1. Sprema Matej 28:18-20, koja zapoved dengja o Isus ple učenikonge?

OTKEDA o Isus voskresningja, ov pojavingja pe ple učenikonge kola so sine khedime ki Galileja. Valjani sine te vakerel lenge nešto važno. So sine adava? Leskere lafija šaj te arakha len ko Matej 28:18-20. (Čitin.)

2. Kola pučiba ka dikha?

² E Isuseskiri zapoved te keren pe učenikija važinela sa e Devleskere slugenge avdive. Adaleske te dikha trin pučiba kola soj tane povrzime e zadačaja so dengja la amenge o Isus. Prvo, osven so sikavaja e neve učenikon so rodela lendar o Devel, so panda valjani te kera? Dujto, sar šaj sa o objavitelija ko sobranie te pomožinen e interesentenge duhovno te napredujnen? Trito, sar šaj te pomožina okolenge soj neaktivna palem te počminen te keren učenikija?

3. Kova posebno upatstvo vklučingja o Isus ki pli zapoved?

³ E Isuseskere upatstvija sine jasna. Mora te sikava e manušen adava so ov zapovedingja. Ama, na valjani te bistra jekh važno detali. O Isus na vakergja: „Sikaven len sa so zapovedingjum tumenge“. Namesto adava, ov vakergja: „Sikaven len te ikeren sa so zapovedingjum tumenge“. Te šaj te šuna akava upatstvo, na valjani samo te sikava e interesenten so te keren, nego isto agjaar valjani te sikava len sar te keren adava (Dela 8:31). Soske?

4. Sar šaj te pomožina nekaske te ikerel e Hristoseskere zapovedija? Vaker primer.

 ⁴ Te „ikerel pe“ nesavi zapoved značinela te ovel pe poslušno. Sar šaj te sikava nekas te ovel poslušno ko adava so zapovedingja o Isus? O sledno primer ka pomožinel amenge te haljova so valjani te kera. Sar jekh instruktori vozibaske sikavela jekhe učeniko te ikerel pe ko soobrakjajna pravilija? O instruktori prvo sikavela le bašo pravilija ko soobrakjaj džikote tane ki učilnica. Ama, te šaj te sikavel le sar te ikerel adala pravilija, valjani te kerel panda nešto. Ov mora te ovel e učenikoja džikote vozinela hem te del le upatstvija sar te primeninel adava so siklilo. So sikljovaja taro akava primer?

5. a) Sprema Jovan 14:15 hem 1. Jovanovo 2:3, so valjani te sikava e interesenten te keren? b) Sar šaj amen te pomožina e interesentenge te primeninen o bibliska načelija?

⁵ Keda proučinaja i Biblija e javerencar, amen sikavaja len so rodela amendar o Devel. Ama, mora te kere nešto poviše. Mora te sikava e interesenten sar te primeninen ko plo životo adava so sikljovena. (Čitin Jovan 14:15; 1. Jovanovo 2:3.) Amare primerea, šaj te sikava e interesenten sar te ikeren o osnovna bibliska merilija ki škola, ki buti hem keda birinena rekreacija. Šaj te vakera lenge nešto so slučingja pe amenge ko životo te šaj te sikava lenge sar adava so primeninaja o bibliska upatstvija zaštitinela amen hem pomožinela amenge te ana mudra odluke. Keda siem e interesentencar, šaj te molina amen e Jehovaske hem te roda lestar te vodinel len ple sveti duhoja (Jovan 16:13).

6. Soj vklučimo ko adava te sikava e javeren te ikeren e Isuseskere zapovedija?

⁶ Soj vklučimo ko adava te sikava e javeren te ikeren e Isuseskere zapovedija? Amen valjani te pomožina amare interesentenge te ovel len želba te keren učenikija. Nesave interesentija šaj darana te džan te propovedinen. Adaleske valjani te ova strpliva džikote pomožinaja lenge pošukar te haljoven o bibliska čačipa te šaj te ovel len zorali vera. Tegani adava ka khuvel lenge ko vilo hem ola ka oven motivirime te propovedinen. So šaj te kera te pomožina e interesentenge te ovel len želba te propovedinen o šukar haberi?

7. Sar šaj te pomožina e interesenteske te razvinel želba te vakerel o šukar haberi e javerenge?

⁷ Šaj te puča e interesente pučiba sar soj akala: „Sar tlo životo ulo pošukar adaleske so primeninea o bibliska sikljojba? Dali mislinea kaj o javera da valjani te šunen o šukar haberi? So šaj te kere te pomožine lenge?“ (Izr. 3:27; Mat. 9:37, 38). Sikav e interesenteske o traktatija soj tane delo taro glavna publikacie službake hem mukh ov te birinel nesave lendar so mislinela kaj ka pomožinel nekaske tari leskiri familija, amala hem kolege. * De e interesenteske nekobor taro akala traktatija. Vežbin lea sar šaj ko taktično način te nudinel o traktatija e javerenge. Džangjola pe, otkeda o interesenti ka ovel nekrsteno objaviteli, amen valjani te propovedina lea te šaj te pomožina leske (Prop. 4:9, 10; Luka 6:40).

8. Soske tano važno o interesenti te bajrarel plo mangipe sprema o Devel hem sprema o pašutne? (Dikh i ramka „ Sar te pomožina e interesentenge poviše te mangen e Devle“.)

⁸ Ma bistre kaj o Isus dengja amen upatstvo te sikava e javeren „te ikeren sa“ so zapovedingja. Ko adava sigurno tane vklučime o duj najbare zapovedija — te manga e Devle hem te  manga e pašutnen (Mat. 22:37-39). Ako pomožinaja e interesenteske te ovel poslušno ko akala duj zapovedija, tegani pomožinaja leske te propovedinel. Soske vakeraja adava? Ako isi le baro mangipe sprema o Devel hem sprema o javera, tegani ka mangel te propovedinel. Normalno tano adava so nesave interesentija darana keda mislinena kaj valjani te propovedinen. Ama, amen šaj te ohrabrina len kaj o Jehova ka pomožinel lenge hem hari po hari ka našaven i dar (Ps. 18:1-3; Izr. 29:25). I ramka ki akaja statija opišinela kola čekorija valjani te kera te šaj te pomožina e interesenteske te bajrarel plo mangipe sprema o Devel. Osven adava, so šaj te kerel o sobranie te šaj te pomožinel e interesenteske te sikavel pobaro mangipe?

9. Sar okova so sikljovela te vozinel šaj te haljol važna pouke?

⁹ Te razmislina palem baši sporedba e učenikoja so sikljovela te vozinel. Džikote vozinela ko soobrakjaj, o instruktori bešela uzi leste, a o učeniko sikljovela na samo adalea so šunela ple instruktore nego isto agjaar so dikhela e javere vozačen. Na primer, o instruktori šaj te sikavel leske nesave vozače so ljubezno dela prednost javere vozačeske. Ili sikavela leske javere vozače so isklučinela o dugačka svetlija te na kojrarel e javere vozačen. Taro akala primerija o učeniko sikljovela skapocena lekcie so šaj korkori te primeninel len džikote vozinela.

10. So ka pomožinel e interesenteske duhovno te napredujnel?

¹⁰ Slično agjaar, o interesenti so počminela te služinel e Jehovaske, na sikljola samo taro objaviteli so proučinela lea nego taro šukar primerija taro javera sluge e Jehovaskere. Adaleske, so ka pomožinel e interesenteske duhovno te napredujnel? Te avel ko sostanokija. Soske? Adava so ka šunel ko sostanokija ka pomožinel leske te sikljovel poviše, te bajrarel pli vera hem te bajrarel plo mangipe sprema o Devel (Dela 15:30-32). Isto agjaar, ko sostanokija o objaviteli so proučinela lea šaj te zapoznajnel e interesente e phralencar hem e phenjencar soj tane slična lea ko but bukja. O interesenti ka dikhel o šukar primerija taro phralja hem phenja kola so sikavena mangipe ko sobranie. Te dikha o sledna situacie.

11. Save primerija šaj o interesentija te dikhen ko sobranie, hem sar adava šaj te vlijajnel upri lende?

¹¹ Jekh interesentka so korkori bajrarela ple čhaven dikhela sar jekh phen ko sobranie tani ki slično situacija. Pogodinela la keda dikhela kobor akaja phen trudinela pe te anel ple tikne čhaven ki dvorana. Jekh interesenti so borinela pe te čhinavel pušibaja zapoznajnela jekhe phrale kova so boringja pe isto problemea hem uspejngja. O objaviteli vakerela e interesenteske sar leskoro mangipe sprema o Jehova pottikningja le te ovel poslušno ko leskere zapovedija (2. Kor. 7:1; Fil. 4:13). O phral vakerela e interesenteske sar čhinavgja e pušibaja hem ohrabrinela le: „Tu da šaj te čhinave“. O interesenti tano ohrabrimo hem verujnela kaj ov da šaj te uspejnel. Jekh terni interesentka dikhela jekhe terne phenja koja so uživinela ko životo sar Svedoko. Keda i interesentka dikhela kobor tani bahtali akaja terni phen, oj mangela te džanel soske tano adava agjaar.

12. Soske šaj te vakera kaj sekova jekh ko sobranie šaj nešto te kerel te pomožinel e interesentenge?

¹² Keda o interesentija zapoznajnena pe različna verna objavitelencar, ola sikljovena taro lengoro primer so značinela te ikerel pe e Isuseskiri zapoved te mangel pe  e Devle hem e pašutnen (Jovan 13:35; 1. Tim. 4:12). Hem sar so sine vakerdo poangle, o interesenti šaj te sikljovel taro objavitelija kola so isi len slična problemija sar leste. O interesenti taro asavke primerija haljovela kaj valjani te kerel o potrebna promene te šaj te ovel e Hristoseskoro učeniko (5. Moj. 30:11). Sekova jekh ko sobranie šaj ko nesavo način te pomožinel e interesenteske duhovno te napredujnel (Mat. 5:16). Sar tu lično ohrabrinea e interesenten so avena ko sostanokija?

13-14. Sar o Isus postapingja ple apostolencar keda sine razočarime?

¹³ Amen mangaja te pomožina amare phralenge hem phenjenge soj neaktivna palem te počminen te propovedinen hem te keren učenikija. O način sar o Isus postapinela sine ple apostolencar keda sine razočarime sikavela amenge sar valjani amen da te postapina avdive.

¹⁴ Angleder o Isus te ovel mudardo, leskere apostolija mukhle le korkori hem našle (Mar. 14:50; Jovan 16:32). So kergja o Isus keda leskere apostolija sine obeshrabrime? Kratko palo leskoro voskresenie, o Isus vakergja nesave učenikonge: „Ma daran! Džan, vakeren mle phralenge [kaj voskresningjum]“ (Mat. 28:10a). O Isus na otkažingja pe taro ple apostolija. Iako ola mukhle le, ov ponadari da vikinela len sine ’mle phralja‘. Isto sar o Jehova, o Isus da sine milostivo hem prostinela sine (2. Car. 13:23).

15. Sar valjani te dikha ko adala so čhinavgje te propovedinen?

¹⁵ Slično agjaar, amen da grižinaja amen okolenge so čhinavgje te džan ki služba. Ola tane amare phralja hem phenja, hem amen but mangaja len! Amen na bistraja sa so kergje poangle akala phralja hem phenja bašo Jehova. Nesave soj tane akana neaktivna, služingje e Jehovaske beršencar (Evr. 6:10). Čače but falinena amenge! (Luka 15:4-7). Isto sar o Isus, sar šaj amen da te sikava kaj grižinaja amen lenge?

16. Sar sikavaja kaj grižinaja amen amare neaktivna phralenge hem phenjenge?

¹⁶ Ljubezno kanin len ko sostanokija. Jekh način sar o Isus ohrabringja ple učenikon keda sine razočarime tano agjaar so vikingja len ko jekh sostanok (Mat. 28:10b; 1. Kor. 15:6). Slično avdive da, amen ohrabrinaja e neaktivna objavitelen te aven palem ko sostanokija. Džanaja kaj te šaj te aven, verojatno ka valjani nekobor puti te kanina len. Sigurno o Isus sine bahtalo keda leskere učenikija prifatingje i pokana. (Sporedin Matej 28:16 hem Luka 15:6.)

17. So valjani te kera keda jekh neaktivno ka avel ko sostanokija?

¹⁷ Dodžaker len taro vilo. Keda o Isus dikhlja pe ple učenikoncar, ov kergja te osetinen pe šukar. Na adžikergja ola te aven ki leste, nego ov gelo te kerel lencar lafi (Mat. 28:18). So valjani te kera ako nekoj taro neaktivna avela ki dvorana? Amen valjani te dža ki leste hem ljubezno te pozdravina le. Ko početok šaj nane te džana so te vakera. Ama, te na osetinel pe nezgodno, šaj ednostavno te vakera kaj siem bahtale so dikhaja le.

18. Sar šaj te ohrabrina e neaktivna objavitelen?

¹⁸ Ohrabrin len. E Isuseskere učenikija šaj mislingje kaj nane sposobna te propovedinen ko celo sveto. Ov ohrabringja ple učenikon adalea so vakergja lenge: „Me sium tumencar ko sa o dive“ (Mat. 28:20). Dali akava pomožingja e učenikonge? Oja. Kratko palo adava, ola „sikavena sine hem vakerena sine o šukar haberi“ (Dela 5:42). E neaktivna  objavitelenge da valjani ohrabruvanje. Ola šaj darana palem te počminen te propovedinen. Amen šaj te ohrabrina len adalea so ka vakera lenge kaj ola nane korkori te propovedinen. Keda ka osetinen pe spremna, amen šaj te dža zaedno lencar ki služba. Sigurno ola ka ceninen amari pomoš keda palem ka počminen te propovedinen o šukar haberi. Keda dikhaja ki lende sar amare phralja hem phenja hem ponašinaja amen lencar agjaar, ola šaj palem te oven aktivna, a adava ka anel bahtalipe ko sobranie.

19. Koja tani amari bari želba, hem soske?

¹⁹ Dži keda ka prodolžina te propovedina hem te kera učenikija? Džikote na avela o krajo akale svetoskoro (Mat. 28:20). Dali ka šaj te propovedina hem te kera učenikija dži tegani? Rešime siem te kera adava! Amen spremno trošinaja amaro vreme, sila hem materijalna bukja te šaj te arakha adalen „so ispravno dikhena ko večno životo“ (Dela 13:48). Keda keraja akava, amen džaja palo e Isuseskoro primer. Ov vakergja: „Mlo hajbe tano te kerav i volja okoleskiri so bičhalgja man hem celosno te završinav i buti so dengja la mange“ (Jovan 4:34; 17:4). Adaja tani amari bari želba. Mangaja te završina i zadača so sine amenge dendi (Jovan 20:21). Hem mangaja o javera da, kote soj tane vklučime o neaktivna da, te istrajnen zaedno amencar ki akaja zadača (Mat. 24:13).

20. Sprema Filipjanite 4:13, soske šaj te ispolnina i zadača so dengja la amenge o Isus?

²⁰ Čače, nane lokho te kerel pe adava so zapovedingja amenge o Isus te kera. Ama, akaja zadača na keraja la korkori. O Isus vetingja kaj ka ovel amencar. Keda keraja učenikija amen siem „e Devleskere sorabotnikija“ hem siem „ko jekhipe e Hristosea“, adaleske o Jehova hem o Isus ka pomožinen amenge (1. Kor. 3:9; 2. Kor. 2:17). Tari adaja pričina šaj te uspejna ko adava. Isi amen bari prednost hem čest te ispolnina akaja zadača hem te pomožina e javerenge te keren isto adava! (Čitin Filipjanite 4:13.)