1. Muyile Mateo 28:18-20, eyi kinyi dibadi Yesu mutumine balongi baye?

KUNYIMA kwa lusangukilo lwaye, Yesu baadi mumwenekyele balongi baye abaadi bebungye mu Ngalileya. Badi na mwanda wi na muulo wa kwibalungula. Mwanda kinyi? Nyi nguno wi mu Mateo 28:18-20.​—Badika.

2. Nkonko kinyi yatutaluula?

² Eyi dya Yesu dya kwikasha bantu bu balongi nditale oso mufubi a Efile Mukulu lelo uno. Nyi bwakinyi, tutaluule nkonko isatu ipushene na mudimo witupe Yesu. Lwa kumpala, kukatusha kulongyesha balongi bapya miiya y’Efile Mukulu, kinyi dingi akitungu’shi tukite? Lwa kabidi, mushindo kinyi ulombene mulungudi oso a mu kakongye kukwasha balongi bapya bwa kunyinga mu kikudi? Lwa kasatu, mushindo kinyi watudya kukwasha balongudi balekye kulungula mukandu wibuwa bwabadya kubangula kukita uno mudimo wa kwikasha bantu bu balongi?

3. Mwanda kinyi wi na muulo wi mu eyi dibadi Yesu mutume?

³ Mayi a Yesu ngatokane. Abitungu tulongyeshe bantu myanda ibaadi Yesu mulambukishe. Anka, tabitungu twilwankane mwanda wi na muulo. Yesu tamwambe’shi: ‘Nwibalambukishe byooso binadi mwinufundile.’ Kadi bakwile’shi: nwibalambukishe “bya kulama [kukookyela] byooso binaadi mwinufundjile.”  Bwa kukookyela eyi dya Yesu abitungu tulongyeshe mulongi etu a Bible kya kukita na bya kwibikita. (Bik. 8:31) Bwakinyi abitungu twibikite?

4. Tusha kileshesho akilesha bya kulongyesha mulongi a Bible bwa kukookyela eyi dya Yesu.

⁴ Mushindo kinyi watudi balombene kulongyesha muntu bwa kukookyela mayi a Yesu? Kino kileshesho akilondo akitukwasha bwa kupusha kyatudya kukita. Banda kutala kileshesho kya mulongyeshi alongyeshaa bya kutela bilamba. Kinyi kyadi mulombene kukita bwa kulongyesha balongi baye bya kutela? Kya kumpala, abadaa kwibalongyesha bya kutela kukiila ku mapupwa abetaminaa bu patron. Kubapu ndjo ende nabo mbalo ya batelelaa bilamba bwa kwibalesha bya kutela. Kino kileshesho akitulongyesha kinyi?

5. (a) Muyile Yowano 14:15; na 1 Yowano 2:3, kinyi akitungu’shi tulongyeshe balongi betu ba Bible bwa kukita? (b) Tusha bileshesho abilesha mushindo watudya kwibalesha bwa kutumikila bya balongo.

⁵ Nsaa yatulongo Bible na bantu, atwibalongyesha bya kukita kyakya akitutekye Efile Mukulu. Kadi, abitungu tukite bikile paapa. Abitungu tulongyeshe balongi betu ba Bible bya kutumikile byabya byabalongo mu muwa wabo. (Badika Yowano 14:15; 1 Yowano 2:3.) Ku bikitshino byetu, twi kulesha balongi ba Bible bya kutumikila bya binyibinyi byabalongo, ku kalasa na ku mudimo. We kumulondela mwanda kampanda ukufikile mu nshalelo obe, bwa kumulesha’shi kulonda bukunkushi bwa mu Bible akwitukalwila ku mwanda kampanda wi kwitukakila masaku, sunga kwitukwasha bwa kwata bitshibilo bi buwa. Nsaa yatulongo Bible na bantu, twi balombene kuteka Yehowa bwa’shi kikudi kyaye kiselele kibakunkushe.​—Yo. 16:13.

6. Nkinyi kingi akitungu’shi tukite bwa kukookyela mayi a Yesu?

⁶ Mu mayi a Yesu mwi kinyi kingi akitungu kulongyesha bantu bwa kukookyela? Abitungu tukwashe balongi betu ba Bible bwa kwikala na lukalo lwa kwikasha bantu bu balongi. Bangi balongi ba Bible be kwikala na moo wa kulungula mukandu wibuwa. Byabya, abitungu twikale na lwishinko nsaa yatukwasha balongi ba Bible bwa kupusha kalolo bya binyibinyi bi Mwiyi dy’Efile Mukulu, abinyingisha lukumiino lwabo na abibatakula bwa kulungula mukandu wibuwa. Kinyi akitungu’shi tukite bwa kukwasha balongi ba Bible bwa’shi bekale na lukalo lwa kulungula mukandu wibuwa?

7. Mushindo kinyi watudya kukwasha mulongi a Bible bwadya kwikala na lukalo lwa kulungula mukandu wibuwa?

⁷ We mulombene kwela mulongi obe a Bible nkonko bu ino: “Kukumiina mukandu wa Bufumu, nkulumbuule nshalelo obe naminyi? Wele binangu’shi kwi bangi be na lukalo lwa kupusha uno mukandu? Nkinyi kyodya kukita bwa kwibakwasha?” (Nki. 3:27; Mat. 9:37, 38) Lesha mulongi a Bible ma trakte e mu Kashete ketu ka bina mudimo, na omulekye bwa’shi asangule aa amono’shi bena kifuko kyaye, ba kuuku na bena mudimo nê abasangela kwiyibadika. Mupe ndambo yaku ano ma trakte na omuleshe byadya kwi abila na kanemo koso. Kunyima kwabo kumukumiina bu mulungudi a mukandu wibuwa shabatshishibwe, abitungu tulungule naye mukandu wibuwa bwa kumukwasha.​—Mul. 4:9, 10; Luk. 6:40.

8. Bwakinyi abitungu’shi balongi ba Bible batamishe kifulo kyabo bw’Efile Mukulu na bwa bantu nabo? (Tala dingi kashibo akamba’shi: “ Bya kutamisha kifulo kya balongi ba Bible bw’Efile Mukulu.”)

⁸ Tentekyesha’shi, Yesu baadi mwitutumine eyi dya kulongyesha bangi bwa “kulama [kukookyela] byooso” byadi mwitulambukishe. Kushi mpaka, mwanka mwi miiya ibidi ikata ​—kufula Efile Mukulu na kufula muntu nobe—​yoso ngipushe na mudimo wa kulungula mukandu wibuwa na kwikasha bantu bu balongi. (Mat. 22:37-39) Nkwipushena kinyi? Kabingilo kakata aketutakula bwa kulungula mukandu wibuwa nyi kifulo​—kifulo kyetu bwa Yehowa na bwa bantu. Eyendo’shi, bwa bangi balongi ba Bible, kulungula mukandu wibuwa kwi kwibapushisha moo. Anka abitungu kwi bashinkamisha’shi Yehowa akebakwasha ku kapelekapela bwa kukambila moo wa bantu. (Mis. 18:2-4; Nki. 29:25) Kashibo ke mu uno mwisambo, akalesha myanda yatudya kukita bwa kukwasha mulongi a Bible bwadya kutamisha kifulo kyaye mwi Yehowa. Byabya, kakongye kekukita kinyi bwa kukwasha balongi bapya bwa kunyisha kulesha bangi kifulo?

9. Mu kileshesho kya mulongi alongo bya kutela, mu mishindo kinyi mwadi mulombene kulonga bya kutela kalolo?

⁹ Nangushena dingi ku kileshesho kya balongi abalongo bya kutela. Nsaa i mulongi atele kulupese kwa mulongyeshi aye, mushindo kinyi dingi wadi mulombene kulonga bya kutela? Pa kuteemesha abimulongyesha mulongyeshi aye na kubeekyela kalolo abitele bangi. Bu kileshesho, mulongyeshi mulombene kwata bula sunga bukata bwa muntu su takwi esaki dya patron. Sunga’shi mulongyeshi akaka binangu byabo kwi ungi muntu atelaa kalolo bwa kwibalesha bya kwela ma mbote. Bino bileshesho abikwasha mulongi bwadya kuuka kyadya kukita nsaa y’atele.

10. Nkinyi kilombene kukwashe mulongi a Bible bwa kunyinga mu kikudi?

¹⁰ Mu mushindo umune, mulongi a Bible babanga kufubila Yehowa, talongyela penda kwi mulongyeshi aye nya, anka alongyela dingi ku bileshesho bi buwa bya bafubi ba Yehowa. Byabya, kinyi akikamba kukwasha balongi ba Bible bwabadya kunyinga mu kikudi? Nyi nkutwela mu bisangilo byetu. Bwakinyi? Byabya byabakalongo mu bisangilo, mbilombene kwibakwasha bwa kutamisha kiukilo kyabo, lukumiino na kifulo kyabo bwa Yehowa. (Bik. 15:30-32) Dingi ku bisangilo, mulongyeshi aye a Bible amufumankasha na bakwetu balume na bakashi abanyingila nkalakashi imumune na yaye. Mulongi a Bible mulombene kumona bileshesho bya bakwetu balume na bakashi abeleshena kifulo mu kakongye. Tubande kutala bino bileshesho.

11. Mbileshesho kinyi bilombene kumona mulongi a Bible mu kakongye, na bino bi kwikala na bukitshishi kinyi kwadi?

¹¹ Mulongi a Bible akusha bana bupenka, amono mukwetu mukashi akusha naye namu bana bupenka. Abimukumu kwishimba pa kumona mushindo awikitshisha mukwetu mukashi bwa kufika ku bisangilo na bana baye. Mulongi a Bible ekitshisha bwa kuleka kutoma nfwanka, epetena na mulungudi mukambile kyakya kipikwa. Mulungudi amulungula bimutakule kifulo kyaye bwa Yehowa, bwa kukookyela miiya yaye. (2 Kod. 7:1; Fid. 4:13) Kunyima kwa kulungula mulongi a Bible bibaadi mwimikye kutoma nfwanka, uno mukwetu bamulungula’shi: “Nobe namu we byakuleka.” Mulongi a Bible badi munyingishibwe na mushinkamishe’shi e kwibikita. Ka nsongwakashi akalongo Bible, akamono mukwetu mukashi a kipimo kyaye e na muloo wa kwikala Temwe a Yehowa. Nsaa ibamono ka nsongwakashi akalongo Bible muloo winao mukwetu mukashi a kipimo kyaye, bapete muloo wa kulonga bi bungi pabitale kyakya kipeteshe yawa mukwetu muloo.

12. Bwakinyi atwamba’shi muntu oso mu kakongye e na kyakukita bwa kukwasha balongi ba Bible?

¹² Nsaa y’abeukena na balungudi ba sha lulamato belekenelekene, balongi ba Bible abalongyela ku bileshesho byabo bya kutumikila mwiya wa Yesu wa kufula Efile Mukulu na  muntu nabo. (Yo. 13:35; 1 Tim. 4:12) Nka bu byatubakatuka mukumona, mulongi a Bible mulombene kulongyela kwi balungudi banyingile nkalakashi imumune na yaye. Mulongi a Bible alongyela ku bino bileshesho’shi, naye namu mulombene kushintuula nshalelo aye bwa kwikala mulongi a Kidishitu. (Miy. 30:11) Muntu oso mu kakongye, e kukwasha mulongi a Bible mu mishindo ilekene bwadya kunyinga mu kikudi. (Mat. 5:16) Nkinyi kyodya kukita bwa kunyingisha balongi ba Bible abatwele mu bisangilo?

13-14. Mushindo kinyi ubadi Yesu mukitshine balongi baye myanda nsaa ibabadi babofule ku mashimba?

¹³ Atukumiina kukwasha bakwetu balume na bakashi balekye kulungula mukandu wibuwa bwa kubanguula kulungula na kwikasha bantu bu balongi. Mushindo ubadi Yesu mukitshine batumiibwa baye abadi babofule ku mashimba myanda, awitulesha kyatudi balombene kukita lelo uno.

¹⁴ Ku nfudilo kwa mudimo wa Yesu pa nsenga, kumpala kwa’shi bamwipee, batumiibwa boso “abamupalakêne basûka.” (Mak. 14:50, EEM; Yo. 16:32) Nkinyi kibaadi kikite Yesu nsaa ibadi batumiibwa baye babofule ku mashimba? Nkaye kyasanguka, Yesu balungwile bangi balongi baye’shi: “Lekaayi kutshiina! Ndaayi nukawukishe bakwetu balume’shi [nasanguka].” (Mat. 28:10a) Yesu tabadi mupele batumiibwa baye nya. Sunga byababadi bapalakane bamuleka, badi mutungunukye na kwibetamina bu ‘bakwabo balume.’ Nka bu Yehowa, Yesu afwidishena lusa.​—2 Bf. 13:23.

15. Mu mushindo kinyi mwatumonaa baba balekye kulungula mukandu wibuwa?

¹⁵ Atupasukila baba boso balekye kulungula mukandu wibuwa. Baki’nka bakwetu balume na bakashi na twi bebafule! Tuky’atutentekyesha mudimo wi bukopo wabadi bafubile Yehowa. Pangi, bangi basha balungula lelo uno, babadi bamufubile munda mwa bipwa bi bungi. (Eb. 6:10) Tukii nabo lukalo! (Luk. 15:4-7) Mu kileshesho kya Yesu, mu mishindo kinyi mwatudi balombene kulesha’shi tukwete kwibapasukila?

16. Mushindo kinyi watudya kulesha’shi atupasukila bakwetu balekye kulungula mukandu wibuwa?

¹⁶ Na muloo oso, ebetamine ku bisangilo. Yesu badi munyingishe batumiibwa baye abadi babofule ku mashimba, pa kwibetamina ku kisangilo. (Mat. 28:10b; 1 Kod. 15:6) Lelo uno, twi kunyingisha balungudi balekye kulungula mukandu wibuwa bwa kutwela mu bisangilo su tabakya bemufikaa. Atuuku’shi, twi balombene kwibetamina misango i bungi kumpala kwa’bo kufika mu bisangilo. Kushi mpaka, Yesu badi mushinkamishe’shi, balongi baye abakumiina lwitamino lwaye.​—Pwandjikisha Mateo 28:16 na Luka 15:6.

17. Twi kwikukita kinyi nsaa ayifiki muntu mulekye kulungula mukandu wibuwa ku bisangilo?

¹⁷ Ebakukile na muloo oso. Yesu badi mukite bwa’shi balongi baye bepushe kalolo nsaa ibabadi bepetene, na bayile kwabadi bwa kwibesambisha. (Mat. 28:18) Twi kukita kinyi nsaa ayifiki muntu mulekye kulungula mukandu wibuwa ku bisangilo? Abitungu twate mpángo ya kwenda mu kumukukila na muloo oso. Kumpala, twi kukutwa kya kwakula. Anka, pamutwe pa kwakula kintu kya kumukokosha, twi kumulungula nka penda’shi, twi na muloo wa nkumona.

18. Mushindo kinyi watudya kunyingisha baba balekye kulungula mukandu wibuwa?

¹⁸ Ebanyingishe n’eshimba dyoso. Balongi ba Yesu abadi abapwandjikisha’shi tabobesha kulungula mukandu wibuwa mu nsenga ishima. Yesu badi mwibanyingishe pa kwibalungula’shi:  “Nee neenu mafuku ooso.” (Mat. 28:20) Ano mayi abadi ebanyingishe su? Oolo. Kunyima kwa mafuku apeela, abaadi bepane mu ‘kulambukisha na kuukisha mukandu wibuwa.’ (Bik. 5:42) Baba balekye kulungula mukandu wibuwa be na lukalo lwa kunyingishibwa. Mwanda mbalombene kupusha moo wa kubanga dingi kulungula mukandu wibuwa. Twibashinkamishe’shi, tabekala bupenka mu bulungudi. Byabya, pabadi na nsaa twi kwenda nabo mu bulungudi. Kushi mpaka, tabakutwa kusankila bukwashi bwetu nsaa y’ababanga dingi kulungula mukandu wibuwa. Nsaa yatukitshina baba balekye kulungula mukandu wibuwa myanda bu bakwetu balume na bakashi, mbilombene kutusha bipeta bi buwa mu kakongye.

19. Lukalo lwetu ndwa kinyi, na bwakinyi?

¹⁹ Atutungunuka na kukita mudimo wa kwikasha bantu bu balongi mpa na nsaa kinyi? Mpa na ku nfudilo kwa uno ndumbulwilo. (Mat. 28:20; tala mu Lexique pa mbalo ifunde’shi, “Système de choses” mu NWT.) Atobesha kulungula mukandu wibuwa mpa na ku nfudilo? Twi na kitshibilo kya kwibikita! Twi na muloo wa kutusha nsaa yetu, bukome na bintu byetu bwa kukimba baba “be na mashimba alombane bwa muwa wa looso.” (Bik. 13:48, NWT) Su twakita byabya, atulondo kileshesho kya Yesu bambile’shi: “Kyakudya kyande, nkukita akikyebe muntume, na kukumbasha mufubo waye.” (Yo. 4:34; 17:4) Nyi bi lukalo lwetu. Atukumiina kupudisha mudimo wabadi betupe. (Yo. 20:21) Na atukumiina’shi bangi, kusanga na baba balekye kulungula mukandu wibuwa, banyingile netu mu uno mudimo.​—Mat. 24:13.

20. Muyile Beena-Fidipe 4:13, nkinyi kilombene kwitukwasha bwa kukumbasha mudimo witupe Yesu?

²⁰ Eyendo’shi, kukumbasha mudimo wabadi betupe kwi Yesu, ta nkubofule. Anka, tatwiukitshi bupenka. Yesu balayile’shi, ekala netu. Atukumbasha mudimo wa kwikasha bantu bu balongi bu “beena mufubo umune n’Efile Mukulu,” “pamune na Kidishitu.” (1 Kod. 3:9, Kilombeeno kipya 2014; 2 Kod. 2:17, NWT) Byabya, twikwiukumbasha. Twi na kinemo kikata kya kukita uno mudimo na kukwasha bangi bwabadya kwiukita!​—Badika Beena-Fidipe 4:13.