1. Ha gutadila Matayo 28:18-20, mukhuala utshi Yesu wahanele?

TANGUA Yesu wafuzumugile, wamonegele gudi alandudi enji akhalele gu Galilea. Wakhalele nu ndaga imoshi ya ndando ya guawambela. Ndaga itshi? Ndaga yene idi mu Matayo 28:18-20.—Tanga.

2. Mihu itshi tuza muzuelela mu longo edi?

² Mukhuala wahanele Yesu gudi alandudi enji udi mutadila nji mukombeledi wagasue wa Nzambi mangino. Mu longo edi, tuza muzuelela mihu thathu idi gudivua nu ginemo giatuhanele Yesu. Wa thomo, gula tuakatula gulongesa mikhuala ya Nzambi gudi alandudi ahe-ahe, itshi luko tudi naye gutshita? Wa mbadi, luholo lutshi alongeshi agasue a mu hungu ajiya gukuatesa hagula athu tuana longesa Biblia akule mu nyuma? Wa thathu, luholo lutshi tuajiya gukuatesa alongeshi abembele gale gulongesa ha gusendesa luko gutshita mudimo wa gubuisa athu alandudi?

3. Ndaga itshi ya ndando yazuelele Yesu tudi naye diago gutshita?

³ Yesu wamonesele diago haphelo ndaga tudi naye gutshita. Tudi naye gulongesa athu ndaga jiatuwambelele muene. Uvi, tushigo naye gujimbila ndaga yabalega ndando tudi naye gutshita. Yesu gazuelelego egi: ‘Alongesenu ndaga jiagasue ngamiwambelele.’ Uvi wazuelele egi: Mualongese ‘ha gutumaga ndaga jiagasue ngamiwambelele.’ Ha gutumagela ndaga yazuelele Yesu, tudi naye gulongesa muthu tuana longesa Biblia ndaga adi naye gutshita nu luholo lua guyikalagala. (Makal. 8:31) Mukunda natshi tudi naye gutshita ngenyi?

4. Gutumaga ndaga jiazuelele Klisto gudi mukotelesa itshi? Hana gifezegeselo.

 ⁴ “Gutumaga” ndaga jiazuelele Yesu gudi mukotelesa gujikalegela. Tutadilenu gifezegeselo egi ha gukotelesa luholo tuajiya gukuatesa muthu tuana longesa Biblia ha gutumagela ndaga jiazuelele Klisto. Luholo lutshi muwendeshi wa gamiyo (mashinyi) wana longesa muthu muko ha gutumagela mikhuala ya njila? Thomo, mulongeshi wenji udi naye gumulongesa mikhuala yene. Uvi, gudi nu ndaga iko mulongeshi udi naye gutshita ha gukuatesa muthu muene hagula atumagele mikhuala ya njila. Udi naye guya nenji tangua muthu muene udi muwendesa gamiyo ha gumuhana malongo nu gumuwambela luholo lua gukalegela ndaga jiamulongesele muene. Gifezegeselo egi gidi gutulongesa itshi?

5. (a) Ha gutadila Yone 14:15; nu 1 Yone 2:3 tudi naye gulongesa athu tuana longesa Biblia ha gutshita itshi? (b) Hana ifezegeselo idi mumonesa luholo tuajiya gukuatesa athu tuana longesa Biblia?

⁵ Tangua tuana longesa athu Biblia, tuana guakuatesa ha gutumagela ndaga jiana gututoga Nzambi. Uvi itshi tudi naye gutshita luko. Tudi naye gualongesa ha gukalegela lusugu nu lusugu ndaga ana longuga mu Biblia mu monyo wawo. (Tanga Yone 14:15; 1 Yone 2:3.) Makalegelo etu ajiya gukuatesa athu tuana longesa Biblia ha gutumagela malongo a Biblia ikhale adi gu khalasa, gu mudimo, nga tangua adi gudikenesa. Tuajiya guawambela ndaga imoshi yatubuidile mu lujingu ha guamonesa luholo malongo a Biblia atukuatesele ha gudibamba mu ndaga yabola, nga luholo atukuatesele ha guzula badesizio abonga. Tangua tudi nu athu tuana longesa Biblia, tuajiya gutoga Yehowa ha guakuatesa nu nyuma yenji.—Yone 16:13.

6. Gulongesa athu ako ha gutumaga ndaga jiazuelele Yesu gudi mukotelesa nji itshi?

⁶ Gulongesa athu ako ha gutumaga ndaga jiazuelele Yesu gudi mukotelesa nji itshi? Tudi naye gukuatesa athu tuana longesa Biblia ha gukudisa nzala ya gubuisa athu ako alandudi. Uvi athu ako tuana longesa Biblia ajiya guvua woma ha gutshita mudimo wa gulongesa. Hene, tudi naye gukhala nu guhuiminyina tangua tudi guakuatesa ha gukotelesa muabonga giamatshidia mukunda nu gukolesa gutshigina guawo. Gutshita ngenyi mbaguahana ngolo ha gutshita mudimo wa gulongesa. Itshi tudi naye gutshita ha gukuatesa athu tuana longesa Biblia ha gukudisa nzala yawo ya gulongesa lukuma luabonga gudi athu ako?

7. Luholo lutshi tuajiya gukuatesa athu tuana longesa Biblia ha gukudisa nzala ya gulongesa lukuma luabonga gudi athu ako?

⁷ Tuajiya guhula athu tuana longesa Biblia mihu eyi: “Luholo lutshi gutumagela malongo a Biblia guagukuatesele ha gukhala nu lujingu luabonga? Udi mutangiza egi athu ako ajiya gukhala nu funu ya malongo ene ba? Itshi wajiya gutshita ha guakuatesa?” (Ish. 3:27; Mat. 9:37, 38) Dijiga muthu wana longesa Biblia trakte jidi mukatshi dia Ikadigilo yetu ya Gulongesela Biblia. Mubembe muene hakhenji atombe trakte jiajiya gukuatesa enya fami yenji, mafuta enji, nu athu ana tshita nawo mudimo. Muhane trakte jiavula. Mulongese luholo lua guhana trakte nu gutema guagasue. Gula muthu tuana longesa Biblia wabua mulongeshi udi khenji gabatijiwego, tudi naye guya nenji mu mudimo wa gulongesa ha gumukuatesa.—Mulo. 4:9, 10; Luka 6:40.

8. Mukunda natshi idi nu ndando egi muthu tuana longesa Biblia akudise guzumba guenji mukunda nu Nzambi nu muthu na muku’enu? (Tala nji galuanda “ Luholo Tuajiya Gukuatesa Athu Tuana Longesa Biblia ha Gukudisa Guzumba Guawo Mukunda nu Nzambi.”)

⁸ Tujimbilago egi Yesu watuwambelele ha gulongesa athu ako ‘ha gutumaga ndaga jiagasue’ jiatuwambelele muene. Mukatshi dia ndaga jiene, gudi nu mikhuala mbadi yakoma tudi naye gutumagela: Guzumba Nzambi nu guzumba muthu na muku’enu. Mikhuala eyi mbadi yana gudivua diago nu mudimo wetu wa gulongesa  nu gubuisa athu alandudi. (Mat. 22:37-39) Luholo lutshi mikhuala yene idi gudivua nu mudimo wa gulongesa? Ndaga yana gututuma ha gulongesa Lukuma luabonga idi guzumba guetu mukunda nu Nzambi nu athu n’akuetu. Idi yadiago egi athu ako tuana longesa Bilbia ajiya gutangiza egi gulongesa Lukuma luabonga guana hana woma. Uvi, tudi naye guamonesa egi Yehowa mbawakuatesa ha gutuna guvua woma wa athu. (Ngi. 18:1-3; Ish. 29:25) Ndaga jidi ha galuanda ga longo edi jidi mumonesa ndaga tuajiya gutshita ha gukuatesa muthu tuana longesa Biblia ha gukudisa guzumba guenji mukunda nu Yehowa. Uvi, itshi aphangi a mu hungu ajiya gutshita luko ha gukuatesa alongeshi ahe-ahe ha gukudisa guzumba guawo?

9. Mu maluholo atshi muthu adi mulongesa luholo lua guwendesa gamiyo wajiya guheta malongo a ndando?

⁹ Tuzuelelenu luko gifezegeselo gia muthu wana longesewa luholo lua guwendesa gamiyo. Mu maluholo atshi muthu wana gulonguga luholo lua guwendesa gamiyo wana wendesa gula udi nu mulongeshi wenji? Udi naye gutegelela mulongeshi wenji, udi naye nji gutala luholo athu ako adi muwendesa tumiyo tuawo nu gutema guagasue. Ha gufezegesa, mulongeshi wenji wajiya gumumonesa luholo muwendeshi muko wa gamiyo udi mubembela muko njila hagula abalege gutuama dienji. Nga ndo, wajiya gumudijiga luholo muwendeshi muko wa gamiyo wazondesa tshuiya tua mienda ya gamiyo genji hagula tusagesago awendeshi ako ha gumona muabonga. Wajiya nji gumutoga ha guzondesa tshuiya tua gamiyo genji. Gutshita ngenyi mbagumukuatesa ha guheta malongo a ndando ha guakalegela mu mudimo wenji wa muwendeshi gamiyo.

10. Itshi yajiya gukuatesa athu tuana longesa Biblia ha gukula mu nyuma?

¹⁰ Luholo lumoshi nji, muthu tuana longesa Biblia yonu udi musendesa gukombelela Yehowa, anago guheta malongo phamba gudi mulongeshi wenji, uvi wana guaheta nji mu ifezegeselo yabonga ya akombeledi ako a Yehowa. Uvi, itshi yajiya gukuatesa diago athu tuana longesa Biblia ha gukula mu nyuma? Ndaga yajiya guakuatesa idi guya mu gudibungisa gua mu hungu. Mukunda natshi tuazuela ngenyi? Handaga malongo tuana heta mu gudibungisa guene mbaakuatesa ha gujiya ndaga jiavula jia mu nyuma, ha gukolesa gutshigina guawo nu ha guzumba Nzambi muavula. (Makal. 15:30-32) Luko, mu gudibungisa guene, mulongeshi wajiya gumukuatesa ha gudijiya nu aphangi ako a mu hungu, adi mutagana nji nu ndaga jiavula jia luholo lumoshi nu muene. Muthu muene mbawumona nji ifezegeselo yabonga ya aphangi ana gudimonesela guzumba mukatshi dia hungu. Tutadilenu ifezegeselo eyi yalandula.

11. Ifezegeselo itshi muthu tuana longesa Biblia wajiya gumona mukatshi dia hungu? Luholo lutshi yajiya gumukuatesa?

¹¹ Tangiza gale egi muthu tuana longesa Biblia udi mvuaji uvi gashigo nu yala. Gula waza mu gudibungisa gua mu hungu, wamona phangi’etu wa mukhetu udi nji mvuaji gifua muene uvi gashigo nu yala; ndaga yene yajiya gumukuatesa ha gumona luholo phangi’etu adi mukalagala ngolo ha guza mu gudibungisa nu an’enji. Tangiza luko egi muthu tuana longesa Biblia ganago gubinga gubemba gunua makaya. Gungima wadimona nu mulongeshi wakhalele thomo munua makaya gifua muene, uvi mulongeshi wabingile khadilo diene. Mulongeshi wamuwambela luholo guzumba guenji mukunda nu Yehowa guamutumine ha gutumagela mikhuala yenji. (2 Kol. 7:1; Fili. 4:13) Gungima dia gutegelela mulongeshi muene, muthu tuana longesa Biblia washa diago mutshima egi muene nji wajiya gubinga khadilo diene, handaga phangi’etu wamuwambela egi: “Aye nji wajiya gubemba gunua makaya.” Henyaha tangiza luko egi muthu tuana longesa Biblia udi muvuala wa mukhetu; wamona phangi’etu ya mukhetu wa muvuala nu gusuanguluga handaga udi Temue wa Yehowa. Gumona luholo phangi’etu udi nu gusuanguluga guamutuma ha  gukamba gujiya ndaga yana tshita egi phangi’etu akhale nu gusuanguluga tangua diagasue.

12. Mukunda natshi tudi muzuela egi muthu wagasue mu hungu udi nu ginemo gia gukuatesa athu tuana longesa Biblia?

¹² Gula athu tuana longesa Biblia adi gudijiya nu alongeshi avula agujinginyina, yajiya guakuatesa ha gujiya gula gutumagela mukhuala wa Klisto watadila guzumba Nzambi nu muthu na muku’enu gudi mukotelesa itshi. (Yone 13:35; 1 Tim. 4:12) Gifua luholo tuayizuelela gale, muthu tuana longesa Biblia wajiya nji guheta malongo gudi aphangi adi mutagana nu malamba gifua muene. Ifezegeselo ya aphangi yajiya gumukuatesa ha gusombegesa makalegelo enji hagula abue mulandudi wa Klisto. (Mikh. 30:11) Muthu wagasue mu hungu wajiya gukuatesa athu tuana longesa Biblia ha gukula mu nyuma mu maluholo agudisha. (Mat. 5:16) Ndaga itshi wana kalagala ha gukuatesa athu tuana longesa Biblia anyi anaza gale mu gudibungisa gua mu hungu?

13-14. Luholo lutshi Yesu wakalegele apostolo enji ndaga tangua alebele muila?

¹³ Tudi naye gukuatesa alongeshi abembele gale gulongesa ha gusendesa luko gutagenesa ginemo giatuhanele Klisto gia gubuisa athu alandudi. Yesu wakalegele apostolo enji ndaga nu guzumba guagasue esue nji, tudi naye gukalagala ngenyi.

¹⁴ Gu gisugishilo gia mudimo wa Yesu, gutuama egi ashiyiwe, apostolo ‘agasue amubembele alengele.’ (Mako 14:50; Yone 16:32) Luholo lutshi Yesu wakalegele apostolo enji ndaga tangua alebele muila? Matangua azonda gungima dia gufuzumuga guenji, Yesu wawambelele alandudi enji egi: ‘Muvuigo woma! Ndenu mutele aphangi’ami lumene [egi ngafuzumuga gale gu gufua].’ (Mat. 28:10a) Yesu gatunyilego apostolo enji. Ngatshima ene amubembele, muene walanduile guatamega egi ‘aphangi’ami.’ Yesu walanduile diago khadilo dia Yehowa dia khenda nu dia gutotesela.—2 Maf. 13:23.

15. Luholo lutshi tuana gudivua mukunda nu aphangi abembele gale gulongesa?

¹⁵ Esue nji, tudi naye gudisagesa muavula mukunda nu aphangi’etu abembele gale mudimo wa gulongesa. Adi aphangi’etu, tudi naye guazumba! Tuana jiya mudimo wakola aphangi awa akalegele nu guzumba guagasue mukunda nu Yehowa mu masugu abalega. (Heb. 6:10) Tuana guatangiza diago! (Luka 15:4-7) Ha gulandula gifezegeselo gia Yesu, mu maluholo atshi tuajiya gumonesa egi tuana gudisagesa mukunda nu ene?

16. Luholo lutshi tuajiya gumonesa egi tuana gudisagesa mukunda nu aphangi’etu alebele gale mu nyuma?

¹⁶ Atamege mu gudibungisa nu gusuanguluga guagasue. Yesu watamegele apostolo enji ha gudibungisa nawo mukunda nu guahana gikhesa nu guzumba guagasue. (Mat. 28:10b; 1 Kol. 15:6) Luholo lumoshi nji, tuajiya guhana gikhesa gudi aphangi’etu alebele gale muila mu nyuma ha guza mu gudibungisa gua mu hungu. Tuajiya guaatamega iphungu yavula gutuama egi aze. Idi yadiago egi, Yesu wasuangulugile muavula tangua alandudi enji ajile ha gudimona nenji.—Fuanesa Matayo 28:16 nu Luka 15:6.

17. Luholo lutshi tuajiya gutshita ndaga gula phangi walebele gale mu nyuma waza mu gudibungisa?

¹⁷ Ayambe nu gusuanguluga guagasue. Yesu wayambele alandudi enji nu gusuanguluga guagasue tangua adimonele, wasendesele guta nawo maga. (Mat. 28:18) Itshi tuajiya gutshita gula phangi’etu walebele gale mu nyuma waza mu gudibungisa gua mu hungu? Tuajiya gumuyamba nu gusuanguluga guagasue. Matangua ako, ndaga ya guzuela yajiya gututota. Uvi ha gumukuatesa ha gudivua muabonga, tuajiya gumuwambela egi tuasuanguluga luholo tuagumona.

18. Luholo lutshi tuajiya guhana gikhesa gudi alongeshi alebele gale mu nyuma?

¹⁸ Ahane gikhesa. Yajiya gukhala alandudi a Yesu atangijile egi ashigo atagana ha gutagenesa  ginemo gia gulongesa ha mavu a mudidi. Yesu wahanele alandudi enji gikhesa, waawambelele egi: ‘Ngudi n’enu masugu agasue.’ (Mat. 28:20) ‘Ndaga yazuelele Yesu yahanele alandudi enji gikhesa ba? Ayi. Masugu azonda gungima, ahetele ginemo gia ‘gulongesa nu gumuanga lukuma luabonga.’ (Makal. 5:42) Esue nji tudi naye guhana gikhesa gudi alongeshi alebele gale mu nyuma. Ajiya gutangiza egi ashigo atagana ha gusendesesa luko gulongesa. Hene, esue tudi naye guahana gikhesa egi mbatulongesa nawo hamoshi. Tuajiya guya nawo mu mudimo wa gulongesa gula adi hehi. Idi yadiago egi mbaasuanguluga muavula gula tuakuatesa ha gusendesa luko gutshita mudimo wa gulongesa. Gula tudi mukalegela aphangi alebele gale mu nyuma ndaga mu luholo luabonga, mbatukhala nu gusuanguluga mukatshi dia hungu.

19. Ndaga itshi esue nji tudi naye gutshita? Mukunda natshi?

¹⁹ Uu nu tangua ditshi tudi naye gulandula gutshita mudimo wa gubuisa athu alandudi? Uu nu gu gisugishilo gia mavu awa. (Mat. 28:20) Tudi naye gukhala hehi ha gutagenesa ginemo egi giatuhanele Yesu. Tuzulenu desizio dia gutshita mudimo wene! Tuana hana nu gusuanguluga guagasue tangua dietu, ngolo jietu, nu ima yetu ha gukamba athu adi nu ‘mitshima yabonga ha guheta monyo wa ivo nu ivo.’ (Makal. 13:48) Gutshita ngenyi gudi mumonesa egi tudi mulandula gifezegeselo gia Yesu. Handaga wazuelele egi: ‘Ima yami ya gudia idi gukalagala gutshigina gua muthu wangutumine nu gumanesela mudimo wenji.’ (Yone 4:34; 17:4) Esue nji tudi naye gutshita ngenyi. Tudi naye gumanesela mudimo watuhanele Yesu. (Yone 20:21) Tuana tshigina gutshita mudimo owu hamoshi nu athu ako, gifua aphangi alebele gale mu nyuma.—Mat. 24:13.

20. Ha gutadila Filiphi 4:13, mukunda natshi tudi naye gutagenesa mudimo watuhanele Yesu?

²⁰ Ishigo ndaga yaleba ha gutagenesa ginemo giatuhanele Yesu. Uvi, tuanago gukalagala mudimo wene hakhetu. Yesu watulayele egi mbawukhala nu esue. Tuana tshita mudimo wa gubuisa athu alandudi handaga tudi ‘mafuta a mudimo a Nzambi’ nu tuana ‘tshita hamoshi nu Klisto.’ (1 Kol. 3:9; 2 Kol. 2:17) Hene, tuajiya diago gutshita mudimo wene. Tudi diago nu gusuanguluga nu luendu lua gutagenesa ginemo egi nu gukuatesa athu ako ha gugitagenesa nji!—Tanga Filiphi 4:13.