45. ARTIKJEL FA DAUT STUDIUM
Aundre halpen, Jesus siene Jebooten notokomen
“Dan got . . . un moakt an to Lieelinja un . . . lieet an aules to doonen, waut ekj junt befolen hab” (MAT. 28:19-20)
LEET 89 Doo, waut Jehova die sajcht
WAUT WIE SEENEN WOAREN *
1. Waut fa een Jeboot jeef Jesus siene Nofolja en Matäus 28:18-20?
NODÄM aus Jesus vom Doot oppjestonen wia, troff hee sikj met siene Jinja en Galiläa. Hee wull dee waut wichtjet sajen. Waut wia daut? Daut kjenn wie en Matäus 28:18-20 läsen (läs).
2. Waut vonne Froagen woa wie ons unjastonen?
2 Jesus sien Jeboot Jinja to moaken es uk vondoag dän Dach noch jeltich fa Gott siene Deena. Doawäajen woa wie ons nu dree Froagen unjastonen, waut met dit Jeboot to doonen haben. Ieeschtens: Waut sell wie noch doonen, aus de niee Jinja bloos lieren, waut Gott von an velangt? Tweedens: Woo kjennen aule Vekjindja von de Vesaumlunk methalpen, daut de Bibelschiela em jeisteljen veraunkomen? Un dreddens: Woo kjenn wie soone Gloowesbreeda halpen, waut nich mea prädjen, daut dee wada aunfangen?
LIEET AN AULES TO DOONEN
3. Waut es bie Jesus sien Jeboot aules met en?
3 Jesus säd ons krakjt, waut wie doonen sullen. Wie sellen de Menschen daut lieren, waut hee ons oppjejäft haft. Oba bie daut es eene Sach wichtich. Jesus säd nich: “Lieet an aules, waut ekj junt befolen hab.” Hee säd: “Lieet an aules to doonen, waut ekj junt befolen hab.” Daut wie daut nokomen kjennen, sell wie onse Bibelschiela lieren, waut dee doonen sellen un uk woo dee daut doonen kjennen (Apj. 8:31). Wuarom wudd daut goot sennen?
4. Woo kjenn wie wäm lieren, daut to doonen, waut Christus ons befolen haft? Jeff een Biespel.
4 Well wie mol een Biespel seenen, waut ons wiest, woo wie wäm lieren kjennen, daut to doonen, waut Christus ons befolen haft. Saj wie mol, doa es een Liera, waut aundre lieet Koa foaren. Woo kaun dee siene Schiela lieren, sikj aun de Jesazen to hoolen? Veleicht lajcht hee dee ieescht mol ut, waut et fa Jesazen jeft. Oba doa es noch mea needich. Hee mott uk met dee toop foaren un dee wiesen, woo dee daut nokomen kjennen, waut see jelieet haben. Waut lia wie von dit Biespel?
5. (a) Waut sell wie onse Bibelschiela wiesen, soo aus Johanes 14:15 un 1. Johanes 2:3 sajcht? (b) Woo kjenn wie dee lieren? Jeff Biespels.
5 Wan wie met aundre studieren, dan lia wie dee, waut Gott von ons haben well. Oba doa es noch mea needich. Wie motten de Bibelschiela uk wiesen, woo dee daut nokomen kjennen, waut dee lieren (läs Johanes 14:15; 1. Johanes 2:3). Dee sellen aun ons seenen kjennen, woo eena enne School, oppe Oabeit ooda biem Tietvedrief dän biblischen Rot nokomen kaun. Wie wudden dee vetalen kjennen, woo wie ons mol Trubbel jespoat haben ooda woo wie ons rajcht entscheiden kunnen, wiels wie ons aun dän Rot ut de Schreft hilden. Un wie kjennen met dee toop bäden, daut Jehova an derch dän heiljen Jeist halpt (Joh. 16:13).
6. Waut es doa noch met en, wan wie aundre lieren, Jesus siene Jebooten notokomen?
6 Waut es doa noch met en, wan wie aundre lieren, Jesus siene Jebooten notokomen? Wie motten de Bibelschiela daut enjankren, Jinja to moaken. Eenje haben veleicht Angst fa daut prädjen. Doawäajen mott wie jeduldich sennen un dee halpen, de Schreft noch bäta to vestonen, daut dee äa Gloowen noch stoakja woat. Dan woat dee daut to Hoaten gonen un dee woaren prädjen wellen. Woo wudd wie dee kjennen halpen, daut dee daut jankat, met aundre von de goode Norecht to räden?
7. Woo kjenn wie eenen Bibelschiela halpen, daut dee met aundre äwa de goode Norecht räden well?
7 Wie wudden onsen Bibelschiela kjennen froagen: “En waut fa Stekjen jeit die daut nu bäta, wiels du no de goode Norecht jehorcht hast? Denkjst du, daut aundre dise Norecht uk hieren sellen? Woo wurscht du dee kjennen halpen?” (Spr. 3:27; Mat. 9:37-38). Wies dän Bibelschiela de Zeichnisbläda, waut to ons Jereetschoft fa dän Deenst jehieren. Dan froag dän, woone von dise sien Frintschoft, siene Frind ooda siene Oabeitspoatna wudden intressieren. Jeff dän eenje von de Zeichnisbläda un eew met dän toop, woo eena dee wudd leeftolich aunbeeden kjennen. Un wan de Bibelschiela dan een ojjedeepta Vekjindja woat, dan go uk met dän toop prädjen un wies dän, woo daut mott (Liera 4:9-10; Luk. 6:40).
WOO DE VESAUMLUNK DE BIBELSCHIELA HALPEN KAUN
8. Wuarom es daut soo needich, daut onse Bibelschiela eene groote Leew fa Gott un fa dän Näakjsten kjrieen? (See uk dän Kausten “ Eenen Bibelschiela halpen, Gott noch dolla to leewen”.)
8 Jesus säd, daut wie aundre lieren sullen, “aules to doonen”, waut hee ons oppjeef. Doa sent de beid jratste Jebooten met en: daut wie Gott un dän Näakjsten leewen sellen (Mat. 22:37-39). Wan wie onse Bibelschiela halpen dise Jebooten notokomen, dan woat an daut uk halpen to prädjen. Wuarom? Wan dee Gott un dän Näakjsten opp iernst leewen, dan woaren dee prädjen wellen. Eenje Bibelschiela woagen sikj daut veleicht nich, to prädjen. Woo kjenn wie dee Moot moaken? Wan wie dee sajen, daut Jehova an halpen woat, soo bie sacht met de Menschenforcht foadich to woaren (Psa. 18:2-4; Spr. 29:25). De Kausten, waut to disen Artikjel jehieet, wiest, woo eena de Bibelschiela halpen kaun, Gott emma dolla to leewen. Oba woo wudd de Vesaumlunk de Bibelschiela halpen kjennen, Jehova un uk aundre noch mea Leew to wiesen?
9. Von wäm kaun eena, waut Koa foaren lieet, waut goodet lieren?
9 Denkj wie noch eemol aun eenen, waut doa well lieren Koa to foaren. Woo lieet dee, wan dee met sienen Liera toop hinjawäajes es? Wan dee dän toohorcht un wan dee feine Foara beoobacht. Veleicht wiest de Liera dän eenen aundren Foara, waut leeftolich es un aundre wellich verfoaren lat. Ooda dee wiest dän eenen, waut doa fein raufdachen deit, daut aundre uk seenen kjennen. Von soone Biespels kaun de Schiela väl lieren.
10. Waut woat eenen Bibelschiela halpen em jeisteljen wiedatokomen?
10 Biejlikj soo es daut uk bie eenen Bibelschiela, waut aunfangt opp dän Wajch no daut eewje Läwen to reisen. Dee lieet väl von sienen Liera un uk von aundre, waut Jehova flietich deenen. Waut woat fa dän eene groote Help sennen, daut dee em jeisteljen wiedakjemt? Wan dee no de Toopkomes wankt. Wuarom? Daut woat dän halpen, mea von de Schreft to lieren un eenen stoakjren Gloowen to kjrieen un eene jratre Leew fa Gott (Apj. 15:30-32). Un bie de Toopkomes kaun de Bibelliera uk doano seenen, daut dee soone Breeda un Sestren kjanen lieet, waut mol meist soowaut beläft haben aus de Bibelschiela. Waut fa goodet wudd dee en de Vesaumlunk seenen kjennen? Well wie mol seenen.
11. Waut wudd een Bibelschiela enne Vesaumlunk beoobachten kjennen, un waut kunn daut aun dän doonen?
11 Veleicht lieet eene Fru, waut de Bibel studieet un äare Kjinja auleen opptrakjt, eene Sesta kjanen, waut en deeselwje Loag es. Daut kaun dee sea to Hoaten gonen, wan dee sitt, woo de Sesta sikj emma aunstrenjt met äare kjliene Kjinja toop no de Toopkomes to komen. Ooda een Maun, waut de Bibel studieet un dän daut schwoa es met schmieekjen opptohieren, lieet eenen Brooda kjanen, waut mol dänselwjen Trubbel haud. Un de Brooda vetalt am dan, woo hee Gott siene Jebooten nokomen kunn, aus siene Leew fa Gott emma jrata wort (2. Kor. 4:7; 7:1). Dan sajcht de Brooda to dän: “Du woascht uk doamet opphieren kjennen!” Daut jeft dän Bibelschiela soo väl Moot, daut hee daut selfst uk jleeft. Ooda eene Jugentliche, waut de Bibel studieet, lieet eene junge Sesta kjanen un sitt, daut dee daut sea scheen jeit, Jehova to deenen. Daut brinjt dee bat doa, daut see weeten well, wuarom de junge Sesta emma soo schaftich es.
12. Woo kaun jieda eena von de Vesaumlunk sien Poat doatoo doonen, eenen Bibelschiela to halpen?
12 Wan een Bibelschiela de veschiedne true Vekjindja kjanen lieet, dan kaun dee von dee lieren, waut daut bediet, Gott un dän Näakjsten to leewen, soo aus Christus ons daut oppjejäft haft (Joh. 13:35; 1. Tim. 4:12). Un soo aus wie aul jeseenen haben, kaun dee dan von soone lieren, waut mol meist soone Trubbels hauden aus hee. Soo kaun dee vestonen, daut dee sikj uk endren kaun un Christus nofoljen (5. Mo. 30:11). Jieda eena von de Vesaumlunk kaun methalpen, daut een Bibelschiela em jeisteljen veraunkjemt (Mat. 5:16). Woo wurscht du kjennen de Bibelschiela oppmuntren, waut no de Toopkomes komen?
SOONE HALPEN, WAUT NICH MEA PRÄDJEN
13-14. Woo jinkj Jesus met siene Apostel om, aus dee mol em Gloowen schwak wieren?
13 Wie wellen onse Breeda un Sestren halpen, waut nich mea prädjen, daut dee wada Christus sien Jeboot nokomen un Jinja moaken. Woo kjenn wie daut doonen? Daut see wie doaraun, woo Jesus met siene Apostel omjinkj, aus dee mol mootloos wieren.
14 Nich lang ver Jesus sienen Doot “veleeten [de Apostel] . . . am aula un sagen daut see wajch kjeemen” (Mar. 14:50; Joh. 16:32). Dee wieren fa een Stoot em Gloowen schwak jeworden. Woo jinkj Jesus dan lota met dee om? Korz nodäm daut Jesus vom Doot oppjestonen wia, säd hee to eenje von siene Nofolja: “Fercht junt nich! Got un sajcht miene Breeda, [daut ekj oppjestonen sie]” (Mat. 28:10a). Jesus jeef met siene Apostel nich fuaz Hopninj opp. Dee hauden am veloten, oba hee nand dee doawäajen noch “miene Breeda”. Jesus wia krakjt soo metliedent un reed toom vejäwen aus Jehova (2. Kjen. 13:23).
15. Woo denkj wie äwa dee, waut nich mea prädjen gonen?
15 Wie sent uk om deejanje bekjemmat, waut nich mea prädjen gonen. Daut sent noch onse Breeda un Sestren un wie leewen dee! Wie weeten daut noch goot, woo väl dee ea fa Jehova jedonen haben. Un eenje von dee wieren joarenlank sea flietich (Heb. 6:10). Wie bangen ons no dee! (Luk. 15:4-7). Woo kjenn wie Jesus nodoonen un an daut wiesen, daut wie om an todoonen sent?
16. Woo kjenn wie deejanje, waut nich mea prädjen, wiesen, daut wie om an bekjemmat sent?
16 Kroag dee leeftolich no de Toopkomes. Jesus spruak siene Apostel biejlikj doaderch Moot too, daut hee dee no een Toopkomen kroagd (Mat. 28:10b; 1. Kor. 15:6). Wie kjennen deejanje, waut nich mea prädjen gonen, uk no de Toopkomes kroagen. Veleicht mott wie dee ieremol enloden, bat dee werkjlich komen. Secha freid Jesus sikj sea doaräwa, aus siene Jinja no daut Toopkomen kjeemen (see uk Matäus 28:16 un Lukas 15:6).
17. Waut sell wie doonen, wan doa wäa nom Vesaumlungshus kjemt, waut nich mea prädicht?
17 Nemm dee leeftolich opp. Jesus neem de Jinja fein opp, aus dee no daut Toopkomen kjeemen. Hee jinkj dee entjäajen un räd dee aun (Mat. 28:18). Waut woa wie doonen, wan doa wäa nom Vesaumlungshus kjemt, waut nich mea prädicht? Wie wudden dän sellen leeftolich bejreessen. Veleicht weet wie nich, waut wie to dän sajen sellen. Saj nich soont, daut dee sikj kaun ommaklich feelen. Saj dän leewa, woo sea die daut freit, daut dee jekomen es.
18. Woo kjenn wie soone Moot toospräakjen, waut nich mea prädjen?
18 Spräakj dee Moot too. Jesus siene Jinja dochten woomäajlich, daut see kjeenmol wudden äwa de gaunze Welt prädjen kjennen. Oba Jesus spruak dee Moot too un säd: “Ekj sie emma bie junt” (Mat. 28:20). Holp de Jinja daut? Jo, wiels nich lang no daut deeden dee flietich “lieren un prädjen äwa daut Evangelium” (Apj. 5:42). Dee, waut nich mea prädjen, fält daut uk doaraun, daut wie dee Moot toospräakjen. Veleicht denkjen dee, daut daut too schwoa es, wada auntofangen. Wie kjennen dee sajen, daut see nich auleen prädjen brucken. Wan dee ieescht wellen, dan kjenn wie met dee toop prädjen. Un secha woaren dee daut väl räakjnen, wan wie an dan halpen. Wan wie dee, waut nich mea prädjen, wiesen, daut dee noch emma onse Breeda un Sestren sent, dan woaren dee veleicht wada aunfangen to prädjen. Un de gaunze Vesaumlunk woat sikj doaräwa freien.
WIE WELLEN DAUT WOAKJ FOADICH MOAKEN, WAUT ONS OPPJEJÄFT ES
19. Waut well wie doonen, un wuarom?
19 Woo lang sell wie noch Jinja moaken? Batem Enj von dise Welt (Mat. 28:20; see de Worterklärungen zur Bibel: “Abschluss des Weltsystems”). Woa wie daut kjennen? Wie sent ons gaunz eenich doatoo! Wie brucken wellich onse Tiet un Krauft un ons Hab un Goot toom soone finjen, waut “to daut eewje Läwen rajcht enjestalt” sent (Apj. 13:48, NW). Wan wie daut doonen, dan doo wie Jesus no. Hee säd: “Mien äten es daut, daut ekj däm sienen Wellen doo, dee mie jeschekjt haft, un sien Woakj verechten doo” (Joh. 4:34; 17:4). Wie wellen dautselwje doonen un daut Woakj foadich moaken, waut ons oppjejäft es (Joh. 20:21). Un wie wellen, daut aundre uk batem Enj prädjen, mau rajcht soone, waut doa ea mol met oppjehieet hauden (Mat. 24:13).
20. Wuarom kjenn wie daut Woakj doonen, waut Jesus ons oppjeef, soo aus 2. Korinta 4:7 wiest?
20 Daut es nich emma leicht, daut to doonen, waut Jesus ons oppjejäft haft. Oba wie sent doamet nich auleen, wiels Jesus säd, daut hee met ons sennen wudd. Wan wie Jinja moaken, dan sent wie “Gott siene Metoabeida” un “Christus siene Deena” (1. Kor. 3:9; 2. Kor. 2:17). Met dee äare Help kjenn wie daut doonen. Es daut nich eene groote Freid un eene Iea, daut wie Jinja moaken kjennen un uk aundre halpen, daut to doonen? (Läs 2. Korinta 4:7.)
LEET 79 Lieet dee fausttostonen
^ Varsch 5 Jesus säd, daut siene Nofolja Jinja moaken sullen. Un dee sullen dee uk lieren, aules to doonen, waut hee an jesajcht haud. Dis Artikjel woat ons wiesen, woo wie daut doonen kjennen.
^ Varsch 66 BILTBESCHRIEWUNK: Eene Sesta lajcht äaren Bibelschiela daut biem studieren ut, waut dee doonen kaun, om Gott noch dolla to leewen. Lota deit dee krakjt de dree Sachen, waut äa Bibelliera ar toojerot haft.
