1. ¿Ndáa chiñu kúú ña̱ xa̱ʼnda ta̱ Jesús ña̱ va̱xi nu̱ú Mateo 28:18-20?

TÁ XA̱A̱ nda̱taku ta̱ Jesús ki̱tara nu̱ú na̱ discípulora na̱ nda̱kutáʼan chí ñuu Galilea. Saáchi íyo iin ña̱ ndáyáʼviní ka̱ʼa̱nra xíʼinna. ¿Ndáaña kúúña? Kivi kaʼviyóña nu̱ú Mateo 28:18-20 (kaʼviña). *

2. ¿Ndáa pregunta ka̱ʼa̱nyó xa̱ʼa̱?

² Ndiʼi miíyó na̱ káchíñu nu̱ú Ndióxi̱ tiempo vitin xíniñúʼu keʼéyó chiñu ña̱ xa̱ʼnda ta̱ Jesús, ña̱ sanáʼa̱yó na̱ yiví ña̱ va̱ʼa xa̱a̱na koona discípulora. Ña̱kán, ná ka̱ʼa̱nyó xa̱ʼa̱ u̱ni̱ pregunta ña̱ káʼa̱n xa̱ʼa̱ chiñu ña̱ xa̱ʼnda ta̱ Jesús keʼéyó. Ña̱ nu̱ú, ¿ndáa inkaka ña̱ʼa xíniñúʼu sanáʼa̱yó na̱ káʼviyó xíʼin? Ña̱ u̱vi̱, ¿ndáa ki̱ʼva kivi chindeétáʼan ndiʼi na̱ íyo ti̱xin congregación xíʼin na̱yóʼo ña̱ va̱ʼa kuaʼnuna xíʼin tu̱ʼun Ndióxi̱? Ta, ña̱ u̱ni̱, ¿ndáa ki̱ʼva chindeétáʼanyó xíʼin na̱ hermano na̱ ku̱xíka nu̱ú Jehová ña̱ va̱ʼa ndikó tukuna keʼéna chiñu ña̱ xa̱ʼnda ta̱ Cristo?

3. ¿Ndáaña kúú ña̱ ni̱ka̱ʼa̱n ta̱ Jesús keʼéyó?

³ Káxi ni̱ka̱ʼa̱n ta̱ Jesús ña̱ xíniñúʼu sanáʼa̱yó na̱ yiví xa̱ʼa̱ chiñu ña̱ xa̱ʼndara. Ta̱ Jesús va̱ása níka̱ʼa̱n kuitíra “Sanáʼa̱ndóna  ndiʼi ña̱ʼa ña̱ sa̱náʼi̱ ndóʼó”. Chi ña̱ ni̱ka̱ʼa̱nra kúú “Sanáʼa̱ndóna ná keʼéna ndiʼi ña̱ʼa ña̱ sa̱náʼi̱ ndóʼó”. Ña̱kán tá kúni̱yó saxínuyó ña̱ ni̱ka̱ʼa̱nra, xíniñúʼu sanáʼa̱yó na̱ káʼviyó xíʼin ndáaña keʼéna ta saátu ndáa ki̱ʼva keʼénaña (Hech. 8:31). ¿Nda̱chun?

4. Ka̱ʼa̱n xa̱ʼa̱ iin ejemplo ña̱ náʼa̱ ndáa ki̱ʼva kivi sanáʼa̱yó iin na̱ yiví ña̱ kandíxana keʼéna chiñu ña̱ xa̱ʼnda ta̱ Cristo.

⁴ ¿Ndáa ki̱ʼva kivi sanáʼa̱yó iin na̱ yiví ña̱ kandíxana chiñu ña̱ xa̱ʼnda ta̱ Jesús? Ná ka̱ʼa̱nyó xa̱ʼa̱ iin ejemplo. Iin ta̱ sánáʼa̱ ti̱xin iin escuela nu̱ú sákuaʼana kavana carro, ¿ndáaña xíniñúʼu keʼéra ña̱ va̱ʼa sanáʼa̱ra na̱ káʼvi kán ña̱ kandíxana ley ña̱ tránsito? Sana siʼna ka̱ʼa̱nra xíʼinna ndáa ki̱ʼva keʼénaña. Soo tá kúnira ña̱ ná sakuaʼana kandíxana ña̱yóʼo, íyo inka ña̱ xíniñúʼu keʼéra. Xíniñúʼu ku̱ʼu̱nra xíʼinna tá xa̱a̱ kávana ña̱ va̱ʼa chindeétáʼanra xíʼinna keʼéna ña̱ sa̱kuaʼana. ¿Ndáaña sákuaʼayó xíʼin ña̱yóʼo?

5. a) Nda̱a̱ táki̱ʼva káchi Juan 14:15 xíʼin 1 Juan 2:3, ¿ndáaña xíniñúʼu sanáʼa̱yó na̱ káʼviyó xíʼin? b) Ka̱ʼa̱n xa̱ʼa̱ sava ejemplo ña̱ náʼa̱ ndáa ki̱ʼva keʼéyóña.

⁵ Tá káʼviyó xíʼin iin na̱ yiví, sánáʼa̱yóna ndáaña kúú ña̱ ndátu Ndióxi̱ ná keʼéyó. Soo su̱ví ña̱yóʼo kuití xíniñúʼu keʼéyó. Chi xíniñúʼu sanáʼa̱yóna ña̱ ndiʼi ki̱vi̱ keʼéna ña̱ sákuaʼana (kaʼvi Juan 14:15; * 1 Juan 2:3). * Xíʼin ña̱ kéʼéyó kivi na̱ʼa̱yó nu̱úna ndáa ki̱ʼva keʼéna ña̱ káʼa̱n tu̱ʼun Ndióxi̱ tá ku̱a̱ʼa̱nna escuela, nu̱ú káchíñuna á tá ndáka̱xinna ña̱ kotonde̱ʼéna á ña̱ kusíkína. Ta saátu, kivi natúʼunyó xíʼinna ndáa ki̱ʼva xa̱a̱ chíndeétáʼan consejo ña̱ va̱xi nu̱ú Biblia xíʼinyó ña̱ vií ndaka̱xinyó keʼéyó iin ña̱ʼa á ndáa ki̱ʼva xa̱a̱ ndáaña miíyó. Ta tá kéʼéyó oración xíʼin na̱ káʼviyó xíʼin, kivi ka̱ʼa̱nyó xíʼin Jehová ña̱ ná kuniñúʼura espíritu santora ña̱ va̱ʼa chindeétáʼanra xíʼinna (Juan 16:13).

6. ¿Ndáa inkaka ña̱ xíniñúʼu keʼéyó ña̱ va̱ʼa sanáʼa̱yó inkana ña̱ kandíxana chiñu ña̱ xa̱ʼnda ta̱ Jesús?

⁶ ¿Ndáa inkakaña xíniñúʼu keʼéyó ña̱ va̱ʼa sanáʼa̱yó inkana ña̱ kandíxana chiñu ña̱ xa̱ʼnda ta̱ Jesús? Xíniñúʼu chindeétáʼanyó xíʼin na̱ káʼviyó xíʼin ña̱ va̱ʼa xa̱a̱na kutóona chindeétáʼanna xíʼin inkana ña̱ koona discípulo ta̱ Cristo. Sava na̱ káʼviyó xíʼin yíʼvinína tá ndákanixi̱nína xa̱ʼa̱ ña̱ ku̱ʼu̱nna natúʼunna xíʼin na̱ yiví xa̱ʼa̱ Ndióxi̱. Ña̱kán, xíniñúʼu kúee koo iniyó ña̱ chindeétáʼanyó xíʼinna ña̱ kunda̱a̱ka-inina xa̱ʼa̱ ña̱ sánáʼa̱ Biblia, tasaá xa̱a̱na kandíxakana Ndióxi̱ ta kuni̱na natúʼunna xíʼin inkana xa̱ʼa̱ra. ¿Ndáaña kivi keʼéyó ña̱ va̱ʼa chindeétáʼanyó xíʼinna ña̱ kutóona natúʼunna xíʼin inkana xa̱ʼa̱ Ndióxi̱?

7. ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ kuni̱na natúʼunna xíʼin na̱ yiví xa̱ʼa̱ Ndióxi̱?

⁷ Sana kivi nda̱ka̱tu̱ʼúnyó na̱ káʼviyó xíʼin: “¿Á viíka íyo ña̱ tákún vitin xa̱ʼa̱ ña̱ ki̱xáʼún sákuaʼún xa̱ʼa̱ Ndióxi̱? ¿Á túviún ña̱ xíniñúʼu sakuaʼa inka na̱ yiví xa̱ʼa̱ra? ¿Ndáa ki̱ʼva kivi chindeétáʼún xíʼinna?” (Prov. 3:27; Mat. 9:37, 38). Nu̱ú va̱xi tutu ña̱ xíniñúʼuyó, kivi nda̱ni̱ʼíyó sava tratado ña̱ kivi na̱ʼa̱yó nu̱úna, ta ná nda̱ka̱tu̱ʼunyóna ndáaña kivi kutóo na̱ veʼena, na̱ migona á na̱ káchíñu xíʼinna. Ná taxiyóña ndaʼa̱na, ta ná sakuaʼa kúeeyó xíʼinna ndáa ki̱ʼva vií taxinaña. Soo saátu, tá ná xa̱a̱na koona publicador xíniñúʼu ndakundeéyó chindeétáʼanyó xíʼinna (Ecl. 4:9, 10; Luc. 6:40).

8. ¿Nda̱chun ndáyáʼviní sanáʼa̱yó na̱ káʼviyó xíʼin ña̱ kuʼvi̱-inina kunina Ndióxi̱ ta saátu ña̱ kuʼvi̱-inina kunina inkana? (Koto recuadro “ Ndáa ki̱ʼva chindeétáʼanyó xíʼin na̱ káʼviyó xíʼin ña̱ kuʼvi̱-inina kunina Ndióxi̱”).

⁸ Ná ndakaʼányó chi ta̱ Jesús ni̱ka̱ʼa̱nra xíʼinyó ña̱ xíniñúʼu sanáʼa̱yó na̱ yiví ña̱ ná keʼéna ndiʼi ña̱ʼa ña̱ sa̱náʼa̱ra miíyó. Tá kúú, ni̱ka̱ʼa̱nra  xa̱ʼa̱ u̱vi̱ ley ña̱ ndáyáʼviní, ña̱ kuʼvi̱-iniyó kuniyó Ndióxi̱ ta saátu kuʼvi̱-iniyó kuniyó inkana (Mat. 22:37-39). Tá ná sanáʼa̱yóna keʼéna ña̱yóʼo, chindeétáʼanyó xíʼinna ña̱ natúʼunna xíʼin na̱ yiví xa̱ʼa̱ Ndióxi̱. Ña̱ nda̱a̱ kúú ña̱ yíʼvi na̱ káʼviyó xíʼin keʼéna ña̱yóʼo tá ndákanixi̱nína xa̱ʼa̱ña, soo kivi ka̱ʼa̱nyó xíʼinna ña̱ chindeétáʼanva Jehová xíʼinna tasaá loʼo tá loʼo va̱ása yi̱ʼvíkana kunina na̱ yiví (Sal. 18:1-3; Prov. 29:25). Nu̱ú artículo yóʼo va̱xi iin recuadro ña̱ káʼa̱n ndáa ki̱ʼva chindeétáʼanyó xíʼin na̱ káʼviyó xíʼin ña̱ kuʼvi̱ka-inina kunina Ndióxi̱. Soo ndiʼiva na̱ congregación kivi chindeétáʼan xíʼin na̱ sákuaʼa xa̱ʼa̱ Ndióxi̱ ña̱ na̱ʼa̱na ña̱ kúʼvi̱-inina xíninara, ta saátu ña̱ kúʼvi̱-inina xínina inkana. Ná kotoyó ndáa ki̱ʼva keʼéyó ña̱yóʼo.

9. ¿Ndáa ki̱ʼva sákuaʼa iin na̱ yiví kavana carro?

⁹ Ná ka̱ʼa̱n tukuyó xa̱ʼa̱ na̱ sákuaʼa kava iin carro. Tá kávana ku̱a̱ʼa̱nna nu̱ú carretera, va̱ása sákuaʼa kuitína xíʼin ña̱ káʼa̱n ta̱ sánáʼa̱-ñaʼá, chi saátu xítona ña̱ kéʼé inka na̱ viíní káva. Ta̱ sánáʼa̱-ñaʼá kivi ka̱ʼa̱nra xíʼinna ña̱ ná kotona ña̱ kéʼé inka na̱ káva, chi xíʼin ña̱ to̱ʼó táxina ná ya̱ʼa inka carro nu̱úna. Á sanatu káʼa̱nra xíʼinna ná kotona ndáaña kéʼé inkana xíʼin luz carrona tá xítona va̱xi inka carro chí nu̱ú. Ku̱a̱ʼání ña̱ sákuaʼana xíʼin ña̱ xítona kéʼé inkana.

10. ¿Ndáaña chindeétáʼan xíʼin na̱ káʼviyó xíʼin ña̱ kuaʼnuna xíʼin tu̱ʼun Ndióxi̱?

¹⁰ Ki̱ʼva saá íyo ña̱ ndóʼo na̱ káʼviyó xíʼin, tá kíxáʼana kéʼéna ña̱ kúni̱ Ndióxi̱ va̱ása sákuaʼa kuitína xíʼin ña̱ káʼa̱nyó xíʼinna, chi saátu sákuaʼana xíʼin ña̱ kéʼé inka na̱ káchíñu nu̱ú Jehová. Xa̱ʼa̱ ña̱yóʼo ndáyáʼviní ku̱ʼu̱nna reunión ña̱ va̱ʼa kuaʼnuna xíʼin tu̱ʼun Ndióxi̱. Chi ña̱ kuniso̱ʼona kán chindeétáʼanña xíʼinna ña̱ sakuaʼakana xa̱ʼa̱ Ndióxi̱, ña̱ kandíxakanara ta kuʼvi̱ka-inina kuninara (Hech. 15:30-32). Ta su̱ví ña̱yóʼo kuití kúú ña̱ kivi keʼéna, chi kán kivi na̱ʼa̱yó na̱ hermano nu̱úna ta sana inkáchi íyo ña̱ kútóona xíʼin na̱ hermano yóʼo á inkáchi íyo ña̱ ndo̱ʼona. Ta, ¿ndáa inkaka ña̱ kivi kotona ti̱xin congregación? Ná ka̱ʼa̱nyó xa̱ʼa̱ sava ña̱yóʼo.

11. ¿Ndáaña kivi kuu ti̱xin congregación, ta ndáa ki̱ʼva kivi chindeétáʼan ña̱yóʼo xíʼin na̱ sákuaʼa xa̱ʼa̱ Ndióxi̱?

¹¹ Iin ñá sákuaʼa xa̱ʼa̱ Ndióxi̱ ta sákuaʼnu iinlá miíñá se̱ʼeñá, xítoñá ndáaña kéʼé iin ñá hermana ñá ndóʼo táʼan ña̱ ndóʼo miíñá. Ndákanda̱ní-iniñá tá xítoñá ña̱ chíka̱a̱ní ñá hermana yóʼo ndee̱ ña̱ ku̱ʼu̱nñá reunión xíʼin na̱ va̱lí se̱ʼeñá. Iin ta̱ sákuaʼa xa̱ʼa̱ Ndióxi̱ ta kúni̱ra sandákoora ña̱ kaʼmira, xínitáʼanra xíʼin iin ta̱ hermano ta̱ ndo̱ʼo táʼan ña̱ ndóʼo miíra. Ta̱ hermano yóʼo nátúʼunra xíʼinra ña̱ xa̱ʼa̱ ña̱ kúʼvi̱-inira xínira Jehová, ki̱xáʼara kándíxara ña̱ káʼa̱n Biblia ta sa̱ndákoora ña̱ kaʼmira (2 Cor. 7:1; Filip. 4:13). Tándi̱ʼi na̱túʼun ta̱ hermano yóʼo xíʼinra xa̱ʼa̱ ña̱ ndo̱ʼora, káʼa̱nra xíʼinra ña̱ kuchiñutu ta̱yóʼova sandákoora ña̱ kaʼmira ta ña̱yóʼo chíka̱a̱níña ndee̱ xíʼinra. Ta, iin ñá loʼo ñá sákuaʼa xa̱ʼa̱ Ndióxi̱, xítoñá ña̱ iin ñá hermana ñá kúúmií táʼan ku̱i̱ya̱ñá kúsi̱íní-iniñá chi kúúñá testigo Jehová. Ña̱kán, kúni̱ñá kunda̱a̱-iniñá nda̱chun kúú ña̱ ndiʼi tiempo kúsi̱íní-ini ñá hermana kán.

12. ¿Nda̱chun káʼa̱nyó ña̱ ndiʼiyó kivi chindeétáʼan xíʼin na̱ sákuaʼa xa̱ʼa̱ Ndióxi̱ ña̱ kuaʼnuna xíʼin tu̱ʼunra?

¹² Tá na̱ káʼviyó xíʼin xínitáʼan xíʼin inka na̱ hermano na̱ nda̱kú íyo ini ndásakáʼnu Ndióxi̱, kivi kotona ndáa ki̱ʼva kandíxana ley ña̱ ni̱ka̱ʼa̱n ta̱ Jesús ña̱ kuʼvi̱-inina kunina Ndióxi̱, ta saátu ña̱ kuʼvi̱-inina kunina inkana (Juan 13:35; 1 Tim. 4:12). Nda̱a̱ táki̱ʼva xa̱a̱ ni̱ka̱ʼa̱nyó, ku̱a̱ʼání ña̱ va̱ʼa kivi ndakiʼin na̱ káʼviyó xíʼin tá ná kotona ña̱ kéʼé na̱ hermano na̱ yáʼa nu̱ú tu̱ndóʼo táʼan ña̱ yáʼa miína nu̱ú. Tasaá kiʼinna kuenta ña̱ kiviva nasamana ña̱ kéʼéna ña̱ va̱ʼa xa̱a̱na koona discípulo ta̱ Cristo (Deut.  30:11). Xa̱ʼa̱ ña̱kán, ndiʼi na̱ íyo ti̱xin congregación kivi chindeétáʼanna xíʼin na̱ sákuaʼa xa̱ʼa̱ tu̱ʼun Ndióxi̱ ña̱ kuaʼnuna xíʼin tu̱ʼunra (Mat. 5:16). Ña̱kán iin tá iinyó ná ndakanixi̱níyó xa̱ʼa̱ ña̱yóʼo: “¿Ndáaña kéʼíi̱ ña̱ va̱ʼa chika̱i̱ ndee̱ xíʼin na̱ sákuaʼa xa̱ʼa̱ Ndióxi̱ ta ki̱xáʼana xáʼa̱nna reunión?”.

13, 14. ¿Ndáaña ke̱ʼé ta̱ Jesús xíʼin na̱ apóstolra tá nda̱kava-inina?

¹³ Kúni̱yó chindeétáʼanyó xíʼin na̱ ku̱xíka nu̱ú Jehová ña̱ kixáʼa tukuna keʼéna chiñu ña̱ xa̱ʼnda ta̱ Jesús, ña̱ chindeétáʼanna xíʼin na̱ yiví ña̱ va̱ʼa xa̱a̱na koona discípulora. Ña̱ va̱ʼa kunda̱a̱-iniyó ndáa ki̱ʼva keʼéyóña, ná ka̱ʼa̱nyó xa̱ʼa̱ ña̱ ke̱ʼé ta̱ Jesús xíʼin na̱ apóstolra tá nda̱kava-inina.

¹⁴ Tá kúma̱ní si̱lóʼo kaʼnína ta̱ Jesús, na̱ apóstolra sa̱ndákoonara ta xi̱nuna (Mar. 14:50; Juan 16:32). ¿Ndáaña ke̱ʼé ta̱ Jesús xíʼinna tá nda̱kava-inina? Ná ka̱ʼa̱nyó xa̱ʼa̱ ña̱ ke̱ʼéra tá xa̱a̱ nda̱takura. Ni̱ka̱ʼa̱nra xíʼin sava ná ñaʼá ná xi̱ndiku̱n sa̱tára, ña̱ ná ku̱ʼu̱nná ka̱ʼa̱nná xíʼin na̱ apóstolra ña̱ xa̱a̱ nda̱takura. Ña̱yóʼo ni̱ka̱ʼa̱nra xíʼinná: “Va̱ása yi̱ʼvíndó. Kúáʼanndó ta ka̱ʼa̱nndó xíʼin na̱ ñanii̱” (Mat. 28:10a). Ni sa̱ndákoonara, ta̱ Jesús va̱ása nísa̱a̱ra xíʼinna, chi nda̱kundeéra ni̱ka̱ʼa̱nra xíʼinna ña̱ kúúna ñanira. Ta̱ Jesús va̱ʼaní xi̱ndiku̱nra yichi̱ Jehová, saáchi ku̱ndáʼvi-inira xi̱nirana ta i̱xakáʼnu-inira xa̱ʼa̱na (2 Rey. 13:23).

15. ¿Ndáaña ndóʼoyó xa̱ʼa̱ na̱ va̱ása xáʼa̱nka nátúʼun xíʼin na̱ yiví xa̱ʼa̱ Ndióxi̱?

¹⁵ Saátu miíyó ndíʼi̱ní-iniyó xa̱ʼa̱ na̱ va̱ása xáʼa̱nka nátúʼun xíʼin na̱ yiví xa̱ʼa̱ Ndióxi̱. Saáchi kúúkavana hermanoyó ta kúʼvi̱-iniyó xíniyóna. Va̱ása nándósó-iniyó xa̱ʼa̱ ndiʼi ña̱ ke̱ʼéna nu̱ú Jehová tá ya̱chi̱, ta savana ku̱a̱ʼání ku̱i̱ya̱ ka̱chíñuna nu̱úra (Heb. 6:10). Ta ndákaʼánníyó xa̱ʼa̱na (Luc. 15:4-7). ¿Ndáa ki̱ʼva kivi kundiku̱nyó yichi̱ ta̱ Jesús ta na̱ʼa̱yó ña̱ ndíʼi̱ní-iniyó xa̱ʼa̱na?

16. ¿Ndáa ki̱ʼva na̱ʼa̱yó ña̱ ndíʼi̱-iniyó xa̱ʼa̱ na̱ hermanoyó na̱ ku̱xíka nu̱ú Jehová?

¹⁶ Viíní ná ka̱ʼa̱nyó xíʼinna ña̱ ku̱ʼu̱nna reunión. Iin ña̱ ke̱ʼé ta̱ Jesús tá nda̱kava-ini na̱ apóstolra, kúú ña̱ ni̱ka̱ʼa̱nra xíʼinna ña̱ ná ndakutáʼanna xíʼinra (Mat. 28:10b; 1 Cor. 15:6). Ta saátu miíyó tiempo vitin, kivi ka̱ʼa̱nyó xíʼin na̱ ku̱xíka nu̱ú Jehová ña̱ ná ku̱ʼu̱nna reunión xíʼin na̱ congregaciónyó. Ta sana ku̱a̱ʼá yichi̱ ka̱ʼa̱nyó xíʼinna ta saáví kandíxana ku̱ʼu̱nna. Ni̱kusi̱íníva-ini ta̱ Jesús tá ka̱ndíxa na̱ discípulora ña̱ ndakutáʼanna xíʼinra, ta saátu miíyó kusi̱íní-iniyó tá ná kandíxana ku̱ʼu̱nna reunión (Mat. 28:16; chitáʼanña xíʼin Lucas 15:6).

17. ¿Ndáaña keʼéyó tá ná xa̱a̱ iin na̱ ku̱xíka nu̱ú Jehová reunión?

¹⁷ Viíní ná ndakiʼinyóna. Tá nda̱kutáʼan ta̱ Jesús xíʼin na̱ discípulora ku̱yatinra ta ni̱ka̱ʼa̱nra xíʼinna ña̱ va̱ʼa ná kunda̱a̱-inina ña̱ kúsi̱í-inira xa̱ʼa̱ ña̱ ni̱xa̱a̱na (Mat. 28:18). Ta miíyó, ¿ndáaña keʼéyó tá ná xa̱a̱ iin na̱ ku̱xíka nu̱ú Jehová reunión? Kivi kuyatinyó nu̱úna ta viíní ndakiʼinyóna. Sana ndíʼi̱-iniyó chi kǒo kúnda̱a̱-iniyó ndáaña ka̱ʼa̱nyó xíʼinna, kivi ka̱ʼa̱nyó xíʼinna ña̱ kúsi̱íní-iniyó ña̱ nda̱kutáʼan tukuyó xíʼinna. Soo ná kiʼinyó kuenta ña̱ va̱ása sakúkaʼanyó nu̱úna.

18. ¿Ndáa ki̱ʼva kivi chika̱a̱yó ndee̱ xíʼin na̱ ku̱xíka nu̱ú Jehová?

¹⁸ Ná chika̱a̱yó ndee̱ xíʼinna. Sana nda̱kanixi̱ní na̱ discípulo ta̱ Jesús ña̱ va̱ása kuchiñuna ku̱ʼu̱nna natúʼunna xíʼin na̱ yiví na̱ íyo iníísaá nu̱ú ñuʼú. Soo ta̱ Jesús sandíkora-inina tá ni̱ka̱ʼa̱nra ña̱yóʼo xíʼinna: “Íyoi̱ xíʼinndó ndiʼi ki̱vi̱” (Mat. 28:20). Xa̱ʼa̱ ña̱yóʼo, tá ni̱ya̱ʼa loʼo nda̱kundeéna na̱túʼunna xíʼin na̱ yiví xa̱ʼa̱ tu̱ʼun Ndióxi̱ (Hech. 5:42). Xíniñúʼutu  na̱ hermano na̱ ku̱xíka nu̱ú Jehová ña̱ ná chika̱a̱yó ndee̱ xíʼinna. Sana yíʼvina kixáʼa tukuna natúʼunna xíʼin na̱ yiví xa̱ʼa̱ tu̱ʼun Ndióxi̱. Soo va̱ʼaní kunina tá ná ka̱ʼa̱nyó xíʼinna ña̱ va̱ása ku̱ʼu̱n iinlá miína natúʼunna xíʼin na̱ yiví, ta ka̱ʼa̱nyó xíʼinna ña̱ ku̱ʼu̱nyó xíʼinna tá xa̱a̱ íyo tu̱ʼvana. Ta taxivana tíxa̱ʼvi ndaʼa̱yó tá ná chindeétáʼanyó xíʼinna. Tá ná kunda̱a̱-ini na̱ ku̱xíka nu̱ú Jehová ña̱ kúúkavana hermanoyó, sana kuni̱na ndikóna kachíñuna nu̱úra ta kusi̱íní-ini na̱ congregación.

19. ¿Ndáaña kúú ña̱ kúni̱níyó keʼéyó, ta nda̱chun?

¹⁹ ¿Nda̱saaka tiempo xíniñúʼu chindeétáʼanyó xíʼin na̱ yiví ña̱ va̱ʼa xa̱a̱na koona discípulo ta̱ Cristo? Xíniñúʼu keʼéyó ña̱yóʼo nda̱a̱ ná ndiʼi-xa̱ʼa̱ ñuyǐví (Mat. 28:20; koto glosario, “conclusión del sistema”). ¿Á kuchiñuyó saxínuyó chiñu ña̱ xa̱ʼnda ta̱ Jesús nu̱úyó? Kuchiñuvayó tá ná chika̱a̱-iniyó keʼéyó ña̱yóʼo. Xíʼin ña̱ si̱í-ini xíniñúʼuyó tiempoyó, ndee̱yó xíʼin ña̱ʼa ña̱ kúúmiíyó ña̱ va̱ʼa nandukúyó na̱ yiví na̱ kúni̱ ndakiʼin ña̱ kutakuna ndiʼi tiempo (Hech. 13:48). Tá kéʼéyó ña̱yóʼo ndíku̱nyó yichi̱ ta̱ Jesús, chi ni̱ka̱ʼa̱nra: “Ña̱ keʼíi̱ ña̱ kúni̱ Ndióxi̱ nda̱a̱ táki̱ʼva íyo ña̱ xíxii̱ saá íyoña ta saxínui̱ chiñura” (Juan 4:34; 17:4). Ña̱ kúni̱níyó kúú ña̱ saxínuyó chiñu ña̱ ta̱xira ndaʼa̱yó (Juan 20:21). Ta saátu kúni̱yó ña̱ ndiʼi na̱ hermanoyó, nda̱a̱ na̱ ku̱xíka nu̱ú Jehová, ná ndakundeéna kachíñuna xíʼinyó nda̱a̱ ná ndiʼi-xa̱ʼa̱ ñuyǐví (Mat. 24:13).

20. Nda̱a̱ táki̱ʼva káchi Filipenses 4:13, ¿nda̱chun kuchiñuyó saxínuyó chiñu ña̱ xa̱ʼnda ta̱ Jesús?

²⁰ Xíniñúʼu ndakuniyó ña̱ yo̱ʼvi̱va chiñu ña̱ ta̱xi ta̱ Jesús ndaʼa̱yó. Soo va̱ása íyo iinlá miíyó saáchi ni̱ka̱ʼa̱nra ña̱ chindeétáʼanra xíʼinyó keʼéyó ña̱yóʼo. Kándíxayó chiñu ña̱ xa̱ʼndara ña̱ chindeétáʼanyó xíʼin na̱ yiví ña̱ xa̱a̱na koona discípulora, saáchi na̱ chíndeétáʼan xíʼin Ndióxi̱ kúúyó, ta saátu chíndeétáʼan ta̱ Cristo xíʼinyó ña̱ keʼéyóña (1 Cor. 3:9; 2 Cor. 2:17). Xa̱ʼa̱ ña̱yóʼo kuchiñuvayó keʼéyó chiñu ña̱ ta̱xira ndaʼa̱yó. Iin chiñu ña̱ káʼnuní kúú ña̱ ta̱xira ndaʼa̱yó, soo saátu kúnda̱a̱-iniyó ña̱ ndáyáʼviní saxínuyóña ta chindeétáʼanyó xíʼin inkana ña̱ keʼéna ña̱yóʼo (kaʼvi Filipenses 4:13). *