1. Nlamulo baani avahile Yesu nnafwanyeya va Mateus 28:18-20?

NUMALA ovenyihiwa muukwani Yesu ahathanyuwedha anamahara aye oGalileya. Oliye ahikanna dhithu afuniye wawaddela. Yaali ddi? Enafwanyeya va Mateus 28:18-20.— Omwileri.

2. Makoho baani nnawakulihu peeno?

² Nlamulo nowahudhiha athu wi ekale anamahudhera nivano nnolaba. Vano nnafuna nawoone makoho mararu eniwanana ni nlamulo avahile Yesu. Noobajha, ohiya wahudhihave athu malamulo a Mulugu wi ekale anamahara, ethu baani enahoweleya werana? Nanabili, anamalaleya atene a mmulogoni, enakavihere addi anamahudhera wunnuwelavo epaddi ya omuzimuni? Nanatharu, nnakavihere addi addibila eridhale omuzimuni ohogolowela wapara mabasa owahudhiha athu nuuviheya?

3. Ethu baani yunlubale enafwanyeya va nlamuloni na Yesu?

³ Dhoholela dha Yesu kadhinarusa wonelamo. Nnofwanelela wahudhihaga athu dhithu arumiliye. Mbwenye kanddiwale ethu yunlubale. ‘Yesu kawonge egi: Mwaahudhihe athu dhatedhene gurumilimini.’ Mbwenye oliye awogile ayi: ‘Mwahudhihege athu wiwelela dhatedhene gurumilimini.’ Eyo enatapulela wi kahiyo omuhudhihave namahudhera a Bibliya ethu yowera, mbwenye nnofwanelela omoniha makalelo owerana. (At. 8:31) Mwahaya wa ddi?

4. Yoladdaniha baani enanikavihera wonelamo enatapulela ohudhiha wiwelela?

⁴ Wihina noonelemo enatapulela wahudhiha “wiwelela”  wawubuwele anamahudhiha a karo. Aliwa enabiha wahudhiha dhoholela dhoweddiha karo egali musala. Mbwenye wihina yahudhihe wiwelela dhoholela ndhe enohowela werana ethu emodhaya. Aliwa enovolowa mukaroni wihina emoone namahudhera ole eddihaga ni omooniha makalelo ohara ndhe ahudhereye musala. Nnahudhera ddi ni yoladdaniha ela?

5. a) Ninga munawogela João 14:15; ni 1 João 2:3 ethu baani enahoweleya wahudhiha anamahudhera ehu werana? b) Nnakavihere addi anamahudhera ehu weddela ndhe enahudheriwa?

⁵ Namuhudhihaga Bibliya nnahudhiha athu malamulo a Mulugu, mbwenye enohoweleya wera ethu emodhaya. Enohoweleya wahudhiha anamahudhera ehu weddela ndhe enahudheriwa. (Omwileri João 14:15; 1 João 2:3.) Wodhela mweddelo wehu iyo podi wakavihera anamahudhera ehu weddela malagano a mBibliyani yakala oskola, omabasani ni yaredhaga. Iyo podi wawaddela makalelo malagano a mBibliyani enibareliwa ni enikaviheriwa othoma ethu yapama. Nakala ni anamahudhera ehu nilobelege wa Yehova nilobaga wihina oliye aweddihe ni muzimu waye wotxena. — João 16:13.

6. Ethu baani enahoweleya wahudhiha amodha wiwelela nlamulo na Yesu?

⁶ Ethu emodha enahoweleya werana naahudhihaga athu amodha wiwelela nlamulo na Yesu sivi? Enohoweleya wakavihera anamahudhera ehu a Bibliya okanna efunelo yo wahudhiha athu wi ekale anamahara. Mbwenye, anamahudhera amodha a Bibliya enowoova wapara mabasa yala. Bumwahaya enohoweleya okala ovilela ni wakavihera okanna enonelo yowinjhiva ya mBibliyani. Dhohudhiha dha mBibliyani dhaddiginya murima wewa dhinere wathukulela wapara mabasa ala. Ethu baani nnafunihu werana wihina nakavihere anamahudhera ehu a Bibliya okanna efunelo ya olaleya?

7. Onaamukavihere addi namahudhera awo okanna efunelo ya olaleya?

⁷ We podi omukoha namahudhera awo: “Ebaribari ya Mbibliyani yukavihere addi okanna egumi yapama? Kunoonelamo wi athu amodha enohowela wiwa ebaribari ela? Onere ddi wihina wakavihere?” (Pro. 3:27; Mat. 9:37, 38) Omonihe namahudhera awo mafolyetu enafwanyeya mMalivuru ehu oohudhiha ni omuhiye wihina oliye asakule folyetu nnaddiginye murima wa amudhaaye, akwaye oskola obe omabasani. * Onvahe mafolyetu ohiyana-iyana. Omwaddele okanna makalelo apama oovahaya mafolyetu ala. Vano namahudhera awo arumedhiwa wi akale namalaleya ohubaddiziwa enofuneya olaleya ni oliye wi omuxagihe. — Ecl. 4:9, 10; Luc. 6:40.

8. Mwahaya bwaddi sofuneya namahudhera ehu omudhivela Mulugu ni omudhivela mwanddamani? ( Osugwe kwaduru “Makalelo omukavihera namahudhera awo wenjhedhedha odhivela waye ni Mulugu.”)

⁸ Wubuwele wihina Yesu anirumile wahudhiha amodha ‘wiwelela dhithu dhatedhene’ anirumiliye. Eyo otapulela nahudhihege wiwelela malamulo ala manlubale — omudhivela Mulugu ni omudhivela mwanddamani. (Mat. 22:37-39) Nimakalelo baani? Ethu enlubaleya enanthukulela wapara mabasa ala oolaleya fudhivela — odhivela ninnihuna ni Yehova vamodha namwanddamani ehu. Malabo mamodha anamahudhera Bibliya yubuwela mabasa oolaleya podi woova. Mbwenye iyo podi waroromeliha wihina nnikavihero  na Yehova enere wanda ogonjhiha wawowova athu. (Sal. 18:1-3; Pro. 29:25) Yohudhera ela ehikanna kwaduru enoniha makalelo omukavihera namahudhera wenjhedhedha odhivela onniyena ni Mulugu. Mulogo podi wakavihera anamahudhera ala axa wenjhedhedha odhivela wewa. Nimakalelo baani?

9. Oskola winahudheriwa karo, makalelo mamodha enaamukavihere namahudhera baavi?

⁹ Vano nnafuna nihogolowele oskola winahudheriwa weddiha karo, omubuwele munaskola. Eddihaga nnamahudhiha aye, anahudhera ni makalelo baani? Anvuruwanaga namahudhiha ni asugwaga anameeddiha amodha apama. Motajhiha, namahudhiha podi omooniha nameeddiha apama anarabela karo dhimodha wihina dhivire obe podi omoniha nameeddiha anavugula malampada aye wihina anathithena anameeddiha amodha enadha osogolo waye. Makalelo ala enomuhudhiha munaskola makalelo apama owerana dhithu.

10. Enaamukavihere namahudhera wunnuwelavo omuzimuni ddi?

¹⁰ Emodhave enapadduwa nnamahudhera anabajha weedda dila ya egumi. Oliye kanahudhera nnamahudhiha aye baahi, mbwenye ni anamalaleya amodha enna mweddelo wapama. Ethu enaamukavihere namahudhera wunnuwelavo epaddi yomuzimuni ddi? Oya omutugumanoni. Mwaha wa ddi? Ayaaga omutugumanoni enonelo yaye enere winjhiva, anere wenjhedha enonelo yaye ni anere olibiha wandana onniyena ni Mulugu. (At. 15:30-32) Ohiya yeyove baahi, omutugumanoni namahudhiha aye podi omutonyihedha addibila amodha. Vano podi wera oliye anere woona dhithu dhowinjhiva aneriyena ni addibila eneriwana. Namahudhera ole anere woona wihina makiristawu enodhivelana. Kabeni noone dhotajhiha dhimodha.

11. Dhithu namahudhera anaafwanyiye mmulogoni sivi ni dhinamukavihere addi?

¹¹ Omubuwele namahudhera ahiteliwe anna mwana. Adhowa Nyumba ya Omwene omoona murogola ahiteliwe anna ahima. Woona wilibihera watewene wa murogola ola wihina adhowe omutugumanoni ni anaaye onooddiginya murima wa namahudhera ole. Obe omubuwele namahudhera ahinanda omuhiya omujha soola. Oliye ohumunona ddibila aanna makathamiho mamodhave mbwenye ogonjhiha. Vano ddibila ole wera ogithukulele ogonjhiha odhivela ginnimina ni Mulugu. (2 Cor. 7:1; Fil. 4:13) Vano ddibila ole wera: “Ni weya onere wanda.” Wiwa yopadduwa ya ddibila ola enere omukavihera namahudhera ole. Obe omubuwele namwali anamuhudhera Bibliya, omoona mwananamwali Namona a Yehova agaali ohagalalene, woona ohagalala wula winere omuthukulela namahudhera ole osayela ethu enamuhagalasa.

12. Mwahaya bwaddi nigawoga wihina kadda namalaleya anookavihera wi namahudhera unnuwelevo epaddi yomuzimuni?

¹² Namahudhera oonaga mweddelo wapama wa addibila ohiyana-iyana, onohudhera makalelo omudhivela Mulugu ni omudhivela mwanddamani. (João 13:35; 1 Tim. 4:12) Ninga nonilihu namahudhera podi ohudhera ni addibila yanna makathamiho mamodhave anniyena. Namahudhera anowoona wihina enowandeya osaddula egumi ni wera ethu-sithu wihina akale namahara a Kiristu. (Deut. 30:11) Kadda namalaleya ammulogoni podi okavihera ni makalelo ohiyana-iyana wihina amukavihere namahudhera wunnuwelavo epaddi yomuzimuni. (Mat. 5:16) Ki we, ethu  baani oneriwe wihina wakavihere anamahudhera a Bibliya enaya omutugumanoni?

13-14. Yesu erile ddi ooniliye wihina anamahudhera aye ehiridha?

¹³ Iyo nnafuna nakavihere addibilihu eridhale omuzimuni ohogolowela wahudhiha athu wi ekale anamahudhera. Wihina nande wakavihera nnafuna noone ethu enrena Yesu wihina akavihere anamahudhera aye mudhidhi yaridhiliwa.

¹⁴ Yesu ahalaga neena wihina apiwe anamahudhera aye ‘atene omwihiya ni othawa.’ (Mar. 14:50; João 16:32) Yesu erile ddi ooniliye wi anamahudhera aye ehiridha epaddi yomuzimuni? Agavenyihiwe muukwani ahiwoga ni anamahudhera aye egi: ‘Kamoove! Dhowani, mwawaddele addibilaga [wi gihivenyihiwa muukwani].’ (Mat. 28:10a) Yesu kanyanyale anamahudhera aye. Naari aliwa egamunyanyale ahididela wawithana “addibilaga.” Amuthajhihaga Yehova oliye ahawaddela thagaraga ni ahalevelela. — 2 Reis 13:23.

15. Nawubuwelaga ale eridhale omuzimuni yubuwelo baani ninkannihuna?

¹⁵ Iyo nnowapwatha ale eridhale omuzimuni. Nivanove baddibilihu teto nnowadhivela. Nnowawubuwela mabasa empareliwa Yehova, amodha muwari wa yaka dhowinjhivadhene. (Heb. 6:10) Iyo nihikanna munukwela naliwa! (Luc. 15:4-7) Nnaamutajhihe addi Yesu wihina noonihe wi nnowapwatha ale eridhale omuzimuni?

16. Nnonihe addi wihina nnowapwatha addibilihu eridhale omuzimuni?

¹⁶ Wawithanele omutugumanoni. Yesu ahalibiha arumiwi aye yaridhale awithanelaga mutugumano. (Mat. 28:10b; 1 Cor. 15:6) Iyo podi werana emodhave ni addibilihu eridhale omuzimuni, akala aliwa kinaya omutugumanoni. Wubuwele wihina malabo mamodha enohoweleya okanna ntidi wihina aliwa erumeedhe odhowa omutugumanoni. Mwebaribarene Yesu ahihagalala vanlubale awooniliye arumiwi aye egarumedhe mutugumano, nerana ndo ni iyowa nnere ohagalala vanlubale. — Omusugwe Mateus 28:16 ni Lucas 15:6.

17. Namona ddibila aridhale omuzimuni adhaaga omutugumanoni nikalege avi?

¹⁷ Wawakele nuuthaba. Yesu awooniliye arumiwi aye ahihagalala vanlubale. Oliye dabanjhe othapanya naliwa. (Mat. 28:18) Namona muthu aridhale omuzimuni adhaaga Onyumbani ya Omwene nikalege avi? Nikalege obajha omulojhela. Podi wihina kannone ethu yowoga. Mbwenye nahifunaga omuukula iyo podi owoga ayi: “Ginohagalala vanlubale wuwoona!”

18. Nnakavihere addi addibila eridhale omuzimuni?

¹⁸ Waroromelihe wihina onere wakavihera. Anamahara a Yesu kiyonelamo wihina enere olaleya muthenga dhapama mwilaboni yatene. Mbwenye Yesu waroromeliha egi: ‘Miyo gili ni nyu malabo amatene.’ (Mat. 28:20) Eyo yahakavihera? Hee. Nuuvira mudhidhi vang’ono aliwa yahiviheya ni mabasa ‘ohudhiha ni olaleya muthenga dhapama.’ (At. 5:42) Anamalaleya eridhale omuzimuni enohowela okanna ebaribari wihina nnere wakavihera. Aliwa podi wubuwelaga wihina kinande owelela mabasa olaleya. Iyo podi waroromeliha wihina nnere wukaviherani. Yiwegeredha iyo podi odhowa vamodha mmalaleyelo. Mwebaribarene, aliwa enere ohagalala vanlubale mwaha wakavihera. Noonaga wihina ale eridhale omuzimuni baddibilihu  enoodhavo mareeliho manlubale wa aliwa ni mulogo watene.

19. Efunelo yehu sivi, ni mwahaya wa ddi?

¹⁹ Mabasa ala olaleya ni owahudhiha athu wi ekale anamahara enagome alini? Ofiyedha omakuthulo wa dhithu ndha. (Mat. 28:20; osugwe Glossário, “Final do sistema de coisas.”) Nnere wanda werana yeyo? Hee, ethu nisakunlihu siyeyo! Nnohagalala naalabihedhaga egumihu, kopolo dhihu, dhokanna dhihu wihina nafwanye ale ‘enna efunelo yapama yegumi yohimala.’ (At. 13:48) Neraga ndo nnahara mweddelo wa Yesu. Oliye ohuwoga egi: ‘Yojha yaaga fuwerana efunelo ya ole agirumile ni wamariha mabasa aye.’ (João 4:34; 17:4) Ela si efunelo yehu. Nnafuna naamarihe mabasa anivahile Yesu. (João 20:21) Teto ethu emodha nnafunihu fuwakavihera ale eridhale omuzimuni wi ekale epaddi yehu yaparaga mabasa yala. — Mat. 24:13.

20. Ninga munawogela Filipenses 4:13, ebaribari baani ninnihuna wi nnere wamala mabasa anirumile Yesu?

²⁰ Ebaribari wihina wapara mabasa anirumile Yesu kinakweya. Mbwenye kanili yekihu. Yesu ohunipaganya wihina anakale epaddi yehu. Naparaga mabasa ala owahudhiha athu wi ekale anamahudhera ‘nnalaba ni Mulugu’ vamodha ‘nthananaga ni Kiristu.’ (1 Cor. 3:9; 2 Cor. 2:17) Eyo enowoniha ebaribari yowi nnere wanda wamariha mabasa ala. Mohanganyedha wakwanihera mutholo wehu ni wakavihera amodha wapara mabasa yala gari enlubale! — Omwileri Filipenses 4:13.