1. Tuir Mateus 28:18-20, Jesus haruka dixípulu sira atu halo saida?

DEPOIS Jesus moris-hiʼas, nia mosu ba ninia dixípulu sira neʼebé halibur hamutuk iha Galileia. Nia fó-hatene buat importante ida ba sira. Saida mak neʼe? Ita bele haree ida-neʼe iha Mateus 28:18-20.​—Lee.

2. Ita sei koʼalia kona-ba pergunta saida deʼit?

² Ohin loron Maromak nia atan ida-idak mós presiza halo tuir Jesus nia mandamentu atu hanorin ema sai dixípulu. Tan neʼe, mai ita koʼalia kona-ba pergunta tolu neʼebé liga ho knaar neʼe. Primeiru, saida mak ita presiza halo bainhira hanorin Maromak nia ukun-fuan ba dixípulu foun sira? Segundu, oinsá mak haklaken-naʼin hotu iha kongregasaun bele ajuda estudante Bíblia atu laʼo ba oin? Terseiru, oinsá mak ita bele ajuda ema neʼebé la ativu ona atu hola parte fali iha serbisu atu hanorin ema sai dixípulu?

3. Jesus fó matadalan espesífiku saida ba ninia dixípulu sira?

³ Jesus nia mandamentu neʼe klaru tebes. Ita presiza hanorin ema kona-ba buat neʼebé nia hanorin. Maibé, ita labele haluha buat importante ida. Jesus la dehan: ‘Hanorin sira mandamentu hotu neʼebé haʼu fó ona ba imi.’ Maibé, nia dehan: “Hanorin sira atu halo tuir mandamentu hotu neʼebé haʼu fó ona ba imi.” Atu halo nuneʼe, ita presiza hanorin estudante kona-ba saida mak nia presiza halo no oinsá atu halo ida-neʼe. (Após 8:31) Tanbasá?

4. Halo tuir mandamentu signifika saida? Fó toʼok ezemplu.

⁴ Oinsá mak ita bele hanorin ema atu halo tuir Jesus nia mandamentu hotu? Hanoin toʼok ezemplu tuirmai. Oinsá  atu hanorin ema seluk lori karreta no halo tuir lei tránzitu nian? Ema neʼebé hanorin presiza esplika uluk kona-ba lei tránzitu nian. Maibé, atu bele hanorin kona-ba halo tuir lei tránzitu, ema neʼebé hanorin presiza halo buat seluk tan. Nia presiza akompaña no dirije ema neʼebé aprende atu lori karreta. Hodi halo nuneʼe, nia bele ajuda ema neʼebé lori karreta atu halo tuir lei tránzitu nian. Saida mak ita bele aprende husi ezemplu neʼe?

5. (a) Tuir João 14:15 no 1 João 2:3, ita presiza hanorin ita-nia estudante Bíblia atu halo saida? (b) Oinsá ita bele ajuda ita-nia estudante atu aplika Bíblia nia prinsípiu?

⁵ Bainhira estuda Bíblia ho ema, ita hanorin sira kona-ba saida mak Maromak hakarak sira atu halo. Maibé ita presiza halo buat seluk tan. Ita presiza hanorin sira atu aplika buat neʼebé sira aprende. (Lee João 14:15; 1 João 2:3.) Liuhusi ita-nia ezemplu, ita bele hatudu ba ita-nia estudante oinsá sira bele aplika Bíblia nia prinsípiu iha eskola, serbisu-fatin, ka durante tempu halimar. Ita bele konta ita-nia esperiénsia rasik atu hatudu oinsá aplika Bíblia nia matadalan proteje ita husi perigu ka oinsá ida-neʼe ajuda ita halo desizaun matenek. Bainhira halo orasaun hamutuk ho ita-nia estudante, husu Jeová atu haraik ninia espíritu santu hodi dirije ita-nia estudante.​—João 16:13.

6. Hanorin ema atu halo tuir Jesus nia mandamentu hotu envolve saida deʼit?

⁶ Hanorin ema atu halo tuir Jesus nia mandamentu hotu envolve saida deʼit? Ita presiza ajuda ita-nia estudante atu haburas hakarak atu hanorin ema sai dixípulu. Estudante balu taʼuk atu haklaken husi uma ba uma. Tan neʼe ita presiza hatudu pasiénsia bainhira ita hanorin sira atu bele komprende didiʼak Bíblia, book sira-nia laran, no book sira atu bá haklaken. Saida mak ita bele halo atu ajuda estudante haburas hakarak atu haklaken?

7. Oinsá mak ita bele ajuda estudante atu haburas hakarak atu haklaken?

⁷ Ita bele husu ba ita-nia estudante pergunta sira tuirmai: “Oinsá mak aplika Bíblia nia hanorin halo Ita-nia moris sai diʼak liu? Tuir Ita-nia hanoin, ema seluk mós presiza rona mensajen neʼe ka lae? Oinsá Ita bele ajuda sira?” (Prov 3:27; Mt 9:37, 38) Hatudu ba ita-nia estudante panfletu sira husi Ekipamentu Hanorin nian no husu nia hili panfletu neʼebé karik ninia família, belun, ka kolega serbisu sei gosta. Fó panfletu sira-neʼe balu ba ita-nia estudante. Pratika hamutuk kona-ba oinsá atu fahe panfletu neʼe iha dalan neʼebé hatudu respeitu. Klaru katak, bainhira kongregasaun fó lisensa ba ita-nia estudante atu sai haklaken-naʼin neʼebé seidauk hetan batizmu, ita presiza akompaña nia atu bele dirije nia.​—Ecle 4:9, 10; Lc 6:40.

8. Tanbasá importante ba ita-nia estudante atu haburas domin ba Maromak no ema? (Haree mós kaixa “ Oinsá hametin estudante Bíblia nia domin ba Maromak?”)

⁸ Hanoin-hetan katak Jesus haruka ita atu hanorin ema atu halo tuir mandamentu hotu neʼebé nia fó ona ba ita. Neʼe inklui mandamentu rua neʼebé boot liu, neʼe mak hadomi Maromak no mós hadomi ema seluk. Mandamentu rua neʼe iha ligasaun metin ho serbisu haklaken no hanorin ema sai dixípulu. (Mt 22:37-39) Oinsá? Domin ba Maromak no ba ema seluk mak razaun importante tanbasá ita  haklaken. Ita komprende katak estudante balu sente susar atu haklaken tanba taʼuk. Maibé ita bele fó-hatene ba ita-nia estudante katak ho Jeová nia ajuda neineik-neineik sira bele manán sira-nia sentimentu taʼuk ba ema. (Sal 18:1-3; Prov 29:25) Kaixa iha lisaun neʼe fó sai kona-ba hakat sira neʼebé ita bele halo atu ajuda ita-nia estudante haburas ninia domin ba Maromak. Maibé, oinsá mak kongregasaun bele ajuda dixípulu foun atu hatudu domin ba Jeová no ema seluk?

9. Tuir ezemplu neʼe, oinsá mak ema neʼebé aprende karreta bele aprende lisaun importante?

⁹ Hanoin fali ezemplu kona-ba ema neʼebé aprende atu lori karreta. Bainhira nia lori karreta hamutuk ho ema neʼebé hanorin nia, oinsá mak nia bele aprende lisaun importante? Nia bele aprende liuhusi rona didiʼak ba ema neʼebé hanorin nia no mós haree xofér sira seluk neʼebé lori karreta ho kuidadu. Porezemplu, karik ema neʼebé hanorin nia bele hatudu ba nia kona-ba xofér seluk neʼebé laran-diʼak hodi husik karreta seluk tama uluk. Ka xofér neʼebé la hiʼit lampu aas toʼo halo xofér seluk labele haree ho moos. Ezemplu sira-neʼe hanorin nia kona-ba lisaun importante neʼebé nia bele aplika bainhira nia rasik lori karreta.

10. Saida mak sei ajuda estudante Bíblia atu laʼo ba oin?

¹⁰ Nuneʼe mós ho estudante Bíblia neʼebé komesa ona atu serbí Jeová. Nia la aprende deʼit husi ninia mestre maibé mós husi Jeová nia atan sira seluk nia ezemplu diʼak. Tan neʼe, saida mak sei ajuda estudante Bíblia atu laʼo ba oin? Tuir reuniaun sira. Tanbasá? Hanorin neʼebé sira rona iha reuniaun neʼebé bazeia ba Bíblia sei aumenta sira-nia koñesimentu, hametin sira-nia fiar, no ajuda sira atu haburas domin ba Maromak. (Após 15:30-32) No mós, iha reuniaun, mestre Bíblia bele fó koñese ninia estudante ba irmaun-irmán sira neʼebé karik tahan susar hanesan ho estudante neʼe. Oinsá mak irmaun-irmán sira-nia ezemplu bele ajuda estudante? Haree toʼok ezemplu balu tuirmai.

11. Estudante bele haree ezemplu saida deʼit iha kongregasaun? Oinsá neʼe bele book nia?

¹¹ Estudante Bíblia neʼebé haboot oan mesak bele haree ezemplu husi irmán seluk neʼebé mós hasoru situasaun hanesan. Estudante neʼe sei hetan anima bainhira nia haree oinsá irmán neʼe hakaʼas an atu tuir reuniaun hamutuk ho ninia oan neʼebé kiʼik. Ka estudante neʼebé sente susar atu para fuma, karik bele hasoru irmaun neʼebé mós uluk sente susar atu para fuma, maibé ikusmai konsege para. Irmaun neʼe konta ba estudante neʼe katak bainhira ninia domin ba Jeová sai boot liután, neʼe book nia atu halo tuir Maromak nia mandamentu. (2 Kor 7:1; Flp 4:13) Bainhira rona tiha irmaun neʼe nia esperiénsia, karik neʼe sei halo estudante neʼe fiar irmaun neʼe nia liafuan: “Ita mós bele para fuma.” Ka feto joven neʼebé estuda Bíblia bele haree irmán joven neʼebé kontente tebes hodi moris nuʼudar Testemuña ida. Buat neʼebé estudante neʼe haree book nia atu hakarak buka-hatene tanbasá mak irmán joven neʼe sempre kontente.

12. Tanbasá ema ida-idak iha kongregasaun bele ajuda estudante laʼo ba oin?

¹² Diʼak ba estudante Bíblia atu koñese irmaun-irmán oioin neʼebé laran-metin. Estudante bele aprende husi sira-nia ezemplu kona-ba oinsá halo tuir Kristu  nia mandamentu atu hadomi Maromak no ema seluk. (João 13:35; 1 Tim 4:12) Liután neʼe, hanesan fó sai ona ohin, estudante Bíblia bele aprende husi irmaun-irmán neʼebé hasoru susar hanesan ho ninian. Estudante mós bele aprende katak nia bele konsege halo mudansa hodi sai Kristu nia dixípulu. (Deut 30:11) Ema ida-idak iha kongregasaun bele ajuda estudante Bíblia laʼo ba oin. (Mt 5:16) Ita rasik halo ona saida atu anima estudante neʼebé tuir ona reuniaun?

13-14. Jesus halo saida bainhira dixípulu sira sente laran-kraik?

¹³ Ita hakarak ajuda irmaun-irmán neʼebé la ativu ona atu halo tuir fali Kristu nia mandamentu atu hanorin ema sai dixípulu. Buat neʼebé Jesus halo bainhira dixípulu sira sente laran-kraik bele ajuda ita hatene saida mak ita presiza halo.

¹⁴ Lakleur antes Jesus mate, apóstolu “hotu halai husik hela nia”. (Mc 14:50; João 16:32) Saida mak Jesus halo bainhira ninia dixípulu sira sai fraku? Lakleur depois nia moris-hiʼas, nia hatete ba ninia dixípulu sira: “Keta taʼuk! Bá fó-hatene haʼu-nia maun-alin sira [katak haʼu moris-hiʼas ona].” (Mt 28:10a, nota) Jesus la husik ninia apóstolu sira. Maski sira husik hela nia, maibé nia nafatin bolu sira maun-alin. Hanesan Jeová, Jesus mós hatudu laran-sadiʼa no fó perdua.​—2 Reis 13:23.

15. Ita sente oinsá kona-ba irmaun-irmán sira neʼebé la ativu ona?

¹⁵ Ita mós hanoin tebes irmaun-irmán sira neʼebé para ona atu haklaken. Sira mak ita-nia irmaun-irmán, no ita hadomi sira. Ita sei hanoin-hetan sira-nia domin no serbisu makaʼas iha tempu uluk, karik ba tinan barak. (Ebr 6:10) Ita hanoin tebes sira! (Lc 15:4-7) Hodi banati-tuir Jesus, oinsá mak ita bele hatudu katak ita hanoin sira?

16. Oinsá mak ita bele hatudu katak ita hanoin irmaun-irmán sira neʼebé la ativu ona?

¹⁶ Ho laran-diʼak konvida sira atu tuir reuniaun. Dalan ida Jesus anima apóstolu sira neʼebé laran-kraik mak liuhusi konvida sira ba reuniaun ida. (Mt 28:10b; 1 Kor 15:6) Nuneʼe mós ohin loron, ita bele anima irmaun-irmán neʼebé la ativu ona atu tuir reuniaun se sira seidauk halo nuneʼe. Ita komprende katak karik ita presiza konvida sira dala barak antes sira hakarak tuir. Klaru katak Jesus kontente tebes bainhira dixípulu sira simu ninia konvite no ita mós bele sente hanesan neʼe.​—Kompara ho Mateus 28:16 no Lucas 15:6.

17. Saida mak ita sei halo bainhira ema neʼebé la ativu ona tuir reuniaun?

¹⁷ Fó benvindu husi laran. Jesus halo ninia dixípulu sira sente kmaan bainhira sira hasoru nia; nia iha inisiativu atu koʼalia ho sira. (Mt 28:18) Ita sei halo saida bainhira ema neʼebé la ativu mai tuir reuniaun? Ita presiza iha inisiativu atu fó benvindu ba nia husi laran. Foufoun, karik ita hanoin barak tanba ita la hatene atu koʼalia saida. Atu nia la sente moe, karik ita bele dehan deʼit katak ita kontente tebes atu haree nia.

18. Oinsá mak ita anima irmaun-irmán neʼebé la ativu ona?

¹⁸ Anima sira. Jesus nia dixípulu sira karik sente katak sira la iha kbiit atu haklaken iha mundu tomak. Jesus anima sira hodi dehan: “Haʼu sei hamutuk nafatin ho imi.” (Mt 28:20) Neʼe ajuda dixípulu sira ka lae? Sin. Depois neʼe, sira sai okupadu atu “hanorin no haklaken liafuan  diʼak”. (Após 5:42) Haklaken-naʼin neʼebé la ativu ona presiza mós hetan anima. Karik sira sente katak sira la iha kbiit atu haklaken fali. Ita bele fó konfiansa ba sira katak sira la presiza haklaken mesak. Kuandu sira prontu, ita bele akompaña sira atu haklaken. Sira sei hafolin duni ita-nia apoia bainhira sira komesa fali haklaken. Bainhira ita hatudu domin ba ema neʼebé la ativu ona no haree sira nuʼudar irmaun-irmán, karik sira sei ativu fali, no neʼe sei halo kongregasaun tomak haksolok.

19. Ita hakarak atu halo saida, no tanbasá?

¹⁹ Ita presiza hanorin ema sai dixípulu toʼo bainhira? Ita presiza halo nuneʼe toʼo sistema neʼe remata. (Mt 28:20; haree Glosáriu, “Sistema neʼe nia rohan”.) Ita bele kontinua halo tuir Jesus nia mandamentu neʼe toʼo sistema neʼe remata ka lae? Ita hakarak duni atu halo nuneʼe. Ita kontente atu uza ita-nia tempu, forsa no rikusoin atu buka-hetan “ema hotu neʼebé prontu atu simu lia-loos neʼebé lori ba moris rohan-laek”. (Após 13:48) Bainhira ita halo nuneʼe, ita halo tuir Jesus nia ezemplu. Nia hatete: “Haʼu-nia ai-han mak atu halo tuir Ida neʼebé haruka haʼu mai nia hakarak no atu halo hotu ninia serbisu.” (João 4:34; 17:4) Ita mós sente hanesan neʼe. Ita hakarak atu halo hotu serbisu neʼebé Jesus fó ona mai ita. (João 20:21) No ita hakarak ema seluk, inklui ema neʼebé la ativu ona, atu kontinua halo serbisu neʼe hamutuk ho ita.—Mt 24:13.

20. Tuir Filipe 4:13, tanbasá mak ita bele duni kumpre serbisu neʼebé Jesus haruka ita atu halo?

²⁰ La fasil atu halo tuir Jesus nia mandamentu neʼe. Maibé, ita la halo serbisu neʼe mesak. Jesus promete katak nia hamutuk ho ita. Bainhira ita hanorin ema sai dixípulu, ita mak “Maromak nia maluk serbisu-naʼin” no “hamutuk ho Kristu”, entaun Jeová no Jesus ajuda ita atu halo serbisu neʼe. (1 Kor 3:9; 2 Kor 2:17) Tan neʼe, ita bele kumpre serbisu neʼe. Ita iha duni priviléjiu atu kumpre ita-nia knaar neʼe no ajuda ema seluk atu halo nuneʼe.—Lee Filipe 4:13.