1. Lá nkilika Mateo 28:18-20, lotomo lɔkɔnge Yeso ndatome ambeki wande?

M’ƆKƆNGƆ wɔ Yeso nkfundɔ, nde ɛnamaka le ambeki wande lá Ngaleliya. Nde ayalaka la n’kambo mɔtshi djɛ djonyi djɛ ndashimela. N’kambo djɛkɔnge? Etepela wɛnde wotanaso lá Mateo 28:18-20.​—Wala.

2. Weepó wɛkɔnge w’ɔkɔpaso nkadjimola?

² Lotomo lɔ Yeso lɔ nkfumba ambeki ndendanaka l’onto onkfumɔ wokambela Ndjambe lɔɔko kɛnɛ. Djɛkondeke, nyotshɔ tokokadjimola lá weepó esato welendana la olemo wɔ Yeso ndɔtɔpɛyɛ. Wɔ ntondo, kɛkɔnge koyɛso ladjɛ nangha m’ɔkɔngɔ wɔ ndakanyɛ ɛlɛmbɛ wɛ Ndjambe le ambeki wa n’tato? W’epe, wopo wɔkɔnge nsakodji kenkfumɔ kɛ l’otshumano oyɛnde ladjɛ nangha djɛ nkotshɛ ambeki wa Bible djɛ nfula la nyuma? W’asato, wopo wɔkɔnge okokaso nkotshɛ winaso akristo wambɔhɔla lá lonyuma djɛ nkalɔ nangha olemo wɔ nkfumba ambeki?

3. Alako wakɔnge wa kɔɔ Yeso ndapɛyɛ lá kɛnɛ kelendana la lotomo lɔnde?

³ Alako wa Yeso walekɔ papoo, iso ladjɛ ndakanyɛ anto akambo wa ndatoshimela. Djɛkondeke, topakoke nyimɛ yimba kaanga má djoyi mɔ djɛ ndatepela. Yeso lako ntepela ante: ‘Nyalakanyɛ akambo ankfumɔ wa manyolakanyɛ.’ Koko nde atepelaka ante: Nyalakanyɛ ‘dj’iwɔ nɛmɛyɛ akambo ankfumɔ wa manyolakanyɛ.’ Má nkamba l’olakanyelo wɔ Yeso wɔsɔ, iso ndakanyɛka ambeki waso wa Bible, dj’iwɔ nangha apengo kɛnɛ k’alakanyɛso toko, koko edjinge kɛnɛ kawɛnyɛso. (Ele. 8:31) Ladjikɛnge oyɛso ladjɛ nangha nghɔsɔ?

4. Pɛyɛ ndjɔmbɔmba kɛnyɛ wopo wokokaso ndakanyɛ ombeki wɔ Bible, djɛnde lotomo lɔ Kristo?

 ⁴ Wopo wɔkɔnge wokokaso ndakanyɛ onto djɛ ‘nɛmɛyɛ’ lotomo lɔ Yeso. Ndjɔmbɔmba kɔkɔpaso nyɛna kɛnɛ, nkoka ntokotshɛ djɛ ndjoka kɛnɛ koyɛso ladjɛ nangha. Wopo wɔkɔnge wetsha wolakanyɛ wopo wɔ nkɛndjɛ otuka, okokande ndakanyɛ ambeki djɛ nɛmɛyɛ ɛlɛmbɛ welendana la ɔkɛndjɛlɔ? Ntondo ntondo, wetsha angalakanyɛ ɛlɛmbɛ woyɛwɔ ladjɛ nɛmɛyɛ. Koko, djɛ ndakanyɛ ambeki wande wopo wokokawɔ nɛmɛyɛ ɛlɛmbɛ wɛsɔ, nde ladjɛ nangha djoyi nkina. Nde ladjɛ ntshindjeyɛ ambeki edjinge ntapɛyɛka alako wina wiyotakɛndjɛ la iyotakambe la kɛnɛ kiyeke. Olakanyelo wɔkɔnge w’owaso má ndjɔmbɔmba kɛsɔ?

5. a) Lá nkilika Djɔanɛ 14:15 la 1 Djɔanɛ 2:3, kɛkɔnge k’oyɛso ladjɛ ndakanyɛ ambeki waso wa Bible djɛ nangha? b) Pɛyɛ ndjɔmbɔmba kɛnyɛ wopo wɔkɔnge w’okokaso ndɔndjɛ ambeki waso.

⁵ Wina w’ekaso Bible l’anto ankina, iso ndalakanyɛka kɛnɛ kɛ Ndjambe ɔtɔlɔmbande. Koko iso topakoke nkoma ngo lasɔ. Iso ladjɛ ndakanyɛ ambeki waso wa Bible dj’iwɔ nkamba l’akambo w’ekawɔ lá lowiko lɔwɔ lɔ lofu la lofu. (Wala Djɔanɛ 14:15; 1 Djɔanɛ 2:3.) Ndjɔmbɔmba, iso nkoka nyɛnyɛ ambeki waso wopo wokokawɔ nkamba la tɔkfɔ tima Bible wina woyalawɔ lá nkalasa, l’olemo kana lá n’tshɛkɛlɔ. Iso nkoka ndakɔndɔla ndjɔmbɔmba kɛmɔtshi kɛ lowiko lɔso djɛ ndawɛnyɛ wopo w’ɛlɔndjɛlɔ kɛ Bible okokawɔ ntolama má nyɛtshi kana ntokotshɛ djɛ ndɔsa akano wa balo. Wina woyalaso l’ambeki waso, iso nkoka ndɔmba Yehova nyuma kɛnde k’ekina djɛ ndalɔndjɛ.​—Dj. 16:13.

6. Kɛkɔnge k’oyɛso ladjɛ nangha lonkina wina w’olakanyɛso anto ankina djɛ nɛmɛyɛ ɛlɛmbɛ wɛ Yeso?

⁶ Kɛkɔnge k’oyɛso ladjɛ nangha lonkina wina wolakanyɛso anto ankina djɛ nɛmɛyɛ ɛlɛmbɛ wɛ Yeso? Iso ladjɛ nkotshɛ ambeki wa Bible dj’iwɔ ndjala la mposɛ kɛ nkfumba ambeki. Ambeki amɔtshi nkoka ndjoka wɔma mpoposanyɛ. Djɛkondeke, iso ladjɛ ndjala la bale ntshitshi wina w’akotshɛso dj’iwɔ ndjala la looka lɔ wɔlɔ l’akambo wa Bible la ndjala la djawo djɛ wolo. Wina w’okotaso eloko wɛwɔ, ndeke iyongoyala la mposɛ kɛ mpoposanyɛ. Kɛkɔnge k’okokaso nangha djɛ nkotshɛ ambeki dj’iwɔ ndjala la mposɛ kɛ mpoposanyɛ losango lɔ wɔlɔ?

7. Wopo wɔkɔnge wokokaso nkotshɛ ombeki djɛnde ndjala la mposɛ kɛ mpoposanyɛ losango lɔ wɔlɔ te anto ankina?

⁷ Iso nkoka ndjopola ombeki wɔso wɔ Bible weepó etengo wɛnɛ: “wopo wɔkɔnge ndjawola losango l’Onkfumi iyombotshikitanyɛ lowiko lɔko tá wɔlɔ? Ongokanelake ente anto ankina walekɔ la djonyi djɛ ndjoka losango lɔsɔ? Kɛkɔnge k’okokɛ nangha djɛ ndakotshɛ?” (Woo. 3:27; Mat. 9:37, 38) Ɛnyɛ ombeki traktɛ yelekɔ l’eteyi kɛ M’peko djɛso djɛ ndakanyɛ ko shimelande djɛnde nsɔna traktɛ yekoka nsasangɛ ambotshi wande, tolongo tɔnde, kana anto wakamba lande olemo. * Pɛyɛnde ekata kɛ traktɛ yɛkɔ djɛnde ntokamba la yɛkɔ. Nyonanghe nyape isawo yɛnyɛ wopo w’okapawɔ traktɛ djɛ ndolakanyɛ wopo w’okokande ntokapanyɛ traktɛ yɛkɔ lá wopo wɔ wɔlɔ. Djɛkondeke, m’ɔkɔngɔ wɔ ombeki wɔso ndjawolama etengo nsakodji ketalongola batisimo, iso ladjɛ mposaka lande t’olemo w’ipoposanyɛ djɛ ndokotshɛ.​—Los. 4:9, 10; Luka 6:40.

8. Ladjikɛnge oyɛwɔ djonyi djɛ ambeki waso ndjala la ngandji k’efula te Ndjambe edjinge te winawɔ anto? (Lenda impapango “ Wopo w’okokaso nkotshɛ ambeki waso wa Bible djɛ Nfudjɛ ngandji kɛwɔ te Ndjambe.”)

⁸ Ewa ente, Yeso atɔpɛyɛka odjito ‘wɔ ndakanyɛ anto ankina djɛ nɛmɛyɛ akambo ankfumɔ’  wa ndatoshimela. L’eteyi k’akambo ankfumɔ wasɔ, ndeke otanaso ɛlɛmbɛ epe weleka n’kekete: Nkɔpa Ndjambe edjinge nkɔpa winako, ɛlɛmbɛ epe wɛsɔ welekɔ la djokanelo la olemo w’ipoposanyɛ la wɔ nkfumba ambeki. (Mat. 22:37-39) Djokanelo djɛkɔnge? Ikfɔ yetshinda onto djɛ ndaapɛyɛ l’olemo wipoposanyɛ nde ngandji, ngandji kɛso te Ndjambe la ngandji kɛso te winaso anto. Etengo ewaso, ikanyi yɛ ndapɛyɛ l’olemo w’ipoposanyɛ nkoka mpɛyɛ ambeki amɔtshi wɔma. Koko, iso nkoka nkeketshɛ ambeki wasɔ ente, má okotshɔ wɔ Yehova wangot’imɛka wɔma w’onto ndambo ndambo. (Yee. 18:1-3; Woo. 29:25) Impapango yelá djamba djɛnɛ, nyɛnyɛka kɛnɛ k’okokaso nangha djɛ nkotshɛ ambeki waso dj’iwɔ ndeka nkɔpa Ndjambe lombombe. Lonkina, kɛkɔnge k’otshumano okokawɔ nangha djɛ nkotshɛ ambeki wa bango djɛ ndjala la ngandji efula?

9. Lá ndjɔmbɔmba kɛ ombeki weka nkɛndjɛ otuka, wopo wɔkɔnge ombeki ekande djɛ mba elakanyelo enkina wɛ djonyi?

⁹ Tokokanela lonkina lá ndjɔmbɔmba k’ambeki weka nkɛndjɛ otuka. Lá ledji lɔkɔnge l’ekawɔ wina wiyotakɛndjɛ esanga la wetsha wɔwɔ? Má ndjekameyɛ ɛlɛmbɛ wɛnde edjinge má ndenda toshofɛrɛ tonkina tolekɔ la balo. Ndjɔmbɔmba, wetsha nkoka ndawɛnyɛ shofɛrɛ imɔtshi yawola djɛ winande mpeta má ntondo kɛnde wina woheetawɔ. Kana nde nkoka nsepa ikanyi yɛwɔ te shofɛrɛ inkina yekakitshɛ osase w’atala wande dj’ipa nde mbola toshofɛrɛ tonkina wiso. Ndjɔmbɔmba yɛ nghɔsɔ nkoka mpɛyɛ ambeki elakanyelo wɛ wɔlɔ w’okokawɔ nkamba la wɛkɔ wina wɔkɛndjɛwɔ.

10. Kɛkɔnge kengokotshɛ ombeki djɛnde nfula la nyuma?

¹⁰ Wopo wɔk’ɔmɔ ndeke, ombeki wɔ Bible wombotateyɛ lɔkɛndɔ lá mboka kɛ lowiko, apeke ngo me wetsha wɔnde toko, koko nde ndjekaka edjinge má ndjɔmbɔmba yɛ wɔlɔ y’enkambi enkina wɛ Yehova. Ko, kɛkɔnge kengoleka nkotshɛ ambeki wa Bible dj’iwɔ nfula lá nyuma? Ndjingela lá nsanghanyɛ yɛso y’Akristo. Ladjikɛnge nghɔsɔ? Olakanyelo wimá Bible w’owaso lá nsanghanyɛ angokembɛ balo djɛwɔ, djawo djɛwɔ, edjinge angakotshɛ djɛ nfudjɛ ngandji kɛwɔ te Ndjambe. (Ele. 15:30-32) Lonkina, wina w’otshɔnde tá nsanghanyɛ, wetsha wɔnde wɔ Bible nkoka ndowewanyɛ la wananyɔ l’ankaana yepomanisa l’akambo etengo wande. Ndjɔmbɔmba yɛkɔnge yɛ wɔlɔ ombeki okokande ntɛna me wananyɔ welá otshumano? Tokolenda ndjɔmbɔmba yɛnɛ.

11. Ndjɔmbɔmba yɛkɔnge yekoka ombeki nyɛna l’otshumano, edjinge eposelo wɛkɔnge wekoka ndjala la ndjɔmbɔmba yɛsɔ te ombeki?

¹¹ Ombeki wɔ Bible wowongola wana nyɔmɛlɛ ambɛna nkaana k’Okristo kewongola wana nyɔmɛlɛ etengo nde. Ombeki wɔsɔ amboka l’oloko wina wɔ ndɔmbɛna welo wenangha nkaana kɛsɔ djɛ ndjakala wɔnande w’ilɛngɛ lá Mvulu k’Onkfumi. Ombeki wɔ Bible wonangha la wolo djɛ ntshika nnɔ ikaya ambɛwana nya nsakodji kɛmɔtshi keyalisa l’okakasano wɔ ntshika nnɔ ikaya etengonde ko ayɛka ndolonga. Nsakodji amboshimela ombeki djɛ wopo wotafulaki ngandji kɛnde k’efula te Yehova ndeke lotshindisa djɛ nɛmɛyɛ ɛlɛmbɛ wɛ Ndjambe. (2 Kɔ. 7:1; Flp. 4:13) M’ɔkɔngɔ wɔ ombeki ndjoka nsakodji ɔkɔndɔla ɔkɔndɔ wɔ lowiko lɔnde nyɔmɛlɛ, ombeki ambokeketshama wina wɔ wɔnanyɔ ndomboshimela ante edjinge “wɛ nkoka ntshika nnɔ ikaya.” Oseka wɔmɔtshi weka Bible ambɛna nkaana kɛmɔtshi k’oseka kelekɔ Owakɛ alekɔ l’osasa efula lá lowiko lɔnde. Wina wɔ ombeki wɔ Bible wɔsɔ ndɔmbɛna nkaana k’oseka kɛsɔ alekɔ l’osasa, nde ambokombola ndjewa ladjikɛnde nkaana kɛsɔ oyɛnde wina enkfumɔ l’osasa efula nghɔsɔ.

12. Ladjikɛnge okokaso ntepela ente onto onkfumɔ wɔ l’otshumano nkoka nangha n’kambo mɔtshi djɛ nkotshɛ ambeki wa Bible?

 ¹² Wina wɔ ombeki wɔ Bible otateyɛnde ndjewa ansakodji yetshikitanyi yelekɔ la n’kɔmano, nde angeka má ndjɔmbɔmba yɛsɔ wopo w’okokande nɛmɛyɛ ɔlɛmbɛ wɔ Kristo wɔ nkɔpa Ndjambe edjinge winaso anto. (Dj. 13:35; 1 Ti. 4:12) Etengo isɛnaki, ombeki wɔ Bible nkoka mba olakanyelo me ansakodji yepomana l’ekakasano etengo wɛnde. Má ndjɔmbɔmba yɛsɔ, ombeki mbaka olakanyelo ante, nde angoyala l’akoka wa nangha etshikitano w’oyɛnde la djonyi djɛ nkoma ombeki wɔ Kristo. (Mvu. 30:11) Onto onkfumɔ wɔ l’otshumano nkoka nangha n’kambo mɔtshi djɛ nkotshɛ ombeki wɔ Bible djɛ nfula lá nyuma. (Mat. 5:16) N’kambo djɛkɔnge dj’okokɛ nangha djɛ nkeketshɛ ambeki wa Bible wayɛ lá nsanghanyɛ?

13-14. Wopo wɔkɔnge Yeso ndɔsaka apɔstɔlɔ wande?

¹³ Iso nkɔpaka nkotshɛ wananyɔ l’ankaana yɛso yɛmbɔhɔla lá nyuma dj’iwɔ nkalɔ nkotshɛ olemo wɔ Kristo wɔ nkfumba ambeki. Wopo wɔ Yeso ndananghela apɔstɔlɔ wande akambo wina wiyalɛmbɛ, nyɛnyɛka kɛnɛ k’okokaso nangha lɔɔko kɛnɛ.

¹⁴ L’ekomo k’olemo wɔ Yeso lanɛ lá looko lá ntondo kɛnde mvɔ, apɔstɔlɔ wande ‘wokadjɛka edjinge wolotaka.’ (Mar. 14:50; Dj. 16:32) Kɛkɔnge kɛ Yeso ndananghe wina w’apɔstɔlɔ wande iyalɛmbɛ? Ndambo ndaambi m’ɔkɔngɔ wɔ nyɔyi kɛnde, Yeso ashimelaka ambeki wande ante: ‘Nyotokake wɔma! Nyotshu nyotoshimele wananyɔ wami ente, [lambo kfundɔ].’ (Mat. 28:10a) Yeso atakɔpa nkadjɛ apɔstɔlɔ wande. Kaanga apɔstɔlɔ wande iyokadjɛ, nde awetaka ante ‘wananyɔ wami.’ Etengo Yehova, Yeso ayalaki la nkɛtshi edjinge entshupa djɛ nyimeyɛ.​—2 Nk. 13:23.

15. Wopo wɔkɔnge oyɛso ladjɛ ndɔsa waapoposa t’olemo w’ipoposanyɛ?

¹⁵ Djɛkondeke, iso ndaapɛyɛka efula le wanɛ wambotshika mpoposanyɛ. Iwɔ walekɔ wananyɔ l’ankaana yɛso, iso ndawokaka ngandji efula! Iso nvungɔka lonkina elemo wɛ la ngandji wɛ wananyɔ wasɔ iyakambe lá etsho wemboheta, wɛmɔtshi wenanghemaka la deko djemboheta. (Heb. 6:10) Nsɔsɔlɔ, tongakanelake efula! (Luka 15:4-7) Djɛ ndjokola Yeso, lɛdji lɔkɔnge l’okokaso ndaapɛyɛ te wɔ?

16. Wopo wɔkɔnge w’okokaso nyɛnyɛ dj’iso ndjilaka wananyɔ l’ankaana yɛso yembɔhɔla lá nyuma yimba?

¹⁶ Etakawɔ tá nsanghanyɛ. Yopo imɔtshi yɛ Yeso ndananghe djɛ nkeketshɛ apɔstɔlɔ wande nde ndaweta tá losanghanyɛ. (Mat. 28:10b; 1 Kɔ. 15:6) Wopo wɔk’ɔmɔ lɔɔko kɛnɛ, iso nkoka nkeketshɛ wambɔhɔla lá nyuma dj’iwɔ ndjɛ lá nsanghanyɛ yel’otshumano ntsha wapayonangha n’kambo djɛsɔ. Iso ndjewaka ente, iso ladjɛ ndaweta mbala efula kaanga lá ntondo k’iwɔ ntateyɛ ndjɛ. Ipa l’ehamo, Yeso ayalaka l’osasa djɛ ambeki wande ndjawola leeta lɔnde.​—Ɛdjɛ la Mateo 28:16 edjinge Luka 15:6.

17. Kɛkɔnge koyɛso ladjɛ nangha wina wɔ onto ɔmɔtshi wɔmbɔhɔla lá nyuma oyɛnde lá losanghanyɛ?

¹⁷ Sangelawɔ l’osasalo onkfumɔ. Yeso ananghaka djɛ ambeki wande ndjala l’osasalo wina wiyapomana lande, nde atakonga dj’iwɔ ndjɛ le nde koko nde atshɔka tewɔ, ko asawolaka lawɔ. (Mat. 28:18) Kɛkɔnge k’oyɛso ladjɛ nangha wina wɔ wɔnanyɔ wɔmbɔhɔla lá nyuma oyɛnde lá Mvulu k’Onkfumi? Totakongelake ngo nde ntosangela koko iso tosangele ntondo l’osasa. Má bango, iso nkoka ndjengenga ladjikɛnde topewe kɛnɛ k’okokaso ntepela. Ipa la ndɔpɛyɛ nsɔnyi, t’okoka ndoshimela ngo ente, tolekɔ l’osasa efula wɔ nkɛna lá losanghanyɛ.

18. Wopo wɔkɔnge w’okokaso nkeketshɛ ansakodji yɛmbɔhɔla lá yuma?

¹⁸ Keketshɛwɔ. Ambeki wa Yeso wayawokaka etengo wapangoyala l’akoka wa nkotshɛ olemo  wɔ Yeso ndapɛyɛ wɔ mpoposanyɛ lá looko l’ontondo. Yeso ashikikɛka l’etepela wɛnɛ ante: ‘Ndekɔ lanyo etsho enkfumɔ.’ (Mat. 28:20) Etepela wɛsɔ wekotshɛka ambeki? Ee. M’ɔkɔngɔ wɔ m’asɔ, iwɔ wayalaka l’osasalo djɛ ‘ndakanyɛ edjinge ndjewoyɛ losango lɔ wɔlɔ.’ (Ele. 5:42) Kaanga ansakodji wambɔhɔla lá nyuma walekɔ la djonyi dj’ekeketshelo. Iwɔ nkoka ndjala la wɔma wɔ ntateyɛ mpoposanyɛ lonkina. Iso nkoka ndakeketshɛ djɛ wapango poposanyɛka iyɔmɛlɛ. Wina woyalawɔ entshupa, iso nkokaka mposa la wɔ t’olemo w’ipoposanyɛ. Apelehamɔ wangoyala l’osasa djɛmba okotshɛ wɔsɔ wina wiyongo tateyɛ mpoposanyɛ losango lɔ wɔlɔ lonkina. Wina wonanghelaso wambɔhɔla lá nyuma akambo etengo wananyɔ l’ankaana yɛso, iwɔ wangokalɔ ndjala l’osasalo lonkina edjinge otshumano onkfumɔ wangoyala l’osasa.

19. Mposɛ kɛkɔnge k’efula k’oyɛso la kɛkɔ, ko ladjikɛnge?

¹⁹ Polo wina wɔkɔnge isongoshiyɛ olemo wɔ nkfumba ambeki? Polo l’etena k’ekomo k’andja. (Mat. 28:20; lenda Elembetshielo wa tɔtɛkɛta ta lo Bible: “Dikongɛ diakambo.”) Tongoyala l’akoka wa nshiyɛ olemo wɔ Yeso ndatɔpɛyɛ wɔsɔ? Tomboyashikikɛ djɛ nangha nghɔsɔ! Iso mpɛyɛka wina wɛso, wolo wɔso edjinge nfalanga yɛso lɛkɔpa djɛ mpona anto ankfumɔ walekɔ ‘entshupa djɛ ndjawola akambo watɔla tá lowiko.’ (Ele. 13:48) Wina wonanghaso nghɔsɔ, iso ndjokolaka ndjɔmbɔmba kɛ Yeso. Nde atepelaka ante: ‘Mma djɛmi nde nangha ɛkɔpa k’onto wontomisa edjinge nshiyɛ olemo wɔnde.’ (Dj. 4:34; 17:4) Edjinge iso tolekɔ la nsaki k’efula kɛsɔ. Iso nkɔpaka nshiyɛ olemo wiyatɔpɛyɛ. (Dj. 20:21) La koko, iso nkɔpaka anto ankina, ndjila edjinge wambɔhɔla lá nyuma, nkindjɛ nangha olemo wiyatɔpɛyɛ.​—Mat. 24:13.

20. Lá nkilika Filipɛ 4:13, ladjikɛnge otepelaso ente iso nkokaka nkotshɛ olemo wɔ Yeso ndatotshikela djɛ nangha?

²⁰ Nkotshɛ, olemo wɔ Yeso ndatɔpɛyɛ apalekɔ n’kambo djɛ daambi. Koko topananghe olemo wɔsɔ isɔmɛlɛ. Yeso alakaka ante nde angoyala esanga laso. Tonangha olemo wɔ nkfumba ambeki etengo enkambi wekamba ‘esanga la Ndjambe edjinge esanga la Kristo.’ (1 Kɔ. 3:9; 2 Kɔ. 2:17) Djɛkondeke, iso nkoka nkotshɛ olemo wɔsɔ. Ɔsɔngo mpeyi edjinge osasa wolekɔ laso djɛ nkamba olemo wɔsɔ edjinge nkotshɛ anto ankina djɛ ndokamba!​—Wala Filipɛ 4:13.