1. Hi ku ya hi Matewu 28:18-20, hi xihi xileriso lexi Yesu a xi vuleke?

 ENDZHAKU ka loko Yesu a pfuxiwe ekufeni, u humelele eka vadyondzisiwa vakwe lava a va hlengeletane eGaleliya. A a lava ku va byela mhaka ya nkoka. Hi yihi mhaka ya kona? Yi kumeka eka Matewu 28:18-20.—Yi hlaye.

2. Hi swihi swivutiso leswi hi nga ta swi hlamula?

² Malandza hinkwawo ya Xikwembu namuntlha ma fanele ma yingisa xileriso xa Yesu. Hikwalaho, hi ta hlamula swivutiso swinharhu leswi fambisanaka ni ntirho lowu Yesu a hi nyikeke wona. Xo sungula, handle ko dyondzisa vanhu leswi Xikwembu xi swi languteleke eka vona, hi fanele hi endla yini? Xa vumbirhi, vandlha hinkwaro ri nga hoxa xandla njhani eku pfuneni ka swichudeni swa Bibele? Xa vunharhu, hi nga va pfuna njhani vamakwerhu lava tshikeke ku tirhela Yehovha leswaku va tlhela va sungula ku chumayela?

3. Hi yihi mhaka yin’wana leyi Yesu a yi vuleke eka xileriso xakwe?

³ Swileriso swa Yesu swi twisiseka kahle. Hi fanele hi dyondzisa vanhu swilo leswi a hi leriseke swona. Kambe a hi fanelanga hi rivala mhaka yin’wana ya nkoka leyi a yi vuleke. Yesu a nga vulanga a ku: ‘Va dyondziseni swilo hinkwaswo leswi ndzi mi leriseke swona.’ Kurinasweswo, u te: “Mi va dyondzisa [ku hlayisa] hinkwaswo leswi ndzi mi leriseke swona.” Leswaku hi endla leswi Yesu a hi leriseke swona, hi fanele hi dyondzisa xichudeni hi tlhela hi xi letela. (Mit. 8:31) Hikwalahokayini swi ri swa nkoka ku endla tano?

4. Swi vula yini ku hlayisa xileriso? Kombisa.

 ⁴ Ku ‘hlayisa’ xileriso swi vula ku xi yingisa. Leswaku hi kota ku dyondzisa munhu ku hlayisa kumbe ku yingisa xileriso xa Kreste, ehleketa hi xikombiso lexi landzelaka. Munhu loyi a dyondzisaka van’wana ku chayela, u va dyondzisa njhani ku landzela milawu ya le magondzweni? U rhanga hi ku va dyondzisa milawu yoleyo va nga si sungula ku chayela. Leswaku a va dyondzisa ku yingisa milawu yoleyo, ku na swin’wana a swi endlaka. U tshama etlhelo ka vona loko va ri karhi va chayela a va letela ku endla leswi a va dyondziseke swona. I yini leswi hi nga swi dyondzaka eka xikombiso lexi?

5. (a) Hi ku ya hi Yohane 14:15 na 1 Yohane 2:3, hi fanele hi dyondzisa swichudeni swa hina swa Bibele ku endla yini? (b) Vula tindlela leti hi nga swi letelaka hatona swichudeni swa hina.

⁵ Loko hi dyondzisa vanhu Bibele, hi va hi va dyondzisa leswi Xikwembu xi swi languteleke eka hina. Kambe ku na swin’wana leswi hi faneleke hi swi endla. Hi fanele hi dyondzisa swichudeni swa hina swa Bibele ku tirhisa leswi swi swi dyondzaka. (Hlaya Yohane 14:15; 1 Yohane 2:3.) Hi nga swi dyondzisa ndlela leyi swi faneleke swi tikhoma hayona loko swi ri exikolweni, entirhweni kumbe loko swi ri eku tihungaseni hi ku va hi swi vekela xikombiso lexinene. Hi nga swi byela ndlela leyi Bibele yi hi sirheleleke kumbe yi hi pfuneke hayona leswaku hi endla xiboho lexinene. Loko hi ri ni swichudeni swa hina, hi nga khongela eka Yehovha hi kombela leswaku a swi kongomisa hi moya wakwe lowo kwetsima.—Yoh. 16:13.

6. I yini swin’wana leswi hi faneleke hi swi endla loko hi dyondzisa van’wana ku hlayisa swileriso swa Yesu?

⁶ I yini swin’wana leswi hi faneleke hi swi endla loko hi dyondzisa swichudeni swa hina ku hlayisa swileriso swa Yesu? Hi fanele hi swi pfuna swi navela ku endla ntirho wa ku endla vadyondzisiwa. Swichudeni swin’wana swi nga ha chava ku chumayela. Hi fanele hi swi lehisela mbilu loko hi ri karhi hi swi dyondzisa ni ku swi letela kutani hakatsongotsongo swi ta ya swi swi navela ku sungula ku chumayela. Hi nga swi pfuna njhani leswaku swi navela ku chumayela van’wana mahungu lamanene?

7. Hi nga xi pfuna njhani xichudeni leswaku xi navela ku chumayela van’wana mahungu lamanene?

⁷ Hi nga vutisa xichudeni xa hina swivutiso leswi landzelaka: “Bibele yi ku pfune njhani leswaku u antswisa vumunhu bya wena? Xana u ehleketa leswaku van’wana na vona va fanele va dyondza Bibele? U nga va pfuna njhani?” (Swiv. 3:27; Mat. 9:37, 38) Xi kombele xi hlawula swiphephana leswi maxaka, vanghana ni vatirhikulobye va nga swi tsakelaka leswi nga eka Switirhisiwa Swo Pfuna Ku Dyondza Bibele. Xi nyike swiphephana swo hlayanyana. Praktisa na xona ndlela yo chumayela hi ku tirhisa xiphephana. Loko se xi va muhuweleri loyi a nga khuvuriwangiki, hi ta famba na xona ensin’wini leswaku hi ta kota ku xi pfuna.—Ekl. 4:9, 10; Luka 6:40.

8. Hikwalahokayini swichudeni swa hina swi fanele swi rhandza Xikwembu ni vanhu hi mbilu hinkwayo? (Vona ni bokisi leri nge “ Ndlela Yo Pfuna Swichudeni Swa Bibele Leswaku Swi Rhandza Xikwembu.”)

⁸ Tsundzuka, Yesu u hi lerise leswaku hi dyondzisa vanhu ‘ku hlayisa swilo hinkwaswo’ leswi a hi leriseke swona. Sweswo swi katsa ku yingisa milawu yimbirhi leyikulu, leyi fambisanaka kahle ni ntirho wo chumayela ni wa ku endla vadyondzisiwa, ku nga ku rhandza Xikwembu ni warikwenu. (Mat. 22:37-39) Milawu leyi yi fambisana njhani ni ntirho wo chumayela? Phela lexi endlaka hi chumayela i  rirhandzu, hi rhandza Xikwembu ni vanhu. Hambiswiritano, swichudeni swin’wana loko swi ehleketa hi ku chumayela swi khomiwa hi rhumbyana. Kambe hi nga tiyisekisa swichudeni sweswo leswaku Yehovha u ta swi pfuna swi tshika ku chava vanhu. (Ps. 18:1-3; Swiv. 29:25) Bokisi leri fambisanaka ni nhlokomhaka leyi, ri hlamusela tindlela leti hi nga swi pfunaka hatona swichudeni swa hina leswaku swi rhandza Xikwembu. Xana vandlha ri nga va pfuna njhani vadyondzisiwa lavantshwa leswaku va rhandza Xikwembu ni vanhu?

9. Xichudeni lexi dyondzisiwaka ku chayela lexi ku vulavuriwaka ha xona eka xikombiso, xi ti dyondze njhani tidyondzo ta nkoka?

⁹ Tlhela u ehleketa hi xikombiso xa xichudeni lexi dyondzaka ku chayela. Loko mudyondzisi wa xona a tshame etlhelo ka xona loko xi ri karhi xi chayela, xi va xi ri eku dyondzeni hi ndlela yihi? Xi dyondza hi ku yingisa mudyondzisi wa xona ni hi ku vona vachayeri van’wana. Hi xikombiso, mudyondzisi wa xona a nga ha xikomba muchayeri un’wana loyi a nga ni musa loyi a pfulelaka van’wana ndlela. Kumbe a xi komba muchayeri loyi a hungutaka mavoni leswaku a nga tlunyi vachayeri van’wana. Sweswo swi dyondzisa xichudeni tidyondzo ta nkoka leti xi faneleke xi ti tirhisa loko xi chayela.

10. I yini lexi nga pfunaka xichudeni xa Bibele leswaku xi endla nhluvuko?

¹⁰ Hilaha ku fanaka, xichudeni xa Bibele lexi sungulaka ku tirhela Yehovha, xi dyondza eka mudyondzisi wa xona swin’we ni le ka malandza man’wana ya Yehovha. Hikwalaho, i yini lexi nga pfunaka swichudeni swa Bibele leswaku swi endla nhluvuko? I ku ta etinhlengeletanweni ta hina ta vandlha. Hikwalahokayini? Hikuva leswi swi nga ta swi dyondza swi ta kurisa vutivi bya swona, swi tiyisa ripfumelo ra swona ni ku swi pfuna leswaku swi ya swi rhandza Xikwembu. (Mit. 15:30-32) Nakambe etinhlengeletanweni ta vandlha, mudyondzisi a nga hlanganisa xichudeni xakwe ni vamakwerhu van’wana lava nga exiyin’weni xo fana ni xa xona. Ku engetela kwalaho, xi ta vona ndlela leyi vamakwerhu va rhandzanaka hayona loko xi ta evandlheni. Xiya swiyimo leswi landzelaka.

11. Hi swihi leswi xichudeni xi nga ta swi vona evandlheni naswona sweswo swi ta xi khumba njhani?

¹¹ Xichudeni xa Bibele lexi nga mutswari loyi a nga yexe, xi vona makwerhu wa xisati loyi na yena a nga mutswari loyi a nga yexe. Swi xi khumba mbilu loko xi n’wi vona a endla matshalatshala yo ta etinhlengeletanweni ta vandlha ni swivanana swakwe. Xichudeni lexi waka xi pfuka leswaku xi tshika ku dzaha, xi hlangana ni makwerhu loyi khale a dzaha. Makwerhu yoloye u xi byela leswaku ku rhandza Yehovha hi swona swi endleke leswaku a yingisa milawu Yakwe. (2 Kor. 7:1; Filp. 4:13) Endzhaku ko twa mhaka yoleyo, xichudeni xi khutazekile loko makwerhu a xi tiyisekisa a ku: “Na wena u ta swi kota.” Ntombhi leyi nga xichudeni xa Bibele yi xiya makwerhu un’wana wa xisati loyi a tshamaka a tsakile hileswi a nga Mbhoni. Xichudeni xexo xi lava ku tiva leswaku hikwalahokayini makwerhu yoloye a tshama a tsakile.

12. Hikwalahokayini hi vula leswaku vandlha hinkwaro ri nga hoxa xandla eku pfuneni ka swichudeni swa Bibele?

¹² Loko swichudeni swa Bibele swi hlangana ni vamakwerhu vo hambanahambana, swi ta dyondza leswi swi vulaka swona ku hlayisa xileriso xa Kreste xa ku rhandza Xikwembu ni muakelani. (Yoh. 13:35; 1 Tim. 4:12) Hilaha se hi swi tweke hakona, xichudeni xi nga dyondza swo tala eka vamakwerhu lava langutaneke ni mitlhontlho yo fana ni ya xona. Sweswo swi ta endla xi swi vona leswaku xi nga swi kota ku cinca kutani xi va mudyondzisiwa wa  Kreste. (Det. 30:11) Vandlha hinkwaro ri nga hoxa xandla hi tindlela to hambanahambana eku pfuneni ka swichudeni swa Bibele leswaku swi endla nhluvuko. (Mat. 5:16) Hi wahi matshalatshala lawa u ma endlaka leswaku u pfuna swichudeni swa Bibele leswi taka etinhlengeletanweni ta vandlha?

13-14. Yesu u va khome njhani vaapostola vakwe loko va hele matimba?

¹³ Hi lava ku pfuna vamakwerhu lava tshikeke ku tirhela Yehovha leswaku va yingisa xileriso xa Kreste xo endla vadyondzisiwa. Ndlela leyi Yesu a va khomeke hayona vaapostola vakwe loko va hele matimba, yi kombisa leswi na hina hi nga swi endlaka.

¹⁴ Loko Yesu a ri ekusuhi ni ku dlayiwa, vaapostola vakwe “hinkwavo va [baleke] va n’wi siya.” (Mar. 14:50; Yoh. 16:32) Yesu u va khome njhani vaapostola vakwe hi nkarhi lowu a va hele matimba? Endzhakunyana ka loko Yesu a pfuxiwile, u byele van’wana va valandzeri vakwe a ku: “Mi nga chavi! Fambani mi ya tivisa vamakwerhu [leswaku ndzi pfuxiwile].” (Mat. 28:10a) Yesu a nga va helelanga mbilu vaapostola vakwe. Hambileswi va balekeke va n’wi siya, a nga tshikanga ku va vitana “vamakwerhu.” Ku fana na Yehovha, Yesu a a ri ni musa naswona a a rivalela.—2 Tih. 13:23.

15. Hi titwa njhani hi vamakwerhu lava tshikeke ku chumayela?

¹⁵ Na hina ha khathala hi vamakwerhu lava tshikeke ku chumayela. Ha va rhandza hikuva i vamakwerhu! Ha wu tsundzuka ntirho lowu va tshameke va wu endla, van’wana va vona va hete malembe yo tala va ri karhi va tirhela Yehovha. (Hev. 6:10) Ha va tsundzuka swinene! (Luka 15:4-7) Ku fana na Yesu, hi nga swi kombisa njhani leswaku ha khathala hi vona?

16. Hi nga swi kombisa njhani leswaku ha khathala hi vamakwerhu lava tshikeke ku tirhela Yehovha?

¹⁶ Va rhambe. Yesu u khutaze vaapostola vakwe lava a va hele matimba hi ku va rhamba enhlengeletanweni. (Mat. 28:10b; 1 Kor. 15:6) Hilaha ku fanaka, na hina hi nga khutaza vamakwerhu lava tshikeke ku tirhela Yehovha hi ku va rhamba leswaku va ta etinhlengeletanweni ta vandlha. Ha swi tiva leswaku swi nga endleka va ta endzhaku ka loko hi va rhambe ko hlayanyana. Yesu a tsake ngopfu loko vadyondzisiwa vakwe va amukela xirhambo xakwe.—Ringanisa na Matewu 28:16 na Luka 15:6.

17. Hi fanele hi endla yini loko makwerhu loyi a tshikeke ku tirhela Yehovha a ta enhlengeletanweni ya vandlha?

¹⁷ Va amukele hi mandla mambirhi. Yesu u amukele vadyondzisiwa vakwe hi mandla mambirhi loko a hlangana na vona. (Mat. 28:18) Hi fanele hi endla yini loko makwerhu loyi a tshikeke ku tirhela Yehovha a ta enhlengeletanweni ya vandlha? Hi fanele hi n’wi amukela hi ndlela leyi nga ta endla a titwa a ri ekaya. Loko hi n’wi vona ro sungula, swi nga endleka hi nga swi tivi leswaku hi ta ku yini. Kambe leswaku hi n’wi endla a titwa a tshunxekile, hi nga n’wi byela leswaku ha tsaka ku n’wi vona.

18. Hi nga va khutaza njhani vamakwerhu lava tshikeke ku tirhela Yehovha?

¹⁸ Va khutaze. Swi nga endleka vadyondzisiwa va Yesu a va xi vona xi tika swinene xileriso xa Yesu xo chumayela emisaveni hinkwayo. Kambe u va khutazile a ku: “Ndzi na n’wina mikarhi hinkwayo.” (Mat. 28:20) Xana valandzeri vakwe va khutazekile? Ina. Swi nga si ya kwihi, se a va khomekile hi ku ‘dyondzisa ni ku chumayela mahungu lamanene.’ (Mit. 5:42) Hilaha ku fanaka, vamakwerhu lava tshikeke ku tirhela Yehovha va lava ku khutaziwa. Swi nga endleka va chava loko va ehleketa hi ku tlhela va sungula ku chumayela. A hi va  khutazeni, hi va byela leswaku loko se va lunghekile hi ta famba na vona entirhweni wo chumayela. Va ta wu tlangela swinene mpfuno wa hina loko va tlhela va sungula ku chumayela mahungu lamanene. Loko hi komba vamakwerhu lava tshikeke ku tirhela Yehovha leswaku ha va rhandza, ku ta va ni ntsako evandlheni.

19. Hi navela ku endla yini naswona hikwalahokayini?

¹⁹ Xana ntirho wo endla vadyondzisiwa hi ta wu endla ku fikela rini? Ku fikela loko makumu ma fika. (Mat. 28:20) Xana hi ta xi yingisa xileriso xa Yesu kukondza ku fika nkarhi wolowo? Hi tiyimisele ku endla tano! Hi ku tirhandzela hi nyikela hi nkarhi, matimba ni rifuwo ra hina leswaku hi lavisisa vanhu lava lavaka “vutomi lebyi nga heriki.” (Mit. 13:48) Loko hi endla leswi, hi va hi tekelela Yesu. U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yoh. 4:34; 17:4) Na hina hi navela ku endla tano. Hi lava ku heta ntirho lowu hi nyikiweke wona. (Yoh. 20:21) Hi lava leswaku vanhu van’wana ku katsa ni vamakwerhu lava tshikeke ku tirhela Yehovha va hi joyina entirhweni lowu.—Mat. 24:13.

20. Hi ku ya hi Vafilipiya 4:13, i yini lexi nga ta hi pfuna hi kota ku heta ntirho lowu Yesu a hi leriseke wona?

²⁰ Ku vula ntiyiso, a swi olovi ku endla ntirho lowu Yesu a hi nyikeke wona. Kambe a hi wu endli hi ri hexe. Yesu u hi tshembise leswaku u ta va na hina. Hi kota ku endla ntirho wo endla vadyondzisiwa hileswi hi nga “vatirhikulobye ni Xikwembu” naswona hi pfuniwaka hi “Kreste.” (1 Kor. 3:9; 2 Kor. 2:17) Hikwalaho, hi ta swi kota ku wu heta. Hakunene i nkateko ku endla ntirho lowu naswona swa tsakisa ku pfuna van’wana leswaku na vona va wu endla!—Hlaya Vafilipiya 4:13.