1. Mateu 28:18-20 ninqannö, ¿imatatan Jesusqa qateqninkunata mandarqan?

JESUS kawariramurqa Galilëachö këkaq apostolninkunatam yuripurqan. Tsëchömi juk mandakuyta qorqan, tsëtaqa Mateu 28:18-20 (leyi) tarintsik.

2. ¿Ima tapukuykunapitatan yachakushun?

² Jehoväpa sirweqninkunaqa, nunakuna Jesuspa qateqnin tikrayänampaq mandakuytam cäsukunantsik. Tsëta ruranapaqqa kima tapukuykunam yanapamäshun. Juk. Bibliapita yachakoqkunataqa, ¿ima mastatan Diospita yachatsinantsik? Ishkë. Bibliapita yachakoqkuna bautizakuyänampaqqa, ¿imanötan wawqi panikuna yanapakuyanman? Kima. Qelanashqa wawqi panikunataqa, ¿imanötan yanapashwan yapë Diospita yachatsikuyänampaq?

3. ¿Imatatan Jesusqa mandakurqan?

³ Jesusqa nunakunata yachatsinapaqmi mandakurqan. Manam “llapan mandayanqaqkunata yachatsirnin” nirqanllatsu, sinöqa “llapan mandayanqaqkunata wiyakuyänampaq yachatsirnin” nirqanmi. Tsëtaqa Bibliapita  yachatsinqantsik nunatam yachatsinantsik wiyakoq kayänampaq y imanö rurayänampaq.

4. ¿Imanötan yachatsikushwan Jesus mandakunqanta cäsukuyänampaq? Juk choferpaq parlakaramuy.

⁴ Jesucristu mandakunqanta cäsukuyänampaqqa, ¿imanötan nunakunata yachatsishwan? Tsëpaqqa këman pensarishun. Juk nuna cärru manejëta yachakunampaqqa, pillapis alliraqmi yachatsinan. Y manejanqan höranam yachakunqanmannö ruranampaq, yachatseqnin pëwan këkänan.

5. (1) Juan 14:15; 1 Juan 2:3 ninqannö, ¿imatatan Bibliapita yachatsinqantsik nunataqa yachatsinantsik? (2) ¿Imanötan yachatsishwan?

⁵ Bibliapita yachatsinqantsik nunataqa, Teyta Dios munanqantam yachatsinantsik y yachakunqanmannö kawanampaqmi yanapanantsik (leyi Juan 14:15; 1 Juan 2:3). Tsëpaqqa Biblia ninqannömi escuëlachö, trabäjuchö y kushikunapaq akranqantsikkunachöpis cäsukoq kanqantsikta rikätsikunantsik. Y kawënintsikchö allita akranapaq Biblia ninqankuna imanö yanapamanqantsiktapis willarishun. Y Bibliapita yachatsinqantsik nunawan mañakurqa Jehovä yanapëkunampaq mañakushun (Juan 16:13).

6. Jesus mandakunqanta rurayänampaqqa, ¿imanötan yanapashwan?

⁶ Bibliapita yachëkätsinqantsik nuna Jesus mandakunqanta ruranampaqmi yanapanantsik. Wakinqa Diospita yachatsikuytam mantsakuyan. Tsëmi pacienciawan Bibliapita yachatsinantsik, tsënöpa Jehoväman markäkur o yärakur yachatsikuyta munayänampaq. Bibliapita yachakoqkuna Diospa alli willakuyninkunapita yachatsikuyänampaqqa, ¿imatatan rurashwan?

7. Bibliapita yachatsinqantsik nuna Diospita yachatsikunampaqqa, ¿imanötan yanapashwan?

⁷ Bibliapita yachatsinqantsik nunataqa itsa kënö tapupashwan: “Bibliapita yachakunqëkiqa, ¿imanötan kawënikichö yanapashurqunki? Wakin nunakunaqa, ¿Diospita yachakuyanmantsuraq? Pëkunataqa, ¿imanötan yanapankiman?” (Prov. 3:27; Mat. 9:37, 38). Tsëpaqqa yachatsikunapaq tratädukunata rikäratsir familiankunapaq, amïgunkunapaq y trabajaq mayinkunapaq munanqan kaqta akranampaq nishun. Akranqankunawan shumaq yachatsikunampaqqa kutin kutin pëwan yachakushun. Y manaraq bautizakur Diospita yachatsikuptimpis yanapanantsikmi (Ecl. 4:9, 10; Lüc. 6:40).

8. Bibliapita yachakoqkunaqa, ¿imanirtan Jehoväta y nuna mayinkunata kuyayänan? (“ Bibliapita yachakoq Jehoväta kuyanampaq yanapashun” neqtawan rikäri).

⁸ Jesusqa, llapan mandakunqanta yachatsikunapaqmi nimarqantsik. Tsëpaq parlarmi Jehovä Diosta y nuna mayintsikta kuyanapaq nirqan (Mat. 22:37-39). Bibliapita yachakoqkunata cäsukoq kayänampaq yachatsishqaqa, Teyta Diospitam yachatsikuyta munayanqa. Wakinkuna wayin wayin yachatsikoq yarquyta mantsakuyaptinqa, Jehovä yanapanampaq kaqta nishun (Sal. 18:1-3; Prov. 29:25). Tsënö yanapanapaqqa, “Bibliapita yachakoq Jehoväta kuyanampaq yanapashun” neqmi yanapamäshun. Llapan wawqi  panikuna yanapakuyaptinmi, Bibliapita yachakoqkunaqa kuyakoq këta yachakuyanqa.

9. Juk nuna cärru manejëta yachakunampaqqa, ¿imakunatan yanapanqa?

⁹ Cärru manejëta yachakuykaq nunapaq yapë parlarishun. Cärruta manejanqan höraqa manam yachatsinqan nuna ninqanllatatsu ruran, sinöqa wakin choferkuna rurayanqampitapis yachakunanmi. Itsa yachatseqnin nunaqa, atska cärrukuna kaptin choferkuna rurayanqanta rikarnin yachakunampaq ninman. O cärrukunapa aktsinta imanö utilizäyanqampita yachakunampaq ninman. Tsëkunam yanapanqa alli chofer kanampaq.

10. Bibliapita yachakoq bautizakunampaqqa, ¿imatan yanapanqa?

¹⁰ Tsënöllam Bibliapita yachakoq nunapis Jesuspa qateqnin tikranampaqqa, yachatseqnimpita y wawqi panikuna rurayanqampita yachakunan. Reunionkunachö wiyakunqanmi yanapanqa mas yachakunampaq, markäkïnin o yärakuynin sinchiyänampaq y Jehoväta mas kuyanampaq. Tsënö rurarqa bautizakuytapis puëdinqam (Hëch. 15:30-32). Bibliapita yachatseqninqa itsa pënö imëkapa pasashqa wawqi panikunata reqitsinqa. Y tsë wawqi panikuna kuyakoq kayanqanta rikarnin, pëkunanö këta munar yachakunqa. Tsëpaq masllata yachakurishun.

11. Wawqi panikuna pasayanqanqa, ¿imanötan Bibliapita yachakoqta yanapanman?

¹¹ Bibliapita yachakoq warmim, pënölla japallanlla wamrankunata wätaq panita reqirqan. Reunionkunaman wamrankunawan ëwanampaq kallpachakunqantam rikarqan. Y juk Bibliapita yachakoqnam cigärru shoquyta dejanampaq kallpachakuykar, tsënöpa pasashqa wawqita reqirin. Tsë wawqinam Bibliapita yachakunqanmannö Jehoväta kuyarnin, cigärru shoquyta dejanqanta willapan (2 Cor. 7:1; Filip. 4:13). Pënölla tsë viciu dejëta puëdinqanta wawqi niptinmi Bibliapita yachakoqqa kushikun. Y shipash panintsik kushishqa Jehovä sirwinqanta rikarmi, pënö kaqlla Bibliapita yachakïkaq shipashpis rurëta munan. Tsëta rikarmi musyëta munan imarëkur kushishqa kanqanta.

12. Bibliapita yachakoqkuna bautizakuyänampaqqa, ¿imanötan yanapakushwan?

¹² Jehoväta y nuna mayintsikta kuyanapaq Jesus mandakunqannö rurashqaqa, Bibliapita yachakoqqa cäsukoq kanqantsiktam rikanqa (Juan 13:35; 1 Tim. 4:12). Awmi, Bibliapita yachakoq Jesuspa qateqnin tikranampaqqa wawqi panikuna allita rurayanqanmi yanapanqa (Deut. 30:11). Bibliapita yachakoqkuna bautizakuyänampaqqa, llapan wawqi panikunam yanapakuyta puëdiyan (Mat. 5:16). Tsëmi kënö tapukushwan: “Bibliapita yachakoqkuna reunionkunaman shayämuptin, ¿imanötan yanapëkä?”.

13, 14. Apostolninkuna llakinashqa këkäyaptin, ¿imanötan Jesus yanaparqan?

¹³ Diospita yachatsikoq mana yarqoq qelanashqa wawqi panikunata yanapashun. Tsëta ruranapaqqa yanapamäshun, apostolninkuna qelanashqa këkäyaptin Jesus yanapanqanmi.

 ¹⁴ Jesus wanunampaq ichik tiempullana pishikaptinmi, apostolninkunaqa mantsakar Jesusta dejarïkur ëwakuyarqan (Mar. 14:50; Juan 16:32). Apostolninkuna llakinashqa këkäyaptinqa, ¿imanötan Jesus yanaparqan? Kawariramurmi, apostolninkunata willayänampaq Jesusqa qateqnin warmikunata kënö nirqan: “¡Ama mantsakäyëtsu! Ëwayë y wawqïkunata willayë” (Mat. 28:10a). Tsënö dejarishqa kayaptimpis, apostolninkunata kuyarmi Jesusqa ‘wawqïkuna’ nirqan. Tsënömi Jesusqa, Teytan Jehovänö llakipäkoq y perdonakoq kanqanta rikätsikurqan (2 Rey. 13:23).

15. Diospita manana yachatsikoq wawqi panikunataqa, ¿imanötan rikantsik?

¹⁵ Qelanashqa wawqi panikuna Diospita manana yachatsikuyaptinqa, pëkunata kuyarnin yanapanapaqmi kallpachakunantsik. Tsëtaqa rurantsik unë witsanchö atska watakunapa Jehoväta sirwirnin imëkata rurashqa kayaptinmi (Heb. 6:10). Pëkunataqa alläpam kuyantsik (Lüc. 15:4-7). Awmi, pëkunapaq yarpachakunqantsiktaqa Jesusnömi rikätsikunantsik.

16. Llakikurnin qelanashqa wawqi panikunataqa, ¿imanötan kuyanqantsikta rikätsishwan?

¹⁶ Reunionkunaman shayämunampaq invitashun. Jesusqa, apostolninkuna llakinashqa këkäyaptinmi juntakur parlakuyänampaq nirqan. Apostolninkuna pë kaqman ëwayaptinqa alläpachi kushikurqan (Mat. 28:10b; 1 Cor. 15:6). Tsënöllam kanampis llakinashqa y qelanashqa këkaq wawqi panikunata, reunionkunaman shayämunampaq invitanantsik. Reunionkunaman shayämunampaqqa, itsa kutin kutinraq invitashun. Pëkuna shayämuptinqa noqantsikpis Jesusnömi kushikushun (Mat. 28:16; Lücas 15:6 igualaratsi).

17. Unëpana reunionkunaman mana shamoqkunataqa, ¿imanötan chaskishwan?

¹⁷ Kushishqa chaskishun. Jesusqa, apostolninkuna mana mantsakuyänampaqmi witïkur shumaq parlaparqan (Mat. 28:18). Tsëmi unëpana reunionkunaman manana shamoq wawqi panikuna chärayämuptinqa, kushishqa chaskinantsik. Tsëpaqqa manam atskataraqtsu parlapänantsik, sinöqa reunionkunaman shayämuptinmi kuyëllapa parlapärinantsik.

18. ¿Imanötan qelanashqa wawqi panikunata yanapashwan?

¹⁸ Kuyëllapa parlaparnin yanapashun. Jesuspa apostolninkunaqa yarpachakuyarqanchi, entëru Patsachö yachatsikuyänampaq kaqta musyarirqa. Tsëchi Jesusqa kënö nirqan: “Llapan junaqkunam qamkunawan këkäshaq” (Mat. 28:20). Tsënö Jesus nishqa kaptinmi, apostolkunaqa “alli willakïkunata mana jaqishpa yachatsikur y willakur sïguiyarqan” (Hëch. 5:42). Qelanashqa këkaq wawqi panikunataqa yanapanantsikmi. Itsa Diospita yachatsikoq yarqïta mantsakuyan, tsëqa pëkunawan yachatsikoq yarqunapaq nishun. Tsënö kuyëllapa yanapashqaqa yapë Jehoväta sirwiyaptinmi llapantsik kushikushun.

19. ¿Imata ruranapaqtan listu këkänantsik?

¹⁹ Jesuspa qateqnin tikrayänampaqqa, imëkapis imanö këkanqampa ushëninyaqmi  yachatsikunantsik (Mat. 28:20; Bibliachö këkaq palabrakunapaq käyitsikïkunachö rikäri “Imëkapis imanö këkanqampa ushënin” neqta). Jesus mandakunqanta ruranapaqqa listum këkänantsik. ‘Imëyaqpis kawakïta chaskiyänampaq kallpachakïkaqkunata’ yanapanapaqqa tiempuntsikwan, kallpantsikwan y kapamanqantsikkunawanmi kushishqa yanapakunantsik (Hëch. 13:48). Imëpis yachatsikushqaqa, Jesus ruranqannömi Jehoväpa munëninta rurëkäshun (Juan 4:34; 17:4). Ushananyaqmi Teyta Diospita yachatsikur sïguinantsik (Juan 20:21). Kë rurëchöqa qelanashqa kaqkunawan y kallpachakuykaq wawqi panintsikkunawanmi juntu ushakë chämunqanyaq yanapanakunantsik (Mat. 24:13).

20. Filipensis 4:13 ninqanqa, ¿imanötan yanapamantsik Jesus mandamanqantsikta ruranapaq?

²⁰ Jesus mandakunqanta rurëqa manam fäciltsu. Tsënö karpis manam japallantsiktsu këkantsik, Jesusmi yanapëkämantsik. Pë mandakunqantaqa cäsukuntsik ‘Diospa minkankuna kar’ y “Cristuwan juntu” karmi (1 Cor. 3:9; 2 Cor. 2:17). Awmi, Jesus mandamanqantsikta rurë y wakinkuna rurayänampaq yanapëqa kushikuypaqmi (leyi Filipensis 4:13).