1. Hi ku ya hi Mattheo 28:18-20, i yini leswi Yesu a leletiki valandzreli vakwe akuva va swi yentxa?

NTSRHAKU ka loko a pfuxiwe ku feni, Yesu a humelele ka vadondzrisiwa vakwe a Galileya. A a ni mhaka ya lisima leyi a a djula ku va byela yone. He yini mhaka ya kone? Hi leyi yi kumekaka ka Mattheo 28:18-20.​—Dondzra.

2. He swini swivutiso leswi hi taka swi hlamula ka nhlokomhaka leyi?

² Ni namunhla Yesu a yimela leswaku mun’wana ni mun’wana wezru a landzra xileleto xa ku yentxa vadondzrisiwa. Kutani, hi ta vona swivutiso swizrazru leswi yelanaka ni xileleto lexi Yesu a hi nyikiki xone. Xa ku sungula, handle ka ku yentxa vadondzrisiwa lavampswha, i yini swin’wana leswi hi nga swi yentxaka? Xa wubidzri, vazrezri hinkwavu a bandleni va nga va pfunisa kuyini lava hi dondzraka na vone Bibele akuva va kula hi tlhelo dzra moya? Xa wuzrazru, hi nga va pfunisa kuyini vamakwezru lava tsrhikiki ku zrezra akuva va tlhela va hlengela ka ntizro wa ku yentxa vadondzrisiwa?

3. He wini ntxhumu wun’we wa lisima lowu Yesu a hi byeliki leswaku hi wu yentxa, nakone wu swi tlhamuxela?

³ Leswi Yesu a swi hlayiki swi le livaleni. Hi fanela ku dondzrisa vhanu leswi a hi leletiki swone. Kambe, a hi fanelanga ku dzrivala ntxhumu wun’we wa lisima. Yesu a nga hlayanga swaku: ‘N’wi dondzrisa vhanu hinkwaswu leswi ndzri n’wi leletiki swone.’ Kambe a te: ‘N’wi va dondzrisa ku bekisa hinkwaswu leswi ndzri n’wi leletiki swone.’ Leswo swi tlhamuxela leswaku a swi yanelanga ku dondzrisa mhunu leswi a fanelaka ku swi yentxa, kambe hi fanela ku mu komba ni leswi a fanelaka ku swi yentxisa xiswone. (Min 8:31) Ha yini?

4. He xini xikombiso lexi nga hi pfunaka ku twisisa ndlela leyi hi nga dondzrisaka ha yone mhunu ku bekisa swileleto swa Yesu?

 ⁴ Akuva hi twisisa ndlela leyi hi nga dondzrisaka ha yone mhunu ku bekisa swileleto swa Yesu, pimisa hi xikombiso xa prisori lwa dondzrisaka vhanu ku fambisa mimovha. Ku sungula a dondzrisa vhanu milawu ya xitaratu na va ha li xikole. Kambe akuva a va dondzrisa ku bekisa milawu leyo, a fanela ku yentxa swin’wana; a fanela ku fambisa movha ni mudondzri mun’wana ni mun’wana akuva a vona ndlela leyi a fambisaka ha yone ni ku mu komba ndlela leyi a nga swi tizrisaka ha yone leswi a swi dondzriki xikole. Hi dondzra yini ka xikombiso lexi?

5. a) Hi ku ya hi Yohan 14:15 ni 1 Yohan 2:3, i yini leswi hi fanelaka ku dondzrisa lava hi dondzraka navu Bibele akuva va swi yentxa? b) Hi nga va pfunisa kuyini lava hi dondzraka na vone Bibele akuva va hanya hi leswi va swi dondzraka?

⁵ Loko hi fambisa swidondzro swa Bibele, hi dondzrisa vhanu milawu ya Xikwembu Nkulukumba. Kambe a hi fanelanga hi gamela lanu. Hi fanela ku pfuna lava hi dondzraka na vone Bibele ku hanya hi leswi va swi dondzraka. (Dondzra Yohan 14:15; 1 Yohan 2:3.) Hi ku tizrisa xikombiso xezru, hi nga pfuna lava hi dondzraka na vone Bibele ku tizrisa minsinya ya milawu ya Bibele a xikole, a ntizrweni ni loko va li ku hungateni. Hi nga ha va dzrungulela ndlela leyi minsinya ya milawu ya Bibele yi hi sizreleliki ha yone ni ku hi pfuna ku yentxa swiboho leswinene. Loko hi li ni lava hi dondzraka na vone Bibele, hi nga khongota ka Yehovha hi kombela kuva a va kongomisa hi ku tizrisa moya wakwe wa ku xwenga.​—Yh 16:13.

6. I yini swin’wana leswi patsrekaka a ku dondzriseni ka van’wana ku bekisa swileleto swa Kriste?

⁶ I yini swin’wana leswi patsrekaka a ku dondzriseni ka van’wana ku bekisa swileleto swa Yesu? Hi fanela ku pfuna lava hi dondzraka na vone Bibele kuva va va ni ku navela ka ku hlengela a ntizrweni wa ku yentxa vadondzrisiwa. Kambe van’wana lava hi dondzraka na vone Bibele, loko va pimisa ku yentxa leswo va teliwa hi ku txhava. Xileswo, hi fanela ku lehisa mbilu hi tlhela hi va pfuna ku va ni wutivi lebyi yentiki bya Bibele. Loko dondzro ya Bibele yi khumba timbilu ta lava hi dondzraka na vone va ta susumeteleka ku yentxa xa kukazri. I yini leswi hi nga swi yentxaka akuva hi pfuna lava hi dondzraka na vone Bibele akuva va navela ku hlengela a ntizrweni wa ku zrezra?

7. U nga mu pfunisa kuyini lweyi u dondzraka na yene Bibele akuva a navela ku zrezra?

⁷ U nga ha vutisa leswi lweyi u dondzraka na yene Bibele: “Xana mintiyiso ya Bibele yi ku pfunise kuyini ku va ni wutomi bya ku yampswa? Xana u vona leswaku vhanu van’wana va swi vilela ku tiva mintiyiso leyi? U nga yentxa yini akuva u va pfuna?” (Pr 3:27; Mt 9:37, 38) Komba lweyi u dondzraka na yene Bibele swipapelana leswi kumekaka ka Switizro swa ku Dondzrisa ha swone u va u mu tsrhika a hlawula leswi a vonaka swaku swi nga nyonxisa maxaka, vanghanu, kumbe vatizrikulobye. Nyika lweyi u dondzraka na yene Bibele swipapelana swa ku siyanasiyana, nakone loko a fanelekela ku tizra swanga muzrezri lwa nga babatisiwangakiki u fanela ku tizra na yene akuva u mu pfuna.—Ekl 4:9, 10; Lk 6:40.

8. Ha yini swi li swa lisima kuva lava hi dondzraka na vone Bibele va zrandzra Xikwembu Nkulukumba ni walekwavu? (Nakambe vona bokisi ledzri liki “ Ndlela Ya Ku Pfuna Lava Hi Dondzraka Na Vone Bibele Akuva Va Yengetela Lizrandzru Dzravu Ha Yehovha”.)

⁸ Dzrimuka leswaku Yesu a hi byele leswaku hi dondzrisa van’wana ‘ku bekisa hinkwaswu’ leswi a hi leletiki swone. Leswo swi patsra ku va dondzrisa milawu yibidzri leyikulu​—ku zrandzra Xikwembu Nkulukumba ni walekwavu—​milawu yoleyo ya yibidzri yi fambelana ni ntizro  wa ku zrezra ni wa ku yentxa vadondzrisiwa. (Mt 22:37-39) Xin’we xa swivangelo lexi hi susumetelaka kuva hi zrezra i lizrandzru ledzri hi nga na dzrone hi Yehovha ni vhanu vambeni. Swa twisiseka leswaku swidondzro swin’wana swa Bibele swa txhava ku zrezra. Kambe hi nga va tiyisekisa leswaku hi ku pfuniwa hi Yehovha va ta ya va swi kota ku hlula ku txhava vhanu. (Ps 18:1-3; Pr 29:25) Bokisi ledzri kumekaka ka nhlokomhaka leyi dzri kombisa magwasu lawa hi nga ma tekaka akuva hi pfuna lweyi hi dondzraka na yene Bibele akuva a yengesela lizrandzru dzrakwe ha Xikwembu Nkulukumba. Kambe bandla na dzrone dzri nga pfunisa akuva lava hi dondzraka na vone Bibele va yengesela lizrandzru dzravu ha Xikwembu Nkulukumba. Hi ndlela yini?

9. Xana prisori a nga ha mu dondzrisa hi tindlela tini mudondzri ku fambisa movha?

⁹ A hi tlheleni ka xikombiso xa prisori lwiya wa ku dondzrisa vhanu ku fambisa mimovha. Yanakanya kutani hi lweyi a mu dondzrisaka. Nkama lowu a fambisaka na a li tlhelweni ka prisori wakwe, a dondzra hi ndlela muni? Hi ku yingiseta prisori wakwe ni ku xiyisisa vafambisi lava nga ni wuswikoti. Hi xikombiso, prisori a nga ha mu dondzrisa hi ku mu komba mufambisi lweyi a fambisaka hi ndlela leyinene nakone a pfumelaka kuva van’wana va mu khaluta. Kumbe a nga ha mu komba mufambisi lweyi a pumbaka gezi akuva dzri nga tlunyi vafambisi van’wana lava a tlhanganaka navu. Swikombiso swa ku fana ni leswi swi nyikela tindondzro ta lisima ka mudondzri leti a nga ti tizrisaka.

10. I yini leswi taka pfuna lweyi hi dondzraka na yene Bibele akuva a yentxa nhluvuku?

¹⁰ Hi ku fanana, loko lweyi hi dondzraka na yene Bibele a sungula ku tizrela Yehovha, a nga dondzri ka mudondzrisi wakwe ntsena kambe ni ka xikombiso lexinene xa malandzra man’wana ya Yehovha. Hi ndlela leyo, i yini leswi nga pfunaka ngopfu lweyi hi dondzraka na yene Bibele akuva a hluvuka? I ku hlalela mintlhanganu. Ha mhaka muni? A mintlhanganwini ya bandla, a ta yengetela wutivi byakwe, a tiyisa lipfumelo dzrakwe ni ku tlhela a yengetela lizrandzru dzrakwe ha Xikwembu Nkulukumba. (Min 15:30-32) Handle ka leswo, loko va li mintlhanganwini, mudondzrisi a nga komba lweyi a dondzraka na yene vamakwezru van’wana. Swi nga yentxeka lweyi hi dondzraka na yene Bibele a gungula leswaku ku ni swinyingi leswi a fanaka ha swone ni vamakwezru lavo. Yene a ta va ni mukhandlu wa ku vona swikombiso leswinene swa lizrandzru dzra wukriste. A hi voneni swin’wana swa swone.

11. I swikombiso muni leswi lweyi hi dondzraka na yene Bibele a nga ha swi vonaka a bandleni, nakone swi nga va ni mabindzru wani?

¹¹ Yanakanya hi loko lweyi hi dondzraka na yene Bibele a li mamana lweyi a wundlaka vana na a li wuswakwe, loko a li Ndlwini ya Mfumu a vona makwezru wa kukazri wa xisati lweyi a nga ka xiyimu lexi fanaka ni xakwe. Ku vona ku tikazrata ka makwezru lweyo wa xisati ka ku teka swivanana swakwe a famba na swone a mintlhanganwini swi nga mu khumba mbilu. Kumbe yanakanya hi loko lweyi hi dondzraka na yene Bibele swi mu kazratela ku tsrhika ku dzraha kutani a ya tiva makwezru wa kukazri lweyi a langusaniki ni xikazratu xa ku fana ni xakwe a va a xi hlula. Kutani a mu bulela swaku lizrandzru dzrakwe ha Xikwembu Nkulukumba hi dzrone dzri mu pfuniki leswaku a yingiseta milawu yakwe. (2Ko 7:1; Flp 4:13) Kutani makwezru lweyo a mu byela a ku: “Phela na wene u nga swi kota!” Ku yingela mfambu wa makwezru lweyo swi mu yentxa a va ni ku dumba ka leswaku na yene a ta swi kota. Kumbe yanakanya hi loko lweyi hi dondzraka na yene Bibele a li mumpswha. Loko a li Ndlwini ya Mfumu a vona mumpswha mun’wana lweyi a nyonxiki hi leswi a nga Mboni ya Yehovha. Ku vona ku nyonxa loku mumpswha lweyo a nga na kone, swi mu  yentxa a djula ku tiva hi ku yentelela leswaku i yini leswi mu pfunaka leswaku a tsrhama na a nyonxile.

12. Ha yini hi nga hlayaka leswaku mun’wana ni mun’wana a bandleni a nga beka xiyandla leswaku lava hi dondzraka na vone Bibele va yentxa nhluvuku?

¹² Loko lweyi hi dondzraka na yene Bibele a vona swikombiso leswinene swa vamakwezru hi le kusuhi, yene a dondzra leswi tlhamuxelaka swone ku bekisa nawu wa ku zrandzra Xikwembu Nkulukumba ni walekwavu. (Yh 13:35; 1Tm 4:12) Hi lani hi swi voniki ha kone, lweyi hi dondzraka naye Bibele a nga pfuneka ka swikombiso swa vamakwezru lava kumaniki ni swikazratu swa ku fana ni leswi a kumanaka na swone. A dondzra leswaku swa koteka ku va a yentxa ku txintxa loku vilelekaka akuva a ndzruluka mudondzrisiwa wa Kriste. (Dt 30:11) Mun’wana ni mun’wana a bandleni a nga beka xiyandla hi tindlela ta ku siyanasiyana akuva a pfuna lava hi dondzraka na vone Bibele leswaku va yentxa nhluvuku. (Mt 5:16) Wene ke, i yini leswi u swi yentxaka akuva u pfuna swidondzro swa Bibele leswi sunguliki ku hlalela mintlhanganu?

13-14. I yini leswi Yesu a swi yentxiki nkama lowu vapostola vakwe va heliki ntamu?

¹³ Hi djula ku pfuna vamakwezru lava tsrhikiki ku zrezra akuva va tlhelela a ntizrweni wa ku zrezra ni ku yentxa vadondzrisiwa. Akuva hi tiva ndlela leyi hi nga va pfunaka ha yone, hi ta vona leswi Yesu a swi yentxiki akuva a pfuna vapostola vakwe nkama lowu a va hele ntamu.

¹⁴ Na Yesu a li kusuhi ni ku fa, hinkwavu vapostola vakwe va mu tsrhikile va tsrutsruma. (Mr 14:50; Yh 16:32) Xana Yesu a yentxe yini nkama lowu vapostola vakwe va heliki ntamu? Ntsrhakunyana ka loko Yesu a pfuxiwile a byele van’we ka valandzreli vakwe a ku: ‘N’wi nga txhaveni, fambani, n’wi bikela vamakwezru [leswaku ni pfuxiwile a ku feni].’ (Mt 28:10a) Yesu a nga va tsrhikanga vapostola vakwe. Nambi leswi a va mu tsrutsrumile, Yesu a tame a va vitana swanga vamakwavu. Ku fana na Yehovha, Yesu a ve ni timpswalu a tlhela a va dzrivalela.​—2Th 13:23.

15. Xana hi titwisa kuyini hi vamakwezru lava tsrhikiki ku zrezra?

¹⁵ Hi ndlela leyi fanaka, na hine ha zron’weka ngopfu hi lava va tsrhikiki ku zrezra. Vone i vamakwezru, nakone ha va zrandzra! Ha ha wu dzrimuka ntizro hinkwawu lowu va wu yentxiki khale, lowu van’we vavu va wu yentxiki hi malembe ya ku tala. (Hb 6:10) Ha va xuva swinene. (Lk 15:4-7) Xana hi nga xi tekelelisa kuyini xikombiso xa Yesu hi va hi kombisa leswaku ha zron’weka hi vamakwezru lava va tsrhikiki ku zrezra?

16. Xana hi nga swi kombisa hi ndlela yini leswaku ha zron’weka hi vamakwezru lava va tsrhikiki ku zrezra?

¹⁶ Va zrambe leswaku va ta mintlhanganwini. Yesu a nyike ntamu vapostola vakwe hi ku va zramba a ntlhanganwini wa kukazri. (Mt 28:10b; 1Ko 15:6) Na hine, hi nga yentxa leswi fanaka ka vamakwezru lava tsrhikiki ku zrezra loko va nga si sungula ku hlalela mintlhanganu. Dzrimuka leswaku swi nga ha djula u va zramba hi makhambi manyingi ku ko va pfumela ku ta mintlhanganwini. Handle ka ku ganaganeka, Yesu a nyonxe ngopfu swinene loko vadondzrisiwa vakwe va yamukele xizrambu xakwe, na hine hi nga va ni ku nyonxa loku fanaka.​—Dzringanisa ni Mattheo 28:16 na Luka 15:6.

17. Xana hi fanela ku yentxa yini loko makwezru lwa tsrhikiki ku zrezra a tlhasa Ndlwini ya Mfumu?

¹⁷ Va yamukeli hi mavoko mabidzri. Yesu a yentxe leswaku vadondzrisiwa vakwe va titwa na va yamukeleka nkama lowu a nga kumana na vone. Hi yene a zrangiki a ya khanela na vone. (Mt 28:18) Xana hi fanela ku yentxa yini loko makwezru lwa tsrhikiki ku zrezra a tlhasa Ndlwini ya Mfumu? Hi fanela ku zranga hi ya mu hoyozela. Swi nga ha yentxeka hi pfumala swa ku  swi hlaya. Kambe na hi nga mu danisi hi nga ha hlaya ntsena swaku: “Na nyonxa swinene hi ku ku vona makwezru.”

18. Hi nga va pfuna hi ndlela yini vamakwezru lava tsrhikiki ku zrezra?

¹⁸ Va tiyisekisi leswaku u ta va pfuna. Vadondzrisiwa va Yesu a va pimisa leswaku a va nge ti swi kota ku zrezra a misaveni hinkwayu. Yesu a va tiyisekise leswi: ‘Ndzri na n’wine hi masiku hinkwawu.’ (Mt 28:20) Xana swoleswo swi va pfunile vadondzrisiwa vakwe? Ina swi va pfunile. Ntsrhakunyana ka leswo, vone a va khomekile ka ntizro wa ku ‘hlaya evhangeli kumbe madzrungula lamanene’. (Min 5:42) Vamakwezru lava tsrhikiki ku zrezra na vone va djula ku tiyisekisiwa leswaku hi ta va pfuna. Vone va nga ha yanakanya leswaku a va nge he swi koti ku tlhela va zrezra. Hi nga tiyisekisa vamakwezru volavo lava zrandzrekaka leswaku a va wuswavu. Nakone loko va tibekiselile, hi nga famba na vone a nsin’wini. Handle ka ku ganaganeka va ta nyonxa ngopfu hi mpfunu wezru. Loko hi va komba leswaku hi va nkonta vamakwezru, mihandzru ya kone yi nga va yinene ngopfu ka vone ni ka bandla hinkwadzru.

19. He kwini ku navela kwezru, nakone ha yini?

¹⁹ Xana a ntizro wa ku zrezra ni ku yentxa vadondzrisiwa hi ta wu yentxa ku ya tlhasa nkama muni? Ku ya tlhasa a wugan’wini bya xiyimu lexi xa mintxhumu. (Mt 28:20) Xana hi ta swi kota ku wu yentxa? Ina, hikusa hi tibekisele ku wu yentxa! Ha nyonxa hi ku tizrisa nkama wezru, ntamu wezru ni leswi hi nga naswu akuva hi kuma ‘lava bekiseliwiki wutomi lebyi nga gamikiki’. (Min 13:48) Loko hi yentxa leswo, hi yetisela xikombiso xa Yesu. Yene a te: ‘A swakuda swanga hi leswaku ndzri hetisa ku zrandzra ka lweyi a ndzri zrumiki, ndzri hetisa ni ntizro wakwe.’ (Yh 4:34; 17:4) Na hine hi navela ku yentxa tanu. Hi swi djula ngopfu ku hetisa ntizro lowu Yesu a hi nyikiki wone. (Yh 20:21) Nakone hi djula leswaku van’wana, ku patsra ni vamakwezru lava tsrhikiki ku zrezra, va va na hine ka ntizro lowu.​—Mt 24:13.

20. Hi ku ya hi Ba-le-Filipi 4:13, ha yini hi nge na ku ganaganeka ka leswaku hi ta swi kota ku hetisisa ntizro lowu Yesu a hi nyikiki wone?

²⁰ I ntiyiso leswaku ku yentxa ntizro lowu Yesu a hi nyikiki wone a swi nabyali. Kambe, a hi wuswezru. Yesu a dumbise leswaku a a ta va na hine. Loko hi hetisisa ntizro wa ku yentxa vadondzrisiwa, hi tizra swanga ‘vatizrikulobye na Xikwembu Nkulukumba’ kun’we ‘na Kriste’. (1Ko 3:9; 2Ko 2:17) Leswo swi hi tiyisekisa leswaku hi nga swi kota ku heta ntizro lowu. Handle ka ku ganaganeka ku hetisisa ntizro lowu ni ku pfuna van’wana kuva va wu yentxa i ndjombo leyikulu!​—Dondzra Ba-le-Filipi 4:13.