TAMACHTILIS 45
Keniuj tikinpaleuiskej oksekin maj kitakamatikan tein Cristo tanauatij
“Xiyakan uan xikinmachtikan taltikpakneminij [...] maj mochiuakan nomomachtijkauan [...]. Xikinmachtikan maj kitakamatikan nochi tein namechnauatij” (MAT. 28:19, 20, TNM).
NEKUIKATIL 89 Jiova kitiochiua akin kikaki uan kitakamati
TEIN MOITAS *
1. ¿Toni tanauatij Jesús itech Mateo 28:18-20?
SATEPAN ke Jesús oksepa nemik, monextij ininixpan imomachtijkauan akin mosentilijkaj ompa Galilea. Kinekia kiniluis se taman tein semi moneki. ¿Toni katka? Tein kiniluij moajsi itech Mateo 28:18-20 itech Traducción del Nuevo Mundo (xikonixtajtolti).
2. ¿Toni netajtanilmej tikitaskej itech nejin tamachtilis?
2 Tiitekitikauan Dios itech nejin tonalmej no moneki tiktakamatiskej Jesús uan tikinpaleuiskej oksekin maj mochiuakan itatojtokakauan. Yejua ika, maj tikitakan eyi netajtanilmej tein mouikaj ika tekit tein Jesús technauatij maj tikchiuakan. Yekinika, ¿toni no moneki tikchiuaskej keman tikmachtiaj se taltikpaknenkej katiyejua itanauatiluan Dios? Ojpatika, ¿keniuj nochin tokniuan itech nechikol uelis tapaleuiskej maj akin momachtijtokej Biblia mochiuakan itatojtokakauan Cristo? Uan expatika, ¿keniuj uelis tikinpaleuiskej tokniuan akin amo tanojnotsajok nion monechikouajok maj oksepa tanojnotsakan?
MAJ TIKINMACHTIKAN MAJ KITAKAMATIKAN TEIN CRISTO TANAUATIJ
3. ¿Toni tein semi moneki kijtoj Jesús itech tanauatil tein kitemakak?
3 Jesús senkis kijtoj ke moneki tikinmachtiskej taltikpakneminij nochi tein tanauatij. Sayoj ke maj amo tikelkauakan se taman tein semi moneki. Jesús amo kijtoj: “Xikinmachtikan nochi tein namechnauatij”, ta kijtoj: “Xikinmachtikan maj kitakamatikan nochi tein namechnauatij”. Keman tikmachtiaj se taltikpaknenkej uan tiknekij tiktakamatiskej nejin tein Jesús tanauatij, amo sayoj moneki tikmachtiskej toni moneki kichiuas, ta no keniuj kichiuas. ¿Keyej?
4. Xikonijto ika se neskayot keniuj uelis tikmachtiskej se taltikpaknenkej maj kitakamati tein Cristo tanauatij.
4 ¿Keniuj uelis tikmachtiskej se taltikpaknenkej maj kitakamati tein Cristo tanauatij? Maj tikitakan se neskayot. Keman se taltikpaknenkej kinextilia okse keniuj kinejnemiltis se carro, ¿keniuj kimachtia maj kitakamati tanauatilmej tein kiixtalijkej tekiuanij? Yekinika kimachtia katiyejua nejon tanauatilmej. Sayoj ke kemej kineki kinextilis keniuj kitakamatis, kichiua okse taman. Iuan youi itech carro uan kipaleuia maj kichiua tein kimachtij. ¿Toni techmachtia nejin?
5. 1) Kemej kinextia Juan 14:15 uan 1 Juan 2:3, ¿toni moneki tiknextiliskej maj kichiua akin tikmachtiaj? 2) Xikonijto keniuj uelis tikchiuaskej.
5 Keman tikmachtiaj se taltikpaknenkej, tiknextiliaj toni kineki Dios maj tikchiuakan. Sayoj ke no moneki tikchiuaskej okse taman. Moneki tikmachtiskej maj kichiua tein momachtia (xikonixtajtolti Juan 14:15; 1 Juan 2:3). Ika tein tikchiuaj uelis tiknextiliskej keniuj kichiuas tein Biblia tamachtia kampa tekiti, itech kaltamachtiloyan oso keman moixpetanis. No uelis tiktapouiskej teisa tein tikpanokej uan keniuj tein tayolmajxitia Biblia techpaleuij maj amo techpanouani tein amo kuali oso maj kuali tikixtalianij tein tikchiuaskej. Uan keman tikchiuaskej netataujtil iuan, uelis tiktajtaniskej Jiova maj kiixyekana ika iyektikatsin espíritu (Juan 16:13).
6. ¿Keniuj no uelis tikmachtiskej se taltikpaknenkej maj kitakamati tein Jesús tanauatij?
6 ¿Keniuj no uelis tikmachtiskej se taltikpaknenkej maj kitakamati tein Jesús tanauatij? Moneki tikpaleuiskej maj kineki kinpaleuis oksekin maj mochiuakan itatojtokakauan Cristo. Sekin akin momachtijtokej Biblia mouij keman kinemiliaj ke moneki se tanojnotsas. Yejua ika, moneki yolik tikinpaleuijtiaskej maj okachi kuali kiajsikamatikan tein Biblia tamachtia, porin nejon kinpaleuis maj mochikaua inintakuaujtamatilis uan maj kinekikan tanojnotsaskej. ¿Keniuj uelis tikinpaleuiskej maj kinekikan kiteixmatiltiskej tein Biblia tamachtia?
7. ¿Keniuj uelis tikpaleuiskej akin tikmachtiaj maj kineki kiteixmatiltis tein Biblia tamachtia?
7 Akin tikmachtiaj xa uelis tikchiuiliskej seki netajtanilmej kemej nejin: “¿Keniuj mitsonpaleuiani tein Biblia tamachtia? ¿Tikonnemilia ke oksekin no moneki kimatiskej tein tamachtia? ¿Keniuj uelis tikonpaleuis?” (Prov. 3:27; Mat. 9:37, 38). Maj tiknextilikan tratados tein moajsij itech nepaleuilmej tein ika titamachtiaj uan maj tikiluikan maj kiixpejpena tein kinemilia ke kiuelitaskej ichankauan, akin kuali iniuan mouika oso akin iniuan tekiti. Maj tikmakakan seki uan maj iuan timomamachtikan keniuj kinnojnotsas keman kinmakas. Uan keman mochiuasya tanojnotskej, maj tiksentokakan tikpaleuikan (Ecl. 4:9, 10; Luc. 6:40).
NOCHIN ITECH NECHIKOL TAPALEUIAJ
8. ¿Keyej moneki maj akin tikmachtiaj kitasojta Dios uan maj kintasojta oksekin? (No xikonita recuadro “ Keniuj tikpaleuiskej akin tikmachtiaj maj okachi kitasojta Dios”).
8 Maj tikelnamikikan ke Jesús techiluij maj tikinmachtikan oksekin maj kitakamatikan nochi tein tanauatij. Itech tein tanauatij moajsij ome tanauatilmej tein okachi tayekantokej: maj se kitasojta Dios uan maj se kintasojta oksekin (Mat. 22:37-39). Komo tiknextiliaj akin tikmachtiaj maj kitakamati nejin ome tanauatilmej, tikpaleuijtoskej maj tanojnotsa. ¿Keyej? Porin komo kitasojta Dios uan no kintasojta oksekin, kinekis kiteixmatiltis tein Biblia tamachtia. Taixejekol maj sekin akin momachtijtokej Biblia mouikan keman itech tanemiliaj tanojnotsalis, sayoj ke uelis tikiniluiskej ke Jiova kinpaleuijtias maj amo mouikanok tanojnotsaskej (Sal. 18:1-3; Prov. 29:25). Itech nejin tamachtilis moajsi se recuadro kampa kijtoua keniuj uelis tikpaleuiskej akin tikmachtiaj maj okachi kitasojta Dios. Uan no, nochin tokniuan itech nechikol uelis kinpaleuiskej akin momachtijtokej maj okachi kitasojtakan Dios uan oksekin. Maj tikitakan keniuj.
9. ¿Keniuj se taltikpaknenkej momachtia kinejnemiltis se carro?
9 Maj oksepa ika titajtokan akin momachtijtok keniuj kinejnemiltis se carro. Keman youi itech icarro uan inakastan youi akin kimachtia, amo sayoj kipaleuia tein kiluijtiuj, ta no tein kiita ke kichiuaj oksekin. Kemej neskayot, akin kimachtia xa kiluia maj kiita se taltikpaknenkej akin kikaua maj kipanaui okse, oso se akin amo semi tauiaok keman kiita ke taixpan uitsej okseki carros. Nochi nejin semi kipaleuis.
10. ¿Toni kipaleuis akin tikmachtiaj ika Biblia maj kineki mochiuas itekitikauj Jiova?
10 No ijkon, akin momachtijtok Biblia uan peua kitekitilia Jiova, amo sayoj kipaleuia tein kiluia akin kimachtia, ta no tein kiita ke kichiuaj okseki itekitikauan Jiova. Yejua ika moneki yas nechikolmej, porin nejon kipaleuis maj kineki mochiuas itekitikauj Jiova. Tein kikakis ompa kipaleuis maj okachi kiixmati Biblia, maj okachi takuaujtamati uan maj okachi kitasojta Dios (Hech. 15:30-32). Uan amo sayoj nejon, akin kimachtia uelis kipaleuis maj kinixmati tokniuan takamej uan siuamej akin xa kipanouanij tein yejua kipanotok. ¿Keniuj uelis kipaleuis ininneskayo nejin tokniuan? Maj tikitakan seki taman.
11. ¿Toni uelis kiitaskej itech nechikol akin momachtijtokej Biblia, uan keniuj uelis kinpaleuis nejon?
11 Se siuat akin momachtijtok Biblia uan iselti kiniskaltijtok ikoneuan kiita se tokniuj siuat akin no iselti kiniskaltijtok ikoneuan. Kiyololinia kiitas ke tokniuj siuat mochikaua yetos itech nechikolmej iniuan ikoneuan. Se takat akin kineki kikauas tachichinalis kiixmati se tokniuj takat akin achto no tachichinaya. Tokniuj kitapouia ke netasojtalis tein kipialia Jiova kipaleuij maj kitakamati tein Biblia tamachtia uan maj amo tachichinaok (2 Cor. 4:7; 7:1). Satepan ke kitapouij toni kipaleuij, kiluia ke yejua no uelis kikauas tachichinalis. Nejon semi kiyolchikaua takat. Uan se ichpoch kiita ke se tokniuj ichpoch semi kiyolpaktia yeski itaixpantijkauj Jiova. Nejon kichiua maj kineki kimatis keyej nochipa yolpaki.
12. ¿Keyej tikijtouaj ke tinochin uelis titapaleuiskej maj akin momachtijtokej Biblia mochiuakan itatojtokakauan Cristo?
12 Keman akin momachtijtok Biblia kinixmati miakej tokniuan akin mochikauaj kiyolpaktiskej Jiova, ueli kiita tein kijtosneki se kitasojtas Dios uan se kintasojtas oksekin kemej Cristo tanauatij (Juan 13:35; 1 Tim. 4:12). Uan kemej tikijtojkej achto, ininneskayo seki tokniuan semi kipaleuis, porin kiitas ke uelis kipatas tein monekis uan mochiuas itatojtokakauj Cristo (Deut. 30:11). Kemej tikitaj, nochin itech nechikol uelis tapaleuiskej maj akin momachtijtokej Biblia mochiuakan itatojtokakauan Cristo (Mat. 5:16). Yejua ika maj timotajtanikan: “¿Keniuj nikinyolchikaua akin momachtijtokej Biblia uan uitsej nechikolmej?”.
MAJ TIKINPALEUIKAN AKIN AMO TANOJNOTSAJOK NION MONECHIKOUAJOK
13, 14. ¿Toni kichiuak Jesús keman itatitaniluan kikaujkaj?
13 Tiknekij tikinpaleuiskej tokniuan akin amo tanojnotsajok nion monechikouajok maj oksepa tanojnotsakan uan maj kinpaleuikan oksekin maj mochiuakan itatojtokakauan Cristo. Tikmatiskej keniuj uelis tikinpaleuiskej komo tikelnamikij toni kichiuak Jesús keman itatitaniluan kikaujkaj.
14 Achto ke kimiktiskiaj Jesús, itatitaniluan kikaujkej uan cholojkej (Mar. 14:50; Juan 16:32). ¿Toni kichiuak Jesús? Tepitsin satepan ke Jiova oksepa kimakak inemilis, kintitanik seki siuamej maj kinnauatitij itatitaniluan ke oksepa nemia. Kiniluij: “Amo ximomoutikan. Ta, xiyakan xikinnejmachtitij nokniuan” (Mat. 28:10a). Maski kikaujkaj, Jesús amo kinixtopeuak, ta kisentokaya kiniluiaya “nokniuan”. Jesús kichiuak kemej Jiova keman kiniknelij uan kintapojpoluij itatitaniluan (2 Rey. 13:23).
15. ¿Keniuj tikinitaj akin amo tanojnotsajok?
15 Tejuan no ininka timotekipachouaj akin amo tanojnotsajok. Tiksentokaj tikinitaj kemej tokniuan uan tikintasojtaj. Amo tikelkauaj ke semi kitekitilijkej Jiova, sekin semi miak xiujmej (Heb. 6:10). Tikuelitaskiaj maj touan yetokan (Luc. 15:4-7). ¿Keniuj uelis tikchiuaskej kemej Jesús uan tiknextiskej ke ininka timotekipachouaj?
16. ¿Keniuj uelis tikinnextiliskej tokniuan akin amo tanojnotsajok nion monechikouajok ke ininka timotekipachouaj?
16 Maj tikinyoleuakan ika netasojtalis maj yakan nechikolmej. Keman itatitaniluan mouejkatilijkej, Jesús kinyoleuak se nechikol. Nejin se taman kemej kinyolchikauak (Mat. 28:10b; 1 Cor. 15:6). Tejuan no uelis tikinyoleuaskej tokniuan akin amo tanojnotsajok nion monechikouajok maj yakan nechikolmej. Sayoj ke xa monekis miakpa tikinyoleuaskej achto ke kinekiskej yaskej. Jesús xa semi yolpakik keman itatitaniluan kiselijkej itayoleualis, uan tejuan no uelis semi tiyolpakiskej (Mat. 28:16; no xikonita Lucas 15:6).
17. ¿Toni moneki tikchiuaskej komo ajsi itech nechikol se tokniuj akin amo yayaok nechikolmej?
17 Maj kuali tikinselikan. Keman Jesús moajsiaya iniuan itatitaniluan, motokij uan iniuan tajtoj porin kinekia maj kuali momachilianij (Mat. 28:18). Uan tejuan, ¿toni tikchiuaskej komo tikitaj ke ajsi itech nechikol se tokniuj akin amo yayaok nechikolmej? Moneki timotokiskej uan tiktajpaloskej. Yekinika uelis ouij techkisas porin xa tiknemiliskej ke amo tikmatiskej toni tikiluiskej. Sayoj ke, uelis sayoj tikiluiskej ke tiyolpakij tikitaskej kemej amo tikchiuaskej maj mopinaujmati.
18. ¿Keniuj uelis tikinyolchikauaskej tokniuan akin amo tanojnotsajok nion monechikouajok?
18 Maj tikinyolchikauakan. Imomachtijkauan Jesús xa kinemiliayaj ke amo ueliskiaj tanojnotsaskej itech nochi taltikpak. Jesús kinyolseuij keman kiniluij: “Niyetos namouan nochi tonalmej” (Mat. 28:20, TNM). Uan moitak ke semi kinpaleuij tein kiniluij porin tepitsin satepan tamachtijtoyaj uan kiteixmatiltijtoyaj iTajtol Dios (Hech. 5:42). Tokniuan akin amo tanojnotsajok nion monechikouajok no moneki maj tikinyolchikauakan. Xa mouij keman kinemiliaj oksepa tanojnotsaskej. Uelis tikinyolseuiskej komo tikiniluiaj ke amo tanojnotsaskej ininselti, uan uelis iniuan tiaskej keman peuaskej tanojnotsaskej. Tikmatij ke semi kitasojkamatiskej maj tikinpaleuikan. Komo tiknextiaj ke tiksentokaj tikinitaj kemej tokniuan, uelis mokepaskej uan nejon kichiuas maj nochin itech nechikol tiyolpakikan.
MAJ TIKTAMICHIUAKAN TEKIT TEIN JESÚS TECHNAUATIJ
19. ¿Toni tiknekij tikchiuaskej, uan keyej?
19 ¿Hasta kemanian moneki tiksentokaskej titanojnotsaskej uan tikinpaleuiskej oksekin maj mochiuakan itatojtokakauan Cristo? Hasta itamian tein mochiujtok itech taltikpak (Mat. 28:20, TNM; xikonita glosario, “conclusión del sistema”). ¿Uelis tikchiuaskej nejon? ¡Tikixtalijtokej ijkon tikchiuaskej! Ika pakilis tikuij totiempo, tochikaualis uan tein tikpiaj uan tikintemouaj ‘akin kiyolnejnekij kiseliskej tein melauak tein kichiua maj se nemi nochipaya’ (Hech. 13:48, TNM). Ijkon tikchiuaj kemej Jesús, akin kijtoj: “Notakualis yejua nijin, ma nikchiua in tekit ijkon keme kimonekiltia Notajtsin Dios ten nechualtitanik. Uan ma niktamichiua” (Juan 4:34; 17:4). Tejuan no tiknekij tiktamichiuaskej tekit tein tikpiaj (Juan 20:21). Uan tiknekij maj nochin tokniuan, hasta akin amo tanojnotsajok nion monechikouajok, kisentokakan tekitikan touan hasta itamian tein mochiujtok itech taltikpak (Mat. 24:13).
20. Kemej kijtoua 2 Corintios 4:7, ¿keyej uelis tikchiuaskej tekit tein Jesús technauatij maj tikchiuakan?
20 Maski tekit tein Jesús technauatij maj tikchiuakan ouij, amo toselti tikchiuaj, porin Jesús kijtoj ke techpaleuiskia. Keman tikinpaleuiaj oksekin maj mochiuakan itatojtokakauan Cristo “iuan titekitij Dios” uan “tipoutinemij iuan Cristo”, tein kijtosneki ke Jiova uan Jesús techpaleuiaj maj tikchiuakan (1 Cor. 3:9, TNM; 2 Cor. 2:17). Yejua ika uelis timatamiskej. Se ueyi tatiochiualis uan semi techyolpaktia tikchiuaskej nejin tekit uan tikinpaleuiskej oksekin maj no kichiuakan (xikonixtajtolti 2 Corintios 4:7).
NEKUIKATIL 79 Xikinpaleui maj taxikokan
^ párr. 5 Jesús kiniluij itatojtokakauan maj kinmachtikan oksekin maj kitakamatikan nochi tein tanauatij. Itech nejin tamachtilis tikitaskej keniuj uelis tikchiuaskej tein kijtoj Jesús.
^ párr. 66 TEIN NESI ITECH TAIXKOPIMEJ: Se tokniuj siuat kiluia siuat akin kimachtia toni moneki kichiuas tein kipaleuis maj okachi kitasojta Dios. Ompa, siuat kichiua eyi taman tein tokniuj kiyolmajxitij.
