayizi bâ na tisalu tiatingi tia ‘longesa  na tia samuna nsangu za [mbote].’ (Bis. 5:42) Bisamuni bia kota tiozi nsatu lutindusu mpe yibâka nawu. Balendi bâ na bunkuta mu vutu karila mu samuna. Tulendi ba tindisa ti ka basamuna bawu kaka ko. Mu ntangu yi babâ ba kubama, tulendi kwenda nawu ku tisalu tia samuna. Ntembe kâni mbo batomo zolo lubakusu lu tubahana mu ntangu yi bakarila mu samuna nsangu za mbote. Mu ntangu yi tukipaka mpangi zeto za kota tiozi, kulendi bâ ndandu za mbote mu timvuka.

19. Ntia nsatu ye neto, mpe mu bungu dia nti?

¹⁹ Tii ntia ntangu tutatamana mu samuna na mu kubika milongoki? Tii ku nsuka ya nza. (Mat. 28:20) Ngano mbo tubâ na lenda dia samuna na dia kubika milongoki tii ku nsuka? Nzengolo tubongele ya sila bo! Na luzolo lwalwansoni mbo tuhanaka ntangu’eto, ngolo zeto, na bimvwama bieto mu baka bô bê na “ndiatulu yifwanakane mu bungu dia luzingu lwa mankululu.” (Bis. 13:48, NWT) Bu tusilaka bo, tifwani tia Yezu tulandaka. Watâ ti: ‘Bidia bia meno, ni mu sarila mio mi zololo Yandi wakuntambika, na mu manisa tisalu ti kakungeni.’ (Za 4:34; 17:4) Beto mpe nsatu ni yo ye neto. Tuzololo tamanisa tisalu ti batuheni. (Za 20:21) Tuzololo mpe bantu bakaka na bô ba kota tiozi batatamana mu tisalu tio tintwari na beto.​—Mat. 24:13.

20. Tintwari na Bisi-Filipe 4:13, mu bungu dia nti tulendi sala tisalu tia tu tuma Yezu

²⁰ Musamu wa mpasi wena mu landa ntumunu ya tu hana Yezu. Kâ, ka tusala tisalu tio beto kaka ko. Yezu wakanisina ti mbo kabâ neto. Bu tukubikaka milongoki, mbo tubâka “bisari tintwari na Nzambi” mpe “tintwari na Yezu,” ntiangu Yehova na Yezu batubakisaka mu sala tisalu tio. (1 Kor. 3:9; 2 Kor. 2:17, NWT) Buna, tulendi tia sala. Ntia mpila bweso, mpe ntia mpila nsayi mu sala tisalu tio na mu bakisa bantu bakaka mu tomo tia sala bubote!​—Tanga Bisi-Filipe 4:13.