1. Ukulingana ne Mateyu 28:18-20, alisundo ci lino Yesu wapile awasambi wakwe?

Pano e Yesu wazyulupusile vye, walolecezile ku wasambi wakwe wano walongine mu Galili. Walinji na amazwi amacindame sana yano walondanga ukuwanena. Amazwi ci? Amazwi yano yakazanwa pe Mateyu 28:18-20.​—Wazyani.

2. Amawuzyo ci yano twandi twasuke mwe co-o icipande?

² Isundo lino Yesu wapile awasambi wakwe ilya kupanga awasambi, lyatwalilila ukuwomba na ku wawonvi wa kwe Leza mwe ya-a amanda. Acino mwe co-o icipande twandi twasuke amawuzyo yatatu yano yakuma umulimo wuno Yesu watupile. Ilya kutalicila likuti, avyani vinji vino tuzipizile ukucita pano tukusambilizya awasambi awapya vino Leza akalonda? Ilya citi wili, avyani vino awa mwi wungwe wazipizile ukucita pa kwavwa umusambi ukulunduluka? Ilya citi tatu, uzye tungavwa wuli awanawitu na wankazi wano watonta ukutalika ukupanga awasambi naswinya?

3. Acisinka ci icicindame cino Yesu walanzile mwi sundo lino watupa?

³ Vino e Yesu walanzile vyawa avivwike sana. Tuzipizile ukusambilizya awantu vino watunenile. Lelo kwawa icisinka icicindame nkaninye cino tuzipizile twakwizuka. E Yesu atalanzile ukuti ‘Muwawasambilizya vyonsinye vino naminenile.’ Lelo watili: Muwawasambilizya “ukukonka vyonsinye vino naminenile.” Co-o cikusula ukuti tutazipizile ukuwuzya vye umusambi vino azipizile ukucita, tuzipizile nu kumwavwa  ukumanya vino angacita pa kukonka vino akusambilila. (Imili. 8:31) Amulandu ci wuno ukucitila wo-o kwacindamila?

4. Uzye casula mwinye ukukonka nanti ukwivwila? Lanjililani.

⁴ Izwi lya kuti “ukukonka” likasula ukwivwila. Nomba tungasambilizya wuli umuntu ukukonka nanti ukwivwila vino Yesu walanzile? Ku cakulolelako, nga ca kuti wumwi akulonda ukusambilizya wumwi ivya kupisya motoka, ica kutalicila akamusambilizya amasundo ya pa musewo. Lelo pa kuti umusambi amanye ivya kukonka ya-a amasundo, wino akumusambilizya azipizile ukumutwala pa musewo nu kumulanjizya vino angawonvya vino asambilizile. Avyani vino tungasambilila kwe co-o icilanjililo?

5. (a) Ukulingana ne Yohani 14:15; 1 Yohani 2:3, avyani vino tuzipizile ukusambilizya awasambi ukucita? (b) Avyani vimwi vino tuzipizile ukucita pa kwavwa awasambi ukukonka vino Yesu walanzile?

⁵ Pano tukusambilizya wumwi e Baibolo tukalonda amanye vino e Yehova akalonda tuwacita. Lelo kuli na vinjinye vino tuzipizile ukucita. Tuzipizile ukuwasambilizya ivya kuwonvya vino wakusambilila mu wumi wawo. (Wazyani Yohani 14:15; 1 Yohani 2:3.) Vino tukucita vingalenga awasambi ukumanya ivya kuwonvya ivisinka vya Masundo pano wali ku sukulu, ku ncito, nanti pano wakusola ivya kumalilamo icitendwe. Tungawasimicilako vino ukukonka amasundo ya mu Baibolo kwatucinjilizile nanti vino kwatwavwizye ukupingulapo icete pa vintu. Pano tuli na wasambi tuzipizile twawapepelako ukuti e Yehova awawacinjilila ukuwonvya umuzimu wakwe.​—Yoha. 16:13.

6. Avyani vino vyasanzyamo mu kusambilizya wanji ukukonka vino Yesu walanzile?

⁶ Avyani vino vyasanzyamo mu kusambilizya wanji ukukonka vino Yesu walanzile? Tuzipizile ukuwavwa ukutalika ukuvwambisya ukupanga awasambi. Lelo awasambi wamwi wangatina ukuya mu kuwizya. Acino tuzipizile ukuwatekanizizya sana pano tukuwasambilizya ivisinka vya mu Baibolo vino vingalenga wawe ni suwilo iwome. Nga tukucita wo-o tulilenga vyawafika pa mwezo swinya waliyikundila ukutalika ukuwizya. Nomba avyani vino tuzipizile ukucita pa kwavwa awasambi ukutalika ukuvwambisya ukuwizya?

7. Uzye tungacita wuli pa kuti umusambi atalike ukuvwambisya sana ukuwizya?

⁷ Tungawuzya wino tukasambilila nawe amawuzyo ndi vino: “Uzye ukukonka vino mukusambilila kwalenga wuli uwumi winu ukuzipilako? Uzye mukulola ukuti nawanjinye wazipizile ukwivwa vyo-o vino mwasambilila? Uzye mungacita wuli pa kuwavwa?” (Imilu. 3:27; Mat. 9:37, 38) Mulanjizyani amatrakiti yano Tukawonvya pa Kusambilizya Baibolo nu kumunena ukuti asolepo yano angapako walupwa, iviwuza nanti wano akasambilila nawo. Swinya mungapitulukamo nawe pa kumwavwa ukumanya vino angasila umuntu e trakiti. Nga ca kuti wiza wawa we kawizya, muzipizile mwawomba nawe sana pa kumwavwa ukumanya ivya kuwawomba icete umulimo wa kuwizya.​—Ekawi. 4:9, 10; Luka 6:40.

8. Amulandu ci wuno awasambi wazipizile ukukunda e Yehova na wantu? (Lolani akambokosi kano kakuti “ Vino Tungavwa Awasambi Ukukunda Sana Leza.”)

⁸ Muwakwizuka ukuti e Yesu watunenile ukuti twasambilizya awantu “ukukonka vyonsinye” vino watunenile. Mwe vino watunenile mwasanzyamo na masundo yawili, akuli kuti ukukunda Leza na wantu. Ya-a  amasundo yalemenkana nkaninye nu mulimo wa kuwizya nu kupanga awasambi. (Mat. 22:37-39) Amulandu ci wuno twalandila wo-o? Amuno umusambi nga wakunda Leza na wantu aliwalondesya nkaninye ukutalika ukuwizya. Kweni, awasambi wamwi wangakwivwa intete zya kutalika ukuwizya, lelo nga twawavwa ukumanya ukuti e Yehova aliwawavwa pano wakuwizya, walileka ukutina awantu. (Amalu. 18:1-3; Imilu. 29:25). Mu kambokosi kano kali mwe co-o icipande walanzile sana pe vino tungacita pa kwavwa awasambi ukutemwa Leza. Nomba avyani vinji vino awa mwi wungwe wangacita pa kwavwa awapya ukulunduluka?

9. Amasambililo ci amacindame yano wino akusambilila ukupisya motoka angasambilila?

⁹ Nga twanyocela ku cilanjililo ca kwe wino akusambilila ukupisya motoka, avizima ci vino wino akusambilila ukupisya motoka angasambilila nga ca kuti wali ponga na wino akumusambilizya? Angasambilila ukupitila mu kulola vino wakapisya wano wawelezya wakucita. Ku cakulolelako, umusambilizya anganena umusambi ukukolanya e kapisya umutekanye. Nanti anganena umusambi ukuti awakolanya e kapisya wino akudimula amalaiti pano wimilila pa kulanjilila wano wali ku nsizi ukuti ayimilile. Ukucita wo-o kungalenga wino akusambilila amanye ukuwa we kapisya muzima.

10. Avyani vino vingavwa umusambi ukulunduluka?

¹⁰ Wonye wo-o avino cikawa na kumusambi wino watalika ukupita pa musewo wa ku wumi, asisambilila vye ku musambilizya wakwe lelo akasambilila na ku wawonvi wa kwe Yehova wanji. Avyani vino vingavwa sana umusambi ukulunduluka? Akuzanwa lyonsi mu kulongana. Amuno nga akuzanwa mu kulongana alisambilila ivivule ukucila na vino akasambilila pi sambililo vino vilimwavwa ukuwomya isuwilo lyakwe nu kukunda sana e Leza. (Imili. 15:30-32) Nga ca kuti akuzanwa mu kulongana, e kasambilizya angawa nu longo lwa kumumanyisya ku wanawitu na wankazi wano wapitapo mu ntazi zimwi izikolane na zino akupitamo. Swinya alilola na vino awanawitu na wankazi wakundana. Mulole vimwi vino angasambilila nga ca kuti walola vino vyakonkapo.

11. Alongo ci luno umusambi angawa nalo nga akuzanwa mu kulongana swinya cingamwavwa wuli?

¹¹ Yelenganyani ukuti umusambi umwanaci wino wasyala akakuzya awana wenga wiza mukulongana nga wamanyana ne nkazi wino akapita mu ntazi iyili yonganye yino akapitamo. Uzye mukwelenganya umusambi angivwa wuli nga walola vino e nkazi akawombesya ukuzanwa mu kulongana? Nanti, Tuti umusambi wumwi camutamya ukuleka ukupepa fwaka. Nga pano wamanyana nu mwanawitu wino waleka ukupepa fwaka pa mulandu wa kukunda Yehova. (2 Kor. 7:1; Flpi. 4:13) Nga wivwa amazwi ya kuwomelezya ukufuma ku mwanawitu aya kuti, “Namwemwenye mungaleka.” Uzye mukwelenganya ukuti angayivwa wuli? Nanti tuti umusambi umukazyana wamanyana ne nkazi uwacitici wino wawa ni nsansa mu kuwombela Yehova. Uzye mukwelenganya co-o cingavwa wuli umusambi? Ukwasowa nu kuvwilika insansa zya kwe nkazi zingalenga atalike ukuvwambisya ukumanyilapo na vinji pa kuti amanye vino vikalenga ukuti e nkazi awawa ni nsansa.

12. Amulandu ci wuno tungalandila ukuti swensinye twawa nu mulimo wa kwavwa awasambi ukulunduluka?

¹² Nga ca kuti awasambi wamanyana na wanawitu awavule wano watwalilila ukuwombela Yehova, wangamanya vino cikasula  ukukonka isundo lya kwe Klistu ilya kukunda Leza na wantu. (Yoha. 13:35; 1 Tim. 4:12) Ukumanyana na wanawitu kungalenga awasambi wamanye ivya kuwomba ni ntazi zino wakupitamo. Swinya cingawavwa ukumanya muno wazipizile ukupiluka pa kuti wawe awasambi wa kwe Klistu. (Amasu. 30:11) Fwandi swensinye mwi wungwe twawa nu mulimo wa kwavwa awasambi ukulunduluka. (Mat. 5:16) Uzye mukacita wuli pa kuti mwavwe awasambi wano wakazanwa mu kulongana ukulunduluka?

13-14. Uzye e Yesu wavwile wuli awasambi wakwe pano watonsile?

¹³ Tuzipizile ukwavwa awanawitu na wankazi wano watonta ukutalika ukuwomba umulimo wuno Klistu watusila uwa kupanga awasambi. Vino Yesu wacisile pa kwavwa awasambi wakwe pano watonsile vingatwavwa na sweswenye pano tukwavwa wano watonta.

¹⁴ Pa wanda wuno e Yesu wafwanga awasambi wakwe “wonsinye wamusile awasamala.” (Mar. 14:50; Yoha. 16:32) Uzye e Yesu wacisile wuli pa kwavwa awasambi wakwe wano watonsile? Walile wazyulupukavye wanenile awasambi wakwe wamwi ukuti: “Mutatina! Yanji kanenani awanji waye ku Galileya akuno wize wandole.” (Mat. 28:10a) E Yesu atakanile awatumwa wakwe pano wazyulupusile. Nanti aca kuti wamusamazile watwalilizile ukuwalola ukuti ‘awawuye.’ E Yesu walinji nu luse swinya watetelanga wulyanye vino Yehova wawa.​—2 Izya. 13:23.

15. Uzye tukayivwa wuli pa wanawitu na wankazi wano waleka ukuwizya?

¹⁵ Nasweswenye twawikako sana amano ku wanawitu na wankazi wano waleka ukuwizya. Wacili awanawitu na wankazi swinya twawakunda nkaninye! Tucili tukakwizuka vino wawombesyanga mu mulimo wa kwe Yehova. Wamwi pe wa-a wawombezile e Yehova ni cisinka pa myaka imivule. (Hebe. 6:10) Tukawalucila nkaninye! (Luka 15:4-7) Uzye anzila ci zimwi zino tungalanjizizyamo ukuti tucili twawawikako sana amano wulyanye vino Yesu wacisile?

16. Uzye tungalanjizya wuli ukuti twawikako sana amano ku watonte?

¹⁶ Witaniko mu kulongana. Inzila yonga yino e Yesu wawomelezizyemo awasambi wakwe akuwitako mu kulongana. (Mat. 28:10b; 1 Kor. 15:6) Nasweswenye tuzipizile ukwitako awatonte mu kulongana nga ca kuti wasizanwako. Lelo muzipizile ukwizuka ukuti mpindi zimwi watanga watalike zuwa ukulongana. Acino mutafwile ukunenuka. Ukwasowa nu kuvwilika e Yesu watemilwe nkaninye pano awatumwa wazanilwe ku kulongana kuno wawisile.​—Linganyaniko Mateyu 28:16 ne Luka 15:6.

17. Avyani vino tuzipizile ukucita nga ca kuti umutonte wiza mu kulongana?

¹⁷ Wapocelelani ni nsansa. E Yesu walenzile awasambi wakwe ukuyivwa awasapuke, pa kuitalicilako ukulanda na woliwo. (Mat. 28:18) Nga sweswe tulicita wuli nga ca kuti umutonte wiza mukulongana? Tuzipizile ukwiza mupocelela ni nsansa. Pa kutalika tungiza twasakamala ‘ukuti nga nandi ndande cani’? Tutazipizile ukusakamala, akumunena vye vino tutemilwe pa kumulola.

18. Uzye tungawomelezya wuli wakawizya awatonte?

¹⁸ Muwawawomelezya. Awasambi wafwile watalisile ukulola ngati watanga wakumanisye pano e Yesu wawanenile ukuti walinji nu kuwizya insi yonsinye. E Yesu wawomelezizye sana awasambi wakwe pano wawawuzizye  ukuti: “Nandi ndawa namwe pe.” (Mat. 28:20) Ya-a amazwi yawomelezizye sana awasambi wakwe! Patazinvile watalisile “ukuwizya nu kusambilizya ilandwe zima.” (Imili. 5:42) Na watontenye tuzipizile ukuwawomelezya. Amuno mpindi zimwi wangatina ukutalika ukuwizya naswinya. Acino tungawawuzya ukuti wataliwawomba wonga. Nga watalika ukuwizya, tuzipizile twawomba nawo. Nga twacita wo-o, swinya twatwalilila ukuwalola ukuti awanawitu na wankazi, walitemwa sana swinya walitalika ukuwizya naswinya. Co-o cililenga swensinye mwi wungwe ukusecelela.

19. Avyani vino tukalondesya ukucita swinya amulandu ci?

¹⁹ Ampindi ci pano tulileka ukuwizya nu kupanga awasambi? Tulitwalilila vye ukuwomba mpaka pano e Yehova aliyononela yo-o insi imbipe. (Mat. 28:20) Uzye tulikumanisya ukuwomba ukufika pano insi ilisilila? Ee! Awuli mulandu wuno tukawonvya impindi, amaka ni vyuuma vino twakwata pa kuti tuzane “wano wakavwamba uwumi wa muyayaya.” (Imili. 13:48) Swinya nga tukucita wo-o, lyo tukukolanya Yesu wino walanzile ukuti: “Ica kulya cane akutontela ukulonda kwa kwe wino wantuma nu kumalizya umulimo wuno wampile ukuti mbombe.” (Yoha. 4:34; 17:4) Nasweswenye tukalonda nkaninye ukumala umulimo wuno twapwa, (Yoha. 20:21) nu kwavwa wonsinye ukuwikako na wano watontanye ukutwalilila ukuwombako.​—Mat. 24:13.

20. Ukulingana na Wafilipi 4:13, acani cino cingalenga ukuti tuwombe umulimo wuno Yesu watupa?

²⁰ Citapepuka ukuwomba umulimo wuno Yesu watupa. Lelo tusiwomba swenga. E Yesu watulaile ukuti wandi awawa naswe. Nga tukuwizya nu kupanga awasambi, lyo ‘tukuwombela ponga nu Leza’ swinya lyo ‘tukulandila mwe Klistu.’ (1 Kor. 3:9; 2 Kor. 2:17) Ukwasowa nu kuvwilika tungakwanisya ukuwomba wo-o umulimo. Ala alongo uluyiwele ukuwombako nu kwavwa wanji ukuwombako!​—Wazyani Wafilipi 4:13.