1. Ino ty lily nimey i Jesosy o mpiana’eo, arake ty Matio 28:18-20?

NISY raha lahibey nitea i Jesosy ho rehafegne tamo o mpiana’eo, tafara ty namelomagne aze tamy ty mate. Niseho tamy iareo areke reke, tamy iareo nivory ta Galilia agney. Trea amy Matio 28:18-20 ao ty raha nirehafe i Jesosy tamy iareo.​—Vakio.

2. Ino iaby ty fagnonteneagne hodinehentikagne ato?

² Mbe mihatse amy ty mpanompo i Jehovah amy izao ka i lily nimey i Jesosy i mpiana reỳ. Izay ty mahavy antika mila mandineke ty fagnonteneagne telo retoagne satria mifandrambe amo o lily i Jesosy iohoe. Voaloha’e, inogne ka ty raha toko’e hataontikagne ankoatse tihoe mampianatse o ndatio ty raha takén’Andrianagnahare amantika? Faharoe, inogne ty toko’e hatao ty mpitory agnivo fiangonagne eo mba hagnampeagne o mpianatse Baibolio handroso ara-pagnahy? Fahatelo, akore ty azontikagne agnampeagne i rahalahy naho rahavave fa tsy mitory sasa rey mba handrambe anjara indraike amy ty asa fanoagne mpianatse?

3. Ino ka ty raha mila ataontikagne naho fa mampianatse Baiboly, naho henteagne i lily nimey i Jesosỳ?

³ Mazava soa i toromareke nimey i Jesosỳ. Tsy maintsy ampianarentikagne o ndatio ty raha nandilia i Jesosy antika. Faie tsy toko’e ho halignontika ka fa misy raha lahibey nirehafe’e trea amo o lily iohoe. Tsy nirehake ty Jesosy tie: “Ampianaro iareo ze raha nandiliako anareo.” Fa hoe reke: “Ampianaro iareo mba hagnorike ze raha nandiliako anareo.” Naho fa itika areke mampianatse Baiboly, le tsy ampe avao ty mampianatse iareo ty lily i Jesosy fa mila atorontika iareo ka tie akore ty fomba hagnoriha’e ty raha ianara’e. (Asa. 8:31) Ino ty anto’e?

4. Hazavao amy ty ohatse tie akore ty hampianarantikagne o mpianatse Baibolio hagnorike ty lily i Jesosy.

 ⁴ Inogne ty raha mila ataontika mba hampianaragne o mpianatse Baibolio hagnorike ty raha nandilia i Jesosy? Hagnampe antika hahatrea izay ty ohatse raike toy. Inogne zao ty raha mila atao ty ndaty raike naho te hampianatse ty hafa hahay hinday tobile reke? Mila ampianare’e ty fitsipike naho ty lalàna miomba ty findesagne o tobileo i ndatỳ. Faie tsy ampe zay. Naho fa minday tobile i ndaty ampianare’ey, le mila miarake ama’e ka reke sady manoro aze ty fomba hagnorihagne i fitsipike naho i lalàna nampianara’e azey. Inogne ty ianarantika boake amy izay?

5. a) Ino ty raha mila ampianarentikagne o mpianantika Baibolio, arake ty Jaona 14:15; 1 Jaona 2:3? b) Inogne ohatse ty raha azontika atoro iareo?

⁵ Naho fa mampianatse Baiboly tika, le tsy ampe avao ty mampianatse o ndatio ty raha takén’Andrianagnahare amantika. Mila ampianarentika iareo ka tie akore ty fomba hampihara iareo amy ty fiaigna’e ty raha ianara iareo. (Vakio ty Jaona 14:15; 1 Jaona 2:3.) Azontikagne atao ohatse ty manoro iareo tie, akore ty hampiharagne ty toro lala ty Baiboly naho fa an-dakilasy agne, am-piasagne agne, ndra naho fa mihisa. Azontika tantaraegne amy iareo ka ty raha niaignantika, amy izay ho trea iareo fa miaro naho magnampe antika handrambe fanampaha-kevetse soa ty fagnorihagne ty toro lala ty Baiboly. Naho fa mivavake agnatreha i mpianatse rey eo ka tika, le azontika atao ty mangatake amy i Jehovah mba hagnomeza’e iareo fagnahy masigne. Ty anto’e, magnampe iareo hagnorike ty raha ianara iareo io.​—Jaona 16:13.

6. Ino ka ty tafilitse amy tihoe mampianatse ty hafa mba hagnorike ty lily i Jesosy?

⁶ Inogne ka ty tafilitse amy tihoe mampianatse ty hafa mba hagnorike ty lily i Jesosy? Mila ampeantikagne o mpianantika Baibolio mba hampitombo ty fagniria iareo handrambe anjara amy ty asa fampianaragne. Ty anto’e, tena mampatahotse ty mpianatse Baiboly ila’e ze o hitory zao. Mila ampeantikagne areke iareo mba hahatakatse soa ty hamarenagne amy Baiboly ao, amy izay matanjake ty finoa iareo, sady ho tohigne ka ty fo iareo. Mitake faharetagne zay. Faie ino ty ho voka’e naho manao izay tika? Ho tapa-kevetse ty hitory avao iareo amy ty fara’e. Ino ka ty azontika atao mba hagnampeagne iareo hampitombo ty fagniria’e hitory?

7. Akore ty hagnampeantika o mpianatse Baibolio mba hagniry hitory amy ty hafa?

⁷ Azontika atao ka ty magnontane o mpianatse Baibolio hoe izao: “Tsapa’o vao tie nihasoa ty fiaigna’o naho fa nampihatse ty raha ianara’o amy Baiboly ao rehe? Naho ty heve’o, mila maharey i raha ianara’ò ka vao ty ndaty hafa? Ino ty azo’o atao mba hagnampeagne iareo?” (Ohab. 3:27; Mat. 9:37, 38) Atorò i mpianatsey o taratasy milimpy agnisa ty Fitaovagne Fampianaragneo, le ampijobogno aze ze hita’e fa va’e hahaliagne ty longo’e naho ty nama’e ndra ty mpiara-miasa ama’e. Le meo maromaro amy i taratasy milimpy igne reke. Sare anò’areo ka ty fomba fanoloragne aze. Atorò aze fa toko’e ho soa fagnahy reke naho fa manolotse aze. Mila miarake mitory ama’e mateteke ka rehe naho fa agne ty fotoagne ahafenoa’e fepetse ho mpitory.​—Mpito. 4:9, 10; Lioka 6:40.

8. Nagnino o mpianatse Baibolio ro tena mila mampitombo ty hatea’e i Jehovah naho o ndatio? (Henteo ty efajoro tihoe “ Ampeo o Mpianatse Baibolio mba ho Tena Tea i Jehovah?”)

⁸ Misy raha mila marehentikagne ka ty amy i lily nimey i Jesosy antikagney. Hoe reke: “Ampianaro iareo mba ‘hagnorike ze raha’ nandiliako anareo.” Tafilitse amy ‘ze raha nandilia’ i Jesosy iohoe i lily fara’e lahibey roe manao tihoey tie: ‘Teao ty Jehovah naho ty nama’o.’  (Mat. 22:37-39) Ino ty ifandrambesa o lily rehoe amy ty asa fitoriagne naho fampianaragne? Hatea. Satria ty hatea ty ndaty raike an’Andrianagnahare naho o ndatio ty hahavy aze hagniry hitory. Matahotse ty mpianatse Baiboly ila’e naho vaho mieretseretse ty hitory zao. Faie toko’e homeintika toky iareo tie ho vita iareo ty handrese ze tahotse ndaty zay naho fa ampea i Jehovah iareo. (Sal. 18:1-3; Ohab. 29:25) Akore areke ty hahavy iareo ho tena tea i Jehovah? Misy dingagne telo mila atao iareo. Trea amy i efajoro amy ty lahatsoratse toỳ zay, le azontika atao ty magnampe iareo mba hanao ireo. Inogne ka ty azo o fiangonagneo atao mba hagnampeagne o mpianatse Baibolio hagnorike ty raha ianara’e?

9. Ino ka ty mila atao ty ndaty raike mianatse hinday tobile mba hahafantara’e ty raha toko’e hatao’e naho fa minday tobile reke?

⁹ Andao hiheregnantikagne indraike i ohatse miomba ty ndaty raike mampianatse ty hafa hahay minday tobile teoy. Naho te hahay tobile ka i ndaty ampianare’ey, le misy raha mila atao’e. Mila mitsanogne ty raha rehafe i ndaty mampianatse azey reke sady magnente ka ty raha atao ty soafera mahay. Va’e hirehake ama’e ohatse i ndaty mampianatse azey tie: “Henteo moa ty atao ty soafera raike roy. Soa fagnahy reke, le mei’e lalagne i tobile afara’e aoy naho fa mangatake ty handeha aloha.” Ndra va’e hirehake reke tie: “Henteo ka ty atao ty soafera raike roy, ahein’e ty fazava i jiro i tobile’ey, amy izay tsy magnelengelegne ty tobile hafa.” Tena hagnampe i mpianatsey hahay ty toko’e hatao’e naho fa minday tobile ka ty fahatreava’e izay.

10. Ino ty hagnampe o mpianatse Baibolio handroso ara-pagnahy?

¹⁰ Hoe izay ka o ndaty ampianarentika Baibolio. Naho fa manomboke mandroso iareo, le mila miana-draha boake amy ty hafa ka fa tsy amy i ndaty mampianatse azey avao. Inogne moa ty tena magnampe iareo handroso ara-pagnahy? Ty fagnatrehagne fivoriagne. Ty anto’e, naho iareo mivory le hitombo ty raha fanta iareo. Hanagne finoagne matanjake ka iareo sady ho tena tea an’Andrianagnahare. (Asa. 15:30-32) Toko’e hampifankafantarentika amo o rahalahio naho rahavaveo ka iareo naho fa mivory. Ty anto’e, misy amy iareo va’e ho nanagne olagne ndra niatreke raha sarotse manahake iareo. Ho trea iareo ka tie manao akore ze o maneho hatea zao. Dineho ty ohatse retoagne.

11. Ino ty raha va’e ho voamare o mpianatse Baibolio naho fa am-pivoriagne atoy, le ino ty va’e ho voka izay amy iareo?

¹¹ Nisy mpianatse Baiboly raike ampela zay, miteza irerike ty ana’e. Nahatrea rahavave raike manahake aze reke naho fa nivory. Mikezake avao o rahavave iohoe mba ho avy amy i Anjomba i Fanjakagney agne reketse ze ana’e kedekede zay. Tena nanohigne ty fo i mpianatsey ty nahatrea izay. Nisy mpianatse Baiboly raike ka nialy mafe mba hiala amo o sigarao. Naho fa nivory reke, le nahatrea rahalahy raike nahavita niala tamo o sigarao. Hoe i rahalahỳ tama’e: “Naho fa nitombo ty hateako i Jehovah, le nanjare te hankatò ty lili’e raho.” (2 Kor. 7:1; Fil. 4:13) Naho fa boake nitantara ty raha niaigna’e i rahalahỳ, le izao ty toky nimei’e i mpianatsey: “Ho vita’o ka ty miala amo o sigarao.” Nanjare natoky areke i mpianatsey fa tena ho vita’e ty hiala amo o sigarao. Misy rahavave raike tanora zay ka lava falefale avao. Naho fa nahavoamareke izay ze mpianatse Baiboly tanora manahake aze zay, le nanjare nagniry hahafantatse ty anto’e mahavy i rahavavey ho falefale avao.

12. Nagnino tika ro mirehake tie afake magnampe o mpianatse Baibolio mba handroso ara-pagnahy ty ndaty tsikiraidraike agnivo fiangonagne eo?

¹² Naho fa mahafantatse soa o rahalahio naho o rahavaveo o mpianatse Baibolio, le ho trea iareo tie akore ty fomba hagnorihagne ze raha nandilia i Jesosy antika, lohotsie fa i lily tihoey tie: ‘Teao ty Andrianagnahare naho ty nama’o.’  (Jaona 13:35; 1 Tim. 4:12) Fa nirehafegne tambone teo ka tie afake miana-draha boake amo o mpitorio iareo. Ty anto’e, misy amo o mpitorio va’e fa niatreke olagne manahake ty atrehe iareo. Ho trea iareo boake amy ty raha natao ty hafa ka tie ho vita’e ty hiova mba hahavy aze ho lasa mpiana i Kristy. (Deot. 30:11) Afake manao raha mba hagnampeagne o mpianatse Baibolio handroso ara-pagnahy areke ty ndaty tsikiraidraike agnivo fiangonagne eo. (Mat. 5:16) Inogne zao ty kezake atao’o mba hagnampeagne i mpianatse Baiboly fa mivory rey mba handroso ara-pagnahy?

13-14. Ino ty natao i Jesosy mba hagnampeagne i apostoli’e rey naho fa nikivy iareo?

¹³ Azo antoke fa teantika ty hagnampe i rahalahy naho rahavaventikagne fa tsy mitory sasa rey mba hagnorike indraike i lily i Jesosy hitory naho hampianatsey. Inogne ty azontika atao mba hagnampeagne iareo? Ho treantikagne amy ty fomba nagnampea i Jesosy i apostoli’e nikivy rey zay.

¹⁴ ‘Nilay iaby’ o apostoly i Jesosy reo taloha kede ty namonoagne aze. (Mar 14:50; Jaona 16:32) Inogne ty natao i Jesosy tafara kede ty namelomagne aze mba hagnampeagne iareo, satria tena nikivy iareo? Hoe ty Jesosy tamy ty mpiana’e ila’e: “Ko matahotse! Akia rehafo amy i rahalahiko rey [tie fa nivelomegne tamy ty mate raho].” (Mat. 28:10a) Tsy niboseke ndra nikivy tamo o apostoli’e reo ty Jesosy ndra tie nienga aze iaby aza iareo. Mbe nitokave’e tihoe ‘rahalahi’e’ iareo. Tena namindra fo naho namela heloke manahake i Jehovah ty Jesosy.​—2 Mpanj. 13:23.

15. Ino iaby ty raha tsapantikagne miomba i rahalahy naho i rahavaventikagne tsy mitory sasa rey?

¹⁵ Tena sarobily amantika ka i rahalahy naho i rahavaventikagne tsy mitory sasa rey. Tena teantika iareo satria mbe rahalahy naho rahavaventikagne. Tsy halignontika ty hatea naseho iareo hoahy i Jehovah tagnate ty taogne maro. (Heb. 6:10) Tena imanignantika mafe iareo! (Lioka 15:4-7) Inogne iaby ty azontika atao mba hagnampeagne iareo manahake ty natao i Jesosy?

16. Akore ty ampisehoantika fa sarobily amantika i rahalahy naho i rahavaventika tsy mitory sasa rey?

¹⁶ Asao hivory iareo faie anò aman-kasoa fagnahy zay. Akore ty fomba nagnampea i Jesosy i apostoli’e rey naho fa nikivy iareo? Nasae’e nivory iareo. (Mat. 28:10b; 1 Kor. 15:6) Azontikagne atao ka ty manasa i rahalahy naho i rahavaventikagne tsy mitory sasa rey mba hivory naho ohatse fa ela iareo ro tsy nivory. Va’e tsy le avy le handeha hivory iareo naho fa asaentikagne. Mila asaegne mateteke areke iareo. Azo antoke zao fa tena nifale ty Jesosy naho fa niavy tamy i toeragne namoria’e iareoy agne i mpiana’e rey.—Ampitahao amy ty Matio 28:16 naho ty Lioka 15:6.

17. Akore ty toko’e hataontika naho fa misy ndaty tsy mitory sasa avy am-pivoriagne agne?

¹⁷ Rambeso amy ty fo iareo. Tena nirambese i Jesosy soa i mpiana’e rey naho fa niavy tamy i toeragne nivoria iareoy agne. Ireke ka ty nagnatogne iareo voaloha’e sady nirehake tamy iareo. (Matio 28:18) Akore ty toko’e hataontika naho fa misy ndaty tsy mitory sasa avy am-pivoriagne agne? Mila magnatogne aze tika mba hanalama aze. Maregne fa va’e hatahotse tika satria tsy haintikagne tie inogne ty ho rehafegne. Faie mba tsy hampihafahafa aze, le azontika atao ty mirehake avao tie: “Tena fale raho mahita azo.”

18. Akore ty hagnomeantika toky naho hampaherezagne i aze fa tsy mitory sasa rey?

¹⁸ Meo toky iareo sady ampaherezo. Va’e nieretseretse i mpiana i Jesosy rey fa tsy ho vita iareo ze o hitory magneneke ty tane toy zao. Faie nimey i Jesosy toky iareo tie: “Ho ama’areo avao raho.” (Mat. 28:20) Tena nisy voka’e  tamy iareo vao zay? Ie. Ty anto’e, nazoto “nampianatse naho nitory i talily soay” iareo tsiela tafara izay. (Asa. 5:42) Mila meigne toky hoe izay ka i rahalahy naho i rahavaventikagne tsy mitory sasa rey. Va’e hatahotse iareo naho fa mieretseretse tie hitory indraike. Faie azontika atao ty mirehake amy iareo tie tsy irerike iareo naho fa manao ty asa fitoriagne. Afake miarake amy iareo ohatse tika naho fa miheregne mitory indraike iareo. Azo antoke fa tena ho fale iareo naho fa tohagnantika. Toko’e hataontika tsapa iareo fa mbe agnisa ty rahalahy naho rahavaventikagne iareo. Naho itika manao izay, le hazoto hitory indraike iareo sady ho fale o fiangonagneo.

19. Ino ty fagniriantikagne iaby, le ino ty anto’e?

¹⁹ Hatrake ombia tika ro toko’e hitory naho hampianatse? Amparake ty hiavia ty fifaragna ty tontolo toy. (Mat. 28:20) Ho vitantikagne vao ty hamita o asa iohoe amparake ty hiavia ze fotoagne zay? Eka, sady lonike tika ho tapa-kevetse hanao izay. Mahafale antika zao ty magnomey ty fotoantika naho ty herintika vaho ty volantika mba hipaliavagne ze ndaty ‘managne toe-po soa hahazoagne i havelogne nainai’ey.’ (Asa. 13:48) Manahake i Jesosy tika naho fa manao izay. Hoe reke: “Ty haneko le ty manao ty zoton’arofo i nagnirake ahỳ naho ty mamita ty asa’e.” (Jaona 4:34; 17:4) Hoe izay ka ty fagniriantikagne iaby. Teantikagne ty hamita hatrake ampara’e i asa nankinegne tamantikagney. (Jaona 20:21) Teantikagne hamita o asa iohoe hatrake am-para’e ka ty ndaty hafa, agnisa izay i rahalahy naho rahavaventika fa tsy mitory sasa rey.​—Mat. 24:13.

20. Arake ty Filipianina 4:13, nagnino tika ro matoky fa tena ho vitantikagne ty hanao i asa nandilia i Jesosy antikagney?

²⁰ Tsy mora ty magnorike i lily nimey i Jesosy antikagney. Faie tsy irerike tika naho fa manao ty asa fampianaragne, satria fa nampitamà ty Jesosy tie ho amantikagne avao reke. ‘Miara-miasa aman’Andrianagnahare’ naho ‘amy i Kristy’ tika naho fa manao o asa iohoe, le azo antoke fa hagnampe antika iareo. (1 Kor. 3:9; 2 Kor. 2:17) Afake matoky areke tika fa tena ho vitantikagne ty hanao o asa iohoe. Tombotsoa tsy misy hoe’e ty manao o asa iohoe sady tena mahafale ty mandrambe anjara ama’e, naho ty magnampe ty hafa mba hanao aze ka.​—Vakio ty Filipianina 4:13.