Kichay leenaykipaq

Índice nisqaman riy

45 YACHACHIKUY

¿Imaynatan jujkunata yanapasunman Jesuspa kamachisqanta kasukunankupaq?

¿Imaynatan jujkunata yanapasunman Jesuspa kamachisqanta kasukunankupaq?

“Riychis, jinaspa yachachimuychis discipuloykuna kanankupaq [...]. Qankunaman llapa kamachisqaykunata paykunaman yachachimuychis kasukunankupaq” (MAT. 28:19, 20)

89 TAKI Jehová Diosta kasukuy

KAYKUNAMANTAN YACHASUN *

1. ¿Imatan Jesús kamachiran Mateo 28:18-20 nisqanpi?

KAUSARIMPUSQAN qhepallamanmi Jesusqa qatikuqninkunaman rijuriran, Galilea llaqtapi juñunasqa kashaqtinku. Chaypin kamachiran Mateo 28:18-20 (leey) nisqanta.

2. ¿Ima tapuykunamantan yachasunchis?

2 Llapa Diosta serviqkunan runakunata yanapananchis Jesuspa discipulon kanankupaq. Chayta junt’ananchispaqmi kinsa tapuykunamanta yachasunchis: Ñaupaqta, ¿imatawanmi ruwananchis Diosmanta yachachisqanchis runakunata yanapananchispaq? Iskaypi, ¿imaynatan iñiq t’aqapi iñiqmasikuna, estudiantekunata yanapankuman iñiyninkupi ñauparinankupaq? Kinsapi, ¿imaynatan iñiyninkupi chiriyapuq iñiqmasikunata yanapasunman jujmanta Diosmanta willanankupaq?

YACHACHISUN JESUSPA KAMACHISQANTA KASUKUNANKUPAQ

3. ¿Imatan reparananchis Jesuspa kamachisqanpi?

3 Jesusqa munanmi runakunaman kamachisqanmanta yachachinanchista. Chay kamachisqanmantan kayta reparananchis, payqa manan “llapa kamachisqaykunata paykunaman yachachimuychis” nillaranchu. Aswanpas niranmi: “Llapa kamachisqaykunata paykunaman yachachimuychis kasukunankupaq”, nispa. Chay kamachikuyta junt’ananchispaqmi, estudiantenchiskunatapas yanapananchis chay kamachikuyta junt’anankupaq.

4. ¿Imaynatan pimanpas yachachisunman Jesuspa kamachisqanta kasukunanpaq?

4 ¿Imaynatan pimanpas yachachisunman Jesuspa kamachisqanta junt’ananpaq? Kaypi yuyaykuy: ¿Imaynatan carro manejayta pimanpas yachachinku? Pitapas carrota manejananpaq yachachispaqa, yachachinallankutaqmi carro manejaymanta kamachikuykunata kasukunanpaq. Chaypaqmi paywan kuska carropi tiyaykuspa yanapananku, yachachisqanman jina carrota manejananpaq.

5. a) Juan 14:15; 1 Juan 2:3 nisqan jina, ¿imata ruwanankupaqmi estudiantenchiskunata yachachinanchis? b) ¿Imaynatan chayta ruwasunman?

5 Pimanpas Bibliamanta yachachispaqa, reparachinanchismi ima ruwananchista Dios munasqanta. Ichaqa manan chayllatachu ruwananchis, yachachinanchismi chayman jina kausananpaqpas (leey Juan 14:15; 1 Juan 2:3). Imayna kausasqanchiswanmi yanapasun; escuelanpi, llank’ananpi, ima kusirikuykuna ajllakusqanpipas Bibliaq nisqanta kasukunanpaq. Chaymantapas willasunmanmi imaynata Bibliaq nisqan yanapawaranchis sasachakuypi tarikuqtinchis otaq imatapas allinta ruwananchispaq chayta. Paywan kuska Diosmanta mañakushaspapas, mañapusunmanmi santo espiritunwan payta yanapananpaq (Juan 16:13).

6. ¿Imatawanmi ruwananchis pipas Jesuspa kamachisqanta kasukunanpaq?

6 ¿Imatawanmi ruwananchis pipas Jesuspa kamachisqanta kasukunanpaq? Yanapananchismi estudiantenchiskunata sonqomantapuni Diosmanta willanankupaq. Wakinqa nishutan manchakunku Diosmanta willaypi piensaspa. Chaymi pacienciawan Bibliaq nisqanta entiendenankupaq yanapananchis, chhaynapi iñiyninkupi kallpachananchispaq, sonqomanta Diosmanta willayta munanankupaqpas, ¿imaynatan chayta ruwasunman?

7. ¿Imaynatan estudiantenchista yanapasunman sonqomantapuni Diosmanta willayta munananpaq?

7 Yaqapaschá kaykunata tapusunman estudiantenchista: “¿Imaniwaqmi yachasqaykimanta, yanapashasunkichu kausayniykipi? ¿Pikunatan kaykunamanta yachay yanapallanmantaq? ¿Imatan ruwawaq paykunarayku?”, nispa (Prov. 3:27; Mat. 9:37, 38). Yachachisunmanmi yachachinapaq ajllasqa qelqakunawan allinta yanapachikunanpaq, chaypaqmi tapusunman: “¿Mayqenkunan gustanman familiaykiman, amigoykikunaman, llank’aqmasiykikunamanpas?”, nispa. Qosunmanmi ajllakusqan qelqakunata, jinaspa yanapasun imaynata munachinman chayta yachananpaq. Diosmanta willaypi puriyta qallariqtinpas, yanapashallasun (Ecl. 4:9, 10; Luc. 6:40).

¿IMAYNATAN IÑIQ T’AQA YANAPANMAN ESTUDIANTEKUNATA?

8. ¿Imaraykun estudiantenchiskuna Diosta, runamasikunatapas sonqomantapuni munakunanku? (Qhaway “ ¿Imaynatan estudiantekunata yanapasunman astawan Diosta munakunankupaq?” nisqata.)

8 Jesusmi niwaranchis runakunaman lliu kamachikuyninkunata kasukunankupaq yachachinanchista. Chaykunamantan kashan kay iskay aswan importante kamachikuykuna, Jehová Diosta runamasitapas, tukuy sonqomanta munakuy (Mat. 22:37-39). Sichus estudiantenchista kasukunankupaq yachachisun chayqa, yanapasunmi Diosmanta willanankupaq. Wakin estudiantekunaqa manchakunkumanmi Diosmanta willayta, chaymi ninanchis: “Jehová Diosmi yanapasunki Diosmanta willanaykipaq”, nispa (Sal. 18:1-3; Prov. 29:25). Jehová Diosta runamasikunatapas munakuspallan Bibliaq yachachisqanta mana manchakuspa willayta atinqa. Kay yachachikuypin willashallantaq imaynata estudiantenchiskunata yanapasunman Diosta munakunankupaq chayta. Ichaqa iñiq t’aqapas yanapanmanmi estudiantekunata astawan munakuyninkuta wiñachinankupaq.

9. ¿Imaynatan juj runa carro manejayta allinta yachanman?

9 Jujmanta yuyaykusun carro manejayta yachashaq runamanta. Carreteranta carrota manejashaspaqa manan yachachiqnillanmantachu yachanman, yachallanmantaqmi carrota allin manejaqkunamantapas. Yaqapaschá yachachiqnin qhawachinman imaynata juj carro manejaqkuna suyanku, waj carrokunataraq pasachinankupaq. Otaq juj carro jamushaspa luzninta pisiyachisqanta, ama ñawinta tutayachinanpaq. Chaykunata qhawaspan aswan allinta carro manejayta yachanqa.

10. ¿Iman estudianteta yanapanqa iñiyninpi wiñananpaq?

10 Chhaynallataqmi estudiantepas mana yachachiqnillanmantachu yachanan, yachallanmantaqmi juj iñiqmasikunamantapas. Chaymi iñiyninpi wiñananpaqqa juñunakuykunaman rinan. Juñunakuykunapi yachasqanmi kallpachanqa iñiyninpi wiñananpaq, astawan Diosta munakunanpaqpas (Hech. 15:30-32). Chaymi yachachiqnin iñiqmasiqa reqsichinan pay jina kallpachakushaq iñiqmasikunata. ¿Imaynatan iñiqmasikunaq munakuyninta rikuy yanapanman? Chaymanta astawan yachasun.

11. ¿Imakunata iñiq t’aqapi reparasqankun estudiantekunata yanapanman?

11 Sapallan wawanta uywaq estudianten reparanman imaynata pay jina tarikuq hermana kallpachakusqanta. Wawakunantin juñunakuyman jamunanpaq kallpachakusqanta rikusqanmi sonqonman chayanman. Chaymantapas cigarrota amaña pitananpaq kallpachakuq estudianten reqsinman pay jina ñaupa tiempopi cigarro pitaq hermanota. Chay hermanon willanman Diosta munakusqanrayku cigarro pitayta saqepusqanta (2 Cor. 7:1; Filip. 4:13). Chayta uyarispan estudianteqa willakunman paypaqpas sasa kasqanta, chay viciota saqey atisqanta yachaspan paypas kallpachakunman. Bibliamanta yachashaq juj sipasmi reparallanmantaq pay jina juj sipas iñiqmasi kusisqa Diosta servisqanta, chayta rikuspan paypas chay hermana jina kayta munanman.

12. ¿Imaynatan llapanchispas yanapakusunman estudiantekuna iñiyninkupi wiñanankupaq?

12 Estudianteqa juj iñiqmasikunata reqsispan reparanqa imayna Jesusta kasukuy kasqanta. Diosta munakuy, runamasikunata munakuypas ancha importante kasqantapas (Juan 13:35; 1 Tim. 4:12). Ñaupaqpi yachamusqanchis jina astawanmi estudianteta yanapanqa pay jina sasachakuyniyoq hermanokunata reqsiy. Chaypin reparanqa paypas Jesuspa qatikuqnin kayta atisqanta (Deut. 30:11). Rikusqanchis jina llapanchismi yanapakusunman estudiantekuna iñiyninkupi wiñanankupaq (Mat. 5:16). Chaymi tapukunanchis: “¿Imatan ruwashani juñunakuykunaman jamuq estudiantekunata yanapanaypaq?”, nispa.

IÑIYNINKUPI CHIRIYAPUQ IÑIQMASIKUNATA YANAPASUN JUJMANTA DIOSMANTA WILLANANKUPAQ

13, 14. ¿Imatan Jesús ruwaran qatikuqninkuna pisikallpayaqtin?

13 Chiriyapuq iñiqmasikunatapas yanapananchismi Jesuspa kamachisqanpi yanapakunankupaq. Chayta ruwananchispaq yachasun imaynatan Jesús yanaparan apostolninkunata pisikallpayaqtinku chayta.

14 Wañuchinanku patapi kashaqtinmi Jesustaqa qatikuqninkuna saqerpariranku (Mar. 14:50; Juan 16:32). Chhaynaña kaqtinpas, ¿imatan Jesús ruwaran? Kausarimpusqan qhepallamanmi Jesusqa kamachiran payta qatikuq warmikunata: “¡Ama manchakuychischu! Phawaychis, wayqeykunaman willamuychis”, nispa (Mat. 28:10). Qatikuqninkuna saqerpariranña chaypas, payqa manan chaytachu ruwaran, aswanpas “wayqeykuna” nispan niran. Jesusqa Jehová Dios jinan khuyapayakuywan paykunata perdonaran (2 Rey. 13:23).

15. ¿Imatan ruwasunman manaña Diosmanta willaq iñiqmasinchiskunarayku?

15 Jesús jinan noqanchispas yanapayta munanchis manaña Diosmanta willaq iñiqmasinchiskunata. Paykunapas iñiqmasinchiskunan kanku, chaymi paykunataqa munakunchis. Paykunaqa askha watakunan ñaupa tiempopi Diospaq llank’aranku (Heb. 6:10). Munasunmanmi noqanchiswan kuska jujmanta llank’anankuta (Luc. 15:4-7). ¿Imakunatan ruwasunman Jesús jina paykuna munakusqanchista rikuchinanchispaq?

16. ¿Imaynatan chiriyapuq iñiqmasikunaman munakusqanchista rikuchisunman?

16 Munakuywan juñunakuykunaman invitaspa. Qatikuqninkuna pisikallpayaqtinkun Jesusqa paykunata invitaran juñunakunankupaq (Mat. 28:10; 1 Cor. 15:6). Noqanchispas kallpachasunmanmi chiriyapuq iñiqmasikunata noqanchiswan kuska juñunakunankupaq. Ichaqa yaqapaschá askha kutita invitananchis kanqa jamunankupaq. Jesusqa anchatachá kusikuran qatikuqninkuna juñukuqtinkuqa. Noqanchispas pay jinan kusikusunman, chiriyapuq iñiqmasikuna noqanchiswan kuska juñukuqtinku (Mateo 28:16; tupanachiy Lucas 15:6 nisqanwan).

17. ¿Imatan ruwananchis iñiyninpi chiriyapuq iñiqmasinchis juñunakuyman jamuqtin?

17 Juñunakuyman jamuqtinku sumaqta chaskispa. Jesús qatikuqninkunawan tupaspaqa achhuykuspan paykunawan sumaqta rimaran (Mat. 28:18). Noqanchisri, ¿imatan ruwasunman iñiyninkupi chiriyapuq iñiqmasinchiskuna juñunakuyman jamuqtinku? Paykunaman achhuykuspan sumaqta chaskinanchis. Qallariypiqa manapaschá imatapas niyta atisunchu, ichaqa manan chaymantaqa nishuta llakikunanchischu, yaqapaschá “kusikunin jujmanta qanwan tupaspa”, nisqallanchis allin kanman.

18. ¿Imaynatan chiriyapuq iñiqmasikunata kallpachasunman?

18 Paykunata sumaqta kallpachaspa. Jesuspa qatikuqninkunaqa manchasqapaschá kasharanku pachantinpi Diosmanta willanankumanta. Jesusmi ichaqa paykunata kallpacharan: “Noqaqa sapa p’unchaymi qankunawan kashasaq”, nispa (Mat. 28:20). Chayraykun qatikuqninkunaqa, “allin willakuykunata” mana samaspa willashallaranku (Hech. 5:42). Chhaynatan chiriyapuq iñiqmasikunatapas kallpachananchis. Paykunaqa manchakushankupaschá jujmanta Diosmanta willayta. Paykunata yanapananchispaqmi nisunman paykunawan kuska Diosmanta willananchispaq. Chayta ruwaqtinchisqa agradecekuwasunmi. Sichus paykunata sumaqta kallpachasun chayqa, kusikusunmi iñiq t’aqapi jujmanta llank’asqankumanta.

JESUSPA KAMACHIWASQANCHISTA TUKUNANCHISKAMA JUNT’ASUN

19. ¿Imatan sonqomantapuni ruwayta munanchis, imarayku?

19 ¿Jayk’aqkaman runakunata yanapananchis Jesuspa discipulon kanankupaq? Kay tiempo tukukapunankaman (Mat. 28:20). ¿Atisunchu Jesuspa kamachiwasqanchista junt’ayta? ¡Chaytaqa ruwasunpunin! Tukuy sonqowanmi tiemponchiswan, kallpanchiswan, kaqninchiskunawanpas yanapachikunchis, “wiñay kausayman apaq ñanninta llapa puriy munaqkunata” maskhananchispaq (Hech. 13:48). Chhaynapin Jesuspa ruwasqanta qatikunchis, paymi niran: “Mijunayqa kachamuwaqniypa munayninta ruwaymi, qowasqan llank’aytapas tukunaykama junt’aymi”, nispa (Juan 4:34; 17:4). Noqanchispas qowasqanchis llank’aytan tukunanchiskama junt’ananchis (Juan 20:21). Munanchistaqmi llapa iñiqmasinchiskunawan, iñiyninkupi chiriyapuq iñiqmasinchiskunawanpas tukukuykama kuska llank’ayta (Mat. 24:13).

20. Filipenses 4:13 nisqan jina, ¿iman yanapawasun Jesuspa kamachiwasqanchista junt’ananchispaq?

20 Jesuspa kamachiwasqanchis llank’ayqa manan fácil junt’aychu. Chaywanpas manan sapallanchischu kashanchis, Jesús kikinmi prometewaranchis noqanchiswan kashananpaq. Jesusta kasukuspan runakunata yanapashanchis paypa discipulon kanankupaq, “Diospa llank’aqmasinkuna” kasqanchisrayku “Cristowan jujllachasqa kaspa” ima (1 Cor. 3:9; 2 Cor. 2:17). Chhaynaqa, atisunmi tukunanchiskama llank’ayta. Arí, ancha sumaq llak’aytan chaskiranchis, chayta ruwanankupaqmi jujkunatapas yanapananchis (leey Filipenses 4:13).

79 TAKI Paykunata iñiyninkupi kallpachay

^ párr. 5 Jesusmi qatikuqninkunata kamachiran jujkunata discipulon kanankupaq yachachinankupaq, yachachinallankutaqmi karan lliu kamachisqanta kasukunankupaqpas. Kay yachachikuypin yachasun imaynata chay ruwayta junt’asunman chayta. Wakin yachachikuykunan orqosqa kashan La Atalaya qelqamanta 2004 wata 1 julio killamanta 14-19 paginakunapi.

^ párr. 66 FOTOMANTA WILLAKUY: Juj hermananchismi yachachishan estudiantenman, imakunatas ruwanman astawan Diosta munakunanpaq chayta. Chaymantataq, estudianteqa hermananchispa kinsa ruwaykuna yachachisqanta ruwashan.