1. San Yesus taigi den disipel fu en fu du na Mateyus 28:18-20?

BAKA di Yesus kisi wan opobaka, a ben miti nanga den disipel fu en di ben kon makandra na Galilea. A ben abi wan prenspari sani fu taigi den. San na dati? Wi kan leisi san a taki na Mateyus 28:18-20.​—Leisi en.

2. Sortu aksi wi o luku?

² Den anbegiman fu Gado na ini a ten disi musu yepi sma tu fu tron disipel. Fu dati ede, wi o poti prakseri na dri aksi di abi fu du nanga a wroko disi di Yesus gi wi. (1) Boiti taki wi e leri sma san Bijbel e taki, sortu tra sani wi musu du? (2) Fa ala preikiman na ini a gemeente kan yepi Bijbelstudie fu go na fesi? (3) Fa wi kan yepi brada nanga sisa di no e preiki moro fu bigin preiki baka?

3. San Yesus taki dati wi musu du?

³ Yesus sori wi krin san wi musu du. Wi musu leri sma san a taki. Ma wi no musu frigiti wan prenspari sani. Yesus no taki: ’Leri den ala san mi taki.’ Ma a taki: Leri den „fu du ala san mi taigi unu fu du”. Fu man du disi, dan wi no musu leri sma nomo san Bijbel e taki, ma wi musu sori den tu fa fu du san den leri. Fu san ede wi musu du dati?

4. Gi wan eksempre di e sori fa wi kan leri wan Bijbelstudie fu du san Krestes taki.

 ⁴ Fa wi kan yepi sma fu du san Yesus taki? Luku na eksempre disi: Fa wan sma di e gi rijles e yepi wan sma fu hori ensrefi na den wet fu a verkeer? A fosi sani di a e du, na taki a e leri en san na den wet. Ma fu yepi a studenti fu gi yesi na den wet dati, a musu du ete wan sani. A musu rèi makandra nanga en na ini a verkeer fu leri en fa a musu hori ensrefi na den wet. San wi kan leri fu na eksempre disi?

5. (a) Soleki fa Yohanes 14:15 nanga 1 Yohanes 2:3 e sori, dan san wi musu leri den Bijbelstudie fu wi fu du? (b) Fa wi kan yepi wi Bijbelstudie fu du san Bijbel e taki?

⁵ Te wi e studeri Bijbel nanga sma, dan wi e leri den san Gado e aksi fu wi. Ma wi musu du moro. Wi musu yepi den fu du tu san den leri. (Leisi Yohanes 14:15; 1 Yohanes 2:3.) A bun eksempre fu wi kan sori den fa den kan du san Bijbel e taki na skoro, na wrokope noso te den abi prisiri. Wi kan fruteri den fa Bijbel rai yepi wi fu no du sani di ben o tyari takru bakapisi kon gi wi èn fa den yepi wi fu teki bun bosroiti. Te wi e studeri nanga den Bijbelstudie fu wi, wi kan begi Yehovah fu yepi den nanga en santa yeye.​—Yoh. 16:13.

6. San na wan fu den sani di wi musu leri trawan fu du?

⁶ San na wan fu den sani di wi musu leri trawan fu du? Wi musu yepi wi Bijbelstudie fu kisi na angri fu preiki. Son Bijbelstudie e frede fu go na ini a preikiwroko. Dati meki wi musu abi pasensi nanga den te wi e yepi den fu frustan Bijbel moro bun èn te wi e yepi den fu abi wan tranga bribi. Te fu kaba den sani di den e leri o naki den ati èn den o kisi na angri fu preiki. San na wan tu sani di wi kan du fu yepi den Bijbelstudie fu wi fu kisi na angri fu preiki a bun nyunsu?

7. Fa wi kan yepi wan Bijbelstudie fu kisi na angri fu preiki a bun nyunsu gi tra sma?

⁷ Wi kan aksi wi Bijbelstudie den sortu aksi disi: „Fa yu libi kenki di yu bigin studeri Bijbel? Yu feni taki tra sma musu yere a bun nyunsu? Fa yu kan yepi den?” (Odo 3:27; Mat. 9:37, 38) Sori a Bijbelstudie den traktaat di wi e gebroiki na ini a preikiwroko èn meki a luku sortuwan fu den traktaat den famiriman fu en, den mati fu en noso den sma na wrokope ben o lobi. Gi a Bijbelstudie wan tu fu den traktaat disi. Oefen nanga en fa a kan taki na wan switi fasi nanga wan sma fu wan fu den traktaat. Te a Bijbelstudie tron wan preikiman di no dopu ete, dan wi musu du a preikiwroko makandra nanga en.​—Preik. 4:9, 10; Luk. 6:40.

8. Fu san ede den Bijbelstudie fu wi musu kon abi moro lobi gi Gado èn gi tra sma? (Luku a faki tu „ Fa wi kan yepi wi Bijbelstudie fu kon abi moro lobi gi Gado?”)

⁸ Hori na prakseri taki Yesus taigi wi fu leri trawan „fu du ala san” a taigi wi fu du. Dati wani taki dati den musu leri fu gi yesi na den tu moro bigi komando. Wi musu lobi Gado èn wi musu lobi tra sma (Mat. 22:37-39). Efu wi e yepi a Bijbelstudie fu wi fu gi yesi na den tu komando disi, dan dati o yepi en fu preiki. Fu san ede? Efu a lobi Gado  nanga tra sma trutru, dan a o wani preiki. Kande son Bijbelstudie e frede fu bigin preiki. Ma wi kan sori den taki safrisafri Yehovah o yepi den fu no frede moro fu preiki gi sma (Ps. 18:1-3; Odo 29:25). A faki na ini na artikel disi e sori sortu sani wi kan du fu yepi wi Bijbelstudie fu kon abi moro lobi gi Gado. Ma san a gemeente kan du fu yepi nyun disipel fu kon abi moro lobi gi Yehovah èn gi tra sma?

9. Na sortu fasi wan sma di e leri rèi wagi kan leri prenspari sani?

⁹ Prakseri na agersitori baka fu a sma di e leri rèi wagi. Te a e rèi na ini a verkeer makandra nanga en leriman, dan na sortu fasi a e teki leri? A musu arki en leriman èn a musu luku san tra sma di e rèi bun na ini a verkeer e du. Fu eksempre, a leriman kan sori en fa wan sma na ini wan tra wagi e sori switifasi fu di a e meki wan sma koti na en fesi. Noso a leriman kan sori en fa wan tra sma e dim den faya fu en so taki a no breni den tra sma na tapu a pasi. Den sortu eksempre disi kan leri a studenti prenspari sani di ensrefi kan du bakaten.

10. San o yepi wan Bijbelstudie fu go na fesi?

¹⁰ Na so a de tu taki wan Bijbelstudie di bigin dini Yehovah no e leri soso fu a sma di studeri nanga en, ma a kan leri tu fu na eksempre fu tra anbegiman fu Yehovah. Sobun, san o yepi den Bijbelstudie fu go na fesi moro esi? Dati na te den e kon na den konmakandra. Fa so? Te den o kon na den konmakandra, dan den o leri moro sani, den bribi o kon moro tranga èn a lobi di den abi gi Gado o kon moro tranga (Tori 15:30-32). Boiti dati, a sma di e studeri nanga en kan meki a kon sabi brada nanga sisa di miti den srefi sani leki en. Fa na eksempre fu brada nanga sisa kan yepi a Bijbelstudie? Wi o luku wan tu eksempre.

11. San wan Bijbelstudie kan si te a e kon na den konmakandra èn fa disi kan yepi en fu go na fesi?

¹¹ Kon meki wi taki dati wan uma di e studeri musu sorgu en pikin en wawan. Te a e kon na den konmakandra, dan a e si wan sisa di de na ini a srefi situwâsi leki en. A e naki en ati te a e si o furu muiti a sisa disi e meki fu tyari den yongu pikin fu en kon na a Kownukondre zaal. Wan tra Bijbelstudie di abi muiti fu tapu nanga smoko e kon sabi wan brada di ben abi a problema disi fosi. A brada e fruteri en taki a ben man gi yesi na den wet fu Yehovah fu di a ben kon abi moro lobi gi en (2 Kor. 7:1; Fil. 4:13). Baka te a brada fruteri a Bijbelstudie fa a tapu nanga smoko, a e taki: „Yu o man du en tu.” Disi e gi a Bijbelstudie deki-ati èn a e bribi taki a o man tapu nanga smoko. Luku wan tra eksempre. Wan yongu uma di e studeri Bijbel e si fa wan yongu sisa e dini Yehovah nanga prisiri. Te a Bijbelstudie e si o koloku a sisa disi de, dan a wani kon sabi fu san ede a sisa de so.

12. Fu san ede wi kan taki dati ibri sma na ini a gemeente kan yepi den Bijbelstudie fu go na fesi?

¹² Te den Bijbelstudie e kon sabi difrenti brada nanga sisa, dan na eksempre fu den kan leri den fa den kan sori lobi gi Gado èn gi tra sma (Yoh. 13:35; 1 Tim. 4:12). Soleki fa wi si kaba, dan a Bijbelstudie kan leri fu preikiman di  abi den srefi problema leki en. Den eksempre disi o sori en taki a o man tyari den kenki kon di de fanowdu fu tron wan disipel fu Krestes (Deut. 30:11). Ibri sma na ini a gemeente kan yepi den Bijbelstudie fu go na fesi (Mat. 5:16). San yu e du fu gi den Bijbelstudie di e kon na den konmakandra deki-ati?

13-14. San Yesus du di den apostel fu en ben lasi-ati?

¹³ Wi wani yepi wi brada nanga sisa di no e preiki moro fu preiki baka èn fu meki disipel. A fasi fa Yesus yepi den apostel fu en di ben brokosaka e sori san wi kan du.

¹⁴ Syatu fosi sma kiri Yesus, den apostel fu en „lon gowe libi en” (Mark. 14:50; Yoh. 16:32). San Yesus du di den apostel fu en ben lasi-ati? Syatu baka di a kisi wan opobaka, a taigi wan tu fu den disipel fu en: „No frede! Un go fruteri den brada fu mi [taki mi kisi wan opobaka]” (Mat. 28:10a). Yesus ben frutrow den apostel fu en ete. Aladi den ben gowe libi en, toku a kari den „brada”. Neleki Yehovah, Yesus ben de klariklari fu gi den pardon.​—2 Kow. 13:23.

15. Fa wi e denki fu den brada nanga sisa di no e preiki moro?

¹⁵ Wi e broko wi ede tu nanga den wan di no e preiki moro. Den na wi brada nanga sisa èn wi lobi den! Wi no frigiti o tranga den wroko gi Yehovah. Sonwan fu den wroko tranga furu yari langa (Hebr. 6:10). Wi e misi den! (Luk. 15:4-7) Fa wi kan sori taki wi e broko wi ede nanga den, neleki Yesus?

16. Fa wi kan sori taki wi e broko wi ede nanga den brada nanga sisa di no e preiki moro?

¹⁶ Aksi den na wan switi fasi fu kon na den konmakandra. Wan fasi fa Yesus gi den apostel fu en deki-ati, na taki a kari den kon na wan konmakandra (Mat. 28:10b; 1 Kor. 15:6). Wi srefi kan aksi brada nanga sisa di no e preiki moro fu kon na den konmakandra efu den no e du dati ete. Kande wi o abi fu aksi den moro leki wán leisi fosi den kon. Te den kon, dan wi o breiti fu si den neleki fa Yesus ben breiti di den disipel ben teki a kari fu en fu kon na a konmakandra.​—Luku Mateyus 28:16 nanga Lukas 15:6.

17. San wi musu du te wan brada noso sisa di no e preiki moro kon na wan konmakandra?

¹⁷ Sori switifasi gi den. Yesus ben sori switifasi gi den disipel fu en di a ben kon makandra nanga den. En fosi bigin taki nanga den (Mat. 28:18). San wi o du te wan brada noso sisa di no e preiki moro kon na a Kownukondre zaal? Wi kan go na en fu gi en wan switikon. Kande na ini a bigin wi no sabi san fu taki. Ma sondro fu meki a firi syen, wi kan taigi en fa wi breiti fu si en.

18. Fa wi kan gi den wan di no e preiki moro deki-ati?

¹⁸ Gi den deki-ati. Kande den disipel fu Yesus ben denki taki den no ben o man preiki a bun nyunsu na heri grontapu. Yesus gi den disipel fu en deki-ati di a taki: „Mi o de nanga unu ala dei” (Mat. 28:20). A sani disi yepi den disipel? Iya. Fosi yu denki, den bigin ’gi sma leri èn den ben e fruteri sma a bun  nyunsu’ fayafaya (Tori 5:42). Den brada nanga sisa di no e preiki moro abi deki-ati fanowdu tu. Kande den e frede fu bigin preiki baka. Wi kan sori den taki den no o abi fu du en den wawan. Te den bigin preiki baka, dan wi o wroko makandra nanga den. A no de fu taki dati den o breiti nanga a yepi fu wi. Te wi e sori den wan di no e preiki moro taki wi e si den leki wi brada nanga sisa, dan dati kan gi den deki-ati fu bigin du a preikiwroko baka. Disi o meki taki a heri gemeente o prisiri.

19. San wi wani du èn fu san ede?

¹⁹ O langa wi o abi fu du a preikiwroko ete? Wi o abi fu du en te na a kaba fu grontapu (Mat. 28:20). Wi o man klari a wroko disi? Seiker wi o meki muiti fu du dati! Wi de klariklari fu gebroiki wi ten, wi krakti nanga wi moni fu suku den sma di abi „a yoisti denki fu man kisi têgo libi” (Tori 13:48). Te wi e du disi, dan wi e teki na eksempre fu Yesus. A ben taki: „Mi nyanyan na fu du a wani fu a sma di seni mi kon èn fu klari a wroko fu en” (Yoh. 4:34; 17:4). Na dati wi wani du tu. Wi wani klari a wroko di Yesus gi wi (Yoh. 20:21). Èn wi wani yepi trawan, soleki den brada nanga sisa di no e preiki moro, fu tan du a wroko disi makandra nanga wi.​—Mat. 24:13.

20. Soleki fa Filipisma 4:13 e sori, dan fu san ede wi o man klari a wroko di Yesus gi wi fu du?

²⁰ A no makriki fu du a wroko di Yesus gi wi. Ma wi no e du a wroko disi wi wawan. Yesus pramisi wi taki a o de nanga wi. Boiti dati, „wi e wroko makandra nanga Gado” (1 Kor. 3:9). Dati meki wi man klari a wroko disi. A de wan bigi grani fu du a wroko disi èn fu yepi tra sma fu du en tu.​—Leisi Filipisma 4:13.