1. E tusa ai ma le Mataio 28:18-20, o le ā le poloaʻiga na avatu e Iesu i ona soo?

INA UA faatūina Iesu mai i le oti, na faaali atu o ia i ona aposetolo na faapotopoto i Kalilaia. Na iai se mea tāua na fia taʻu atu e Iesu iā i latou. O le ā lenā mea? O loo maua fetalaiga a Iesu i le Mataio 28:18-20.​—Faitau.

2. O ā fesili o le a tatou talanoaina?

² E faatatau mai foʻi i auauna taʻitoʻatasi a le Atua i aso nei, le poloaʻiga a Iesu ia fai isi ma soo. O lea, seʻi o tatou talanoa i fesili e tolu e fesootaʻi i lo tatou tofiga na tuuina mai e Iesu. Muamua, o ā isi mea e manaʻomia ona tatou faia e ese mai i le aʻoaʻoina o soo fou i mea e faafinagaloina e le Atua? Lua, e faapefea ona fesoasoani tagata talaʻi uma o le faapotopotoga i le tuputupu aʻe faaleagaga o tagata aʻoga o le Tusi Paia? Tolu, e faapefea ona tatou fesoasoani i uso ma tuafāfine e lē o toe talaʻi, ina ia toe auai i le galuega o le faia o isi ma soo?

3. O ā faatonuga patino na faaaofia e Iesu i lana poloaʻiga?

³ E manino poloaʻiga a Iesu. E tatau ona tatou aʻoaʻo tagata i mea na ia poloaʻi mai ai. Peitaʻi, e lē tatau ona tatou faagaloina le mea tāua lenei. E leʻi fetalai Iesu: ʻIa aʻoaʻo i latou i mea uma ua ou poloaʻi atu ai.’ Ae na ia fetalai: Ia aʻoaʻo i latou e “tausi i mea uma ua ou poloaʻi atu ai.” Ina ia faatatau lenā faatonuga patino pe a aʻoaʻoina se tagata aʻoga, e manaʻomia ona aʻoaʻoina o ia i mea e tatau ona fai ma ia faasino foʻi i ai le auala e fai ai. (Galu. 8:31) Aiseā e tāua ai lo tatou faia faapea?

4. O le ā le uiga o le tausia o se poloaʻiga? Ia faataʻitaʻi.

 ⁴ O le “tausia” o se poloaʻiga, e uiga atu i le usitaʻi i ai. Ina ia faataʻitaʻi le auala e fesoasoani ai i se tasi ia tausi pe usitaʻi i mea na poloaʻi mai ai Keriso, seʻi mafaufau i le faaaʻoaʻoga lenei. E faapefea ona aʻoaʻo e se faiaʻoga avetaavale se tagata aʻoga e tausi i tulafono o le auala? E aʻoaʻo muamua e le faiaʻoga le tagata aʻoga i totonu o le potuaʻoga, ia malamalama i tulafono o le auala. Ae e iai se isi mea e manaʻomia ona faia e le faiaʻoga ina ia aʻoaʻo ai lana tagata aʻoga e usitaʻia tulafono o le auala. E tatau ona la ō ma faatonutonu le tagata aʻoga a o ia aveina le taavale, ma taumafai e faatatau mea na ia aʻoaʻoina i le potuaʻoga. O le ā e tatou te aʻoaʻoina mai i lenei faataʻitaʻiga?

5. (a) E tusa ai ma le Ioane 14:15 ma le 1 Ioane 2:3, o le ā e tatau ona aʻoaʻo ai a tatou tagata aʻoga e fai? (e) O ā auala e tatou te fesoasoani ai i a tatou tagata aʻoga e faatatau mataupu silisili o le Tusi Paia i lona olaga?

⁵ Pe a tatou suʻesuʻeina le Tusi Paia ma isi, e tatou te aʻoaʻoina i latou i mea e finagalo le Atua e tatou te faia. Ae e iai le isi mea e tatau ona tatou faia. E tatau ona tatou aʻoaʻoina le tagata aʻoga e faatatau i lona olaga mea ua ia aʻoaʻoina. (Faitau le Ioane 14:15; 1 Ioane 2:3.) O a tatou faaaʻoaʻoga, e faailoa atu ai i le tagata aʻoga auala e na te faatatau ai mataupu silisili faavae o le Tusi Paia i aʻoga, galuega, ma faigāmālōlōga. E mafai ona tatou faamatala atu i ai se mea na tupu i o tatou olaga, e iloa ai e le tagata aʻoga, o le faatatauina o taʻiala a le Tusi Paia e puipuia ai i tatou mai i le faaleagaina, ma le auala na fesoasoani ai na taʻiala e tatou te faia ai se filifiliga atamai. Ia tatalo faatasi ma le tagata aʻoga, ina ia taʻitaʻia i latou e le agaga o Ieova.​—Ioa. 16:13.

6. O le ā e aofia ai i le aʻoaʻoina o isi e tausia poloaʻiga a Iesu?

⁶ O le ā e aofia ai i le aʻoaʻoina o isi e tausia poloaʻiga a Iesu? E manaʻomia ona tatou fesoasoani i a tatou tagata aʻoga e atiaʻe le faanaunauga e faia isi ma soo. E ono fefefe isi tagata aʻoga e auai i le galuega talaʻi. O lea, e tatau ona tatou onosaʻi a o fesoasoani pea iā i latou ina ia faalolotoina lo latou malamalama, pāʻia o latou loto, ma uunaʻia i latou e gaoioi. E faapefea ona fesoasoani i a tatou tagata aʻoga e atiaʻe le faanaunauga ina ia faasoa atu le tala lelei i isi?

7. E faapefea ona tatou fesoasoani i le tagata aʻoga e atiaʻe se faanaunauga e faasoa atu le tala lelei i isi?

⁷ Atonu e tatou te fesili i la tatou tagata aʻoga i fesili nei: “O ā suiga lelei ua e faia i lou olaga ona o lou taliaina o le feʻau o le Malo? O le ā sou manatu, pe e manaʻomia ona faalogo isi i lenei feʻau? O le ā e mafai ona e faia e fesoasoani ai iā i latou?” (Faata. 3:27; Mata. 9:37, 38) Ia faaali i le tagata aʻoga sāvali o loo i Meafaigaluega mo le Aʻoaʻo Atu, ma fai i ai e filifili po o fea o nei sāvali e manatu e fiafia i ai sona tauaiga, ana uō, po o ē e latou te faigaluega faatasi. Ia avatu i le tagata aʻoga sāvali eseese. Ia faataʻitaʻi ma lau tagata aʻoga, pe faapefea ona ofo sāvali i se auala faautauta. Pe a avea la tatou tagata aʻoga ma se tagata talaʻi e leʻi papatiso, e tatou te talaʻi faatasi ina ia fesoasoani iā te ia.​—Fai. 4:9, 10; Luka 6:40.

8. Aiseā e tāua tele ai mo a tatou tagata aʻoga ona atiaʻe se alofa e matuā malosi mo Ieova ma tuaoi? (Tagaʻi i le pusa “ Auala e Faalolotoina ai e Tagata Aʻoga lo Latou Alofa mo le Atua.”)

⁸ Ia manatua, na faatonuina i tatou e Iesu e aʻoaʻo isi ia “tausia mea uma” na ia poloaʻi mai ai. O loo aofia i na mea uma poloaʻiga silisili e lua, o le alofa i le Atua ma le alofa i tuaoi. O na poloaʻiga silisili e fesootaʻi atu i le galuega talaʻi ma le faia o isi ma soo. (Mata. 22:37-39) O le ā le fesootaʻiga? O le alofa i le Atua ma  tuaoi o le uunaʻiga autū lea e tatou te talaʻi ai. O nisi tagata aʻoga e latou te ono lagona le fefe pe a mafaufau e auai i le galuega talaʻi, ma o se faalogona masani lenā. Ae e mafai ona tatou faamautinoa atu iā i latou na, o le fesoasoani a Ieova o le a faasolosolo mālie ai ona mou atu lo latou fefe i tagata. (Sala. 18:1-3; Faata. 29:25) O loo faamatala mai e le pusa o lenei suʻesuʻega, laasaga e tatou te uia e fesoasoani ai i tagata aʻoga e faalolotoina lo latou alofa mo le Atua. Ae e faapefea ona fesoasoani le faapotopotoga i soo fou ina ia latou faaalia pea le alofa?

9. I le faaaʻoaʻoga i le tagata o loo aʻo lana avetaavale, o ā auala e na te aʻoaʻoina ai ni lesona tāua?

⁹ Seʻi toe mafaufau i le faataʻitaʻiga i le tagata o loo aʻo lana avetaavale. O loo nofo i ona autafa le faiaʻoga a o ia aveina le taavale. O ā ni auala e aʻoaʻoina ai e le tagata o loo aʻo lana avetaavale ni mea? E ala i le faalogo lelei i lana faiaʻoga, ma mātau isi o loo ave ma le faaeteete a latou taavale. O se faataʻitaʻiga, atonu e faasino e le faiaʻoga i le tagata aʻoga se avetaavale agalelei, o loo tuu le avanoa i le isi taavale e oso ane ai i ona luma e ui i le pisi o le auala. Pe atonu e na te faasino atu foʻi i ai se avetaavale o loo ki i lalo molī o lana taavale, ina ia iloa lelei ai e isi avetaavale le auala. O na faaaʻoaʻoga, e aʻoaʻoina ai e le tagata aʻoga ni lesona tāua e na te faatatauina pe a aveina le taavale.

10. O le ā e fesoasoani i se tagata aʻoga o le Tusi Paia ina ia agaʻigaʻi ai i luma faaleagaga?

¹⁰ E faapena foʻi se tagata aʻoga o le Tusi Paia ua amata ona ia uia le ala i le ola, e lē gata e na te aʻoaʻoina mea mai i lana faiaʻoga, ae e na te aʻoaʻoina foʻi mea mai i faaaʻoaʻoga lelei a isi auauna faamaoni a Ieova. O lea la, o le ā e sili ona fesoasoani i le tagata aʻoga e agaʻigaʻi ai i luma faaleagaga? O le auai i a tatou sauniga faa-Kerisiano. Aiseā? O taʻiala faale-Tusi Paia e aʻoaʻoina i sauniga, e mafai ona faalolotoina ai lo latou iloa, faamalosia lo latou faatuatua ma fesoasoani e faateleina ai lo latou alofa i le Atua. (Galu. 15:30-32) I sauniga, e faafeiloaʻi foʻi e le faiaʻoga le tagata aʻoga i uso ma tuafāfine o ē atonu e tele ni mea e tutusa ai o latou tulaga. O ā faaaʻoaʻoga o le faaalia o le alofa faa-Kerisiano e ono molimauina e le tagata aʻoga i le faapotopotoga? Ia mātau faataʻitaʻiga nei.

11. O ā ni faataʻitaʻiga e ono mātauina e le tagata aʻoga i le faapotopotoga, ma o ā ni aafiaga lelei iā te ia?

¹¹ Seʻi faapea o le tagata aʻoga o se matua nofo toʻatasi, ma ua ia mātauina se tuafafine Kerisiano e tutusa lelei o la tulaga. E pāʻia le loto o le tagata aʻoga i le vaai atu i le tele o taumafaiga o loo fai e le tuafafine ina ia auai ma lana fanau lāiti i le sauniga. O se tagata aʻoga o loo taumafai e tuu le ulaula, ae ua faamasani atu i se tagata talaʻi na faapena foʻi le mea na tupu iā te ia, ae ua mafai ona tuu lana ulaula. Ua faamatala atu foʻi e le tagata talaʻi i le tagata aʻoga, o le tuputupu aʻe o lona alofa mo Ieova na uunaʻia ai o ia e usitaʻia ana poloaʻiga. (2 Kori. 7:1; Fili. 4:13) Ina ua faalogo le tagata aʻoga i mea na tutupu i le tagata talaʻi, na ia lagona ai le matuā mautinoa ina ua faapea atu le uso, “E mafai foʻi ona tuu lau ulaula.” O le isi faataʻitaʻiga, o se teine talavou o loo suʻesuʻe le Tusi Paia, ae ua ia mātauina le fiafia o le olaga o se tuafafine talavou Molimau. O le mātauina e le tagata aʻoga o uiga fiafia o le tuafafine talavou, ua manaʻo ai foʻi e fia iloa atili le māfuaaga e foliga fiafia ai le tuafafine.

12. Aiseā e faapea atu ai, e iai i tagata taʻitoʻatasi o le faapotopotoga le matafaioi o le fesoasoani i tagata aʻoga o le Tusi Paia?

¹² Pe a masani lelei tagata aʻoga o le Tusi Paia i tagata talaʻi faamaoni, o le a latou aʻoaʻoina mai ai i faaaʻoaʻoga a na tagata talaʻi le  uiga o le tausia o poloaʻiga a Keriso, ia alofa i le Atua ma tuaoi. (Ioa. 13:35; 1 Timo. 4:12) E pei ona taʻua muamua, e mafai e le tagata aʻoga ona aʻoaʻo mai i tagata talaʻi na feagai ma luʻi e pei o luʻi o loo ia fesagaʻia. E aʻoaʻoina e le tagata aʻoga mai i na faaaʻoaʻoga, e mafai telē ona ia faia suiga e manaʻomia ina ia avea ai ma soo o Keriso. (Teu. 30:11) E mafai e tagata taʻitoʻatasi o le faapotopotoga ona fesoasoani i auala eseese ina ia tuputupu aʻe ai faaleagaga le tagata aʻoga. (Mata. 5:16) O ā taumafaiga o loo e faia e faalaeiau ai tagata aʻoga o loo auai i sauniga?

13-14. Na faapefea ona feutagaʻi Iesu ma ona aposetolo lotovaivai?

¹³ E tatou te fia fesoasoani i o tatou uso ma tuafāfine ua lē o toe talaʻi, ina ia toe auai i le faataunuuina o le poloaʻiga a Keriso e faia isi ma soo. O le auala na feutagaʻi ai Iesu ma ona aposetolo lotovaivai, ua faaalia ai mea e mafai ona tatou faia i aso nei.

¹⁴ I le faaiʻuga o le faiva a Iesu i le lalolagi ina ua latalata lava ona maliu, na “tuua ai o ia e le ʻauaposetolo uma ae sosola.” (Mare. 14:50; Ioa. 16:32) O le ā le auala na feutagaʻi ai Iesu ma ona aposetolo, ina ua latou lotovaivai mo sina taimi? Ina ua faatoʻā faatūina Iesu, na taʻu atu ai e Iesu i nisi o ona soo: “Aua lua te fefefe! Ia oulua ō ma taʻu atu i oʻu uso [ua ou toetū].” (Mata. 28:10a) E leʻi fiu Iesu i ona aposetolo. E ui ina latou tuua o ia, ae na ia taʻua lava i latou o “oʻu uso.” Na alofa mutimutivale ma lotofaamagalo Iesu e pei o Ieova.​—2 Tu. 13:23.

15. O ā o tatou lagona iā i latou ua lē o toe talaʻi?

¹⁵ E tatou te faaalia foʻi le manatu mamafa iā i latou ua lē o toe talaʻi. O i latou o tatou uso ma tuafāfine ma e tatou te alolofa iā i latou. E lē galo iā i tatou galuega o le alofa na latou faia i le taimi ua teʻa, atonu o nisi na faia mo le tele o tausaga. (Epe. 6:10) E tatou te matuā misia i latou. (Luka 15:4-7) Ina ia faaaʻoaʻo iā Iesu, o ā auala e tatou te faaalia ai le manatu mamafa mo i latou?

16. E faapefea ona tatou faaalia le manatu mamafa i o tatou uso ma tuafāfine ua lē o toe talaʻi?

¹⁶ Ia valaaulia ma le māfana i latou i sauniga. O se tasi o auala na faalaeiau ai e Iesu ona aposetolo lotovaivai, o le valaaulia lea o i latou i se faatasiga. (Mata. 28:10e; 1 Kori. 15:6) I aso nei, e mafai foʻi ona tatou faalaeiau uso ma tuafāfine ua lē o toe talaʻi, ina ia auai i sauniga a le faapotopotoga pe afai e lē o auai i sauniga. E tatou te iloa, atonu e tele ni taimi e manaʻomia ona valaaulia ai i latou, faatoʻā mafai ona auai i sauniga. E mautinoa na mātua faafiafiaina Iesu ina ua talia e ona soo lana valaaulia.​—Faatusatusa i le Mataio 28:16 ma le Luka 15:6.

17. O le ā e tatou te faia pe a toe auai i le sauniga se tasi ua lē o toe talaʻi?

¹⁷ Ia faafeiloaʻi ma le māfana i latou. Na faafeiloaʻi ma le māfana e Iesu ona soo ina ua latou feiloaʻi. E leʻi faatali Iesu seʻi faafeiloaʻi muamua o ia e ona soo, ae na tausolomua o ia e faafeiloaʻi ma talanoa iā i latou. (Mata. 28:18) O le ā e tatou te faia pe a toe auai i le sauniga se tasi ua lē o toe talaʻi? E tatau ona tatou tausolomua e faafeiloaʻi ma le māfana o ia. I le amataga, atonu e tatou te ono popole po o ā tatou tala e fai atu. Nai lo o le fai atu o se tala e faamāsiasi ai o ia, ae taʻu i ai lo tatou fiafia tele ona ua tatou toe feiloaʻi.

18. E faapefea ona tatou faalaeiau i latou ua lē o toe talaʻi?

¹⁸ Ia faalaeiau atu. Na ono lofitūina soo o Iesu ina ua poloaʻia i latou e talaʻi atu i le lalolagi atoa. Na faalaeiau e Iesu ona soo i lona faapea atu: “Ou te faatasi ma outou i aso uma  lava.” (Mata. 28:20) Pe na aogā i soo o Iesu lenā faalaeiauga? Ioe. E leʻi umi ae latou pisi loa e “aʻoaʻo atu, . . . ma folafola atu le tala lelei.” (Galu. 5:42) E manaʻomia foʻi e tagata e lē o toe talaʻi ni faalaeiauga. E latou te ono lagona le lofitūina, pe a mafaufau e toe auai i le galuega talaʻi. E tatou te faalaeiau i latou i le faamautinoa i ai e lē na o i latou o le a ō e talaʻi. Pe a latou sauni e toe talaʻi, e tatou te ō faatasi ma i latou. E mautinoa e latou te talisapaia la tatou lagolagosua, a o amata ona latou toe auai i le talaʻia o le tala lelei. Pe a tatou feutagaʻi ma i latou ua lē o toe talaʻi o ni o tatou uso ma tuafāfine, atonu o le a latou toe malolosi ai faaleagaga ma maua ai e le faapotopotoga le fiafia.

19. O le ā ua tatou maumauaʻi e fai, ma aiseā?

¹⁹ O afea e tatau ona faauma ai le galuega o le faia o isi ma soo? O le a faauma i le taimi e faaiʻuina ai lenei faiga o mea. (Mata. 28:20) Po o le a mafai ona tatou faataunuuina lenei vala o le poloaʻiga a Iesu? Ua tatou maumauaʻi e faia lenā mea. E tatou te fiafia e faaaogā lo tatou taimi, malosi ma ʻoa e saʻilia ai i latou “ua saunia o latou loto mo le ola e faavavau.” (Galu. 13:48) Pe a tatou faia lenā mea, ua tatou mulimuli i le faaaʻoaʻoga a Iesu. Na ia fetalai: “O laʻu meaʻai, o le faia lea o le finagalo o lē na auina mai aʻu, ma faaiʻu lana galuega.” (Ioa. 4:34; 17:4) O lo tatou faanaunauga foʻi lenā, ia faaiʻu le galuega na tuuina mai iā i tatou. (Ioa. 20:21) E tatou te mananaʻo foʻi i isi, e aofia ai ma i latou ua lē o toe talaʻi, ina ia auai ma i tatou i le faia o lenei galuega.​—Mata. 24:13.

20. E tusa ai o le Filipi 4:13, aiseā e mafai ai ona tatou faataunuuina le galuega na poloaʻia i tatou e Iesu e fai?

²⁰ O le mea moni, o se luʻi le faataunuuina o le poloaʻiga tāua lenei a Iesu. Peitaʻi, e tatou te lē o faia na o i tatou lenei galuega. Na folafola mai e Iesu o le a ia faatasi ma i tatou. O i tatou o le “ʻaufaigaluega faatasi ma le Atua” i lenei tofiga o le faia o isi ma soo, ma o ni ē e galulue ʻfaatasi ma Keriso.’ (1 Kori. 3:9; 2 Kori. 2:17) O lea la, e mafai ona tatou faataunuuina lenei galuega. O se faaeaga, ma o se fiafiaga iā i tatou le faataunuuina o lenei tofiga. E tatou te fiafia foʻi e fesoasoani i isi ina ia tatou faia faatasi lenei galuega.​—Faitau le Filipi 4:13.