CILONGESA 45
Twasa Kukwasa Bati Bakwetu Bononoke Mashiko a Kilistu?
‘Ngeci bene, yeni oni na kupwisa banu bandongesi bange, co balongeseni kwononoka byuma byoshe bije binjamishiki.’—MATEO 28:19, 20.
MWASO 89 Tolilileni, Ononokeni, co Mubezika
BILI MUNO MU CILONGESA *
1. Kwesekesa na mukanda wa Mateo 28:18-20, Yesu washikile bandongesi bendi balinge bika?
YESU mwasangukile, washolokele ku bandongesi bendi baje bakungulukile ku Ngalileya. Kuli byuma bimo bya seho byashakele kubaleka. Byuma muka bene obyo? Ebi byuma, tubiwana ku mukanda wa Mateo 28:18-20.—Tandeni.
2. Bihula muka bitukumbulula muno mu cilongesa?
2 Bangamba ba Njambi nabo, banapande kwononoka eli lishiko lya Yesu lya kupwisa banu bandongesi. Ngeci, tukumbulula bihula bitatu bije binakundama ku cipangi catwanene Yesu. Cihula ca kulibanga eci, omwo tulongesa bandongesi babaha byatonda Njambi ngwendi balinge, byuma muka bikwabo bitunapande kulinga? Ca mu cibali, bika bibanapande kulinga baka-kwambulula boshe mu cikungulukilo mangana bakwase baje bacililongesa Mbimbiliya kukola ku sipilitu? Ca mu citatu, twasa kukwasa bati bandolome na bandokazi betu baje banazeye ku sipilitu bashangumuke kwambulula lalo?
BALONGESENI KWONONOKA MASHIKO A KILISTU
3. Yesu watushikile ngwendi tulinge bika?
3 Lishiko lya Yesu lyapwa lyalyasi kulizibisisa. Tunapande kulongesa banu byuma byatushikile. Oloni kuli cuma ca seho citunapande kwanuka. Yesu kendekele ngwendi: ‘Balongeseni byuma byoshe binjamishiki.’ Oloni wendekele ngwendi: “Balongeseni kwononoka byuma byose bije binjamishiki.” Ngeci, nga tushaka kwononoka lishiko lya Yesu, co tunapande kulongesa banu batukalilongesa nabo byuma bibanapande kulinga nomwo mubanapande kubilingila. (Vili 8:31) Mwafwa bika?
4. Twasa kulongesa bati munu itukalilongesa nendi Mbimbiliya ononoke byuma byashikile Kilistu? Endekeni cakumwenako.
4 Twasa kulongesa bati munu ononoke byuma byashikile Kilistu? Cakumwenako cinatako casa kutukwasa kuzibisisa bitunapande kulinga. Munu uje alongesa mukwabo mwakwendesela mota, akamulongesa bati kwononoka mashiko a ha tapalo? Cakulibanga, amulongesa mashiko a ha tapalo anapande kukabangeya simbu kanda ashangumuke kwendesa. Oloni kuli cuma cikwabo canapande kulinga mangana amulongese kwononoka mashiko a ha tapalo. Napande kukala na muka-kulilongesa mu mota omwo endesa na kumutwamenena omwo apangesa byuma byanalilongesa. Eci cakumwenako citulongesa bika?
5. (a) Kwesekesa na mukanda wa Yowano 14:15 na 1 Yowano 2:3, bika bitunapande kulongesa banu batukalilongesa nabo Mbimbiliya ngwetu balinge? (b) Twasa kukwasa bati banu batukalilongesa nabo Mbimbiliya bapangese byuma bibali na kulilongesa?
5 Mutukalilongesa Mbimbiliya na banu, tukabalongesa byuma byashaka Njambi ngwendi tulinge. Oloni kuli byuma bikwabo bitunapande kulinga. Tunapande kubalongesa kupangesa byuma bibali na kulilongesa mu kuyoya kwabo kwa litangwa na litangwa. (Tandeni Yowano 14:15; 1 Yowano 2:3.) Byuma bitulinga byasa kukwasa banu batukalilongesa nabo Mbimbiliya bazibuke mwakupangesela binangulo bya mu Mbimbiliya bibali na kulilongesa nga bali ku sikola, ku cipangi nambe ha simbu ya kulizima buli. Twasa kubaleka omwo kupangesa binangulo bya mu Mbimbiliya kwatunyungililile nomwo kwatukwaselele kwangula mwamubwa bya kulinga. Ha simbu ituli na munu itukalilongesa nendi Mbimbiliya, twasa kulomba Yehova ngwetu amutwamenene kupangesa sipilitu yendi ya kujela.—Yowa 16:13.
6. Bika byalibungila mu kulongesa bakwetu kwononoka byuma byashikile Yesu?
6 Bika byalibungila mu kulongesa bakwetu kwononoka byuma byashikile Yesu? Tunapande kukwasa banu batukalilongesa nabo bakale na lishungu lya kupanga cipangi ca kupwisa banu bandongesi. Bamo banasa kuziba lyoba kwambulula. Ngeci, tunapande kukala na mbunge ya kubandamena omwo tubakwasa kuzibisisa binangulo bya mu Mbimbiliya bije bikanyamesa likulahelo lyabo. Nga tulinga ngoco, co tubeta ku mbunge na kubashongangeya kwambulula. Bika bitunapande kulinga mangana tukwase banu batukalilongesa nabo Mbimbiliya bakale na lishungu lya kwambulula muzimbu waubwa?
7. Twasa kukwasa bati munu itukalilongesa nendi akale na lishungu lya kwambulula muzimbu waubwa?
7 Mwasa kwihula munu imukalilongesa nendi Mbimbiliya ngweni: “Kupangesa byuma bimuli na kulilongesa mu Mbimbiliya kunamikwasa bati mu kuyoya kweni? Musinganyeka ngweni bakweni nabo banapande kuziba ou muzimbu ndi? Munapande kulinga bika mangana mubakwase?” (Visi 3:27; Mateo 9:37, 38) Mweseni munu imukalilongesa nendi matilakiti aje ali mu cikasha ca bikwata bya kupangesa mu kulongesa, co mulekeni ngweni anguleho aje amona ngwendi babushoko bwendi, babusamba bendi nambe banu bakapanga nabo basa kushaka kuwatanda. Mwaneni matilakiti amangi. Mumweseni mwakwanena tilakiti mu ngila yaibwa. Co nga munu itukalilongesa nendi apwa muka-kwambulula wa kujeneka kumbwitika, tunapande kwambulula nendi mangana tumukwase.—Kwambu 4:9, 10; Luka 6:40.
CIKUNGULUKILO CASA KUKWASA BATI BANDONGESI BAKOLE KU SIPILITU?
8. Mwafwa bika baka-kulilongesa Mbimbiliya banapande kuzema manene Njambi na banu? (Taleni lalo cipalo ca “ Twasa Kukwasa Bati Banu Batukalilongesa Nabo Mbimbiliya Bazeme Manene Njambi?”)
8 Anukeni ngweni Yesu watushikile ngwendi tulongese bakwetu “kwononoka byuma byoshe” bije byatushikile. Ebi binambateselela na mashiko akama abali. Lishiko lya kuzema Njambi neli lya kuzema bakwetu, co eci cizemo citukwasa mu cipangi ca kupwisa banu bandongesi. (Mateo 22:37-39) Cizemo cikatukwasa bati omwo twambulula? Kuzema Njambi na kuzema bakwetu kukekwo kukatushongangeya twambulule. Baka-kulilongesa Mbimbiliya bamo banasa kuziba lyoba kwambulula. Oloni twasa kubakwasa bakulahele ngwabo mu kwita kwa simbu Yehova abakwasa bahyane lyoba lya kutewa banu. (Myaso 18:1-3; Visi 29:25) Muno mu cilongesa, muli cipalo cije casa kutukwasa kuzibuka bitunapande kulinga mangana tukwase munu itukalilongesa nendi azeme manene Njambi. Bika bibanapande kulinga bandolome na bandokazi mu cikungulukilo mangana bakwase bandongesi babaha kuzema manene Njambi na banu?
9. Muka-kulilongesa kwendesa mota itunendeka, ali na kulilongesa mu bingila muka?
9 Tusimutwiyeni lalo ha cakumwenako ca munu uje alilongesa mwakwendesela mota. Asa kulilongesa bati nga endesa mu tapalo oku ali hamo na muka-kumulongesa? Asa kulilongesa nga atolilila kuli muka-kumulongesa na kutala mubali na kwendesela bakwabo. Cakumwenako, mulongesi nasa kumumwesa muka-kwendesa uje atabesa bakwabo bamutubakane. Nambe hamo nasa kumumwesa muka-kwendesa uje atepululako ku ceke ca malaiti a mota yendi mangana keti atohwe bakwabo baka-kwendesa bimota. Ebi byakumwenako byasa kukwasa muka-kulilongesa azibuke byanapande kulinga omwo endesa.
10. Bika byasa kukwasa muka-kulilongesa Mbimbiliya akole ku sipilitu?
10 Mu ngila imo lika, muka-kulilongesa Mbimbiliya uje nashangumuka kupangela Yehova, alilongesa byuma bimo byabibwa kuli mulongesi wendi na ku bangamba ba Yehova bakwabo. Bika byasa kukwasa baka-kulilongesa Mbimbiliya bakole ku sipilitu? Kukunguluka. Mwafwa bika? Byuma bibakaziba ku biwano bibakwasa kuzibuka byabingi, kukanyamesa likulahelo lyabo na kuzema manene Njambi. (Vili 15:30-32) Co lalo, nga bali ku biwano mulongesi nasa kukwasa muka-kulilongesa alizibuke na bandolome na bandokazi baje bali na kuliwana na byuma bya kulifwa na bije byali na kuliwana nabyo. Muka-kulilongesa alimwena omwo bandolome na bandokazi bali na kumweselamo cizemo mu cikungulukilo. Tusimutwiyeni ha byakumwenako binatako.
11. Byuma muka byanasa kunanguka muka-kulilongesa Mbimbiliya mu cikungulukilo, co byasa kumukwasa bati?
11 Acisinganyekeni ngweni muka-kulilongesa Mbimbiliya uje ali na kulela bana likalyendi amona ndokazi uje ali na kulela bana likalyendi. Akomoka omwo ali na kumona mwali na kulifwitila uje ndokazi kwija na bana bendi babandondo ku Njubo ya Bumwene simbu yoshe. Muka-kulilongesa Mbimbiliya uje ali na kwonowa kwecela kusipa makaya alizibuka na muka-kwambulula uje wakele na bukalu bwa kulifwa, oloni wabuhyanene. Co ou muka-kwambulula aleka muka-kulilongesa Mbimbiliya omwo kuzema Yehova kwamukwaselele ononoke mashiko endi. (2 Koli 7:1; Fili 4:13) Munima ya kumuleka byuma byamukwasele ecele kusipa, amuleka ngwendi, “Nobe wasa kwecela kusipa.” Co ou muka-kulilongesa Mbimbiliya aliziba ngwendi asa kulinga ngoco. Mumbanda umo uje ali na kulilongesa Mbimbiliya ananguka ngwendi ndokazi umo wa mumbanda ali na kulikuwa kuyoya. Omwo uje muka-kulilongesa Mbimbiliya amona ngwendi ndokazi wapwa wa kubwahelela simbu yoshe, ashaka kuzibuka bikamulingisa apwe wa kubwahelela.
12. Bika twendekela ngwetu umo na umo mu cikungulukilo asa kulingako bimo mangana akwase baje bacili na kulilongesa Mbimbiliya?
12 Nga muka-kulilongesa Mbimbiliya alizibuka na bandolome na bandokazi babangi, co azibuka byanapande kulinga mangana ononoke lishiko lya Kilistu lya kuzema Njambi na kuzema bakwetu. (Yowa 13:35; 1 Tima 4:12) Ngwe mutunendeka ha kulibanga, muka-kulilongesa Mbimbiliya asa kulilongesa kuli baka-kwambulula baje bali mu bukalu bwa kulifwa nobu bwali nabwo. Byuma byalilongesa kuli baje baka-kwambulula bimulingisa amone ngwendi asa kutengululako byuma bimo mangana apwe ndongesi ya Kilistu. (Kwitu 30:11) Umo na umo mu cikungulukilo asa kulingako bimo mangana akwase baka-kulilongesa Mbimbiliya bakole ku sipilitu. (Mateo 5:16) Byuma muka bimukalingi mangana mushongangeye baka-kulilongesa Mbimbiliya baje bakaija ku biwano?
KWASENI BAJE BANAZEYE KU SIPILITU BASHANGUMUKE KWAMBULULA LALO
13-14. Yesu walingile bika omwo tupositolo bendi bazeyele?
13 Tushaka kukwasa bandolome na bandokazi betu baje banazeye ku sipilitu mangana bashangumuke lalo kupanga cipangi ca kwambulula na kupwisa banu bandongesi. Byuma byalingile Yesu omwo tupositolo bendi bazeyele, bitukwasa kuzibuka bitunapande kulinga.
14 Simbu kanda bamutsiye tupositolo bendi “boshe bamusezele, co batewele.” (Mako 14:50; Yowa 16:32) Yesu walingile bika omwo tupositolo bendi bazeyele? Yesu mwasangukile, walekele baka-kumukabangeya bamo ngwendi: “Kesi muzibe lyoba. Yeni mukaleke bandolome bange [ngweni njinasanguka].” (Mateo 28:10a) Yesu kayengwile tupositolo bendi. Nameme bamusezele, oloni wabatumbwile ngwendi “bandolome bange.” Ngwe mwa Yehova, Yesu nendi wakele na ngozi, co wapwile muka-kusambesa.—2 Vimye 13:23.
15. Tukalizibi bati omwo bandolome na bandokazi betu bamo banecela kwambulula?
15 Mu ngila imo lika, netu tushaka kukwasa bandolome na bandokazi betu baje banecela kwambulula. Twabazema manene. Tucili na kwanuka mubakele na kupangela na nzili aba bandolome na bandokazi betu. (Heve 6:10) Co tukashungwiya kubamona. (Luka 15:4-7) Twasa kumwesa bati ngwetu twabaka mbunge ngwe mwalingile Yesu?
16. Twasa kumwesa bati ngwetu tushaka kukwasa bandolome na bandokazi betu baje banazeye ku sipilitu?
16 Balanyeni ku biwano. Ngila imo yapangesele Yesu mu kushongangeya tupositolo bendi baje bazeyele yapwile kubalanya ku ciwano. (Mateo 28:10b; 1 Koli 15:6) Mu ngila imo lika, netu twasa kushongangeya baje banazeye ngwetu bashangumuke kukunguluka nga banalikele kulinga ngoco. Tuzibuka ngwetu tunasa kubalanya lwalwingi asina beje ku biwano. Yesu wabwahelelele omwo bandongesi bendi baile ku ciwano.—Esekeseni Mateo 28:16 na Luka 15:6.
17. Byuma muka bitunapande kulinga nga ndolome nambe ndokazi uje nazeye ku sipillitu aija ku biwano?
17 Batambuleni na nzanzu. Bandongesi ba Yesu bashubulukile mubaliwanene nendi mwafwa kabandamenene ngwendi baije kuli ikeye, oloni waile kuli bakebo na kusimutwiya nabo. (Mateo 28:18) Byuma muka bitunapande kulinga nga ndolome nambe ndokazi uje nazeye ku sipilitu aija ku Njubo ya Bumwene? Tunapande kumutambula na nzanzu. Hamo tunasa kusinganyeka ngwetu kutuzibuka bitunapande kwendeka mangana tumutakamese. Tunasa kwendeka lika mu kasingimiko ngwetu twabwahelela manene kumumona.
18. Twasa kutakamesa bati baka-kwambulula baje banazeye ku sipilitu?
18 Batakameseni. Bandongesi ba Yesu hamo balizibile ngwabo kubasa kwambulwila mu kaye koshe. Yesu wabatakamesele mwabalekele ngwendi: “Njikakala neni matangwa oshe.” (Mateo 28:20) Majwi endi abatakamesele bene ndi? Eyo. Munima ya simbu yaindondo lika, bashangumukile “kulongesa na kwambulula biñanda byabibwa.” (Vili 5:42) Netu tunapande kutakamesa baka-kwambulula baje banazeye ku sipilitu. Banasa kuliziba ngwabo kubasa kwambulula lalo. Twasa kubaleka ngwetu kubambulula lika lyabo. Nga banalibwahesela kuya na kwambulula, twasa kwambulwila hamo nabo. Bakandelela manene ku bukwasi bwetu nga twambulwila hamo nabo omwo bashangumuka kwambulula lalo. Nga tukwasa bandolome na bandokazi betu baje banazeye ku sipilitu, co tubaboshe mu cikungulukilo tupwa ba kubwahelela.
TUSHAKA KUMANESA CIPANGI CIBANATWANA
19. Byuma muka bitushaka kulinga, co mwafwa bika?
19 Cipangi ca kupwisa banu bandongesi tucipanga ha simbu ya kupwa hali? Tutwalelelaho kucipanga kweta na ha kukotoka kwa kano kaye. (Mateo 28:20, taleni ha mutamba wa Litaluso za Manzwi ha mutwe wa, “Nako ya kufela kwa lifasi.” mu Mbimbiliya ya Toloko ya Lifasi Lelinca.) Twasa kutwalelelaho kwambulula na kupwisa banu bandongesi kweta na kumamaneselelo ndi? Eyo. Tushaka kupangesa simbu yetu, na nzili yetu na byuma bituli nabyo mu kushakazeka banu “ba bimbunge byabibwa bya kushaka kuyoya myaka yoshe.” (Vili 13:48, NWT) Nga tulinga ngoco, co tutembwinina Yesu. Wendekele ngwendi: “Byakulya byange binapu kwononoka cizango ca uje wanjitumine na kumanesa bipangi byanjanene ngeci njibilinge.” (Yowa 4:34; 17:4) Netu bikebyo bitushaka kulinga. Tushaka kumanesa cipangi cibanatwana. (Yowa 20:21) Co tushaka ngwetu na bakwetu batwaleleleho kulinga eci cipangi, kwambateselela na bandolome na bandokazi betu baje banazeye ku sipilitu.—Mateo 24:13.
20. Kwesekesa na mukanda wa Filipu 4:13, bika twendekela ngwetu twasa kumanesa cipangi catwanene Yesu?
20 Tuzibuka ngwetu kulinga cipangi catwanene Yesu keti kwakwasi. Oloni kutwesi na kulinga eci cipangi likalyetu. Yesu wakulahesele ngwendi akala hamo netu. Omwo tupanga cipangi ca kupwisa banu bandongesi, “tuli na kupangela hamo [na] Njambi” ha kupwa “bangamba ba Kilistu.” (1 Koli 3:9; 2 Koli 2:17) Ngeci, twasa kucimanesa. Twabezika manene ha kulinga eci cipangi na kukwasa bakwetu bacilinge.—Tandeni Filipu 4:13.
MWASO 79 Balongeseni Bakolese
^ par. 5 Yesu washikile baka-kumukabangeya ngwendi bapwise banu bandongesi na kubalongesa kwononoka byuma byoshe bije byabashikile. Muno mu cilongesa, tusimutwiya mutwasa kwononokela eli lishiko lya Yesu. Biñanda bimo bili muno mu cilongesa, babisonekele mu Kaposhi ka Kukengela ka Silozi ka July 1, 2004, liputa 14-19.
^ par. 66 KULUMBUNUNA BIKUPULO: Ndokazi ali na kutwamenena cilongesa ca Mbimbiliya, co ali na kuleka muka-kulilongesa Mbimbiliya byanapande kulinga mangana azeme manene Njambi. Kutundaho, muka-kulilongesa Mbimbiliya apangesa byuma bitatu byanamuleke muka-kumulongesa.
