Skip to content

Skip to table of contents

CIBALO CAKWIIYA 45

Mbotukonzya Kugwasya Bamwi Kutobela Malailile aa Kristo

Mbotukonzya Kugwasya Bamwi Kutobela Malailile aa Kristo

‘Aboobo kamuya mukayiisye bantu kuti babe basikwiiya, mukabayiisye kutobela zintu zyoonse nzyondakamulailila.’​—MT. 28:19, 20.

LWIIMBO 89 Amuswiilile Akutobela Zyaambwa Kutegwa Mulelekwe

IZILI MUCIBALO *

1. Kweelana alugwalo lwa Matayo 28:18-20, malailile nzi Jesu ngaakapa?

JESU naakabusyigwa, wakalibonya kuli basikwiiya bakwe ibakabungene mu Galilaya. Kwakali makani aayandika kapati ngaakali kuyanda kubaambila. Ino akali makani nzi aayo? Makani aayo alajanika kulugwalo lwa Matayo 28:18-20.—Amubale.

2. Mibuzyo nzi njotutiilange-lange?

2 Malailile aa Jesu aakugwasya bantu kuba basikwiiya acibeleka kuli umwi aumwi wababelesi ba Leza mazuba aano. Aboobo, atulange-lange mibuzyo yotatwe iijatikizya mulimo Jesu ngwaakatupa. Wakusaanguna, ncinzi ncotweelede kucita kunze buyo lyakubayiisya kutobela malailile aa Leza basikwiiya bapya? Wabili, mbuti basikumwaya boonse mumbungano mbobakonzya kutola lubazu mukugwasya basikwiiya Bbaibbele kuyaambele kumuuya? Watatu, mbuti mbotukonzya kubagwasya basyomima ibatacisungweede kuti bautalike alimwi mulimo wakugwasya bantu kuba basikwiiya?

AMUBAYIISYE KUTOBELA MALAILILE AA KRISTO

3. Malailile nzi aagaminide Jesu ngaakaamba?

3 Malailile aa Jesu alisalede. Aboobo tweelede kuyiisya bantu kutobela zintu nzyaakalailila. Nokuba boobo, tatweelede kuluba kaambo kayandika kapati. Jesu kunyina naakaamba kuti: ‘Amubayiisye zintu zyoonse nzyondakamulailila.’ Pele wakaamba kuti: Amubayiisye “kutobela zintu zyoonse nzyondakamulailila.” Kutegwa tutobele malailile aa Jesu aagaminide, tweelede kumuyiisya sikwiiya Bbaibbele ncayelede kucita alimwi akumutondezya mbocicitwa. (Mil. 8:31) Nkaambo nzi ncotweelede kucita boobo?

4. Ino kutobela malailile caamba nzi? Amupe cikozyanyo.

4 “Kutobela” malailile caamba kucita caambwa. Kutegwa tutondezye mbotukonzya kuyiisya muntu kutobela naa kucita zintu nzyaakalailila Kristo, atuyeeye kujatikizya cikozyanyo eeci. Mbuti mwiiyi uuyiisya kweenzya mootokala mbwayiisya basikwiiya kutobela malailile aamumugwagwa? Imwiiyi ulakonzya kusaanguna kubayiisya malailile aamumugwagwa basikwiiya mukkilasi. Pele kutegwa acikonzye kuyiisya basikwiiya aaba kutobela malailile, weelede kubweza ntaamu iimbi. Weelede kuunka abasikwiiya alimwi akubasololela ciindi nobeenzya mumugwagwa muli myootokala minji akubagwasya kuzibelesya zintu nzyobakaiya. Ncinzi ncotukonzya kwiiya kucikozyanyo eeci?

5. (a) Kweelana alugwalo lwa Johane 14:15; 1 Johane 2:3, ncinzi ncotweelede kuyiisya basikwiiya Bbaibbele kuti kabacita? (b) Amupe zikozyanyo izitondezya mbotukonzya kubasololela basikwiiya besu.

5 Ciindi notuyiisya bantu Bbaibbele, tubagwasya kuzyiba ncayanda Leza kulindiswe. Pele nzinji nzyotweelede kucita. Tweelede kubayiisya kuzibelesya mubuumi bwabo bwabuzuba abuzuba zintu nzyobaiya. (Amubale Johane 14:15; 1 Johane 2:3.) Kwiinda mucikozyanyo cesu, tweelede kubatondezya mbobakonzya kubelesya njiisyo zyamu Magwalo nobali kucikolo, kumulimo alimwi aciindi nobalyookezya. Tulakonzya kubaambila cintu cimwi cakatucitikila, kutegwa tubagwasye kubona kuti kutobela malailile aamu Bbaibbele kwakatukwabilila kuntenda alimwi akutugwasya kusala cabusongo. Ciindi notuli antoomwe ambabo, tulakonzya kupaila kuli Jehova kulomba muuya uusalala kuti ubagwasye.—Joh. 16:13.

6. Ncinzi cimbi ncotweelede kucita ciindi notuyiisya bamwi kutobela malailile aa Jesu?

6 Ino ncinzi cijatikizyidwe mukuyiisya bamwi kutobela malailile aa Jesu? Nkuyiisya basikwiiya Bbaibbele besu kuba aluyandisisyo lwakugwasya bantu kuba basikwiiya. Basikwiiya bamwi inga balayoowa kukambauka. Aboobo tweelede kubakkazikila moyo ciindi notubagwasya kumvwisya kasimpe kamu Bbaibbele kutegwa babe alusyomo luyumu. Mpoonya kuti kasimpe kabasika amoyo, bayookulwaizyigwa kutalika kukambauka. Ncinzi ncotukonzya kucita kutegwa tugwasye basikwiiya kuba aluyandisisyo lwakukambauka makani mabotu?

7. Mbuti mbotukonzya kumugwasya sikwiiya kuba aluyandisisyo lwakukambauka makani mabotu?

7 Tulakonzya kubabuzya basikwiiya Bbaibbele mibuzyo mbuli yakuti: “Sena buumi bwanu bwacinca akaambo kakutobela nzyoliyiisya Bbaibbele? Sena muyeeya kuti kuli bamwi beelede kuumvwa mulumbe ooyu? Ino inga mwabagwasya buti?” (Tus. 3:27; Mt. 9:37, 38) Amumutondezye sikwiiya kuti matulakiti aalo ncibeela ca Zibelesyo Nzyotubelesya Kapati Mukuyiisya, mpoonya amumwaambile kuti asale eeyo njabona kuti inga baikkomanina banamukwasyi, balongwe, naa babelesinyina. Amumupe matulakiti aaindene-indene. Amucite citondezyo anguwe kutegwa abone mbwakonzya kwaabila tulakiti kuli bamwi. Aboobo, kuti sikwiiya wesu weelela kuba sikumwaya uutanabbapatizyigwa, tweelede kunookambauka anguwe kutegwa tumugwasye.—Muk. 4:9, 10; Lk. 6:40.

MBUNGANO MBOIKONZYA KUGWASYA BASIKWIIYA BBAIBBELE KUYAAMBELE

8. Nkaambo nzi ncociyandika kuti basikwiiya bayaambele mukutondezya luyando kuli Leza alimwi akuli basimukobonyina? (Alimwi amubone kabbokesi kakuti “ Kugwasya Basikwiiya Bbaibbele Kuyaambele Mukuyanda Leza.”)

8 Amuyeeye kuti, Jesu wakatwaambila kuyiisya bantu “kutobela zintu zyoonse” nzyaakalailila. Eeci cibikkilizya milawo yobilo mipati kapati, nkokuti kuyanda Leza alimwi akuyanda basimukoboma, milawo yoonse yobilo iliswaangene kapati amulimo wakukambauka alimwi akugwasya bantu kuba basikwiiya. (Mt. 22:37-39) Ino iswaangene buti? Kaambo kapati ikeelede kutupa kutola lubazu mumulimo wakukambauka, nduyando, nkokuti luyando ndotujisi kuli Leza alimwi aluyando ndotujisi kuli basimukoboma. Nokuba boobo, basikwiiya Bbaibbele bamwi balakonzya kuyoowa kutola lubazu mumulimo wakukambauka. Pele tulakonzya kubaambila kuti kwiinda mulugwasyo lwa Jehova, banooyaabulizunda penzi lyakuyoowa muntu aasyoonto-syoonto. (Int. 18:1-3; Tus. 29:25) Kabbokesi ikali mucibalo eeci katondezya nzila nzyotukonzya kutobela kutegwa tumugwasye sikwiiya kuyaambele muluyando ndwajisi kuli Leza. Kuyungizya waawo, ncinzi mbungano ncoikonzya kucita kutegwa igwasye basikwiiya bapya kuyaambele mukutondezya luyando?

9. Mucikozyanyo camwiiyi uuyiisya sikwiiya kweenzya mootokala, muunzila nzi sikwiiya mwaiya ziiyo ziyandika kapati?

9 Amuyeeye alimwi cikozyanyo camwiiyi uuyiisya muntu kweenzya mootokala. Mbuti sikwiiya mbwaiya ciindi neenzya mootokala mumugwagwa muli myootokala minji kumwi mwiiyi wakwe kakkede ambali? Nkwiinda mukuswiilila malailile ngaamba mwiiyi wakwe alimwi akubona bamwi mbobeenzya. Mucikozyanyo, imwiiyi ulakonzya kumutondezya sikwiiya namutekenya umwi calubomba mbwainzizya umwi kuti anjile ambele lyakwe. Naa kumutondezya namutekenya uumbi cabuuya uuzima malaiti aayaka kapati akubelesya aatayakisyi kutegwa atabatowi banamutekenya bamwi. Zikozyanyo zili boobo zilamuyiisya sikwiiya, ziiyo ziyandika kapati nzyeelede kubelesya neenzya mootokala.

10. Ncinzi cikonzya kumugwasya sikwiiya Bbaibbele kuyaambele kumuuya?

10 Mbubwenya buyo, sikwiiya Bbaibbele iwatalika kweendela munzila iitola kubuumi ulaiya ikutali buyo kuli sikumuyiisya pele alimwi akuzikozyanyo zibotu nzyabona mumbungano. Aboobo ncinzi ciyoobagwasya kapati basikwiiya Bbaibbele kuyaambele kumuuya? Nkujanika kumiswaangano yesu ya Bunakristo. Nkaambo nzi ncotwaambila boobo? Lulayo lwamu Magwalo ilupegwa kumiswaangano luyooyungizya luzyibo ndobajisi, kuyumya lusyomo lwabo alimwi akubagwasya kuyaambele muluyando lwabo kuli Leza. (Mil. 15:30-32) Kuyungizya waawo, kumiswaangano mwiiyi ulakonzya kumuzyibya sikwiiya kubakwesu abacizyi ibajisi bukkale ibukozyenye ambwajisi. Ino nzikozyanyo zili buti zyaluyando lwa Bunakristo nzyakonzya kubona sikwiiya mumbungano?

11. Nzikozyanyo nzi nzyakonzya kubona sikwiiya mumbungano, alimwi ino inga zyamugwasya buti?

11 Amubone bukkale oobu butobela. Sikwiiya Bbaibbele muzyali uuli alikke wabona mucizyi Munakristo uuli mubukkale bukozyenye abwakwe. Wakulwaizyigwa kapati kubona mucizyi mbwabeleka canguzu kutegwa acikonzye kuboola ku Ŋanda ya Bwami abana bakwe ibacili baniini. Sikwiiya uujisi penzi lyakuleka kufweba wazyibana amukwesu iwakajisi penzi likozyenye andyajisi, pele iwakacikonzya kulizunda. Mukwesu ooyu waambila sikwiiya kuti luyando ndwajisi kuli Jehova ndolwakamukulwaizya kutobela malailile aa Leza. (2Kor. 7:1; Flp. 4:13) Ciindi sikwiiya naamana kuswiilila cakuluula camukwesu, wakulwaizyigwa kapati naamwaambila kuti, “Anduwe inga wacikonzya kuleka kufweba.” Sikwiiya Bbaibbele mukaintu uucili mwana-mwana, wabona mucizyi waciimo cakwe uukkomene mubuumi akaambo kakuba Kamboni. Ciindi naabona mbwakkomene mucizyi ooyu, sikwiiya Bbaibbele uyanda kuzyiba zinji kujatikizya kaambo mucizyi ooyu ncakkomana lyoonse.

12. Nkaambo nzi ncotukonzya kwaamba kuti aumwi mumbungano ulijisi lubazu mukugwasya basikwiiya Bbaibbele?

12 Ciindi basikwiiya Bbaibbele nobazyibana abasikumwaya basyomeka ibaindene-indene, basikwiiya balaiya kuzwa kuzikozyanyo zyabo kujatikizya ncocaamba kutobela malailile aa Kristo aakuyanda Leza alimwi abasimukobonyina. (Joh. 13:35; 1Tim. 4:12) Alimwi kweelana ambotwabona kale, sikwiiya Bbaibbele ulakonzya kwiiya kuli basikumwaya ibakazunda buyumuyumu ibukozyenye ambwajisi. Kuzwa kuzikozyanyo eezyi, sikwiiya ulabona kuti awalo inga wacikonzya kucinca akuba sikwiiya wa Kristo. (Dt. 30:11) Umwi aumwi mumbungano ulakonzya kugwasyilizya basikwiiya Bbaibbele munzila ziindene-indene kutegwa bayaambele kumuuya. (Mt. 5:16) Nkusoleka kuli buti nkomucita nywebo kumugama kutegwa mukulwaizye basikwiiya Bbaibbele ibajanika kumiswaangano?

AMUBAGWASYE IBATACISUNGWEEDE KUTALIKA ALIMWI KUKAMBAUKA

13-14. Mbuti Jesu mbwaakabeendelezya baapostolo bakwe ibakatyompedwe?

13 Tuyanda kubagwasya bakwesu abacizyi ibatacisungweede kuti batalike alimwi kukambauka kutegwa bazuzikizye malailile aa Kristo aakugwasya bantu kuba basikwiiya. Mbwaakabagwasya Jesu baapostolo bakwe ibakatyompedwe citondezya ncotukonzya kucita andiswe mazuba aano.

14 Kumamanino aamulimo wa Jesu waanyika ciindi naakali afwaafwi kujaigwa, baapostolo “boonse bakamusiya akutija.” (Mk. 14:50; Joh. 16:32) Ncinzi ncaakacita Jesu aciindi eeco baapostolo bakwe nobakatyompedwe? Nokwakainda buyo ciindi cisyoonto kuzwa naakabusyigwa, Jesu wakaambila basikumutobela bamwi kuti: “Mutayoowi! Kamuya, mukabaambile bakwesu kuti [ndakabusyigwa].” (Mt. 28:10a) Jesu kunyina naakabalekelezya baapostolo bakwe. Nokuba kuti bakamusiya, wakacili kubaita kuti “bakwesu.” Mbubwenya mbuli Jehova, Jesu wakabatondezya luzyalo alimwi akubalekelela.—2Bam. 13:23.

15. Ino tulimvwa buti kujatikizya baabo ibakacileka kukambauka?

15 Mbubwenya buyo, tulababikkila maano kapati aabo ibakacileka kukambauka. Mbakwesu abacizyi, alimwi tulabayanda! Tulaiyeeya milimo yabo yaluyando njobakabeleka kaindi, alimwi bamwi bakacita oobo kwamyaka minji. (Heb. 6:10) Masimpe tulabayeeya! (Lk. 15:4-7) Kwiinda mukwiiya cikozyanyo ca Jesu, muunzila nzi motukonzya kutondezya kuti tulababikkila maano?

16. Mbuti mbotukonzya kutondezya kuti tulababikkila maano bakwesu abacizyi ibatacisungweede?

16 Amubatambe kumiswaangano. Nzila imwi Jesu mbwaakabakulwaizya baapostolo bakwe ibakatyompedwe nkwiinda mukubatamba kumuswaangano. (Mt. 28:10b; 1Kor. 15:6) Mbubwenya buyo amazuba aano, tulabakulwaizya ibatacisungweede kuti kabajanika kumiswaangano yambungano ikuti naa tabanatalika kucita boobo. Tulizyi kuti inga twayandika kubatamba ziindi zinji. Pele kuti baboola, tuyookkomana kapati mbubwenya Jesu mbwaakakkomana ciindi basikwiiya bakwe nobakakuzumina kutamba kwakwe.—Amweezyanisye Matayo 28:16 a Luka 15:6.

17. Ino tweelede kucita buti ciindi muntu uutacisungweede naajanika kumuswaangano?

17 Amubatambule amaanza obilo. Jesu wakapa basikwiiya bakwe kulimvwa kwaanguluka ciindi naakaswaangana ambabo; wakabweza ntaamu yakubandika ambabo. (Mt. 28:18) Ino tuyoocita buti ciindi muntu uutacisungweede aakuboola ku Ŋanda ya Bwami? Tweelede kubweza ntaamu kwiinda mukumutambula camaanza obilo. Kumatalikilo, tulakonzya kulibilika kujatikizya ncotuyakwaamba. Pele kakunyina kumupa kufwa nsoni, tulakonzya kumwaambila buyo mbotwakkomana kapati kumubona.

18. Mbuti mbotukonzya kubakulwaizya basikumwaya ibatacisungweede?

18 Amubakulwaizye kuzwa ansi aamoyo. Kweelede kuti basikwiiya ba Jesu bakalibilika nobakapegwa mulimo wakukambauka munyika yoonse. Aboobo wakabakulwaizya kwiinda mukubaambila kuti: “Ndilaandinywe mazuba oonse.” (Mt. 28:20) Sena nzila njaakabelesya yakagwasya? Inzya. Kalitanalampa, bakajisi bubi “kuyiisya akwaambilizya makani mabotu.” (Mil. 5:42) Mbubwenya buyo, abalo basikumwaya ibatacisungweede bayandika kukulwaizyigwa. Balakonzya kuyoowa kapati kutalika kukambauka alimwi. Tulakonzya kubakkazika moyo kwiinda mukubaambila kuti tabanookambauki balikke pe. Aboobo baakulibambila kutalika, inga twaunka ambabo mumulimo wakukambauka. Cakutadooneka, bayoolukkomanina lugwasyo lwesu baakutalika alimwi kukambauka makani mabotu. Ciindi batacisungweede notubatondezya kuti tubabona kuba bakwesu alimwi abacizyi, balakonzya kusungwaala alimwi, calo cikonzya kupa kuti boonse mumbungano bakkomane.

TUYANDA KUUMANIZYA MULIMO NGOTWAKAPEGWA

19. Ino tukanzide kucita nzi alimwi nkaambo nzi?

19 Ndilili notuyooleka kugwasya bantu kuba basikwiiya? Kusikila kumamanino aabweende bwazintu oobu. (Mt. 28:20; amubone Bupanduluzi Bwamabala Aamu Bbaibbele, “Mamanino aabweende bwazintu.”) Sena tuyoocikonzya kuzumanana kukambauka akugwasya bantu kuba basikwiiya kusikila kuciindi eeco? Aayo ngamakanze eesu! Tulilyaabide kubelesya ciindi cesu, nguzu alimwi amali kutegwa tujane baabo ‘balibambilide kutambula buumi butamani.’ (Mil. 13:48) Ciindi notucita boobo, tutobela cikozyanyo ca Jesu. Wakaamba kuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.” (Joh. 4:34; 17:4) Andiswe eeci ncotuyanda. Tuyanda kuumanizya mulimo ngotwakapegwa. (Joh. 20:21) Alimwi tuyanda kuti abamwi, kubikkilizya abaabo ibatacisungweede, tuzumanane kubelekela antoomwe mumulimo ooyu.—Mt. 24:13.

20. Kweelana a Bafilipi 4:13, nkaambo nzi ncotukonzya kuuzuzikizya mulimo ngwaakatupa kucita Jesu?

20 Masimpe kuti, tacili cuuba-uba kuuzuzikizya mulimo mupati ngwaakatupa kucita Jesu. Nokuba boobo, ooyu mulimo tatuubeleki tolikke. Jesu wakasyomezya kuti unooli aandiswe. Tulaubeleka mulimo ooyu wakugwasya bantu kuba basikwiiya katuli “basimilimonyina a Leza” “alimwi ibakamantene a Kristo.” (1Kor. 3:9; 2Kor. 2:17) Aboobo, tulakonzya kuuzuzikizya mulimo ooyu. Eelo kaka ncoolwe alimwi cilakkomanisya kucita mulimo ooyu akugwasya bamwi kuti baucite abalo!—Amubale Bafilipi 4:13.

LWIIMBO 79 Amubayiisye Kwiima Nji

^ munc. 5 Jesu wakalailila basikumutobela kuti bagwasye bantu kuba basikwiiya akubayiisya kutobela zintu zyoonse nzyaakabalailila. Mucibalo eeci tulalanga-langa mbotukonzya kwaatobela malailile aa Jesu. Makani amwi aali mucibalo eeci akazwa mucibalo cakamwaigwa mu Ngazi Yamulindizi yamu July 1, 2004, peeji 14-19.

^ munc. 66 BUPANDULUZI BWACIFWANIKISO: Mucizyi uusololela ciiyo ca Bbaibbele upandulwida sikwiiya ncakonzya kucita kutegwa ayumye luyando lwakwe kuli Leza. Kumane, sikwiiya ubelesya nzila zyotatwe nzyayiisyigwa asikumuyiisya Bbaibbele.