1. Dapre Matie 28:18-20, ki komannman Zezi ti donn so bann disip?

APRE so rezireksion, Zezi ti aparet ar so bann disip dan Galile. Li ti ena enn kitsoz bien inportan pou dir zot. Ki sa kitsoz-la sa? Nou trouv sa dan Matie 28:18-20.​—Lir.

2. Ki bann kestion nou pou examine dan sa lartik-la?

² Azordi, tou bann serviter Bondie bizin aplik komannman ki Zezi ti done pou fer bann disip. Alor, anou examinn trwa kestion ki ena enn lien avek sa responsabilite ki Zezi inn donn nou la. Premierman, anplis ki nou ansegn bann nouvo disip bann komannman Bondie, ki nou bizin fer ankor? Deziemman, kouma tou bann proklamater dan lasanble kapav ede pou ki bann etidian Labib progrese? Ek trwaziemman, kouma nou kapav ed bann inaktif pou rekoumans prese?

3. Ki kitsoz bien inportan ena dan komannman ki Zezi ti done?

³ Bann instriksion ki Zezi inn done, zot bien kler. Nou bizin ansegn bann dimounn so bann komannman. Selman, fode pa nou bliye enn kitsoz bien inportan. Zezi pa ti dir: ‘Montre zot tou seki mo finn komann zot.’ Okontrer, li ti dir: Montre zot “met anpratik tou seki mo finn komann zot.” Alor, pou obeir komannman Zezi, fode pa nou zis ansegn nou bann etidian Labib seki zot bizin fer, nou bizin osi montre zot kouma zot kapav fer sa. (Zist. 8:31) Kifer nou bizin fer sa?

4. Servi enn lexanp pou montre kouma nou kapav ansegn enn etidian Labib kouma pou obeir bann komannman Zezi.

 ⁴ Anou servi enn lexanp pou montre kouma nou kapav ansegn enn kikenn pou met an pratik, ouswa obeir, bann komannman Zezi. Kouma eski enn moniter oto-ekol ansegn so zelev pou obeir bann code de la route? Pou koumanse, moniter-la pou ansegn so zelev bann lalwa ki li pou bizin obeir lor larout. Selman, ena enn lot kitsoz osi ki li bizin fer. Li bizin akonpagn zelev-la. Pandan ki zelev-la pe kondir ek met an pratik seki li’nn aprann, moniter-la pou bizin donn li bann konsey. Ki nou aprann ar sa lexanp-la?

5. (a) Dapre Zan 14:15 ek 1 Zan 2:3, ki kitsoz nou bizin ansegn nou bann etidian Labib pou fer? (b) Kouma nou kapav ed nou bann etidian pou aplik bann prinsip Labib?

⁵ Kan nou etidie Labib avek lezot, nou ansegn zot seki Bondie demann nou pou fer. Me nou bizin fer plis ki sa. Nou bizin ansegn nou bann etidian kouma zot kapav met an pratik tou seki zot pe aprann. (Lir Zan 14:15; 1 Zan 2:3.) Par nou lexanp, nou kapav montre nou bann etidian kouma zot kapav met an pratik bann prinsip Labib dan bann divertisman, dan lekol, ek dan travay. Nou kapav osi rakont zot kouma bann konsey ki ena dan Labib inn protez nou ek inn ed nou pou pran bann bon desizion. Kan nou avek nou bann etidian, nou kapav priye Zeova ek demann Li pou gid zot par so lespri sin.​—Zan 16:13.

6. Kan nou pe ansegn nou bann etidian kouma pou obeir bann komannman Zezi, ki kitsoz ankor nou bizin fer?

⁶ Kan nou pe ansegn nou bann etidian kouma pou obeir bann komannman Zezi, ki kitsoz ankor nou bizin fer? Nou bizin ed zot pou devlop dezir pou fer bann disip. Sertin etidian kitfwa per pou prese. Alor, nou bizin ena pasians kan nou pe ed zot pou konpran pli bien bann verite Biblik. Lerla, sa bann verite-la pou tous zot leker, zot lafwa pou ogmante, ek zot pou anvi al prese. Kouma nou kapav ed nou etidian pou devlop dezir pou prese?

7. Kouma nou kapav ed nou etidian pou devlop dezir pou prese?

⁷ Nou kapav poz nou etidian Labib bann kestion kouma: “Kouma to lavi inn ameliore kan to finn met an pratik seki Labib ansegne? Eski to panse ki lezot osi bizin tann sa mesaz-la? Ki to kapav fer pou ed zot?” (Prov. 3:27; Mat. 9:37, 38) Montre to etidian bann trak ki ena dan nou Kes Zouti pou Ansegne ek les li swazir bann trak ki li pou kapav donn so fami, so bann kamarad, ek so bann koleg travay. Donn li inpe trak ek montre li kouma li kapav propoz sa bann trak-la dan enn bon fason. Biensir, kan to etidian pou ranpli bann kondision pou vinn enn proklamater, to pou bizin pres ansam avek li pou ed li.​—Ekle. 4:9, 10; Lik 6:40.

8. Kifer eski li inportan ki nou bann etidian devlop lamour pou Bondie ek pou bann dimounn? (Get lankadre “ Kouma To Kapav Ed To Etidian pou Ogmant So Lamour pou Bondie?”)

⁸ Zezi inn donn nou lord pou ansegn lezot pou “met anpratik tou seki” li’nn komann nou. Sa inplik de pli gran komannman, setadir kontan Bondie ek kontan bann dimounn. (Mat. 22:37-39)  Si nou ed nou etidian pou obeir sa bann komannman-la, an realite nou pe ed li pou prese. Kifer nou dir sa? Si li ena enn gran lamour pou Bondie ek pou bann dimounn, sa pou motiv li pou prese. Selman, sertin etidian Labib kapav gagn per pou al prese. Me nou kapav rasir zot ki Zeova pou ed zot pou sirmont zot laper. (Ps. 18:1-3; Prov. 29:25) Lankadre ki ena dan sa lartik-la montre nou seki nou kapav fer pou ed nou etidian pou ogmant so lamour pou Zeova. Me kouma bann frer ek ser dan lasanble kapav ed bann etidian Labib pou ena plis lamour?

9. Dan lexanp oto-ekol, kouma zelev-la kapav aprann kondir dan enn bon fason?

⁹ Anou reflesi ankor enn fwa lor lexanp oto-ekol. Kan zelev-la pe kondir avek moniter-la akote li, kouma eski zelev-la pe aprann? Li pe aprann kan li pe ekout konsey so moniter ek obzerv bann lezot sofer ki pe kondir bien. Par exanp, moniter-la kitfwa montre li enn loto ki pe les enn lot loto pas devan li. Ouswa moniter-la kapav montre so zelev kouma enn sofer inn tir foul-far lor so loto pou ki sa pa deranz bann lezot loto. Par zot bon lexanp, sa bann sofer-la kapav ed zelev-la pou kone kouma pou kondir dan enn bon fason.

10. Ki kitsoz pou ed enn etidian Labib pou progrese pli vit?

¹⁰ Dan mem fason, enn etidian Labib ki koumans servi Zeova, li pa zis aprann ar so ansegnan, li aprann osi ar bon lexanp bann lezot serviter Zeova. Me ki kitsoz pou ed enn etidian Labib pou progrese pli vit? Se kan li asiste bann renion. Kifer? Seki li pou aprann dan bann renion pou ogmant so konesans, fortifie so lafwa, ek ogmant so lamour pou Bondie. (Zist. 15:30-32) Anplis, dan bann renion, ansegnan Labib la kapav prezant so etidian bann frer ek ser ki finn konn bann mem problem ki etidian-la. Etidian-la pou aprann ar bon lexanp bann frer ek ser ki pe montre lamour dan lasanble.

11. Kouma lexanp bann frer ek ser kapav ena enn bon lefe lor bann etidian Labib?

¹¹ Anou get plizir lexanp. Enn etidian ki pe elve tousel so bann zanfan, trouv enn ser ki dan mem sitiasion ki li. Kan li trouv zefor ki sa ser-la fer pou amenn so bann zanfan Lasal, sa bien ankouraz li. Enn lot etidian ki pe gagn difikilte pou aret fime, zwenn enn frer ki ti ena mem difikilte ki li ek ki’nn reisi sirmont sa. Frer-la explik etidian-la ki se so lamour pou Zeova ki’nn ed li pou obeir bann komannman Zeova. (2 Kor. 7:1; 2 Kor. 4:7) Apre ki frer-la explik etidian-la kouma li’nn aret fime, li dir li: “Twa osi to kapav aret fime.” Lerla, sa ankouraz etidian-la ek li trouve ki li osi li kapav reisi. Enn zenn madam remarke ki enn zenn ser bien zwaye dan so servis pou Zeova. Kan madam-la trouve ki kantite sa ser-la zwaye, li anvi kone kifer sa ser-la touletan zwaye koumsa.

12. Kifer nou kapav dir ki sak manb dan lasanble kapav ed bann etidian Labib pou progrese?

¹² Zezi inn donn nou lord pou kontan Bondie ek pou kontan bann dimounn. (Zan 13:35) Kan enn etidian aprann konn bann lezot manb lasanble, atraver zot bon lexanp, li pou aprann ki savedir obeir komannman Zezi. (1 Tim. 4:12) Ek kouma nou finn gete avan, enn etidian pou aprann boukou ar lexanp bann frer ek ser ki ti ena bann mem difikilte ki li.  Zot lexanp pou montre li ki li osi li kapav fer bann sanzman pou vinn enn disip Zezi. (Det. 30:11) Tou bann manb lasanble kapav ed enn etidian Labib pou progrese. (Mat. 5:16) Ki bann zefor twa to kapav fer pou ankouraz bann etidian ki asiste renion?

13-14. Ki Zezi ti fer kan so bann zapot ti dekouraze?

¹³ Nou anvi ed nou bann frer ek ser ki inaktif pou rekoumans prese. Kouma nou kapav fer sa? Nou kapav aprann ar fason ki Zezi ti tret so bann zapot kan zot ti dekouraze.

¹⁴ Zis avan ki Zezi mor, tou so bann zapot ti “kit li, zot [ti] sove.” (Mark 14:50; Zan 16:32) Ki Zezi ti fer kan so bann zapot ti dekouraze? Zis apre so rezireksion, Zezi ti dir sertin parmi so bann disip: “Pa gagn per; al dir mo bann frer [ki mo finn resisite].” (Mat. 28:10a) Zezi pa ti abandonn so bann zapot. Mem si bannla ti abandonn li, kanmem sa li ti apel zot “mo bann frer.” Parey kouma Zeova, Zezi ti ena boukou mizerikord ek li ti dispoze pou pardone.​—2 Ler. 13:23.

15. Ki to resanti pou bann inaktif?

¹⁵ Nou osi parey, nou gagn traka nou bann frer ek ser inaktif. Zot nou bann frer ek ser, ek nou kontan zot! Nou ankor rapel tou bann zefor ki zot inn fer dan zot servis pou Zeova. Ek sertin parmi zot finn fer bann zefor pandan boukou lane. (Ebre 6:10, NW) Zot vremem mank nou! (Lik 15:4-7) Kouma nou osi nou kapav montre ki nou gagn zot traka, parey kouma Zezi?

16. Kouma nou kapav montre ki nou kontan nou bann frer ek ser inaktif?

¹⁶ Invit zot pou asiste renion. Enn fason ki Zezi ti ankouraz so bann zapot ki ti dekouraze se kan li ti invit zot pou enn renion. (Mat. 28:10b; 1 Kor. 15:6) Azordi osi parey, avek boukou lamour, nou kapav ankouraz bann inaktif pou asiste bann renion. Kitfwa nou pou bizin invit zot plizir fwa avan ki zot vinn renion. Me kan zot vini, nou pou extra kontan, parey kouma Zezi ki ti bien kontan kan so bann disip ti aksepte so linvitasion.​—Konpar avek Matie 28:16 ek Lik 15:6.

17. Kouma nou bizin reazir kan enn inaktif vinn Lasal?

¹⁷ Akeyir zot bien. Kan Zezi ti zwenn so bann disip, li ti fer zot santi zot alez. Li ti pran linisiativ pou al koz avek zot. (Mat. 28:18) Kouma nou reazir kan enn inaktif vinn Lasal? Nou bizin pran linisiativ pou akeyir li. O-koumansman, kitfwa nou pa pou tro kone ki pou dir. Me san ki nou met li malalez, nou kapav zis dir li ki kantite nou kontan pou trouv li.

18. Kouma nou kapav ankouraz bann inaktif?

¹⁸ Ankouraz zot. Kitfwa bann disip Zezi ti panse ki zot pa ti pou kapav prese partou lor later. Zezi ti ankouraz so bann disip kan li ti dir zot: “Mo avek zot toulezour.” (Mat. 28:20) Eski sa ti ed so bann disip? Wi. Inpe letan apre sa, zot ti bien okipe pou “ansegne e proklam Bonn Nouvel.” (Zist. 5:42) Nou bann frer ek ser inaktif osi bizin nou lankourazman. Kitfwa zot per pou rekoumans prese. Nou kapav rasir zot ki zot pa pou bizin prese tousel. Kan zot pou pare, nou kapav akonpagn zot pou  prese. Pena dout ki zot pou bien kontan ki nou soutenir zot kan zot rekoumans prese. Kan nou montre bann inaktif ki nou konsider zot kouma nou bann frer ek ser, sa kapav ed zot pou rekoumans form parti dan lasanble. Lerla, tou bann manb lasanble pou extra kontan!

19. Ki kitsoz nou anvi fer avek tou nou leker, ek kifer?

¹⁹ Ziska kan eski nou pou bizin kontign prese? Ziska “lafin-dimonn.” (Mat. 28:20; get Lexique « période finale du monde ».) Eski nou pou reisi fer seki Zezi inn demann nou? Nou bien deside pou fer sa! Nou kontan pou donn nou letan, nou lenerzi, ek nou bann kitsoz materyel pou rod bann dimounn ki “ena enn bon kondision leker pou gagn lavi eternel.” (Zist. 13:48, NW) Kan nou fer sa, nou pe swiv lexanp Zezi. Li ti dir: “Mo manze, se fer volonte ek fini travay Sa-Enn ki finn avoy mwa la.” (Zan 4:34; 17:4) Nou osi, nou anvi fer sa avek tou nou leker. Nou anvi fini travay ki li’nn donn nou. (Zan 20:21) Ek nou anvi ki lezot osi, mem bann inaktif, kontign fer sa travay-la ansam avek nou.​—Mat. 24:13.

20. Dapre 2 Korintien 4:7, kifer nou sir ki nou pou kapav fer travay ki Zezi inn donn nou?

²⁰ Li pa fasil pou fer seki Zezi inn demann nou. Selman, nou pa tousel pou fer sa travay-la. Zezi inn promet ki li pou avek nou. “Nou pe travay ansam avek Bondie” ek ‘dan prezans Lekris.’ (1 Kor. 3:9; 2 Kor. 2:17) Alor, nou kapav fer travay-la! Se vremem enn gran privilez ek enn plezir pou partisip dan sa travay-la ek pou ed lezot osi pou fer parey!​—Lir 2 Korintien 4:7.