ARTIKULO DIˈIB YAˈËXPËJKP 45
Nˈokpudëjkëmë jäˈäy parë tmëmëdowët ti Kristë nyiˈanaˈamë
“Nëjx yaˈëxpëktë jäˈäyëty [...] esëts ëj njäˈäyˈattët. [...] Tukniˈixëdë es tkuytyunët tëgekyë diˈibëts ëj miits të ndukˈanaˈamdë” (MAT. 28:19, 20).
ËY 89 Jyobaa kyunuˈkxypy pënaty mëmëdoowëp
DIˈIB YAJNIMAYTYÄˈÄGÄÄMP *
1. ¿Ti Jesus nyiˈanaˈamë mä Matewʉ 28:18-20?
KO JESUS jyukypyejky, ta nyaytyukˈijxë ja yˈëxpëjkpëty mä nety të tyuˈukmuktë Galilea, pes yëˈë nety nyiˈanaˈamëyaampy diˈib jëjpˈam mbäät ttundë. Parë nnijäˈäwëm, min nˈokkäjpxëmë Matewʉ 28:18-20 (käjpx).
2. ¿Tijaty nˈatsoowëmbitäˈänëm?
2 Niˈamukë ninuˈun tyam nDiosmëduˈunëm, nan tsojkëp nmëmëdoˈowëm ti Jesus ojts tniˈanaˈamë: nyaˈëxpëjkëmë jäˈäy. Pääty, min nˈokˈatsoˈowëmbijtëm tëgëëgë yajtëˈëwën parë mbäät nduˈunëm ti ojts tniˈanaˈamë. Myëduˈuk, ¿tijaty mbäät nˈaktuˈunëm ko nety ja jäˈäy të ndukniˈˈijxëm ti Dios tsyojkypy ttunët? Myëmajtsk, ¿wiˈix mbäädë nmëguˈukˈäjtëm tpudëkëdë ja jäˈäy diˈib nyaˈëxpëjkëm parë wyimbatët? Ets myëdëgëëk, ¿wiˈix mbäät nbudëjkëm ja nmëguˈukˈäjtëm diˈib të tmastutnëdë Diosë tyuunk parë jatëgok ttundët ti Jesus nyiˈanaˈamë?
NˈOKTUKNIˈˈIJXËM PARË TMËMËDOWDËT TI KRISTË OJTS TNIˈANAˈAMË
3. ¿Tidën meerë Jesus ojts tniˈanaˈamë?
3 Jesus yajxon ojts tnigajpxy ko tsojkëp ndukniˈˈijxëmë jäˈäy tijaty ojts tniˈanaˈamë. Per jëjpˈam njamyajtsëm ko kyaj jeˈeyë ojts jyënaˈany: “Tukniˈˈixëdë tukëˈëyë tijatyëts miitsëty të ndukˈanaˈamdë”. Yëˈë duˈunën jyënany: “Tukniˈˈixëdë es tkuytyunët tëgekyë diˈibëts ëj miits të ndukˈanaˈamdë”. Parë nmëmëdoˈowëm extëmë Jesus ojts tniˈanaˈamë, tsojkëp ndukniˈˈijxëm ja jäˈäy diˈib nyaˈëxpëjkëm ti mbäät ttundë, per nanduˈunë net ndukniˈˈijxëm wiˈix ttundët. ¿Tiko?
4. Nimaytyäˈäk mët tuˈugë ijxpajtën wiˈix mbäät nbudëjkëm ja diˈib nyaˈëxpëjkëm parë tmëmëdowët ti Kristë ojts tniˈanaˈamë.
4 ¿Wiˈix mbäät ndukniˈˈijxëm tuˈugë jäˈäy parë tmëmëdowët ti Jesus ojts tniˈanaˈamë? Min nˈokˈijxëm tuˈugë ijxpajtën. Ko tuˈugë jäˈäy ttukniˈˈixë ja myëguˈuk wiˈix kyarrëwiidët, tyukmëtmaytyakypy ko siudääjoty tamˈäjtpë anaˈamën diˈib mbäät twingutsëˈëgë. Per kyaj jeˈeyë ttukmëtmaytyaˈaky, jyamyëdäjtypyë net parë ttukniˈˈixë wiˈix mbäät twingutsëˈëgë ja anaˈamën. ¿Ti tyäˈädë xytyukniˈˈijxëm?
5. 1) Extëm jyënaˈanyë Fwank 14:15 etsë 1 Fwank 2:3, ¿ti tsojkëp ndukniˈˈijxëm ttunët ja jäˈäy diˈib nyaˈëxpëjkëm? 2) ¿Wiˈix mbäät nbudëjkëm parë tkuytyundët ja Biiblyë kyäjpxwijën?
5 Ko nyaˈëxpëjkëm tuˈugë jäˈäy, ta ndukniˈˈijxëm ti Jyobaa tsyojkypy ets nduˈunëm. Per kyaj yëˈëyëty, tsojkëbën ndukniˈˈijxëm wiˈix tkuytyunët mä jyukyˈäjtën tijaty yˈëxpëjkypy (käjpxë Fwank 14:15; 1 Fwank 2:3). Ja ijxpajtën diˈib nmoˈoyëm, mbäät pyudëkëty parë tˈixët wiˈix yajkuytyunäˈänyë Biiblyë kyäjpxwijën mä eskuelë, mä nduˈunëm o mä nwinˈijxëmë ixy jawë. Nan mbäät ndukmëtmaytyakëm wiˈix ojts xypyudëjkëmë Biiblyë kyäjpxwijën parë ojts nwinˈijxëm diˈib oybyëtsëmëp o wiˈix ojts xykyuwäˈänëm. Ets ko nnuˈkxtakëm mët ja jäˈäy diˈib nyaˈëxpëjkëm, nˈokˈamdoˈowëmë Jyobaa parë nyëˈëmoˈoy tyuˈumoˈoyëdët mët yëˈëgyëjxmë yˈespiritë santë (Fwank 16:13).
6. ¿Tijaty mbäät nˈaktuˈunëm parë nbudëjkëm ja diˈib nyaˈëxpëjkëm ets tmëmëdowët tijatyë Jesus nyiˈanaˈamë?
6 ¿Tijaty mbäät nˈaktuˈunëm parë nbudëjkëm ja diˈib nyaˈëxpëjkëm ets tmëmëdowët tijatyë Jesus nyiˈanaˈamë? Tsojkëp nbudëjkëm ets tmëdatët ja tsojkën parë nanduˈun dyaˈëxpëkäˈänët ja jäˈäy. Ta nääk diˈib nëgooyë tsëˈëgë tyuktëjkëndë jantsy jeˈeyë tmëdowdë ko tsojkëp nyëjkxtët ëwäˈkx käjpxwäˈkxpë. Pääty, tsojkëp nbudëjkëm maˈkxtujkën myëët parë tjaygyukëdët yajxon ja tëyˈäjtën diˈib miimp mä Biiblyë ets dyajkëktëkëdët ja myëbëjkën. Duˈuntsoo, mbäät ja yˈääw jyot jyënäˈändë ets nyëjkxtët ëwäˈkx käjpxwäˈkxpë. ¿Wiˈix mbäät nbudëjkëm parë tmëdattët ja tsojkën ets tnimaytyäˈägäˈändët ja oybyë ayuk?
7. ¿Wiˈix mbäät nbudëjkëm ja diˈib nyaˈëxpëjkëm parë jyënäˈänët ja yˈääw jyot ets tˈëwäˈkxäˈän tkäjpxwäˈkxäˈänët ja oybyë ayuk?
7 Mbäät nyajtëˈëwëm ja jäˈäy diˈib nyaˈëxpëjkëm: “¿Wiˈix kujk yˈoyë mjukyˈäjtën desde ko ojts xymyëdoyë Diosë yˈayuk? Ets wiˈix mˈokwinmay, ¿tsojkëbëdaa nanduˈunë wiink jäˈäy tmëdowët? ¿Ti mbäät xytyuny parë xypyudëkët?” (Prov. 3:27; Mat. 9:37, 38). Nˈoktukwinˈijxëm kanäägë trataadë ets nˈokˈyajtëˈëwëm: ¿Diˈibëdaa yˈoymyëdowëbë mjiiky mmëguˈuk, mmëtnaymyaayëbë o diˈib mëët mdundë? Nˈoktukwinˈijxëm tuˈuk majtskë trataadë ets nˈoktuundakëm mëët parë kyaj tsyëˈëk jyawët ko nety tˈawanë. Etsë tyäˈädë jäˈäy duˈunyëm yajpudëkëyaˈany ko nety nyaxy publikadoor (Ecl. 4:9, 10; Luk. 6:40).
WIˈIX MBÄÄDË NMËGUˈUKˈÄJTËM TPUDËKËDË JA JÄˈÄY DIˈIB NYAˈËXPËJKËM
8. ¿Tiko jyëjpˈamëty ets ja diˈib nyaˈëxpëjkëm ttsokët mas niˈigyë Dios ets ja myëguˈuk? (Ixë rekuäädrë “ Wiˈix mbäät nbudëjkëm ja diˈib nyaˈëxpëjkëm parë mas niˈigyë ttsokëdë Dios”).
8 Nˈokjamyajtsëm ko Jesus jyënany ets ndukniˈˈijxëmë jäˈäy parë tkuytyunët tukëˈëyë tijaty ojts tniˈanaˈamë. Tyäˈädë yëˈë nanduˈun yˈandijpy ndukniˈˈijxëm ja majtskpë mandamientë diˈib mas jëjpˈam, ttsokëdë Dios etsë myëguˈuk (Mat. 22:37-39). Ko ndukniˈˈijxëm parë tmëmëdowët, nbudëjkëmë nety parë yˈëwäˈkx kyäjpxwäˈkxët. Näägë jäˈäy diˈib nyaˈëxpëjkëm, tsëˈkëdëp parë nyëjkxtët ëwäˈkx käjpxwäˈkxpë, per mbäät nˈanmäˈäyëm ko Jyobaa pudëkëyanëp parë wanaty wanaty jyëgaˈagëdë tsyëˈëgë (Sal. 18:1-3; Prov. 29:25). Tyäˈädë artikulo myëmiimpy tuˈugë rekuäädrë mä yajnimaytyaˈaky wiˈix mbäät nbudëjkëm ja diˈib nyaˈëxpëjkëm parë mas niˈigyë ttsokëdë Dios. Ets ja nmëguˈukˈäjtëm diˈib mëët nˈyoˈoyëm reunyonk, nan mbäät pyudëkëdë parë mas niˈigyë dyaˈixëdët ja tsojkën.
9. ¿Tijaty pudëjkëp tuˈugë jäˈäy parë tjaty yajkarrëyoˈoyët?
9 Min jatëgok nˈoknimaytyakëm ja jäˈäy diˈib yajtukniˈˈijxëbë karrëwiˈtk. Mientrës jam yajkarrëyoˈoy, kyaj yëˈëyë tmëdoowgukë wiˈix yˈanëˈëmxëty ja diˈib jam tukniˈˈijxëp, nanduˈunën tˈixy ttuny wiˈix yajkarrëyoˈoytyë ja oy tsyofeer. Extëm nˈokpëjtakëm, mbäät yˈanëˈëmxëty ja diˈib jam tukniˈˈijxëp parë tˈixët wiˈix tuˈugë oy tsyofeer tˈlugäärmoˈoy ja myëguˈuk parë tyëkët mä ja maygyarrë të nyayjyëjpjëëbëty. Ets nan mbäät tˈanëëmë parë tˈixët wiˈix tuˈugë jäˈäy dyajjënakyë kyarrë jëën parë kyaj ttukwindëˈkxëˈëky ja myëguˈuk diˈib miimp. Ko yajtukˈixy wiˈixë jäˈäy yajkarrëyoˈoytyë, mëjwiin kajaa pyudëkëty.
10. ¿Ti pudëkëyanëp ja jäˈäy diˈib nyaˈëxpëjkëm parë niˈigyë wyimbatët?
10 Nanduˈunën jyaty mët ja jäˈäy diˈib nyaˈëxpëjkëm, ko tpatsoony ja nëˈë tuˈu diˈib yajnëjkxp mä jukyˈäjtën, kyaj yëˈëyë pyudëkëyaˈanyëty tijaty ja myaˈestrë tukniˈˈijxëp, nanduˈunën ja oybyë ijxpajtën diˈib yäjktëp ja nmëguˈukˈäjtëm. Päätyën jyëjpˈamëty nyëjkxët reunyonk parë wyimbatët, pes jap mas niˈigyë tijaty tjatäˈäny, kyëktëkëyaˈanyë myëbëjkën ets pyudëkëyaˈanyëty parë mas niˈigyë ttsokëdë Dios (Apos. 15:30-32). Mä reunyonk, nan mbäät jap ja myaˈestrë tyukˈixyˈatyëtyë nmëguˈukˈäjtëm diˈib nanduˈun yaˈijx yajpattëp extëm yëˈë ets mbäät mëët nyayjaygyukëdë. Nan mbäät jap tˈixy wiˈixë nmëguˈukˈäjtëm dyajnigëxëˈëktë tsojkën. Min nˈokˈijxëm tuˈuk majtskë ijxpajtën.
11. ¿Tijaty yˈixandëp ja jäˈäy diˈib nyaˈëxpëjkëm ko nyëjkxtët reunyonk, ets wiˈix pyudëkëyäˈänëdë?
11 Myëduˈuk, yëˈë mä tuˈugë toxytyëjkjäˈäy nyijkxy reunyonk diˈib aduˈugë yˈuˈunk yajˈyeˈky yajpejtypy, ets ta jap tˈixy tuˈugë nmëguˈukˈäjtëm diˈib nanduˈun yaˈijx yajpatp. Tyäˈädë toxytyëjkjäˈäy pudëjkëp mëjwiin kajaa ko tˈixy nuˈunën ja nmëguˈukˈäjtëm dyajnimëjääwdaˈaky parë jyaˈty reunyonk mët ja yˈënäˈkuˈunk. Ets myëmajtsk, yëˈë tuˈugë jäˈäy diˈib tsiptakxëp tmastuˈudëdë juˈuky, per ta tˈixyˈaty tuˈugë nmëguˈukˈäjtëm diˈibë nety nanduˈun juˈkp ets ojts tsyiptakxëty tmastuˈudët. Ta tyukmëtmaytyaˈagyëty ko diˈib pudëjkë parë tmëmëdooyë Biiblyë kyäjpxwijën ets tmastuty, yëˈë ko ttsokyë Jyobaa (2 Kor. 7:1; Filip. 4:13, TNM). Mä duˈun tyukmëtmaytyaˈagyëty, ta yˈanëˈëmxëty ko yëˈë nan mbäät tmastuˈuty. Tyäˈädë jäˈäy mëjwiin kajaa pyudëkëty ets ta wyinmay ko mbäät duˈun ttuny. Ets ja myëdëgëëkpë ijxpajtën, yëˈë tuˈugë kiixy diˈib yˈëxpëjkypyë Biiblyë, ta tpëkyë kuentë wiˈix tuˈugë myëduknax yajpääty agujk jotkujk ko tmëdunyë Jyobaa. Ets ko duˈun tˈixy, ta tnijawëyaˈany tiko xëmë ja nmëguˈukˈäjtëm yajpääty agujk jotkujk.
12. ¿Tiko njënäˈänëm ko mbäät niˈamukë nbudëjkëm yiˈin waanë ja jäˈäy diˈib ëxpëjkp parë wyimbatët?
12 Ko ja jäˈäy diˈib nyaˈëxpëjkëm tˈixyˈatët niganäägë nmëguˈukˈäjtëm, ta tpëkäˈänyë kuentë tidën yˈandijpy nmëmëdoˈowëm ja Kristë yˈanaˈamën: ntsojkëmë Dios ets ja nmëguˈukˈäjtëm (Fwank 13:35; 1 Tim. 4:12). Ets extëm të nˈokˈijxëmbë, ja jäˈäy diˈib nyaˈëxpëjkëm, nan mbäät pyudëkëtyë yˈijxpajtënë nmëguˈukˈäjtëm diˈib nanduˈun yaˈijx yajpattëp extëm yëˈë. Ets duˈun tpëkäˈänyë kuentë ko mbäät dyajtëgatsyë jyukyˈäjtën parë tpanëjkxëdë Jesus (Deut. 30:11). Extëm nˈijxëm, mbäät niˈamukë nbudëjkëm yiˈin waanë ja jäˈäy parë wyimbatët (Mat. 5:16). Pääty, tsojkëbë net nnayajtëˈëwëm niduˈuk niduˈuk: “¿Tits nduumpy parëts nbudëkë ja jäˈäy diˈib miimp reunyonk?”.
NˈOKPUDËJKËM JA DIˈIB TË TMASTUTNËDË DIOSË TYUUNK PARË JATËGOK KYÄJPXWÄˈKXTËT
13, 14. ¿Ti tyuunë Jesus ko ja yˈapostëlëtëjk yˈëxtëkëwäˈktë?
13 Nbudëkëyäˈänëm pënaty të tmastutnëdë Diosë tyuunk parë jatëgok kyäjpxwäˈkxtët ets dyaˈëxpëktëdë jäˈäy extëmë Jesus ojts tniˈanaˈamë. Parë nnijäˈäwëm wiˈix mbäät nbudëjkëm, min nˈokˈijxëm ti Jesus tyuun ko ja yˈapostëlëtëjk yˈëxtëkëwäˈktë.
14 Mä netyë Jesus dyajjëjpkëjxnë ja Diosë tyuunk yä Naxwiiny ets mä të ttukjäjnë ja tiempë parë yˈooganë, ta ja yˈapostëlëtëjk myastutëdë ets kyaktääytyë (Mar. 14:50; Fwank 16:32). ¿Ti tyuunë Jesus ko ja yˈapostëlëtëjk yˈëxtëkëwäˈktë? Jantsy jeˈeyë jyukypyejky, ta tˈanmääy nimajtsk ja toxytyëjkjäˈäy parë nëjkx ttukˈawanëdë ja apostëlëtëjk ko të jyukypyeky. Duˈun tˈanmääy: “Katë mtsëˈëgëdë. Nëjkx anëëmëdë nmëguˈuktëjkëts” (Mat. 28:10a). Oyë nety të myastuˈudëdë, mbäät nˈijxëm ko Jesus kyaj ttukjotmäˈty ja yˈapostëlëtëjk, duˈunyëm ojts ttijy “nmëguˈuktëjkëts”. Yëˈë duˈun jyaˈayˈajty extëmë Tyeety, pyaˈˈayoow ja yˈapostëlëtëjk ets pyokymyaˈkx (2 Rey. 13:23).
15. ¿Wiˈix xyyajnayjyäˈäwëm pënaty kyaj yˈoknëjkxnëdë ëwäˈkx käjpxwäˈkxpë?
15 Ëtsäjtëm, nan mëk nmëmäˈäy nmëdäjëm pënaty kyaj yˈoknëjkxnëdë ëwäˈkx käjpxwäˈkxpë. Per duˈunyëm nmëguˈukˈäjtëm ets mëk ntsojkëm. Nan kyaj njäˈäytyëgoˈoyëm tukëˈëyë tijaty të ttukmëdundë Jyobaa, ta nääk diˈib jantsy kanäk jëmëjt të tyundë (Eb. 6:10). Njantsy wyinˈayoˈowëmë tyäˈädë nmëguˈukˈäjtëm (Luk. 15:4-7). ¿Wixaty mbäät nbanëjkxëmë Jesusë yˈijxpajtën ets nyajnigëxëˈkëm ko nmëmäˈäy nmëdäjëm?
16. ¿Wiˈix mbäät ndukˈijxëm ko nmëmäˈäy nmëdäjëm ja nmëguˈukˈäjtëm diˈib të yˈëxtëkëwäˈknëdë?
16 Nˈokwoˈow nˈokwijtsëm mä reunyonk. ¿Ti Jesus tyuun ko ja yˈapostëlëtëjk yˈëxtëkëwäˈktë? Wyoow wyijts parë tyuˈukmuktët (Mat. 28:10b; 1 Kor. 15:6). Tyam, nan mbäät nwoˈow nwijtsëm mä reunyonk ja nmëguˈukˈäjtëm diˈib të yˈëxtëkëwäˈknëdë. Per nnijäˈäwëm ko kyaj netyë nyëjkxäˈändë, pääty, tsojkëp nwoˈow nwijtsëm kanäkˈok. Seguurë ko Jesus jantsy agujk jotkujk nyayjyäˈäwë ko ja yˈëxpëjkpëty tyuˈukmujktääytyë, ets seguurë ko ëtsäjtëm nanduˈun nnayjyawëyäˈänëm ko jyäˈttët reunyonk (Matewʉ 28:16; ijxkijpxyë mëdë Lukʉs 15:6).
17. ¿Ti mbäät nduˈunëm ko jyäˈtët mä reunyonk ja nmëguˈukˈäjtëm diˈibë nety kyaj yˈokmiinë?
17 Nˈokˈagëˈë nˈokˈaxäjëm tsuj yajxon. Ko Jesus nyaybyatë mët ja yˈëxpëjkpëty, ta tmëwingoony ets myëtkäjpx myëtmaytyak parë dyajnayjyäˈäwëdë tsuj yajxon (Mat. 28:18). Ets ëtsäjtëm, ¿ti ndunäˈänëm ko nety nˈijxëm tyëkë mä salonk tuˈugë nmëguˈukˈäjtëm diˈib kyaj yˈokmiinë? Tsojkëp nmëwingoˈonëm ets nˈagëˈë nˈaxäjëm tsuj yajxon. Waˈan nmëmäˈäy nmëdäjëm wiˈix nˈokˈanmäˈäyëm, per kyaj tyim tsokyëtyë ääw ayukë mëjwiin kajaabë, mbäät jeˈeyë nˈanmäˈäyëm ko nëgooyë ndukxondakënë ko të myiny ets kyaj axëëk nyajnayjyäˈäwëm.
18. ¿Wiˈix mbäät nmëjääwmoˈoyëm ets njotkujkmoˈoyëm pënaty të yˈëxtëkëwäˈäktë?
18 Nˈokmëjääwmoˈoyëm ets nˈokjotkujkmoˈoyëm. Ja Jesusë yˈëxpëjkpëty, waˈan wyinmääytyë ko tsipë nety yˈëwäˈkx kyäjpxwäˈkxtët abëtsemy naxwinyëdë. Per diˈib jotkujkmooyëdë, yëˈë ko Jesus yˈanmääyëdë: “Dëˈënyëmts ëj nˈity mët miitsëty” (Mat. 28:20). Ets pudëjkëdë ko duˈun yaˈˈanmääytyë, pes ko waanë yˈijty tamë nety ja jäˈäy dyaˈëxpëktë ets “tkäjxwäˈxtë ja oybyë ayuk” (Apos. 5:42). Nanduˈun jyaty mët ja nmëguˈukˈäjtëm diˈib të yˈëxtëkëwäˈäktë, tsojkëp nmëjääwmoˈoyëm ets njotkujkmoˈoyëm. Pes mbäät tjëjptsëˈëk tjëjpjawëdë wiˈix jatëgok yˈoknëjkxtët ëwäˈkx käjpxwäˈkxpë. Per mbäät jyotkujkmoˈoyëdë ko nˈanmäˈäyëm ko kyaj naytyuˈuk nyëjkxäˈändë ets ko njamyëdatäˈänëm. Tyäˈädë nmëguˈukˈäjtëm kyuˈëwëyan kyukäjpxëyandëp ko duˈun nduˈunëm. Ets ko tpëktëdë kuentë ko duˈunyëm njäˈäwëm extëmë nmëguˈukˈäjtëm, mbäät pyudëkëdë parë jatëgok jyëmbittët. Ko duˈun tyun jyatëdët, agujk jotkujk niˈamukë nnayjyawëyäˈänëm.
NˈOKˈYAJJËJPKËJXËM JA TUUNK DIˈIBË JESUS OJTS XYTYUKNIPËJKËM
19. ¿Ti diˈib ntsojkënyëˈäjtëm, ets tiko?
19 ¿Axtë näˈäjën jyëjpkëxäˈänyë tyäˈädë tuunk mä nˈëwäˈkx ngäjpxwäˈkxëm ets mä jäˈäy nyaˈëxpëjkëm? Axtë ko jyëjptëgoyëdë tyäˈädë jukyˈäjtën (Mat. 28:20). ¿Nmëmadäˈägäˈänëmëdaa tyäˈädë tuunk diˈibë Jesus ojts tniˈanaˈamë? Nmëmadäˈägäˈänëm, pes ¡të ja jot winmäˈäny nbëjtakëm! Jam ja xëëw tiempë nyajtuˈunëm, ja jot mëjääw ets ja meeny sentääbë parë nˈëxtäˈäyëm pënaty jënandëp “ja yˈääw jyot ko kyupëkandëp ja tëyˈäjtën parë jyukyˈattët winë xëëw” (Hech. 13:48, TNM). Ko duˈun nduˈunëm, yëˈë nety nbanëjkxëm ja yˈijxpajtënë Jesus, diˈib jënan: “Ja ngäˈäy nˈukënëts, yëˈë kots nduunët ja tsyojkën diˈibëts të xykyexy etsëts nyajjëjpkëxët ja tyuunk” (Juan 4:34, TNM; Fwank 17:4). Ëtsäjtëm, nan nyajjëjpkëxäˈänëm ja tuunk diˈib të nyajtuknipëjkëm (Fwank 20:21). Ets ntsojkëm parë niˈamukë nmëguˈukˈäjtëm, axtë pënaty të yˈëxtëkëwäˈäktë, tyuunˈadëˈëtstët mët ëtsäjtëm axtë ko jyëjpkëxëdë tyäˈädë jukyˈäjtën (Mat. 24:13).
20. Extëm jyënaˈanyë Filipenses 4:13, ¿tiko njënäˈänëm ko mbäät nduˈunëm ja tuunk diˈibë Jesus ojts xytyuknipëjkëm?
20 Ja tuunk diˈibë Jesus ojts xytyuknipëjkëm tsiptakp parë nduˈunëm. Per kyaj ak ëtsäjtëm ndunäˈänëm, pes wyandak ko yajpäädäämp mët ëtsäjtëm. Ko jäˈäy nbudëjkëm parë tpanëjkxtëdë Jesus yëˈë nety “mëët nduunmujkëmë Dios”. Pääty, mbäät nduˈunëmë tyäˈädë tuunk mët ko yëˈë xypyudëkëyäˈänëmë Jyobaa (1 Cor. 3:9, TNM). Nëgooyë yˈoyˈäjnë ets njantsy tyukxondakëm ko nduˈunëmë tyäˈädë tuunk ets ko nbudëjkëm ja nmëguˈukˈäjtëm parë nanduˈun ttundët (käjpxë Filipenses 4:13, TNM). *
ËY 79 Pudëkë parë mëkë myëbëjkën dyaˈittët
^ parr. 5 Jesus yˈanmääy ja yˈëxpëjkpëty parë nëjkxë jäˈäy ttukniˈˈixëdë ets tkuytyundët tukëˈëyë tijatyë nety të ttukˈanaˈamdë. Mä tyäˈädë artikulo nˈixäˈänëm wiˈixën yajtunäˈäny ti Jesus nyiˈanaˈamë. Diˈib yam yajnimaytyäˈägäämp jap waanë të yajjuuty mä La Atalaya diˈib pëtsëëm 1 äämbë julië 2004, pajina 14 axtë 19.
^ parr. 20 Filipenses 4:13, TNM: “Nmëdäjtypyëts ja jot mëjääw parëts ndunët oytyim tiijëty mët ko tam pënëts xymyoopy ja mëjääw”.
^ parr. 67 YAJNIMAYTYAˈAGYË DIBUJË: Tuˈugë nmëguˈukˈäjtëm ttukmëtmaytyaˈaky ja diˈib yaˈëxpëjkypy ti mbäät ttuny parë mas niˈigyë ttsokëdë Dios. Ok, ta tyäˈädë jäˈäy tkuytyuny ja tëgëëkpë käjpxwijën diˈib të myoˈoyëty ja nmëguˈukˈäjtëm.
