1. Матфейы 28:18–20 стихтӕм гӕсгӕ, Йесо йӕ ахуыргӕнинӕгтӕн цы бафӕдзӕхста?

ЙЕСО куы райгас, уӕд Галилейӕйы йӕ ахуыргӕнинӕгтӕм фӕзынд. Ахсджиаг цыдӕр зӕгъинаг сын уыд. Цымӕ цы? Йӕ ныхӕстӕ фыст сты Матфейы 28:18–20 стихты. (Бакӕс сӕ.)

2. Цавӕр фарстатыл аныхас кӕндзыстӕм?

² Йесойы фӕдзӕхст абон махмӕ дӕр хауы. Хуыцауы лӕггадгӕнджытӕй алчидӕр хъуамӕ цӕттӕ кӕна ахуыргӕнинӕгтӕ. Уымӕ гӕсгӕ аныхас кӕндзыстӕм ӕртӕ фарстайыл: 1) Ног ахуыргӕнинӕгтӕн Хуыцауы фӕдзӕхстытӕ кӕй амонӕм, уымӕй уӕлдай ма цы хъуамӕ аразӕм? 2) Ӕмбырды алкӕмӕн дӕр йӕ бон куыд у, Библи кӕимӕ ахуыр кӕнӕм, уыдонӕн ӕххуыс кӕнын, цӕмӕй сӕ уырнындзинад фидардӕр кӕна? 3) Иуцасдӕр ӕмбырдтӕм ӕмӕ хъусын кӕнынмӕ чи нал цӕуы, уыцы хотӕ ӕмӕ ’фсымӕртӕн нӕ бон куыд у баххуыс кӕнын, цӕмӕй та ахуыргӕнинӕгтӕ цӕттӕ кӕныны хъуыддаджы архайой?

3. Йесо йӕ ахуыргӕнинӕгтӕн цавӕр бӕлвырд амындтӕ радта?

³ Йесо йӕ ахуыргӕнинӕгтӕн бӕлвырд амындтӕ радта. Уый загъта, цы бафӕдзӕхста, уыдӕттӕ адӕмӕн кӕй хъуамӕ амонӕм. Фӕлӕ нӕ иу ахсджиаг хъуыддаг хъуамӕ рох ма уа. Йесо афтӕ нӕ загъта, цы уын бафӕдзӕхстон, ӕппӕт уыдӕттӕ сын амонут, зӕгъгӕ. Уый загъта, зӕгъгӕ сӕ ахуыр кӕнут, «ӕз уын цы бафӕдзӕхстон, ӕппӕт уыдӕттӕ ӕххӕст кӕнын». Нӕ бон куыд у ацы ныхӕстӕм гӕсгӕ архайын? Библи кӕимӕ ахуыр кӕнӕм, уымӕн хъуамӕ Йесойы фӕдзӕхстытӕ ӕрмӕст амонгӕ ма кӕнӕм. Хъуамӕ ма йын ӕмбарын дӕр кӕнӕм, уыцы фӕдзӕхстытӕ ӕххӕст  кӕнын йӕ бон куыд у, уый (Хъуыд. 8:31). Уый ахсджиаг цӕмӕн у?

4. Нӕ бон куыд у адӕмы ахуыр кӕнын Йесойы фӕдзӕхстытӕ ӕххӕст кӕнын? Ӕрхӕсс цӕвиттон.

⁴ Нӕ бон куыд у адӕмы ахуыр кӕнын, Йесо цы бафӕдзӕхста, уыдӕттӕ ӕххӕст кӕнын? Цӕвиттонӕн ӕрхӕссӕм, шофырты скъолайы чи ахуыр кӕны, уыдоны ахуыргӕнӕг машинӕ скъӕрын куыд фӕахуыр кӕны, уый. Фыццаг уал сын бацамоны фӕндагыл цӕуыны уагӕвӕрдтӕ. Фӕлӕ цӕмӕй уыцы уагӕвӕрдтӕм гӕсгӕ машинӕ скъӕрын сахуыр уой, уый тыххӕй ма хъуамӕ ноджыдӕр цыдӕр сараза. Ахуыргӕнинаг йӕхӕдӕг машинӕ скъӕрын куы фӕлвара, уӕд ахуыргӕнӕг хъуамӕ йӕ фарсмӕ бада, йӕ хъус ӕм дара ӕмӕ йын исты куы нӕ уайа, уӕд ын ӕмбарын кӕна, куыд ӕй хъӕуы бакӕнын, уый. Ацы цӕвиттонӕй цӕуыл ахуыр кӕнӕм?

5. а) Иоанны 14:15 стихмӕ гӕсгӕ ӕмӕ 1 Иоанны 2:3 стихмӕ гӕсгӕ, Библи кӕимӕ ахуыр кӕнӕм, уыдоны цӕуыл хъуамӕ сахуыр кӕнӕм? б) Нӕ бон куыд у адӕймагӕн ӕххуыс кӕнын, цӕмӕй Библийы уагӕвӕрдтӕм гӕсгӕ архайа?

⁵ Искӕимӕ Библи куы фӕахуыр кӕнӕм, уӕд ын фӕамонӕм Хуыцауы закъӕттӕ ӕмӕ уагӕвӕрдтӕ. Фӕлӕ уый фаг нӕу. Хъуамӕ ма йӕ ахуыр кӕнӕм, цы базоны, уымӕ гӕсгӕ архайын дӕр. (Бакӕс Иоанны 14:15; 1 Иоанны 2:3.) Зӕгъӕм, ис ын ӕмбарын кӕнӕн, Библийӕ цы базоны, уымӕ гӕсгӕ йӕ бон куыд у скъолайы кӕнӕ куысты архайын, йе та ирхӕфсӕнтӕ куы февзары кӕнӕ искуы куы фӕулӕфы, уӕд. Нӕ бон ын у радзурын, Библийы уагӕвӕрдты фӕрцы нӕхи цӕмӕйдӕр куыд бахызтам кӕнӕ раст уынаффӕ куыд рахастам. Стӕй-иу йемӕ куы кувӕм, уӕд нӕ бон у Йегъовӕйӕ курын, цӕмӕй йын йӕ сыгъдӕг тыхы фӕрцы разамынд дӕтта (Иоан. 16:13).

6. Ноджыдӕр ма нӕ бон куыд у адӕймаджы ахуыр кӕнын, цӕмӕй Йесойы фӕдзӕхстытӕ ӕххӕст кӕна?

⁶ Ноджыдӕр ма нӕ бон куыд у адӕймаджы ахуыр кӕнын, цӕмӕй Йесойы фӕдзӕхстытӕ ӕххӕст кӕна? Хъуамӕ йын баххуыс кӕнӕм, цӕмӕй йӕхи дӕр бафӕнда ахуыргӕнинӕгтӕ цӕттӕ кӕнын. Библи кӕимӕ фӕахуыр кӕнӕм, уыдонӕй иуӕй-иутӕ хъусын кӕнынмӕ сӕ ныфс нӕ фӕхӕссынц. Уӕдӕ сын Библийы ахуырӕдтӕ бамбарынӕн куы феххуыс кӕнӕм, уӕд-иу хъуамӕ уӕм фӕразон. Хъуамӕ сӕ уырнындзинад афтӕ сфидар уа, цӕмӕй, Библийӕ цы базыдтой, уый сын сӕ зӕрдӕтӕ бацагайа. Ӕмӕ сӕ уӕд бафӕнддзӕн хъусын кӕнын дӕр. Уӕдӕ сын куыд ис баххуыс кӕнӕн, цӕмӕй сӕ зӕрдӕйы зынг ссудза, ӕмӕ сӕ бафӕнда иннӕтӕн дӕр хорз хабар дзурын?

7. Куыд ис адӕймагӕн баххуыс кӕнӕн, цӕмӕй йӕ бафӕнда иннӕтӕн дӕр хорз хабар дзурын?

⁷ Библи кӕимӕ ахуыр кӕнӕм, уымӕ ис ахӕм фарстатӕ раттӕн: «Библийӕ цы базыдтай, уымӕ гӕсгӕ архайгӕ дӕр кӕй кӕныс, уый фӕрцы дӕ цард хуыздӕрырдӕм куыд аивта? Куыд дӕм кӕсы, иннӕтӕн дӕр хъӕуы хорз хабар дзурын? Дӕ бон сын куыд у баххуыс кӕнын?» (Ӕмб. 3:27; Матф. 9:37, 38). Адӕймагӕн равдис, иннӕтӕн Библи цы буклетты фӕрцы фӕамонӕм, уыдон. Уадз ӕмӕ дзы равзара, йӕ хиуӕтты, йе ’мбӕлтты кӕнӕ йе ’мкусджыты зӕрдӕмӕ чи фӕцӕудзӕн, уыцы буклеттӕ. Цалдӕргӕйттӕ йын дзы ратт. Иумӕ афӕлварут, куыд ис искӕимӕ хӕларзӕрдӕйӕ аныхас кӕнӕн ӕмӕ йын буклет раттӕн. Кӕй зӕгъын ӕй хъӕуы, ӕнӕаргъуыд хъусынгӕнӕг куы суа, уӕд дӕр-иу хъуамӕ йӕ фарсмӕ уай, ома йемӕ хъусын кӕнай ӕмӕ йын дарддӕр ӕххуыс кӕнай (Еккл. 4:9, 10; Лук. 6:40).

8. Цӕмӕн у ахсджиаг, цӕмӕй, Библи кӕимӕ ахуыр кӕнӕм, уый Хуыцауы ӕмӕ адӕмы тынг бауарза? (Ноджыдӕр кӕс рамкӕ « Библи кӕимӕ ахуыр кӕныс, уымӕн баххуыс кӕн, цӕмӕй Хуыцауы тынгдӕр бауарза».)

⁸ Йесо загъта, адӕмы кӕй хъуамӕ ахуыр кӕнӕм, «цы бафӕдзӕхста, ӕппӕт уыдӕттӕ ӕххӕст кӕнын». Ӕмӕ уыцы фӕдзӕхстытӕм хауынц дыууӕ сӕйраг фӕдзӕхсты дӕр – Хуыцауы уарзын ӕмӕ адӕмы уарзын (Матф. 22:37–39).  Цӕмӕй, Библи кӕимӕ ахуыр кӕнӕм, уый хорз хабар хъусын кӕнын бафӕнда, уый тыххӕй хъуамӕ бауарза Хуыцауы дӕр ӕмӕ адӕмы дӕр. Иуӕй-иутӕ хъусын кӕнын тӕрсгӕ фӕкӕнынц. Фӕлӕ сын хъуамӕ бамбарын кӕнӕм, Йегъовӕйы фӕрцы гыццылгай ныфсджындӕр кӕй кӕндзысты ӕмӕ адӕмӕй кӕй нал тӕрсдзысты (Пс. 18:1–3; Ӕмб. 29:25). Ацы статьяйы ис рамкӕ. Ӕмӕ дзы цы уынаффӕтӕ ис, уыдоны фӕрцы нӕ бон у адӕймагӕн баххуыс кӕнын, цӕмӕй Хуыцауы тынг бауарза. Фӕлӕ йын ӕмбырд та куыд баххуыс кӕндзӕн, цӕмӕй Йегъовӕйы ӕмӕ адӕмы тынг бауарза?

9. Адӕймаг ма ноджыдӕр цӕй фӕрцы сахуыр вӕййы машинӕ скъӕрын?

⁹ Ахъуыды та кӕнӕм, машинӕ скъӕрын чи ахуыр кӕны, ууыл. Машинӕ куы фескъӕры ӕмӕ йӕ ахуыргӕнӕг йӕ фарсмӕ куы вӕййы, уӕд ӕй цы фӕхъӕуы аразын? Йӕ ахуыргӕнӕгмӕ хъусын ӕмӕ, машинӕ хорз чи скъӕры, уыцы шофыртӕм йӕ хъус дарын. Гӕнӕн ис, ахуыргӕнӕг ын бацамона, йӕ разӕй иннӕ машинӕ чи ауагъта, уыцы шофырмӕ. Кӕнӕ та, зӕгъӕм, ахуыргӕнӕг уыны, кӕцыдӕр шофыр, дардмӕ чи рухс кӕны, уыцы рухсытӕ ахуыссын кодта ӕмӕ, хӕстӕгмӕ чи рухс кӕны, уыдон ссыгъта, цӕмӕй иннӕты цӕстытӕ ма куырм кӕна. Ӕмӕ ахуыргӕнӕгӕн йӕ бон у ахуыргӕнинагӕн уыцы шофырмӕ дӕр бацамонын. Уӕдӕ иннӕ шофыртӕй дӕр адӕймаг бирӕ цӕуылдӕрты сахуыр вӕййы.

10. Библи кӕимӕ ахуыр кӕнӕм, уымӕн йӕ уырнындзинад фидардӕр цӕй фӕрцы кӕндзӕн?

¹⁰ Раст афтӕ, Библи кӕимӕ ахуыр кӕнӕм, уый дӕр царды фӕндагыл цӕуын куы райдайы, уӕд ӕй ӕрмӕст мах нӕ фӕахуыр кӕнӕм. Йӕ бон ма вӕййы иннӕ лӕггадгӕнджытӕм дӕр кӕсын ӕмӕ уыдонӕй ахуыр кӕнын. Уӕдӕ цӕмӕй йӕ уырнындзинад фидардӕр кӕна, уый тыххӕй йӕ хъӕуы ӕмбырдтӕм цӕуын. Уым нын цы фӕамонынц, уый фӕрцы-иу Библийӕ ноджы фылдӕр базондзӕн, йӕ уырнындзинад фидардӕр кӕндзӕн ӕмӕ Хуыцауы ноджы тынгдӕр бауарздзӕн (Хъуыд. 15:30–32). Стӕй, ӕмбырдтӕм куы цӕуа, уӕд-иу ӕй базонгӕ кӕндзыстӕм, уый уавӕрты хуызӕн уавӕрты чи уыд кӕнӕ ныр чи ис, уыцы хотӕ ӕмӕ ’фсымӕртимӕ. Уыдоны цӕвиттонтӕ йын куыд баххуыс кӕндзысты?

11. Библи кӕимӕ ахуыр кӕнӕм, уыдон ӕмбырды цавӕр адӕмимӕ базонгӕ вӕййынц ӕмӕ сыл уый куыд фӕзыны?

¹¹ Зӕгъӕм, Библи ахуыр кӕнӕм, йӕ сывӕллӕтты иунӕгӕй чи хъомыл кӕны, ахӕм сылгоймагимӕ. Уый ӕмбырды базонгӕ, йӕ сывӕллӕтты иунӕгӕй чи хъомыл кӕны, ахӕм хоимӕ. Ӕмӕ йын йӕ зӕрдӕ тынг бацагайдта, уыцы хо йӕ гыццыл сывӕллӕтты ӕмбырдтӕм йемӕ кӕй фӕкӕны, кӕд ын уый афтӕ ӕнцон нӕу, уӕддӕр. Кӕнӕ та, Библи кӕимӕ ахуыр кӕнӕм, уыцы нӕлгоймаг йӕ тамако ныууадзыныл архайы. Ӕмӕ базонгӕ, раздӕр тамако чи дымдта ӕмӕ йӕ чи ныууагъта, ахӕм ӕфсымӕримӕ. Уый йын радзырдта, Йегъовӕйы тынг кӕй бауарзта ӕмӕ йӕ уый тыххӕй кӕй бафӕндыд йӕ уагӕвӕрдтӕм гӕсгӕ цӕрын (2 Кор. 7:1; Фил. 4:13). Ӕфсымӕр ын йӕ хабӕрттӕ куы ракодта, уӕд ма йын загъта, дӕуӕн дӕр дӕ тамако ныууадзын рауайдзӕн, зӕгъгӕ. Ӕмӕ адӕймаджы ныфс бацыд. Йе та, зӕгъӕм, Библи ахуыр кӕнӕм ӕрыгон чызгимӕ, ӕмӕ уый базонгӕ ӕрыгон хоимӕ. Чызг уыны, уыцы хойӕн циндзинад кӕй хӕссы, Йегъовӕйӕн кӕй лӕггад кӕны, уый, ӕмӕ йӕ бафӕндыд фылдӕр базонын, афтӕ цӕмӕн у.

12. Цӕмӕн ис зӕгъӕн, ӕмӕ ӕмбырды алкӕмӕн дӕр йӕ бон у, Библи кӕимӕ ахуыр кӕнӕм, уыдонӕн ӕххуыс кӕнын?

¹² Библи кӕимӕ ахуыр кӕнӕм, уыдон Йегъовӕйы иузӕрдион лӕггадгӕнджытимӕ куы базонгӕ вӕййынц, уӕд бамбарынц, куыд ис Хуыцауы ӕмӕ иннӕты уарзӕн (Иоан. 13:35; 1 Тим. 4:12). Стӕй, куыд загътам, афтӕмӕй цӕуылдӕрты сахуыр вӕййынц, цы зындзинӕдтыл ӕмбӕлынц, ахӕм зындзинӕдтыл чи ӕмбӕлы, уыцы хъусынгӕнджытӕй. Ӕмӕ бамбарынц, уыдонӕн дӕр сӕ бон кӕй бауыдзӕн  хъӕугӕ ивындзинӕдтӕ скӕнын, цӕмӕй Чырыстийы ахуыргӕнинӕгтӕ суой (Дык. з. 30:11). Ӕмбырды алкӕмӕн дӕр йӕ бон у цӕмӕйдӕр баххуыс кӕнын, Библи кӕимӕ ахуыр кӕнӕм, уыдонӕн, цӕмӕй сӕ уырнындзинад фидардӕр кӕна (Матф. 5:16). Ды та куыд баххуыс кӕныс, ӕмбырдтӕм цӕуын чи райдыдта, уыдонӕн ӕмӕ сӕ ныфс куыд бауадзыс?

13, 14. Йесо йӕ апостолтӕм цы цӕстӕй каст, ныфссаст куы уыдысты, уӕд?

¹³ Мах фӕнды, иуцасдӕр ӕмбырдтӕм ӕмӕ хъусын кӕнынмӕ чи нал цӕуы, уыцы хотӕ ӕмӕ ’фсымӕртӕн ӕххуыс кӕнын, цӕмӕй та ахуыргӕнинӕгтӕ цӕттӕ кӕной. Уыцы хъуыддаджы нын Йесо у фӕзминаг. Ӕркӕсӕм, йӕ апостолтӕ ныфссаст куы уыдысты, уӕд сӕм цы цӕстӕй каст, уымӕ.

¹⁴ Йесойы мӕлӕтмӕ бирӕ куы нал хъуыд, уӕд ӕй йӕ апостолтӕ «се ’ппӕт дӕр ныууагътой ӕмӕ алыгъдысты» (Мар. 14:50; Иоан. 16:32). Йесойӕн йӕ апостолтӕ ныфссаст куы уыдысты, уӕд сӕм цы цӕстӕй каст? Куы райгас, уымӕй гыццыл фӕстӕдӕр йӕ фӕдылдзӕуджытӕй кӕмӕндӕрты загъта: «Ма тӕрсут! Цӕут ӕмӕ ме ’фсымӕртӕн зӕгъут [кӕй райгас дӕн, уый]» (Матф. 28:10а). Йесо сыл йӕ къух нӕ ауыгъта. Кӕд ӕй ныууагътой, уӕддӕр сӕ хуыдта йе ’фсымӕртӕ. Йесо дӕр Йегъовӕйау уыд фӕлмӕнзӕрдӕ ӕмӕ хатыргӕнаг (2 Пад. 13:23).

15. Уацамынды чи нал цӕуы, уыцы хотӕ ӕмӕ ’фсымӕртӕм цы зӕрдӕ дарӕм?

¹⁵ Махӕн дӕр зынаргъ сты, уацамынды чи нал цӕуы, уыдон. Нӕ хотӕ ӕмӕ не ’фсымӕртӕ сты, ӕмӕ сӕ тынг уарзӕм! Стӕй нӕ рох нӕу, Хуыцауы хъуыддаджы куыд фыдӕбон кодтой, уый. Иуӕй-иутӕ сӕ Йегъовӕйӕн бирӕ азты дӕргъы лӕггад кодтой (Дзут. 6:10). Мах сӕ тынг мысӕм! (Лук. 15:4–7). Цӕмӕй уыдзӕн бӕрӕг, кӕй сыл тыхсӕм, уый? Нӕ бон куыд у Йесойы бафӕзмын?

16. Нӕ бон куыд у равдисын, ӕмбырдтӕм ӕмӕ хъусын кӕнынмӕ чи нал цӕуы, уыдоныл кӕй тыхсӕм, уый?

¹⁶ Ӕмбырды фембӕлдтӕм-иу сӕ фӕхон. Йесо йӕ апостолты фӕхуыдта фембӕлдмӕ, ӕмӕ сӕ афтӕмӕй ныфс бауагъта (Матф. 28:10б; 1 Кор. 15:6). Махӕн дӕр нӕ бон у, ӕмбырдтӕм ӕмӕ хъусын кӕнынмӕ чи нал цӕуы, уыцы хотӕ ӕмӕ ’фсымӕрты ӕмбырдтӕм хонын. Чи зоны сӕ цалдӕр хатты дӕр бахъӕуа фӕхонын. Ӕмӕ, куы ’рбацӕуой, уӕд, кӕй зӕгъын ӕй хъӕуы, цин кӕндзыстӕм. Йесо дӕр куыннӕ цин кодтаид, йӕ апостолтӕ уыцы фембӕлдмӕ куы ’рбацыдысты, уӕд (Матф. 28:16; абар Лукайы 15:6).

17. Иуцасдӕр ӕмбырдтӕм чи нӕ цӕуы, ахӕм хо кӕнӕ ’фсымӕр Паддзахады залмӕ куы ’рбацӕуа, уӕд-иу куыд хъуамӕ бакӕнӕм?

¹⁷ Зӕрдиагӕй-иу сыл бацин кӕн. Йесо йӕ ахуыргӕнинӕгтимӕ куы фембӕлд, уӕд бӕрӕг уыд, сӕ фенд ын ӕхсызгон кӕй уыд. Уый не ’нхъӕлмӕ каст, уыдон цыдӕр кӕй зӕгъдзысты, уымӕ, фӕлӕ сӕм йӕхӕдӕг бацыд ӕмӕ семӕ ныхас кӕнын райдыдта (Матф. 28:18). Мах та куыд бакӕндзыстӕм, иуцасдӕр ӕмбырдтӕм чи нӕ цӕуы, ахӕм хо кӕнӕ ’фсымӕр Паддзахады залмӕ куы ’рбацӕуа, уӕд? Хъуамӕ-иу ыл зӕрдиагӕй бацин кӕнӕм. Кӕй зӕгъын ӕй хъӕуы, мах нӕ фӕндид, цӕмӕй фӕтыхсдзӕн, ахӕм исты йын зӕгъын. Цы йын зӕгъӕм, уый куы нӕ зонӕм, уӕд ын уыдзӕн ӕнӕуи зӕгъӕн, йӕ фенд нын тынг ӕхсызгон кӕй у.

18. Ӕмбырдтӕм ӕмӕ хъусын кӕнынмӕ чи нал цӕуы, уыцы хъусынгӕнджыты нӕ бон куыд у ныфс уадзын?

¹⁸ Ныфс-иу сӕ бауадз. Ӕвӕццӕгӕн, Йесойы ахуыргӕнинӕгтӕ афтӕ хъуыды кодтой, ӕмӕ сӕ бон нӕ бауыдзӕн хорз хабар ӕгас дунейы фехъусын кӕнын. Фӕлӕ сын Йесо загъта: «Ӕз алы бон дӕр уыдзынӕн уемӕ» (Матф. 28:20). Ӕмӕ сӕ йӕ ныхӕстӕй ныфс бауагъта. Уымӕй бирӕ нӕ рацыд, афтӕ ахуыргӕнинӕгтӕ «амыдтой ӕмӕ хъусын кодтой... хорз хабар» (Хъуыд. 5:42). Ӕмбырдтӕм ӕмӕ хъусын кӕнынмӕ чи нал цӕуы, уыцы хъусынгӕнджыты дӕр фӕхъӕуы ныфс бауадзын. Чи зоны сӕм афтӕ кӕсы, ӕмӕ сӕ бон нӕ бауыдзӕн ногӕй хъусын кӕныны  хъуыддаджы архайын. Уӕд сын нӕ бон у зӕгъын, хъусын кӕнынмӕ иунӕгӕй кӕй нӕ цӕудзысты. Ӕмӕ та хъусын кӕнын куы райдайой, уӕд нӕ бон уыдзӕн семӕ уацамынды цӕуын. Уыдон нӕ тынг бузныг уыдзысты, кӕй сын ӕххуыс кӕнӕм, уый тыххӕй. Уӕдӕ йӕ куы уыной, ныр дӕр сӕ нӕ хотӕ ӕмӕ не ’фсымӕртыл кӕй нымайӕм, уӕд сын уый, гӕнӕн ис, сӕ зӕрдӕтӕ бацагайа. Ӕмӕ та уӕд Хуыцауы хъуыддаджы зӕрдиагӕй архайын райдайдзысты. Уый ӕнӕхъӕн ӕмбырдӕн дӕр стыр цины хос куыннӕ уыдзӕн!

19. Зӕрдиагӕй нӕ цы фӕнды ӕмӕ цӕмӕн?

¹⁹ Кӕдмӕ хъӕудзӕн ахуыргӕнинӕгтӕ цӕттӕ кӕнын? Цалынмӕ ацы цардӕвӕрды кӕрон не ’рцӕуа, уӕдмӕ (Матф. 28:20). Цымӕ уый нӕ бон бауыдзӕн? Бӕгуыдӕр. Уый у нӕ фидар фӕнд! Мах агурӕм, «ӕнусон царды фӕндагыл цӕуын кӕй фӕнды, уыдоны», ӕмӕ уымӕн нӕ рӕстӕг, нӕ тыхтӕ ӕмӕ не ’хца не ’вгъау кӕнӕм (Хъуыд. 13:48). Афтӕмӕй фӕзмӕм Йесойы. Уый загъта: «Мӕнӕн мӕ хӕринаг у, чи мӕ рарвыста, уымӕн йӕ фӕндон ӕххӕст кӕнын ӕмӕ йын йӕ хъуыддаг кӕронмӕ ахӕццӕ кӕнын» (Иоан. 4:34; 17:4). Ӕмӕ мах дӕр зӕрдиагӕй фӕнды, нӕ бар цы хъуыддаг ис, уый кӕронмӕ ахӕццӕ кӕнын (Иоан. 20:21). Стӕй нӕ фӕнды, цӕмӕй, ӕмбырдтӕм ӕмӕ хъусын кӕнынмӕ чи нал цӕуы, уыцы хотӕ ӕмӕ ’фсымӕртӕ та хъусын кӕнын райдайой, ӕмӕ иумӕ уыцы хъуыддаджы кӕронмӕ архайӕм (Матф. 24:13).

20. Филиппӕгтӕм 4:13 стихӕй куыд зыны, Йесо нын кӕй бафӕдзӕхста, уыцы хъуыддаг нӕ бон кӕронмӕ ахӕццӕ кӕнын кӕй у, уый?

²⁰ Йесойы фӕдзӕхст ӕххӕст кӕнын афтӕ ӕнцон нӕу. Фӕлӕ ацы хъуыддаг иунӕгӕй нӕ аразӕм. Йесо нын зӕрдӕ бавӕрдта, немӕ кӕй уыдзӕн. Мах ахуыргӕнинӕгтӕ куы фӕцӕттӕ кӕнӕм, уӕд вӕййӕм «Хуыцауы ӕмкусджытӕ» ӕмӕ фӕархайӕм «Чырыстиимӕ иудзинады», ома нын Йегъовӕ ӕмӕ Чырысти феххуыс кӕнынц (1 Кор. 3:9; 2 Кор. 2:17). Ӕмӕ уымӕ гӕсгӕ нӕ бон у ацы хъуыддаг кӕронмӕ ахӕццӕ кӕнын. Цӕй стыр кад у ӕмӕ нын куыд ӕхсызгон у Йесойы фӕдзӕхст ӕххӕст кӕнын ӕмӕ иннӕтӕн дӕр уыцы хъуыддаджы ӕххуыс кӕнын! (Бакӕс Филиппӕгтӕм 4:13.)