1. Ia Mataio 28:18-20, eaa ta Iesu i akaue?

I MURI ake i to Iesu tuakaouanga mei te mate, kua aravei aia i tana au pipi e akaputuputu ra i Galilea. E apinga puapinga tana ka akakite kia ratou. Eaa te reira? Tei roto tana tuatua ia Mataio 28:18-20.—E tatau.

2. Eaa te au uianga ta tatou ka uriuri?

² Ka tau katoa ta Iesu akauenga no tatou i teia tuatau, ei au tavini no te Atua. Ka uriuri tatou e toru uianga no te angaanga ta Iesu i oronga mai. Te mea mua, me apiiia te au ikuiku anga a te Atua ki te au pipi ou, eaa atu ta tatou ka rave? Te rua, akapeea te au papuritia o te putuputuanga me tauturu i te aronga apii Pipiria kia tupu i te pae vaerua? Te toru, akapeea tatou me tauturu i te au taeake paruparu kia piri akaou ki te angaanga akariro i te tangata ei pipi?

3. Eaa te au ikuiku anga ta Iesu i akakite i roto i tana akauenga?

³ Taka meitaki ta Iesu au ikuiku anga. Ka apii tatou i tana i akaue mai ki te tangata. Inara, eiaa e akangaropoina i tetai apinga puapinga. Kare a Iesu i karanga ana: ‘Apii ia ratou i te au mea katoa taku i akaue atu kia kotou.’ Mari ra, karanga aia: Apii ia ratou “kia akono i te au mea katoa taku i akaue atu kia kotou.” Me apii tatou i teia ikuiku anga ki te tangata apii Pipiria, ka anoanoia tatou ei au  puapii e kia arataki ia ratou. (Anga. 8:31) Eaa te tumu?

4. Eaa te aiteanga kia akono i tetai akauenga? Akatutu mai.

⁴ Kia “akono” i tetai akauenga, tera te aiteanga kia akarongo i te reira. Ei akatutuanga, akapeea tatou me apii i tetai kia akono, me kore kia akarongo, i te au mea ta Karaiti i akaue, akamanako ana i teia akaraanga. Akapeea tetai puapii no te apinga akaoro me apii i tana aronga apii kia akono i te au ture no te apinga akaoro? Penei, te mea mua, ka apii aia i te au ture o te mataara. Me apii aia i te aronga apii, ka rave aia i tetai atu apinga. Ka aru aia e ka arataki i te aronga apii, ia ratou e akaoro ra i runga i te mataara, e ka taangaanga i ta ratou i apii mai. Eaa ta tatou ka apii mai mei teia akaraanga?

5. (a) Ia Ioane 14:15; 1 Ioane 2:3, eaa te ka anoanoia kia apii i te aronga apii Pipiria kia rave? (e) Oronga mai i te au akaraanga akapeea tatou me arataki i ta tatou aronga apii.

⁵ Me apii tatou i te Pipiria ki tetai ke, ka apii tatou i ta te Atua e umuumu maira. Inara e maata atu ta tatou ka rave. Ka apii tatou i te aronga apii Pipiria kia taangaanga i ta ratou i tamou mai. (E tatau ia Ioane 14:15; 1 Ioane 2:3.) Ei akaraanga, ka akaari tatou ki te aronga apii akapeea me taangaanga i te au kaveinga Pipiria i te apii, i te ngai angaanga, e te ngai tarekareka. Ka akakite tatou i to tatou akaraanga, te riro anga te Pipiria ei arataki e te paruru ia tatou mei te kino e te tauturu anga ia tatou kia rave i te iki anga pakari. Ka pure kapiti tatou kia Iehova i mua i te aronga apii, kia arataki te vaerua tapu ia ratou.—Ioa. 16:13.

6. Eaa te ō maira ki roto i te apiianga i tetai ke kia akono i ta Iesu akauenga?

⁶ Eaa te ka ō mai ki roto i te apiianga i tetai kia akono i ta Iesu akauenga? Ka tauturu tatou i te aronga apii Pipiria kia akariro i te tangata ei pipi. Ka mataku rai tetai pae i te tutu aere. No reira, ka anoanoia tatou kia akakoromaki i te apii ia ratou kia maata atu te mārama, kia pakia te ngakau, e kia akakeu ia ratou i te tutu aere. Eaa ta tatou ka rave no te tauturu i te aronga apii, kia tutu aere i te nuti meitaki ki tetai ke?

7. Akapeea tatou me tauturu i te tangata apii kia inangaro i te tutu aere i te nuti meitaki ki tetai ke?

⁷ Penei ka ui tatou i teia au uianga ki te tangata apii Pipiria: “Akapeea taau āriki anga i te karere Patireia te taui anga i toou oraanga? I toou manako, te anoano ra ainei te tangata i teia karere? Eaa taau ka rave i te tauturu ia ratou? (Mase. 3:27; Mata. 9:37, 38) Akaari ki te tangata apii i te au aenga pepa i roto i te Pia Apii, e nana rai e iki eaa te ka akakeu i tona kopu tangata, te au oa, e te au oa angaanga. * E oake i tetai o teia au aenga pepa ki te tangata apii. Apii iaia akapeea me oronga i te aenga pepa ma te maru. Me riro mai ta tatou tangata apii ei papuritia kare i papetitoia, ka noo tatou ki te pae iaia ma te arataki iaia.—Kohe. 4:9, 10; Luka 6:40.

8. Eaa i puapinga ai kia anoano maata atu te aronga apii i te Atua e te tangata tupu? (Akara i te pia “ Tauturu i te Aronga Apii Pipiria Kia Akaperepere i te Atua.”)

⁸ Akamanako ana e kua akakite mai a Iesu kia apii tatou i te tangata “kia akono i te au mea katoa” tana i akaue. Ka kapiti mai te rua o te akauenga maata—kia anoano i te Atua e kia anoano i te tangata tupu—e apinga meitaki teia no te  angaanga tutu aere e te akariro i te tangata ei pipi. (Mata. 22:37-39) Eaa te tumu? Tetai tumu puapinga kia piri ki roto i te angaanga tutu aere ko te aroa—te aroa no te Atua e te tangata tupu. Mārama ua tatou i tetai aronga apii Pipiria, ka mataku ratou i te piri ki roto i te angaanga tutu aere. Inara ka akamaroiroi tatou i te aronga apii e ka tauturu a Iehova ia ratou kia kore e mataku i te tangata. (Sala. 18:1-3; Mase. 29:25) Te akataka ra te pia i teia atikara, te au takainga ka tauturu tatou i te tangata apii kia aroa i te Atua. Pera katoa, eaa ta te putuputuanga ka rave no te tauturu i te au pipi ou kia maata atu te aroa?

9. I te akatutuanga o te tangata e apii ra i te akaoro, eaa te au apiianga puapinga kiaia?

⁹ Akamanako akaou i te akatutuanga o te tangata te apiipii ra i te akaoro. Iaia e akaoro ra e tona puapii i te pae iaia, eaa tana ka apii mai? Na te akarongo anga ki tona puapii e te akarakara i te aronga e akaoro meitaki ra. Penei ka tou te puapii ki te tangata akaoro, tei tuku ua i tetai kia aere mai ki roto i tona mataara. Penei ka tou aia ki te tangata akaoro tei tamaru i tona mori, kia kore te aronga akaoro e aere ke. Ka riro teia au akaraanga ei apiianga puapinga ki te tangata apii e kia taaangaanga i te reira.

10. Eaa te ka tauturu i te tangata apii kia tere ki mua i te pae vaerua?

¹⁰ Te tangata apii Pipiria tei akamata i te aere na te ara o te ora, ka apii aia mei tona puapii e te au akaraanga memeitaki o te au tavini o Iehova. No reira, eaa te ka tauturu i te aronga apii Pipiria kia tere ki mua i te pae vaerua? Aere ki te au uipaanga Kerititiano. Eaa ra? Ka riro te apiianga Pipiria i te uipaanga ei akaoonu i to ratou kite, te akamaroiroi i te akarongo, e kia maata atu to ratou inangaro i te Atua. (Anga. 15:30-32) Pera katoa, ka rauka i te puapii i te akaoaoa i te tangata apii ki te au taeake e te au tuaine aiteite to ratou turanga. Eaa te au akaraanga o te aroa Kerititiano ta te tangata apii ka kite i roto i te putuputuanga? Akamanako ana i teia au akaraanga.

11. Eaa te au akaraanga ta te tangata apii ka kite i roto i te putuputuanga, e eaa tana ka apii mai?

¹¹ Te metua vaine takaua apii Pipiria, te akara ra aia i te tuaine Kerititiano e aiteite to raua turanga. Pakia tona ngakau i te kite i te tuaine e tauta ra i te aere ki te Are Uipaanga Patireia e tana tamariki rikiriki. Kua akaoaoa atu te tangata apii ki te papuritia, tei ngata i te akamutu i tana kai avaava, inara kua autu i teianei. Akakite te papuritia ki te tangata apii e na tana akaperepere ia Iehova i akakeu iaia kia akarongo ki te akauenga a te Atua. (2 Kori. 7:1; Phili. 4:13) I muri ake, te akarongo anga i te tua o te papuritia, mataora te tangata apii i te akamaroiroianga a te taeake, “Ka rauka rai ia koe te akamutu.” Kite atu te vaine mapu apii Pipiria i te tuaine mapu e mataora ra i tona oraanga ei Au Kite. Te kite anga te tamaine apii Pipiria i te tuaine mapu e mataora ra i tona oraanga, inangaro aia i te kite eaa te tuaine i mataora ua ai?

12. Eaa tatou i karanga ai e tuanga ta te putuputuanga no te tauturu i te aronga apii Pipiria?

¹² Me matau te aronga apii Pipiria i te au papuritia tiratiratu, ka rauka te apiianga mei to ratou akaraanga e ka kite ratou i te akono i te akauenga a Karaiti kia aroa atu i te Atua e te tangata tupu. (Ioa. 13:35; 1 Timo. 4:12) Mei tei akakiteia, ka apii te tangata apii Pipiria  mei te au papuritia tei akakoromaki i te manamanata mei to ratou rai. Ka apii te tangata apii mei teia au akaraanga e ka rauka iaia i te taui kia riro mai ei pipi na Karaiti. (Deu. 30:11) Ka rauka i te putuputuanga i te tauturu i te aronga apii Pipiria kia tere ki mua i te pae vaerua. (Mata. 5:16) Eaa taau e rave ra no te akamaroiroi i te aronga apii Pipiria tei aere mai ki te uipaanga?

13-14. Akapeea a Iesu te akono anga i tana au apotetoro i to ratou tuatau paruparu?

¹³ Ka inangaro tatou i te tauturu i te au taeake e te au tuaine paruparu, kia piri akaou ki roto i te angaanga ta Karaiti i akaue, e akariro i te tangata ei pipi. Ka aru tatou ia Iesu te akamaroiroianga i tana au apotetoro paruparu.

¹⁴ I te openga o ta Iesu angaanga tutu aere i te enua nei i mua ua ake ka mate ei aia, kua “akaruke iora ratou katoa iaia, oro atura.” (Mare. 14:50; Ioa. 16:32) Akapeea a Iesu te akono anga i tana au apotetoro i to ratou tuatau paruparu? I muri ua ake i tona tuakaouanga, akakite a Iesu ki tana au pipi: “Auraka e mataku: ka aere, ka akakite atu ki taku au taeake [kua tuakaou mai au].” (Mata. 28:10a) Kare a Iesu i akaruke ana i tana au apotetoro. Noatu kua akaruke ratou iaia, kua kapiki rai aia ia ratou e ko “taku au taeake.” Mei ia Iehova, e tu aroa ua to Iesu e te akakore i te ara.—2 Ari. 13:23.

15. Eaa to tatou manako i te aronga tei akamutu i te angaanga tutu aere?

¹⁵ Te maaraara atu nei tatou i te aronga tei akamutu i te tutu aere. E au taeake e te au tuaine teia e te akaperepere ra tatou ia ratou! Te maara nei ia tatou ta ratou angaanga memeitaki i rave i te tuatau i topa. (Ebe. 6:10) Te miimii nei tatou ia ratou! (Luka 15:4-7) Na te aru anga ia Iesu, akapeea tatou me akaari e te maaraara atura tatou ia ratou?

16. Akapeea tatou me akamaaraara atu i te au taeake e te au tuaine paruparu?

¹⁶ E pati ma te pumaana. Tetai mataara ta Iesu akamaroiroianga i tana au apotetoro paruparu, kua pati aia ia ratou ki te uipaanga. (Mata. 28:10e; 1 Kori. 15:6) Pera katoa i teia tuatau, ka akamaroiroi tatou i te aronga paruparu kia aere ki te uipaanga putuputuanga me kare ratou i aere ake. Penei ka pati putuputu katoa tatou i mua ake ka aere mai ei. Kare e ekoko anga kua ariu mai tana au pipi ki tana pati anga.—Akaaite ia Mataio 28:16 e Luka 15:6.

17. Eaa ta tatou ka rave me aere mai te taeake paruparu ki te uipaanga?

¹⁷ E āriki pumaana ia ratou. Āriki ua a Iesu i tana au pipi me aravei aia ia ratou; kua pukapuka katoa aia kia ratou. (Mata. 28:18) Eaa ta tatou ka rave me tae mai tetai taeake paruparu ki te Are Uipaanga Patireia? Ka āriki pumaana tatou iaia. I te akamata anga, penei ka manata tatou eaa ta tatou ka pukapuka atu. Eiaa e taakama atu iaia, mari ra e akakite e te mataora ra tatou i te kite akaou iaia.

18. Akapeea tatou me akamaroiroi i te au papuritia paruparu?

¹⁸ Akamaroiroi ia ratou. Papu kua taitaia rai te au pipi a Iesu, kare e rauka ia ratou i te tutu aere ki te ao katoa. Akamaroiroi a Iesu i tana au pipi te karanga anga: “Tei vaitata ua ra au ia kotou, e tae ua atu ki te openga.” (Mata. 28:20) Kua tauturu ainei teia ia ratou? Ae. Kare i roa, kua maroiroi ratou i “te apii anga atu e te  tuatua anga atu [i te nuti meitaki] ia Iesu Mesia.” (Anga. 5:42) Ka anoano katoa te au papuritia paruparu i te akamaroiroianga. Penei ka mataku ratou i te akamata akaou i te tutu aere. Ka akamaroiroi tatou ia ratou, kare e tuku ia ratou kia aere ko ratou anake ua. Me papa ratou, ka aru tatou ia ratou i te tutu aere. Kare e ekoko anga, ka āriki ratou i ta tatou tauturu me akamata akaou ratou i te tutu aere i te nuti meitaki. Me akono tatou i te aronga paruparu ei au taeake e te au tuaine, ka maroiroi akaou ratou ma te rekareka i roto i te putuputuanga.

19. Eaa to tatou anoano ma te ngakau tae, e no teaa ra?

¹⁹ Eaa te roa ta tatou akariro anga i te tangata ei pipi? E tae ua atu ki te openga o teianei ao. (Mata. 28:20; akara i te reo Papaa, Glossary, “Conclusion of the system of things.”) Ka rauka ainei ia tatou te rave i teia tuanga o ta Iesu akauenga? Ka aruaru ua atu tatou! Ka oronga tatou i te taime, te maroiroi, e te puapinga no te kimi i “te aronga i akonoia no te ora mutu kore.” (Anga. 13:48) Me rave tatou i teia, te aru ra tatou i to Iesu akaraanga. Akakite aia: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioa. 4:34; 17:4) To tatou anoano katoa te reira. Ka inangaro tatou i te akaoti i te angaanga tei orongaia mai kia tatou. (Ioa. 20:21) Ka inangaro katoa tatou i te aronga paruparu, kia akakoromaki i teia angaanga na tatou.—Mata. 24:13.

20. Ia Philipi 4:13, eaa ka rauka ai ia tatou i te rave i te angaanga ta Iesu i akaue ia tatou kia rave?

²⁰ Kare i te mea māmā i te rave i ta Iesu i akaue ia tatou kia rave. Inara, kare ko tatou anake ua te rave ra i teia angaanga. Taputou mai a Iesu e ka vai ua aia i te pae ia tatou. Ka rave tatou i te angaanga akariro i te tangata ei pipi ei ‘oa rave angaanga no te Atua’ e ‘ki mua oki i te aroaro o te Atu.’ (1 Kori. 3:9; 2 Kori. 2:17) No reira, ka rauka ia tatou i te rave i te reira. Mei teaa atura te akameitakianga e te mataora i te rave i teia angaanga e te tauturu i tetai ke kia pera!—E tatau ia Philipi 4:13.