1. Ia Mataio 28:18-20, ko e heigoa ne poaki e Iesu?

HE MOLE e liu tu mai a Iesu he mate, ne tū atu a ia ke he tau tutaki haana ne fakapotopoto i Kalilaia. Fai mena aoga a ia ke tala age ki a lautolu. Ko e heigoa e mena ia? Moua e tau kupu haana ia Mataio 28:18-20.​—Totou.

2. Ko e heigoa e tau hūhū ka fakatutala a tautolu ki ai?

² Ko e poaki ha Iesu ke taute tutaki kua aoga foki ke he tau fekafekau takitaha he Atua mogonei. Ko e mena ia, kia fakatutala a tautolu ke he tolu e hūhū ne matutaki ke he kotofaaga ne foaki mai e Iesu ki a tautolu. Fakamua, lafi ke he fakaako e tau puhala he Atua ke he tau tutaki foou, ko e heigoa ha tautolu kua lata ke taute? Uaaki, maeke fēfē e tau tagata fakailoa oti he fakapotopotoaga ke lafi ke he tupuaga fakaagaaga he tau tagata fakaako Tohi Tapu? Toluaki, maeke fēfē a tautolu ke lagomatai e tau matakainaga nakai gahuahua fakaagaaga ke liu fai vala he gahua taute tutaki?

3. Ko e heigoa e tau fakaakoaga pauaki ne putoia e Iesu he poakiaga haana?

³ Maaliali e tau fakaakoaga ha Iesu. Lata a tautolu ke fakaako e tau tagata ke he tau mena ne poaki e ia. Ka e ua nimo e tautolu e manatu uho. Nakai pehē a Iesu: ‘Fakaako ki a lautolu e tau mena oti ne poaki atu e au.’ Ka e pehē a ia: Fakaako ki a lautolu ke “omaoma ke he tau mena oti ne tala atu e au kia mutolu.” Ke fakaaoga e fakaakoaga pauaki ia ka fakaako e tagata fakaako Tohi Tapu, lata a tautolu ke eke mo tau faiaoga mo e fakakite age e puhala ki a lautolu. (Gahua 8:31) Ko e ha ne pihia ai?

4. Ko e heigoa e kakano ke omaoma ke he poaki? Fakatai.

⁴ Maeke fēfē a tautolu ke fakaako e taha ke omaoma e tau  mena oti ne poaki he Keriso? Manamanatu ke he fakatai nei. Fakaako fēfē he faiaoga fakaako fakaholo motokā e tau tagata fakaako haana ke omaoma ke he tau matafakatufono he puhalatū? Lata e faiaoga ke fakaako fakamua e tau matafakatufono he puhalatū. Ka e ke fakaako e tau tagata fakaako haana ke he puhala ke omaoma e tau matafakatufono ia, lata a ia ke taute taha lakaaga foki. Lata a ia ke fano mo e tagata fakaako mo e fakakite ki a ia e puhala ke fakaholo he puhalatū mo e fakagahua e tau mena ne fakaako e ia. Ko e heigoa ka fakaako e tautolu mai he fakataiaga ia?

5. (a) Ia Ioane 14:15 mo e 1 Ioane 2:3, ko e heigoa ka fakaako e tautolu ke he tau tagata fakaako Tohi Tapu ke taute? (e) Talahau e tau fakatai ke he puhala ka takitaki e tautolu e tau tagata fakaako ha tautolu.

⁵ Ka fakaako e tautolu e Tohi Tapu mo e falu, fakaako e tautolu a lautolu ke he tau mena ne manako e Atua ki a tautolu. Ka e lahi atu foki e mena ha tautolu ke taute. Lata a tautolu ke fakaako e tau tagata fakaako Tohi Tapu ke fakagahua e tau mena ne fakaako e lautolu he tau momoui ha lautolu he tau aho takitaha. (Totou Ioane 14:15; 1 Ioane 2:3.) Ha ko e fakafifitakiaga ha tautolu, maeke a tautolu ke fakakite ke he tau tagata fakaako e puhala ke fakagahua e tau matapatu fakaakoaga he Tohi Tapu he aoga, gahua, po ke fakafiafiaaga. Tala age e tautolu e mena ne tupu he tau momoui ha tautolu ke fakakite ki a lautolu e puhala ke fakagahua e fakaakoaga he Tohi Tapu ne puipui a tautolu mai he hagahagakelea po ke lagomatai a tautolu ke taute e fifiliaga pulotu. Ka haia mo e tau tagata fakaako ha tautolu, maeke a tautolu ke liogi ki a Iehova mo e ole ke he agaaga tapu ke takitaki a lautolu.​—Ioane 16:13.

6. Ko e heigoa kua putoia he fakaako e falu ke omaoma ke he tau poakiaga ha Iesu?

⁶ Ko e heigoa kua putoia he fakaako e falu ke omaoma ke he tau poakiaga ha Iesu? Lata a tautolu ke lagomatai e tau tagata fakaako Tohi Tapu ha tautolu ke feaki e manako ke taute tutaki. Ma e falu tagata fakaako, ko e manatu ke taute e gahua fakamatala kua liga hopoate. Ti lata a tautolu ke fakauka he foaki fakahaga e tau fakatonuaga ki a lautolu ti fakahokulo e fakamaamaaga, ke hokotia ke he tau loto mo e omoomoi a lautolu ke taute ai. Ti ko e heigoa e puhala ha tautolu ke lagomatai e tau tagata fakaako ke feaki e manako ke fakamatala e tala mitaki ke he falu?

7. Lagomatai fēfē e tautolu e tagata fakaako ke feaki e manako ke fakamatala e tala mitaki ke he falu?

⁷ Liga hūhū e tautolu e tau hūhū ke he tau tagata fakaako Tohi Tapu ha tautolu tuga anei: “Fēfē e puhala kua holo ki mua e moui haau he fakagahua e mena ne fakaako he Tohi Tapu? Manatu nakai a koe kua lata e falu ke logona e fekau nei? Ko e heigoa haau ka taute ke lagomatai a lautolu?” (Fakatai 3:27; Mata. 9:37, 38) Fakakite ke he tagata fakaako e tau tuleke ne haia he Puha Koloa Fakaako ha tautolu ti fakaatā a ia ke fifili e tau tuleke kua manatu a ia kua fiafia e tau magafaoa, tau kapitiga, po ke tau tagata gahua haana ki ai. Age e tau tuleke loga nei ke he tagata fakaako. Fakamahani ke fakaako a ia ke foaki e tuleke he puhala totonu. Ka mole e talia e tagata fakaako ke eke mo tagata fakailoa nakaila papatiso, to manako a tautolu ke ha ha he faahi haana ke lagomatai a ia.​—Fakama. 4:9, 10; Luka 6:40.

8. Ko e ha kua aoga ma e tau tagata fakaako ke feaki e fakaalofa lahi ma e Atua mo e katofia? (Kikite foki e puha “ Fakahokulo e Fakaalofa he Tau Tagata Fakaako Tohi Tapu ma e Atua.”)

⁸ Kia tokaloto kua fakaako e Iesu a tautolu ke fakaako e falu ke “omaoma ke he tau mena oti” ne poaki e ia. Putoia mooli ai ua e poakiaga lalahi, ke fakaalofa ke he Atua mo e ke fakaalofa ke he katofia ne matutaki tata ke he gahua fakamatala mo e taute tutaki. (Mata. 22:37-39)  Ko e heigoa e matutakiaga? Ko e kakano uho he fai vala ke he gahua fakamatala ko e fakaalofa ke he Atua mo e fakaalofa ke he katofia. Ma e falu tagata fakaako Tohi Tapu ko e manatu ke fai vala he gahua fakamatala ne liga fakamatakutaku. Ka e fakamafana e tautolu e tau tagata fakaako pihia to lagomatai e Iehova a lautolu ke kautū fakahaga ke he matakutaku tagata. (Sala. 18:1-3; Fakatai 29:25) Ko e puha ne matutaki mo e vala tala nei kua fakamaama e tau lakaaga ka taute e tautolu ke lagomatai e tagata fakaako ke tupu e fakaalofa haana ke he Atua. Lafi ki ai, ko e heigoa he fakapotopotoaga ka taute ke lagomatai e tau tutaki foou ke tupu he fakakite e fakaalofa?

9. He fakatai ke he tagata fakaako fakaholo, ko e heigoa e tau puhala aoga kua fakaako he tagata fakaako?

⁹ Liu ke manamanatu ke he fakatai he tagata fakaako fakaholo. He fakaholo a ia he puhalatū mo e faiaoga he faahi haana, he tau puhala fe kua fakaako e tagata fakaholo? He fanogonogo ke he haana faiaoga mo e mailoga e falu tagata fakaholo mitaki. Tuga anei, liga fakakite age he faiaoga e tagata fakaholo ne totonu he fakaatā e taha tagata fakaholo ke hau ki mua haana he puhalatū. Po ke liga fakakite age he faiaoga e tagata fakaholo ne totonu he fakatote hifo e maama he tau molī haana ke mukamuka e falu tagata fakaholo ke kitia. Ko e tau fakafifitakiaga pihia kua fakaako ki a ia e tau fakaakoaga aoga ka fakagahua e ia ka fakaholo.

10. Ko e heigoa ka lagomatai e tagata fakaako Tohi Tapu ke holo ki mua fakaagaaga?

¹⁰ Pihia foki, ko e tagata fakaako Tohi Tapu kua kamata ke fekafekau ki a Iehova kua fakaako mai he faiaoga haana mo e tau fakafifitakiaga mitaki he falu fekafekau ha Iehova. Ko e mena ia, ko e heigoa ka lagomatai lahi e tau tagata fakaako Tohi Tapu ke holo ki mua fakaagaaga? Ko e o atu ke he tau feleveiaaga Kerisiano ha tautolu. Ko e ha? Ko e fakaakoaga faka-Tohi Tapu he tau feleveiaaga ka fakahokulo e iloilo, fakamalolō e tua, mo e lagomatai ke tupu e fakaalofa ha lautolu ke he Atua. (Gahua 15:30-32) Pihia foki, maeke e faiaoga Tohi Tapu he tau feleveiaaga ke fakafeleveia e tagata fakaako ke he tau matakainaga ne liga tatai lahi mo ia. To kitia he tagata fakaako e tau fakafifitakiaga mitaki he fakaalofa he tau matakainaga he fakapotopotoaga. Manamanatu ke he tau mena nā ne tupu.

11. Ko e heigoa e tau fakafifitakiaga ne liga mailoga he tagata fakaako he fakapotopotoaga, ti lauia fēfē ke he tagata fakaako?

¹¹ Ko e tagata fakaako Tohi Tapu ko e matua tokotaha kua mailoga e matakainaga fifine Kerisiano he tuaga pihia foki. Kua aamotia e loto he tagata fakaako ke kitia e lahi he laliaga he matakainaga fifine he hau ke he Fale he Kautu mo e tau fanau ikiiki haana. Ko e tagata fakaako ne taufetului ke oti e ula ne feleveia mo e tagata fakailoa ne taufetului pihia ka kua kautū mogonei. Tala age he tagata fakailoa ke he tagata fakaako ko e tupu he fakaalofa haana ki a Iehova ne omoomoi a ia ke omaoma e tau poakiaga he Atua. (2 Kori. 4:7; 7:1) He mole e fanogonogo ke he tala he tagata fakailoa, lahi e mauokafua he tagata fakaako ha kua fakamafana he matakainaga, “Maeke foki a koe ke oti e ula.” Ko e fifine fuata ko e tagata fakaako ne mailoga e matakainaga fifine fuata kua fiafia mooli e moui he eke mo Fakamoli. Ko e mena ne mailoga he tagata fakaako Tohi Tapu hagaao ke he matakainaga fifine fuata ko e tuaga fiafia ti taute he mena ia a ia ke fakaako fakalahi hagaao ke he kakano ne tuga kua fiafia tumau e matakainaga fifine.

12. Ko e ha kua talahau e tautolu kua igatia e tau tagata i loto he fakapotopotoaga mo e matagahua ke lagomatai e tau tagata fakaako Tohi Tapu?

¹² Ka iloa he tau tagata fakaako Tohi Tapu e tau matakainaga fakamooli kehekehe, fakaako mai e tau tagata fakaako he tau  fakafifitakiaga ha lautolu ke omaoma ke he poakiaga he Keriso ke fakaalofa ke he Atua mo e katofia. (Ioane 13:35; 1 Timo. 4:12) Tuga kua fitā he talahau, fakaako mai e tagata fakaako Tohi Tapu he tau tagata fakailoa ne fehagai mo e tau paleko tuga he tagata fakaako. Ti fakaako mai e tagata fakaako he tau fakafifitakiaga pihia na maeke a ia ke taute e tau hikiaga kua lata a ia ke eke mo tutaki he Keriso. (Teu. 30:11) Ko e tau tagata oti he fakapotopotoaga ka lagomatai ke he tau puhala kehekehe ke holo fakaagaaga ki mua he tau tagata fakaako Tohi Tapu. (Mata. 5:16) Ko e heigoa e tau laliaga kua maeke ni ia koe ke fakamafana e tau tagata fakaako Tohi Tapu ne o mai ke he tau feleveiaaga?

13-14. Fehagai fēfē a Iesu mo e tau aposetolo loto tupetupe haana?

¹³ Manako a tautolu ke lagomatai e tau matakainaga kua nakai gahuahua fakaagaaga ke liu fai vala he matagahua he taute tutaki he Keriso. Ko e puhala ne fehagai a Iesu mo e tau aposetolo loto tupetupe haana kua fakakite e mena ka taute e tautolu mogonei.

¹⁴ He matahiku he fekafekauaga ha Iesu he lalolagi ato mate a ia, ko e tau aposetolo kua “tiaki ai e lautolu oti a ia, ka e fehola.” (Mare. 14:50; Ioane 16:32) Fehagai fēfē a Iesu mo e tau aposetolo haana he magaaho kū ne lolelole a lautolu? Nakai leva e liu tu mai ha Iesu, tala age a ia ke he falu he tau tutaki haana: “Ua matakutaku a mua, ati o a, ke talahau atu e mua ke he haku a tau matakainaga [kua fakaliu tu mai au].” (Mata. 28:10a) Nakai tiaki e Iesu e tau aposetolo haana. Pete kua tiaki e lautolu a ia, ne fakahigoa agaia e ia a lautolu ko e “haku a tau matakainaga.” Tuga a Iehova, ne fakaalofa hofihofi noa mo e fakamagalo atu a Iesu.​—2 Patu. 13:23.

15. Fēfē e logonaaga ha tautolu ki a lautolu kua nakai liu gahua fakamatala?

¹⁵ Pihia foki, hokulo e logonaaga ha tautolu ki a lautolu ne kua oti e gahua fakamatala. Ko lautolu ko e tau matakainaga ha tautolu, ti fakaalofa mooli a tautolu ki a lautolu! Manatu agaia e tautolu e tau gahua mitaki ne taute he tau matakainaga ia he magaaho fakamua, falu liga ke he tau tau loga kua mole. (Hepe. 6:10) Misi mooli e tautolu a lautolu! (Luka 15:4-7) He muitua ki a Iesu, ko e tau puhala fe ka fakakite e tautolu kua manamanatu a tautolu ki a lautolu?

16. Fakakite fēfē e tautolu kua manamanatu a tautolu ke he tau matakainaga nakai gahuahua ha tautolu?

¹⁶ Uiina mafanatia a lautolu. Taha puhala kua fakamafana e Iesu e tau aposetolo loto tupetupe haana he uiina a lautolu ke he feleveiaaga. (Mata. 28:10e; 1 Kori. 15:6) Pihia foki mogonei, fakamafana e tautolu a lautolu ne nakai gahuahua ke o mai ke he tau feleveiaaga he fakapotopotoaga ka nakaila taute pihia e lautolu. Mailoga e tautolu kua liga lata ke lagaloga e uiina ki a lautolu ato talia ai. Fiafia mooli a Iesu he talia he tau tutaki e uiina haana.​—Fakatatai Mataio 28:16 mo e Luka 15:6.

17. Ko e heigoa ha tautolu kua lata ke taute ka hau e matakainaga nakai gahuahua he feleveiaaga?

¹⁷ Fakafeleveia mai he loto a lautolu. Fakafeleveia fakamitaki e Iesu e tau tutaki haana he mogo ne feleveia a lautolu; ne vagahau fakamua a Iesu ki a lautolu. (Mata. 28:18) Ko e heigoa ha tautolu ka taute ka hau e matakainaga nakai gahuahua ke he Fale he Kautu? Lata a tautolu ke o atu ke fakafeleveia mafanatia fakamua a ia. Ke kamata aki, liga tupetupe a tautolu to nakai iloa e tautolu e mena ke talahau. Ka e he nakai fakafuafua kelea a ia, maeke a tautolu ke talahau kua fiafia a tautolu he kitia a ia.

18. Fakamafana fēfē e tautolu e tau matakainaga nakai gahuahua?

¹⁸ Fakamafana fakamooli a lautolu. Liga  tupetupe lahi e tau tutaki ha Iesu he poakiaga ke fakamatala ke he lalolagi oti. Fakamafana e Iesu e tau tutaki haana he pehē: “To fakalataha au mo mutolu ke he tau aho oti.” (Mata. 28:20) Lagomatai nakai e puhala haana? Ē. Nakai leva ti lavelave a lautolu he ‘fakaako atu mo e fakamatala atu e tala mitaki.’ (Gahua 5:42) Lata foki e tau matakainaga fakailoa nakai gahuahua ke fakamafana. Liga tupetupe lahi a lautolu he manatu ke liu fakamatala. Fakamafana e tautolu a lautolu to nakai fakamatala tokotaha a lautolu. Ka mautali a lautolu, maeke a tautolu ke gahua fakamatala mo lautolu. Loto fakaaue mooli a lautolu ke he lalagoaga ha tautolu he kamata a lautolu ke liu fakamatala e tala mitaki. Ka onoono mo e fehagai a tautolu ki a lautolu kua nakai gahuahua ko e tau matakainaga ha tautolu, to kitia e tautolu e tau fua mitaki he fakapotopotoaga.

19. Ko e heigoa e manako mooli ha tautolu, ti ko e ha?

¹⁹ Fiha e leva he matutaki a tautolu ke taute tutaki? Ato hoko e moumouaga he fakatokaaga nei. (Mata. 28:20) To maeke nakai a tautolu ke fakamooli e vala nei he poakiaga ha Iesu? Eketaha mooli a tautolu ke taute pihia! Fiafia a tautolu ke foaki e magaaho, malolō, mo e tau koloa ke kumi a lautolu ‘kua lata mo e moui tukulagi.’ (Gahua 13:48) Ka taute e mena nei, kua muitua e tautolu e fakafifitakiaga ha Iesu. Pehē a ia: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34; 17:4) Ko e manako mooli foki ha tautolu anei. Manako a tautolu ke fakaoti e gahua ne tuku mai ki a tautolu. (Ioane 20:21) Ti manako a tautolu ke he falu, putoia e tau matakainaga nakai gahuahua ke tumau ke taute e gahua nei mo tautolu.​—Mata. 24:13.

20. Ia 2 Korinito 4:7, ko e ha kua maeke a tautolu ke fakakatoatoa e gahua ne poaki e Iesu ke taute e tautolu?

²⁰ Nakai mukamuka ke taute e poakiaga ha Iesu. Ka e nakai taute e tautolu hoko tautolu e gahua nei. Mavehe a Iesu to fakalataha a ia mo tautolu. Ka taute tutaki, ko e “tau ekegahua a [t]autolu fakalataha mo e Atua” mo e Keriso. (1 Kori. 3:9; 2 Kori. 2:17) Ko e mena ia kua maeke ia tautolu ke fakakatoatoa ai. Ko e lilifu mo e fiafia mooli ke taute e kotofaaga nei mo e lagomatai e falu ke taute pihia foki!​—Totou 2 Korinito 4:7.