1. ¿Tlen okinnauati Jesús imachtijkauan ijkon ken kijtoua Mateo 28:18-20, TNM?

IJKUAK Jehová okiyoliti Jesús, Jesús okinmonextili imachtijkauan tlen okatkaj ompa Galilea. Omonekiaya itlaj kinmiluis. Uelis tikitaskej non itech Mateo 28:18-20, TNM (xiktlajtolti).

2. ¿Tlen tiknankiliskej itech nin tlamachtil?

² Axkan tinochtin akinmej tiktekichiuiliaj Jehová moneki tikinmititiskej akinmej tikinmachtiaj ma kichiuakan ijkon ken Jesús okijto. Ik non, tiknankiliskej eyi tlajtlanilmej tlen techpaleuis ma tikmatikan ken tikchiuaskej tlen Jesús otlanauati. Maski tikinmachtiskej tlen kijtoua toTajtsin Dios ma tikchiuakan, ¿tlen okseki moneki tikinmachtiskej? ¿Ken uelis tinochtin tikinpaleuiskej akinmej momachtiaj ma kitechiuilikan Jehová? ¿Ken uelis tikinpaleuiskej tokniuan tlen ayakmo tetlapouiaj para oksepa ma tetlapouikan?

3. ¿Tlen noijki okijto Jesús ma tikchiuakan?

³ Jesús okijto ma tikinmachtikan oksekimej tlen ye otlanauati. Pero amo san okijto: “Xikinmachtikan nochi tlen onamechnauati”. Ye okijto: “Xikinmachtikan  ma kichiuakan nochi tlen onamechnauati”. Tla tiknekij ijkon tikchiuaskej, akinmej tikinmachtiaj moneki tikinmititiskej tlen kichiuaskej uan noijki ken kichiuaskej (Hech. 8:31). ¿Tleka moneki ijkon tikinmititiskej?

4. Xikijto se neskayotl ken uelis ikaj tikmachtiskej ma kichiua tlen Jesús otlanauati.

⁴ ¿Ken uelis oksekimej tikinmachtiskej ma kichiuakan tlen Jesús okijto? Ma tikitakan tlen kichiua akin kimachtia ikaj ma kiuika se carro. Achto kititia ken moneki kiuikas itech ojtli ijkon ken kijtouaj tekiuajkej. Pero tla akin temachtia kineki ma kichiua tlen tekiuajkej kijtouaj, moneki kiuikas itech ojtli uan kitas tla kiuika carro ijkon ken yokimachti. ¿Tlen techmachtia non?

5. (1) Ijkon ken kijtoua Juan 14:15 uan 1 Juan 2:3, ¿tlen moneki tikititiskej akin tikmachtiaj? (2) Xikijto ken uelis tikmachtiskej.

⁵ Ijkuak ikaj tikmachtiaj tikititiaj tlen kineki toTajtsin Dios ma kichiua. Pero noijki moneki tikmachtiskej nochipa ma kichiua tlen momachtia (xiktlajtolti Juan 14:15; 1 Juan 2:3). Ma tikititikan ken tikchiuaj tejuan tlen kijtouaj principios bíblicos itech escuela, kanin titekipanouaj uan ijkuak timoyolpaktiaj. Noijki uelis tikiluiskej tlen kijtoua Biblia yotechpaleui amo ma techpano tlen amo kuali uan noijki yotechpaleui ma tikchiuakan tlen moneki. Ijkuak timotlatlaujtiaj iuan akin tikmachtiaj, ma tikiluikan Jehová ma kiyekana ika iespíritu santo (Juan 16:13).

6. ¿Tlen okseki moneki tikchiuaskej para ma kichiua tlen okijto Jesús akin tikmachtiaj?

⁶ ¿Tlen okseki moneki tikchiuaskej para tikpaleuiskej akin tikmachtiaj ma kichiua tlen okijto Jesús? Moneki tikpaleuiskej ma kisa itech iyolo ma tetlapoui. Sekimej momojtiaj ijkuak mokuayejyekouaj tetlapouiskej. Ik non, moneki tikinpaleuiskej kuali ma kajsikamatikan tlen kijtoua Biblia uan ijkon kipiaskej chikauak intlaneltokilis uan tetlapouiskej. ¿Ken uelis tikinpaleuiskej para ma tetlapouikan?

7. ¿Ken tikpaleuiskej akin tikmachtiaj ma tetlapoui?

⁷ Akin tikmachtiaj uelis ijkin tiktlajtlaniskej: “¿Ken mitspaleuia tikchiuas tlen kijtoua Biblia? ¿Timokuayejyekoua oksekimej moneki kimatiskej tlen kijtoua Biblia? ¿Ken uelis tikinpaleuis?” (Prov. 3:27; Mat. 9:37, 38). Ma tikititikan amatlajkuilolmej tlen ika titlamachtiaj uan ma tiktlajtlanikan katli kipaktiskia ifamilia, akinmej iuan mouika uan akinmej inmiuan tekipanoua. Ma tikmakakan seki amatlajkuilolmej tlen kinpaktis uan ma tikititikan ken uelis kintemakas. Maski peuas tetlapouis iuan tlanechikol ok ma tikpaleuikan (Ecl. 4:9, 10; Luc. 6:40).

8. ¿Tleka moneki kitlasojtlas toTajtsin Dios uan oksekimej akin tikmachtiaj? (Xikita recuadro “ ¿Ken tikpaleuiskej akin tikmachtiaj ma kitlasojtla toTajtsin Dios?”).

⁸ Jesús okijto ma titlamachtikan nochi tlen ye okijto. Non kijtosneki akin tikmachtiaj moneki kitlasojtlas toTajtsin Dios uan oksekimej (Mat. 22:37-39). Tla akin tikmachtiaj tikititiaj ijkon ma kichiua, tikpaleuiskej ma tetlapoui. Miakej tlen momojtiaj tetlapouiskej ma  tikinmiluikan Jehová kinpaleuis para amo okachi ma timomojtikan (Sal. 18:1-3; Prov. 29:25). Nin tlamachtil kipia se recuadro tlen kiyekijtoua ken uelis tikpaleuiskej akin tikmachtiaj okachi ma kitlasojtla toTajtsin Dios. Tokniuan tlen touan monechikouaj noijki uelis kipaleuiskej okachi ma tetlasojtla.

9. ¿Ken momachtia ikaj kiuikas se carro?

⁹ Oksepa ma timotlapouikan ken kichiua akin momachtia kiuikas se carro. Ijkuak kiuika, inauak yaui akin kimachtia uan kichiua tlen kiluia. Pero noijki kichiua ken oksekimej tlen kiuikaj incarro. Akin kimachtia xamo kiluia ma kita se tlakatl kikauilia okse tlakatl achto ma pano. Xamo noijki kititia tlen kichiua ikaj para amo kixmiktis akin ompa uits. Ijkon akin momachtia kajsikamati miak tlamantli.

10. ¿Ken uelis tikpaleuiskej akin tikmachtiaj ma kichiua ken Cristo?

¹⁰ Noijki ijkon akin tikmachtiaj, ijkuak peua kitekichiuilia toTajtsin Dios kipaleuia tlen tikchiuaj uan noijki ijkuak kita ken tokniuan kitekichiuiliaj Jehová. Para uelis kitekichiuilis Jehová moneki touan monechikos. Tlen ompa kikakis kipaleuis chikauak ma kipia itlaneltokilis, okachi ma kixmati Jehová uan okachi ma kitlasojtla (Hech. 15:30-32). Ompa uelis tikpaleuis ma kinmixmati tokniuan tlen xamo noijki yokinpanok ijkon ken akin tikmachtiaj. Kitas ken mochijchikauaj tokniuan kitekichiuiliaj Jehová. Ma tikitakan ken kichiuaj sekimej.

11. ¿Tlen uelis kitaskej akinmej tikinmachtiaj ijkuak timonechikouaj uan ken uelis kinpaleuis?

¹¹ Se siuatl tlen iselti kiskaltia ikone kita se tokni tlen noijki ijkon kipanotok. Kiyolchikaua kita tokni monechikoua uan kinuika ikoneuan. Se tlakatl tlen mochijchikaua ayakmo tlachichinas kixmati se tokni tlen noijki ijkon okipanok. Tokni kiluia sapanoua kitlasojtla Jehová, ik non, kichiua tlen kijtouaj principios bíblicos uan non okipaleui ayakmo ma tlachichina (2 Cor. 7:1; Filip. 4:13, TNM). Ijkuak tokni yokitlapoui ken okichi uan kiluia ye noijki uelis ayakmo tlachichinas, akin momachtia moyolchikaua. Noijki se ichpochtli kita okse ichpochtli kitekichiuilia Jehová uan yolpaki uan kineki kimatis tleka tokni nochipa yolpaki.

12. ¿Tleka tikijtouaj tinochtin uelis tikpaleuiskej ikaj tlen momachtia?

¹² Ijkuak akin tikmachtiaj kita tokniuan amo kikauaj Jehová, kita tlen kijtosneki tlen okijto Jesús: ma tiktlasojtlakan Jehová uan oksekimej (Juan 13:35; 1 Tim. 4:12). Ken yotikijtojkej, akin tikmachtiaj uelis kipaleuis ijkuak kita tlen kinpanoua tokniuan porque xamo noijki ijkon kipanotok. Ijkon kajsikamatis uelis kipatlas inemilis uan kichiuas ken Cristo (Deut. 30:11). Nochtin tokniuan uelis kipaleuiskej ma kitekichiuili Jehová (Mat. 5:16). Ik non, ma timotlajtlanikan: “¿Ken tikinpaleuijtokej akinmej momachtiaj Biblia uan touan yimonechikouaj?”.

13, 14. ¿Tlen okichi Jesús maski imachtijkauan okikajtejkej?

¹³ Tiknekij tikinpaleuiskej tokniuan tlen ayakmo tetlapouiaj oksepa ma  tlamachtikan ijkon ken otlanauati Jesús. Ma tikitakan ken Jesús okinpaleui imachtijkauan ijkuak omoyolkokojkej uan ken tejuan uelis tikinpaleuiskej tokniuan.

¹⁴ Ijkuak yikimiktiskiaj Jesús, imachtijkauan okikajtejkej uan ocholojkej (Mar. 14:50; Juan 16:32). ¿Tlen okichi Jesús ijkuak imachtijkauan okikajtejkej? Ma tikitakan tlen okichi ijkuak Jehová okiyoliti. Okintitlanki sekimej siuamej tlen okitlakamatiayaj ma kinmiluitij itlatitlaniluan toTajtsin Dios okiyoliti. Okinmilui: “Amo ximawikah. Xikinmilitih nokniwah mawiah” (Mat. 28:10a). Maski imachtijkauan Jesús okikajtejkej, non texto kiteititia ye amo okinkokoli, ye okijto okatkaj “nokniwah”. Jesús okichi ken Jehová oteiknomatki uan otetlapojpolui (2 Rey. 13:23).

15. ¿Tleka ok tikinmilnamikij tokniuan tlen ayakmo tetlapouiaj?

¹⁵ Tejuan noijki tiknekij tikinpaleuiskej akinmej ayakmo tetlapouiaj porque tokniuan uan tikintlasojtlaj. Amo tikilkauaj yiuejkika okitekichiuilijkej Jehová uan xamo miak xiuitl ijkon okichijkej (Heb. 6:10). Ik non, tikinmilnamikij (Luc. 15:4-7). ¿Ken uelis tikinpaleuiskej ijkon ken Jesús okinpaleui imachtijkauan?

16. ¿Ken uelis tikteititiskej tikintlasojtlaj tokniuan tlen ayakmo tetlapouiaj?

¹⁶ Ma tikinyoleuakan ma monechikokan. Ijkuak imachtijkauan Jesús omoyolkokouayaj, ye okinyole ma monechikokan (Mat. 28:10b; 1 Cor. 15:6). Axkan noijki tikinyoleuaj touan ma monechikokan tokniuan tlen ayakmo tetlapouiaj. Xamo miakpa monekis tikinmiluiskej. Jesús sapanoua oyolpakik ijkuak imachtijkauan omonechikojkej uan tejuan noijki tiyolpakiskej ijkuak tokniuan oksepa monechikoskej (Mateo 28:16 noijki xikita Lucas 15:6).

17. ¿Tlen tikchiuaskej ijkuak touan monechikoti se tokni tlen ayakmo tetlapouia?

¹⁷ Kuali ma tikinselikan. Ijkuak Jesús okinmitak imachtijkauan, kuali okinseli uan san niman inmiuan omotlapouito (Mat. 28:18). ¿Tlen tikchiuaj tejuan ijkuak oksepa touan monechikoua se tokni tlen ayakmo tetlapouia? Ma tiktlajpalokan uan ma tikiluikan tiyolpakij touan omonechiko. Xamo amo tikmatiskej tlen tikiluiskej pero ma tikyolchikauakan.

18. ¿Ken uelis tikinyolchikauaskej uan tikinyolseuiskej akinmej ayakmo tetlapouiaj?

¹⁸ Ma tikinyolchikauakan uan ma tikinyolseuikan. Xamo imachtijkauan Jesús omokuayejyekojkej amo uelis tetlapouiskiaj itech nochi tlaltikpak. Pero Jesús okinyolseui uan okinmilui: “Nochipa namouan niyetos” (Mat. 28:20, TNM). Uan melauak ijkon opanok porque nochipa “otlamachtiayah iwa otetlapowiayah” (Hech. 5:42). Noijki moneki tikinyolchikauaskej uan tikinyolseuiskej tokniuan tlen ayakmo tetlapouiaj. Xamo momojtiaj oksepa tetlapouiskej. Uelis tikinyolseuiskej tla tikinmiluiskej amo inselti tetlapouiskej. Ijkuak yikinekiskej tetlapouiskej, uelis inmiuan tiaskej. Tla ijkon tikchiuaskej, techtlasojkamatiliskej. Tla tikinmitaj ken tokniuan, kinpaleuis oksepa ma tetlapouikan uan non kichiuas tinochtin ma tiyolpakikan.

19. ¿Tlen tiknekij tikchiuaskej ika nochi toyolo uan tleka?

¹⁹ ¿Keman tlamis tikinpaleuiskej oksekimej ma kichiuakan ken Cristo? Hasta ijkuak tlamis nochi tlen amo kuali (Mat. 28:20, TNM; xikita glosario kanin kijtoua, “conclusión del sistema”). ¿Uelis tikchiuaskej tlen Jesús otlanauati? Kema. Ik non, timochijchikauaj uan tiktekitiltiaj totomin para tikinpaleuiskej akinmej kinekij yoltoskej nochipa (Hech. 13:48, TNM). Ijkon tikchiuaskej ken Jesús, ye okijto: “Notlakual ye manikchiwa tlan kipaktia Akin onechaltítlanki, iwa maniktlami iteki” (Juan 4:34; 17:4). Tejuan noijki tiknekij ika nochi toyolo tikchiuaskej tlen Jesús okijto (Juan 20:21). Tiknekij tinochtin san sekan titetlapouiskej uan noijki iuan akinmej ayakmo tetlapouiaj. Tiknekij titetlapouiskej hasta ijkuak kijtos Jehová (Mat. 24:13).

20. Ijkon ken kijtoua Filipenses 4:13, TNM, ¿ken tikmatij uelis tikchiuaskej tlen okijto Jesús?

²⁰ Ualeua oui tikchiuaskej tlen otechnauati Jesús. Pero amo tikatej toselti, Jesús techpaleuia ijkon ken okijto. Miakej tikinpaleuiaj ma kichiuakan ken Cristo porque “titlapalewijkeh itech iteki Dios” uan ‘tiseititokeh iwa’ Cristo (1 Cor. 3:9; 2 Cor. 2:17). Ik non, uelis tikchiuaskej. Se ueyi tlateochiualistli titetlapouiaj uan tikinpaleuiaj oksekimej noijki ma tetlapouikan (xiktlajtolti Filipenses 4:13, TNM).