1. Mateo 28:18 al 20-pi nishca shinaca ¿Jesusca imata rurachuntaj mandarca?

JESUSCA causarishca qꞌuipaca Galileapimi paipaj catijcunapaj ñaupajpi ricurirca. ¿Paicunamanca ima importante mandashcatataj nirca? Caitaca Mateo 28:18 al 20-pi ricushun (Mateo 28:18-20-ta liyipai).

2. ¿Ima tapuicunatataj yachashun?

² Cunan punllacunapish Diosta sirvijcunaca gentecunata Jesuspaj discipulocuna tucuchunmi ayudana canchij. Chaimanta Jesús mandashcata pajtachingapaj quimsa tapuicunata yachashun. Puntapica, ¿Bibliamanta yachacujcunaman Dios mandashcata yachachishpapish imatataj ashtahuan rurana canchij? Ishquipica, ¿yachacujcunata Diosta ashtahuan sirvichunca ima shinataj huauqui panicunaca ayudai tucuncuna? Quimsapica, ¿chiriyashca huauqui panicunataca paicunapish cutin Jesuspaj discipulocunata rurashpa ayudachunca ima shinataj ayudai tucunchij?

3. ¿Jesusca paita catijcunamanca imatataj pajtachichun mandarca?

³ Jesusca shujtajcunaman huillachunmi mandarca. Chaimantami paica, “cancunata ñuca tucui imalla mandashcacunata yachachinguichij” ninapaj randica, “cancunata ñuca tucui imalla mandashcacunata paicunapish rurachun yachachinguichij” nirca. Bibliamanta yachacujcunatapish Jesús mandashcata ima shina pajtachina cashcata, imata rurana cashcatami  yachachina canchij (Hechos 8:31). ¿Imamantataj chaita ruranataca minishtinchij?

4. ¿Jesús mandashcata shujtajcunaman yachachingapajca imatataj rurana canchij? Shuj ejemplomanta parlai.

⁴ ¿Jesús mandashcata shujtajcunapish cazuchunca ima shinataj yachachina canchij? Cai ejemplopi yuyashun, ¿carrota manejanata yachachijca paipaj yachacujcunamanca leyes de tránsito nishcacunata respetachunca ima shinataj yachachin? Yachachijca paipaj yachacujcunamanca puntapica escuelapimi leyes de tránsito imacuna cashcata yachachina can. Pero leyes de transitota ima shina cazunata yachachunca yachachijca paipaj yachacujcunahuanmi carropi tiyarishpa, callepi ima shina manejanata yachachina can. ¿Cai ejemploca imatataj yachachin?

5. a) Juan 14:15; 1 Juan 2:3-pi nishca shinaca ¿yachacujmanca imata rurachuntaj yachachina canchij? b) ¿Biblia yachachishcacunata pajtachichunca imatataj rurana canchij?

⁵ Piman Bibliamanta yachachicushpaca Yayitu Dios imata rurachun munashcatami yachachinchij. Pero mana chaillatachu rurana canchij. Ashtahuanpish ima yachashcacunata paicunapaj causaipi pajtachichunmi yachachina canchij (Juan 14:15; 1 Juan 2:3-ta liyipai). Escuelapi, trabajopi cashpa o ima ricunacunata, pugllanacunata agllacushpaca shujtajcunapajca alli ejemplomi cana canchij. Shinallataj Bibliapaj consejocuna ima shina ayudashcata, chai consejocuna alli decisionta agllachun ayudashcatami yachacujmanca parlana canchij. Yachacujhuan Diosta mañacushpaca Diospaj espíritu santo paita ayudachunmi mañana canchij (Juan 16:13).

6. ¿Jesús mandashcata shujtajcunapish pajtachichunca imallatataj rurana canchij?

⁶ ¿Jesús mandashcata shujtajcunapish pajtachichunca imallatataj rurana canchij? Yachacujcunapish shujtajcunaman yachachina munaita charichunmi ayudana canchij. Huaquin yachacujcunaca maipica Bibliamanta predicanatami manchancuna. Biblia yachachishcacunata alli intindishpa, sinchi feta charichunmi paicunataca pacienciahuan ayudana canchij. Chaita rurajpica paicunaca shungumantami predicanata munangacuna. ¿Yachacujcuna shungumanta predicana munaita charichunca imatataj rurana canchij?

7. ¿Yachacuj predicana munaita charichunca ima shinataj ayudana canchij?

⁷ Yachacujmanca cai tapuicunatami rurai tucunchij. ¿Biblia yachachishcata cambaj causaipi pajtachishpaca imallapitaj mejorashcangui? ¿Shujtajcunapish Bibliamanta yachanatachu minishtincuna? ¿Canpish paicunata ayudangapajca imatataj rurai tucungui? (Proverbios 3:27; Mateo 9:37, 38). Familiacunaman, amigocunaman, trabajopi compañerocunaman huillangapaj agllashca tratadocunata cuchunmi ayudai tucunchij. Yachacujmanca, ¿cai tratadocunamantaca maijantataj cunata munanguiman? nishpami tapuna canchij. Pai agllashca tratadocunatami cui tucunchij. Qꞌuipaca chai tratadocunahuan respetohuan yachachichunmi ayudana canchij. Ña publicador tucujpipish paicunatami ayudashpa catina canchij (Eclesiastés 4:9, 10; Lucas 6:40).

8. ¿Yachacujca imamantataj Jehová Diosta, shujtajcunatapish cꞌuyanaca can? (“ ¿Yachacuj Diosta ashtahuan cꞌuyachunca ima shinataj ayudai tucunchij?” nishca recuadrota ricui).

⁸ Jesusca, “ñuca tucui imalla mandashcacunata paicunapish rurachun yachachinguichij” nishcatami yuyarina canchij. Chashna nishpaca Jesusca Jehová Diosta tucui shunguhuan cꞌuyanata, shinallataj shujtajcunatapish cꞌuyanatami nisha nicurca (Mateo 22:37-39). Jesús mandashcacunata cazuchun ayudashpaca paicunapish predicachunmi ayudashun. Maijan  yachacujcunaca predicanatami manchancuna. Pero gentecunaman mana manchashpa huillachun, Jehová Dios ayudanatami intindichina canchij (Salmo 18:1-3; Proverbios 29:25). Cai yachaica “¿Yachacuj Diosta ashtahuan cꞌuyachunca ima shinataj ayudai tucunchij?” nishca recuadrotami charin. Yachacujcuna Jehová Diosta, shujtajcunatapish ashtahuan cꞌuyachunca paicunata ima shina ayudanata ricushun.

9. ¿Manejanata yachacujca alli manejaj cangapajca imallatataj yachana can?

⁹ Carrota manejanata yachacujpi cutin yuyashun. Yachacujca yachachij ima nishcatami yachan. Shinallataj alli manejajcunamantapishmi yachan. Por ejemplo, yachachijca paipaj yachacujmanca alli manejajcunamantami yachai tucungui. Paicunaca achca carrocuna tiyajpipish shujtaj carrocuna paicunapaj ñaupajpi richunmi saquin. Shinallataj alli manejanata yachajca carrota manejashpa luz shujtajcunapaj ñahuipi ama shitachun, luzta bajana cashcatami yachachin. Yachachij chashna yachachijpica yachacujca valishca yuyaicunatami yachan.

10. ¿Yachacujtaca Diosta sirvichunca imataj ayudanga?

¹⁰ Diosta sirvishpa callarijca paita yachachijllamantaca mana yachanchu. Paica Diosta alli sirvij huauqui panicunapaj ejemplomantapishmi yachan. ¿Yachacujca Diosta ashtahuan sirvishpa catingapajca imatataj ruranata minishtin? Tandanacuicunamanmi rina can. Tandanacuicunapi imallata yachashpaca Diostami ashtahuan rijsinga, paipaj fepishmi sinchiyanga. Jehová Diostapish tucui shunguhuanmi cꞌuyanga (Hechos 15:30-32). Maijan huauqui panicunaca yachacujpaj causaita layallatajmi charishcacuna. Yachachijca yachacujtaca chashna laya huauqui panicunata rijsichunmi ayudai tucun. Congregacionpi cꞌuyaita ricuchij huauqui panicunamantapishmi yachacujca yachai tucun. ¿Yachacujcunaca paicunamantaca imatataj yachai tucuncuna? Ricushun.

11. a) ¿Tandanacuicunapica yachacujcunaca huauqui panicunamantaca imatataj yachai tucuncuna? b) ¿Paicuna Diosta sirvingapaj esforzarishcata ricushpaca yachacujcunaca imatataj rurasha nin?

¹¹ Shuj Bibliamanta yachacuj madre solterapi yuyashun. Paica tandanacuiman rishpaca pai layallataj madre soltera Diosta alli sirvij panitami rijsin. Cai pani paipaj huahuacunahuan tandanacuna huasiman shamungapaj achcata esforzarishcatami ricun. Cutin shuj yachacuj fumanata saquingapaj esforzaricushcapi yuyashun. Yachacujca tandanacuiman rishpa shuj huauqui fumana viciota saquishcatami rijsin. Cai huauquica “Jehová Diosta cꞌuyashcamanta, paipaj mandashcacunata cazushcamantami fumana viciota saquircani” nishpami yachacujmanca parlan (2 Corintios 7:1; Filipenses 4:13). Cai huauquica pai fumana viciota ima shina saquishcata parlashpaca yachacujmanca, “canpish fumanatami saqui tucungui” nishpami animan. Chaita yachashpaca yachacujca animarishcami sintirin. Cutin Bibliamanta yachacuj shuj joven huarmipi yuyashun. Yachacujca pai layallataj shuj joven pani Jehová Diosta cushilla sirvicushcatami ricun. Chaimantami yachacujca chai joven pani siempre cushilla cajta ricushpaca ¿imamantataj paica cushilla can? nishpa yachasha nin.

12. ¿Yachacujcunata tucuicuna ayudai tucushcataca ima shinataj yachanchij?

¹² Huauqui panicuna Diosta cꞌuyashcata, shujtajcunata cꞌuyashcata yachashpaca yachacujca Jesús mandashcata ima shina cazunatami cuentata cun (Juan 13:35; 1 Timoteo 4:12). Shinallataj yachacujca huaquin huauqui panicuna Diosta alli sirvingapaj paicunapaj causaipi ima cambiocunata rurashcatami yachai  tucun. Chaita yachashpami yachacujpish Diosta sirvingapaj ima cambiocunata rurana cashcata cuentata cun (Deuteronomio 30:11). Congregacionpica tucuicunami yachacujcunataca ayudai tucunchij (Mateo 5:16). Chaimantami cashna nishpa tapurina canchij. ¿Tandanacuicunaman shamuj yachacujcunata ayudangapajca imatataj ruracunchij?

13, 14. ¿Jesusca paipaj apostolcuna irquilla shina cajpica ima shinataj tratarca?

¹³ Chiriyashca huauqui panicunata cutin predicachun, gentecunata Jesuspaj catijcunata rurachunmi ayudasha ninchij. Paicunata ima shina ayudanata yachangapajca Jesús paipaj apostolcunata desanimarijpi ima shina ayudashcata ricushun.

¹⁴ Jesusta huañuchingapaj japijpica paipaj apostolcunaca paita saquishpa, miticushpami rircacuna (Marcos 14:50; Juan 16:32). ¿Apostolcuna irquilla shina cajpipish Jesusca ima shinataj tratarca? Jesús pai causarishca qꞌuipa imata rurashcapi yuyashun. Paica Diosta sirvij huarmicunatami pai causarishcata apostolcunaman huillachun cacharca. Jesusca: ‘Ama manchaichijchu. Ñuca huauquicunaman huillanaman richij’ nircami (Mateo 28:10a). Paita catijcuna paita saquishpa rijpipish Jesusca “ñuca huauquicuna” nishpami catirca. Jesusca Jehová Dios shinallatajmi cꞌuyaj, perdonaj carca (2 Reyes 13:23).

15. ¿Huauqui panicuna huillanata saquijpica ima shinataj sintirinchij?

¹⁵ Huillanata saquijcunamantaca ñucanchijpish achcatami preocuparinchij. Paicunaca ñucanchij huauqui panicunami cashpa catincuna. Paicunataca achcatami cꞌuyanchij. Paicunaca Jehová Diosta sirvingapaj tucui pudishcata rurashcataca manataj cungarinchijchu. Maijancunaca huillanata manaraj saquishpaca Diospajca achca huatacunatami trabajashcacuna (Hebreos 6:10). Paicunataca ñucanchij yuyaipimi charinchij (Lucas 15:4-7). ¿Jesús shina paicunamanta de verastij preocuparishcataca ima shinataj ricuchi tucunchij?

16. ¿Chiriyashca huauqui panicunamanta preocuparishcataca ima shinataj ricuchinchij?

¹⁶ Cꞌuyaihuan tandanacuicunaman invitashunchij. Apostolcuna desanimado cajpica Jesusca paihuan tandanacuchunmi invitarca (Mateo 28:10b; 1 Corintios 15:6). Jesusca paipaj discipulocuna paipaj invitacionta chasquijpica cushillami sintirishcanga. Cunan punllacunapish ñucanchijca chiriyashca huauqui panicunatami tandanacuicunaman richun invitai tucunchij. Paicuna tandanacuicunaman richunca cutin cutinchari invitana tucunga. Ñucanchijpish cai huauqui panicuna congregacionman rijpica Jesús shinami cushilla sintirishun (Mateo 28:16-taca Lucas 15:6-huan chꞌimbapurai).

17. ¿Chiriyashcacuna cutin tandanacuiman shamujpica imatataj rurana canchij?

¹⁷ Chiriyashcacunata cushilla chasquishunchij. Jesusca paipaj discipulocunahuan tupashpaca paicunapajman cꞌuchuyashpami alli chasquirca (Mateo 28:18). ¿Chiriyashcacuna tandanacuicunaman cutin shamujpica ñucanchijpish imatataj rurana canchij? Paicunapajman cꞌuchuyashpami alli chasquina canchij. Callaripica paicunahuan tupashpaca tal vez imatachari mana ni tucushun. Pero, “tandanacuiman shamushcamantami cushilla sintirinchij” ni tucunchij.

18. ¿Chiriyashca huauqui panicuna tranquilo sintirichunca ima shinataj animai tucunchij?

¹⁸ Chiriyashcacunata animashpa tranquilo sintirichun ayudashunchij. Jesuspaj discipulocunaca muyundij Allpapi predicanata  yachashpaca preocupadosmi sintirishcangacuna. Pero, Jesusca paicuna tranquilo sintirichunca cashnami nirca: ‘Tucui punllacuna ñucaca cancunahuanmi casha’ (Mateo 28:20). Paicunata animashca asha tiempo qꞌuipaca paicunaca yachachinata, huillanataca manataj saquircacunachu (Hechos 5:42). Congregacionmanta caruyajcunaca tranquilo sintirinata animachunmi minishtincuna. Paicunaca predicanatami manchancuna. Chaimantami paicuna seguro sintirichunca animana canchij. Paicunataca: “Canhuanmi huillanaman llujshi tucunchij” nishpami animana canchij. Chaita rurajpica paicunaca cushillami sintiringacuna. Shinallataj huauqui panicunata shina ricujpica paicunaca cutinmi congregacionpi Diosta sirvi callaringacuna. Chashnami tucuicuna cushilla sintirishun.

19. a) ¿Gentecuna huiñai causaita charichunca ima shinataj ayudai tucunchij? b) ¿Imamantataj chaita rurana canchij?

¹⁹ ¿Ima horacamataj Jesuspaj discipulocunata rurashpa catina canchij? Cai pacha tucuringacamami huillashpa catina canchij (Mateo 28:20). Huiñai causaita gentecuna charichunca ñucanchij fuerzahuan, ñucanchij tiempohuan, imalla cosascunahuanmi ayudai tucunchij (Hechos 13:48). Chashnami Jesuspaj ejemplota catishun. Paica: “Ñuca micunaca ñucata cachaj Yayapaj munaita rurana, pai rurai nishcata pajtachinami” nircami (Juan 4:34; 17:4). Ñucanchijpish ñucanchijman mingashca trabajotami cushilla pajtachisha ninchij (Juan 20:21). Tucuicunami tandalla tucuringacama Diospaj trabajasha ninchij (Mateo 24:13).

20. 2 Corintios 4:7-pi nishca shinaca ¿Jesús mandashcata pajtachingapajca picunataj ayudai tucun?

²⁰ Jesús mingashcata pajtachinaca mana facilchu can. Pero mana ñucanchijllachu canchij. Jesusca cancunahuanmi casha nircami. Gentecunata Jesusta catichun ayudashpaca Jehová Diospajta paihuan rurajcunami canchij. Shinallataj Jesushuanmi tandalla trabajanchij (1 Corintios 3:9; 2 Corintios 2:17). Jesuspish, Jehová Diospish ayudajpica cai mingashcataca pajtachi tucushunmi. Ñucanchijpajca Jesús mandashcata pajtachinaca valishcami can. Shujtajcunapish chaillatataj rurachun ayudashunchij (2 Corintios 4:7-ta liyipai).