1. Maatewoosi 28:18-20 kultanno garinni, Yesuusi rosaanosi maa assitara hajajino?

YESUUSI reyotenni kaihu gedensaanni, rosaanosi Galiilaho gamba yite noowa marino. Insara mitto lowo geeshsha hasiisanno coye kulinonsa. Kulinonsari maati? Yesuusi kulinonsari Maatewoosi 28:18-20 no.—Qummeeshsha nabbawi.

2. Konni birxichira hiikkuri xaˈmuwa xiinxallineemmo?

² Yesuusi rosaanosi manna rosaano assitanno gede hajajino hajajo, xaa yannara ninke baalunkuno wonsha hasiissannonkete. Konnira, Yesuusi uyinonke loosi ledo xaadooshshe afidhinota sase xaˈmuwa xiinxallineemmo. Umihunni, Maganu haaro rosaano maa assitara hasiˈrannoro rosiinseemmotano agurranna wolere maa assa hasiissannonke? Layinkihunni, songote giddo noo halashshaano baalanti Qullaawu Maxaafi rosaano ayyaanaamittetenni lophitanno gede kaaˈla dandiitannohu hiittoonniiti? Sayikkihunni, ayyaanaamittetenni qiiddinori ammanate roduuwinke manna rosaano assate looso wirro loossanno gede kaaˈla dandiineemmohu hiittoonniiti?

3. Yesuusi manna rosaano assineemmo gede hajaji woyite, wolere maa assinammora hajajinonke?

³ Yesuusi hajajo digoˈlitinote. Hajajosi mannaho rosiisa hasiissannonke. Kayinni manna rosaano assineemmo woyite dea hasiissannonkekkiri no. Yesuusi, ‘hajajoommoˈnere baala rosiissensa’ diyiino. Hatteentenni isi, “hajajoommoˈnere baala assitanno [“agadhitanno,” NW] gede rosiissensa” yiino. Tenne hajajo agadhate  Qullaawu Maxaafi rosaancho rosiisa calla ikkikkinni hajajosi ma garinni agadhannoro kaaˈlano hasiissannonke. (Soq. 8:31) Hatto assa hasiissannonkehu mayiraati?

4. Hajajo agadhate yaa mayyaate? Lawishsha kuli.

⁴ Hajajo ‘agadhate’ yaa hajajamate yaate. Mittu manchi Kiristoosi hajajo agadhanno woy hajajamano gede rosiisate kaaˈlannonkeha aane noo lawishsha laˈno. Mittu makiina kada rosiisanno manchi rosaanosi tiraafikete higge agadhitanno gede rosiisannohu hiittoonniiti? Balaxe rosiisaanchu rosaanosira tiraafikete higge kifilete giddo rosiisannonsaha ikkara dandaanno. Ikkollana, rosaanosi tenne higge agadhitanno gara rosiisate wolereno assa hasiissannosi. Rosaanchu makiina kadannonna rosinore harunsate woˈnaalanno woyite rosiisaanchisi ledosi ofolle biddishsha aannosi. Konni lawishshinni maa rosa dandiineemmo?

5. (a) Yohaannisi 14:15 nna 1 Yohaannisi 2:3 kultanno garinni, Qullaawu Maxaafi rosaanonke maa assitano gede rosiisa hasiissannonke? (b) Rosaanonke kaaˈla dandiineemmo gara leellishanno lawishsha kuli.

⁵ Mannaho Qullaawa Maxaafa xiinxallinseemmo woyite, Maganu maa assinammora hasiˈrannoro rosiinseemmonsa. Kayinni kawiinni sainore assa hasiissannonke. Qullaawu Maxaafi rosaanonke rossinore barru baala loosu aana hosiissanno gede rosiisa hasiissannonke. (Yohaannisi 14:15; 1 Yohaannisi 2:3 nabbawi.) Qullaawu Maxaafi rosaanonkera dancha lawishsha ikkine, rosu mine, loosu basewa woy boohaartanno woyite xinta ikkinoha Qullaawu Maxaafi halaale loosu aana hosiissanno gara leellisha dandiineemmo. Qullaawu Maxaafi biddishsha harunsanke ninke umonke gawajjotenni gatissinonke gara woy dancha doorsha doodhineemmo gede kaaˈlitinonke gara kullammonsara dandiineemmo. Qullaawu Maxaafi rosaanonke qullaawu ayyaani massagannonsa gede, insa albaanni Yihowa huucca dandiineemmo.—Yoh. 16:13.

6. Mannu Yesuusi hajajo agadhanno gede rosiisate wolere maa assa hasiissannonke?

⁶ Mannu Yesuusi hajajo agadhanno gede rosiisate wolere maa assa hasiissannonke? Qullaawu Maxaafi rosaanonkera manna rosaano assate hasattonsa lexxitanno gede kaaˈla hasiissannonke. Mite rosaano sabbaka waajjitara dandiitanno. Konnira, rosaanonke ammanansa kaajjishiˈrate Qullaawu Maxaafi halaale seekkite wodanchitanno gede kaaˈlineemmo woyite, cincineemmore ikka hasiissannonke; hatto assinummoro rossinori wodanaho coanno daafira sabbakate kakkaˈanno. Rosaanonke dancha duduwo wolu mannira kulate hasattonsa lexxitanno gede kaaˈlate, maa assa dandiineemmo?

7. Rosaanchinkera dancha duduwo wolootaho kulate hasattosi lexxitanno gede kaaˈla dandiineemmohu hiittoonniiti?

⁷ Qullaawu Maxaafi rosaanchonke aante noo xaˈmuwa xaˈma dandiineemmo: “Maganu Mangiste sokka macciishshakki heeshshokki woyyaabbanno gede assitinohu hiittoonniiti? Wolootuno tenne sokka macciishsha hasiissannonsa yite hedatto? Insa kaaˈlate maa assa dandaatto?” (Law. 3:27; Mat. 9:37, 38) Rosaanchoho Rosiisate Horoonsiˈneemmo Borro giddo noo tiraaktuwa leellishisi; hattono fiixisi, jaallasi woy ledosi loossannori nabbawa baxxanno tiraakte dooranno gede assi. Hakkiinni rosaanchoho mite tiraaktuwa uyisi. Tiraakte hayyotenni elanno gara rosiisisi. Rosaanchinke cuuaminokki halashshaancho ikke soqqamanno gede fajjinisihu gedensaanni, soqqansho ledosi fulle sabbakanno gara rosiisa hasiissannonketi egennantinote.—Ros. 4:9, 10; Luq. 6:40.

8. Rosaanonke Maganonna manna albinni roore baxa hasiissannonsahu mayiraati? (“ Qullaawu Maxaafi Rosaanonke Albinni Roore Magano Baxxanno Gede Kaaˈla Dandiineemmohu Hiittoonniiti?” yitanno saaxineno lai.)

⁸ Yesuusi, mannu ‘hajajosi baalanta agadhano gede rosiisse’ yee hajajinonketa deˈnoonke.  Yesuusi hajajino hajajo Maganonna manna baxi yitannota baalanta roortannota lame hajajono amaddannote; tini lamenti hajajo sabbakatenna manna rosaano assate loosi ledo xaado afidhinote. (Mat. 22:37-39) Mayi xaadooshshe afidhino? Sabbankeemmo gede assannonkehu qaru coyi Maganohonna mannaho noonke baxilleeti. Mite Qullaawu Maxaafi rosaano sabbakate daafira heddanno woyite waajjitara dandiitanno. Ikkirono, Yihowa kaaˈlonni sunu sununni manna waajjitukkinni sabbaka dandiitannota kulle jawaachinshammonsara dandiineemmo. (Far. 18:1-3; Law. 29:25) Konni birxichira noo saaxinera rosaanchinkera Maganoho noosi baxilli lexxanno gede kaaˈlate, maa assa hasiissannonkero kulloonni. Qoleno, songo Qullaawu Maxaafi rosaano albinni roore baxille leellishshanno gede kaaˈlate maa assa dandiitanno?

9. Makiina kada rosiisiˈranno rosaanchi, kaaˈlannosi roso rosannohu hiitte doogganniiti?

⁹ Hanni xaano makiina kada rosiisiˈranno rosaanchi lawishsha hedde. Rosaanchu qajeelsannosihu mule ofolle heeˈreenna makiina kadanno woyite, isi rosannohu hiitte doogganniiti? Isi rosannohu rosiisaanchu yaannosire macciishshenna makiina qorophite kaddannore woloota laeeti. Lawishshaho, rosiisaanchu rosaanchisira mittu makiina kadanni noo manchi wolootu iso saˈe hadhanno gede shaqqillunni doogo aanna leellishannosiha ikkara dandaanno. Woy mittu makiina kadanni noo manchi wole makiina kadanni nooha makiinisi caabbichi ille amadannosikki gede caabbicho ajishanna leellishasira dandaanno. Rosaanchu makiina kadanno woyite konni lawishshinni kaaˈlannosiha kaajja roso rosanno.

10. Qullaawu Maxaafi rosaanchi ayyaanaamittetenni lophanno gede kaaˈlannosiri maati?

¹⁰ Hatteente gede mittu heeshshote doogo aana haˈra hanafinohu Qullaawu Maxaafi rosaanchi, rosiisaanchisiwiinni calla ikkikkinni dancha lawishsha ikkitannote Yihowa soqqamaasinewiinnino rosanno. Qullaawu Maxaafi rosaano ayyaanaamittete lophitanno gede lowo geeshsha kaaˈlannonsari maati? Kiristaanu gambooshshenke haˈransaati. Hatto yineemmohu mayiraati? Gambooshshunniwa rossannori egennonsa lexxitanno, ammanansa kaajjitannonna Yihowara noonsa baxilli lexxanno gede assannonsa. (Soq. 15:30-32) Qoleno, Qullaawu Maxaafi rosiisaanchi rosaanchosi songote giddo alba isite gedee heeshsho heedhino roduuwi ledo egensiisara dandaanno. Qullaawu Maxaafi rosaano dancha lawishsha ikkitanno roduuwi songote giddo baxille leellishshanna laˈannoha ikkara dandaanno. Hanni aante noo lawishshuwa laˈno.

11. Qullaawu Maxaafi rosaano songote giddo maa laˈara dandiitanno? Tini kaaˈlitansara dandiitannohu hiittoonniiti?

¹¹ Mitte qaaqquulle callase lossidhannoti Qullaawu Maxaafi rosaancho, songote giddo isente gede qaaqquulle callase lossidhanno rodoo laˈino. Qullaawu Maxaafi rosaancho, tini rodoo shiimmaadda qaaqquullese adhite Gambooshshu Addaraashe daate sharrantino gara laˈe jawaattino. Mittu sijaara aga agurate sharrammanni noohu Qullaawu Maxaafi rosaanchi, sijaara aga agurino rodii ledo egennamino. Kuni rodii Yihowara noosi baxilli lexxanno gede assiˈrasi, Maganu hajajo agadhanno gede kakkayissinosita kulinosi. (2 Qor. 7:1; 4:7) Roduu rosaanchoho sijaara aga agurino gara kulisihu gedensaanni, “Atino agura dandaatto” yiinosi; hakkiinni rosaanchu jawaatino; hattono agura dandaannota ammanino. Mitte wedellitte Qullaawu Maxaafi rosaancho, Yihowara soqqamase heeshshose hagiirraame assitinoseta mitte wedellitte rodoo laˈino. Qullaawu Maxaafi rosaancho rodoo hagiirraame ikkitino gara laˈe, ise hagiirraame ikkitanno gede assinoseri maatiro ledde afa hasidhino.

12. Songote giddo noohu mittu mittunku halashshaanchi Qullaawu Maxaafi rosaano kaaˈla dandaanno yineemmohu mayiraati?

¹² Qullaawu Maxaafi rosaano addi addite  ammantino halashshaano ledo egennantanno woyite, insa lawishshinni Kiristoosi, ‘Maganonna manna baxxe’ yee hajajino hajajo agadhitanno gara rossanno. (Yoh. 13:35; 1 Xim. 4:12) Aleenni laˈnummonte gede Qullaawu Maxaafi rosaanchi alba isite gedee heeshsho heeˈrino halashshaanchiwiinnino rosa dandaanno. Rosaanchu, kuri lawishshuwanni biddi assiˈra hasiissannosire biddi assiˈre Kiristoosi rosaancho ikka dandaannota huwatanno. (Mar. 30:11) Songote giddo noohu mittu mittunku halashshaanchi Qullaawu Maxaafi rosaano ayyaanaamittetenni lophitanno gede addi addi doogganni kaaˈla dandaanno. (Mat. 5:16) Ati gambooshshe daggannore Qullaawu Maxaafi rosaano jawaachishate maa assa dandaatto?

13-14. Yesuusi hexxo mudhitino soqqamaanosi kaaˈlinohu hiittoonniiti?

¹³ Ayyaanaamittetenni qiiddino roduuwanke sabbakatenna manna rosaano assate looso wirro loossanno gede kaaˈla hasiˈneemmo. Yesuusi hexxo mudhitino soqqamaasinesi jawaachishino gari ninkeno xaa yannara maa assa dandiineemmoro leellishanno.

¹⁴ Yesuusa shinara kaˈne heeˈneenna, ‘soqqamaasinesi baala iso agurte xooqqino.’ (Maq. 14:50; Yoh. 16:32) Yesuusi soqqamaanosi hexxo mudhitu yannara maa assino? Reyotenni kaihunni shiima yanna gedensaanni isi mite harunsaanosi, “Waajjitinoonte! Hadhine . . . [reyotenni kaoommota] roduuwiˈyara kulle” yiino. (Mat. 28:10) Yesuusi soqqamaanosi facci asse diagurino. Insa agurte xooqqinosiha ikkiro nafa ‘roduuwaˈya’ yiinonsa. Yihowa gede Yesuusino maarannohonna gatona yaannoho.—2 Mot. 13:23.

15. Soqqama agurtinori daafira mayi macciishshamannonke?

¹⁵ Ninkeno soqqansho fula agurtino roduuwinkeri lowo geeshsha yaachishannonke. Insa roduuwankeeti; lowo geeshsha banxeemmonsa! Kuri roduuwi alba leellishshino baxille dihambeemmo; insa giddo mitu lowo diro soqqantinore ikkitara dandiitanno. (Ibi. 6:10) Insa qalli assitannonke! (Luq. 15:4-7) Yesuusi lawishsha harunsine insara hendeemmota leellisha dandiineemmohu hiitte doogganniiti?

16. Ayyaanaamittetenni qiiddino roduuwinkera hendeemmota leellisha dandiineemmohu hiittoonniiti?

¹⁶ Gambooshshe dagganno gede faasiiqqine koyissensa. Yesuusi hexxo mudhitino soqqamaasinesi jawaachishino doogga giddo mitte, gambooshshe dagganno gede koyiseeti. (Mat. 28:10b; 1 Qor. 15:6) Hatteente gede ninkeno xaa yannara ayyaanaamittetenni qiiddinori gambooshshe dagganno gede koyisa dandiineemmo. Insa gambooshshe dagga geeshsha duucha hinge koyisa hasiissannonkeha ikkara dandaanno. Yesuusi, rosaanosi koyisinonsa gambooshshe dagguta hagiidhinoti dihuluullissannote.—Maatewoosi 28:16 nna Luqaasi 15:6te ledo heewisiisi.

17. Ayyaanaamittetenni qiiddinori gambooshshe dagganno woyite maa assa hasiissannonke?

¹⁷ Anga fantine hadhensa. Yesuusi rosaanosi ledo xaadi woyite, anga fane haaˈrinonsa; Yesuusi insa isiwa daggara agarikki insawa mare hasaawisinonsa. (Mat. 28:18) Ayyaanaamittetenni qiiddinori Gambooshshu Addaraashe dagguro maa assineemmo? Insa dagganno woyite anga fanne haaˈra hasiissannonke. Umi qarra ‘mayine hasaawinseemmo ikka?’ yine komo yinammora dandiineemmo. Ikkirono, insa komo yitanno gede assinummokkinni, daggino daafira lowo geeshsha hagiidhinoommota kula dandiineemmo.

18. Ayyaanaamittetenni qiiddinore jawaachisha dandiineemmohu hiittoonniiti?

¹⁸ Jawaachishshensa. Yesuusi rosaano alame baalate sabbakara uyinoonninsa loosi wolqansara aleenni ikkinohu gede assite heddinoha ikkara dandaanno. Yesuusi harunsaanosi  woˈmanka woyite “ani kiˈne ledo noommo” yee jawaachishinonsa. (Mat. 28:20) Tini rosaanosi kaaˈlitinonsa? Ee. Insa muleenni diinaggaabbe “rosiisanna dancha duduwo kula” hanaffino. (Soq. 5:42) Ayyaanaamittetenni qiiddino roduuwirano jawaante hasiissannonsa. Insa wirro sabbaka waajjitara dandiitanno. Insa soqqansho fultanno woyite calloota ikkitinokkita kulle jawaachinshammonsara dandiineemmo. Soqqansho fulate qixxaabbanno woyite ledonsa fula dandiineemmo. Insa wirro sabbaka hanaffanno woyite kaaˈlinoommonsa daafira hagiidhitannoti dihuluullissannote. Ayyaanaamittetenni qiiddinore roduuwinke gede assine laˈneemmonsaha ikkiro, insa wirro jawaattanno; tini songo hagiidhitanno gede assitanno.

19. Maa assa hasiˈneemmo? Mayira?

¹⁹ Manna rosaano assate looso loosa hasiissannonkehu mamari geeshshaati? Tini alame baˈa geeshshaati. [Mat. 28:20; Amaaru afii Qullaawu Maxaafi (NW) qaalla tiro hunda nooha “Alamete goofimarcho” yaannoha lai.] Ikkina, konne Yesuusi uyinonke looso hattee yanna geeshsha loosa dandiineemmo? Ee, hatto assate murciˈnoommo! Yannanke, wolqankenna woxenke mararrummokkinni horoonsiˈne “gara ikkitinoti wodanu dooˈˈo noonsa” manna hanseemmo. (Soq. 13:48, NW) Hatto assineemmoha ikkiro Yesuusi lawishsha harunsinanni heeˈnoommo. Yesuusi, “Ane sagale soyinoehu haja wonshatenna loososi guutate” yiino. (Yoh. 4:34; 17:4) Ninkeno hatto assa hasiˈneemmo. Yesuusi uyinonke looso umo fushsha hasiˈneemmo. (Yoh. 20:21) Ayyaanaamittetenni qiiddinorinna wolootuno konne looso ninke ledo goofimarchu geeshsha loossara hasiˈneemmo.—Mat. 24:13.

20. Layinki Qorontoosi 4:7 kultanno garinni, Yesuusi uyinonke looso umo fushsha dandiineemmo yineemmohu mayiraati?

²⁰ Yesuusi uyinonke looso umo fushsha shota ikkitinokkiti egennantinote. Ikkirono, konne looso loonseemmohu callootinke diˈˈikkino. Yesuusi kiˈne ledo noommo yee qaale eino. Manna rosaano assineemmo woyite ‘Maganu ledo loonsanni’ heeˈnoommo. (1 Qor. 3:9) Hakko daafira, konne looso umo fushsha dandiineemmo. Konne looso loosanna wolootuno hatto assitanno gede kaaˈla ninkera lowo ayirrinyeeti; qoleno lowo hagiirre afiˈneemmo!—2 Qorontoosi 4:7 nabbawi.