TLAMACHTIJLI 45
¿Kenon uelis tikinpaleuiskej oksekimej makitlakamatikan Cristo?
“Xuiyan niman xkinmachtikan tlaltikpakchanejkej [...], xkinmachtikan makitlakamatikan nochi tlajtlamach tlen yonimechnauati” (MAT. 28:19, 20, TNM).
TLAKUIKAJLI 89 Kiteochiuaj akin tlakaki niman tetlakamati
TLEN TIKITASKEJ *
1. ¿Tlenon otlanauati Jesús ipan Mateo 28:18-20?
SAKIN ika oyoliuj, Jesús okinnojtiti inomachtijkauan, akin onosentlalijkaj Galilea. Kinekiya kimijlis itlaj tlen melak ueyi kijtosnekiya. ¿Tlenon kinekiya kimijlis? Uelis tikitaskej yejuin ipan Mateo 28:18-20 * itech Traducción del Nuevo Mundo (xpoua).
2. ¿Tlenon tiknankiliskej aman?
2 Ipan yejuin tonaltin, tinochimej akin tiktekichiuiliaj toTajtsin noijki noneki tikinpaleuiskej oksekimej manochiuakan inomachtijkauan Jesús, ijkon ken yejua otlanauati. Ipan yejuin tlamachtijli tiknankilijtoskej yejuin: 1) maski tikimititiaj tonomachtijkauan tlen kitlajtlani Jehová, ¿tlenon noijki noneki tikinmachtiskej?, 2) ¿kenon tlanechikojli uelis kipaleuis akin nomachtijtika Biblia machikaui itlaneltokil? niman 3) ¿kenon uelis tikinpaleuiskej tokniuan akin youejkaujkej xok tenojnotsaj oksejpa matenojnotsakan?
MATIKINMACHTIKAN MAKITLAKAMATIKAN CRISTO
3. ¿Tlenon kineki Jesús matikchiuakan?
3 Jesús kuajli otechijli ika noneki tikinmachtiskej oksekimej tlen yejua otlanauati. San ika, matikitakan ika Jesús xokijto: “Xkinmachtikan nochi tlajtlamach tlen yonimechnauati”. Yejua okijto: “Xkinmachtikan makitlakamatikan nochi tlajtlamach tlen yonimechnauati”. Tla tiknekij tikchiuaskej yejuin, xsan noneki tikititiskej akin tikmachtiaj Biblia tlenon kichiuas, noijki noneki tikititiskej kenon kichiuas (Hech. 8:31). ¿Tleka?
4. ¿Tlenon noneki tikchiuaskej niman ijkon tikpaleuiskej akin tikmachtiaj Biblia makitlakamati Cristo? Xkijto se neskayotl.
4 ¿Tlenon noneki tikchiuaskej niman ijkon tikpaleuiskej akin tikmachtiaj Biblia makitlakamati Cristo? Matiknemilikan ika tiknekij yakaj tikmajmachtiskej makinejnemilti carro. Kachtopa kanaj nonekis tikijliskej kenon tlanejnemiltis. San ika, tla tiknekij matlanejnemilti ken noneki, kipiya ika tikchiuaskej itlaj okse. Ijkuak yejua peuas tlanejnemiltis ipan carretera, nonekis iuan tiaskej niman ijkon tikpaleuiskej matlanejnemilti ijkon ken yotikmachtijkej. ¿Tlenon tiuelij itech yejuin?
5. a) Itech tlen kijtoua Juan 14:15 niman 1 Juan 2:3, ¿tlenon noneki tikititiskej akin tikmachtiaj? b) Xkijto kenon uelis tikchiuaskej.
5 Ijkuak yakaj tikmachtiaj itech Biblia, tikititiaj tlen toTajtsin kineki matikchiuakan. San ika, xsan yejon noneki tikchiuaskej. Noneki tikititiskej kenon kichiuas tlen ueltiuj (xpoua Juan 14:15; 1 Juan 2:3). Tla akin tikmachtiaj kita kenon tejuamej tikchiuaj tlen yotiuelkej ipan Biblia, yejua noijki kimatis kenon kitlakamatis iTlajtol toTajtsin ijkuak nemis ipan escuela, ipan itekiyo noso ijkuak nonekis kitlapejpenis tlen ika noyolpaktis. Uelis tikijliskej kenon Biblia yotechpaleui maka matitlajyouikan noso kenon yotechpaleui matiktlapejpenikan tlen kuajli. Niman ijkuak tikchiuaskej teoyotl iuan tonomachtijkauj, uelis tiktlajtlaniliskej Jehová makiyekana ika iespíritu santo (Juan 16:13).
6. ¿Tlenon más noneki tikchiuaskej niman ijkon tikimititiskej akin tikinmachtiaj makitlakamatikan tlen Jesús otlanauati?
6 ¿Tlenon más noneki tikchiuaskej niman ijkon tikimititiskej akin tikinmachtiaj makitlakamatikan tlen Jesús otlanauati? Noneki tikinpaleuiskej noijki makinekikan kinmachtiskej oksekimej. Miyekej melak nomojtiaj ijkuak kinemiliaj ika nonekis tenojnotsaskej. Ika yejon, melak noneki matikinpaleuikan kuajli makasikamatikan tlen temachtia Biblia niman ijkon uelis chikauak kipiyaskej intlaneltokil. Ijkon, yejuamej melak kinekiskej tenojnotsaskej. ¿Kenon más uelis tikinpaleuiskej makinekikan matenojnotsakan?
7. ¿Kenon uelis tikpaleuiskej akin tikmachtiaj makineki tenojnotsas?
7 Kanaj uelis tiktlajtoltiskej akin tikmachtiaj: “¿Kenon yomitspaleui tlen yotiuel ipan Biblia? ¿Tiknemilia ika oksekimej noijki noneki kimatiskej tlen kijtoua Biblia? ¿Kenon uelis tikinpaleuis?” (Prov. 3:27; Mat. 9:37, 38). Matikititikan seki tratados tlen ika titemachtiaj niman matiktlajtoltikan katlejua kinemilia ika kuelitaskiaj kipouaskej ichanejkauan, iamigos noso akin imiuan tekiti. Matikmakakan yejon tratados niman matikititikan kenon uelis kintemakas. Niman, ijkuak yejua peuas tenojnotsas iuan tlanechikojli, ok nonekis tikmajmachtijtoskej kenon kichiuas yejuin tekitl (Ecl. 4:9, 10; Luc. 6:40).
¿KENON TLANECHIKOJLI UELIS KINPALEUIS AKIN KEMACH NOMACHTIJTOKEJ?
8. ¿Tleka melak noneki matikpaleuikan akin tikmachtiaj makitlasojtla toTajtsin niman noijki oksekimej? (Noijki xkita recuadro “ ¿Kenon tikpaleuiskej tonomachtijkauj más makitlasojtla toTajtsin?”).
8 Matikilnamikikan ika Jesús okijto ika noneki tikinmachtiskej oksekimej makitlakamatikan nochi tlen yejua otlanauati. Yejuin kijtosneki ika noijki noneki tikimititiskej yejon ome tlanauatiltin tlen más ueyi kijtosnekij, kampa kijtoua ika noneki tiktlasojtlaskej toTajtsin niman noijki oksekimej (Mat. 22:37-39). Yejuin ome tlanauatiltin kipaleuiskej akin tikmachtiaj matenojnotsa. Xkipiya ika techmojkatlachialtis tla sekimej akin tikinmachtiaj nomojtiaj ijkuak kinemiliaj ika nonekis tenojnotsaskej. San ika, uelis tikimijliskej ika Jehová kinpaleuis maka makinmakasikan tlaltikpakchanejkej (Sal. 18:1-3; Prov. 29:25). Yejuin tlamachtijli kipiya se recuadro tlen techijlia kenon tikititiskej tonomachtijkauj más makitlasojtla toTajtsin. Nochi tlanechikojli uelis kinpaleuiskej akin kemach nomachtijtokej Biblia más matetlasojtlakan. Matikitakan kenon uelis kichiuaskej.
9. ¿Tlenon uelis kipaleuis akin kemach nomachtijtika tlanejnemiltis?
9 Oksejpa matikonnemilikan ika yakaj tikmajmachtijtokej makinejnemilti carro. Chika yejua tlanejnemiltia ipan carretera, tejuamej tiauej inakastlan niman tikijlijtiuej tlenon noneki kichiuas. San ika, xsan yejon, noijki tikijliaj makita kenon oksekimej tlanejnemiltiaj. Kanaj tikijliaj makita kenon yakaj melak tetlakaita pampa kikauilia mapano okse carro. Noso kanaj tikititiaj kenon yakaj kitemoltilia iluces icarro niman ijkon xkimixkuilis okseki carros. Nochi yejuin melak kipaleuis kuajli matlanejnemilti.
10. ¿Tlenon kipaleuis akin kemach nomachtijtika Biblia más machikaui itlaneltokil?
10 Noijki ijkon, se akin kemach yopeuj nomachtia Biblia xsan ueli itech akin kimachtia, noijki ueli intech oksekimej iteixpantijkauan Jehová. Ika yejon, melak noneki mauiya tlanechikoltin. Tlen ompa kikakis kipaleuis más makimati tlen kijtoua Biblia, más machikaui itlaneltokil niman más makitlasojtla toTajtsin (Hech. 15:30-32). Niman xsan yejon, akin kimachtia noijki uelis kipaleuis makimixmati oksekimej tokniuan akin uelis kiyolchikauaskej. Akin kemach yopeuj nomachtia uelis kitas kenon tokniuan kiteititiaj ika kitlasojtlaj Jehová niman oksekimej.
11. ¿Tleka tikijtouaj ika tlen kichiuaj tokniuan uelis kinpaleuis akin kemach nomachtijtokej?
11 Matitlanemilikan itech yejuin. Se nantli akin kemach nomachtijtika niman san iselti kimiskaltia ikoneuan kita ika se tokniuj noijki kixnamiktika tlen ouijtika ijkon ken yejua. Melak kiyolchikaua kitas ika yejon tokniuj nokojtilia kinuikas ikoneuan ipan Kajli kampa tosentlaliaj. Se tlakatl akin kemach nomachtijtika niman nokojtilijtika kikajkauas ika pokis, kixmati se tokniuj akin okixnamik tlen yejua kixnamiktika. Tokniuj kijlia yejuin tlakatl ika ouel okikajkauj ika poki niman ouel okitlakamat tlen kijtoua Biblia pampa onokojtili más kitlasojtlas Jehová (2 Cor. 4:7; 7:1). Sakin ika tokniuj kijlia nochi tlen okipaleui makikajkaua yejon vicio niman ika yejua noijki uelis kikajkauas, yejon tlakatl akin kemach nomachtijtika melak noyolchikaua. Niman se ichpochtli kita ika se tokniuj ichpochtli melak yolpaki pampa kitekichiuilia Jehová. Yejuin kichiua ika on ichpochtli makineki kimatis tleka yolpaki.
12. ¿Tleka tikijtouaj ika tinochimej ipan tlanechikojli uelis tikpaleuiskej akin kemach nomachtijtika Biblia?
12 Ijkuak akin kemach nomachtijtika Biblia kimixmati tokniuan akin yolmelajkanemij, ueli kita kenon yejuamej kitlasojtlaj toTajtsin niman noijki oksekimej, ijkon ken Cristo otechnauati matikchiuakan (Juan 13:35; 1 Tim. 4:12). Ijkon ken yotikijtojkaj, akin kemach nomachtijtika Biblia uelis noyolchikauas ijkuak kimixmatis tokniuan akin kixnamiktokej tlen ouijtika ijkon ken yejua. Yejuin kipaleuis makita ika kema uelis nopatlas niman ijkon nochiuas inomachtijkauj Cristo (Deut. 30:11). Kuajli tikitaj ika tinochimej ipan tlanechikojli uelis tikpaleuiskej akin kemach nomachtijtika Biblia (Mat. 5:16). Kuakon matotlajtoltikan: “¿Ninokojtilijtika nikinyolchikauas akin yopeuj uajlauej tlanechikojli?”.
MATIKINPALEUIKAN AKIN XOK TENOJNOTSAJ OKSEJPA MATENOJNOTSAKAN
13, 14. ¿Tlenon okichiuj Jesús ijkuak inomachtijkauan noyolajmanayaj?
13 Tiknekij tikinpaleuiskej tokniuan akin youejkaujkej xok tenojnotsaj oksejpa touan matenojnotsakan niman matemachtikan. Matikitakan kenon Jesús okinyolchikauj iapóstoles ijkuak noyolajmanayaj. Yejuin techpaleuis matikmatikan kenon tikinpaleuiskej tokniuan.
14 Ijkuak ikimiktiskiaj Jesús, “inomachtijkauan [...] okajtejkej, niman ochojcholojkej” (Mar. 14:50; Juan 16:32). ¿Tlenon okichiuj Jesús ijkuak inomachtijkauan noyolajmanayaj? Matikitakan tlenon okichiuj ijkuak san kemach yoyoliujka. Okomintitlan sekimej siuamej akin inomachtijkauan katkaj makimijlitij iapóstoles ika yoyoliujka. Yejua okimijli: “Maka xmomojtikan. Xuiyan, xkinmachistitij nokniuan” (Mat. 28:10a). Maski iapóstoles okitlalkauijkaj, Jesús xokintlalkaui, yejua ok kimijliaya “nokniuan”. Jesús oteikneli niman otetlapopolui ijkon ken Jehová kichiua (2 Rey. 13:23).
15. ¿Tlenon tiknekij tikchiuaskej inpampa akin youejkaujkej xok tenojnotsaj, niman tleka?
15 Tejuamej noijki tiknekij tikinpaleuiskej akin xok tenojnotsaj. Yejuamej ok tokniuan niman melak tikintlasojtlaj. Xtikilkauaj ika yeuejkaui chikauak okitekichiuilijkej Jehová. Sekimej itech yejuin tokniuan melak ouejkaujkej chikauak okitekichiuilijkej Jehová (Heb. 6:10). Melak tiknekij oksejpa touan manemikan (Luc. 15:4-7). ¿Kenon uelis tikchiuaskej ken Jesús niman ijkon tikinpaleuiskej yejuin tokniuan?
16. ¿Kenon tikimititiaj tokniuan akin youejkaujkej xok tenojnotsaj ika tiknekij tikinpaleuiskej?
16 Matikinyolchikauakan mauiyan tlanechikoltin. Pampa Jesús kimatiya ika iapóstoles noyolajmantoyaj, okimijli san sekan manosentlalikan (Mat. 28:10b; 1 Cor. 15:6). Aman, tejuamej noijki uelis tikinyolchikauaskej tokniuan akin youejkaujkej xok tenojnotsaj mauiyan tlanechikoltin. Maka matikilkauakan ika kanaj nonekis miyekpa tikimijliskej niman ijkon kinekiskej yaskej. Kuajli tikmatstokej ika Jesús oyolpak ijkuak okitak ika inomachtijkauan san sekan onosentlalijkej, niman tejuamej noijki uelis ijkon tomachiliskej (uelis tikitas Mateo 28:16 niman Lucas 15:6).
17. ¿Tlenon noneki tikchiuaskej tla se tokniuj akin youejkauj xok tenojnotsa uajlauj ipan tlanechikojli?
17 Kuajli matikinselikan. Jesús okichiuj kuajli manomachilikan inomachtijkauan pampa ijkuak imiuan onosentlali, yejua okinnisiui niman imiuan otlajtlajto (Mat. 28:18). Niman tejuamej, ¿tlenon tikchiuaskej tla tikitaj ika se tokniuj akin youejkauj xok tenojnotsa uajlauj ipan Kajli kampa tosentlaliaj? Noneki tiknisiuiskej niman kuajli tikseliskej. Kanaj ijkuak tikitaskej xtikmatiskej tlenon tikijliskej. San ika, maka matajmanakan, kanaj san uelis tikijliskej ika tlakaitalistli ika tiyolpakij tikitaskej.
18. ¿Kenon uelis tikinyolchikauaskej akin youejkaujkej xok tenojnotsaj?
18 Matikinyolchikauakan. Kanaj inomachtijkauan Jesús nomojtiayaj ijkuak kinemiliayaj ika nonekiya tenojnotsaskej ipan nochi tlaltikpaktli. Ika yejon, Jesús okinyolseui niman okimijli: “Mojmostla nemouan ninemi” (Mat. 28:20, TNM). Yejuin melak okinyolchikauj pampa sakin “xkajkauayaj ika temachtiayaj niman tenojnotsayaj” (Hech. 5:42). Tokniuan akin youejkaujkej xok tenojnotsaj noijki kinekij yakaj makinyolchikaua. Kanaj nomojtiaj ijkuak kinemiliaj ika oksejpa peuaskej tenojnotsaskej. Uelis tikinyolseuiskej tla tikimijliaj ika xsan inselti noneki tenojnotsaskej niman ika uelis imiuan tikisaskej ijkuak kimachiliskej ika iuelis tenojnotsaskej. Yejuamej melak yolpakiskej tla ijkon tikinpaleuiyaj. Tla tikimititiaj ika tikimitaj ken tokniuan, kanaj yejuamej oksejpa kinekiskej tenojnotsaskej, niman nochi tlanechikojli yolpakis.
MATITLAMIKAN TEKITL TLEN JESÚS OTECHNAUATI
19. ¿Tlenon melak tiknekij tikchiuaskej, niman tleka?
19 ¿Hasta kemanon xok nonekis titemachtiskej? Hasta ijkuak kipopoloskej tlen xkuajli ipan tlaltikpaktli (Mat. 28:20, TNM; xkita glosario, “conclusión del sistema”). ¿Uelis tikchiuaskej yejuin tekitl hasta ijkuak yejkos yejon tonajli? ¡Yejon tlen tiknekij tikchiuaskej! Ika toyojlo tijkuij totiempo, tokojtilis niman totomin niman ijkon tikintejtemoskej akin kinekij “kipiyaskej nemilistli tlen xkeman tlamis” (Hech. 13:48, TNM). Tikchiuaj ijkon ken Jesús, akin okijto: “Nikchiua tlen kineki on yejuan onechajtitlan para nitlamis itekiu. Yejua ika tej, in tekitl sano ijki ken notlakual” (Juan 4:34; 17:4). Melak tiknekij titlamiskej yejuin tekitl tlen yotechmakakej (Juan 20:21). Niman tiknekij ika nochimej tokniuan, noijki akin youejkaujkej xok tenojnotsaj, touan makichiuakan yejuin tekitl hasta ijkuak titlamiskej (Mat. 24:13).
20. Itech tlen kijtoua 2 Corintios 4:7, ¿tleka tikijtouaj ika uelis tikchiuaskej tlen Jesús otechnauati?
20 Melauak ika sajnoye ueyi on tekitl tlen Jesús otechnauati. San ika, xtoselti tinemij pampa Jesús okijto ika touan nemiskia. Ijkuak titenojnotsaj niman titemachtiaj, titekitij iuan toTajtsin niman iuan Cristo (1 Cor. 3:9; 2 Cor. 2:17). Kuakon, kema uelis tikchiuaskej yejuin tekitl. Techyolpaktia ika toTajtsin techkauilia matikchiuakan yejuin tekitl niman matikinpaleuikan oksekimej noijki ijkon makichiuakan (xpoua 2 Corintios 4:7).
TLAKUIKAJLI 79 Xkinmachti mayolmelajkej itech intlaneltokil
^ párr. 5 Jesús okimijli inomachtijkauan makinmachtikan oksekimej niman makimititikan kenon kitlakamatiskej nochi tlen yokinnauatijka. Ipan yejuin tlamachtijli, tikitaskej kenon tikchiuaskej tlen okijto Jesús. Seki tlen nikan tomachtiskej otikitakaj ipan La Atalaya del 1 de julio de 2004, páginas 14-19.
^ párr. 1 Mateo 28:18-20: “18 Jesús ononisiui niman okimijli: ‘Nochi tlanauatijkayotl yonechmakakej ipan iluikak niman ipan tlaltikpaktli. 19 Xuiyan niman xkinmachtikan tlaltikpakchanejkej ipan nochi kalpamej, xkinapolaktikan ipampa itoka toTajtsin niman ipampa teKoneuj niman ipampa espíritu santo, 20 xkinmachtikan makitlakamatikan nochi tlajtlamach tlen yonimechnauati. Niman, ¡xkitakan!, mojmostla nemouan ninemi hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli’”.
^ párr. 67 TLEN NESI IPAN TLAIXKOPINAJLI: Se tokniuj siuatl kijlia akin kimachtijtika tlenon noneki kichiuas niman ijkon más kitlasojtlas toTajtsin. Sakin, inomachtijkauj kichiua yejon yeyi tlemach tlen kijliaj.
