1. Wanem nao Jesus komandim olketa disaepol blo hem for duim wea stap lo Matthew 28:18-20?

BIHAEN Jesus laef bak from dae, hem showaot lo olketa disaepol blo hem wea hipap lo Galilee. Hem laek for talem lo olketa wanfala important samting. Wat nao datwan? Datfala toktok hem stap lo Matthew 28:18-20.—Readim.

2. Olketa wanem kwestin nao bae iumi story raonem?

² Komand wea Jesus givim lo olketa disaepol blo hem, hem for olketa pipol blo God distaem tu. So, bae iumi storyim thrifala samting abaotem assignment wea Jesus givim for iumi. First samting, taem iumi teachim pipol abaotem wanem God laekem, wanem moa iumi shud duim? Mek-tu, hao nao evri pablisa lo kongregeson savve helpem wanfala Bible student for muv ahed lo spiritual wei? Mek-thri, hao nao iumi savve helpem wanfala brata or sista wea inactive for share moa lo disfala waka for teachim pipol for kamap disaepol?

3. Wanem important instruction nao Jesus talem insaed lo datfala komand?

³ Olketa instruction wea Jesus givim hem klia. Iumi mas teachim pipol lo olketa samting wea hem komandim. Bat, iumi shud no forgetim wanfala important samting. Jesus no sei: ‘Teachim olketa evri samting wea mi laekem iufala for duim.’ Bat hem sei: “Teachim olketa for followim evri samting wea mi laekem iufala for duim.” For followim datfala instruction, taem iumi teachim wanfala Bible student, iumi no just teachim olketa nomoa, bat iumi mas showim olketa hao for duim. (Acts 8:31) Why nao iumi need for duim datwan?

4. Wanem nao hem minim for followim wanfala komand? Storyim example.

 ⁴ For “followim” wanfala komand hem minim for obeyim datwan. For savve hao for iumi savve teachim samwan for followim or obeyim komand blo Christ, iumi savve ting raonem disfala example. Hao nao instructor wea lanem samwan for draev savve teachim student blo hem lo olketa law blo traffic? Datfala instructor mas teachim hem firstaem lo olketa law blo traffic. Bat for teachim student blo hem for savve hao for obeyim olketa rul hia, hem mas duim nara samting. Tufala mas go tugeta and datfala student nao mas draev and hem bae trae for followim wanem nao tufala bin lanem. Wat nao iumi savve lanem from datfala example?

5. (a) Olsem John 14:15 and 1 John 2:3 storyim, wanem nao iumi need for teachim Bible student blo iumi for duim? (b) Storyim olketa example lo hao iumi savve helpem olketa student.

⁵ Taem iumi studyim Bible witim olketa narawan, iumi teachim olketa for duim wanem God laekem iumi for duim. Bat, iumi mas duim nara samting moa. Iumi mas teachim Bible student for followim evriday wanem hem lanem. (Readim John 14:15; 1 John 2:3.) Thru lo example blo iumi, iumi savve showim lo student hao nao hem savve followim olketa main Bible principle lo skul, lo waka, and lo olketa nara taem. Iumi savve storyim lo hem tu eni samting wea happen lo laef blo iumi wea showimaot olketa Bible principle hem protectim iumi from wei for kasem nogud samting, or hao datwan savve helpem iumi for mekem olketa wise disison. Iumi savve prea witim student blo iumi and askem Jehovah for givim holy spirit for helpem hem.—John 16:13.

6. Wanem nao insaed lo wei for teachim olketa narawan for followim olketa komandment blo Jesus?

⁶ Wanem nao insaed lo disfala wei for teachim olketa narawan for followim olketa komandment blo Jesus? Iumi need for helpem olketa Bible student blo iumi for mekem grow disfala feeling for laek teachim olketa narawan for kamap disaepol. For samfala student, disfala wei for duim preaching waka hem samting wea olketa fraet tumas for duim. So iumi need for patient taem iumi teachim olketa lo wei wea bae mekem savve blo olketa kamap moa big, kasem heart blo olketa, and muvim olketa for duim samting. Wanem nao iumi savve duim for helpem student for mekem grow disfala feeling for laek sharem disfala gud nius witim olketa narawan?

7. Hao nao iumi savve helpem wanfala student for mekem grow disfala feeling for laek talemaot gud nius lo olketa narawan?

⁷ Iumi maet askem Bible student olketa kwestin olsem: “Hao nao wei wea iu acceptim datfala Kingdom message hem mekem laef blo iu kamap moabeta? Waswe, iu tingse olketa narawan need for herem disfala message? Wanem nao iu savve duim for helpem olketa?” (Provebs 3:27; Matt. 9:37, 38) Showim lo student olketa tract wea hem part lo disfala Teaching Toolbox and letem hem for chus, which wan nao bae hem fitim olketa relative, fren, or pipol lo ples wea hem waka. Givim samfala lo olketa tract hia lo student blo iu. Practice witim hem lo hao hem savve offerim wanfala tract lo kaenfala wei. Bihaen student blo iu hem kamap wanfala anbaptaes pablisa, hem gud for go preach witim hem mekem iu savve helpem hem.—Eklesiastes 4:9, 10; Luke 6:40.

8. Why nao hem important for olketa student blo iumi mekem grow love blo hem for God and for neiba? (Lukim tu box “ Hao for Strongim Love blo Bible Student blo Iumi for God.”)

⁸ Tingim diswan, Jesus talem iumi for teachim olketa narawan “for followim evri samting” wea hem komandim olketa for duim. Tufala main komand hem insaed diswan, hem nao for  lovem God and for lovem neiba. Tufala komand hia hem join witim preaching waka and waka for teachim pipol for kamap disaepol. (Matt. 22:37-39) Hao nao hem join tugeta? Wanfala main samting wea muvim iumi for share lo preaching waka hem nao love. Iumi lovem God and iumi lovem neiba. So for samfala Bible student, wei for share lo preaching waka hem samting wea olketa fraet for duim. Bat iumi savve encouragem olketa and storyim hao Jehovah bae helpem olketa and gogo bae olketa winim wei for fraetem man. (Sams 18:1-3; Provebs 29:25) Box wea join witim disfala article hem storyim wanem iumi savve duim for helpem olketa student for mekem grow love blo olketa for God. Mek-tu samting, wanem nao kongregeson savve duim for helpem wanfala niu disaepol for mekem grow love blo hem for God?

9. Olsem datfala example blo student wea lane for draev, lo olketa wanem wei nao student savve lanem olketa important leson wea hem savve followim?

⁹ Tingim moa example abaotem student wea lane for draev. Taem hem go thru lo traffic and instructor blo hem lo saed lo hem, lo olketa wanem wei nao student hem lane? Thru lo wei wea hem lisin lo instructor, and lukluk gud lo olketa nara draeva wea barava careful. Olsem example, instructor maet showim lo student taem nara draeva give wei for nara trak insaed traffic. Or hem maet showim lo hem hao olketa nara draeva daonem headlight blo trak for hem no spoelem eye blo olketa nara draeva. Olketa example hia savve teachim student olketa important leson wea hem savve followim taem hem draev.

10. Wanem nao bae helpem wanfala Bible student for muv ahed lo spiritual wei?

¹⁰ Lo sem wei, wanfala Bible student wea start for followim road for laef bae lane no from teacher blo hem nomoa, bat from olketa gud example blo olketa nara servant blo Jehovah tu. So, wat nao bae barava helpem wanfala Bible student for muv ahed lo spiritual wei? Hem for attendim olketa Christian meeting. Why nao olsem? Bikos lo olketa meeting, hem bae herem olketa Bible instruction wea bae helpem savve blo hem for grow, strongim faith blo hem, and helpem hem for barava lovem God. (Acts 15:30-32) And tu, lo olketa Christian meeting, Bible teacher savve introducem student lo olketa brata and sista wea garem sem experience olsem hem. Student bae lukim gudfala example blo olketa brata and sista wea showimaot love insaed lo kongregeson. Bae iumi story abaotem samfala example.

11. Olketa wanem example nao maet student savve lukim insaed kongregeson, and hao nao datwan maet affectim wanfala student?

¹¹ First example, wanfala Bible student wea hem singol mami, hem lukim wanfala sista wea situation blo hem semsem witim hem. Taem hem lukim datfala sista traem best for kam lo Kingdom Hall witim olketa smol pikinini blo hem, datwan tasim heart blo hem. Mek-tu example, wanfala Bible student wea stragol for lusim smoke hem start for savve lo wanfala pablisa wea stragol witim datwan bifor bat hem win. Datfala pablisa talem datfala student hao wei wea hem garem strong love for God nao muvim hem for obeyim olketa komand blo Hem. (2 Cor. 7:1; Phil. 4:13) Bihaen student hem lisin lo datfala pablisa, hem barava sure hao hem tu savve stop for smoke. Mek-thri example, wanfala young woman wea hem wanfala Bible student, hem lukim wanfala young sista wea barava enjoyim laef blo hem olsem wanfala Witness. Datfala Bible student luksavve datfala young sista evritaem hapi and datwan muvim hem for laek lane abaotem why nao datfala sista hem evritaem luk hapi.

12. Why nao iumi fit for sei each wan lo kongregeson savve duim samting for helpem olketa Bible student?

¹² Taem Bible student start for savve lo olketa didifren pablisa wea faithful, student savve  lane from example blo olketa abaotem hao for obeyim komand blo Christ abaotem wei for lovem God and neiba. (John 13:35; 1 Tim. 4:12) And tu, olsem iumi bin storyim, wanfala Bible student savve lane from olketa pablisa wea deal witim olketa sem kaen challenge olsem hem. Olketa example olsem savve helpem student for luksavve hem fit for mekem olketa change for hem kamap disaepol blo Christ. (Diutronomi 30:11) Each wan lo kongregeson savve duim samting for helpem wanfala Bible student for muv ahed lo spiritual wei. (Matt. 5:16) Wanem nao iu savve duim for encouragem wanfala Bible student wea savve kam lo meeting?

13-14. Hao nao Jesus treatim olketa aposol blo hem wea wikdaon?

¹³ Iumi laek for helpem olketa brata and sista blo iumi wea inactive for preach moa mekem olketa savve fulfillim disfala komand blo Christ for teachim pipol kamap disaepol. Iumi savve lane from wei wea Jesus hem treatim olketa aposol blo hem lo taem wea olketa wikdaon.

¹⁴ Lo end blo ministry blo Jesus lo earth taem olketa redi for killim hem dae, olketa aposol blo hem “lusim hem and ranawe.” (Mark 14:50; John 16:32) Hao nao Jesus treatim olketa aposol hia lo taem wea olketa wikdaon for lelebet taem? No longtaem bihaen hem resurrect, Jesus talem samfala lo olketa follower blo hem: “Iufala no fraet! Go talem olketa brata bilong mi [dat mi laef bak nao].” (Matt. 28:10a) Jesus hem no les lo olketa aposol blo hem. Nomata olketa lusim hem, hem still kolem olketa “brata blo mi.” Olsem Jehovah, Jesus hem showimaot mercy and wei for forgive.—Mektu Kings 13:23.

15. Hao nao iumi ting lo olketa wea stop for share lo ministry?

¹⁵ Iumi tu savve showimaot iumi barava tingim olketa wea stop for share lo ministry. Olketa hia brata and sista blo iumi, and iumi lovem olketa! Iumi still rememberim gudfala waka and love wea olketa showimaot lo bifor, maet for staka year. (Heb. 6:10) Iumi barava missim olketa! (Luke 15:4-7) Olsem Jesus, lo olketa wanem wei nao maet iumi showimaot iumi tingim olketa?

16. Hao nao iumi showimaot iumi tingim olketa brata and sista blo iumi wea inactive?

¹⁶ Invaetem olketa lo kaenfala wei. Wanfala wei wea Jesus encouragem olketa aposol blo hem taem olketa wikdaon, hem for invaetem olketa lo wanfala meeting. (Matt. 28:10b; 1 Cor. 15:6) Distaem tu, iumi savve encouragem olketa wea inactive for attendim olketa kongregeson meeting sapos olketa no duim datwan yet. Iumi savve hao iumi need for invaetem olketa staka taem bifor olketa savve kam. Iumi sure Jesus hem hapi tumas taem olketa disaepol blo hem acceptim invitation blo hem.—Comparem Matthew 28:16 and Luke 15:6.

17. Wanem nao iumi savve duim taem samwan wea inactive hem kam lo wanfala meeting?

¹⁷ Barava welkamim olketa. Jesus hem no weit for olketa disaepol blo hem kam lo hem, bat hem nao go and story lo olketa, datwan mekem olketa for feel olsem hem barava welkamim olketa. (Matt. 28:18) Wanem nao bae iumi duim taem samwan wea inactive kam lo Kingdom Hall? Iumi shud go and barava showimaot iumi welkamim hem. Maet iumi wari bikos iumi no savve wanem nao for talem. Bat iumi savve talem hao iumi hapi tumas for lukim hem and iumi savve duim datwan lo wei wea bae no mekem hem feel shame.

18. Hao nao iumi savve encouragem olketa pablisa wea inactive?

¹⁸ Gohed for encouragem olketa. Luk olsem olketa disaepol blo Jesus maet feel dat disfala waka for preach evriwea lo world hem big tumas for olketa. Jesus encouragem olketa  follower blo hem taem hem sei: “Bae mi stap witim iufala.” (Matt. 28:20) Waswe, datwan hem encouragem olketa? Yes. No longtaem bihaen datwan, olketa busy for “teachim pipol and talemaot gud nius.” (Acts 5:42) Olketa pablisa wea inactive tu need for kasem encouragement. Olketa maet fraet for start preach moa. Iumi savve encouragem olketa lo wei for talem olketa hao olketa bae no need for preach seleva. Taem olketa redi, iumi bae waka witim olketa lo ministry. Iumi sure olketa bae barava tinghae lo sapot blo iumi for helpem olketa for start for preach moa. Taem iumi showimaot lo olketa wea inactive dat iumi ting lo olketa olsem brata and sista blo iumi, iumi bae lukim hao datwan mekem evriwan lo kongregeson for hapi

19. Wat nao iumi barava laek for duim, and why nao olsem?

¹⁹ Disfala waka for teachim pipol for kamap disaepol bae gohed go kasem wanem taem? Hem bae gohed go kasem taem wea world blo Satan hem finis. (Matt. 28:20 lo NW; Lukim Glossary, “Conclusion of the system of things.”) Waswe, bae iumi fit for fulfillim disfala komand wea Jesus givim for iumi preach? Iumi disaed strong for duim datwan! Iumi hapi for givim taem, strong, and selen blo iumi for faendem “evriwan wea showimaot olketa laekem laef olowe.” (Acts 13:48) Taem iumi duim diswan, iumi followim example blo Jesus wea sei: “Kaikai bilong mi hem for duim waka wea man wea sendem mi kam hem laekem mi for duim and for finisim datfala waka.” (John 4:34; 17:4) Iumi barava laek for duim diswan. Iumi laek for finisim waka wea hem trustim iumi for duim. (John 20:21) And iumi evriwan, insaed diswan hem olketa wea inactive, iumi laek for waka tugeta go kasem end.—Matt. 24:13.

20. Olsem Philippi 4:13 storyim, why nao iumi savve duim disfala waka wea Jesus komandim iumi for duim?

²⁰ Hem tru, for fulfillim disfala komand wea Jesus givim iumi hem wanfala challenge. Bat iumi no duim disfala waka seleva. Jesus promisim hao hem bae stap witim iumi. Taem iumi duim disfala waka for teachim pipol for kamap disaepol, iumi “waka tugeta witim God,” and witim Christ, so Jehovah and Jesus bae helpem iumi witim disfala waka. (1 Cor. 3:9; 2 Cor. 2:17) From datwan, iumi savve duim. Hem wanfala nambawan privilege and iumi hapi tumas for duim disfala assignment and for helpem olketa narawan for duim disfala waka tu!—Readim Philippi 4:13.