1. Ekkar ñan Matu 28:18-20, ta naanin jiroñ eo Jesus ear lel̦o̦k ñan ri-kal̦oor ro an?

ÃLIKIN an kar Jesus jerkakpeje, ear wal̦o̦kl̦o̦k ñan ri-kal̦oor ro an ke rar kobal̦o̦k ippãn doon ilo Galili. Ewõr juon men eaorõk ear aikuj in kõnnaanek er kake. Kar ta ennaan eo? Naan kein an rej pãd ilo Matu 28:18-20.​—Riit.

2. Ta kajjitõk ko jenaaj etali?

² Naanin jiroñ eo an Jesus ñan kõm̦m̦an ri-kal̦oor ej bareinwõt jerbal ñan ri-karejar ro kajjojo an Anij rainin. Kõn men in, jen etale jilu kajjitõk ko me rej ekkejell̦o̦k ñan jerbal eo me em̦õj an Jesus letok ñan kõj. Kein kajuon, kobal̦o̦k ippãn ad katakin ri-kal̦oor ro rekããl kõn ta ko Anij ekõn̦aan bwe ren kõm̦m̦ani, ta eo jej aikuj in bar kõm̦m̦ane? Kein karuo, ewi wãween an aolep ri-kwal̦o̦k naan ro ilo eklejia eo maroñ bõk kun̦aaer ñan jipañ rũkkatak Baibõl̦ ro kõm̦m̦an wõnm̦aanl̦o̦k ko? Kein kajilu, ewi wãween ad maroñ jipañ ro m̦õttad ilo tõmak me ebõjrak aer kwal̦o̦k naan bwe ren bar bõk kun̦aaer ilo jerbalin kõm̦m̦an ri-kal̦oor?

3. Ilo naanin jiroñ ko an Jesus, ta eo ear lukkuun kaalikkar bwe jen kõm̦m̦ane?

³ Naanin jiroñ ko an Jesus relukkuun alikkar. Jej aikuj katakin armej ro kõn naanin jiroñ ko an. Bõtab ewõr juon men eaorõk jejjab aikuj kõjekdo̦o̦ne. Jesus ear jab ba: ‘Kom̦win katakin er aolep men ko iar jiroñ kom̦ kaki.’ Ijoke, ear ba: Kom̦win katakin er “bwe ren pokake aolep men ko iar jiroñ kom̦ kaki.” Ñan jerbale naanin jiroñ in an ñe jej katakin juon rũkkatak Baibõl̦, jeban baj katakini wõt ak jenaaj aikuj bar jipañ ak tõl e. (Jrb. 8:31) Etke jej aikuj kõm̦m̦ane men in?

4. Kwal̦o̦k juon waanjoñak kõn wãween ad maroñ katakin juon rũkkatak Baibõl̦ ñan pokake naanin jiroñ ko an Christ.

 ⁴ Ewi wãween ad maroñ katakin juon armej ñan pokake naanin jiroñ ko an Christ? Waanjoñak eo jenaaj etale emaroñ jipañ kõj ñan mel̦el̦e kõn ta eo jej aikuj in kõm̦m̦ane. Ewi wãween an juon ri-kaki in kattõr katakin ri-jikuul̦ ro an ñan pokake kakien ko kõn kattõr? Ilo kilaaj, ri-kaki eo emaroñ m̦okta kwal̦o̦k kõn kakien ko rej aikuj in pokaki ñe rej ettõr ilo ial̦ eo. Bõtab, bwe en katakin ri-jikuul̦ ro an kilen pokaki ak l̦oori kakien kein, ewõr juon men ej aikuj in bar kõm̦m̦ane. Ej aikuj pãd ippãn ri-jikuul̦ ro im jipañ ak tõl er ilo aer kattõr ilo ial̦ ko im jipañ er jerbali men ko rar katak kaki ilo kilaaj. Ta eo jemaroñ katak jãn waanjoñak in?

5. (1) Ekkar ñan Jon 14:15 im 1 Jon 2:3, ta eo jej aikuj in katakin rũkkatak Baibõl̦ ro ad ñan kõm̦m̦ane? (2) Kwal̦o̦k jet waanjoñak ko kõn ewi wãween ad maroñ tõl rũkkatak Baibõl̦ ro ad.

⁵ Ñe jej katak Baibõl̦ ippãn ro jet, jej katakin er kõn ta ko Anij ekõn̦aan bwe jen kõm̦m̦ani. Bõtab ebar wõr men ko jej aikuj in kõm̦m̦ani. Jej aikuj in katakin rũkkatak ro ad ñan jerbali men ko rej katak kaki jãn Baibõl̦ ilo mour ko aer kajjojo raan. (Riit Jon 14:15; 1 Jon 2:3.) Ikijjeen joñak ko ad, jemaroñ kwal̦o̦k wãween aer maroñ jerbali naanin kakapilõk ko rej katak kaki jãn Baibõl̦ ilo jikuul̦, jikin jerbal, ekoba ilo iien ko rej kakkije ak kõm̦m̦ani men ko rekam̦õn̦õn̦õ. Jemaroñ kwal̦o̦k ñan er kõn juon wãween jaar iioone ilo mour eo ad, ñan kwal̦o̦k kõn wãween ad kar jerbali naanin tõl ko jãn Baibõl̦ kar maroñ kõjparok kõj jãn jorrããn ak wãween an kar men in jipañ kõj ñan kõm̦m̦ane juon pepe emãlõtlõt. Im ñe jej pãd ippãn rũkkatak ro ad, jemaroñ jar im kajjitõk ippãn Jeova bwe jetõb kwõjarjar en tõl er.​—Jon 16:13.

6. Ta eo jej aikuj in bar kõm̦m̦ane ñe jej katakin ro jet ñan pokake naanin jiroñ ko an Jesus?

⁶ Ta eo jej aikuj in bar kõm̦m̦ane ñe jej katakin ro jet ñan pokake naanin jiroñ ko an Jesus? Jej aikuj in jipañ rũkkatak Baibõl̦ ro ad ñan ejaak juon kõn̦aan ñan kõm̦m̦an ri-kal̦oor. Ewõr jet rũkkatak ro remijak in bõk kun̦aaer ilo jerbalin kwal̦o̦k naan. Kõn men in, jej aikuj in kijenmej wõt ippãer ilo ad jipañ er ñan kal̦apl̦o̦k aer mel̦el̦e kõn katak ko ilo Baibõl̦ bwe en maroñ kajoorl̦o̦k tõmak eo aer. Innem, katak kein renaaj tõpar bũrueer im kõm̦akũt er ñan kõn̦aan bõk kun̦aaer ilo jerbalin kwal̦o̦k naan. Ta eo jemaroñ kõm̦m̦ane ñan jipañ rũkkatak ro ad ñan ejaak juon kõn̦aan ñan kwal̦o̦k naan kõn ennaan eo em̦m̦an ñan ro jet?

7. Ewi wãween ad maroñ jipañ juon rũkkatak ñan ejaak juon kõn̦aan ñan kwal̦o̦k kõn ennaan eo em̦m̦an ñan ro jet?

⁷ Jemaroñ kajjitõk ippãn rũkkatak Baibõl̦ ro ad kajjitõk ko ãinwõt: “Ilo am̦ kar eo̦roñ ennaan eo em̦m̦an kõn Aelõñ eo, ewi wãween an kar men in kakõm̦anm̦anl̦o̦k mour eo am̦? Kwõl̦ak lale, ro jet rej aikuj in ke bar roñ kõn ennaan in? Ta eo kwõmaroñ kõm̦m̦ane ñan jipañ er?” (JK. 3:27; Matu 9:37, 38) Kwal̦o̦k tũrããk ko me rej m̦õttan Nien Kein Jerbal eo Ad ñan Katakin ñan rũkkatak eo im kõtl̦o̦k bwe en kããlõt ewi iaaer ej l̦õmn̦ak bwe ro nukũn, ro m̦õttan, ak ro ej jerbal ippãer renaaj itoklimo kake. Innem lel̦o̦k jet an kaape in tũrããk kein. Kwõn kõmmãlmel ippãn im katakini kilen an lel̦o̦k juon tũrããk ilo juon wãween ejouj. Ejjel̦o̦k pere bwe ãlikin an rũkkatak eo ad erom juon ri-kwal̦o̦k naan ejjañin peptaij, jenaaj aikuj in pãd iturin im jipañe ak tõle.​—Ekl. 4:9, 10; Luk 6:40.

8. Etke eaorõk bwe rũkkatak ro ad ren ejaak juon yokwe ekajoor ñan Anij im ro ri-turier? (Bar lale bo̦o̦k eo etan “ Wãween Ad Maroñ Jipañ Rũkkatak ro Ad ñan Kam̦wilal̦l̦o̦k Yokwe eo Aer ñan Anij.”)

⁸ Jekõn̦aan keememej bwe Jesus ear jiroñ kõj bwe jen katakin ro jet “bwe ren pokake aolep men ko” ear jiroñ kõj kaki. Alikkar bwe men in ej bar kitibuj ad katakin er kõn kien ko ruo  rel̦l̦aptata​—ñan yokwe Anij im ñan yokwe ro ri-turid—​men kein jim̦or rej ekkejell̦o̦k ñan jerbalin kwal̦o̦k naan im kõm̦m̦an ri-kal̦oor. (Matu 22:37-39) Ewi wãween an men kein ekkejell̦o̦k ippãn doon? Unleplepin ad kõn̦aan bõk kun̦aad ilo jerbalin kwal̦o̦k naan ej yokwe​—yokwe eo ad ñan Anij im ro ri-turid. Jemel̦el̦e bwe ñan jet rũkkatak Baibõl̦, rel̦ak l̦õmn̦ak kõn aer bõk kun̦aaer ilo jerbalin kwal̦o̦k naan men in emaroñ kõm̦m̦an aer mijak. Bõtab jemaroñ kõkajoor rũkkatak rein ilo ad kaalikkar ñan er bwe ikijjeen jipañ eo jãn Jeova, jidik kõn jidik remaroñ anjo̦ ioon aer mijak armej. (Sam 18:1-3; JK. 29:25) Bo̦o̦k eo ilo katak in ej kwal̦o̦k kõn ta buñtõn ne ko jemaroñ kõm̦m̦ani ñan jipañ rũkkatak ro ad bwe en eddekl̦o̦k yokwe eo aer ñan Anij. Kiiõ, ta ko eklejia eo emaroñ bareinwõt kõm̦m̦ani ñan jipañ ri-kal̦oor ro rekããl ñan kal̦apl̦o̦k aer kwal̦o̦k yokwe?

9. Ilo waanjoñak eo kõn juon eo me ej katak kilen kattõr, ewi wãween an armej in katak men ko raorõk?

⁹ Bar l̦õmn̦ak m̦õk kõn waanjoñak eo me kar kwal̦o̦k kake kõn eo me ej katak kilen kattõr. Ilo an kattõr ilo ial̦ eo ippãn ri-kaki eo an, ewi wãween an armej in katak? Ej katak ikijjeen an roñjake ri-kaki eo an im ilo an bar lale im katak jãn ro me em̦m̦an aer ettõr. Ñan waanjoñak, ri-kaki eo emaroñ jitõñel̦o̦k juon ri-kattõr me ej kõtl̦o̦k an bar juon wa etal m̦aanin. Ak emaroñ kwal̦o̦k kõn bar juon ri-kattõr me ej kwal̦o̦k an jel̦ã m̦anit ilo an kadikl̦o̦k teeñki in wa eo waan bwe en jab l̦ap an meraml̦o̦k mejãn ri-kattõr ro jet. Waanjoñak kein rej jipañ rũkkatak eo ñan jel̦ã men kein raorõk me emaroñ jerbale ilo iien ko enaaj kattõr.

10. Ta eo enaaj jipañ juon rũkkatak Baibõl̦ ñan kõm̦m̦an wõnm̦aanl̦o̦k?

¹⁰ Ejja ãindeinl̦o̦k wõt, juon rũkkatak Baibõl̦ me ilo kõkkar ej jino kattõr ilo ial̦ eo me ej tõll̦o̦k ñan mour, ejjab katak jãn ri-katakin eo an wõt ak ej bar katak jãn joñak ko rem̦m̦an an ri-karejar ro jet an Jeova. Kõn men in, ta eo enaaj l̦ap an jipañ rũkkatak Baibõl̦ ro ñan kõm̦m̦an wõnm̦aanl̦o̦k ko? Ikijjeen aer pãd ilo kweilo̦k ko ad. Etke jej ba men in? Naanin jiroñ ko jãn Baibõl̦ me jej bũki ilo kweilo̦k ko renaaj kam̦wilal̦l̦o̦k jel̦ã eo aer, kõkajoorl̦o̦k tõmak eo aer, im jipañ er bwe en kajoorl̦o̦k yokwe eo aer ñan Anij. (Jrb. 15:30-32) Ejjab men in wõt, ak ilo kweilo̦k ko, ri-kwal̦o̦k naan eo emaroñ kwal̦o̦k kajjien rũkkatak eo ñan ro jeid im jatid me rej ãinl̦o̦kwõt e ilo jet wãween ko. Ta joñak ko rem̦m̦an rũkkatak eo emaroñ loi ilo eklejia eo me ej kaalikkar an Kũrjin ro kwal̦o̦k yokwe? L̦õmn̦ak kõn waanjoñak kein me jenaaj etali.

11. Waanjoñak ta ko me juon rũkkatak emaroñ loi ilo eklejia eo, im ewi wãween an waanjoñak kein maroñ jelõt rũkkatak eo?

¹¹ Juon rũkkatak Baibõl̦ me ej juon jinen me ejjel̦o̦k pãleen ej kalimjeke bar juon jeid im jatid kõrã me ej iioone ejja wãween eo wõt me ej bar iioone. Rũkkatak eo el̦ak loe an kõrã in jeid im jatid lukkuun kate ñan itok ñan Im̦õn Kweilo̦k eo ippãn ajri ro nejin, men in etõpar bũruon. Juon rũkkatak me epen an jol̦o̦k an kõbaatat ej jino kal̦apl̦o̦k an jel̦ã kajjien juon ri-kwal̦o̦k naan me ear bar iioone ejja wãween in wõt ak ear maroñ jol̦o̦k an kõbaatat. Ri-kwal̦o̦k naan eo ej bwebwenato ippãn rũkkatak eo kõn wãween an kar kajoorl̦o̦k yokwe eo an ñan Jeova im an kar men in kõm̦akũti ñan pokake naanin jiroñ ko an Anij. (2 Kor. 7:1; Pil. 4:13) Ãlikin an rũkkatak eo roñjake bwebwenato eo an ri-kwal̦o̦k naan eo, el̦apl̦o̦k an bõk kõkajoor ke eo jeid im jatid ej ba ñane, “Kwõmaroñ bar jol̦o̦k am̦ kõbaatat.” Juon rũkkatak Baibõl̦ me ej juon jiroñ ej lo bar juon jiroñ me ealikkar an m̦õn̦õn̦õ ilo mour eo an ãinwõt juon iaan Ri-Kõnnaan ro an Jeova. Kõn an loe an jiroñ in jeid im jatid lañlõñ, men in ekõm̦m̦an an kõn̦aan kal̦apl̦o̦k an katak bwe en jel̦ã etke eo jeid im jatid ej m̦õn̦õn̦õ aolep iien.

12. Etke jemaroñ ba bwe kajjojo iaan ro ilo eklejia eo ewõr kun̦aaer ñan jipañ rũkkatak Baibõl̦ ro?

¹² Ñe rũkkatak Baibõl̦ ro rej jino kal̦apl̦o̦k aer  jel̦ã kajjien elõñ iaan ri-kwal̦o̦k naan ro retiljek, rũkkatak rein rej katak jãn joñak ko an rein kõn kilen aer maroñ pokake naanin jiroñ eo an Christ ñan yokwe Anij im ro ri-turier. (Jon 13:35; 1 Tim. 4:12) Bareinwõt, ãinwõt kar kwal̦o̦k kake m̦oktal̦o̦k, juon rũkkatak Baibõl̦ emaroñ katak jãn ri-kwal̦o̦k naan ro me rej kijenmej ium̦win wãween ko reppen me rej ãinl̦o̦kwõt wãween eo ej bar iioone. Men eo rũkkatak eo ej katak jãn waanjoñak ko an rein, ej bwe emaroñ bar lo tõprak ilo an kõm̦m̦an oktak ko ej aikuj in kõm̦m̦ani bwe en erom juon iaan ri-kal̦oor ro an Christ. (Dut. 30:11, UBS) Kajjojo iaan ro ilo eklejia eo remaroñ bõk kun̦aaer ilo elõñ wãween ko ñan jipañ rũkkatak Baibõl̦ ro bwe ren kõm̦m̦an wõnm̦aanl̦o̦k ko. (Matu 5:16) Ta ko kwõj kõm̦m̦ani ñan rõjañ rũkkatak Baibõl̦ ro me rej itok ñan iien kweilo̦k ko?

13-14. Ewi wãween an kar Jesus kõm̦m̦an ñan ri-kal̦oor ro an ke rar ebbweer?

¹³ Jekõn̦aan jipañ ro jeid im jatid me ejako aer kwal̦o̦k naan bwe ren bar bõk kun̦aaer im kajejjet jerbal eo Christ ear jiroñ kõj kake, ñan kõm̦m̦an ri-kal̦oor. Wãween an kar Jesus kõm̦m̦an ñan rijjilõk ro an ke rar ebbweer ej kaalikkar ñan kõj kõn ta eo jemaroñ kõm̦m̦ane rainin.

¹⁴ Ilo jem̦l̦o̦kin jerbalin kwal̦o̦k naan eo an Jesus ioon lal̦ ke ear epaak an mej, aolep rijjilõk ro “rar etal jãne im ko.” (Mark 14:50; Jon 16:32) Ewi wãween an kar Jesus kõm̦m̦an ñan rijjilõk ro an ke rar ebbweer ium̦win jidik iien? Ejjabto ãlikin an kar jerkakpeje, Jesus ear ba ñan jet iaan ri-kal̦oor ro an: “Komiro en jab mijak! Komiro ilo̦k im kõnnaanek ri-kal̦oor ro aõ bwe [em̦õj aõ jerkak].” (Matu 28:10a) Jesus ear jab ebbweer jãn an jipañ rijjilõk ro an. Meñe rar ko jãne, ak ear ãñinñini wõt er “ri-kal̦oor ro aõ.” Ãinwõt Jeova, el̦ap an kar Jesus tũriam̦o im m̦õn̦õn̦õ in jol̦o̦k an ro jet bõd.​—2 Kñ. 13:23.

15. Ewi wãween ad eñjake kõn ro me ejako aer bõk kun̦aaer ilo jerbalin kwal̦o̦k naan?

¹⁵ Kõj bareinwõt el̦ap ad kea kõn ro me ejako aer bõk kun̦aaer ilo jerbalin kwal̦o̦k naan. Rein rej ro jeid im jatid, im jej yokwe er! Jej keememej wõt jerbal ko rel̦l̦ap me rũttõmak rein m̦õttad rar kõm̦m̦ani ilo jinoin kõn aer yokwe Jeova​—bõlen ium̦win elõñ iiõ ko. (Hib. 6:10) Jej lukkuun oñ kake er! (Luk 15:4-7) Ilo ad anõke Jesus, ta wãween ko jemaroñ kõm̦m̦ani ñan kwal̦o̦k ad kea kõn er?

16. Ewi wãween ad maroñ kwal̦o̦k ad kea kõn ro jeid im jatid me ejako aer kwal̦o̦k naan?

¹⁶ Ilo jouj kũrtok er ñan kweilo̦k ko. Juon wãween Jesus ear kõketak rijjilõk ro an me rar ebbweer ej ilo an kar kũrl̦o̦k er ñan juon kweilo̦k. (Matu 28:10b; 1 Kor. 15:6) Ãindeinl̦o̦k wõt ilo raan kein, jemaroñ rõjañ ro ejako aer kwal̦o̦k naan ñan itok ñan kweilo̦k ko an eklejia, ñe rejjañin kõm̦m̦ane men in. Jejel̦ã bwe jemaroñ aikuj kũrtok er elõñl̦o̦k jãn juon alen m̦okta jãn aer naaj em̦m̦akũt im itok. Ejjel̦o̦k pere bwe Jesus ear lukkuun m̦õn̦õn̦õ ke ri-kal̦oor ro an rar eo̦roñ kũr eo an.​—Keidi Matu 28:16 im Luk 15:6.

17. Ta eo jen kõm̦m̦ane ñe juon eo me ejako an kwal̦o̦k naan ej itok im kweilo̦k?

¹⁷ Lukkuun karwaineneik er jãn bũruod. Jesus ear kõm̦m̦an bwe ri-kal̦oor ro an ren kile im eñjake aer ruwainene ke rar iioone; ear m̦õkaj in em̦m̦akũt im kõnono ippãer. (Matu 28:18) Ta eo jen kõm̦m̦ane ñe juon jeid im jatid me ejako an kwal̦o̦k naan ej itok ñan Im̦õn Kweilo̦k eo? Jej aikuj m̦õkaj in em̦m̦akũt ilo ad lukkuun karwaineneik tok e. Ilo jinoin, jemaroñ inepata bwe jenaaj jaje ta eo jen ba. Bõtab ilo ad jab kõm̦m̦an an jook ak mijak, jemaroñ baj ba wõt ñan e kõn joñan ad m̦õn̦õn̦õ in loe.

18. Ewi wãween ad maroñ rõjañ ri-kwal̦o̦k naan ro me ejako aer kwal̦o̦k naan?

¹⁸ Lukkuun kõkajoor er. Ri-kal̦oor ro an Jesus remaroñ kar inepata im l̦õmn̦ak kõn ewi wãween  aer naaj maroñ kajejjete naanin jiroñ eo ñan kwal̦o̦k naan ñan aolep armej ro ipel̦aakin lal̦ in. Jesus ear kaenõm̦m̦an ri-kal̦oor ro an ilo an kar ba: “Inaaj pãd ippemi iien otemjej.” (Matu 28:20) Naan kein an rar ke jipañ er? Aet. Ejjabto jãn iien in, rar poub ilo aer “katakin im kwal̦o̦k kõn ennaan eo em̦m̦an.” (Jrb. 5:42) Ri-kwal̦o̦k naan ro me ejako aer kwal̦o̦k naan rej bar aikuj naanin kaenõm̦m̦an. Remaroñ inepata ak mijak jidik ilo aer l̦õmn̦ak kõn aer bar jino kwal̦o̦k naan. Jemaroñ kaenõm̦m̦an er im kaalikkar ñan er bwe reban aikuj in kwal̦o̦k naan make iaaer. Im ñe repojak, jemaroñ jerbal ippãer ilo kwal̦o̦k naan. Renaaj m̦õn̦õn̦õ kõn ad jipañ er ilo aer jino bar kwal̦o̦k naan kõn ennaan eo em̦m̦an. Ñe jej watõk er im kõm̦m̦an ñan er ãinwõt ro jeid im jatid, jemaroñ lo tokjãn ko rem̦m̦an ñan eklejia eo ad.

19. Ta kõn̦aan eo ilo bũruod, im etke?

¹⁹ Ewi toon ad naaj wõnm̦aanl̦o̦k im kõm̦m̦an ri-kal̦oor? M̦ae iien ejem̦l̦o̦k jukjukun pãd in. (Matu 28:20; lale “Jem̦l̦o̦kin jukjukun pãd in” ilo Kõmel̦el̦e Ko.) Jenaaj ke maroñ kajejjete men in me Jesus ear jiroñ kõj ñan kõm̦m̦ane? Jej jek ippãd make bwe jenaaj kajejjete men in! Jej m̦õn̦õn̦õ in lel̦o̦k iien, maroñ, im kõjerbal jããn ko ad ñan pukot ro me “em̦m̦an bũrueer ñan bõk mour indeeo.” (Jrb. 13:48) Ñe jej kõm̦m̦ane men in, jej anõke joñak eo an Jesus. Ear ba: “M̦õñã eo kijõ in ej bwe in kõm̦anm̦an ankilaan eo ear jilkintok eõ im kadedel̦o̦k jerbal eo ear letok ñan eõ.” (Jon 4:34; 17:4) Eñin ej bar kõn̦aan eo ad ilo bũruod. Jekõn̦aan kadedel̦o̦k jerbal eo me em̦õj kappeik kõj ñan kõm̦m̦ane. (Jon 20:21) Im jekõn̦aan bwe ro jet, ekoba ro me ejako aer kwal̦o̦k naan, ren bar kijenmej ippãd ilo ad kõm̦m̦ane jerbal in.​—Matu 24:13.

20. Ekkar ñan Pilippai 4:13, etke jemaroñ kajejjete jerbal eo me Jesus ear jiroñ kõj ñan kõm̦m̦ane?

²⁰ Ejjab juon men epidodo ñan kajejjete jerbal eo Jesus ear jiroñ kõj ñan kõm̦m̦ane. Ijoke, jejjab make iaad ilo ad kõm̦m̦ane jerbal in. Jesus ear kallim̦ur bwe enaaj pãd ippãd. Jej kõm̦m̦ane jerbal eo kar letok ñan kõj ñan kõm̦m̦an ri-kal̦oor ãinwõt ro rej “ri-jerbal ippãn Anij” im “ippãn Christ.” (1 Kor. 3:9; 2 Kor. 2:17) Kõn men in, jemaroñ kajejjete jerbal in. Ej juon jeraam̦m̦an im juon menin kam̦õn̦õn̦õ ñan kõm̦m̦ane jerbal in im ñan jipañ ro jet ñan bar kõm̦m̦ane!​—Riit Pilippai 4:13.