1. Matthaia 28:18-20-a kan hmuh angin, Isua’n eng thupêk nge a pêk?

THIHNA ata Isua a thawhleh khân, Galili rama kal khâwm a zirtîrte hnênah a inlâr a. An hnênah thu pawimawh tak hrilh tûr a nei a ni. Chu chu eng nge ni? A thusawite chu Matthaia 28:18-20-ah kan hmu thei a ni.—Chhiar rawh.

2. Eng zawhnate nge kan sawiho vang?

² Zirtîr siam tûra Isua thupêk chu tûn laia Pathian chhiahhlawh zawng zawngte tân pawh a ni a. Chuvângin, Isua min pêk mawhphurhna nêna inkûngkaihin zawhna pathum i lo sawiho vang u. Pakhatna, zirtîr tharte hnêna Pathian thil phûtte kan zirtîr bâkah eng nge kan tih ngai? Pahnihna, kan Bible zirpuite’n thlarau lama hma an sâwn theih nân kohhrana thuchhuahtu zawng zawngin engtin nge an ṭanpui theih? Pathumna, rawngbâwlnaa tel tawh lo kan unaute chu zirtîr siamnaa tel leh tûrin engtin nge kan ṭanpui theih?

3. Isua thupêkah chuan eng kaihhruaina chiang tak nge tel?

³ Isua kaihhruaina chu a chiang hle. A thupêkte chu mite hnênah kan zirtîr tûr a ni a. Mahse, a pawimawh laite chu kan hmuh hmaih tûr a ni lo. Isua chuan: ‘Thu ka pêk zawng zawng che u zirtîr rawh u,’ tiin a sawi lo. Chu aiin: “Thu ka pêk zawng zawng che u pawm tûrin zirtîr rawh u,” tiin a sawi zâwk a. Kan Bible zirpuite kan zirtîr hunah, chu kaihhruaina chiang tak zâwm tûr chuan zirtîrtu mai ni lovin, tih dân tûr kawhhmuhtu kan nih a ngai a ni. (Tirh. 8:31) Engvângin nge chutianga kan tih a ngaih?

4. Thupêk pawm tih awmzia chu eng nge ni? Entîrna pe rawh.

 ⁴ Thupêk “pawm” tih chu thupêk zâwm tihna a ni a. Mi chu Krista thupêk pawm, a nih loh leh zâwm tûra kan zirtîr dân entîr nân, he tehkhin thu hi han ngaihtuah ta ila. Motor khalh dân zirtîrtu chuan a zirtîrte chu traffic dân pawm tûrin engtin nge a zirtîr ang? Zirtîrtu chuan kawngpui dân leh dûnte chu classroom-ah a zirtîr hmasa ngei ang. Mahse, chûng dânte zawm dân zirtîr tûr chuan thil dang pawh a tih a ngai a. Zirlaiin a thil zirte a taka hmang thei tûr chuan, kawngpuia motor khalh chhuahpuia a sîra lo ṭhuin, zirlaiin a thil zirte a taka a hman theih nâna a kawhhmuh zêl a ngai a ni. He entîrna aṭang hian eng nge kan zir theih?

5. (a) Johana 14:15 leh 1 Johana 2:3-a sawi angin, kan Bible zirpuite chu eng ti tûrin nge kan zirtîr ang? (b) Bible zirpuite kan zirtîr theih dân chungchângah entîrna pe rawh.

⁵ Mite Bible kan zirpui hian, Pathian thil phûtte kan zirtîr a. Mahse, chu aia tam pawh kan tih a ngai a ni. Kan Bible zirpuite chu an nî tin nuna an thu zirte nunpui tûra kan zirtîr a ngai bawk. (Johana 14:15; 1 Johana 2:3 chhiar rawh.) Kan zirpuite chu school-ah te, hnathawhnaah te, leh intihhlimnaahte Bible thu bul nunpui theih dân hre tûrin entawn tûr siamin kan zirtîr thei a. Bible kaihhruainate nunpuinain dinhmun hlauhawm laka min vênhim dân leh thu tlûkna fing siam tûra min ṭanpui theih dânte chu mahni thiltawn aṭangin kan hrilh thei bawk. Kan zirpuite chu an hriat ngeiah thlarau thianghlim hmanga kaihruai tûrin Jehova hnênah kan ṭawngṭaisak thei a ni.—Joh. 16:13.

6. Isua thupêkte pawm tûra mi dangte zirtîrnaah eng nge tel?

⁶ Isua thupêkte pawm tûra mi dangte zirtîrnaah eng nge tel? Kan Bible zirpuite chu zirtîrte siam duhna nei tûra kan ṭanpui a ngai a. Zirlai ṭhenkhat tân chuan thu hrilh rawngbâwlnaa tel anga inchan ringawt pawh a zâmawm hle thei a. Chuvângin, zawi zawia an rawn hriatthiam a, an thinlung khawih theitu leh hma la tûra chêttîrtu kaihhruainate kan pêk hunah dawhtheihna kan lantîr a ngai a. A nih chuan, kan zirpuite chu mite hnêna chanchin ṭha hrilh duhna nei tûrin engtin nge kan ṭanpui theih?

7. Kan Bible zirpuite chu mi dangte hnêna chanchin ṭha hrilh duhna nei tûrin engtin nge kan ṭanpui theih?

⁷ Kan Bible zirpuite chu hêng zawhnate hi kan zâwt thei a ni: “Lalram thuchah i pawmnain engtin nge nun ṭha zâwk nei tûra a ṭanpui che? Mi dangte pawhin he thuchah hi an hriat a ngai niin i hria em? Anmahni ṭanpui tûrin eng nge i tih theih?” tihte hi. (Thuf. 3:27; Mt. 9:37, 38) Zirlai chu kan Zirtîrna Hmanraw Bâwma tract-te chu hmuh la; tichuan, a chhûngte, a ṭhiante, leh a hnathawhpuite chhiar duh tûra a rin chu thlantîr ang che. Chumi hnuah, chûng tract-te chu engemaw zât pe la. Thiam taka sem chhuah dân pawh zirtîr bawk ang che. Ni e, kan zirpui chu baptisma la chang lo thuchhuahtu a rawn nih chuan, amah ṭanpui tûra thawhpui chu kan duh ngei ang.—Thur. 4:9, 10; Lk. 6:40.

8. Engvângin nge kan zirpuite’n Pathian leh vêngte hmangaihna thûk tak an neih chu a pawimawh? (“ Pathian Hmangaihna Nei Lehzual Tûra Kan Bible Zirpuite Ṭanpui Theih Dân,” tih bâwm chu en bawk rawh.)

⁸ Isua chuan ‘a thupêk zawng zawng pawm’ tûra mite zirtîr tûrin thu min pe tih hre reng ang che. Chutah chuan thu hrilh rawngbâwlna leh zirtîr siamna nêna inkûngkaihna nei thupêk ropui ber pahnih, Pathian leh vêngte hmangaihna a tel a ni. (Mt. 22:37-39) A inkûngkaihna chu eng nge ni? Thu hrilh  rawngbâwlnaa tel tûra min chêttîrtu ber chu hmangaihna—Pathian leh vêngte hmangaihna—a ni a. Zirlai ṭhenkhatin rawngbâwlnaa tel anga an inngaihtuah ringawt pawha hlauhna an nei chu hriatthiamawm tak a ni a. Chuvângin, Jehova ṭanpuinain mihring hlauhna chu zawi zawiin an hneh thei tih kan hriat chiantîr thei a ni. (Sâm 18:1-3; Thuf. 29:25) He thuziaka târ lan bâwm chuan Pathian hmangaihna nei chho tûra kan zirpuite kan ṭanpui theih dân kawngte a târ lang a ni. Chu bâkah, kan Bible zirpuite’n hmangaihna an lantîr lehzual theih nân kohhrana unaute’n eng nge an tih theih?

9. Motor khalh zirlai tehkhin thu-ah khân, zirlai chuan eng kawngtein nge a khalh ve huna a hman theih tûr thil ṭha tak takte a zir?

⁹ Motor khalh zirlai tehkhin thu kha han ngaihtuah leh ta ila. Zirlaiin zirtîrtu bula ṭhua motor a khalh chuan eng kawngtein nge a zir? Zirtîrtu thusawi a ngaihthlâkna leh fîmkhur taka motor khalhtu dangte a enna hmangin a ni. Entîr nân, zirtîrtu chuan kawngpuia mi dang intlân pelhtîrtu motor khalhtu ngilnei tak chu a kawhhmuh thei a. A nih loh leh, a lam pana rawn tlân motor khalhtu dangte mit a kah loh nâna hawihhâwm taka a motor êng herh hniamtu chu a kawhhmuh mai thei bawk. Chûng entîrnate chuan zirlai chu motor a khalh huna a hman theih tûr thil ṭha tak takte a zirtîr a ni.

10. Bible zirlai chu thlarau lama hma sâwn tûrin engin nge ṭanpui ang?

¹⁰ Chutiang bawkin, nunna kawng zawh ṭantu Bible zirlai chuan amah zirtîrtu hnên aṭang chauh ni lovin, Jehova chhiahhlawh dangte entawn tûr ṭha siam aṭang pawhin a inzir thei a. A nih chuan, kan Bible zirpuite chu thlarau lama hma sâwn tûrin engin nge nasa taka ṭanpui ang? Kristian inkhâwma telna hian a ni. Engvângin nge? Inkhâwma Bible kaihhruaina an dawnte chuan an hriatna a tipungin, an rinna a tihngheh bâkah, Pathian an hmangaihna a ṭhan chhohtîr vâng a ni. (Tirh. 15:30-32) Chu bâkah, amah zirtîrtu chuan inkhâwmnaah a harsatna tawh ang lo tâwk ve tawh unaute chu a hmêlhriattîr thei a. Zirlai chuan kohhranah Kristian hmangaihna hnathawh dân engte nge a hmuh mai theih? Hêng entawn tûr siamte hi i lo ngaihtuah ang u.

11. Zirlai chuan kohhranah eng entawn tûr ṭhate nge a hmuh theih a, chu chuan a chungah eng nghawng nge a neih theih?

¹¹ Nu leh pa mal ṭan Bible zirlai pakhat chuan a dinhmun anga ding Kristian unaunu a hmu a. Unaunu’n a fa naupang chu theih tâwp chhuahin a inkhâwmpui ṭhîn tih a hmuhna chuan zirlai rilru a khawih hle a. Mei zûk bânsan harsa ti tak zirlai chu chutiang harsatna lo hneh tawh thuchhuahtu nêna hmêlhriattîr a ni a. Thuchhuahtu chuan Jehova a hmangaihnain a thupêkte zâwm tûra a chêttîr thu a hrilh a ni. (2 Kor. 7:1; Phil. 4:13) Thuchhuahtu thiltawn a ngaihthlâk hnu chuan, “Nang pawhin i bânsan ve thei,” tia a sawi chu a ring lehzual a ni. Bible zirlai hmeichhe tleirâwl pakhatin Thuhretu ṭhalai unaunu chuan hlim takin a nun a hmang tih a hmu a. Unaunu hlimzia a hmuh chuan chutianga a hlim reng theih chhan chu hriat chian a duh a ni.

12. Kohhrana mi tinte hian Bible zirlaite ṭanpui tûrin mawhphurhna an nei ṭheuh tih engvângin nge kan sawi theih?

¹² Bible zirlaiin thuchhuahtu rinawm tam tak a hriat chuan, an thiltawn aṭangin Pathian leh vêngte hmangaih tûra Krista thupêk zawm awmzia chu a hre thei ang. (Joh. 13:35; 1 Tim. 4:12) Chu bâkah, kan hriat tawh angin, Bible zirlai chuan a harsatna ang hmachhawntu thuchhuahtute hnên aṭang pawhin a inzir thei a. Chûng an thiltawnte aṭangin Krista  zirtîr ni tûrin a inthlâk danglam ve thei tih a hria a. (Deut. 30:11) Kohhrana mi tinte hian Bible zirlaite chu thlarau lama hma sâwn tûrin kawng hrang hrangin kan ṭanpui thei a ni. (Mt. 5:16) Inkhâwma lo tel Bible zirlaite chu a mi mal takin eng fuihnate nge i pêk theih?

13-14. Isua’n a tirhkoh lunghnualte chu engtin nge a cheibâwl?

¹³ Rawngbâwlnaa tel tawh lo kan unaute chu zirtîr siam tûra Krista thupêk hlen chhuahnaa lo tel leh tûra ṭanpui kan duh a. Isua’n a tirhkoh lunghnualte a cheibâwl dân chuan tûn laia kan tih tûrte a târ lang a ni.

¹⁴ Leia a rawngbâwlna tâwp dâwn lama a thih hma lawk khân, tirhkohte chuan ‘an zaa thlahthlamin an tlân bosan ta vek a.’ (Mk. 14:50; Joh. 16:32) A nih leh, hun engemawti chhûng lunghnuala awm a tirhkohte chu Isua’n engtin nge a cheibâwl? A thawhleh hnu lawkah, a hnungzui ṭhenkhat hnênah: “Hlau suh u! Kal ta ula, [ka thawhleh tawh thu] ka unaute va hrilh rawh u,” tiin a hrilh a. (Mt. 28:10) Ani chu a tirhkohte chungah a beidawng mai lo. Anni chuan thlahthlam mah se, “ka unaute,” tiin anni chu a la ko reng a. Jehova ang bawkin, Isua chu zahngai thei tak leh mite ngaihdam peih tak a ni.—2 Lal. 13:23.

15. Rawngbâwlnaa tel tawh lote chu engtin nge kan thlîr?

¹⁵ Chutiang bawkin, keini pawhin rawngbâwlnaa tel tawh lote chu kan ngaihsak tak zet a. Anni chu kan unaute an ni a, kan hmangaih hle! Hun kal tawha an hmangaihna thiltihte chu kan hre reng a—a ṭhen phei chuan kum sâwmbi têl an lo ti tawh a ni. (Heb. 6:10) Anni chu kan va ngai tak êm! (Lk. 15:4-7) Isua entawnin, eng kawngtein nge anni chu kan ngaihsakzia kan lantîr theih?

16. Rawngbâwlnaa tel tawh lo kan unaute chungah engtin nge ngaihsakna kan lantîr theih?

¹⁶ Ngilnei takin sâwm rawh. Isua’n a tirhkoh lunghnualte a tihchak dân kawng khat chu inhmu khâwm tûra a sâwmna hmangin a ni a. (Mt. 28:10; 1 Kor. 15:6) Chutiang bawkin, tûn laiah pawh, rawngbâwlnaa tel tawh lote chu inkhâwmahte an lo la tel leh hrih lo a nih chuan, lo tel tûra sâwmin kan fuih thei a. An rawn inkhâwm nghâl lo a nih pawhin, vawi tam tak kan sâwm nawn a ngai thei tih kan hria a. Isua chu a zirtîrte’n a sâwmna an chhân lêt avângin a lâwm hle ngei ang.—Matthaia 28:16 leh Luka 15:6 chu khaikhin rawh.

17. Rawngbâwlnaa tel tawh lote inkhâwma an lo tel hian engtin nge kan lo dawnsawn ang?

¹⁷ Thinlung takin lo lâwm rawh. Isua’n a zirtîrte a hmuh chuan rilru hahdam taka awmtîrin, anmahni a be hmasa a. (Mt. 28:18) A nih leh, rawngbâwlnaa tel tawh lote chu Kingdom Hall-a an lo kal hunah engtin nge kan lo dawnsawn ang? Anni chu ṭha taka lo lâwmin hma kan la tûr a ni. A tîr chuan, sawi tûr kan vân pawh a ni mai thei. Mahse, anni chu awm nuam lova siam lovin, anmahni kan hmuh avânga kan hlimzia kan hrilh thei a ni.

18. Rawngbâwlnaa tel tawh lote chu engtin nge kan fuih theih?

¹⁸ Ṭha takin fuih rawh. Isua zirtîrte chuan khawvêl pum huapa thu hril tûra thupêk chu thil huphurhawm tak niin a ngai ngei ang. Isua chuan anni chu: “Khawvêl tâwp thleng pawhin, in hnênah ka awm zêl ang,” tiin a fuih a ni. (Mt. 28:20) Chu chuan a ṭanpui em? Ṭanpui e. Chumi hnu rei vak lovah, ‘zirtîr leh thu hrilin’ an buai hle a ni. (Tirh. 5:42) Rawngbâwlnaa tel tawh lote pawhin kan fuihna an mamawh a. Rawngbâwlnaa tel leh chu an huphurh hle ngei ang a. Thu hrilhnaah anmahni chauh an ni dâwn lo tih hrilhin kan fuih thei a ni. Rawngbâwlnaa  an tel leh theih hunah, anni chu kan thawhpui thei a. Chutianga kan ṭanpui avângin an lâwm hle ngei ang. Rawngbâwlnaa tel tawh lote chu kan unaute anga thlîra kan cheibâwl chuan, rawngbâwlnaah an lo tel leh theiin, chu chuan kohhranah hlimna a thlen thei a ni.

19. Engtih nge kan duh a, engvângin nge?

¹⁹ Zirtîr siamna chu eng chen nge kan la thawh dâwn? He khawvêl tâwp thlengin a ni ang. (Mt. 28:20) Isua min pêk he hna hi kan hlen thei ang em? Hlen theih kan tum tlat a ni! “Chantuana nun duhna rilru dik tak neite” zawn hmuh nân, kan hun, tha leh zung, leh thil neihte chu phal takin kan hmang a. (Tirh. 13:48, NW) Chutianga kan tih chuan, Isua entawn tûr siam chu kan zui a ni ang. Ani chuan: “Mitîrtu duh zâwng tih leh, a hna thawh zawh tûr hi ka chaw a ni,” tiin a sawi a. (Joh. 4:34; 17:4) Keini pawh chutianga tih chu kan duh tak zet a ni. Thawk tûra min pêk hna chu thawh zawh kan duh a. (Joh. 20:21) Rawngbâwlnaa tel tawh lote pawh tiamin, mi dangte chu he hnaa chhel taka min thawhpui tûrin kan duh a ni.—Mt. 24:13.

20. Philippi 4:13-a sawi angin, thawk tûra Isua min pêk hna chu engvângin nge kan hlen theih?

²⁰ Isua min pêk hna ropui tak hlen chhuah chu thil awlsam a ni lo. Mahse, he hna hi mahni chauhva kan thawh a ngai lo va. Isua chuan min awmpui a tiam a ni. Zirtîr siamna chu “Pathian hnathawhpuite” angin kan thawk a. (1 Kor. 3:9; 2 Kor. 2:17) Chuvângin, he hna hi kan hlen thei a ni. He rawngbâwlnaa tel theihna leh mi dangte pawh lo tel ve tûra ṭanpui theihna kan nei chu chanvo hlu a va ni tak êm!—Philippi 4:13 chhiar rawh.