1. Bici Yezu abwîzire abanafunzi bage bajire biri omu lwandiko lwa Mateyo 28:18-20?

ENYUMA z’okufûka, Yezu abonekera abanafunzi bage bali omu ntimanano e Galilaya. Agwêrhe ebintu by’obulagirire by’okubabwira. Bici ababwîzire? Ebi ababwizire biri omu lwandiko Mateyo 28:18-20.​—Osome.

2. Madoso gahi rhwaganirira?

² Irhegeko lya Yezu ly’okujira abanafunzi liyerekire ngasi mukozi wa Nnamahanga ene. Rhuganirirage madoso asharhu gayerekire omukolo Yezu arhuhîre. Burhangiriza, aha nyuma n’okuyigiriza, bici bindi rhukwanine rhujire? Bwa kabirhi, gurhi abahubiri boshi b’omu cigamba bakarhabalamwo abanafunzi b’Ebibliya bakule kiroho? Bwa kasharhu, gurhi rhwakarhabala bene wirhu na bali birhu balesire okujira omukolo gw’amahubiri bagushubirire?

3. Mahano gahi gali omw’irhegeko Yezu ahanâga?

³ Amarhegeko ga Yezu gayumvikine n’obwalagale. Rhukwanini rhuyigirize abantu ngasi bintu Yezu arhegesire. Cikone rhurhakwanini rhuyibagire aka kantu kw’obulagirire. Yezu arhaderhanga erhi: ‘Mubayigirize byoshi namurhegesire.’ Cikone lubero n’oko, aderha oku: Mubayigirize “okushimba ebi namurhegekaga byoshi.” Lyo rhukenga eryo irhegeko kuli kwa bulagirire rhuyigirize omwanafunzi w’Ebibliya ebi ajira, n’okumuyereka gurhi abijira. (Ebj. 8:31) Bulya gurhi kuli kwa bulagirire okujira ntyo?

4. Ohâne olwiganyo luyerekine gurhi rhwakayigiriza omwanafunzi w’Ebibliya okushimba amarhegeko ga Yezu?

⁴ “Okushimba” irhegeko, kuli kuderha kulirhumikira. Rhuganirire  olwiganyo lwakarhurhabala rhuhugûkwe gurhi rhwakayigiriza omuntu okushimba erhi kurhumikira ebi Kristu arhegekaga. Gurhi omwalimu oli wayigiriza owundi okutembeza omutuga ajira ly’amuyigiriza okukenga amarhegeko gw’omw’ibarabara? Burhangiriza, mwalimu ashinganine ayigirize omwanafunzi wage amarhegeko gw’omw’ibarabara. Cikoki, ly’ayigiriza omwanafunzi wage okukenga ago marhegeko, hali okundi ashinganine ajire. Ashinganine aluse omwanafunzi wage omw’ibarabara n’okumulongoza ly’abona gurhi omwanafunzi ali atembeza n’oku ali akolesa ebi ayigirizîbwe. Bici olo lwiganyo lurhuyigirizize?

5. (a) Nk’oku biyerekinwe omu Yowane 14:15 na 1 Yowane 2:3, bici rhwakayigiriza abanafunzi birhu b’Ebibliya bajire? (b)  hâne enyiganyo ziyerekine gurhi rhwakalongoza abanafunzi birhu.

⁵ Erhi rhuyigiriza abandi Ebibliya, rhunabayigirize ebi Nnamahanga alonzize rhujire. Cikoki rhukwanine rhujire binji kulusha oko. Rhukwanine rhuyigirize abanafunzi birhu b’Ebibliya bakamanya gurhi bakakolesa ebi bali bayiga omu kalamo kabo ka ngasi lusiku. (Osome Yowane 14:15; 1 Yowane 2:3.) Kugerera olwiganyo lwirhu, rhwanayereka abanafunzi birhu b’Ebibliya gurhi bakakolesa amakanuni g’Ebibliya ebwa masomo, omu kazi, erhi omu kasanzi kw’okucishagalula. Rhwanamuganirira gurhi okukolesa amakanuni g’Ebibliya omu kalamo kirhu kwarhulanzire oku buhanya erhi gurhi kwarhurhabire rhurhôle omuhigo mwinja. Amango rhuli haguma n’omwanafunzi, rhwanashenga Yehova amulongoze kugerera iroho lyage litagatifu.​—Yn. 16:13.

6. Bindi bici rhushinganine rhujire amango rhuli rhwayigiriza abandi okushimba amarhegeko ga Yezu?

⁶ Bindi bici rhushinganine rhujire amango rhuli rhwayigiriza abandi okushimba amarhegeko ga Yezu? Rhukwanine rhurhabale abanafunzi birhu b’Ebibliya nabo babe n’irala ly’okujira abanafunzi. Hali banafunzi baguma bakayoboha okujira omukolo gw’amahubiri. Rhukwanine rhube bakulembera amango rhuli rhwabarhabala bahugûkwe bwinja enyirigizo z’Ebibliya lyo baba n’obuyemere busêzire. Rhukajira ntyo, enyigirizo zirhu zanahuma oku murhima gw’abanafunzi birhu n’okubarhabala bajire empindûlo omu kalamo kabo. Bici rhwakajira lyo rhurhabala abanafunzi b’Ebibliya babe n’irala ly’okuyaliza omwanzi mwinja?

7. Gurhi rhwakarhabala omwanafunzi w’Ebibliya abe n’irala ly’okuhubiri omwanzi mwinja?

⁷ Rhwanadosa omwanafunzi w’Ebibliya aga madoso: “Gurhi okukolesa enyigirizo z’Ebibliya kwashanjire akalamo kawe? Kw’orhanyize oku abandi balagirire okuyumva kw’ogu mwanzi? Gurhi wakajira ly’obarhabala?” (Mig. 3:27; Mt. 9:37, 38) Oyereke omwanafunzi w’Ebibliya amatrakte gali omu Bikolanwa Birhu by’Omwigiriza onamuleke acishoge galya abwine gakasimisa abantu bw’omulala gwage, abîra bage, ababo b’emasomo, erhi ababo bakola boshi. Omuhe matrakte maguma maguma. Obe n’akasanzi kw’okucikomereza haguma naye ly’ahugûkwa gurhi akaha abandi etrakte buzira kubakwaza. Buzinda, amango amayemererwa okuba muhubiri orhacibatizibwa, rhukwanine rhuhubiri naye lyo rhumukomereza.​—Muh. 4:9, 10; Lk. 6:40.

8. Bulya gurhi kuli kwa bulagirire omwanafunzi abe n’obuzigire busezîre kuli Nnamahanga n’omulungu? (Olole ecisanduku cidesire “ Gurhi Rhwakarhabala Abanafunzi Birhu b’Ebibliya Bayushûle Obuzigire Bwabo Kuli Nnamahanga.”)

⁸ Ensiku zoshi okakengera oku Yezu arhurhegesire oku rhuyigirize abandi ‘okushimba byoshi’ arhurhegesire. Okujira ntyo kuhiziremwo amarhegeko abirhi makulu: Okuzigira Nnamahanga n’omulungu. (Mt. 22:37-39) Lushangi luhi luli ekarhi k’okujira omukolo gw’amahubiri n’okuzigira Nnamahanga n’omulungu? Akantu karhanzi karhushumya okujira omukolo  gw’amahubiri buba buzigire rhujirako Yehova n’omulungu. Hali abanafunzi bakaciyumva bayobohire okujira omukolo gw’amahubiri. Cikone rhwanabarhabala n’obwalagale bahugûkwe oku kugerera oku burhabale bwa Yehova banahikira aha bahima okuyoboha mwene muntu bunyi-bunyi. (Enna 18:1-3; Mig 29:25) Ecisanduku ciri mw’eci cigabi, carhurhabala rhuhugûkwe gurhi rhwakajira lyo rhurhabala omwanafunzi w’Ebibliya agendekere azigira Nnamahanga bwenene. Na kandi gurhi bene wirhu boshi b’omu cigamba nabo bakajira lyo barhabala abanafunzi bahyahya bayushûle obuzigire bwabo?

9. Omu lwiganyo lw’omwanafuzi oli wayiga oku batembeza omutuga, njira ehi yakamurhabala ayige bintu binji?

⁹ Ocib’irhanya oku lwiganyo lw’omwanafunzi oli wayiga gurhi batembeza omutuga. Nk’oyo mwanafunzi akaba ali atembeza omutuga na mwalimu wage amuli aha burhambi, kunganaci eyo njira yakamurhabala ayige bintu binji? Akwanine ayumvirhize amahano ga mwalimu wage n’okulola gurhi abandi bali batembeza. Kwa lwiganyo, mwalimu anayeresa omwanafunzi wage shoferi walesîre owundi shoferi amurhaluke. Kandi anamuyeresa shoferi wapunguzîze omwangaza gw’ebinyoteri by’omutuga gwage ly’abandi bashoferi baja babona enjira bwinja n’okumubwira oku naye akazijira ntyo. Ezo nyiganyo zoshi zanayigiriza omwanafunzi ebi ayish’ikajira amango aba shoferi.

10. Bici byakarhabala omwanafunzi w’Ebibliya ajire amajambere g’ekiroho?

¹⁰ Ko n’oko, omwanafunzi w’Ebibliya walonza okukolera Yehova, arhali lwiganyo lwa mwalimu wage lone akayiga, cikoki anayiga bintu binji kugerera enyiganyo nyinja z’abandi bakozi ba Yehova. Muli ntyo, bici byakarhabala abanafunzi b’Ebibliya bajire amajambere g’ekiroho? Kuli kukaja oku ntimanano zirhu z’Ecikristu. Bici birhumire rhwashuza ntyo? Bulya enyigirizo z’Ebibliya rhuhâbwa oku ntimanano zirhu zanabarhabâla babe n’obumanye, obuyemere busêzire n’okuyushûla obuzigire bwabo kuli Nnamahanga. (Ebj. 15:30-32) Na kandi amango g’entimanano, mwalimu anayerekana omwanfunzi wage kuli bene wirhu na bali birhu bakaba bali balembera amazibu gashushine n’agage. Omwanafunzi anabona enyiganyo nyinja za bene wirhu na bali birhu bali bayerekena obuzigire omu cigamba. Rhuganirire ezi nyiganyo zikulikire.

11. Nyiganyo zihi zakaba ziri omu cigamba omwanafunzi akabona, na gurhi zakamurhabala?

¹¹ Mukazi muguma oli wayiga Ebibliya olera abana bage yene anabona mwali wirhu muguma olera naye abana bage yene. Anahumwa oku murhima okubona obwihangane bwa mwali wirhu bw’okuja oku ntimanano aha Nyumpa y’Entimanano haguma n’abana bage baciri barho. Mulume muguma oli wayiga Ebibliya ali ajira okwage koshi ly’aleka okunywa irhabi anaganîra haguma na mwene wirhu wagwêrhe amazibu ga mwene ago cikone ahikira aha agahima. Oyu muhubiri anabwira ayu mwanafunzi oku erhi obuzigire bwage kuli Yehova burhangira bwayushuka, bwamushumya okurhumikira amarhegeko ga Nnamahanga. (2 Kr. 7:1; Fl. 4:13) Enyuma z’okuyumva ebi oyo mwene wirhu ajijire, oyo mulume anaciyumva bwinja erhi mwene wirhu akamubwira ntya: “Nawe wanahasha okuleka enkomêdu y’okunywa irhabi.” Munyere muguma oli mwanafunzi w’Ebibliya anabona mwali wirhu ociri munyere ashagalukire akalamo kw’okubona ali Muhamirizi wa Yehova. Oku oyo mwali wirhu ali alama kwamarhuma oyo mwananyere alonza okumanya bici birhuma oyo mwali wirhu ajira obushagaluke omu kalamo.

12. Bulya gurhi rhwanaderha oku ngasi muguma wirhu agwerhe omukolo gw’okurhabala abanafunzi b’Ebibliya?

¹² Erhi abanafunzi b’Ebibliya barhondera bamanyana na bene wirhu bishwekerezi, banahikire aha bahugûkwa okushimba irhegeko lya Yezu ly’okuzigira Nnamahanga n’omulungu  kw’okuderha gurhi. (Yn. 13:35; 1 Tm. 4:12) Na kandi, nk’oku rhwanayizire, omwanafunzi w’Ebibliya anaciyigiriza binji kugerera enyiganyo z’abandi bahubiri bali omu mazibu gali nk’ag’ali alwisa. Kugerera enyiganyo z’abandi bahubiri, omwanafunzi anabona oku naye anahasha okujira empindûlo zihunyirwe ly’ahikira okuba mwanafunzi wa Yezu. (Lush. 30:11) Ngasi muguma wirhu omu cigamba anarhabala abanafunzi b’Ebibliya omu njira ziri lubero-lubero lyo bajire amajambere g’ekiroho. (Mt. 5:16) Nawe, gurhigi okajira ly’aha abanafunzi b’Ebibliya bayishire oku ntimanano omurhima?

13-14. Gurhi Yezu ajirire entumwa zage erhi zivunika omurhima?

¹³ Rhunalonze okurhabâla bene wirhu na bali birhu balesire omukolo gw’amahubiri bashubirire omukolo gw’okujira abanafunzi Kristu arhegekaga. Oku Yezu ajiriraga entumwa zage zavunikâga omurhima kwanarhuyigiriza ebi rhukwaninine rhujire ene.

¹⁴ Oku buzinda bw’omukolo gwa Yezu hanw’igulu hisanzi hisungunu embere bamunige, abaganda bage “banacimuleka, bayâka boshi.” (Mk. 14:50; Yn. 16:32) Gurhi Yezu ajijire erhi abona abaganda bage bavunika omurhima mw’ako kasanzi? Kasanzi kasungunu enyuma z’okufûka kwage, Yezu abwira baguma bw’omu banafunzi bage erhi: “Murhayobohaga! Mugend’ibwira balumuna bani [oku nafûsire].” (Mt. 28:10a) Yezu arhalekaga entumwa zage. Ciru akaba entumwa zage zamuyakaga, oko kurharhumaga arhabahamagala “balumuna bani.” Aka Yehova, Yezu naye aba wakubabalira.​—2 Bam. 13:23.

15. Gurhi rhurhanya lugenda balya balesire omukolo gw’okuhubiri?

¹⁵ Nirhu kw’on’oko, rhunashibirire bwenene bene wirhu na bali birhu balesire okujira omukolo gw’amahubiri. Abo bali bene wirhu na bali birhu rhunaba rhubazigire bwenene! Rhunacikengere omukolo gw’obuzigire abo birhu banyakazi bw’obuyemere bajijire omu kasanzi kagerâga, nkaba baguma muli bo ciru bajijire myaka minji bali bakola ogo mukolo. (Hb. 6:10) Rhunabakengere bwenene! (Lk. 15:4-7) Omu kuyiga Yezu, omu njira nci rhwakabayereka oku rhubashibirire?

16. Gurhi rhwakayereka bene wirhu na bali birhu balesire emikolo y’ecigamba oku rhubashibirire?

¹⁶ Obalalike n’obushagaluke. Enjira Yezu ayerekinemwo oku ashibirire entumwa zage zali vunisire omurhima kwali kubalalika oku ntimanano. (Mt. 28:10b; 1 Kr. 15:6) Ko n’oko nirhu ene, rhwanacihangana rhuyegereze balya balesîre okujira omukolo gw’amahubiri bayishe oku ntimanano akaba barhasag’irhondera bajira ntyo. Nkaba byanahûna rhubalalike kanji-kanji embere bayishe oku ntimanano. Yezu ashagaluka bwenene erhi abaganda bage bayemera ogo mulali gwage.​—Oshushanye n’olwandiko lwa Mateyo 28:16 n’olwa Luka 15:6.

17. Gurhi rhwakajira nka mwene wirhu erhi mwali wirhu walesire emikolo y’ecigamba akayisha oku ntimanano?

¹⁷ Obayegereze n’omurhima goshi. Yezu ajira entumwa zage ziciyumve bwinja erhi bamubugana; alonza obulyo bw’okubaganiza. (Mt. 28:18) Gurhi rhwakajira erhi rhwakabona mwene wirhu erhi mwali wirhu walesire emikolo y’ecigamba ayisha aha Nyumpa y’Entimanano? Rhushinganine rhube baburhanzi okubayegereza n’obushagaluke. Oku murhondero nkaba rhwanaba n’amazibu gw’okumanya bici rhwababwira. Cikone buzira kumubulisa obushagaluke, rhwanamubwira kone oku rhushagalusire bwenene okumubona.

18. Gurhi rhwakaha omurhima abahubiri balesire omukolo gw’amahubiri?

¹⁸ Obahe omurhima. Nkaba abanafunzi ba Yezu bakaciyumvirhe nka barhahashe omukolo abahâga gw’okuyigiriza omw’igulu lyoshi. Yezu abaha omurhima omu kubabwira ntya: “Ndi haguma ninyu ensiku zoshi.” (Mt. 28:20) Kw’oko  kwarhabire abanafunzi bage? Neci. Enyuma za hisanzi hisungunu, babà na binji by’okujira omu “kuyigiriza n’okuyaliza omwanzi mwinja.” (Ebj. 5:42, NWT) Ko n’oko, balya balesire omukolo gw’ecigamba balagirire oku kuhâbwa omurhima. Byanahashikana babe bali bayoboha okushub’irhondera omukolo gw’amahubiri. Rhwanabaha omurhima bahugûkwe oku barhakaje omu mahubiri bone. Nka bakaderha oku bakola bacib’irhondera baja omu mahubiri, rhwanagenda haguma nabo. Buzira karhinda banashagalukira bwenene oburhabale rhuli rhwabaha amango bamashub’igalukira omukolo gw’okuyaliza omwanzi mwinja. Erhi rhwakakayereka abalesire omukolo gw’ecigamba oku nabo bali bene wirhu erhi bali birhu, banahikira aha bacibigalukira omukolo na ntyo ecigamba coshi canaba n’omwishingo.

19. Irala lirhu liba lihi, na bulya gurhi?

¹⁹ Kuhika mangaci rhwagendekera rhwajira omukolo gw’okujira abanafunzi? Kuhika amango obuzinda bw’er’igulu bwahika. (Mt. 28:20, NWT; olole aha bayandisire omu Bibliya Maana ya Maneno ya Biblia, “Umalizio wa mupangilio wa mambo.”) Ka rhwanahash’igendekera rhwayigiriza n’okujira abanafunzi kuhika ago mango gahike? Neci, rhuhizire okugendekera kwajira ntyo! Rhunahâne akasanzi kirhu, emisi yirhu n’obuhirhi bwirhu lyo rhulonza abantu bagwerhe “irala ly’okuba n’obuzîne bw’ensiku n’amango.” (Ebj. 13:48, NWT) Nka rhwakajira ntyo, rhwanaba rhuli rhwashimba olwiganyo lwa Yezu. Aderha ntya: “Ebiryo byani kuli kujira obulonza bw’owantumaga n’okuyukiriza omukolo gwage.” (Yn. 4:34; 17:4) Nirhu eryo lyo liba irala lirhu. Rhulonzize rhuyukirize omukolo rhwahâbagwa. (Yn. 20:21) Rhunalonzize abandi, kuhiramwo bene wirhu balesire omukolo, rhweshi haguma rhugendekere rhwalembera n’okujira ogo mukolo.​—Mt. 24:13.

20. Nk’oku biyerekinwe omu lwandiko lwa Abafilipi 4:13, bulya gurhi rhwakayemera n’obwalagale oku rhwanahash’ihikiriza omukolo Yezu arhuhâga?

²⁰ Kurhaba kulembu okujira omukolo Yezu arhurhegekaga oku rhujire. Cikone, rhukengere oku rhurhaba mw’ogo mukolo rhwene. Yezu alaganyize oku aba haguma na nirhu. Nka rhuli omu mukolo gw’okujira abanafunzi rhunabe rhuli “rhwagwasa Nyamuzinda” n’okukola nka “bambali ba Kristu.” (1 Kr. 3:9; 2 Kr. 2:17, Mashi Bible) Co cirhumire, rhwanahasha okuhikiriza ogo mukolo. Luli lukengwa lunene na mwishingo munji okujira kw’ogo mukolo n’okurhabala abandi bagujire!​—Osome Abafilipi 4:13.