1. Mwawiiwanana ni Mateu 28:18-20, nlamulo taani Yesu aavanheiye?

YESU amanle oviihiwa mookhwani, aahirwa wa oohuserya awe yaawo yaathukumanne o Kalileya. Owo aahikhalano echu yoochuneyaxa wi aaleele. Echu taani? Masu awe anaphwanyeya mu Mateu 28:18-20.—Mwaalakhanye.

2. Makoho taani nnahaalaahu othokororya?

² Nlamulo na Yesu na waapaka oohuserya, ninnaphariheleya wa mulapeli a Muluku ori oothene mmahiku ahu. Mwawiihiiha, hankooni nthokororye makoho mararu yaawo aniiwanana ni muteko yoowo Yesu onivanheiye. Noopacerya, ohiya pahiru waahusiha oohuserya avyaani yookhwela ya Muluku, echu taani ekina nnaphwanelaahu opaka? Nanaawiili, ti mwawiihai alaleeryi oothene a mmulokoni, eneeraaya yaakhaviherye oohuserya a Piipiliya wunnuwa omunepani? Naneeraru, nni naakhaviherye hai anna ni arokora yaawo yaamaanle olaleerya okookela wanaawiili mmuteko wa waapaka oohuserya?

3. Mahusiheryo taani ooluluwanya Yesu olonceiye mu nlamulo nawe?

³ Mahusiheryo a Yesu tookwakwaleya. Nnaphwanela waahusiha achu, ichu seiyo Yesu aalamulenleiye. Mwa yeeyo, hannaphwanela ocuwala echu yoochuneyaxa. Yesu halonce wi: ‘Mwaahusihe ichu soothene koorummaakaani.’ Ohiya yeeyo owo olonce wi: “Munaahusiha ochariha soothene koorummaakaani.” Wi niiwelele mahusiheryo yaala a Yesu nnaphwanela waahusiha oohuserya ahu a Piipiliya echu ya weera ni owooniherya mukhalelo wa weerano. (Saw. 8:31) Ntakhara heeni nnaphwanelaahu weerano yeela?

4. Ochariha nlamulo enataphulela eheeni? Mphwanaphwanihe.

⁴ “Ochariha” nlamulo enataphulela wiiwelela. Wi niphwanaphwanihe mukhalelo nneeraahu nimuhusihe muchu ochariha, naari wiiwelela ichu Kristu olamulenleiye, muthokororye yootakiherya  enacharela. Muhusiha yoowo onaahusiha achu weeciha ekaaro, oni aahusihe hai wiiwelela malamulo a muramphani? Yoopacerya, muhusiha onnaaleela oohuserya malamulo yaawo anaphwanelaaya ochariha muramphani. Mwawiihiiha, wi aahusihe ochariha malamulo awo, owo onaphwanela opaka echu ekina. Owo onaphwanela waahoola oohuserya vaavaa aneecihaaya ekaaro ni weererya opharihela seiyo ahusenryaaya. Tiheeni nnahuseryaahu orweela wa yootakiherya yeela?

5. (1) Mwawiiwanana ni Yohani 14:15; 1 Yohani 2:3 echu taani nnaphwanelaahu waahusiha oohuserya ahu opaka? (2) Mvahe yootakiherya mukhalelo nneeraahu naakhaviherye oohuserya ahu a Piipiliya opharihela malakiheryo a Piipiliya.

⁵ Vaava nnaahusihaahu akina Piipiliya, ninnaahusiha tho yeeyo Muluku onachuneiye wa hiyo. Nyenya ninnaphwanela opaka sincipale. Nnaphwanela waahusiha oohuserya ahu a Piipiliya opharihela seiyo ahusenryaaya mookumini mwaya nihiku ti nihiku. (Mwaalakhanye Yohani 14:15; 1 Yohani 2:3.) Ntoko yootakiherya, nnanwerya owooniherya oohuserya ahu a Piipiliya mukhalelo wa opharihela malakiheryo a Piipiliya oxikola, o muteko, ni variyari va mathatelo. Nnanwerya waaleela echu vyakala yeeren’ye mookumini mwahu wi niwooniherye ti mwawiihai opharihela malakiheryo a Piipiliya yaanikhapelenlaaya va yawoopiha vyakala naari mukhalelo yaanikhavihenryaaya opaka yoolakelela mwamiruku. Vaavaa nnakhalaahu vamoha ni oohuserya ahu a Piipiliya nnanwerya ovekela wa Yehova wi aahooleleke ni munepa Awe waweela.—Yoh. 16:13.

6. Waahusiha akina ochariha malamulo a Yesu enaphitaanyerya eheeni?

⁶ Waahusiha akina ochariha malamulo a Yesu enaphitaanyerya eheeni? Nnaphwanela waakhaviherya oohuserya ahu a Piipiliya wunnuwiha nchuno na waapaka oohuserya. Wa oohuserya akina, oya mmuteko woolaleerya enamukhala echu yawuuliha muru. Nnaphwanela okhala oopisa murima, wi naakhaviherye awo wiiwexexa iparipari sa Mpiipiliyani seiyo inahaala otannya murima aya, olipiha nroromelo naya, ni waaceenyerya weeravo echu. Tiheeni nnaphwanelaahu weere wi naakhaviherye oohuserya ahu a Piipiliya okhalano nchuno na olaleerya michaka saphaama wa akina?

7. Nni nimukhaviherye hai oohuserya a Piipiliya wunnuwiha nchuno na olaleerya michaka saphaama wa akina?

⁷ Nnaphwanela ompakela oohuserya ahu a Piipiliya makoho ntoko ala: “Weemererya michaka sa Omwene otoronke hai okumi anyu? Apwanne munuupuwela wi akina annachuna owiriyana michaka seiya? Tiheeni munaphwanelaanyu weera wi mwaakhaviherye yaawo?” (Masi. 3:27; Mat. 9:37, 38) Mmoonihe oohuserya anyu itrataato seiyo inapaka makupa a Ikaruma sa Ohusihano nave mmuhiye wi athanle ikina seiyo onuupuweleiye wi amusi awe, asinthamwene, ni asinthamwene oomutekoni inahaala waasivela waalakhanya. Mumvahe oohuserya owo sincipale sa itrataato seiyo. Mmuhusihe mukhalelo wa ovaha etrataatu eyo mwa mavyakelo. Voocharela, wakhala wi oohuserya ahu a Piipiliya oheemereryiwa okhala mulaleeryi oohipatisiwa onamuchuneyaka weeca ni yoowo mmuteko woolaleerya wi nimukhaviherye.—Ekle. 4:9, 10; Luka 6:40.

8. Ntakhara heeni oryaaya woochuneya oohuserya a Piipiliya winnuwiha osivela ntakhara Muluku ni mwaacamani? (Moone tho ekaaxa “ Mukhalelo Nneeraahu Naakhaviherye Oohuserya Ahu a Piipiliya Winnuwiha Osivela Ntakhara Muluku.”)

⁸ Muupuwele wi Yesu oonihusiha wi naahusiheke akina “ochariha soothene” onilamulenleiye. Ela enaphitaanyerya malamulo meeli matokotoko—omusivela Muluku ni omusivela mwaacamani—malamulo yaala meeli anniiwanana ni muteko woolaleerya nave tho muteko wa waapaka oohuserya. (Mat. 22:37-39)  Wiiwanana taani orivovo? Echu yoochuneya enanceenyerya opaka makupa mmuteko woolaleerya, ti osivela—omusivela wahu Muluku ni mwaacamani. Ninniiwexexa wi wa ohuserya akina, opaka makupa mmuteko woolaleerya onnaaruuhela woova. Nyenya nnanwerya waalipiha oohuserya ntoko yaawo wi nnikhaviheryo na Yehova anahaala ovootha owoova waya achu. (Sal. 18:1-3; Masi. 29:25) Ekaaxa eri mmwaha yoola ennathariha mikhalelo seiyo inahaala omukhaviherya oohuserya wunnuwiha osivela wawe ntakhara Muluku. Mwawaaceererya, muloko oni waakhaviherye hai oohuserya a Piipiliya avyaani wunnuwiha osivela moopwahasa?

9. Mu niphwanaphwaniho na muchu onahuserya weeciha ekaaro mmikhalelo taani owo oneereiye ahuserye ichu soochuneya?

⁹ Muupuwele wanaawiili vooloca sa niphwanaphwaniho na muchu anahuserya weeciha ekaaro. Vaavaa owo oneeciheiye ekaaro ari ni muhusiha awe, mmikhalelo taani onahusereiye? Moorweela wa onwiriyana muhusiha awe ni waavarerya achu akina aneeciha ekaaro. Muhusiha onanwerya omukhaviherya oohuserya awe ochariha yootakiherya ya mulipa a weeciha ekaaro mukina yoowo oneemererya wi ahooleliwe ni alipa a weeciha ekaaro akina nthowa na oreera wawe murima. Naari muhusiha onanwerya omukhaviherya oohuserya awe ochariha yootakiherya ya mulipa a weeciha ekaaro mukina yoowo onavukula waarya wa alampata wi ahaatuthe alipa a weeciha ekaaro akina. Sootakiherya seiya inanmukhaviherya oohuserya osuwela ichu soochuneya seiyo oneereiye apharihele muteko vaavaa oneeciheiye ekaaro.

10. Tiheeni enahaala omukhaviherya oohuserya a Piipiliya winnuwa omunepani?

¹⁰ Moolikana, oohuserya a Piipiliya yoowo anapacerya weeca mu ephiro ya wookumini woohimala onnahuserya ohiya pahiru orweela wa muhusiha awe nyenya orweela wa sootakiherya saphaama sa alapeli akina a Yehova. Mwawiihiiha, tiheeni enahaala omukhaviherya oohuserya a Piipiliya wunnuwa omunepani? Ophiyaka mmithukumano sahu Seekristu. Ntakhara heeni? Mahusiheryo a Piipiliya yaawo aniiwaaya mmithukumano anamulipiha nroromelo naya, nave anamwaakhaviherya winnuwiha osivela waya ntakhara Muluku. (Saw. 15:30-32) Nave tho mmithukumano muhusiha onanwerya omusuwanyeiha ohuserya awe wa anna ni arokora yaawo avilenle ni makacamiho oolikana ni awawe. Sootakiherya taani sa osivela Weekristu oohuserya a Piipiliya anahaalaaya woona mmulokoni? Muthokororye sootakiherya inacharela.

11. Sootakiherya taani oohuserya a Piipiliya onahaaleiye woona mmulokoni, nave mmukhalelo taani sinahaalaaya omvolowela?

¹¹ Oohuserya a Piipiliya yoowo onaaphuwa anamwane meekheiye onnamoona murokora Eekristu yoowo ori mmukhalelo woolikana. Oohuserya a Piipiliya onnatannyeya murima vaavaa onooneiye ophiyerya mweeryo taani murokora oniilipiseryeiye wi aphiye mu Empa ya Omwene vamoha ni anaawe. Oohuserya yoowo oniilipiserya ohiya omulya soona onnamusuwela munna yoowo aarino nikacamiho noolikana. Mulaleeryi onnamuleela oohuserya a Piipiliya ti mwawiihai winnuwiha omusivela Yehova waamuceenyenryaaya wiiwelela malamulo Awe. (2 Kor. 7:1; Fil. 4:13) Vaavaa onawiriyaneiye yaweereya ya mulaleeryi, oohuserya a Piipiliya onnaroromela vaavaa onamwiiweiye munna ariki: “We tho onanwerya.” Oohuserya a Piipiliya yoowo ori mwali onnamoona Namoona a Yehova yoowo tho ori mwali arino ekumi yoohakalala. Vaavaa oohuserya a Piipiliya onamooneiye murokora yoowo ori mwali ari oohakalala muukumini, owo onnachuna ohuserya sincipale wi akhale oohakalala.

12. Ntakhara heeni nnaweryaahu oloca wi mmoha ti mmoha mmulokoni onanwerya omukhaviherya oohuserya a Piipiliya?

¹² Vaavaa oohuserya a Piipiliya onasuweleiye  nroromelo na alaleeryi oohiyana hiyana, oohuserya a Piipiliya onnahuserya orweela wa sootakiherya saya, yootaphulela ya ochariha nlamulo na Kristu na omusivela Muluku ni mwaacamani. (Yoh. 13:35; 1 Tim. 4:12) Hiiha ntoko nloncaahu, oohuserya a Piipiliya onanwerya ohuserya orweela wa alaleeryi yaawo avoonthe makacamiho oolikana ni awawe. Oohuserya a Piipiliya onnahuserya orweela wa sootakiherya ntoko seiya wi akhale oohuserya a Kristu. (Malam. 30:11) Muchu ti muchu mmulokoni onanwerya omukhaviherya oohuserya a Piipiliya mmikhalelo soohiyana hiyana wunnuwa omunepani. (Mat. 5:16) Wiilipiserya taani munapakaanyu wi mwaalipihe oohuserya a Piipiliya yaawo anaphiya mmithukumano?

13-14. Yesu aakhalinhe hai arummwa awe ooceecheya?

¹³ Nnachuna waakhaviherya anna ni arokora ooceecheya wi ekookele wanaawiili waakhwaniherya nlamulo na Kristu na waapaka oohuserya. Mukhalelo Yesu aakhaliheiye arummwa awe ooceecheya ennooniherya echu nnaphwanelaahu weera olelo.

¹⁴ Omakuchuwelo wa muteko wa Yesu veelaponi ya vathi ahaalaka vakhaani okhwa, arummwa awe “oothene yaamuhiya, echawa.” (Mar. 14:50; Yoh. 16:32) Yesu aakhalinhe hai arummwa awe vaavaa yaaceechen’yaaya mu elukuluku vakhaani? Mu elukuluku vakhaani amanle oviihiwa mookhwani Yesu aahaaleela akina a oomuchara awe ariki: “Muhoove! Haweni mwaaleele asinnaka wi eye oKalileya nakumane weiwo.” (Mat. 28:10) Yesu haavelavenle ni arummwa awe. Naamwi awo yaamuchanwe nlelo aahiwiichana “asinnaka.” Moolikana ni Yehova, Yesu aahooniherya ikharari ni olevelela.—2 Mam. 13:23.

15. Nnoona hai vooloca sa yaale amaanle oya mmuteko woolaleerya?

¹⁵ Moolikana, nookhalano wuukhuwa omohamoha ntakhara yaale ahin’ye olaleerya. Awo anna ni arokora ahu, nave ninnaasivela! Nlelo ninnuupuwelela muteko wakuru anna ni arokora yaala apankaaya khalai, akina a yaawo aceechen’ye aarumeela mu iyaakha sincipale. (Ahe. 6:10) Mweeparipari ninnachuna okookela olapa vamoha ni yaawo! (Luka 15:4-7) Nimutakiheryaka Yesu mmikhalelo taani nnahaalaahu wooniherya wuukhuwa ntakhara yaawo?

16. Nni nooniherye hai wuukhuwa ntakhara anna ni arokora ooceecheya?

¹⁶ Mooreera murima mwaawope ntakhara mithukumano. Mukhalelo mmoha Yesu aalipinheiye arummwa awe ooceecheya waari orweela wa waawopa ntakhara muthukumano. (Mat. 28:10; 1 Kor. 15:6) Mmukhalelo woolikana, nnanwerya waaceenyerya ooceecheya ophiyaka mmithukumano wanaawiili. Nyenya ninnasuwela wi nnanwerya waawopa mu ikwaha sincipale nto ehirwe. Moohikhwa minikwa Yesu aahitepa ohakalala vaavaa oohuserya awe yeemerenryaaya nwopelo.—Mulikanyihe ni Mateu 28:16 ni Luka 15:6.

17. Nnaphwanela woonaka hai vaavaa anna ni arokora ooceecheya anaphiyaaya mmithukumano?

¹⁷ Muwaakhele phaama. Oohuserya a Yesu yaahiisoona wi yaahaakheliwa phaama vaavaa yaakumannaaya ni yene; owo taari oopacerya oloca ni yaawo. (Mat. 28:18) Nnoona hai vaavaa ooceecheya onaphiyeiye mmithukumano? Nnaphwanela omwaakhela phaama ooceecheya. Wuupaceryani nnamukhala awuukhuwa nthowa na ohisuwela echu yooloca. Nyenya nihimuulinhe muru pahiru nnanwerya oloca wi nootepa ohakalala omoona yoowo.

18. Nni naalipihe hai alaleeryi ooceecheya?

¹⁸ Mwaalipihe yaawo. Akhweya oohuserya a Yesu yaahuupuwela wi hiyi ewerye murici wa olaleerya elapo yoothene. Yesu aahaalipiha oomuchara  awe moorweela wa oloca: “Kiri ni nyuwo mahiku oothene.” (Mat. 28:20) Apwanne masu ala yaahaalipiha oohuserya? Chiryene. Vahilekenle emanle wiiwa masu yaala awo yaahikhala ooweiwa mu “olaleya ni ohusiha muchaka waphaama.” (Saw. 5:42, BNM.) Alaleeryi ooceecheya tho annaphwanela olipihiwa. Awo anamukhala awuukhuwa okookela olaleerya wanaawiili. Nnanwerya waalipiha yaawo moorweela wa waaleela wi heni elaleeryeke mukhataaya. Wakhala wi aarehereya okookela olaleerya, nnanwerya okhala vamoha ni yaawo. Moohikhwa minikwa awo anahaala othamalela nikhaviheryo nahu vaavaa anapaceryaaya olaleerya michaka saphaama wanaawiili. Vaavaa nnawoonaahu ooceecheya ntoko anna ni arokora ahu, nnanwerya woona sookhumelela soohakalaliha mmulokoni mwahu.

19. Tiivi eri yoolakelela ahu, nave ntakhara heeni?

¹⁹ Nni ntitelele waapaka oohuserya ophiyerya liini? Ophiyerya omakuchuwelo wa elapo ela yoonanara. (Mat. 28:20; mmoone Glossário, “Final do sistema de coisas” mu Tradução do Novo Mundo.) Apwanne nnahaala otitelela olaleerya ni waapaka oohuserya ophiyerya elukuluku yeeyo? Nri oolakelela weerano yeeyo! Ninnahakalala ovaha elukuluku, ikuru, ni sookhalano sahu wi naaphwanye yaale “yaalakhanyeriwe waakhela okumi woohimala.” (Saw. 13:48) Mu weerano hiiha, nnachariha yootakiherya ya Yesu. Owo aaloca: “Yoolya aka ti weerano yookhwela ya yoowo okirumme ni okhwaaniherya muteko awe.” (Yoh. 4:34; 17:4) Nave hiyo tho nri oolakelela weerano emohamoha. Nnachuna waakhwaniherya muteko yoowo ninnyereryiwaahu. (Yoh. 20:21) Nave nnachuna wi akina, ophitaanyerya ooceecheya, etitelele olapa vamoha ni hiyo mmuteko yoola ninnyereryiwaahu.—Mat. 24:13.

20. Mwawiiwanana ni Filipi 4:13, ntakhara heeni nnanwerya waakhwaniherya muteko yoowo Yesu onilamulenleiye opaka?

²⁰ Tahi wookhweya weerano yeeyo Yesu onilamulenleiye. Mwawiihiiha hinni niwerye opaka omuteko yoola meekhihu. Yesu aahiroromeliha wi aahaala okhala vamoha ni hiyo. Ninnaakhwaniherya muteko wa waapaka oohuserya ntoko “alipa-muteko akhwawe a Muluku” ni “nlochaka mwa Kristu.” (1 Kor. 3:9; 2 Kor. 2:17, NN.) Mwawiihiiha, nnanwerya waakhwaniherya muteko yoola. Ekari etokweene ni yoohakalaliha waakhwaniherya muteko yoola ni waakhaviherya akina weerano emohamoha!—Mwaalakhanye Filipi 4:13.