1. A doltirakl er a Mateus 28:18-20, e ngera ngdilu Jesus er a redisaiplo er ngii?

A URIUL er a lebekiis er a kodall a Jesus, e ngmlo duum er a redisaiplo er ngii er a Galilea. Ngmla er ngii a klou a ultutelel el tekoi el bo louchais er tir. Tiang ngerang? Kede metik a tekingel el ngar er a Mateus 28:18-20.​—Monguiu.

2. Ngera el ker a bo dosaod?

² A tekingel a Jesus el mo meruul er a redisaiplo a dirrek el mora derta el mesiungel a Dios er chelecha el taem. Me a leuaisei, e bo dosaod a edei el ker el obengkel a ngerachel el Jesus a milskid. A kot, e ngera dirrek el uldimukl er a dolisechakl er a rechad a llechul a Dios? A ongerung, te mekera rokui el publisher er a ongdibel a lolengeseu er a remesuub er a Biblia el mukeroul er a tekoi er a klereng? A ongedei, kede mekera ngosuterir tirke el inactive el lmuut el mo omerk er a klumech?

3. Ngera el ileakl el tekoi a mle uldimukl er a tekingel a Jesus?

³ Ngkmal bleketakl a tekingel a Jesus. Ngkired el olisechakl a tekingel el mora rechad. Me nguaisei, engdi ngdiak el soad el choitii a ta er a klou a ultutelel el tekoi. A Jesus a dimlak ledu el kmo: ‘Molisechakl er tir aike el rokui el bla kdu er kemiu.’ Ngbai dilu el kmo: Molisechakl er tir el mo ‘oltirakl a ikel rokui el bla kdu er kemiu.’ A bo doltaut er tia el tekingel a Jesus a belkul a kmo ngdiak di dosisecheklii a chad el dosuub lobengkel, ngdirrek el kired el omekrael er ngii. (Rel. 8:31) E ngera uchul me kede meruul uaisei?

4. Momekesiu er a rolel e ngsebeched el osisecheklii a chad el mesuub el mo olengesenges a tekingel a Kristus.

 ⁴ A bo ‘doltirakl’ a belkul a kmo kede olengesenges. Ka me domekesiu er a rolel a dosisecheklii a chad el mo meduch el oltirakl me a lechub e ngolengesenges a tekingel a Kristus. Ngmekera chad a losisecheklii a ta er a chad el mesuub el omekall el mo oltirakl a llach er a rael? A kot, e ngosisecheklii er a llechul a rael. Me nguaisei, engdi a lsoal a bo loltirakl aika el llach, e ngika el olisechakl a ngar ngii a lmuut el ta er a tekoi el kirel meruul er ngii. Ngkirel el obengkel sel lomekall e omekrael e olengeseu er ngii me bo el sebechel loltaut aike el lesiluub. Me ngera kede suubii er tia el okesiu?

5. (a) A doltirakl er a Johanes 14:15 me a 1 Johanes 2:3, e ngera kired el osisecheklterir tirke el dosuub lobengterir el mo meruul er ngii? (b) Mouchais a bebil tekoi el sebeched el meruul el omekrael er tirke el dosuub lobengterir.

⁵ Sel dosuub a Biblia lobengterir a rechad, e kede olisechakl er tir er aike el soal a Dios a doruul. Me nguaisei, engdi ngkired el meruul a lmuut el betok. Ngkired el osisecheklterir el mo oltaut a tekoi el losuub er a klengar er tir. (Monguiu er a Johanes 14:15; 1 Johanes 2:3.) Ngokiu a kerebai er kid, e ngsebeched el ochotii a rolel e ngsebechir el oltaut a omellach er a Bades sel lengar er a skuul, ureor, me a lechub e te meruul a tekoi er a ongelaod. Ngsebeched louchais er tir er a rolel e kede mlukerreu er a tellemall e le kid el uleltirakl a ulekrael er a Biblia me a lechub a rolel e a ulekrael er a Biblia a ngilsukid el mo ungil melilt a tekoi. E sel dobengterir e ngsebeched el meluluuch el mora Jehovah lolengit er a chedaol reng er ngii me lomekrael er tir.​—Jn. 16:13.

6. Ngera uldimukl er a dolisechakl er a rechad el mo oltirakl a tekingel a Jesus?

⁶ Ngera uldimukl er a dolisechakl er a rechad el mo oltirakl a tekingel a Jesus? Ngkired el ngosuterir el mekurulii a urungulir el mo meruul er a redisaiplo. A rebebil el mesuub a Biblia a locha medakt el mo teloi er a ureor er a berkel a klumech. Me ngkired el oba kllourreng sel domesterir a ulekrael el ngii a mo menglou er a klemedengei er tir, e remutech a rengrir, e odbecheterir el mo omerk er a klumech. Me ngera sebeched el rullii el ngosuterir el mekurulii a urungulir el mo omerk er a klumech?

7. Ngmekera dengesuir a chad el dosuub lobengkel el mekurulii a urungulel el mo omerk er a klumech?

⁷ Ngsebeched el oker er ngike el dosuub lobengkel aika el ker el kmo: “Ngmilekera lmuut el mo ungil a klengar er kau e le kau el uleltaut a omellach er a Biblia? Omomdasu e a rebebil er a rechad te ousbech er tia el klumech? Ngera sebechem el meruul el ngosuterir?” (Osi. 3:27; Mt. 9:37, 38) Mocholt aike el tract el ngar er a Blil a Dongu e mdu er ngii me lengilt aike el lomdasu e te mo semeriar a rechedal, resechelil, me a lechub a rechad er a urerel. Bsa bebil er a tract. E mdak el terung el practice er a ungil rolel a bo lorous aika el tract. E sel bo el ta er a dirkak el metecholb el publisher, e bo mobengkel el oldingel e momekrael er ngii.​—Oli. 4:9, 10; Lk. 6:40.

8. Ngera me ngklou a ultutelel el kirir tirke el dosuub lobengterir a bo lomekeroul er a mesisiich el bltikerreng el mora Dios me a ngar bita er tir? (Dirrek el momes er a baks el “ Rolel a Donglou er a Bltkil a Rengrir Tirke el Dosuub Lobengterir el Mora Dios.”)

⁸ Lak dobes el kmo a Jesus a millekoi er kid el mo olisechakl er a rechad el mo ‘oltirakl a ikel rokui’ el bla ledung. E tia uldimukl er aike el eru el kot el ngarbab el llach, el ngii a mo betik a rengud er a Dios me a ngar bita er kid. Aika el eru el llach a ulekuak er a berkel a klumech me a omeruul el disaiplo. (Mt. 22:37-39) Ngoeak a ngera el rolel? A klou a ultutelel  el uchul me kede omerk er a klumech a bltikerreng, el bltikerreng el mora Dios me a rengar bita er kid. Nguaisei el bebil er a remesuub er a Biblia a locha mo medakt sel lolatk a mo omerk er a klumech. Engdi ngsebeched el olterekokl a rengrir el kmo ngokiu a ngelsuil a Jehovah e ngmo sebechir el mo mesisiich er a datk er a rechad. (Psa. 18:1-3; Osi. 29:25) Sel baks el obengkel tia el suobel a mesaod a rolel e ngsebeched el ngosuir ngike el dosuub lobengkel el mo menglou er a bltkil a rengul el mora Dios. E a ongdibel, ngera ngsebechel meruul el ngosuterir a remesuub er a Biblia el mo menglou er a bltikerreng er tir?

9. Ngar sel okesiu er a chad el mesuub lomekall, e ngoeak a ngera el rolel e ngmesuub a meklou a ultutelel el tekoi?

⁹ Ka me deluut el mo mesaod er sel okesiu er a chad el mesuub lomekall. Sel lengar er a mlai lobengkel ngike el olisechakl er ngii, e ngoeak a ngera el rolel e ngmesuub? Ngoeak sel lorrenges er ngika el olisechakl e lomes er a rungil lomekall. El ua tiang, ngike el olisechakl a sebechel tutkii a chad lomekall el omsa techellel a ta er a chad me ngmora medal. Me a lechub e ngtutkii a chad lomekall el ngii a remuul a light er a mlil el mora low me a rumekall el me engelakl er ngii a diak el bo el medidech a mederir. A chouaika el tekoi a osisecheklii ngika el mesuub er a ungil rolel a bekall el sebechel loltirakl.

10. Ngera mo ngosuir a chad el mesuub el olengeriakl er a tekoi er a klereng?

¹⁰ Me ngdi osisiu, a chad el mesuub el ngii a merael er a rael el mora klengar a diak di lengai a klubelel er ngike el olisechakl er ngii, ngdirrek el ngmai a klubelel er a ungil kerebai er a remesiungel a Jehovah. Me a leuaisei, e ngera sebechel ngosuterir a remesuub el olengeriakl er a tekoi er a klereng? Sel lemei er a miting er a Rekristiano. E ngera uchul? A tekoi el lerenges er a miting a mo dochel a klemedengei er tir, e smisichii a klaumerang er tir, e ngosuterir el menglou er a bltkil a rengrir el mora Dios. (Rel. 15:30-32) Ngdirrek el sebechir tirke el lolisechakl er tir el ngosuterir el mo medengelterir a rudam me a rudos el tir a ngar ngii a lekaisisiu er ngii. Ngera el olechotel a bltikerreng er a Rekristiano a sebechir el mo mesang er a ongdibel? Momtab aika el bebil er a olechotel.

11. Ngera bebil er a tekoi el sebechel a chad el mesuub el mes er a ongdibel, e ngera ngsebechel rullii el mo er ngii?

¹¹ A mesobil chedil el mesuub a omes er a Kristiano el chelebangel er a osisiu el blekeradel el uai ngii. Ngkmal rutechii a rengul sel lomtab er a blakerreng er ngika el odos el lobetiterir a remekekerei el ngelekel el mei er a miting er a Blil a Ongdibel. A chad el mesuub el melasem el mo diak loloko a dekool a mo medengelii a odam el mle chelebangel er a osisiu el mondai e mlo mesisiich er ngii. A odam a ouchais er ngii el kmo, sera lemukeroul a bltkil a rengul el mora Jehovah e tiang a uldbechii el mo olengesenges a llechul. (2 Ko. 7:1; Fil. 4:13, NW) Me a uriul er a lerenges a tekingel ngika el odam, e ngmengal mlo ulterekokl a rengul er a ledu er ngii el kmo, “Kau me ngsebechem el mo diak moloko a dekool.” A ngeasek el dil el mesuub a omes er a ngeasek el odos el kmal dmeu a rengul er a klengar er ngii el ta er a Sioning. Tia rullii el mo soal el mo medengelii a uchul me ngika el odos a kora di dmeu a rengul.

12. Ngera me ngsebeched el melekoi el kmo a derta el chad er a ongdibel a ngar ngii a sebechir rullii el ngosuterir tirke el mesuub?

¹² Me tirke el mesuub sel bo lodengelterir a reblak a rengrir el rudam me a rudos, e te ngmai a klubelir er a rolel a lolengesenges er a tekingel a Kristus el mo betik a rengrir er a Dios me a ngar bita er tir. (Jn. 13:35;  1 Ti. 4:12) Ngdirrek el uaike el dulsaod, tirke el mesuub a sebechir el ngmai a klubelir er a rudam me a rudos el chelebangel a osisiu el blekeradel. Te suubii el kmo ngkmal sebechir el ngmodech a tekoi er a klengar er tir me bo el sebechir el mo disaiplo er a Kristus. (Dut. 30:11) A derta el chad er a ongdibel a sebechir el meruul a kakerous el tekoi el ngosuterir tirka el mesuub el mo olengeriakl. (Mt. 5:16) Ngera ke meruul el smisicheterir tirke el mesuub a Biblia el mei er a miting?

13-14. Ngmle uangera omerellel a Jesus el mora rechapostol er ngii er a bo el mechitechut a rengrir?

¹³ Ngsoad el ngosuterir tirke el inactive el rudam me a rudos el lmuut el me teloi er a ureor er a berkel a klumech me a omeruul el disaiplo. A omerellel a Jesus el mora rechapostol er ngii er a bo el mechitechut a rengrir a ochotii a rolel e ngsebeched el meruul er tiang.

¹⁴ Ngar er a ulebengelel a omesiungel el ngar tia el chutem er a uchei er a lemad, e a rechapostol er ngii a “chilitii e chemiis.” (Mk. 14:50; Jn. 16:32) Me ngmle uangera omerellel a Jesus el mo er tirka el apostol el mle telkib el taem el lemechitechut a rengrir? A kedeb el taem er a uriul er a okisel, e ngdilu er a rebebil er a rultirakl er ngii el kmo: “Lako medakd; e morael el mo subedeterir ar udam er ngak [el kmo ak mla mekiis].” (Mt. 28:10a, BT) A Jesus a dimlak lotngeklterir a rechapostol er ngii. Ngdirk ulemekedong er tir el “ar udam er ngak” alta te chilitii. A Jesus a di ua Jehovah el chubechub e ousubes.​—2 Ki. 13:23.

15. Ngua ngera uldesued el kirir tirke el mla mo diak leteloi er kid el omerk er a klumech?

¹⁵ Me ngdi osisiu, kede kmal omekerreu er tirke el mla mo diak leteloi er kid el omerk er a klumech. Tirka rudam me a rudos er kid, e kmal betik a rengud er tir! Kede dirk melatk a meringel el urerir, el bebil er tir a mle meringel loureor el betok el rak. (Heb. 6:10) Kede mera el miss er tir! (Lk. 15:4-7) Ngoeak a ngera el rolel e ngsebeched el oukerebai er a Jesus el ochotii el kmo kede kmal omekerreu er tir?

16. Ngmekera dochotii el mora re inactive el odam me a odos er kid el kmo kede omekerreu er tir?

¹⁶ Mongemedaol er tir. A ta er a rolel e a Jesus a millisiich er a rechapostol er ngii er a bo el mechitechut a rengrir a milengemedaol er tir el mora miting. (Mt. 28:10b; 1 Ko. 15:6) Me ngdi osisiu er chelecha el taem, kede melisiich er tirke el inactive sel dongemedaol er tir el mei er a miting er a ongdibel. Kede medengei el kmo nglocha mo kired el mengemedaol er tir el betok el taem e ngmochu sebechir el mei. A Jesus a ulterekokl el kmal mlo dmeu a rengul er a lekengei a rechapostol er ngii el mei er a miting.​—Momekesiu er a Mateus 28:16 me a Lukas 15:6.

17. Kede mo mekerang a lsekum a inactive el chad a mei er a miting?

¹⁷ Mouetkeu er tir. A Jesus a rirelleterir a rultirakl er ngii el mo ungil a rengrir er a bo lesang, e di mle ngii el mo mengedecheduch er tir. (Mt. 28:18) Me kede mo mekerang a lsekum a chad el inactive a mei er a Blil a Ongdibel? Ngkired el osiik a techall el mo outkeu er ngii. Kede locha bekikl e le ngdiak dodengei el kmo kede mo dmu el kmo ngerang. Nguaisei engdi ngsebeched el ouchais er ngii el kmo ngkmal dmeu a rengud el mesang el ngar er a rolel e ngdiak derellii el mo merur.

18. Ngmekera dolisiich er tirke el inactive?

¹⁸ Molisiich er tir. A rultirakl er a Jesus a locha kmal mle medakt er a ngerachel el mo omerk er a klumech er a beluulechad el rokir. Engdi a Jesus a millisiich a rengrir er a ledu el kmo: “Ngak a mo obengkemiu el di blechoel.” (Mt. 28:20) Me tia ngmla er ngii a lerellii?  Ngmla er ngii. E le uriul er tiang, e te “dimlak le meterob lomerk” er a ungil chais. (Rel. 5:42, BT) Tirke el inactive me te dirrek el ousbech a omelisiich. Te locha medakt el lmuut el mo omerk er a klumech. Me ngsebeched el melisiich er tir el kmo ngdiak di bo el tir el tang el omerk er a klumech. Sel bo el kltmokl, e ngsebeched el obengterir. Te ulterekokl el mo oba omereng el saul el kirel a ngelsuid sel lluut el mo teloi er tia el ureor. Me sel dochotii el kmo kede omes er tir el rudam me a rudos er kid, e te locha sebechir el lmuut el mo omerk er a klumech, el uchul a deurreng el mora rokui el chad er a ongdibel.

19. Ngera urunguled, e ngera uchul?

¹⁹ Kede meruul er tia el ureor er a omeruul el disaiplo el mo lmuut er oingerang? Ngmo lmuut er a ulebongel er a blekeradel er tia el beluulechad. (Mt. 28:20) Ngsebeched el kutmeklii? Ngulterekokl el soad el meruul uaisei! Ngdmeu a rengud el ousbech a temed, klisiched, me aike el ngar ngii er kid el osiik er tirke el “rredemelel a diak a ulebengelel el klengar.” (Rel. 13:48, NW) Sel doruul uaisei, e kede oltirakl er a kerebil a Jesus. Ngdilu el kmo: “A kall el kunga er ngii a sel kutireklii a soal ngikel ulderchak e krekir sel ureor el le bilskak.” (Jn. 4:34; 17:4) Tiakid me ngdirrek el urunguled. Ngsoad el rokir a ureor el bla demukngerachel er ngii. (Jn. 20:21) E soad a rebebil, el uldimukl er tirke el inactive, a bo lobengked el outekangel el meruul er tia el ureor.​—Mt. 24:13.

20. A doltirakl er a 2 Korinth 4:7, e ngera me ngsebeched el kutmeklii tia el ureor el lebilskid a Jesus?

²⁰ Ngulterekokl el diak lebeot er kid el kutmeklii tia el ureor el lebilskid a Jesus. Me nguaisei engdi ngdiak doruul er ngii el di kid el tang. A Jesus a tilbir el kmo ngmo obengked. Kede meruul er tia el ureor er a omeruul el disaiplo el “kldemel a Dios” el “lobengkel a Kristus.” (1 Ko. 3:9; 2 Ko. 2:17, NW) Me a leuaisei e ngsebeched el kutmeklii. Tia kmal ileakl el techall me a deurreng el sebeched el teloi er tia el ureor e dirrek el ngosuterir a rebebil el mo teloi er ngii!​—Monguiu er a 2 Korinth 4:7.