1. Ukulingana na Mateo 28:18-20, i sunde ci lino Yesu wapeezile alondezi yakwe?

PA CISILA ca kutuutululwa ukufuma uku afwe, Yesu walolekiile uku yalondezi yakwe akolongine uku Galile. Wakweti amazwi acindame yano walondanga ukuyanena. Amazwi ci yayo? Amazwi yayo yaya pali Mateo 28:18-20.—Belengini.

2. A mauzyo ci yano tumaasuka?

² Isunde lyakwe Yesu ilya kupanga asambi likaomba nu ku yaomvi yakwe Leza ndakai. Lekini tusambilile pa mauzyo yatatu alemana nu mulimo uno Yesu watupeela. Cakutandikilapo, ukulunda pa kusambilizya asambi apya vino Leza akalonda, i vyani na vyuze vino tulinzile ukucita? Cakwe ciili, uzye ya kasimikila yonsi umu cilongano yangazwa uli asambi ya Baibo ukulunduluka? Cakwe citatu, tungazwa uli aata ukusimikila ukutandika nupya ukuomba umulimo wa kupanga asambi?

3. A mazwi ci yano Yesu walanzile umwi sunde lyakwe?

³ Masunde yakwe Yesu yangupala. Tulinzile ukulasambilizya antu vintu vino Yesu watunenyile. Nomba tutalinzile ukwilila icisinka icicindame sana. Yesu ataalanzile ukuti: ‘Mwayasambilizya ivintu vyonsi vino namunenyile.’ Lelo watiile: ‘Mwayasambilizya ukucita vyonsi vino namunenyile.’ Pa kulanga ukuti tukalondela vino Yesu walanzile, tulinzile ukusambilizya  asambi itu ivyakucita nu kuyalanga vino yangacita ivintu kwene vivyo. (Mili. 8:31) U mulandu ci uno tulinzile ukucitila vivyo?

4. Uzye cikapiliula cani ukuvwila isunde? Langililini.

⁴ Tungasambilizya uli umuntu ukulauvwila isunde lyakwe Klistu? Cilangililo icalondelelapo cingatwazwa ukumanya vino tulinzile ukucita. Uzye akusambilizya umuntu ukupisya motoka angamusambilizya uli ukuti alondela masunde ya pa museo? Inkolelo, kasambilizya alinzile ukusambilizya umusambi masunde yano alinzile ukulondela lino ali pa museo. Lelo, pakuti aazwe umusambi ukulalondela masunde yayo, kuli na vyuze vino alinzile ukucita. Alinzile ukuya pamwi nu musambi nu kumulanga ivyakucita lino akuomvya vino watasambilila lino akupisya motoka. I vyani vino tungasambilila uku cilangililo cii?

5. (a) Kulingana na Yoane 14:15 na 1 Yoane 2:3, i vyani vino tulinzile ukusambilizya asambi ya Baibo ukucita? (b) Langililini vino tungatungulula asambi itu.

⁵ Lino tukusambilizya yauze Baibo, tukayasambililzya vino Leza akalonda twacita. Lelo kuli na vyuze vino tulinzile ukucita. Tulinzile ukusambilizya asambi itu ukulaomvya vino yakusambilila umu umi wao. (Belengini Yoane 14:15; 1 Yoane 2:3.) Tungalanga asambi itu muli vino tukacita ivya kuomvya ivisinte vya mu malembelo lino yali uku sukulu, uku ncito nanti lino yakucita vyuze. Tungayanena pali vino vyatucitikile umu umi pa kuyalanga vino ukulondela ukusunda kwa muli Baibo kwatwazwile ukuicingilila uku uzanzo nanti vino kwatwazwile ukupingulapo ningo. Lino tuli na asambi itu, tungapepa kuli Yeova nu kumulenga ukuti ayatungulula ukuomvya umupasi wa muzilo.—Yoa. 16:13.

6. I vyani na vyuze ivyaya umukusambilizya yauze ukulondela masunde yakwe Yesu?

⁶ I vyani na vyuze ivyaya umukusambilizya yauze ukulondela masunde yakwe Yesu? Tulinzile ukwazwa asambi itu ukulalondesya ukuomba umulimo wa kupanga asambi. Asambi yamwi yakauvwa intete zya kusimikila. Fwandi tulinzile ukuya atekele lino tukwazwa asambi itu ukuvwikisya sana icumi ca muli Baibo pakuti yaye nu utailo ukome nupya cilalenga ukuti yalondesya ukusimikila. I vyani vino tungacita pakuti twazwe asambi itu ukulalondesya ukusimikila ilandwe lisuma?

7. Tungazwa uli umusambi pakuti alondesya ukuombako umulimo wa kusimikila ilandwe lisuma?

⁷ Limwi tunguzya umusambi witu uwa Baibo amauzyo wakwe yaa: “Uzye uumi wako wasenuka uli pa mulandu wakuti ukaomvya vino ukusambilila muli Baibo? Uzye ukwelenganya ukuti na yauze yangatemwa ukuvwako vino wasambilila? Uzye ungacita uli pakuti uyazwe?” (Mapi. 3:27; Mate. 9:37, 38) Langini umusambi utupepala twi landwe utwaya pa Viombelo Vino Tukaomvya pa Kusambilizya nu kuleka asoolole kapepala akangazipila ya lupwa, ivyuza nanti yano akaomba nayo. Mupeele umusambi utupepala tuu utwingi. Langizyini umusambi vino angasiila antu kapepala ki landwe. Kwene, pa cisila cakuti umusambi waya kasimikila aatatala wabatiziwa tulinzile ukulaomba nawe umu mulimo pakuti twamulanga ivyakucita.—Kasa. 4:9, 10; Luka 6:40.

8. U mulandu ci uno cacindamila ukuti asambi itu yatwalilila ukutemwa sana Leza na antu yauze? (Lolini na kambokosi kakuti: “ Vino tungazwa asambi itu ukutemwa sana Leza.”)

⁸ Yesu watunenyile ukulasambilizya yauze “kucita vyonsi vino” watunenyile. Mu kucita vii mwaya ukuvwila masunde yaili akulu kuluta kuli kuti ukutemwa Leza na antu  yanji, nupya amasunde yaa yalemana sana nu mulimo wa kusimikila nu kupanga asambi. (Mate. 22:37-39) Vyalemana uli? Icikalenga twaomba umulimo wa kusimikila u kutemwa, kuli kuti kutemwa kuno twatemwa Leza na antu yanji. Asambi ya Baibo yamwi, yangauvwa intete ukuombako umulimo wa kusimikila. Nomba tungayakomelezya ukuti Yeova alayazwa nupya yalata ukutiina antu. (Masa. 18:1-3; Mapi. 29:25) Akambokosi akali umu cipande cii kakulondolola vino tungacita pakuti twazwe umusambi ukulatemelwako Leza. Nupya, i vyani vino amu cilongano yangacita pakwazwa asambi apya ukutwalilila ukulalanga ukutemwa?

9. Umu cilangililo ca musambi aakusambilila ukupisya motoka, u mu nzila ci muno musambi ali wasambililila ivintu ivicindame?

⁹ Elenganyini nupya pa cilangililo ca musambi aakusambilila ukupisya motoka. Lino akupisya motoka ali na kasambilizya wakwe, u mu nzila ci muno musambi angasambililila? U kuvwa kuli kasambilizya wakwe nu kulola kuli ya kapisya yauze akapisya ningo. Wakwe, limwi kasambilizya angalanga umusambi wakwe lino umwi wazumilizya umuze ukuti aye pa nkolelo yakwe. Nanti limwi kasambilizya angalanga umusambi kapisya wakwe motoka aali pa nkolelo yakwe uwacefya malaiti pakuti cangukile ya kapisya yauze ukulola ningo, nu kumukomelezya ukucita vivyo kwene. Vilangililo vivyo vya sambilizya umusambi ivintu vicindame vino alinzile ukucita lino akupisya.

10. I cani icilazwa umusambi wa Baibo ukulunduluka?

¹⁰ Vikwene, avino caya nu ku musambi wa Baibo uwatandika ukuombela Yeova asisambilila sile kuli kasambilizya wakwe lelo akasambilila nu kuyaomvi yauze yakwe Yeova aya ni miyele isuma. Nomba, i cani icingazwa sana asambi ya Baibo ukulunduluka? U kulazanwa umu kulongana. U mulandu ci? Vino yalasambilila pa kulongana vilayazwa ukumanya ivingi, ukukomya utailo wao nu kuyazwa ukutemelwako Leza. (Mili. 15:30-32) Kasambilizya angalondolola umusambi wakwe ku ina na ya nkazi amu cilongano yano limwi yangakolana umu vintu ivingi. Umusambi alalola vino aina na ya nkazi yakulanga ukutemwa umu cilongano. Elenganyini pa vilangililo vii.

11. I vyani vimwi vino umusambi angalola umu cilongano, nupya vingamwazwa uli?

¹¹ Umusambi wa Baibo umuvyazi atakwata ya iya angalola nkazi umuvyazi atakwata ya iya. Cingafika umusambi pa mwenzo ukulola vino nkazi akaipeelesya ukwiza na ana yakwe anono uku Ng’anda ya Wene. Umusambi umulumendo aakwezya ukuleka ukupeepa fwaka yamanyana nu mwina umwi uwakweti intazi ili imwi lelo uwacimvizye. Kasimikila akunena umusambi vino ukutemwa Yeova kwalenzile aauvwila amasunde yakwe Leza. (2 Kol. 7:1; Filipi 4:13) Lino umwina wanena umusambi vino watile ukupeepa fwaka nu kumunena ukuti nawe kwene angata ukupeepa, umusambi wakomeleziwa sana nupya wataila ukuti angakwanisya ukucita vivyo. Umusambi wa Baibo umukazyana uwacance walola nkazi uwacance uwaya sana ni nsansa pa mulandu wa kuya Nte. Lino umusambi wa Baibo walola vino nkazi waya sana ni nsansa watandika ukulonda ukusambilila ivingi ivyalenga ukuti aye ni nsansa.

12. U mulandu ci uno tungalandila ukuti cila muntu mu cilongano wakwata umulimo wa kwazwa asambi ya Baibo ukulunduluka?

¹² Lino asambi yamanya ya kasimikila aingi umu cilongano yakasambililako vino cikapiliula ukuvwila isunde lyakwe Klistu lya  kutemwa Leza na antu yauze. (Yoa. 13:35; 1 Tim. 4:12) Nupya wakwe vino itulanda mpiti a sambi ya Baibo yangasambilila kuli ya kasimikila aakwata intazi izili zimwi na zino nayo yakwata. Umusambi akasambililako vimwi vino alinzile ukusenukamo pakuti aye umusambi wakwe Klistu. (Malan. 30:11) Cila muntu umu cilongano angacitapo vimwi apakwazwa umusambi ukulunduluka. (Mate. 5:16) Uzye mwemo ivyani vino mukacita pa kwazwa asambi ya Baibo aakaiza umu kulongana?

13-14. I vyani vino Yesu wacitiile atumwa yakwe aali asakamikwe?

¹³ Tukalonda ukwazwa aina na ya nkazi aleka ukusimikila ukutandika ukusimikila nu kupanga asambi. Vino Yesu wacitiile atumwa yakwe asakamile vikalangilila vino tungacita ndakai.

¹⁴ Lino Yesu wamalilanga umulimo wa kusimikila pano nsi ala atatala wafwa, atumwa yonsi yutwike “yamusya.” (Mako 14:50; Yoa. 16:32) I vyani vino Yesu wacisile lino atumwa yakwe yali aasakamikwe? Pa cisila cakuti Yesu watuutululwa, wanenyile alondezi yakwe yamwi ukuti: “Mutoopa! Yangini mukanene aina yane [ukuti nati ntuutululwa].” (Mate. 28:10a) Yesu atakanyile atumwa yakwe. Nanti cakuti yamusile, watwalilile ukuyama ukuti: “aina yane.” Yesu wali nu luse nupya weelelanga wakwe vino Yeova waya.—2 Yamw. 13:23.

15. Uzye tukauvwa uli pali yayo aleka ukusimikila?

¹⁵ Naswe kwene twikako sana mano kuli yayo yonsi aleka ukusimikila. Aantu yaa a ina itu na ya nkazi, nupya twayatemwa sana. Tucili tukaiusya vino yaombesyanga umu mulimo wakwe Yeova, yamwi pa myaka iingi. (Ayeb. 6:10) Nupya tukayaluuka sana! (Luka 15:4-7) Wakwe vino Yesu wacitanga, u mu nzila ci muno tungalanga ukuti twayasakamala?

16. Tungalanga uli ukuti tukasakamala aina itu na ya nkazi aleka ukusimikila?

¹⁶ Mwayalalika ukwiza umu kulongana. I nzila yonga ino Yesu wakomelezezyangamo atumwa yakwe aali asakamikwe ukuyalalika uku kukomana. (Mate. 28:10b; 1 Kol. 15:6) Na ndakai kwene, tungakomelezya aleka ukusimikila ukutandika ukuzanwa umu kulongana. Twamanya ukuti tungayalalika imiku iingi pakuti sile yatandike ukwiza. Ukwaula nu kutwisika Yesu uvwile ningo sana vino asambi yakwe yazumile ulwamo.—Loliniko Mateo. 28:16 na Luka 15:6.

17. Tungacita uli ndi cakuti uwaleka ukulongana wiza umu kulongana?

¹⁷ Mwayapokelela ningo. Yesu walenzile alondezi yakwe ukuyuvwa ukuti iyapokelelwa, atalolelanga ukuti yaye kuli aliwe, lelo waile kuli aliyo nu kulanda nayo. (Mate. 28:18) Tungacita uli ndi cakuti uwaleka ukulongana wiza pa Ng’anda ya Wene? Tulinzile ukuitandikila ukupokelela umuntu wa musango uu. Pa kutandika, tungasakamala pali vino tumavwanga. Lelo ukwaula ukumuvwisya insonyi, tungamunena pali vino ituvwa ningo ukumulola.

18. Uzye tungakomelezya uli aata ukusimikila?

¹⁸ Mwayakomelezya. Asambi yakwe Yesu yelenganyanga ukuti yatange yasimikile umu nsi yonsi. Lelo Yesu wayakomelizye lino wayanenyile amazwi yakuti: “Namayanga pamwi namwe lyonsi.” (Mate. 28:20) Uzye vivyo vyazwile asambi yakwe? Ee. Pa cisila ca kukomeleziwa izile iyaya acincile mu mulimo wa “kusambilizya nga nu kukosola Ilandwe lisuma.” (Mili. 5:42) Na ya kasimikila aleka ukusimikila yakalondekwa ukukomeleziwa. Yangauvwa intete ukutandika ukusimikila  nupya. Tungayakomelezya ukuti yatalasimikila yonga. Ndi cakuti yaipekanya, tungaya nayo umu mulimo wa kusimikila. Ukwaula nu kutwisika yalaya sana ni nsansa ndi cakuti twayazwa ukutandika ukusimikila ilandwe lisuma nupya. Nga tukulanga ukuti tukaika mano ku ina na ya nkazi aata ukulongana nu kusimikila yangatandika nupya, na cii cingalenga umu cilongano muye uluzango.

19. I vyani vino tukalondesya ukucita, nupya u mulandu ci?

¹⁹ U kufika lilaci lino tulinzile ukutwalilila ukusimikila nu kupanga asambi? U kufika nu kumpelelekezyo ya nsi yii. Uzye tulatwalilila ukusimikila nu kupanga asambi ukufika uku nsita iyo? Tukalondesya ukucita vivyo! Tukaitemelwa ukupeela insita itu, amaka na vino twakwata uku kulonda yayo yonsi aya “nu mwenzo wakulondesya ukuya nu umi wa pe.” (Mili. 13:48) Nga tukucita vivyo, ala tukukolanya vino Yesu wacitanga. Walanzile ukuti: “Cakulya cane, ukucita ukulonda kwakwe wino uwantumile, nu kumalila milimo yakwe ino wampeela kuti ncite.” (Yoa. 4:34; 17:4) Nupya vivyo kwene avino tukalonda ukucita. Tukalonda ukumalila umulimo uno twapeelwa. (Yoa. 20:21) Nupya tukalonda na yauze, ukwikako sile na aata ukulongana, ukuti twazizimizya pamwi nayo lino tukuomba umulimo uu.—Mate. 24:13.

20. Kulingana na Filipi 4:13, i cani cingalenga tukwanisye ukuomba umulimo uno Yesu watunenyile?

²⁰ Citanguka ukuomba umulimo uno Yesu watupeezile ukuomba. Lelo tusiomba swenga umulimo uu. Yesu walavile ukuti alaaya naswe. Tukaomba umulimo wa kupanga asambi nga “aomvi alemana pamwi mu kuombela Leza” nupya tukaombela pamwi na “Klistu.” (1 Kol. 3:9; 2 Kol. 2:17) Fwandi, tungakwanisya ukuomba umulimo uu. I syuko sana nupya cikatuzanzya sana ukuombako umulimo uu nu kwazwa yauze ukucita vivyo kwene!—Belengini Filipi 4:13.