1. Base ed Mateo 28:18-20, antoy ingganggan nen Jesus ed saray disipulo to?

NEN inmoli si Jesus, sikatoy nampanengneng ed saray disipulo to ya nantitipon diad Galilea. Walay importante ya imbaga tod sikara. Nabasa tayo itan diad Mateo 28:18-20.​—Basaen.

2. Anto ran tepet so ebatan tayo?

² Say ganggan nen Jesus ya ibangat iray totoo pian magmaliw iran disipulo to et nepeg met ya unoren na kada lingkor nen Jehova natan. Ebatan tayo sirin so taloran tepet ya walay koneksion to ed satan ya ganggan nen Jesus. Unona, anto ni nepeg tayon gawaen nilikud ed pangibangat tayo ed saray iyaaralan? Komadua, panon ya makatulong so interon kongregasyon ed iyaligwas na saray iyaaralan? Tan komatlo, antoy gawaen tayo pian natulongan tayo ray inaktibo ya mibiang lamet ed panagpulong ya kimey?

3. Anton importantin detalye so imbaga nen Jesus diad samay ganggan to?

³ Malinew so instruksion nen Jesus. Nepeg tayon ibangat ed totoo iray ganggan to. Balet imanoen iyan importantin detalye. Ag-imbaga nen Jesus ya: ‘Ibangat yod sikara so amin ya ingganggan kod sikayo.’ Imbes, say imbaga to: “Ibangat yo ran mangunor ed amin ya ingganggan kod sikayo.” Agtayo labat sirin ibabangat ed saray iyaaralan tayo na Biblia iray ganggan ya nepeg dan unoren. Importante ya ipanengneng tan  ipaliwawa tayod sikara no panon dan unoren iratan. (Gawa 8:31) Akin et importante itan?

4. Antoy nayarin pangikomparaan tayo ed pangibangat tayod saray iyaaralan ya unoren iray ganggan nen Kristo?

⁴ Pian natalosan tayo no akin ya importantin ibangat tayo ray totoo no panon dan unoren iray ganggan nen Jesus, nia so sakey ya ilustrasyon. Antoy gawaen na driving instructor pian nibangat to ray estudyante to ya unoren da iray traffic rules? Unona, ibangat tod sikara iray traffic rules ya kaukolan dan unoren. Balet pian nibangat tod sikara no panon dan unoren iratan, wala ni kaukolan ton gawaen. Ibaan to ra ya manmaneho ed karsada, insan to ipanengneng tan ipaliwawa no panon dan unoren iray traffic rules ya inaral da. Akin et dugaruga itan ya ilustrasyon?

5. (a) Base ed Juan 14:15 tan 1 Juan 2:3, antoy nepeg tayon ibangat ed saray iyaaralan tayo? (b) Antoy gawaen tayo pian natalosan na saray iyaaralan tayo no panon dan iyaplika iray prinsipyo ed Biblia?

⁵ Ibabangat tayod saray iyaaralan tayo iray ganggan na Dios. Balet wala ni nepeg tayon gawaen. Nepeg tayon ibangat no panon dan iyaplika iray nanaaralan da. (Basaen so Juan 14:15; 1 Juan 2:3.) Diad mismon alimbawa tayo et nanengneng na saray iyaaralan no panon dan niyaplika iray prinsipyo ed Biblia sano wala rad eskuelaan, trabaho, odino no manrerelaks ira. Istoryaen tayo sirin ed sikara no panon tayon inyaplika so sakey ya bilin na Biblia ya lapud satan et nipaliis tayod peligro odino akapandesisyon tayoy duga. No manpikasi tayo kaiba iray iyaaralan tayo, kerewen tayod si Jehova ya igiya to ra panamegley na masanton espiritu to.​—Juan 16:13.

6. Anto ni nepeg tayon gawaen pian nibangat tayo so iyaaralan tayo ya unoren toy ganggan nen Jesus?

⁶ Anto ni nepeg tayon gawaen pian nibangat tayo so iyaaralan tayo ya unoren toy ganggan nen Jesus? Ipurek tayod sikato ya kaukolan ton ibangat met so arum pian natulongan to ran magmaliw ya disipulo. Natural labat ya diad unaan et natatakot ya manpulong iray iyaaralan. Kanian anosan tayo ran ibangat pian mas natalosan da iray katuaan ed Biblia tan ombiskeg so pananisia ra. No onsasabi ed puso da iray nanaaralan da, seguradon labalabay da met la itan ya ipaamta ed arum. Panon tayon nagawaan itan?

7. Antoy gawaen tayo pian napakiwas so iyaaralan tayo ya ipaamta ed arum so maong a balita?

⁷ Tepetan so iyaaralan tayo: “Anto ray balibalin epekto ed sika nen iyaaplikam la ray nanaaralan mod Biblia? Parad sika, kasin kaukolan met iyan naamtaan na arum? Antoy gawaen mo pian natulongan mo met ira?” (Pro. 3:27; Mat. 9:37, 38) Ipanengneng mod iyaaralan mo iray tract ya kaibad Uusaren ed Panagbangat (Teaching Toolbox) tan pampilim no dinan ditan so iisipen ton nagustoan na saray kakanayon, kakaaro, o katrabaho to. Ikdan mo so iyaaralan mo na sarayan tract tan ibangat mo no panon to iratan ya iyopresi. Insan no naaprobaan lan magmaliw ya agbautismadon manangipalapag, lanang mon ibaan diad panagpulong.​—Ecl. 4:9, 10; Luc. 6:40.

8. Akin et importantin pabiskegen na saray iyaaralan tayo so panangaro da ed Dios tan ed kapara dan too? (Nengnengen met so kahon ya “ No Panon Tayon Natulongan Iray Iyaaralan Tayo ya Mas Aroen so Dios.”)

⁸ Tandaan tayo ya ingganggan itayo nen Jesus ya ibangat tayo ray totoo ya ‘mangunor ed amin ya ingganggan to.’ Kaiba ed satan imay duaran sankaimportantian ya ganggan​—aroen so Dios tan aroen so kaparan too. Baleg so koneksion na saratan ya dua ed kimey  ya panagpulong tan panagbangat. (Mat. 22:37-39) Akin et ontan so nibaga tayo? On, ta no say sakey et inaro toy Aman Jehova tan say kapara ton too, atan so mamakiwas ed sikaton manpulong. Natural met labat ya diad unaan et ompan natatakot ya manpulong iray iyaaralan. Pero ipaseguro tayod sikara ya tulongan ira nen Jehova pian kalnakalna dan nalabanan so takot da ed too. (Sal. 18:1-3; Pro. 29:25) Nanengneng ed kahon na sayan artikulo iray nepeg tayon gawaen pian say iyaaralan tayo et mas aroen to so Dios. Panon balet ya makatulong so interon kongregasyon?

9. Diad samay ilustrasyon nipaakar ed sakey ya manaaral a manmaneho, antoy nepeg ton gawaen pian makaaral?

⁹ Isipen pa lamet imay ilustrasyon niman nipaakar ed samay manaaral ya manmaneho. Legan ya manmamaneho kaiba so driving instructor to, antoy gawaen to pian makaaral? Kaukolan ton dengelen so ibabaga na instructor to tan imanoen to so gagawaen na arum ya driver ya maalwar ed panmamaneho ra. Singa bilang, ompan ipaimano na instructor to so sakey a driver ya pinalugaran to so arum pian makalusot ira. Odino, ipaimano to so sakey a driver ya inkuyep toy headlight to pian agnalaram iray kasabatan to. Seguradon makaaral so student driver ed saratan ya nanenengneng to.

10. Antoy nepeg ya gawaen na iyaaralan pian onaligwas ed espiritual?

¹⁰ Say sakey ya iyaaralan na Biblia ya onggagapo lan manbiahe ed dalan ya paarap ed bilay et aglabat makaaral ed samay mismon mangiyaaral ed sikato, noagta makaaral met ed maong ya alimbawa na arum a lingkor nen Jehova. Anto sirin so nepeg ya gawaen na iyaaralan pian onaligwas ed espiritual? Nepeg ya onatendi ed saray aral. Akin? On ta no miaral, naaruman so amta to ed Biblia, ombiskeg so pananisia to, tan lalo ton naaro so Dios. (Gawa 15:30-32) Sakey ni, nakabat to iray nanduruman agagi ya nayarin kapara to na situasyon. Tan nanengneng to met so maabig ya alimbawa na agagi diad pangipanengneng na panangaro. Amtaen tayo so pigara ed saratan.

11. Anto ran alimbawa so nayarin nanengneng na iyaaralan na Biblia no miaral, tan antoy epekto na satan ed sikato?

¹¹ Imanoen irayan situasyon. Walay iyaaralan na Biblia ya bukor toy mamapabaleg ed ananak to, tan naimano to ed aral so sakey a sister ya ontan met so situasyon to. Panbiliban to so pansasagpot na sayan sister ya miaral kaiba iray angkekelag nin ananak to. Walay iyaaralan ya irap ton itunda so pansisigarilyo to, tan akabat to so sakey a brother ya ontan met so problema to nensaman. Inistorya ed sikato na brother ya nitunda to so bisyo to lapud panangaro tod si Jehova. (2 Cor. 7:1; Fil. 4:13) Insan to imbaga ed samay iyaaralan, “Sarag mo ’tan ya itunda.” Kanian mas desidido la natan ya itunda so bisyo to. Walay marikit ya iyaaralan na Biblia ya lanang ton naiimano so sakey a kabataan ya sister a malikeliket ed bilay to bilang Tasi nen Jehova. Kanian napapaisip laingen no akin.

12. Akin et walay nitulong na kada sakey ed kongregasyon ed iyaligwas na saray iyaaralan na Biblia?

¹² No nakabat na saray iyaaralan so nanduruman matoor ya agagi, makatulong itan pian nanengneng da no panon dan niyaplika so ganggan nen Kristo ya aroen so Dios tan say kaparan too. (Juan 13:35; 1 Tim. 4:12) Tan singa abitla niman, say sakey ya iyaaralan et makaaral ed saray agagi ya kapareho toy situasyon. Napaneknekan tod alimbawa ra ya sarag to met so manguman pian magmaliw ya  disipulo nen Kristo. (Deu. 30:11) Kanian kada sakey ed kongregasyon et walay nitulong to pian onaligwas ed espiritual iray iyaaralan na Biblia. (Mat. 5:16) Sika ey, antoy gagawaen mo pian napaseseg mo iray mimiaral lan iyaaralan na Biblia?

13-14. Panon so impantrato nen Jesus ed saray apostol to sanen kinmapuy ira?

¹³ Labay tayon tulongan iray inaktibon agagi ya unoren da lamet so ganggan nen Kristo ya pulongan tan bangatan iray totoo. Antoy gawaen tayo? Makaaral tayo ed impantrato nen Jesus ed saray apostol to sanen kinmapuy ira.

¹⁴ Nen nasusumpal lay ministeryo nen Jesus diad dalin tan asingger lay ipatey to, sikatoy tinaynan na saray apostol to tan ‘batik iran amin.’ (Mar. 14:50; Juan 16:32) Panon so impantrato nen Jesus ed sikara anggano kinmapuy ira? Ag-abayag kayari na inkioli to, oniay imbaga nen Jesus ed arum ya papatumbok to: “Agkayo natatakot! La kayo, ibaga yod saray agagik [ya inmoli ak la].” (Mat. 28:10a) On, ag-inisip nen Jesus ya aglan balot napapawil na saray apostol to so datin seseg da. Diad tua, tinawag to ni ra ingen ya “agagik” anggano sikatoy tinaynan da. Inalig nen Jesus si Aman Jehova​—kinasian to ra tan mabulos to ran pinerdona.​—2 Ara. 13:23.

15. Antoy nalilikna tayo ed saray agagi ya akatunda ed panagpulong?

¹⁵ Singa si Jesus, sankanonot tayo nin siansia iramay akatunda ed panagpulong. Inar-aro tayo ra ta agagi tayo ra! Agtayo nalingwanan so matoor ya impanlingkor da nensaman. Arum ed sikara et pigaran dekada ya nanlingkor ed si Aman Jehova. (Heb. 6:10) Naiiliw tayo la ra! (Luc. 15:4-7) Anto sirin so gawaen tayo pian naalig tayoy Jesus tan nipalikna tayo ya sankanonot tayo ra?

16. Panon tayon nipanengneng ya sankanonot tayo ray inaktibon agagi tayo?

¹⁶ Imbitaan iran miaral. Say sakey ya ginawa nen Jesus pian napaseseg to ray apostol to nen kinmapuy ira et inimbitaan to ra ed sakey ya pantitipon. (Mat. 28:10b; 1 Cor. 15:6) Ontan met so gawaen tayo natan, pasesegen tayo iray inaktibo ya miaral lamet. Ompan kaukolan ya maminpigapiga tayo ran imbitaan antis iran miaral. Seguradon malikeliket si Jesus nen linmad saman ya pantitipon iray disipulo to.​—Ikompara so Mateo 28:16 tan Lucas 15:6.

17. Antoy gawaen tayo no walay inaktibon agi ya akiaral?

¹⁷ I-welcome ira ed aral. Impalikna nen Jesus ed saray disipulo to ya malikeliket ta anengneng to ra lamet; sikato la so inmunan inmasingger tan akitongtong ed sikara. (Mat. 28:18) Antoy gawaen tayo no walay inaktibo ya akiaral? Sikatayo la so unonan onasingger tan mitongtong ed sikato, tan ipalikna tayon welcome dia ed aral. Ompan diad unona et agtayo amta no antoy ibaga tayo. Maabig no say ibaga tayo et malikeliket tayo ta anengneng tayo, tan ibaga tayo itan diad paraan ya agnabaingan.

18. Antoy gawaen tayo pian napabiskeg tayoy liknaan na saray inaktibon agagi?

¹⁸ Pabiskegen so liknaan da. Ompan inisip na saray disipulo nen Jesus ya agda sarag ya pulongan so interon mundo. Balet oniay impaseguro tod sikara: “Wala ak ed sikayo ed amin ya agew.” (Mat. 28:20) Kasin binmiskeg so liknaan da ed satan ya imbaga to? On, ta ag-abayag kayari na impitongtong nen Jesus ed sikara et ginawa day anggaay nayarian da ya ‘ibangat  tan iyabawag so maong a balita.’ (Gawa 5:42) Kaukolan tayo met ya pabiskegen so liknaan na saray inaktibon agagi. Ompan iisipen da ya agda la amtay manpulong. Ipaseguro tayo ya wadtan tayon onsuporta ed sikara. No mibiang la rad panagpulong, miulop tayod sikara. Seguradon pisalsalamatan day suporta tayod sikara ed satan ya kimey. No nalikna da ya agagi nin siansia so turing tayod sikara, ompan napakiwas iran magmaliw lamet ya aktibo tan seguradon panliketan itan na interon kongregasyon.

19. Anto so labalabay tayon gawaen, tan akin?

¹⁹ Anggad kapigan tayo gawaen so kimey ya panagpulong tan panagbangat? Anggad nasumpal so kaunoran a parte na sistema na mundo. (Mat. 28:20; nengnengen so Glosaryo, “Kaunoran a parte na sistema na mundo.”) Kasin sarag tayo itan? On, tan atan so determinado tayon gawaen! Malikeliket tayon usaren so panaon, biskeg, tan saray kaykayarian tayo pian naanap tayo iramay “walaan na dugan kipapasen na puso parad bilay ya andi-anggaan.” (Gawa 13:48) No ontan so gawaen tayo, aaligen tayoy alimbawa nen Jesus. Imbaga to: “Say kanen ko et say panggaway linawa na samay angibaki ed siak tan say panumpal ed kimey to.” (Juan 4:34; 17:4) Atan met so labalabay tayon gawaen. Labay tayon sumpalen so kimey ya inmatalek nen Jesus ed sikatayo. (Juan 20:21) Tan labay tayon nakaiba so arum ya mansungdo ed sayan kimey, pati saray inaktibo.​—Mat. 24:13.

20. Base ed Filipos 4:13, akin et sarag tayon sumpalen so kimey ya ipapagawa nen Jesus ed sikatayo?

²⁰ Amta tayo ya aliwan mainomay ya gawaen imay ipapagawa nen Jesus. Balet tandaan tayo ya agtayo bukbukor ed sayan kimey. Insipan nen Jesus ya tulongan to tayo. Legan tayon gagawaen so kimey ya panagpulong tan panagbangat, ipapasen itayo nen Jehova ya “kakimeyan” to tan ‘kaiba tayoy Kristo.’ (1 Cor. 3:9; 2 Cor. 2:17) Kanian segurado tayo ya sarag tayon sumpalen iya. Baleg ya pribilehyo tan makapaliket so pibiang ed sayan kimey kanian tulongan tayo so arum ya ontan met so gawaen da!​—Basaen so Filipos 4:13.