1. Kwesekeja naMatewu 28:18-20, lushimbinyi lwahaniniyi Yesu?

HANYIMA yakwila Yesu anamusañuli dehi, wamwekeni kudi atumbanji twindi apompeli kuÑaliliya. Kudi yuma yalema yakeñeleñayi kuyileja. Yumanyi yeniyi? Mazu indi ekala haMatewu 28:18-20.—Tañenu.

2. Malwihwinyi itukuhanjekahu?

² Lushimbi lwaYesu lwakwilisha atumbanji lwakundama nikudi ambuña aNzambi makonu. Dichi, tuhanjekenu hamalwihu asatu kutalisha kumudimu watwinkayi Yesu. Chatachi, chumanyi chitwatela kwila kubombela hakuyidizisha atumbanji amaha yuma yakeñañayi Nzambi? Chamuchiyedi, akwakushimwina ejima amuchipompelu anateli kukwasha ñahi kadizi waBayibolu kupama kuspiritu? Chamuchisatu, tunateli kuyikwasha ñahi akwetu akwakwitiya azeya kulonda atachiki cheñi kwilisha atumbanji?

3. Lushimbinyi lwabombelelihu Yesu hanshimbi yindi?

³ Nshimbi jaYesu japela. Twatela kudizisha antu yuma yatulejeliyi Yesu. Hela chochu, hitwatela kujimbalaku chikuma chalemaku. Yesu wahosheli wanyi nindi: ‘Yidizishenu yuma yejima yinayileji enu.’ Ilaña wahosheli nindi: Yidizishenu “ahembeña yuma yejima yinnayileji enu.” Hakwila twovwahili ilu lushimbi hakudizisha kadizi waBayibolu, hitwatela kwikala hohu antañishiku, ilaña twatela nikuyilombola. (Yilw. 8:31) Muloñadi chitwatela kwilila mwenimu?

4. Kuhemba’ lushimbi kwatalisha mudihi? Shimunenu chakutalilahu.

 ⁴ ‘Kuhemba’ lushimbi kwatalisha mukulovwahila. Talenu chakutalilahu chinakulumbulula chitwatela kudizisha muntu kuhemba hela kwovwahila yuma yatulejeliyi Kristu. Muntu wunakudizisha mukwawu chakwendesha motoka nateli kumukwasha ñahi kulondela nshimbi jahamukwakwa? Chatachi iwu mukwakudizisha watela ntahi kumuleja kadizi windi nshimbi jahamukwakwa. Hela chochu, hakwila nawu yadizishi atudizi kulondela iji nshimbi, watela kwilahu yuma yikwawu. Watela kuya nakadizi hamukwakwa kulonda yamulomboleña hampinji yinakwendeshayi nawa yamukwasheña kulondela nshimbi. Yumanyi yitunadizili kunichi chakutalilahu?

5. (a) Kwesekeja naYowanu 14:15 ni 1 Yowanu 2:3, yumanyi yitwatela kuyidizisha atudizi etu aBayibolu? (b) Hanenu yakutalilahu yinakumwekesha chitunateli kuleja atudizi etu.

⁵ Neyi tunakudiza Bayibolu nawantu, twayidizishaña yuma yakeñañayi Nzambi kudi etu. Hitwatela kukumina dakuyidizisha yuma yakeñañayi Nzambi hohuku. Ilaña twatela cheñi kuyidizisha atudizi etu aBayibolu kuzatisha yuma yinakudizawu. (Tañenu Yowanu 14:15; 1 Yowanu 2:3.) Tunateli kuyidizisha atudizi etu chatela kuzatishawu nshimbi jamuBayibolu kushikola, kumudimu hela neyi anakunooka kuhitila muyuma yitwelaña. Tunateli kuyilumbulwila kuzatisha nshimbi jamuBayibolu chikwatukiñili kuwubanji hela chikwatukwashili kufuukulahu chiwahi. Neyi tudi nawatudizi etu, twatela kulomba kudi Yehova kulonda spiritu yajila yiyilomboleña.—Yow. 16:13.

6. Yumanyi yinabombeli mukudizisha antu kuhemba nshimbi jaYesu?

⁶ Yumanyi yinabombeli mukudizisha antu kuhemba nshimbi jaYesu? Twatela kuyikwasha atudizi etu aBayibolu kwikala namuchima wakwilisha atumbanji. Atudizi amakwawu anateli kutiya woma wakushimwina. Dichi twatela kwikala adiwunjika hampinji yitunakuyikwasha kutiyishisha chalala chamuBayibolu kulonda ekali nachikuhwelelu chakola. Nkumininaku, yuma yinakudizawu yikuyishika hamuchima nawa akutachika kushimwina. Yumanyi yitwatela kwila hakwila tukwashi atudizi kulonda ekali namuchima wakushimwina nsañu yayiwahi?

7. Tunateli kukwasha ñahi kadizi kulonda yekali namuchima wakushimwinaku akwawu nsañu yayiwahi?

⁷ Twatela kuyihula atudizi etu aBayibolu netu: “Chihandilu chenu chinahimpiki ñahi muloña wakuzatisha yuma yimunakudiza muBayibolu? Munakutoñojoka nenu kwosi antu amakwawu atela kutiyaku iyi nsañu? Chumanyi chimwatela kwila hakwila nawu muyikwashi?” (Yish. 3:27; Mat. 9:37, 38) Mutalishenu kadizi matilakiti adi muChikasha Chetu chaYozelu Yakuzatisha Hakudizisha nawa mwilenu yatondihu yinateli kukwasha antaña jindi, amabwambu hela akwawu mwazatilañawu. * Mwinkenu kadizi matilakiti amavulu. Zatenu nindi kulonda mumuleji chakuhana tilakiti. Neyi kadizi wetu nekali dehi mukwakushimwina wabula kupapatishewa, twatela kushimwinaña nindi kulonda tumukwasheñaku.—Mukwa. 4:9, 10; Luka 6:40.

8. Muloñadi atudizi etu chatela kumukeñelawu Nzambi niantu? (Talenu cheñi chikasha chinakwila nawu “ Chitunateli Kukwasha Atudizi Etu aBayibolu Kumukeña Nzambi.”)

⁸ Anukenu nenu Yesu watulejeli kudizisha antu ‘kuhemba yuma yejima’ yatulejeliyi.  Munabombeli nshimbi jiyedi jabadika, dikwila nawu kumukeña Nzambi niakwetu, nshimbi yejimiyi yinakundami kumudimu wakushimwina nikwilisha atumbanji. (Mat. 22:37-39) Kunuñañananyi kudihu? Kukeña kutwamukeña Nzambi niakwetu antu, dichuma chatuleteshaña kushimwina. Kuhosha hohu chalala, atudizi aBayibolu amakwawu anateli kutiya woma kushimwina. Ilaña twatela kuyikolesha atudizi amuchidiwu netu Yehova nateli kuyikwasha kuleka kutiya woma chovu-chovu. (Mas. 18:1-3; Yish. 29:25) Chikasha chidi muchinu chibaaba chinalumbululi yuma yitwatela kwila hakwila nawu tukwashi atudizi etu kulonda amukeñi Nzambi. Kubombelahu, yumanyi yatela kwila chipompelu hakwila akwashi atumbanji amaha kulonda amwekesheña kukeña?

9. Muchakutalilahu chakadizi wunakudiza motoka, kadizi nateli kwiluka ñahi yuma yatela kwilayi?

⁹ Toñojokenu cheñi chakutalilahu chamuntu wunakudiza kwendesha motoka. Munjilanyi mwadizilañayi kadizi kwendesha motoka neyi wudi nantañishi yindi? Kuhitila mukumutiyilila ntañishi yindi nikumona chinakwendeshawu akwawu. Chakutalilahu, ntañishi nateli kwinyikila kadizi windi ñendeshi wunashili mukwawu njila. Hela ntañishi nateli kwinyikila kadizi windi ñendeshi wunakeheshi chejeji kumotoka kulonda akwawu amoni chiwahi. Iyi yakutalilahu yinateli kumukwasha kadizi kwiluka yuma yatela kwilayi neyi nakwendesha.

10. Yumanyi yinateli kumukwasha kadizi kupama kuspiritu?

¹⁰ Munjila yoyimu kadizi waBayibolu wunatachiki kumukalakela Yehova wadizilaña kudi ntañishi yindi nikudi ambuña aYehova akweti yilwilu yayiwahi. Hanu dinu chumanyi chinateli kumukwasha kadizi waBayibolu kupama kuspiritu? Kwinzaña nakupompa. Muloñadi? Yuma yikutiyawu kukupompa yikuyikwasha kwiluka yuma yayivulu, kukolesha chikuhwelelu chawu nikumukeña Nzambi chikupu. (Yilw. 15:30-32) Cheñi, hakupompa ntañishi nateli kumulumbulula kadizi kudi amanakwetu niahela ashindili kukala neyi kukwetiyi. Kadizi wukumona amanakwetu niahela anakumwekesha kukeña muchipompelu. Talenu iyi yakutalilahu.

11. Yakutalilahwinyi yinateli kumonayi kadizi muchipompelu, nawa yinateli kumukwasha ñahi?

¹¹ Kadizi waBayibolu wamumbanda wakulishaña anyana nkawindi namoni muhela mukwaKristu wukweti kukala kwokumu. Natiyi kuwaha hakumona muhela chinakuzatayi nañovu hakwila nawu yenzi nakupompa hamu nawanyanindi anyanya. Kadizi waBayibolu wunakufwila kuleka makanya nadiluki namanakwetu walekeli kunwa makanya. Mukwakushimwina namuleji kadizi kukeña kwamukeñeliyi Yehova chikwamukwashili kwovwahila nshimbi jaNzambi. (2 Kor. 7:1; Fwi. 4:13) Hanyima yakwila mukwakushimwina namuleji kadizi chalekeliyi makanya, namuleji kadizi nindi, “Nineyi wunateli kuleka.” Chumichi chinamukoleshi kadizi nawa nakuhweleli nindi nateli kuleka. Iwu kadizi waBayibolu wakansi wamumbanda namoni muzañalu wukwetiyi muhela wakansi. Iwu kadizi waBayibolu chinamoniyi muzañalu wudi naniwu muhela, niyena nakukeña kwiluka yuma yayivulu yinaleteshi iwu muhela kwikala namuzañalu mpinji yejima.

12. Muloñadi chitukuhoshela netu muntu wejima muchipompelu wukweti mudimu wakukwasha atudizi aBayibolu?

¹² Neyi atudizi aBayibolu eluka akwakushimwina amavulu ashinshika, atudizi anateli kudizila kudi wena mwatalisha kuhemba  lushimbi lwaKristu lwakumukeña Nzambi niakwetu. (Yow. 13:35; 1 Tim. 4:12) Kubombelahu, neyi chitwahosha dehi hakusambila, kadizi waBayibolu nateli kudizila kudi akwakushimwina akweti kukala neyi kukwetiyi. Kadizi nateli kudizila kuyakutalilahu yawu nindi nateli kuhimpa yilwilu nakwikala kambanji kaKristu. (Kuhit. 30:11) Muntu wejima muchipompelu nateli kukwasha atudizi aBayibolu kupama kuspiritu. (Mat. 5:16) Yumanyi yimwelaña hamuntu-hamuntu hakwila nawu mukoleshi atudizi aBayibolu enzaña nakupompa?

13-14. Yesu welili ñahi nawapostolu indi chelili azeyi?

¹³ Tunakukeña kukwasha amanakwetu niahela azeya kulonda atachiki cheñi kushimwina nikwilisha atumbanji. Yesu chakwashiliyi apostolu indi hampinji yazeyeliwu chamwekeshaña chitwatela kwila ninetu makonu.

¹⁴ Chamanishiliyi Yesu mudimu windi hanu hamaseki nawa hadiñayi kwakwihi nakufwa, apostolu “ejima amushiyili nakumutemuka.” (Maku 14:50; Yow. 16:32) Yesu welili ñahi nawapostolu indi chelili azeyi? Chelili amusañuli, Yesu wayilejeli akwakumulonda nindi: “Bayi mutiya womaku! Yenu muyileji anakwami [nenu nasañuki].” (Mat. 28:10a) Yesu hakaanini apostolu indiku. Hela chakwila amushiyili, wayiteneni nindi “anakwami.” Kufwana Yehova, Yesu wayitiyilili luwi nawa wayanakeneni.—2 Anya. 13:23.

15. Twatoñojokañahu nenudi hadi antu aleka kushimwina?

¹⁵ Munjila yoyimu ninetu twayakamenaña antu aleka kushimwina. Hiyamanakwetu niahela nawa twayikeña. Tuchidi kwanuka nyidimu yazatiliwu kunyima awa akwetu akwakwitiya, amakwawu hadaha azatili hadi yaaka yayivulu. (Heb. 6:10) Twayanukaña nankashi. (Luka 15:4-7) Kufwana Yesu munjilanyi mutunateli kumwekesha netu twayakamenaña?

16. Tunateli kumwekesha ñahi netu twayakamenaña amanakwetu niahela azeya?

¹⁶ Yitambikenuña kukupompa. Njila yimu mwayikolesheleliyi Yesu apostolu indi, hikuyitambika kwinza nakupompa. (Mat. 28:10b; 1 Kor. 15:6) Munjila yoyimu, twatela kuyileja antu azeya kulonda enzeña nakupompa neyi enzaña wanyi. Tuneluki netu twatela kuyitambika kakavulu hakwila enzi. Yesu watiyili kuwaha chetejeliwu atumbanji twindi mutambi.—Esekejenu Matewu 28:16 niLuka 15:6.

17. Tunateli kwila ñahi neyi muntu wazeya yenza nakupompa?

¹⁷ Yishikijenu namuzañalu. Yesu wayitambwilili atumbanji twindi namuzañalu; wayili nakuyiwana nawa wahanjekeli nawu. (Mat. 28:18) Tunateli kwila ñahi neyi muntu wazeya yenza Kwitala daWanta nakupompa? Twatela kumushikija namuzañalu. Hakusambila tunateli kwakama netu tukwiluka wanyi jakuhosha. Twatela kumuleja netu tunatiyi kuwaha hakumumona chatela tumutiyishi nsonyi.

18. Tunateli kuyikolesha ñahi akwakushimwina azeya?

¹⁸ Yikoleshenu. Hadaha atumbanji twaYesu atoñojokeleña nawu akutwesha wanyi kushimwina mwahita kaayi kejima. Yesu wayikolesheli atumbanji twindi nindi: “Ami nukwikalaña nanenu mafuku ejima.” (Mat. 28:20) Komana chumichi chayikwashili atumbanji twindi? Eña. Haleheli wanyi, atachikili kuya “nakutañisha nikushimwina nsañu yayiwahi.” (Yilw. 5:42) Akwakushimwina azeya niwena akeñekaña kuyikolesha. Anateli kwikala nawoma wakutachika cheñi kushimwina. Twatela kuyileja netu akushimwinaña nkawawu  wanyi. Neyi anadiloñeshi dehi, twatela kuya nawu hamu. Chakadi nikujina, akuzañalala hakuyikwasha neyi atachika cheñi kushimwina nsañu yayiwahi. Neyi tuyimonaña awa antu azeya netu hiyamanakwetu niahela, akukola cheñi nawa chipompelu chikuzañalala.

19. Chumanyi chitwafwilaña, nawa muloñadi?

¹⁹ Mpinjinyi yitwakaleka kushimwina nikwilisha atumbanji? Tukutwalekahu kushika tuhu nikumakumishilu anshakaminu yamakonu. (Mat. 28:20; talenu Kulumbulula, “Kukuma kwanshakaminu yamakonu.”) Komana tukutwesha kushimwina nikwilisha atumbanji kushika nikukukuma? Tunakufwila kwila mwenimu. Twazatishaña mpinji yetu, ñovu nimaheta etu kulonda tuwani antu adi “nanyichima yashinshika yakukeña kwikala nawumi wahaya nyaaka.” (Yilw. 13:48) Neyi twila mwenimu, dikwila nawu tunakumwimbujola Yesu. Wahosheli nindi: “Yakuda yami yowu kwila nkeñelu yanowu wantemesheli nikumanisha mudimu windi.” (Yow. 4:34; 17:4) Dichuma chitwafwilaña ninetu. Tunakukeña kumanisha mudimu watukunjikawu. (Yow. 20:21) Nawa tunakukeña kutwalekahu kuzata iwu mudimu hamu nawakwetu, kushilahu tuhu niazeya.—Mat. 24:13.

20. Kwesekeja naAfwilipi 4:13, chumanyi chinateli kutukwasha kumanisha mudimu watwinkeliyi Yesu?

²⁰ Chapela wanyi kuzata mudimu watwinkeliyi Yesu. Hela chochu, iwu mudimu hitunakuwuzata nkawetuku. Yesu watukanini nindi wukwikalaña nanetu. Twazataña mudimu wakwilisha atumbanji muloña “tudi akwakukalakala hamu naNzambi” nawa “adikunda hamu naKristu.” (1 Kor. 3:9; 2 Kor. 2:17) Dichi tunateli kuwuzata. Hikukooleka kuzataku iwu mudimu nikukwashaku akwetu niwena kulonda azateñaku.—Tañenu Afwilipi 4:13.