1. UJesu watjela abafundi bakhe bona benzeni ngokomtlolo kaMatewu 28:18-20?

NGEMVA kobana uJesu avusiwe, wabonakala kubalandeli bakhe ebebahlangene eGalile. Bekunento eqakathekileko afuna ukubatjela yona. Khuyini ebekafuna ukubatjela yona? Amezwi lawo asemtlolweni kaMatewu 28:18-20.​—Ufunde.

2. Ngimiphi imibuzo esizokucoca ngayo?

² Umlayezo uJesu awunikela abafundi bakhe usasebenza neenkhonzini zakaZimu namhlanjesi. Yeke, akhesicabange ngemibuzo emithathu emalungana nesabelo uJesu asinikele sona. Wokuthoma, ngaphezu kwalokho uZimu akulindele kithi njengabafundi abatjha, khuyini ekufuze sikwenze? Kwesibili, abatjhumayeli ebandleni bangasifaka njani isandla ekuthuthukeni komfundi weBhayibheli? Kwesithathu, singabasiza njani, esikholwa kunye nabo abangasayi esimini nesifundweni bona bathome godu batjhumayele?

3. Ngisiphi isinqophiso esikhanyako uJesu asinikela abalandeli bakhe?

³ Iinqophiso zakaJesu ziyakhanya, kufuze sifundise abantu izinto asifundise zona. Kodwana nanyana kunjalo, akukafuzi silibale amaphuzu aqakathekileko. UJesu akhenge athi, ‘Nibafundise enginiyale ngakho.’ Kunalokho uthe, nibafundise “ukwenza koke enginiyale ngakho.” Nasilalela isinqophiso sakaJesu, sizokufundisa abantu esifunda nabo, bona khuyini ekufuze bayenze, sibuye sibafundise nokuthi bangakwenza njani lokho. (IzE. 8:31) Kubayini kufuze senze njalo?

4. Kutjho ukuthini ukwenza koke oyalwe ngakho? Nikela isibonelo.

 ⁴ “Ukwenza koke” uJesu asiyale ngakho kutjho ukumlalela. Nasizakufanekisa bona mumuntu onjani owenza koke namkha olalela umyalo kaJesu Krestu, akhesicabange ngesibonelo esilandelako: Umuntu ofundisa abantu ukutjhayela ubafundisa njani bona batjheje imithetho yendlela? Kokuthoma umfundisi angaveza yoke imithetho ekumbeni yokufundela, kodwana nakazakufundisa abafundi bona bayilandele njani imithetho, kuzokufuze athathe elinye igadango. Kuzokufuze akhambe nabafundabo abanqophise njengombana batjhayela endleleni enemithetho neenkoloyi ezinengi. Angabasiza benze njengombana abafundisile. Khuyini esingayifunda esibonelwenesi?

5. (a) Ngokomtlolo kaJwanisi 14:15; neyoku-1 kaJwanisi 2:3, khuyini ekufuze siyifundise abantu esifunda nabo iBhayibheli? (b) Nikela iimbonelo zeendlela ekufuze sinqophise ngazo abantu esifunda nabo.

⁵ Nasifunda iBhayibheli nabantu, siyabafundisa bona yini uZimu uyilindele kibo. Kodwana kufuze senze okungeziweko, kufuze sibafundise ukuphila ngalokho abakufunda eBhayibhelini. (Funda uJwanisi 14:15; yoku-1 kaJwanisi 2:3.) Singabuye sibafundise ngesibonelo sethu bona bangakghona njani ukuphila ngeenkambiso zeBhayibheli esikolweni, emsebenzini nalokha nabazithabisako. Singabuye sibacocele ukuthi ukuphila ngeenkambiso zakaZimu kusivikele njani eengozini nokuthi kusisize njani sathatha iinqunto ezivuthiweko. Singathi nasinabantu esifunda nabo iBhayibheli, sithandaze sibawe ummoya ocwengileko bona ubasize.​—Jwa. 16:13.

6. Khuyini ebandakanyekileko ekufundiseni abanye bona benze koke uJesu asiyale ngakho?

⁶ Khuyini ebandakanyekileko nasifundisa abantu ukwenza koke uJesu asiyale ngakho? Kufuze sisize abantu esifunda nabo iBhayibheli bafise ukwenza abafundi. Kabanye abantu ukutjhumayela kungaba yinto ethusako, kufuze sibabekezelele njengombana sibanikela iinqophiso kancanikancani ezizobasiza bazwisise, zibathinte iinhliziyo begodu zibenze bafune ukuthabisa uZimu. Ngiwaphi amagadango ekufuze siwathathe nasizakusiza abantu esifunda nabo bafise ukutjhumayela iindaba ezimnandi kabanye?

7. Singamsiza njani umfundi bona afise ukutjhumayela iindaba ezimnandi kabanye?

⁷ Singabuza abantu esifunda nabo imibuzo enjengale: “Ukwamukela umlayezo womBuso kukwenze njani ukuphila kwakho kwabangcono? Inga-kghani ucabanga bona nabanye kufuze bawuzwe umlayezo lo? Khuyini esingayenza bona sibasize?” (IzA. 3:27; Mat. 9:37, 38) Tjengisa umuntu ofunda naye amaphetjhana Emathulusinethu Wokufundisa begodu umvumele akhethe elizokukhambisana nobujamo beenhlobo, abangani nofana abantu asebenza nabo. * Mnikele ambalwa, msize nilungiselele bona akghone ukukhambisa amaphetjhana la ngendlela enomusa nezokusiza abantu bafune ukulalela. Ngemva kokuthi umfundi abemtjhumayeli ongakabhajadiswa, sizokufuna ukusebenzisana naye simsize simnqophise.​—UMtj. 4:9, 10; Luk. 6:40.

8. Kubayini kuqakathekile bona abafundi beBhayibheli bathande uZimu nabomakhelwana? (Funda ibhoksi elithi, “ Singabasiza Njani Abantu Esifunda Nabo IBhayibheli Bathande UZimu Khulu.”)

⁸ Khumbula, uJesu wasiyala bona sifundise abanye “ukwenza koke” asiyale ngakho. Lokho kuhlanganisa imiyalo emibili  emikhulu kunayo koke, ekuthanda uZimu nabomakhelwana. Yomibili ihlobene nomsebenzi wokutjhumayela nokwenza abafundi. (Mat. 22:37-39) Ihlobene ngani nokutjhumayela? Ukuthanda uJehova nabomakhelwana bethu ngikho okwenza sitjhumayele. Abanye esifunda nabo iBhayibheli kuyabathusa ukucabanga ukuthi nabo kuzokufuze bayokutjhumayela. Kufuze sibaqinisekise abafundabo ukuthi uJehova uzobasiza bahlule ukusabokho. (Rhu. 18:1-3; IzA. 29:25) Ibhoksi elikhambisana nesihlokwesi lihlathulula amagadango esingawathatha bona sisize abafundi beBhayibheli bathande uZimu khulu. Ukungezelela kilokho ibandla lingabasiza njani abatjhumayeli abatjha bona batjengise ithando?

9. Esibonelweni somuntu ofunda ukutjhayela, ngiziphi iimfundo esizifundako eziqakathekileko?

⁹ Akhucabange godu ngomfanekiso womuntu ofundisa abantu ukutjhayela. Njengombana yena nomfundisakhe batjhayela hlangana nezinye iinkoloyi, khuyini umfundi ayifundako lapho? Uzabe enza kuhle nakalalela umfundisakhe begodu afunda kwabanye abatjhayeli abatjhayela endlelenapho. Isibonelo salokho umfundisi angamtjengisa omunye umtjhayeli onomusa begodu ovumela abanye bona bangene phambi kwakhe njengombana kutjhayelwa. Namkha angamtjengisa omunye umtjhayeli okhanyisa iimbani zekoloyakhe kancani bona angaphazamisi abantu abatjhayela naye. Iimbonelwezi zitjengisa umfundi ukuthi angakusebenzisa njani akufundileko nakatjhayelako.

10. Khuyini engasiza umfundi weBhayibheli akhulise ithando lakhe ngoZimu?

¹⁰ Ngokufanako, umfundi weBhayibheli othoma ukukhamba endleleni yokuphila le, akafundi emntwini omfindisako kwaphela kodwana ufunda nakwezinye iimbonelo zeenkhonzi zakaJehova. Alo, singathi khuyini engasiza umfundi weBhayibheli athuthuke ethandweni lakhe ngoZimu? Kukuya esifundweni. Iinqophiso ezinikelwa emihlanganenwethu ezisekelwe eBhayibhelini zizomsiza abe nelwazi elingeziweko, abenokukholwa okuqinileko kuZimu begodu kumsize amthande khulu. (IzE. 15:30-32) Ukungezelela kilokho, umfundisakhe uzomazisa abanye abafowethu nabodadwethu okungenzeka banobujamo obufana nebakhe. Ngiziphi izenzo zekholo umfundi angazibona kwamanye amaKrestu ebandleni? Akhesifunde ebujamweni obulandelako.

11. Ngiziphi iimbonelo umfundi angazitjheja ebandleni begodu lokho kungaba namuphi umphumela?

¹¹ Umfundi weBhayibheli ongumma okhulusa abantwana ayedwa, ufunda esibonelweni sakadadwethu osebujamweni obufana nebakhe. Kumthinta ihliziyo ukubona enza umzamo wokuba khona qobe eWolweni lomBuso anabantwana bakhe abancani. Umfundi okufumana kubudisi ukulisa ukubhema uhlangana nomtjhumayeli osebunjamweni obufana nebakhe. Umtjhumayeli lo, umtjela ngendlela ithando lakhe ngoJehova elamtjhukumisela ngayo bona alalele imithetho kaZimu. (2 Kor. 7:1; Flp. 4:13) Ngemva kokulalela indaba yomtjhumayeli lo, uzizwa azithemba lokha umfowethu nakathi “nawe ungalisa.” Omunye umntazana ofunda iBhayibheli utjheja indlela omunye olingana naye athabela ukuba nguFakazi kaJehova. Ubona indlela umntazana lo athabe ngayo begodu lokho kumenza afune ukwazi okungeziweko ngokuthi khuyini okumenza ahlale athabile.

12. Kubayini singathi woke umuntu ebandleni angasiza abafundi beBhayibheli nabeze esifundweni?

¹² Lokha umfundi weBhayibheli nakahlangana nabatjhumayeli abahlukahlukeneko,  ufunda eembonelweni zabo ukuthi kutjho ukuthini ukulalela umthetho kaKrestu nokuthanda uZimu nabomakhelwana. (Jwa. 13:35; 1 Thim. 4:12) Ukungezelela kilokho, njengombana eengabeni ezidlulileko sibonile umuntu ofunda iBhayibheli angafunda ebatjhumayelini abaqalene nobujamo obufana nebakhe. Umfundi uzokufunda eembonelweni lezo bona kufuze enze amatjhuguluko bona abe mlandeni kaKrestu begodu lokho kuyakghonakala. (Dut. 30:11) Woke umuntu ebandleni angasiza abafundi beBhayibheli ngeendlela ezihlukahlukeneko bona bathuthuke. (Mat. 5:16) Khuyini ongayenza bona ukhuthaze abafundi beBhayibheli nabeze esifundweni?

13-14. UJesu wabaphatha njani abapostoli bakhe nababogabogako?

¹³ Sifunda ukusiza abafowethu nabodadwethu abalise ukutjhumayela nokuya esimini bona bahlanganyele godu. Indlela uJesu aphatha ngayo abapostoli bakhe abadanileko iyasitjengisa ukuthi khuyini esingayenza namhlanjesi.

¹⁴ Lokha uJesu nakazokuphetha ikonzwakhe yephasini, abapostoli bakhe “boke bamtjhiya babaleka.” (Mar. 14:50; Jwa. 16:32) UJesu wabaphatha njani abapostoli bakhe nabatjengisa ukubogaboga kwesikhatjhana? Ngemva kokuvuswa kwakhe watjela abalandeli bakhe wathi “Ningasabi! Khambani niyokubikela abafowethu bona [ngivusiwe].” (Mat. 28:10a) UJesu akhenge abaphelele ihliziyo abapostoli bakhe. Nanyana bamtjhiya bekasolo ababiza ngokuthi ‘bafowethu.’ NjengoJehova uJesu bekamnene begodu alibalela.​—2 Kho. 13:23.

15. Sizizwa njani ngabafowethu nabodadwethu abalise ukutjhumayela?

¹⁵ Ngokufanako, nathi sinendaba nabafowethu nabodadwethu abalise ukutjhumayela begodu siyabathanda. Sisayikhumbula imisebenzi abayenzako lokha nabasatjhumayela begodu abanye, batjhumayele iminyaka eminengi. (Heb. 6:10) Sibakhumbula khulu! (Luk. 15:4-7) Ngokulingisa uJesu, ngiziphi iindlela esingatjengisa ngazo bona siyabakhumbula?

16. Singatjengisa njani bona sinendaba ngabafowethu nabodadwethu abalise ukuhlanganyela ebandleni?

¹⁶ Bameme bona beze esifundweni. UJesu wakhuthaza abapostoli bakhe ababogabogako ngokuthi abamemele emihlanganweni. (Mat. 28:10b; 1 Kor. 15:6) Ngokufanako nanamhlangesi singakhuthaza abalise ukuhlanganyela bona beze esifundweni. Kungatlhogeka bona sibameme iinkhathi ezinengi ngaphambi kobana beze esifundweni. Siyaqiniseka ukuthi kwamthabisa khulu uJesu lokha abafundi bakhe bamukela isimemo sakhe.​—Madanisa noMatewu 28:16 noLukasi. 15:6.

17. Kufuze senzeni lokha umuntu obekalise ukuhlanganyela eza esifundweni?

¹⁷ Bamukele ngethando. UJesu wenza bona abafundi bakhe bazizwa batjhaphulukile nakahlangana nabo begodu kwaba nguye oqunta ukukhuluma nabo kokuthoma. (Mat. 28:18) Sizozizwa njani lokha umfowethu namkha udadwethu obekalise ukuya esifundweni eza eWolweni lomBuso? Kufuze simamukele ngethando. Kungenzeka sizibuze ukuthi sizokuthini nasimbonako. Akukafuzi simenze azizwe aneenhloni. Singamtjela ukuthi sithabela ukumbona.

18. Singabakhuthaza njani abatjhumayeli abalise ukuhlanganyela?

¹⁸ Bakhuthaze. Kungenzeka abalandeli bakaJesu bazizwa bangekhe bakghone ukutjhumayela  ephasini loke. UJesu waqinisekisa abalandeli bakhe wathi: “Nginani imihla yoke.” (Mat. 28:20) Inga-kghani indlela le yasebenza? Iye, kungasi kade bebamajadu “bafundisa begodu batjhumayela ngeendaba ezimnandi.” (IzE. 5:42) Ngokufanako nabatjhumayeli abalise ukuhlanganyela batlhoga ukukhuthazwa. Bangazizwa banevalo lokutjhumayela godu. Singabaqinisekisa bona angekhe batjhumayele babodwa. Lokha nasele baqunte ukutjhumayela godu singakhamba nabo esimini. Njengombana bathoma ukutjhumayela siyaqiniseka bona bazokuthaba nasibasekelako. Nasibaqala njengambafowethu nabodadwethu singafumana imiphumela ethabisako ebandleni.

19. Khuyini esiyenza ngokusuka ehliziyweni begodu kubayini?

¹⁹ Sizokutjhumayela bekube kunini? Bekube sekupheleni kwephasi. (Mat. 28:20) Inga-kghani singakghona ukwenza umsebenzi uJesu asinikele wona? Sizimisele ukuwenza. Ngokuzithandela sisebenzisa isikhathi sethu, amandlethu nezinto esinazo bona sifune “abazimisele ukufumana ukuphila okungapheliko.” (IzE. 13:48) Nasenza njalo silingisa isibonelo sakaJesu. Wathi: “Ukudla kwami kukwenza intando yongithumileko nokuqeda umsebenzakhe.” (Jwa. 4:34; 17:4) Lokho sikwenza ngokusuka ehliziyweni. Sifuna ukuqeda umsebenzi esinikelwe wona. (Jwa. 20:21) Sifuna ukubambelela emsebenzini lo, siwenze nalabo abalise ukuhlanganyela.​—Mat. 24:13.

20. Ngokuya ngokomtlolo webeFilipi 4:13, kubayini singakghona ukuwuqeda umsebenzi uJesu asinikele wona?

²⁰ Akusilula ukwenza umsebenzi uJesu asinikele wona. Nanyana kunjalo, asiwenzi sisodwa. UJesu wasithembisa ukuthi uzokuba nathi. Senza umsebenzi lo “sisebenza noZimu” begodu ‘sikunye noKrestu.’ (1 Kor. 3:9; 2 Kor. 2:17) Yeke sizokukghona ukuwuqeda, qala bona kulilungelo elihle kangangani ukwenza umsebenzi lo, besisize nabanye bawenze kuhle.​—Funda yebeFilipi 4:13.