1. Kurugiirira ahari Matayo 28:18-20, Yesu akaragiira abakuratsi be kukora ki?

BWANYIMA ya Yesu kuzooka, akeeyoreka abeegi be abaabaire beteeraniire Galilaaya. Akaba aine ekintu kikuru ky’okubagambira. Kikaba kiri kiiha? Ebigambo bye nibishangwa omuri Matayo 28:18-20.​—Kishome.

2. Nituza kushwijuma bibuuzo ki?

² Ekiragiro kya Yesu eky’okuhindura abantu abeegi nikikwata n’aha baheereza ba Ruhanga aba hati. N’ahabw’ekyo, ka tugarukemu ebibuuzo bishatu ebiine akakwate n’omurimo ogu Yesu atuhaire. Eky’okubanza, twine kukora ki ekindi, oyihireho okwegyesa abeegi abasya ebi Ruhanga arikwenda ngu bakore? Ekya kabiri, ababuurizi boona omu kibiina nibabaasa kuhwera bata omwegi wa Baibuli kutunguuka omu by’omwoyo? Ekya kashatu, nitubaasa kuhwera tuta ow’eishe-emwe otakibuurira kugaruka kwejumba omu murimo gw’okuhinda abantu abeegi?

3. Ni kashonshorekye ki akarikutwarirwa omu kiragiro kya Yesu?

³ Ebi Yesu yaaragiire nibyetegyerezibwa gye. Twine kwegyesa abantu ebi yaaragiire. Kwonka, hariho akashonshorekye kakuru aku tutaine kwehuzya. Yesu taragizire ngu ‘mubeegyese byona ebi naabaragiira.’ Kureka, akagira ati: ‘Mubeegyese kworobera byona ebi naabaragiire.’ Kubaasa kukuratira akashonshorekye  aka twaba nitwegyesa omwegi wa Baibuli, titwine kuba abeegyesa kyonka, beitu twine n’okuba abahabuzi. (Byak. 8:31) Ahabw’enki kiri kityo?

4. Okworobera ekiragiro nikimanyisa ki? Ha eky’okureeberaho.

⁴ ‘Okworobera’ ekiragiro nikimanyisa okukora eki oragiirwe. Kumanya oku turikubaasa kwegyesa omuntu kworoba, nari kukora ebi Kristo yaaragiire, teekateeka aha ky’okureeberaho eki. Orikutendeka abeegi kuvuga naabeegyesa ata kworobera ebiragiro by’aha ruguuto? Omutendeki naabaasa kubanza yaabegyesa ebiragiro ebyo omu kibiina. Kwonka, kubaasa kutendeka abeegi be oku baine kworobera ebiragiro ebyo, hariho ekindi eki aine kukora. Aine kugyenda n’abeegi akabooreka butunu oku baine kuvuga aha ruguuto kandi nabo bakateeraho kuta omu nkora ebi beegire. Nitubaasa kwegyera ki aha ky’okureeberaho ekyo?

5. (a) Kurugiirira ahari Yohaana 14:15 na 1 Yohaana 2:3, twine kwegyesa abeegi ba Baibuli kukora ki? (b) Ha eby’okureeberaho kworeka oku turikubaasa kuhabura abeegi ba Baibuli?

⁵ Twaba nitwegyesa abandi Baibuli, nitubeegyesa ebi Ruhanga arikwenda ngu tukore. Kwonka twine kukora ekirikukira ahari ekyo. Twine kwegyesa abeegi ba Baibuli kugyendera aha bi barikwega omu mbeera zaabo eza butoosha. (Shoma Yohaana 14:15; 1 Yohaana 2:3.) Twataho eky’okureeberaho kirungi, nitubaasa kworeka oku abeegi barikubaasa kugyendera aha misingye mikuru y’Ebyahandiikirwe baaba bari aha ishomero, aha murimo, n’omu by’okweshemeza. Nitubaasa kubatebeza ebi turabiremu kubooreka oku twayetantaire akabi ahabw’okukuratira emisingye ya Baibuli nari oku yaatuhweraire kucwamu gye. Twaba turi hamwe n’abeegi, nitubaasa kushaba Yehova kubaha omwoyo gurikwera kubeebembera.​—Yoh. 16:13.

6. Niki ekirikutwarirwa omu kwegyesa abandi kworobera ebiragiro bya Yesu?

⁶ Niki ekirikutwarirwa omu kwegyesa abandi kworobera ebiragiro bya Kristo? Twine kuhwera abeegi kugira ekyetengo ky’okwejumba omu murimo gw’okubuurira. Abeegi abamwe, nibabaasa kuba nibatiina kwejumba omu kubuurira. N’ahabw’ekyo twine kuba abagumisiririza twaba nitubaha obuhabuzi oburikubahwera mporampora kwetegyereza enshonga egi, kubahika aha mutima, reero kikabahiga kugira eki baakora. Nitubaasa kukora ki kuhwera abeegi kugira ekyetengo ky’okubagana n’abandi amakuru marungi?

7. Nitubaasa kuhwera tuta omwegi kugira ekyetengo ky’okubagana n’abandi amakuru marungi?

⁷ Nitubaasa kubuuza omwegi wa Baibuli ebibuuzo nk’ebi: “Okozire mpinduka ki enungi ahabw’okwikiriza obutumwa bw’Obukama? Nooteekateeka ngu abandi nabo baine kuhurira obutumwa obu? Noobaasa kukora ki kubahwera?” (Enf. 3:27; Mat. 9:37, 38) Yoreka omwegi turakiti eziri omu by’Okukoresa omu Kwegyesa, reero atooranemu ezi arikuteekateeka ngu nizibaasa kushemeza abanyabuzaare, abanywani, nari abu arikukora nabo. Muhe nyingiho ahari turakiti ezo. Yegyezemu nawe kumworeka oku arikubaasa kugaba turakiti omu muringo gw’obwengye. Nangwa omwegi wa Baibuli yaikirizibwa kuba omubuurizi otabatiziibwe, nituba twine kumuhwera turikubuurira nawe.​—Mub. 4:9, 10; Luk. 6:40.

8. Ahabw’enki ni kikuru omwegi kwongyera kukunda Ruhanga n’abataahi? (Reeba n’akabokusi “ Oku Turikubaasa Kuhwera Abeegi Kwongyera Kukunda Ruhanga.”)

⁸ Ijuka ngu Yesu akatuhabura kwegyesa abandi ‘kworobera byona’ ebi yaaragiire. Buzima nibitwariramu ebiragiro bibiri ebikuru, okukunda Ruhanga n’abataahi, kandi byombi  biine akakwate n’omurimo gw’okubuurira n’okuhindura abantu abeegi. (Mat. 22:37-39) Bita shi? Ekintu kikuru ekirikutuhiga kwejumba omu murimo gw’okubuurira ni rukundo ei twiniire Ruhanga n’abataahi. Nikyetegyerezibwa okwejumba omu murimo gw’okubuurira kwaba nikureetera abeegi abamwe kutiina. Kwonka nitubaasa kuhamiza abeegi nkabo ngu ahabw’obuhwezi bwa Yehova mporampora nibaija kusingura okutiina abantu. (Zab. 18:1-3; Enf. 29:25) Akabokusi k’ekicweka eki nikashoboorora amadaara ogu twine kukuratira kuhwera omwegi kwongyera kukunda Ruhanga. Kandi, ekibiina nikibaasa kukora ki kuhwera abeegi abasya kwongyera kugira rukundo?

9. Omwegi naayega mashomo ki amakuru omu ky’okureeberaho ky’omwegi orikwega kuvuga?

⁹ Garuka oteekateekye aha ky’okureeberaho ky’omuntu orikwega kuvuga. Yaaba naavuga aha ruguuto omutendeki we amuri aha rubaju, naaba naayega mu miringo ki? Naaba naahurikiza gye omutendeki we kandi arikwetegyereza n’abavugi abandi abeegyendesereza. Nk’eky’okureeberaho, omutendeki omu muringo gw’embabazi naabaasa kureka omuvugi ondiijo kumurabaho kumwebembera. Nari naabaasa kumworeka omuvugi orikutuubya aha kwaka kw’amataara g’emotoka ye kugira ngu kyorobere abavugi abandi kuhweza gye, reero amuhigye nawe kuguma naatwaza atyo. Eby’okureeberaho nk’ebyo nibyegyesa omwegi amashomo makuru agu aine kuta omu nkora yaaba naavuga.

10. Niki ekiraahwere omwegi wa Baibuli kutunguuka omu by’omwoyo?

¹⁰ Nikyo kimwe, omwegi orikutandika orugyendo omu ruguuto orurikuhitsya omu magara, tarikwegyera ahari ogwo orikumwegyesa wenka beitu n’aha by’okureeberaho birungi eby’abaheereza ba Yehova abandi. Mbwenu shi niki ekiraahwere omwegi wa Baibuli kutunguuka omu by’omwoyo? N’okuza omu nteerane z’Ekikristaayo. Ahabw’enki? Obuhabuzi oburikwegamira aha Byahandiikirwe oburikuheebwa omu nteerane nibubahwera kwongyera aha kumanya kwabo, nibuhamya okwikiririza kwabo, kandi nibubahwera kwongyera kukunda Ruhanga. (Byak. 15:30-32) Ekindi, omu nteerane omwegyesa naabaasa kworeka omwegi, ab’eishe-emwe na banyaanyazi-itwe abaine embeera nk’eze. Omu kibiina omwegi naabaasa kureebamu by’okureeberaho ki eby’Abakristaayo abaine rukundo? Teekateeka aha by’okureeberaho ebi.

11. Omwegi naabaasa kwetegyereza by’okureeberaho ki omu kibiina, kandi nibibaasa kumukwataho bita?

¹¹ Omwegi wa Baibuli ori omuzaire omwe naareeba munyaanyazi-itwe Omukristaayo oine embeera nk’eze. Ekyo kikwata aha mutima gw’omwegi kureeba oku munyaanyazi-itwe arikuteeraho kwija aha Kyombeko ky’Obukama n’abaana be bato. Ekindi, omwegi orikugumirwa kucwa omuze gw’okureetsa yaanywana omubuurizi owaabaire aine oburemeezi nk’obwe kwonka owaabusingwire. Omubuurizi naagambira omwegi oku rukundo ye ei ainiire Yehova yaamuhigire kworobera ebiragiro bye. (2 Kor. 7:1; 4:7) Bwanyima y’okuhurikiza oku omubuurizi yaasingwire, omwegi naayongyera kwesiga ow’eishe-emwe yaamuhamiza ngu, “naiwe noobaasa kucwa omuze ogwo.” Omwishiki orikwega Baibuli naareeba munyaanyazi-itwe omunyeeto ashemereirwe ahabw’okuba Omujurizi wa Yehova. Omwegi wa Baibuli ku arikureeba munyaanyazi-itwe butoosha ashemererwe agira ekihika ky’okwenda kumanya enshonga ahabw’enki naaba ashemereirwe.

12. Ahabw’enki nitubaasa kugira ngu buri omwe omu kibiina naabaasa kugira eki yaakora kuhwera omwegi wa Baibuli?

¹² Abeegi ba Baibuli baamanya ababuurizi batari bamwe na bamwe abeesigwa, nibaija  kubeegyeraho eki kirikumanyisa kworobera ekiragiro kya Kristo eky’okukunda Ruhanga n’abataahi. (Yoh. 13:35; 1 Tim. 4:12) Nk’oku kyaba kyagambirweho, omwegi wa Baibuli naabaasa kwegyera aha babuurizi abandi abaine embeera nk’eze. Omwegi naayegyera aha by’okureeberaho nk’ebyo ngu empindahinduka ezi aine kukora kuba omwegi wa Kristo nizibaasika. (Bir. 30:11) Buri omwe omu kibiina naabaasa kuhwera omwegi wa Baibuli omu miringo mingi kutunguuka omu by’omwoyo. (Mat. 5:16) Iwe nookira kukora ki kuhiga abeegi ba Baibuli abarikwija omu nteerane?

13-14. Yesu akatwariza ata entumwa ze abaabaire bahwairemu amaani?

¹³ Nitwenda kuhwera abatakibuurira kugaruka kworobera ekiragiro kya Kristo eky’okuhindura abantu beegi. Oku Yesu yaatwariize entumwa ze abaabaire bashobeirwe nikyoreka eki twine kukora obunaku obu.

¹⁴ Yesu ari haihi kuhendera obuheereza bwe kandi akaitwa, entumwa ze ‘zoona zikamuhungaho, zairuka.’ (Mak. 14:50; Yoh. 16:32) Omu kaire ako Yesu akatwariza ata entumwa ze obu baabaire bahwairemu amaani? Yesu ku yaaherize kuzooka, akagambira abakuratsi be ati: “Mutatiina, mugyende, mugambire bagyenzi bangye [ngu nzookire].” (Mat. 28:10a) Yesu akaguma abainemu amatsiko. N’obu baraabe baamutsigireho, kwonka nabwo akabeeta “baine ishe.” Nka Yehova, Yesu akaba ari omunyambabazi kandi orikusaasira.​—2 Bag. 13:23.

15. Twine kutwariza tuta ab’eishe-emwe abatakyemba omu buheereza?

¹⁵ Naitwe, nitufayo munonga ahari abo abatakyejumba omu buheereza. N’ab’eishe-emwe kandi banyaanyazi-iwe, abu turikukunda! Nitukiijuka ebikorwa byabo eby’enyima ebya rukundo, kandi obundi abamwe baheereza emyaka mingi. (Heb. 6:10) Buzima tubainiire orushusho! (Luk. 15:4-7) Turikutooreza Yesu nitubaasa kworeka ngu nitubafaho?

16. Nitubaasa kworeka tuta ngu nitufayo aha b’eishe-emwe na banyaanyazi-itwe abatakibuurira?

¹⁶ Beete n’omuhimbo. Omuringo gumwe ogu Yesu yaahigiremu entumwa ze abaabaire bahwairemu amaani n’okubeeta kuteeranira hamwe. (Mat. 28:10b; 1 Kor. 15:6) N’omu bunaku obu, nitubaasa kuhinga abatakibuurira kwija omu nteerane baaba batwire batarikwija. Nitumanya ngu twine kubeeta emirundi mingi kubaasa kurugaho bakaikiriza. Hatariho kubangaanisa Yesu akashemererwa abeegi be ku baikiriize okweta kwe.​—Gyeragyeranisa Matayo 28:16 na Luka 15:6.

17. Twine kutwaza tuta otakibuurira yaija omu ruteerane?

¹⁷ Baakiire oyihire aha mutima. Yesu akaba naareetera abeegi be kwehurira baikaikaine baaba bari nawe, niwe yaabaire abanza kugamba nabo. (Mat. 28:18) Nitwija kutwariza tuta ow’eishe-emwe otakibuurira yaahika aha Kyombeko ky’Obukama? Niitwe twine kubanza kumwakiira omu muringo gwa rukundo. Omu kubanza, nitubaasa kutiina ahabw’okutamanya eky’okugamba. Kwonka turikwetantara kumureetera kwehurira kubi, nitubaasa kumugambira ngu twashemererwa munonga kumureeba.

18. Nitubaasa kuhamiza tuta ab’eishe-emwe abatakibuurira?

¹⁸ Bahamize oyihire aha mutima. Abeegi ba Yesu nibabaasa kuba baabaire bashobeirwe oku barahikiirize obujunaanizibwa bw’okubuurira abantu boona omu nsi. Yesu akagumya abakuratsi be arikubagira ati: “Ndi hamwe naimwe ebiro byona.” (Mat. 28:20) Mbwenu shi omuringo ogwo gukakora? Eego. Bwanyima, bakatandika kwejumbira kimwe omu kwegyesa n’okubuurira amakuru marungi.  (Byak. 5:42) N’ababuurizi abatakibuurira twine kubahamiza. Nibabaasa kuba nibatiina kugaruka kubuurira. Twine kubahamiza ngu tibarikwija kubuurira bonka. Ku baraagarukyemu kubuurira, nitubaasa kwehayo kugyenda nabo. Hatariho kubangaanisa nibaija kushemererwa ahabw’okugaruka kubuurira amakuru marungi. Abatakibuurira twabatwariza nk’ab’eishe-emwe bagyenzi baitu, nitubaasa kureeba ekibiina kyaitu kirikubamu ebirimushemeza munonga.

19. Twine kyetengo ki, kandi ahabw’enki?

¹⁹ Twine kugumizamu nitukora omurimo gw’okuhindura abantu abeegi kuhitsya ryari? Kuhitsya obu obusingye obu burahendere. (Mat. 28:20) Nitwija kugumizamu nituhikiiriza ekiragiro kya Yesu eki? Tumariirire kuhikiiriza ekiragiro eki! Nikitushemeza kuhayo obwire bwaitu, amaani gaitu, n’ebi twine kusherura abaine ekihika ky’okutunga amagara agatahwaho. (Byak. 13:48) Twakora ekyo, nituba nitutooreza Yesu. Akagira ati: ‘Eby’okurya byangye nikwo kukora eki owaantumire arikukunda n’okuhikiiriza omurimo gwe.’ (Yoh. 4:34; 17:4) Ekyo nikyo kyetengo eki twine aha mutima. Naitwe nitwenda kuhikiiriza omurimo ogu twakwatsiibwe. (Yoh. 20:21) Kandi nitwenda n’abandi, otwariiremu abatakibuurira bagumisirize naitwe omu murimo ogu.​—Mat. 24:13.

20. Kurugiirira aha 2 Abakorinso 4:7, ahabw’enki nitubaasa kuhikiiriza omurimo ogu Yesu yaaturagiire kukora?

²⁰ Tikyorobi kuhikiiriza omurimo ogurikukirayo obukuru ogu Yesu yaatuhaire. Kwonka omurimo ogu titurikugukora twenka. Yesu akaturaganisa ngu naija kuba ari hamwe naitwe. Omu kuhikiiriza omurimo gwaitu gw’okuhindura abantu abeegi nitukora hamwe na Ruhanga na Kristo. (1 Kor. 3:9; 2 Kor. 2:17) N’ahabw’ekyo, nitubaasa kuguhikiiriza. Ka nikitushemeza kukora omurimo ogu n’okuhwera abandi kugwejumbamu!​—Shoma 2 Abakorinso 4:7.