လေ့လာရန် ဆောင်းပါး ၄၅
ခရစ်တော်ရဲ့ မိန့်မှာချက်တွေကို လိုက်နာဖို့ တခြားသူတွေကို ကူညီပေးနိုင်ပုံ
‘သွားပြီး လူတွေကို တပည့် ဖြစ်လာအောင် သွန်သင်ပေးကြပါ။ ကျွန်တော် မိန့်မှာထားသမျှကို လိုက်နာဖို့ သွန်သင်ပေးကြပါ။’—မ. ၂၈:၁၉၊ ၂၀။
သီချင်း ၈၉ နားထောင်၊ နာခံ၊ ကောင်းချီးစံ
အကြိုသုံးသပ်ချက် *
၁။ မဿဲ ၂၈:၁၈-၂၀ အရ ယေရှု ဘာမိန့်မှာသလဲ။
ယေရှု ရှင်ပြန်ထမြောက်ပြီးနောက် ဂါလိလဲနယ်မှာ စုဝေးနေတဲ့ တပည့်တွေရှေ့ ကိုယ်ထင်ရှားပြတယ်။ ယေရှုမှာ အရေးတကြီး ပြောစရာ ရှိတယ်။ ဘာများလဲ။ ယေရှု ပြောတဲ့ စကားကို မဿဲ ၂၈:၁၈-၂၀ မှာ တွေ့ရတယ်။—ဖတ်ပါ။
၂။ ဘယ်မေးခွန်းတွေ ဆွေးနွေးကြမလဲ။
၂ တပည့်ဖြစ်စေပါဆိုတဲ့ မိန့်မှာချက်ဟာ ဒီနေ့ခေတ် ဘုရားကျေးကျွန် ယောက်တိုင်းနဲ့လည်း သက်ဆိုင်တယ်။ ဒါကြောင့် ယေရှု ပေးခဲ့တဲ့ တာဝန်နဲ့ပတ်သက်တဲ့ မေးခွန်း သုံးခုကို ဆွေးနွေးကြည့်ကြစို့။ ပထမ၊ တပည့်သစ်တွေကို ဘုရားသခင့် တောင်းဆိုချက်တွေ သင်ပေးတဲ့အပြင် ဘာလုပ်ရဦးမလဲ။ ဒုတိယ၊ ကျမ်းစာသင်သားတွေ ဘုရားရေးရာဘက် တိုးတက်လာအောင် အသင်းတော်မှာ ရှိတဲ့ ကြေညာသူအားလုံး ဘယ်လို ကူညီပေးနိုင်သလဲ။ တတိယ၊ တပည့်ဖြစ်စေခြင်း လုပ်ငန်းမှာ ပြန်ပါဝင်လာဖို့ မလှုပ်မရှား ဖြစ်နေတဲ့ ကြေညာသူတွေကို ဘယ်လို ကူညီပေးနိုင်သလဲ။
လိုက်နာဖို့ သွန်သင်ပေးပါ
၃။ ယေရှုရဲ့ မိန့်မှာချက်မှာ ဘယ်သတ်သတ်မှတ်မှတ် ညွှန်ကြားချက် ပါသလဲ။
၃ ယေရှုရဲ့ ညွှန်ကြားချက်က ရှင်းပါတယ်။ လူတွေကို မိမိ မိန့်မှာထားသမျှ သွန်သင်ပေးဖို့ ဖြစ်တယ်။ ဒါပေမဲ့ အရေးကြီးတဲ့ အချက်ကို မမေ့သင့်ဘူး။ ယေရှုက ‘ကျွန်တော် မိန့်မှာထားသမျှကို သွန်သင်ပေးပါ’ လို့ မပြောဘူး။ “ကျွန်တော် မိန့်မှာထားသမျှကို လိုက်နာဖို့ သွန်သင်ပေးကြပါ” လို့ ပြောတယ်။ အဲဒီသတ်သတ်မှတ်မှတ် ညွှန်ကြားချက်ကို လိုက်နာဖို့ ကျွန်တော်တို့က ကျမ်းစာ သင်ပေးရုံတ. ၈:၃၁) ဘာကြောင့်လဲ။
လောက်သာ မဟုတ်ဘဲ လိုက်နာနိုင်ပုံကို အနီးကပ် ပြပေးရမယ်။ (၄။ ခရစ်တော် မိန့်မှာသမျှကို လိုက်နာဖို့ သွန်သင်နိုင်ပုံအကြောင်း ဥပမာပေးပါ။
၄ ခရစ်တော် မိန့်မှာသမျှကို လိုက်နာဖို့ သွန်သင်နိုင်ပုံနဲ့ပတ်သက်တဲ့ ဥပမာတစ်ခု စဉ်းစားကြည့်ပါ။ ယာဉ်မောင်းသင်တန်း ပို့ချသူဟာ ယာဉ်စည်းကမ်း လိုက်နာဖို့ သင်တန်းသားတွေကို ဘယ်လို သင်ပေးသလဲ။ အရင်ဆုံး အတန်းထဲမှာ လမ်းစည်းကမ်းတွေ သင်ပေးတယ်။ ဒါပေမဲ့ လိုက်နာနိုင်ပုံကို သင်ပေးဖို့ နောက်တစ်ဆင့် လုပ်ရမယ်။ သင်တန်းသားတွေ လမ်းပေါ် တကယ် မောင်းကျင့်တဲ့အခါ အတူလိုက်ပြီး အနီးကပ် ပြောပြပေးတယ်။ ဒီကနေ ဘာသင်ယူနိုင်သလဲ။
၅။ (က) ယောဟန် ၁၄:၁၅ နဲ့ ၁ ယောဟန် ၂:၃ အရ ကျမ်းစာသင်သားကို ဘာတွေ သင်ပေးရမလဲ။ (ခ) အခြေခံ ကျမ်းစာမူတွေ ကျင့်သုံးဖို့ သင်သားကို ဘယ်လို ကူညီပေးနိုင်သလဲ။
၅ တခြားသူတွေနဲ့ ကျွန်တော်တို့ ကျမ်းစာလေ့လာတဲ့အခါ ဘုရားတောင်းဆိုချက်တွေကို သင်ပေးတယ်။ ဒါပေမဲ့ ဒီ့ထက်မက လုပ်ရမယ်။ သိလာတာတွေကို နေ့စဉ်ဘဝမှာ ကျင့်သုံးဖို့ သင်ပေးရမယ်။ (ယောဟန် ၁၄:၁၅။ ၁ ယောဟန် ၂:၃ ကိုဖတ်ပါ။) အခြေခံ ကျမ်းစာမူတွေကို ကျောင်း၊ အလုပ်၊ အပန်းဖြေချိန်မှာ ဘယ်လို ကျင့်သုံးနိုင်တယ်ဆိုတာ ကိုယ့်ပုံသက်သေနဲ့ သင်ပေးနိုင်တယ်။ ကျမ်းစာ လမ်းညွှန်ချက်တွေကို လိုက်နာတာက အန္တရာယ်ကနေ ဘယ်လို ကာကွယ်ပေးကြောင်း၊ ပညာရှိ ဆုံးဖြတ်ချက် ချဖို့ ဘယ်လို ကူညီပေးကြောင်း ကိုယ်တွေ့ဖြစ်ရပ်တွေ ပြောပြနိုင်တယ်။ သင်သားနဲ့အတူ ဆုတောင်းချိန်မှာ သူ့ကို သန့်ရှင်းသော စွမ်းအားတော် လမ်းပြဖို့ ဆုတောင်းပေးနိုင်တယ်။—ယော. ၁၆:၁၃။
၆။ ယေရှုရဲ့ မိန့်မှာချက်တွေကို လိုက်နာဖို့ သွန်သင်ပေးခြင်းမှာ ဘာပါဝင်သလဲ။
၆ ယေရှုရဲ့ မိန့်မှာချက်တွေကို လိုက်နာဖို့ သွန်သင်ပေးခြင်းမှာ ဘာပါဝင်သလဲ။ တပည့်ဖြစ်စေခြင်း လုပ်ငန်းမှာ ပါဝင်ချင်လာအောင် ကျမ်းစာသင်သားတွေကို ကူညီပေးဖို့ လိုတယ်။ သင်သားတချို့က ဟောပြောခြင်း လုပ်ငန်းမှာ ပါဝင်ရမှာကို စိုးရိမ်နေနိုင်တယ်။ ဒါကြောင့် ကျမ်းစာ အမှန်တရား ပိုနားလည်လာအောင်၊ စိတ်ထိမိပြီး ဟောပြောချင်စိတ် ပေါ်လာအောင် စိတ်ရှည်ရှည် သင်ပေးဖို့ လိုတယ်။ တခြားသူတွေကို သတင်းကောင်း ဝေမျှချင်စိတ် ပေါ်လာအောင် သင်သားတွေကို ဘယ်လို ကူညီပေးနိုင်သလဲ။
၇။ တခြားသူတွေကို သတင်းကောင်း ဝေမျှချင်စိတ် ပေါ်လာအောင် သင်သားကို ဘယ်လို ကူညီနိုင်သလဲ။
၇ ကျမ်းစာသင်သားတွေကို ဒီလို မေးနိုင်တယ်– “နိုင်ငံတော် သတင်းတရား လက်ခံလို့ ဘဝ ဘယ်လို တိုးတက်ကောင်းမွန်လာသလဲ။ ဒီသတင်းကို တခြားသူတွေလည်း ကြားဖို့ လိုတယ်လို့ ထင်သလား။ သူတို့ကို ဘယ်လို ကူညီပေးနိုင်သလဲ။” (ပညာ. ၃:၂၇။ မ. ၉:၃၇၊ ၃၈) သွန်သင်ခြင်း ကိရိယာထဲမှာ ပါတဲ့ ဝေစာတွေ ပြပြီး သူ့ရဲ့ ဆွေမျိုး၊ သူငယ်ချင်း၊ အလုပ်ဖော်တွေနဲ့ သက်ဆိုင်မယ့် ဝေစာကို ရွေးခိုင်းပါ။ အဲဒီဝေစာ အတော်များများ ပေးထားပါ။ ဝေစာကို ဘယ်လို ထိထိရောက်ရောက် ဝေငှနိုင်မလဲဆိုတာ ကြိုတင် လေ့ကျင့်ပေးပါ။ သင်သား နှစ်ခြင်းမခံရသေးတဲ့ ကြေညာသူ ဖြစ်လာတဲ့အခါ သူ့ဘေးနားကနေ အနီးကပ် သင်ပေးပါ။—ဒေ. ၄:၉၊ ၁၀။ လု. ၆:၄၀။
ကျမ်းစာသင်သားတွေ တိုးတက်လာအောင် အသင်းတော် ကူညီပေးပုံ
၈။ သင်သားမှာ ဘုရားနဲ့ လူလူချင်းကို ချစ်တဲ့ မေတ္တာ တိုးများလာဖို့ ဘာကြောင့် အရေးကြီးသလဲ။ (“ ဘုရားကို ချစ်တဲ့ မေတ္တာ တိုးများလာအောင် ကျမ်းစာသင်သားကို ကူညီပေးနိုင်ပုံ” လေးထောင့်ကွက်ကိုလည်း ကြည့်ပါ။)
၈ “မိန့်မှာထားသမျှကို လိုက်နာဖို့ သွန်သင်ပေးကြပါ” လို့ ကျွန်တော်တို့ကို ယေရှု ညွှန်ကြားတယ်။ အဲဒီထဲမှာ ဘုရားနဲ့ လူလူချင်းကို ချစ်ပါဆိုတဲ့ အရေးကြီးဆုံး ပညတ်နှစ်ခု ပါဝင်တာ သေချာတယ်။ အဲဒီပညတ်နှစ်ခုစလုံးက ဟောပြောခြင်း၊ တပည့်ဖြစ်စေခြင်း လုပ်ငန်းနဲ့ အနီးကပ် ဆက်စပ်တယ်။ (မ. ၂၂:၃၇-၃၉) ဘယ်လို ဆက်စပ်သလဲ။ ဘုရားနဲ့ လူလူချင်းကို ချစ်တဲ့မေတ္တာက ဟောပြောခြင်းလုပ်ငန်းမှာ ပါဝင်ဖို့ လှုံ့ဆော်ပေးတယ်။ ဒါပေမဲ့ ကျမ်းစာသင်သားတချို့ဟာ ဟောပြောခြင်းလုပ်ငန်းမှာ ပါဝင်ဖို့ တွေးရုံနဲ့ ကြောက်မိနိုင်တယ်။ ဒါကြောင့် လူကြောက်တဲ့စိတ်ကို ယေဟောဝါရဲ့ အကူအညီနဲ့ တဖြည်းဖြည်း ကျော်လွှားနိုင်မယ်ဆိုတာ ယုံကြည်စိတ်ချလာအောင် လုပ်ပေးပါ။ (ဆာ. ၁၈:၁-၃။ ပညာ. ၂၉:၂၅) ဘုရားကို ချစ်တဲ့ မေတ္တာ တိုးများလာအောင် သင်သားကို ဘယ်လို အဆင့်ဆင့် ကူညီပေးနိုင်ကြောင်း ဒီဆောင်းပါးမှာ ပါတဲ့ လေးထောင့်ကွက်မှာ ဖော်ပြထားတယ်။ အသင်းတော်ကကော တပည့်သစ်တွေကို ဘယ်လို ကူညီနိုင်သလဲ။
၉။ ယာဉ်မောင်း ဥပမာမှာ သင်တန်းသားဟာ အရေးကြီး သင်ခန်းစာတွေကို ဘယ်လို သိလာသလဲ။
၉ ယာဉ်မောင်းသင်တန်း ဥပမာအကြောင်း ပြန်စဉ်းစားကြည့်ပါ။ သင်တန်းသားဟာ ဆရာ့ဘေးကနေ ကားမောင်းရင်း ဘယ်နည်းတွေနဲ့ သင်ယူသလဲ။ ဆရာ ပြောတာ နားထောင်ခြင်း၊ ဂရုတစိုက် မောင်းနှင်နေတဲ့ တခြား ယာဉ်မောင်းတွေကို အကဲခတ်ကြည့်ရှုခြင်းအားဖြင့်ပါပဲ။ ဥပမာ၊ ဆရာက နောက်ကားကို ကျော်တက်ခွင့် ပေးတဲ့ ယာဉ်မောင်း ဒါမှမဟုတ် တစ်ဖက်လမ်းပေါ်က ယာဉ်မောင်း အလင်း မစူးအောင် အလိုက်တသိ မီးချပေးတဲ့ ယာဉ်မောင်းတွေကို ပြပြီး သင်ပေးနိုင်တယ်။ အဲဒီနမူနာကောင်းတွေက ယာဉ်မောင်းနှင်ချိန်မှာ လက်တွေ့ကျင့်သုံးနိုင်တဲ့ အရေးကြီး သင်ခန်းစာတွေ သင်ပေးတယ်။
၁၀။ ဘုရားရေးရာဘက် တိုးတက်ဖို့ သင်သားကို ဘာက ကူညီပေးမလဲ။
၁၀ အလားတူပဲ အသက်လမ်းပေါ် စတင်လျှောက်လှမ်းနေတဲ့ ကျမ်းစာသင်သားဟာ ကျမ်းစာသင်ပေးသူဆီကသာမက တခြား သစ္စာရှိ ကျေးကျွန်တွေရဲ့ ပုံသက်သေကောင်းကနေပါ သင်ယူရမယ်။ အဲဒီလို သင်ယူနိုင်ဖို့ ဘာက ကူညီပေးမလဲ။ ခရစ်ယာန် အစည်းအဝေးတွေ တက်ရောက်ခြင်းပါပဲ။ ဘာကြောင့်လဲ။ အစည်းအဝေးတွေမှာ ကြားရတဲ့ ကျမ်းစာ လမ်းညွှန်ချက်တွေက အသိပညာ၊ ယုံကြည်ခြင်းနဲ့ ဘုရားကို ချစ်တဲ့ မေတ္တာ တိုးများလာဖို့ ကူညီပေးလို့ပဲ။ (တ. ၁၅:၃၀-၃၂) အဲဒီအပြင် သင်သားနဲ့ ဘဝတူ ညီအစ်ကို/မတွေကို ကျမ်းစာသင်ပေးသူက အစည်းအဝေးတွေမှာ မိတ်ဆက်ပေးနိုင်တယ်။ အသင်းတော်မှာ အချင်းချင်း မေတ္တာပြနေတဲ့ ညီအစ်ကို/မတွေရဲ့ ပုံသက်သေကောင်းကိုလည်း သင်သား တွေ့မြင်လာမယ်။ အောက်ပါ အခြေအနေကို စဉ်းစားကြည့်ပါ။
၁၁။ အသင်းတော်မှာ သင်သားတစ်ယောက် ဘာတွေကို သတိထားမိနိုင်သလဲ။ အဲဒါက သူ့အပေါ် ဘယ်လို အကျိုးသက်ရောက်နိုင်သလဲ။
၁၁ ကြင်ဖော်မဲ့ မိခင် ဖြစ်တဲ့ ကျမ်းစာသင်သားဟာ သူနဲ့ အခြေအနေ တူတဲ့ ခရစ်ယာန် ညီအစ်မကို သတိထားမိတယ်။ ကလေးငယ်တွေနဲ့အတူ အစည်းအဝေး လာတက်ဖို့ ညီအစ်မ ဘယ်လောက် ကြိုးစားရကြောင်း မြင်တဲ့အခါ စိတ်ထိမိသွားတယ်။ ဆေးလိပ်ဖြတ်ဖို့ ကြိုးစားနေတဲ့ သင်သားဟာ သူ့လို အခြေအနေကို ရင်ဆိုင်ကျော်ဖြတ်ခဲ့တဲ့ ကြေညာသူတစ်ယောက်နဲ့ သိလာတယ်။ ယေဟောဝါကို ချစ်တဲ့ မေတ္တာ တိုးများလာတဲ့အခါ ဘုရားပညတ်တွေကို နာခံဖို့ လှုံ့ဆော်ခံရကြောင်း အဲဒီကြေညာသူက ပြောပြတယ်။ (၂ ကော. ၇:၁။ ဖိ. ၄:၁၃) ကြေညာသူက ကိုယ်တွေ့ဖြစ်ရပ်ကို ပြောပြပြီးနောက် “ခင်ဗျားလည်း ဆေးလိပ် ဖြတ်နိုင်ပါတယ်” လို့ ပြောတဲ့အခါ သင်သား အားရှိသွားတယ်။ ကျမ်းစာလေ့လာနေတဲ့ မိန်းကလေးက ပျော်ရွှင်နေတဲ့ သက်သေခံ ညီအစ်မငယ်ကို သတိထားမိတယ်။ အဲဒီညီအစ်မ အမြဲ ပျော်ရွှင်နေတာကို ကြည့်ပြီး ဘာကြောင့်လဲဆိုတာ သိချင်လာတယ်။
၁၂။ ကျမ်းစာသင်သားတွေကို အသင်းတော်မှာ ရှိတဲ့ ကြေညာသူအားလုံး ကူညီနိုင်တယ်လို့ ဘာကြောင့် ပြောနိုင်သလဲ။
၁၂ ဘုရားနဲ့ လူလူချင်းကို ချစ်ပါဆိုတဲ့ ခရစ်တော်ရဲ့ မိန့်မှာချက်ကို လိုက်နာတယ်ဆိုတာ ဘာကို ဆိုလိုကြောင်း သစ္စာရှိ ကြေညာသူတွေရဲ့ ပုံသက်သေကောင်းကနေ သင်သား သိလာနိုင်တယ်။ (ယော. ၁၃:၃၅။ ၁ တိ. ၄:၁၂) အဲဒီအပြင် ရှေ့အပိုဒ်မှာ ပြောခဲ့သလို သင်သားဟာ သူနဲ့ ဘဝတူ ကြေညာသူတွေဆီကနေလည်း သင်ယူနိုင်တယ်။ ခရစ်တော်ရဲ့ တပည့်ဖြစ်လာဖို့ လိုအပ်တဲ့ ပြုပြင်ပြောင်းလဲမှု တွေ လုပ်နိုင်မှန်း သူတို့ရဲ့ ပုံသက်သေကနေ သိလာနိုင်တယ်။ (တရား. ၃၀:၁၁) ဘုရားရေးရာဘက် ကျမ်းစာသင်သားတွေ တိုးတက်လာဖို့ အသင်းတော်မှာ ရှိတဲ့ ကြေညာသူအားလုံး နည်းအမျိုးမျိုးနဲ့ ကူညီပေးနိုင်တယ်။ (မ. ၅:၁၆) အစည်းအဝေး လာတဲ့ ကျမ်းစာသင်သားတွေကို သင်ကော ဘယ်လို ကိုယ်တိုင်ကိုယ်ကျ အားပေးနေသလဲ။
ဟောပြောခြင်းမှာ ပြန်ပါဝင်လာအောင် မလှုပ်မရှား ဖြစ်နေသူတွေကို ကူညီပါ
၁၃-၁၄။ စိတ်ဓာတ်ကျနေတဲ့ တမန်တော်တွေကို ယေရှု ဘယ်လို ဆက်ဆံသလဲ။
၁၃ တပည့်ဖြစ်စေပါဆိုတဲ့ ခရစ်တော်ရဲ့ မိန့်မှာချက်ကို ပြန်လိုက်နာဖို့ မလှုပ်မရှား ဖြစ်နေတဲ့ ညီအစ်ကို/မတွေကို ကျွန်တော်တို့ ကူညီပေးချင်တယ်။ စိတ်ဓာတ်ကျနေတဲ့ တမန်တော်တွေကို ယေရှု ဆက်ဆံပုံကနေ သင်ယူနိုင်တယ်။
၁၄ ယေရှု မသေဆုံးခင်လေးမှာ တမန်တော်တွေ “ယေရှုကို ထားခဲ့ပြီး ထွက်ပြေးကုန်တယ်။” (မာ. ၁၄:၅၀။ ယော. ၁၆:၃၂) ခဏ အားနည်းသွားတဲ့ တမန်တော်တွေကို ယေရှု ဘယ်လို ဆက်ဆံသလဲ။ ထမြောက်ပြီး မကြာခင်လေးမှာပဲ “မကြောက်ပါနဲ့။ [ကျွန်တော် ထမြောက်ပြီဆိုတဲ့အကြောင်း] ကျွန်တော့် ညီအစ်ကိုတွေကို ပြောလိုက်ပါ” လို့ နောက်လိုက်တချို့ကို ပြောတယ်။ (မ. ၂၈:၁၀) တမန်တော်တွေကို ယေရှု လက်မလျှော့ဘူး။ သူတို့ ပစ်သွားပေမဲ့ “ကျွန်တော့် ညီအစ်ကိုတွေ” လို့ ခေါ်နေတုန်းပဲ။ ယေဟောဝါလိုပဲ ယေရှုဟာ သနားစာနာပြီး ခွင့်လွှတ်တတ်တယ်။—၂ ဘု. ၁၃:၂၃။
၁၅။ အမှုဆောင်လုပ်ငန်းမှာ မပါဝင်တော့သူတွေနဲ့ပတ်သက်ပြီး ကျွန်တော်တို့ ဘယ်လို ခံစားရသလဲ။
၁၅ ကျွန်တော်တို့လည်း အမှုဆောင်လုပ်ငန်းမှာ မပါဝင်တော့တဲ့ ညီအစ်ကို/မတွေကို သိပ်စိုးရိမ်တယ်။ သူတို့ဟာ ကျွန်တော်တို့ရဲ့ ညီအစ်ကို/မတွေ ဖြစ်နေဆဲပဲ။ သူတို့ကို ကျွန်တော်တို့ ချစ်တယ်။ အရင်က ဘုရားအမှုတော်မှာ သူတို့ လုပ်ဆောင်ခဲ့တာတွေကို အမှတ်ရနေဆဲပဲ။ တချို့ဆိုရင် နှစ်ပေါင်းများစွာတောင် အမှုဆောင်ခဲ့ကြတာ။ (ဟီ. ၆:၁၀) သူတို့ကို ကျွန်တော်တို့ သတိရနေတယ်။ (လု. ၁၅:၄-၇) ယေရှုကို တုပတဲ့အနေနဲ့ ကျွန်တော်တို့ရဲ့ စိုးရိမ်မှုကို ဘယ်နည်းတွေနဲ့ ဖော်ပြနိုင်သလဲ။
၁၆။ မလှုပ်မရှား ဖြစ်နေတဲ့ ညီအစ်ကို/မတွေကို စိုးရိမ်ကြောင်း ဘယ်လို ဖော်ပြနိုင်သလဲ။
၁၆ အစည်းအဝေး တက်ဖို့ လှိုက်လှိုက်လှဲလှဲ ဖိတ်ခေါ်ပါ။ စိတ်ဓာတ်ကျနေတဲ့ တမန်တော်တွေကို ယေရှု အားပေးခဲ့တဲ့ တစ်နည်းကတော့ အစည်းအဝေး တက်ဖို့ ဖိတ်ခေါ်ခြင်းပဲ။ (မ. ၂၈:၁၀။ ၁ ကော. ၁၅:၆) ဒီနေ့လည်း မလှုပ်မရှား ဖြစ်နေသူတွေကို အစည်းအဝေး တက်ဖို့ ကျွန်တော်တို့ အားပေးနိုင်တယ်။ အကြိမ်ကြိမ် ဖိတ်ခေါ်ဖို့တောင် လိုအပ်နိုင်တယ်။ ဖိတ်ခေါ်ချက်ကို တပည့်တွေ လက်ခံတဲ့အခါ ယေရှု သိပ်ဝမ်းသာခဲ့သလို ကျွန်တော်တို့လည်း ဝမ်းသာရပါလိမ့်မယ်။—မဿဲ ၂၈:၁၆ နဲ့ လုကာ ၁၅:၆ ကို နှိုင်းယှဉ်ပါ။
၁၇။ မလှုပ်မရှား ဖြစ်နေသူတစ်ယောက် အစည်းအဝေး လာတက်တဲ့အခါ ကျွန်တော်တို့ ဘာလုပ်သင့်သလဲ။
၁၇ လှိုက်လှိုက်လှဲလှဲ ကြိုဆိုပါ။ တပည့်တွေနဲ့ တွေ့တဲ့အခါ ယေရှု လှိုက်လှိုက်လှဲလှဲ ကြိုဆိုတယ်။ အစပြု စကားပြောတယ်။ (မ. ၂၈:၁၈) မလှုပ်မရှား ဖြစ်နေသူတစ်ယောက် အစည်းအဝေး လာတက်တဲ့အခါ ကျွန်တော်တို့ ဘာလုပ်သင့်သလဲ။ ကိုယ့်ဘက်က စပြီး လှိုက်လှိုက်လှဲလှဲ ကြိုဆိုပါ။ အစပိုင်းမှာ ဘာပြောရမှန်း မသိလို့ စိုးရိမ်မိနိုင်တယ်။ ဒါပေမဲ့ သူ့ကို မြင်ရလို့ ဘယ်လောက် ဝမ်းသာကြောင်း သူ အနေရမခက်စေမယ့်နည်းနဲ့ ရိုးရိုးလေး ပြောနိုင်တယ်။
၁၈။ မလှုပ်မရှား ဖြစ်နေတဲ့ ကြေညာသူတွေကို ဘယ်လို အားပေးနိုင်သလဲ။
၁၈ စိတ်ရင်းမှန်နဲ့ အားပေးပါ။ တစ်ကမ္ဘာလုံးမှာ ဟောပြောရမယ်ဆိုတဲ့ မိန့်မှာချက်ကြောင့် ယေရှုရဲ့ တပည့်တွေ စိုးရိမ်မိနိုင်တယ်။ ဒါပေမဲ့ “ခင်ဗျားတို့နဲ့အတူ ကျွန်တော် အမြဲ ရှိနေမယ်” လို့ ယေရှု အားပေးတယ်။ မ. ၂၈:၂၀) အဲဒီလို အားပေးတာ ထိရောက်ရဲ့လား။ ထိရောက်ပါတယ်။ မကြာခင်မှာပဲ တပည့်တွေဟာ ‘သတင်းကောင်း သွန်သင်ဟောပြောခြင်း’ မှာ အလုပ်များလာတယ်။ (တ. ၅:၄၂) မလှုပ်မရှား ဖြစ်နေတဲ့ ကြေညာသူတွေလည်း အားပေးမှု လိုတယ်။ ဟောပြောခြင်းလုပ်ငန်းမှာ ပြန်ပါဝင်ရတော့မယ်ဆိုတဲ့ စိတ်ကြောင့် စိုးရိမ်မိနိုင်တယ်။ ဒါပေမဲ့ သူတို့ တစ်ယောက်တည်း မဟုတ်ကြောင်း စိတ်ချစေပါ။ သူတို့ အသင့်ဖြစ်လာတဲ့အခါ အမှုဆောင်မှာ အတူလိုက်ပေးပါ။ ကျွန်တော်တို့ရဲ့ ထောက်မမှုအတွက် ကျေးဇူးတင်ကြမှာ သေချာပါတယ်။ မလှုပ်မရှား ဖြစ်နေသူတွေကို ညီအစ်ကို/မတွေအဖြစ် သဘောထားပြီး ဆက်ဆံမယ်ဆိုရင် အသင်းတော်တစ်ခုလုံး အကျိုးခံစားရပါလိမ့်မယ်။
(အပ်နှင်းခံထားရတဲ့ အလုပ်ကို ပြီးစီးအောင် လုပ်ပါ
၁၉။ ကျွန်တော်တို့ ဘာစိတ်ပိုင်းဖြတ်ထားသလဲ။ ဘာကြောင့်လဲ။
၁၉ တပည့်ဖြစ်စေခြင်း လုပ်ငန်းကို ဘယ်အချိန်ထိ ဆက်လုပ်ရဦးမလဲ။ ဒီလောကစနစ် အဆုံးတိုင်ချိန်အထိပါပဲ။ (မ. ၂၈:၂၀။ “လောကစနစ် နိဂုံးပိုင်း” ခက်ဆစ်ကို ကြည့်ပါ။) အဲဒီအချိန်အထိ ယေရှုရဲ့ မိန့်မှာချက်ကို ကျွန်တော်တို့ လိုက်နာနိုင်ကြမလား။ “ထာဝရအသက် ရဖို့ စိတ်ရင်းမှန်နဲ့ ကြိုးစားတဲ့သူတွေ” ကို လိုက်ရှာရာမှာ အချိန်၊ ခွန်အားနဲ့ ငွေကြေးတွေကို လိုလိုလားလား ပေးဆက်ခြင်းအားဖြင့် လိုက်နာဖို့ စိတ်ပိုင်းဖြတ်ထားပါတယ်။ (တ. ၁၃:၄၈) ဒါက ယေရှုရဲ့ ပုံသက်သေကို လိုက်နာနေတာပဲ။ “ကျွန်တော့်ကို စေလွှတ်တဲ့အရှင်ရဲ့ အလိုတော်ကို ဆောင်တာ၊ သူခိုင်းထားတဲ့ အလုပ်ကို ပြီးစီးအောင် လုပ်တာဟာ ကျွန်တော့်အတွက် စားစရာပဲ” လို့ ယေရှု ပြောတယ်။ (ယော. ၄:၃၄။ ၁၇:၄) ကျွန်တော်တို့လည်း အပ်နှင်းခံထားရတဲ့ အလုပ်ကို ပြီးစီးအောင် လုပ်ချင်ကြတယ်။ (ယော. ၂၀:၂၁) မလှုပ်မရှား ဖြစ်နေသူတွေ အပါအဝင် တခြားသူတွေကို ဒီလုပ်ငန်းမှာ ကျွန်တော်တို့နဲ့အတူ ပါဝင်စေချင်တယ်။—မ. ၂၄:၁၃။
၂၀။ ဖိလိပ္ပိ ၄:၁၃ အရ ယေရှု မိန့်မှာခဲ့တဲ့ လုပ်ငန်းကို ဘာကြောင့် ပြီးမြောက်အောင်မြင်နိုင်သလဲ။
၂၀ ယေရှုရဲ့ မိန့်မှာချက်ကို လိုက်နာဖို့ မလွယ်ပါဘူး။ ဒါပေမဲ့ ဒီတာဝန်ကို ကျွန်တော်တို့ တစ်ယောက်တည်း လုပ်ဆောင်နေရတာ မဟုတ်ဘူး။ ကျွန်တော်တို့နဲ့ အတူရှိမယ်လို့ ယေရှု ကတိပေးထားတယ်။ ဒါ့အပြင် “ဘုရားသခင်ရဲ့ လုပ်ဖော်ဆောင်ဖက်တွေ” အဖြစ် လုပ်ဆောင်ကြရမှာ။ (၁ ကော. ၃:၉) ဒါကြောင့် ပြီးမြောက်အောင်မြင်နိုင်ပါတယ်။ ဒီတာဝန်ကို ထမ်းဆောင်ရတာ၊ အဲဒီလို ထမ်းဆောင်နိုင်အောင် တခြားသူတွေကိုလည်း ကူညီရတာဟာ တကယ့်ကို ပျော်ရွှင်စရာ အခွင့်ထူးပါပဲ။—ဖိလိပ္ပိ ၄:၁၃ ကိုဖတ်ပါ။
သီချင်း ၇၉ ကြံ့ကြံ့ခံ ရပ်တည်နိုင်အောင် သင်ပေးပါ
^ အပိုဒ်၊ 5 လူတွေကို တပည့်ဖြစ်လာအောင်၊ မိမိ မိန့်မှာထားသမျှ လိုက်နာအောင် သွန်သင်ဖို့ နောက်လိုက်တွေကို ယေရှု ညွှန်ကြားတယ်။ ယေရှုရဲ့ ညွှန်ကြားချက်ကို ဘယ်လို လိုက်နာနိုင်ကြောင်း ဒီဆောင်းပါးမှာ ဆွေးနွေးပါမယ်။ ၂၀၀၄၊ ဇူလိုင် ၁ ကင်းမျှော်စင် စာမျက်နှာ ၁၄-၁၉ မှာ ပါတဲ့ ဆောင်းပါးကို အခြေခံထားပါတယ်။
^ အပိုဒ်၊ 66 ပုံအညွှန်း– ဘုရားကို ချစ်တဲ့ မေတ္တာ တိုးများလာအောင် ဘာတွေ လုပ်ရမယ်ဆိုတာ ကျမ်းစာသင်ပေးတဲ့ ညီအစ်မက သင်သားကို ရှင်းပြနေ။ နောက်ပိုင်း၊ ကျမ်းစာသင်ပေးသူဆီက အကြံပြုချက် သုံးခုကို သင်သား လိုက်နာနေ။