1. Nin duwen me Madiu 28:18-20 mahsanih, kehkehlik dahieu me Sises ketikihda?

MWURIN Sises ketin iasada sang mehla, e ketin pwarohng sapwellime tohnpadahk kan me pokonpene nan Kalili. Mie mehkot kesempwal me e pahn mahsanihong irail. Dahkot mwo? Sapwellime mahsen ko dierek nan Madiu 28:18-20.​—Wadek.

2. Peidek dah kan me kitail pahn koasoiapene?

² Sapwellimen Sises kehkehlik me pid katohnpadahk pil pidada emenemen sapwellimen Koht ladu kan rahnwet. Eri, kitail pahn koasoiapene peidek siluh me pidada pwukoa me Sises ketikihongehr kitail. Keieu, dahme kitail anahne wia likin atail en padahkihong tohnpadahk kapw kan duwen kupwuren Koht? Keriau, ia duwen sounkalohk koaros nan mwomwohdiso ar kak sewese tohnsukuhl en Paipel men en kekeirda nan eh papah Koht? Kesiluh, ia duwen atail kak sewese irail kan me sohla iang kalohk oh mihting ren pwurehng iang wia doadoahk en katohnpadahk?

3. Ia ire kesempwalo nan sapwellimen Sises kehkehliko?

³ Sapwellimen Sises kaweid kan uhdahn sansal. Kitail anahne padahkihong aramas akan soahng kan me e ketin kehkehlingki. Ahpw kitail en dehr manokehla ire kesempwal ehu. Sises sohte mahsanih: ‘Padahkihong irail mehkoaros me I kehkehlingkihong kumwail.’ Ahpw e mahsanih: Padahkihong irail “en kapwaiada mehkoaros me I kehkehlingkihong kumwail.” Pwehn peikiong kaweid wet, kitail anahne padahkihong neitail tohnsukuhl en Paipelo dahme e anahne wia, oh kasalehiong ih ia duwen eh  pahn wia met. (Wiewia 8:31) Dahme kahrehda?

4. Ia wehwehn en kapwaiada kehkehlik ehu? Menlau kihda ehu karasaras.

⁴ En “kapwaiada” kehkehlik ehu kin wehwehki en peikiong. Pwehn karasahda ia duwen emen eh kak padahkihong emen en kapwaiada soahng kan me Krais ketin kehkehlingki, medewehla karasaras wet. Ia duwen emen eh kin padahkihong emen me sukusukuhlki en diraipih sidohsa en kapwaiada kosonned en tangahki sidohsa? Keieu, sounkaweido kin padahkihong nah tohnsukuhlo duwen kosonned kan me tohnsukuhlo anahne peikiong nan ahlo. Ahpw, pwehn padahkihong nah tohnsukuhlo ia duwen eh pahn peikiong kosonned ko, sounkaweido pil anahne wia mehkot. E anahne iangih tohnsukuhlo oh kihong kaweid erein eh didiraipih sidohsao pwehn kapwaiada dahme e sukuhlki. Dahme kitail kak sukuhlki sang karasaras wet?

5. (a) Nin duwen me Sohn 14:15 oh 1 Sohn 2:3 mahsanih, dahme kitail anahne padahkihong neitail tohnsukuhl en Paipel kan en wia? (b) Ia duwen atail kak sewese tohnsukuhl kan ren doadoahngki kaweid kan en Paipel?

⁵ Ni atail kin onop Paipel rehn meteikan, kitail kin padahkihong irail dahme Koht ketin kupwurki sang kitail. Ahpw kitail anahne wia laudsang met. Kitail anahne padahkihong neitail tohnsukuhl ko en doadoahngki dahme re sukuhlki ong arail mour en ehuehu rahn. (Wadek Sohn 14:15; 1 Sohn 2:3.) Atail mehn kahlemeng kak kasalehiong neitail tohnsukuhl kan ia duwen arail kak doadoahngki kaweid kan me re sukuhlki sang Paipel nan sukuhl, wasahn doadoahk, de ni arail kin mwemweitseli. Kitail kak padahkihong irail mehkot me wiawi nan atail mour pwehn kasalehiong irail ia duwen atail doadoahngki kaweid en Paipel eh kin pere kitail sang keper de ia duwen eh sewese kitail en wiahda pilipil mwahu. Ni atail mi rehn neitail tohnsukuhlo, kitail kak kapakap ong Siohwa oh peki sapwellime manaman en kaweid irail.​—Sohn 16:13.

6. Dahme kitail pil anahne wia ni atail kin padahkih meteikan en kapwaiada sapwellimen Sises kehkehlik kan?

⁶ Dahme kitail pil anahne wia ni atail kin padahkih meteikan en kapwaiada sapwellimen Krais kehkehlik kan? Kitail anahne sewese neitail tohnsukuhl en Paipel kan en kakairada ineng en men katohnpadahk. Ekei tohnsukuhl ele kin masak iang kalohk. Eri kitail en kanengamah ni atail sewese irail kalaudehla arail wehwehki padahk mehlel en Paipel kan pwe ren kak ahneki pwoson laud. Met pahn sair arail mohngiong oh kamwakid irail en iang kalohk. Dahme kitail kak wia pwehn sewese tohnsukuhl kan en ahneki ineng en men kalohki rongamwahwo?

7. Ia duwen atail kak sewese tohnsukuhl men en kakairada eh ineng en men ehukihong meteikan rongamwahwo?

⁷ Ele kitail kak idek rehn neitail tohnsukuhl kan peidek pwukat: “Ia duwen omw doadoahngki dahme Paipel padahngki eh kamwahwihala omw mour? Ke leme meteikan anahne rong dahme Paipel padahngki? Dahme ke kak wia pwehn sewese irail?” (Lep. Pad. 3:27; Mad. 9:37, 38) Kasalehiong tohnsukuhlo kisin doaropwe kan me mi nan neitail Koakon en Kasukuhl oh mweidohng en pilada mehnia me kiseh kan, kompoakepah kan, de ienge tohndoadoahk kan pahn mwahuki wadek. Kihong ih me tohto. Koasoanehdi kumwa en praktiski ia duwen eh kak kihla kisin doaropwe pwukat ni ahl kadek. Ei mehlel, mwurin neitail tohnsukuhlo wiahla sounkalohk men me saikinte papidais, kitail pahn men iangih kalohk pwehn sewese.​—Ekl. 4:9, 10; Luk 6:40.

8. Dahme kahrehda e kesempwal ong neitail tohnsukuhl kan en kalaudehla arail poakohng Koht oh mehn mparail kan? (Pil kilang koakono “ Ia Duwen Atail en Sewese Neitail Tohnsukuhl en Paipel kan en Kalaudehla Arail Poakohng Koht.”)

⁸ Sises mahsanihong kitail en padahkihong meteikan “en kapwaiada mehkoaros” me e ketin  kehkehlingki. Met kin pidada kosonned riauo me keieu kesempwal, me iei en poakohng Koht oh poakohng mehn mpomw. (Mad. 22:37-39) Ma kitail sewese neitail tohnsukuhl en Paipel men en peikiong kehkehlik pwukat, kitail kin sewese ih en kalohk. Dahme kahrehda? Ma e ahneki limpoak laud ong Koht oh pil meteikan, e pahn men kalohk. Mehlel, ekei tohnsukuhl en Paipel kan ele kin masak kalohk. Ahpw kitail kak kamehlelehiong tohnsukuhl pwukat me re pahn kak powehdi arail masak aramas sang sawas rehn Siohwa. (Mel. 18:1-3; Lep. Pad. 29:25) Koakon me iang iren onop wet pahn kawehwehda kahk kan me kitail kak wia pwehn sewese neitail tohnsukuhl kan en kalaudehla arail poakohng Koht. Patehng met, dahme mwomwohdiso kak wia pwehn sewese tohnpadahk kapw kan en kalaudehla arail kasalehda limpoak?

9. Nan karasaras en tohnsukuhl en diraipih sidohsao, ia duwen tohnsukuhlo eh sukuhlki mehn kasukuhl kesempwal kan?

⁹ Pwurehng medewehla karasaras en tohnsukuhlo me sukuhlki en diraipih sidohsa. Ia duwen tohnsukuhlo eh sukuhlkihdi diraip erein eh sounkaweido iangih? Sang ni eh kin rong eh sounpadahko oh kilang soundiraip mwahu teikan. Karasepe, sounkaweido ele pahn idih emen soundiraip me ni kadek mweidohng ehu sidohsa en kohla mwowe. De e pahn idih emen soundiraip me kaidi dengki en were sidohsao pwe soundiraip teikan en kak kilang mwahu, oh ele e pahn kangoange tohnsukuhlo en wia duwehte. Mehn kahlemeng pwukat kak padahkihong tohnsukuhlo mehn kasukuhl kesempwal kan me e kak doadoahngki ni eh kin diraipih sidohsa.

10. Dahme pahn sewese tohnsukuhl men en wiahla tohnpadahk?

¹⁰ Duwehte met, tohnsukuhl en Paipel men me tepida papah Siohwa sohte kin ihte ale kasukuhl sang eh sounpadahko ahpw pil sang mehn kahlemeng mwahu en sapwellimen Siohwa ladu teikan. Eri dahme pahn sewese laud tohnsukuhl kan en wiahla tohnpadahk? Towehda mihting kan en Kristian. Dahme kahrehda? Dahme re kin rong nan mihting kan pahn sewese irail en sukuhlki soahng tohto, kakehlakahla arail pwoson, oh sewese irail en kalaudehla arail poakohng Koht. (Wiewia 15:30-32) Patehng met, ni mihting kan, sounpadahk en Paipelo kak kahrehla tohnsukuhlo en tuhwong Kristian teikan me ele arail irair ko duwehte aho. Tohnsukuhlo pahn kilang mehn kahlemeng mwahu kan en riatail Kristian kan ni arail kasalehda limpoak nan mwomwohdiso. Medewehla mehn kahlemeng pwukat.

11. Mehn kahlemeng dah me tohnsukuhl men ele kilang nan mwomwohdiso, oh dahme arail mehn kahlemeng kakete wiahiong tohnsukuhlo?

¹¹ Tohnsukuhl en Paipel men me wia nohno men ahpw sohte pwopwoud kilang sister men me duwehte eh irairo. Eh kilang sistero eh nantihong en kahrehdo nah kisin seri kan nan Wasahn Kaudoko uhdahn sair eh mohngiong. Emen tohnsukuhl me nannanti en uhdihsang simoak tuhwong emen brother me ahneki soangen kahpwalo ahpw powehdi. Brothero padahkihong tohnsukuhlo ia duwen eh limpoak ong Siohwa kamwakid ih en peikiong sapwellime kehkehlik kan. (2 Kor. 7:1; Pil. 4:13) Mwurin brothero koasoiaiong tohnsukuhlo ia duwen eh uhdihsang simoak, e nda, “Ke pil kak uhdihsang simoak.” Met kangoange tohnsukuhlo oh e kamehlele me e pil kak wia. Emen serepein me wia tohnsukuhl en Paipel kilang sister pwulopwul men me kin uhdahn perenki eh wia emen Sounkadehdehn Siohwa. Ni tohnsukuhlo eh kilang uwen peren me sister pwulopwulo ahneki, e men esehla dahme kahrehda sistero kin ahnsou koaros mwomwen peren.

12. Dahme kahrehda kitail kak nda me emenemen nan mwomwohdiso kak wia mehkot pwehn sewese tohnsukuhl en Paipel kan?

¹² Ni tohnsukuhl en Paipel kan ar esehla sounkalohk lelepek tohto, irail pahn sukuhlki sang  arail mehn kahlemeng duwen ia wehwehn en kapwaiada sapwellimen Krais kehkehlik duwen poakohng Koht oh mehn mpomw. (Sohn 13:35; 1 Tim. 4:12) Oh nin duwen me kitail koasoiaier mwoweo, tohnsukuhl en Paipel men kak sukuhl sang sounkalohk kan me ahneki soangen kahpwal me e pil kin lelohng. Sang mehn kahlemeng pwukat, e sukuhlki me e pahn kak wiahda wekidekla kan me anahn pwehn wiahla sapwellimen Krais tohnpadahk. (Deud. 30:11) Emenemen nan mwomwohdiso kak wia mehkot pwehn sewese tohnsukuhlo. (Mad. 5:16) Dahme ke kak pein wia pwehn kangoange tohnsukuhl en Paipel kan me kin kohdo iang mihting?

13-14. Dahme Sises ketin wia ni ahnsou me sapwellime wahnpoaron ko mworusala?

¹³ Kitail men sewese riatail Kristian kan me sohla kin iang kalohk oh mihting ren pwurehng kapwaiada sapwellimen Krais kehkehlik en katohnpadahk. Sapwellimen Sises wiewia ong sapwellime tohnpadahk ko me mworusala kin kasalehda dahme kitail kak wia rahnwet.

¹⁴ Mwohnte Sises ketin kamakamala, wahnpoaron ko “koaros eri kesehla ih oh tangdoaui.” (Mark 14:50; Sohn 16:32) Dahme Sises ketin wia ni ahnsou me sapwellime wahnpoaron ko mworusala? Mwurinte eh ketin iasada, Sises mahsanihong ekei sapwellime tohnpadahk ko: “Kumwa dehr masak! Kumwa kohla kairehki riei ko [me I iasadahr].” (Mad. 28:10a) Sises sohte ketin likidmeliehla sapwellime wahnpoaron ko. Mendahki arail kesehla ih, e ketin ekerkihte irail “riei ko.” Duwehte Siohwa, Sises kin ketin kasalehda kadek kalahngan oh mahk.​—2 Nan. 13:23.

15. Ia atail pepehm ong irail kan me uhdihsang iang kalohk?

¹⁵ Pil duwehte, kitail kin uhdahn nsenohki irail kan me uhdihsang iang kalohk. Irail riatail Kristian kei oh kitail kin poakohng irail! Kitail kin tamatamante doadoahk laud koaros me re wiahiong Siohwa mahso—ekei irail wia met erein sounpar tohto. (Ipru 6:10) Kitail uhdahn wereisang irail! (Luk 15:4-7) Pwehn alasang Sises, ni ahl dah me kitail kak kasalehda atail nsenohkin irail?

16. Ia duwen atail kak kasalehda atail nsenohki riatail Kristian kan me sohla iang kalohk oh mihting?

¹⁶ Luke irail ni kadek ong mihting kan. Ehu ahl me Sises ketin kangoange sapwellime wahnpoaron ko me mworusala iei sang ni eh ketin kasamwo irail ong mihting ehu. (Mad. 28:10b; 1 Kor. 15:6) Rahnwet, kitail pil kak kangoange irail me sohla iang kalohk oh mihting ren iang towehda mihting kan en mwomwohdiso. Kitail wehwehki me ele kitail anahne luke irail pak tohto mwohn arail pahn wia met. Sises uhdahn kupwurperenkihda sapwellime tohnpadahk ko ar mwekidki sapwellime luhk.​—Pil kilang Madiu 28:16 oh Luk 15:6.

17. Dahme kitail pahn wia ni emen me sohla iang kalohk oh mihting eh kohdo iang mihting?

¹⁷ Kasamwo irail ni kadek. Sises ketin kasamwo sapwellime tohnpadahk ko ni arail lella reh. E sohte ketin awih irail en kohla reh, ahpw e ketila rehrail oh mahseniong irail. (Mad. 28:18) Dahme kitail pahn wia ni emen me sohla iang kalohk oh mihting eh kohdo ni atail Wasahn Kaudoko? Kitail pahn tiengla mwowe oh kasamwo ih ni kadek. Nin tapio, ele kitail pahn pwunodki me kitail sehse dahme kitail pahn nda. Ahpw kitail kak ndahte me kitail uhdahn perenki atail kilang ih oh kanahieng en dehr kahrehiong ih en soansuwedda.

18. Ia duwen atail kak kangoange irail kan me sohla iang kalohk oh mihting?

¹⁸ Kangoange irail. Sapwellimen Sises tohnpadahk ko ele pehm me re sohte pahn kak kalohk wasa koaros nin sampah. Sises ketin kangoange irail ni eh mahsanih: “I pahn ieiang kumwail rahn koaros.” (Mad. 28:20) Ia  duwe, met sewese sapwellime tohnpadahk ko? Ei. Sohte pwand mwurin mwo, irail uhdahn soupisengkihla arail “padapadahk oh kalokalohki rongamwahu.” (Wiewia 5:42) Irail kan me sohla iang kalohk oh mihting pil anahne kangoang. Ele re masak en pwurehng iang kalohk. Kitail kak kangoangehkin irail me re sohte pahn kelehpw kalohk. Ni ahnsou me re onopada, kitail kak iang irail kalohk. Re pahn kalahnganki atail sawas ni ahnsou me re pwurehng tepida kalohki rongamwahwo. Ni atail kin kasalehiong irail me kitail kin wiahkin irail riatail Kristian kei, re pahn men pwurehng iang kalohk, oh met pahn kaperenda koaros nan mwomwohdiso.

19. Dahme kitail kin inengieng wia, oh dahme kahrehda?

¹⁹ Ia uwen werei me kitail en pousehlahte kalohk oh katohnpadahk? Lao lel kaimwiseklahn koasoandi en mwehi wet. (Mad. 28:20; kilang Kawehwehn Lepin Lokaia kan, “Koasoandi en mwehi.”) Kitail pahn kak kapwaiada sapwellimen Sises kehkehliko lao lel ahnsowo? Ei, kitail koasoanedier teng en wia met! Kitail kin perenki toukihda atail ahnsou, kehl, oh neitail mwohni pwehn rapahki irail kan me “ahneki mohngiong mwahu en ale mour soutuk.” (Wiewia 13:48) Ni atail wia met, kitail kin idawehn sapwellimen Sises mehn kahlemeng. E mahsanih: “Kenei mwenge iei en kapwaiada kupwuren ih me ketin poaroneiehdo oh kanekehla sapwellime doadoahk.” (Sohn 4:34; 17:4) Kitail pil kin inengieng wia met. Kitail men kanekehla doadoahko me kohwongehr kitail. (Sohn 20:21) Oh kitail men meteikan, iangahki irail kan me sohla iang kalohk oh mihting, ren iang kitail dadaurete nan doadoahk wet.​—Mad. 24:13.

20. Nin duwen me Pilipai 4:13 mahsanih, dahme kahrehda kitail kak kapwaiada doadoahko me Sises ketin kehkehlingkihong kitail en wia?

²⁰ Ei mehlel, e sohte mengei en wia dahme Sises ketin kehkehlingkihong kitail en wia. Ahpw kaidehn kitail kelehpw me kin wia doadoahk wet. Sises ketin inoukihda me e pahn ketin ieiang kitail. Ni atail kin katohnpadahk, kitail kin wia “iengen Koht tohndoadoahk kan” oh “kin ieiang Krais.” (1 Kor. 3:9; 2 Kor. 2:17) Eri, kitail kak kapwaiada doadoahk wet. Ia uwen eh wia pwais kaselel ehu oh pil kaperen en kapwaiada pwukoa wet oh sewese meteikan ren pil wia duwehte!​—Wadek Pilipai 4:13.