1. Andi Jesosi bi piki dee bakama fëën u de du, te u luku Mateosi 28:18-20?

BAKA di Gadu bi weki Jesosi ko a libi, hën Jesosi bi go a dee bakama fëën di de bi ko makandi a Galilea. A bi kë piki de wan fanöudu soni. Andi a bi kë piki de? Wë dee soni dee a bi piki de sikifi a Mateosi 28:18-20.​—Lesi ën.

2. Un hakisi woo luku?

² Dee dinima u Gadu u di ten aki seei musu heepi sëmbë u de ko dë bakama u Keesitu. Fëën mbei a bunu fuu luku dii hakisi di nama ku di wooko di Jesosi da u fuu du. Di fosu hakisi da, andi u musu ta du jeti, boiti di lei di u musu ta lei sëmbë andi Gadu kë? Di u tu da, unfa hii dee peleikima a di kemeente sa heepi sëmbë di ta lei soni u Bëibel, u de go a fesi a di biibi? Nöö di u dii soni da, unfa u sa heepi dee baaa ku dee sisa fuu dee an ta peleiki möön, u de bigi baka ku di heepi di de bi ta heepi wotowan u de ko dë bakama u Keesitu?

3. Un fanöudu soni Jesosi bi taki, di a bi da dee bakama fëën wan wooko u de du?

³ Di soni di Jesosi piki u fuu du, dë gbelingbelin u fusutan. U musu lei sëmbë dee soni di Jesosi bi piki u. Ma wa musu fëëkëtë wan fanöudu soni. Jesosi an bi taki taa: ’Lei de hii dee soni dee mi taki.’ Ma a bi taki taa: Lei de „u de piki hii dee soni tuu dee mi manda unu fuun musu ta du”. Ee u kë du di soni di Jesosi piki u fuu du, nöö u musu lei di sëmbë di u ta lei soni u Bëibel andi a musu du, söseei u musu lei ën unfa a musu du ën  (Tjab. 8:31). Faandi mbei u musu du dee soni aki?

4. Konda unfa u sa heepi wan sëmbë di u ta lei soni u Bëibel, faa du andi Keesitu piki u fuu du.

⁴ Unfa u sa heepi wan sëmbë faa du dee soni di Keesitu piki u fuu du? Woo konda wan woto di o heepi u fuu sabi andi u sa du. Unfa wan sëmbë di ta lei woto sëmbë u lëi wagi, sa heepi dee sëmbë dee a ta lei, u de hoi dee wëti? Wë di fosu soni di a musu du, hën da a musu lei dee sëmbë dee wëti. Ma te a kë lei de unfa de musu hoi de, nöö a musu du wan woto soni. A musu tja dee sëmbë go lëi, nöö a musu lei de soni. Dee sëmbë musu mbei möiti u de du dee soni di de lei. Andi u sa lei u di woto aki?

5. (a) Andi u musu heepi dee sëmbë dee u ta lei soni u Bëibel u de du, te u luku Johanisi 14:15 ku 1 Johanisi 2:3? (b) Konda unfa u sa ta heepi dee sëmbë dee u ta lei soni u Bëibel.

⁵ Te u ta lei sëmbë soni u Bëibel, nöö u ta lei de unfa Gadu kë taa u musu libi. Ma soni dë jeti di u musu du. U musu da de taanga u de libi ku dee soni di de ta lei. (Lesi Johanisi 14:15; 1 Johanisi 2:3.) Ku di fasi fa u ta libi u sa ta lei de unfa de sa libi ku dee soni di de ta lei u Bëibel te de dë a siköö, te de dë a wooko, nasö te de ta du soni u mbei piizii. U sa piki de andi bi miti u, nöö u sa konda da de unfa di libi di u ta libi ku dee wëti u Bëibel bi tjubi u da hogi, nasö unfa de bi heepi u fuu du soni a wan köni fasi. Te u dë makandi ku dee sëmbë dee u ta lei soni u Bëibel, nöö u sa begi Jehovah faa tii de ku di santa jeje fëën.​—Joh. 16:13.

6. Un woto soni u musu du te u ta heepi sëmbë u de du dee soni di Jesosi piki u fuu du?

⁶ Andi a kë taki u heepi sëmbë u de du dee soni di Jesosi piki u fuu du? Wë u musu heepi dee sëmbë dee u ta lei soni u Bëibel u de ko abi di hangi u lei woto sëmbë soni u Bëibel. Kandë so u de o fëëë u du di peleikiwooko. Fëën mbei u musu abi pasensi te u ta heepi de u de ko fusutan dee lei u Bëibel möön bunu, nöö di biibi u de o ko möön taanga. Dee soni di de o lei o dou de hati, nöö de o kë du di peleikiwooko. Andi u sa du u heepi de, u de ko kë du di peleikiwooko?

7. Unfa u sa heepi wan sëmbë di u ta lei soni u Bëibel faa ko kë paaja di bunu buka?

⁷ U sa hakisi di sëmbë di u ta lei soni u Bëibel dee soni aki: „Unfa di libi fii ko dë di i bigi libi ku dee lei u Bëibel? I si kuma woto sëmbë musu jei di buka aki tu ö? Andi i sa du u heepi de?” (Nöng. 3:27; Mat. 9:37, 38) Lei ën dee talakitaati dee u ta tei u peleiki, nöö hakisi ën ee undi u de a ta si kuma dee famii fëën, dee mati fëën, nasö dee sëmbë dee hën ku de ta wooko bi o kë lesi. Dëën wantu u dee talakitaati aki. Lei ën unfa a sa da wan sëmbë wan talakitaati. Ma an dë u taki taa te a ko toon wan peleikima, nöö u musu ta peleiki makandi ku ën u heepi ën go dou.​—Peleik. 4:9, 10; Luk. 6:40.

8. Faandi mbei a dë fanöudu taa dee sëmbë dee u ta lei soni u Bëibel, musu ko lobi Gadu ku woto sëmbë möön gaanfa? (Luku di pisi „ Unfa u sa heepi dee sëmbë dee u ta lei soni u Bëibel u de ko lobi Gadu möön gaanfa?”)

⁸ Hoi a pakisei taa Jesosi bi piki u taa u musu lei wotowan ’u de piki hii dee soni tuu dee a manda u fuu musu ta du’. Di soni aki kë taki tu taa u musu heepi de tu u de hoi dee tu möön gaan wëti, di ta taki taa u musu lobi Gadu ku woto sëmbë tuu. Dee tu wëti aki nama ku di peleikiwooko, ku di heepi di u musu heepi sëmbë u de ko dë bakama u Keesitu (Mat. 22:37-39). Unfa dee tu soni aki nama tjika? Wë di möön gaan soni di mbei u ta du di peleikiwooko, hën da u di u lobi Gadu ku woto sëmbë. U sa fusutan taa so sëmbë di ta lei soni u Bëibel sa fëëë u du di peleikiwooko. Ma u sa da de taanga taa Jehovah o heepi de pikipiki u  de an fëëë sö möön (Ps. 18:1-3; Nöng. 29:25). Di pisi di nama ku di woto aki, ta taki andi u sa du u heepi dee sëmbë dee u ta lei soni u Bëibel, u de ko lobi Gadu möön gaanfa. Ma boiti dee soni aki, andi di kemeente sa du u heepi dee sëmbë aki, u de ko ta möön lobi Gadu ku woto sëmbë?

9. Unfa di sëmbë di ta lei u lëi wagi, sa lei wantu fanöudu soni?

⁹ Pakisei di woto u di sëmbë di ta lei u lëi wagi. Te a ta lëi, nöö di sëmbë di ta lei ën soni, ta dë leti nëën bandja. Ma unfa di sëmbë ta lei u lëi di wagi? Wë a ta lei te a ta haika andi di sëmbë di ta lei ën ta piki ën, söseei te a ta luku unfa woto sëmbë ta lëi. Kandë di sëmbë di ta da di lësi, sa lei di sëmbë unfa wan woto sëmbë di ta lëi wan wagi, ta da wan woto wagi pasi faa go nëën fesi. Nasö a sa lei ën unfa wan sëmbë di ta lëi wan wagi ta saka di faja fëën, sö taa an toobi sëmbë a wojo. Dee soni aki sa heepi di sëmbë di ta lei u lëi wagi faa ko sabi wantu fanöudu soni te a o ta lëi wagi bakaten.

10. Andi o heepi wan sëmbë di ta lei soni u Bëibel faa ko toon wan bakama u Keesitu?

¹⁰ Wë sö nöö a dë ku wan sëmbë di ta bigi dini Jehovah. A ta lei soni a di sëmbë di ta lei ën soni u Bëibel, ma a sa lei soni a dee woto dinima u Jehovah tu. Andi sa heepi wan sëmbë gaanfa faa go a fesi a di biibi? Di soni di sa heepi ën gaanfa da te a nango a dee komakandi. Faandi mbei u taki sö? Wë a o lei möön hia soni a dee komakandi, di biibi fëën o ko möön taanga, söseei de o heepi ën faa ko möön lobi Gadu (Tjab. 15:30-32). Boiti di dë, di peleikima sa mbei di sëmbë di a ta lei soni u Bëibel, miti baaa ku sisa di bi miti dee seei soni kuma hën. Di sëmbë o si unfa baaa ku sisa u di kemeente ta lei taa de lobi deseei. Pakisei dee woto dee woo taki u de aki.

11. Andi ku andi wan sëmbë di ta lei soni u Bëibel sa ta si a di kemeente, nöö unfa dee soni dë sa heepi ën?

¹¹ Wan mujëë di ta lei soni u Bëibel, söseei di dë hën wanwan ta kiija dee mii fëën, miti wan sisa a di kemeente di ta kiija dee mii fëën hën wanwan. Di mujëë lobi unfa di sisa ta mbei taanga möiti faa ko a di Könuköndë zali ku dee mii fëën. Nasö wan womi di ta lei soni u Bëibel ta mbei möiti faa disa sumuku. Di womi aki miti wan baaa a di kemeente di bi ta sumuku tu ma a disa. Di baaa ta piki di womi taa möön a bi ta ko lobi Jehovah, möön a bi ta kë piki hën buka a soni (2 Kol. 7:1; Fil. 4:13). Baka te di baaa konda da di womi unfa a waka taa a disa di sumuku, nöö di baaa ta toona piki ën taa: „I seei sa disa sumuku tu o.” Di womi ta feni taanga, nöö a ta biibi taa hënseei sa disa sumuku tu. Wan njönku mujëë di ta lei soni u Bëibel, ta si unfa wan njönku sisa ta dë waiwai hii juu ta dini Jehovah, nöö a kë ko sabi unfa a waka taa di sisa sa ta dë waiwai sö.

12. Faandi mbei u sa taki taa hii sëmbë a di kemeente sa heepi sëmbë di ta lei soni u Bëibel?

¹² Te di sëmbë di ta lei soni u Bëibel ko sabi peipei peleikima, nöö dee peleikima o sa heepi ën ku di fasi fa de ta libi. De sa heepi ën faa ko fusutan andi a kë taki u du di soni di Keesitu piki u fuu du, di a bi taki taa u musu lobi Gadu ku woto sëmbë tuu (Joh. 13:35; 1 Tim. 4:12). Nöö kumafa u bi taki kaa, wan sëmbë di ta lei soni u Bëibel, sa lei soni a dee peleikima dee ta miti dee seei fuka kuma dee ta miti ën. Di sëmbë o ko si taa a o sa tooka soni nëën libi faa ko dë wan bakama u Keesitu (Deto. 30:11). Hii sëmbë a di kemeente sa da wan maun u heepi sëmbë di ta lei soni u Bëibel u de go a fesi a di biibi (Mat. 5:16). Andi i ta du u da dee sëmbë dee ta lei soni u Bëibel taanga, te de ko a dee komakandi?

13-14. Unfa Jesosi bi libi ku dee apösutu fëën di de bi lasi hati?

¹³ U kë heepi dee baaa ku dee sisa dee an ta peleiki möön, u de ta du di peleikiwooko baka, söseei u de ta heepi wotowan u de toon bakama u Keesitu. Di fasi fa Jesosi bi libi ku dee apösutu fëën di de bi lasi hati, ta lei u andi u sa du a di ten aki.

¹⁴ Kölö sö ufö de kii Jesosi, dee apösutu bi „paaja kule go disëën fiaa” (Maik. 14:50; Joh. 16:32). Andi Jesosi bi du a di pisiten di dee apösutu fëën bi lasi hati? Wë, di Gadu bi weki Jesosi ko a libi baka, hën Jesosi bi piki so u dee bakama fëën taa: „Wan fëëë e. Un go taki da dee otowan u mi taa [Gadu weki mi ko a libi baka]” (Mat. 28:10a). Jesosi an bi disa dee apösutu fëën. Hii fa de bi kule go disëën, tökuseei a bi kai de „dee otowan u mi”. Jesosi bi abi tjalihati u sëmbë, nöö a bi ta da de paadon.​—2 Kön. 13:23.

15. Unfa u ta si dee baaa ku dee sisa dee an ta du di peleikiwooko möön?

¹⁵ Leti kuma Jesosi, useei ta booko u hedi ku baaa ku sisa di an ta du di peleikiwooko möön. De da baaa ku sisa fuu, nöö u lobi de! Wa ta fëëkëtë dee wooko di dee baaa ku dee sisa aki bi du da Jehovah. So u de bi wooko sömëni jaa longi da Jehovah (Heb. 6:10). U ta hangi de seei! (Luk. 15:4-7) Unfa u sa lei taa u ta booko u hedi ku de, kumafa Jesosi bi ta booko hën hedi ku dee apösutu fëën?

16. Unfa u sa lei dee baaa ku dee sisa dee an ta du di peleikiwooko möön taa u ta booko u hedi ku de?

¹⁶ Kai de a wan suti fasi u de ko a dee komakandi. Wan fasi fa Jesosi bi da dee apösutu fëën taanga, da di a bi kai de u de ko a wan komakandi (Mat. 28:10b; 1 Kol. 15:6). A di ten aki, useei sa da dee baaa ku dee sisa dee an ta peleiki möön, taanga u de ta ko a dee komakandi baka. Kandë a o dë fuu kai de sömëni pasi ufö de ko. Jesosi bi musu u wai seei di dee bakama fëën bi ko a di komakandi.​—Luku Mateosi 28:16; Lukasi 15:6.

17. Andi u musu du te wan baaa nasö wan sisa di an ta peleiki möön ko a wan komakandi?

¹⁷ Lei taa i ta wai u si de. Di Jesosi bi miti ku dee bakama fëën, an bi wakiti u de ko fan ku ën, ma hën bi waka go fan ku de (Mat. 28:18). Andi woo du te wan baaa nasö wan sisa di an ta peleiki möön, ko dou a di Könuköndë zali? Wë u musu waka go fan ku ën, nöö u wai ku ën. Kandë bigibigi woo ta booko u hedi ku andi woo piki ën te u go fan ku ën. Ma söndö fuu mbei di sëmbë fii wan fasi, u sa piki ën unfa u ta wai tjika taa u si ën.

18. Unfa u sa da baaa ku sisa di an ta peleiki möön taanga?

¹⁸ Da de taanga. Kandë dee bakama u Jesosi bi ta si kuma de an bi o sa paaja di bunu buka a hii së u goonliba. Jesosi bi piki dee bakama fëën taa: „Mi o dë ku unu hiniwanten” (Mat. 28:20). Di soni dë bi heepi de u? Wë aai. An bi tei longi seei, hën dee bakama u Jesosi bi bigi ta „konda di Bunu Buka da lanti” hiniwan daka (Tjab. 5:42). Dee peleikima dee an ta peleiki möön, musu feni taanga tu. Kandë de o ta fëëë u de bigi du di peleikiwooko baka. Ma u sa mbei de dë seiki taa de an o ta du di peleikiwooko de wanwan. Te de kaba u de go a di peleikiwooko, nöö woo go makandi ku de. De o tei ën u bigi seei taa u ta heepi de u de sa peleiki baka. Te u ta lei de taa u ta si de kuma u baaa, nasö u sisa, nöö kandë de o kë bigi du di peleikiwooko baka. Di soni dë o mbei hii sëmbë a di kemeente wai.

19. Andi u kë du seei, nöö faandi mbei?

¹⁹ Un longi jeti u abi fuu heepi sëmbë u de ko toon bakama u Keesitu? Wë u te di kaba u di  goonliba aki dou (Mat. 28:20). Woo sa du di wooko aki u te di ten dë dou ö? Wë u dë kabakaba u du di wooko aki! Ku hii u hati u ta tei di ten fuu, di kaakiti fuu, ku di möni fuu, fuu sa feni dee sëmbë „dee a kai da u de feni di libi u teego” (Tjab. 13:48). Te u ta du di soni aki, nöö hën da u ta waka a Jesosi baka. Jesosi bi taki taa: „Di njanjan u mi, hën da te mi ta du dee soni di Sëmbë manda mi ko aki kë fu mi du, be di wooko fëën kaba” (Joh. 4:34, NW; 17:4). Di soni dë useei kë du tu. U kë du di wooko di Jesosi da u fuu du, u te a kaba (Joh. 20:21). U kë tu taa woto sëmbë, te kisi dee baaa ku dee sisa dee an ta peleiki möön, hoi dou a di wooko aki.​—Mat. 24:13.

20. Faandi mbei u sa taki taa u sa du di wooko di Jesosi da u fuu du u te a kaba, te u luku Filipi 4:13?

²⁰ A sa taanga da u fuu du di wooko di Jesosi da u fuu du. Ma wa ta du di wooko aki u wanwan. Jesosi bi paamusi u taa a o dë ku u. Te u ta heepi sëmbë u de ko toon bakama u Keesitu, nöö u ta wooko makandi ku Gadu. Nöö Jesosi seei ta dë ku u (1 Kol. 3:9; 2 Kol. 2:17). Dee soni aki mbei u sa du di wooko di Jesosi manda u fuu du, u te a kaba. A dë wan gaandi da u fuu du di wooko aki, söseei fuu heepi wotowan u de du ën tu. Nöö u ta wai seei u du di wooko!​—Lesi Filipi 4:13.