1. Ngokwalokho okutshiwo kuMathewu 28:18-20, yiwuphi umlayo uJesu awunika abafundi bakhe?

UJESU wathi esevusiwe wabonakala kubafundi bakhe ababebuthene eGalile. Wayelomlayo oqakathekileyo ayefuna ukubanika wona. Umlayo lo utholakala kuMathewu 28:18-20.—Bala.

2. Yiphi imibuzo esizaxoxa ngayo?

² Umlayo kaJesu wokwenza abafundi uyasebenza lakuzo zonke izinceku zikaNkulunkulu lamuhla. Ngakho asixoxeni ngemibuzo emithathu ephathelane lomsebenzi uJesu asinike wona. Owokuqala, kuyini okunye okumele sikwenze ngaphandle kokufundisa abantu imithetho kaNkulunkulu? Owesibili, abamemezeli bonke abasebandleni bangenzani ukuze bancedise abafunda iBhayibhili ukuthi bathuthuke? Owesithathu, singabancedisa njani abangasayifezi inkonzo ukuthi baphinde benze abafundi?

3. Yiwuphi umcijo oqakathekileyo osemlayweni kaJesu?

³ Umlayo kaJesu ucacile. Kumele sifundise abantu lokho asilaye khona. Kodwa kulomcijo oqakathekileyo okumele siwunanzelele. UJesu kazange athi: ‘Libafundise izinto zonke engililaye zona’ kodwa wathi: “Libafundise ukulandela izinto zonke engililaye zona.” Lokhu kutsho ukuthi kufanele sifundise umfundi wethu okumele  akwenze futhi simtshengise ukuthi angakwenza njani. (ImiSeb. 8:31) Kungani kumele senze njalo?

4. Kutshoni ukulandela umlayo? Nika umzekeliso.

⁴ “Ukulandela” umlayo kutsho ukuwulalela. Cabanga ngomzekeliso ongasinceda sizwisise ukuthi singabancedisa njani abantu balandele kumbe balalele izinto uKhristu asilaya zona. Umuntu ofundisa abanye ukutshayela uqala ngokubafundisa imithetho yomgwaqo besesekilasini. Kodwa kulokunye akwenzayo. Uyahamba lomfundi oseqalisa ukutshayela ukuze amnike amacebo ngesikhathi ezama ukusebenzisa lokho akufundileyo. Sifundani emzekelisweni lo?

5. (a) Ngokwalokho okutshiwo kuJohane 14:15 lo-1 Johane 2:3, kumele sibafundiseni abantu esifunda labo iBhayibhili? (b) Singabancedisa njani abantu esifunda labo?

⁵ Nxa sifunda labantu iBhayibhili siyabe sibafundisa imithetho kaNkulunkulu. Kodwa kulokunye okufanele sikwenze. Kumele sibafundise ukuthi bangakusebenzisa njani lokho abakufundayo. (Bala uJohane 14:15 lo-1 Johane 2:3.) Singabatshengisa ngesikwenzayo ukuthi bangakusebenzisa njani lokho abakufunda eBhayibhilini nxa besesikolo, emsebenzini kumbe bezilibazisa. Singabalandisela ukuthi ukusebenzisa esikufunde eBhayibhilini kusivikele njani kumbe ukuthi kusincede njani ukuthi senze isinqumo esihle. Kanti njalo singathandaza labantu esifunda labo sicela uJehova ukuthi abakhokhele esebenzisa umoya ongcwele.—Joh. 16:13.

6. Kuyini okunye okumele sikwenze nxa sifundisa abantu ukuthi balandele imilayo kaJesu?

⁶ Kuyini okunye okumele sikwenze nxa sifundisa abantu ukuthi balandele imilayo kaJesu? Kufanele sibancedise ukuthi babe lesifiso sokwenza abafundi. Phela abanye esifunda labo bayesaba ukutshumayela. Yikho kumele sibekezele nxa sibancedisa ukuthi bazwisise kuhle iqiniso eliseBhayibhilini ukuze babe lokholo oluqinileyo. Lokho kuzabathinta inhliziyo besebezimisela ukutshumayela. Singabancedisa njani ukuthi babe lesifiso sokutshumayela izindaba ezinhle?

7. Singenzani ukuze sincede umfundi abe lesifiso sokutshumayela izindaba ezinhle?

⁷ Singabuza esifunda laye imibuzo le: “Ukusebenzisa okufunda eBhayibhilini kukuncede njani empilweni yakho? Ubona angani bakhona abanye okumele bazwe izindaba ezinhle eziseBhayibhilini? Ungenzani ukuze ubancedise?” (Zaga. 3:27; Mat. 9:37, 38) Mtshengise amaphetshana atholakala eBhokisini Elilamathuluzi Okufundisa ubusumbuza ukuthi yiwaphi angathandwa yizihlobo zakhe, abangane kumbe asebenza labo. Mnike wonalawo ayabe ewakhethile abe manengi. Phrakthiza laye ukuthi angawahambisa njani. Kodwa nxa esengummemezeli ongabhabhathizwanga kuzamele sitshumayele laye ukuze simncedise.—UmTshu. 4:9, 10; Luk. 6:40.

8. Kungani kuqakathekile ukuthi abantu esifunda labo iBhayibhili bamthande kakhulu uJehova lomakhelwane? (Khangela lebhokisi elithi “ Esingakwenza Ukuze Sincedise Esifunda Labo Bamthande Kakhulu UNkulunkulu.”)

⁸ Khumbula ukuthi uJesu wathi sifundise abantu “ukulandela izinto zonke” asilaya zona. Izinto lezi zigoqela ukuthanda uNkulunkulu lomakhelwane, okuyimilayo emibili eqakatheke kulayo yonke.  (Mat. 22:37-39) Ukuthanda uNkulunkulu lomakhelwane yiso isizatho esiqakathekileyo esenza sitshumayele. Kodwa abanye esifunda labo iBhayibhili bayesaba ukutshumayela. Yikho kumele sibaqinisekise ukuthi uJehova uzabancedisa ukuthi bangakhulelwa yikwesaba abantu. (Hubo. 18:1-3; Zaga. 29:25) Ibhokisi elisesihlokweni lesi lisitshela esingakwenza ukuze sincedise esifunda laye ukuthi amthande kakhulu uNkulunkulu. Ibandla lona lingabancedisa njani abafundi abatsha ukuthi bamthande kakhulu uJehova lomakhelwane?

9. Emzekelisweni womuntu ofundela ukutshayela, yiziphi indlela afunda ngazo?

⁹ Asibuyeleni emzekelisweni womuntu ofundela ukutshayela. Nxa esetshayela elomuntu omfundisayo eceleni kwakhe uyabe efunda ngokumlalela langokukhangela abanye abatshayela kuhle. Ngokwesibonelo, umuntu omfundisayo angamtshengisa omunye umtshayeli ovumela omunye ukuthi ahambe kuqala. Kumbe angamtshengisa umtshayeli oyehlisa ukukhanya kwamalayithi akhe ukuze angaphandli abanye abatshayeli. Izibonelo lezi zinganceda umfundi abone okumele akwenze nxa laye esetshayela.

10. Kuyini okuzanceda umfundi weBhayibhili athuthuke ekukhonzeni?

¹⁰ Umfundi weBhayibhili oseqalisa ukukhonza uJehova laye ufunda kulowo omfundisayo aphinde afunde lasezincekwini zikaJehova ezenza kuhle ekukhonzeni. Yikho ukuya emihlanganweni yebandla kuzamnceda ukuthi athuthuke ekukhonzeni. Phela azakufunda emihlanganweni le kuzamnceda angezelele ulwazi alalo, aqinise ukholo lwakhe njalo amthande kakhulu uNkulunkulu. (ImiSeb. 15:30-32) Kanti njalo umuntu omfundisayo angamethula kwabanye abafowethu labodadewethu abalezimo ezihambelana lezakhe. Abazalwane labo bangamnceda njani umfundi? Ake sixoxe ngezinye izibonelo.

11. Kuyini umfundi angakubona ebandleni futhi lokho kungamenza azimisele ukwenzani?

¹¹ Umfundi weBhayibhili okhulisa abantwana eyedwa ubona udade osesimeni esinjengesakhe. Kumthinta inhliziyo ukucabangisisa ngokwenziwe ngudade lo ukuze abuye labantwabakhe abancane eWolu yoMbuso. Umfundi othwaliswa nzima yikuyekela ukubhema ujayelana lomfowethu owayelohlupho olufananayo kodwa walunqoba. Umfowethu umtshela ukuthi ukuthanda uJehova yikho okwamnceda ukuthi alalele imilayo yakhe. (2 Khor. 7:1; Flp. 4:13) Uthi esemtshelile ukuthi wenzani ukuze atshiye ukubhema abesesithi kuye, “Lawe ungenelisa ukutshiya ukubhema.” Lokhu kuyamkhuthaza umfundi kumenze abone ukuthi laye angenelisa ukunqoba umkhuba lo. Intombazana efunda iBhayibhili ibona udade osakhulayo othokozayo futhi ozimisele ukuncedisa abanye. Lokhu kuyenza ifise ukwazi okunengi ngokuthi kungani ehlala ethokoza.

12. Kungani sisithi bonke ebandleni bangancedisa labo abafunda iBhayibhili?

¹² Nxa umfundi angajayelana labafowethu labodadewethu abathembekileyo uzafunda kibo ukuthi kutshoni ukulandela umlayo kaKhristu wokuthanda uNkulunkulu lomakhelwane. (Joh. 13:35; 1 Tim. 4:12) Kanti njalo njengoba sike sabona, angafunda kubamemezeli abalenhlupho ezihambelana lezakhe. Azakufunda kubo kuzamnceda abone  ukuthi angenelisa ukutshintsha indlela aphila ngayo abe ngumfundi kaKhristu. (Dute. 30:11) Bonke ebandleni bangancedisa labo abafunda iBhayibhili ukuthi bathuthuke ekukhonzeni. (Mat. 5:16) Wena ubancedisa njani abafundi beBhayibhili ababuya emihlanganweni yebandla?

13-14. UJesu wabaphatha njani abaphostoli bakhe ababedanile?

¹³ Sifuna ukuncedisa abafowethu labodadewethu abangasayifezi inkonzo ukuthi baphinde batshumayele njalo benze abafundi. Indlela uJesu aphatha ngayo abaphostoli bakhe ababedanile iyasinceda sibone esingakwenza.

¹⁴ UJesu wathi esezakufa abaphostoli “bonke bamtshiya babaleka.” (Mak. 14:50; Joh. 16:32) Wabanceda njani abaphostoli bakhe ababedanile? Esanda kuvuswa watshela abanye abalandeli bakhe wathi: “Lingesabi! Hambani liyebikela abafowethu [ukuthi sengivusiwe].” (Mat. 28:10a) UJesu kazange abakhalale abaphostoli bakhe. Wababiza ngokuthi ‘ngabafowabo’ lanxa babeke bamtshiya. UJesu wayelozwelo futhi ethethelela njengoJehova.—2 AmaKho. 13:23.

15. Sibabona njani labo abangasatshumayeli?

¹⁵ Lathi njengoJehova loJesu, silendaba lalabo abangasayifezi inkonzo. Phela balokhu bengabafowethu labodadewethu futhi siyabathanda. Silokhu siyikhumbula imisebenzi abayenzayo lothando abalutshengisayo. Abanye babo basebenza nzima okweminyaka eminengi. (Heb. 6:10) Siyabakhumbula sibili! (Luk. 15:4-7) Singatshengisa njani ukuthi silendaba labo njengoJesu?

16. Singatshengisa njani ukuthi silendaba labafowethu labodadewethu abangasayifezi inkonzo?

¹⁶ Banxuse emihlanganweni yebandla. Enye indlela uJesu akhuthaza ngayo abaphostoli bakhe ababedanile yikubanxusa emhlanganweni. (Mat. 28:10b; 1 Khor. 15:6) Lathi singakhuthaza abangasayifezi inkonzo ukuthi bangene imihlangano yebandla. Kungadinga ukuthi sibanxuse kanengana. Nxa bengabuya, sizathokoza njengoba nje uJesu wathokoza lapho abafundi bakhe bebuya emhlanganweni ayebanxuse kuwo.—Khangela uMathewu 28:16 loLukha 15:6.

17. Kufanele senzeni nxa sibona umfowethu kumbe udadewethu ongasayifezi inkonzo ebuya eWolu yoMbuso?

¹⁷ Bamukele ngazo zombili. UJesu wenza abafundi bakhe bakhululeka ngesikhathi behlangana laye. Kazange amelele ukuthi babuye kuye kodwa wabalanda wasekhuluma labo. (Mat. 28:18) Kufanele senzeni nxa sibona umfowethu kumbe udadewethu ongasayifezi inkonzo ebuya eWolu yoMbuso? Kumele simlande futhi simenze akhululeke. Ekuqaliseni singakhathazeka ngoba siyabe singakwazi ukuthi sizafika sisithini. Kodwa singamtshela ukuthi siyathaba ukumbona singazange simenze abe lenhloni.

18. Singabaqinisekisa njani labo abangasayifezi inkonzo?

¹⁸ Baqinisekise. Kungenzeka abafundi bakaJesu babecabanga ukuthi abasoze benelise ukutshumayela emhlabeni wonke. Kodwa uJesu wabaqinisekisa esithi: “Ngizabe ngilani.” (Mat. 28:20) Akutshoyo kwabanceda yini? Ye. Kungakayi ngaphi ‘basebefundisa njalo bememezela izindaba ezinhle.’ (ImiSeb. 5:42) Labangasayifezi inkonzo badinga ukuqinisekiswa.  Bangabe besesaba ukuphinda batshumayele. Kodwa singabaqinisekisa ukuthi sizahamba labo nxa sebekulungele ukwenza njalo. Akuthandabuzwa ukuthi bazathokoza singabancedisa ukuthi baphinde batshumayele. Nxa singaphatha labo abangasayifezi inkonzo njengabafowethu labodadewethu bangavuselela inkonzo yabo futhi ibandla lizathokoza.

19. Kuyini esikufuna ngenhliziyo yonke njalo kungani?

¹⁹ Sizawenza kuze kube nini umsebenzi wokwenza abafundi? Kuze kube yisiphetho somumo lo wezinto. (Mat. 28:20; khangela iNgcazelo Yamabala AseBhayibhilini, “Isiphetho somumo wezinto.”) Sizenelisa yini ukutshumayela lokwenza abafundi kuze kufike lesosikhathi? Sizimisele ukwenza njalo! Siyathokoza ukusebenzisa isikhathi sethu, amandla kanye lemali ukudinga labo ‘abalesifiso sokuthola ukuphila okungapheliyo.’ (ImiSeb. 13:48) Nxa sisenza njalo siyabe silingisela uJesu. Wathi: “Ukudla kwami yikwenza intando yalowo ongithumileyo lokuqeda umsebenzi wakhe.” (Joh. 4:34; 17:4) Lathi siyafuna sibili ukuqeda umsebenzi esiwuphathisiweyo. (Joh. 20:21) Kanti njalo sifuna labanye, okugoqela abangasayifezi inkonzo baqinisele emsebenzini lo kanye lathi.—Mat. 24:13.

20. Ngokwalokho okutshiwo kuFiliphi 4:13, kuyini okwenza senelise ukulandela umlayo esawuphiwa nguJesu?

²⁰ Khona akulula ukulandela umlayo esawuphiwa nguJesu. Kodwa umsebenzi lo asiwenzi sodwa ngoba uJesu wathembisa ukuthi uzakuba lathi. Nxa sisenza abafundi siyabe “sisebenza loNkulunkulu” futhi “simunye loKhristu.” (1 Khor. 3:9; 2 Khor. 2:17) Ngakho singenelisa sibili ukuwenza. Kuyisibusiso futhi kuyasithokozisa ukwenza umsebenzi lo, lokuncedisa abanye ukuthi bawenze!—Bala uFiliphi 4:13.