1. Hi ku ya hi Matewu 28:18-20, i mpsini leswi Yesu a nga rhuma vadjondzisiwa va yena swaku va swi yentxa?

A NKAMA Yesu a nga pfuxiwa a humelele ka vadjondzisiwa va yena lava a va li Galileya. A a ni swilo swa lisima leswi a a lava ku va byela swona. Swilo swa kona swi le ka Matewu 28:18-20. — Yi lerhi.

2. Hi swini swivutiso leswi hi nga ta bulaka hi swona?

² Leswi Yesu a nga rhuma vadjondzisiwa va yena swaku va swi yentxa swa tirha ni ka hina namuntlha. Hi mhaka leyo, a hi voneni swivutiso swinharhu leswi nga ta hi pfuna ku hetisisa leswi Yesu a nga hi rhuma swona. Xa ku sungula, handle ka ku djondzisa vanhu minawu ya Xikwembu, i mpsini swin’wana leswi hi faneleke hi swi yentxa? Xa wumbirhi, vamakwerhu abandleni va nga yentxa yini swaku va pfuna lava hi djondzaka na vona Bibele a kuva va rhandza Yehovha? Xa wunharhu, hi nga va pfunisa ku yini vamakwerhu lava nga tshika ku chumayela swaku va tlhela va sungulisa?

3. Yesu a hi rhumi ku yentxa yini?

³ Leswi Yesu a nga hi rhuma swona swa twisiseka. Hi mhaka leyo hi fanele hi swi djondzisa vanhu van’wana. Kambe ku ni swin’wana swa lisima swaku a hi fanelanga hi swi kholhwa. Yesu a nga hlayanga swaku hi djondzisa vanhu ‘hinkwaswu leswi a nga hi byela swona’ kambe a te ‘mi va djondzisa kuhlayisa hinkwaswu leswi nimibyeleke swona’. A hi fanelanga hi djondzisa vanhu leswi va faneleke va swi yentxa ntsena, kambe hi fanele hi va komba swaku va fanele va swi yentxisa ku yini. (Mint. 8:31) Hi mhaka muni hi fanele hi swi yentxisa xileswo?

4. Kombisa swaku hi nga va pfunisa ku yini lava hi djondzaka na vona Bibele swaku va hlayisa minawu ya Kreste.

 ⁴ “Kuhlayisa” nawu swi vula ku wu yingisa. Leswaku hi twisisa leswi vulaka swona ku landzela nawu wa Yesu a hi pimiseni hi xikombiso lexi. Munhu lweyi a djondzisaka van’wana ku fambisa movha a nga yentxa yini swaku a va pfuna ku landzela minawu ya xitaratu? Xa ku sungula a fanele a va djondzisa minawu hinkwayu leyi va faneleke va yi landzela. Kambe leswaku va kota ku yi landzela ku ni swin’wana leswi a faneke a swi yentxa. A fanele a famba na vona a va komba swaku va nga yi tirhisisa ku yini minawu leyi a nga va djondzisa yona loko va famba xitaratwini. Hi djondza yini ka xikombiso lexi?

5. a) Hi ku ya hi Yohane 14:15 na 1 Yohane 2:3, hi fanele hi va djondzisa yini lava hi va djondzisaka Bibele? b) Nyikela xikombiso xa leswi hi nga va pfunaka ka swona.

⁵ Loko hi djondza Bibele ni vanhu, hi va djondzisa leswi Xikwembu xi swi lavaka. Kambe ku ni swin’wana leswi hi faneleke hi swi yentxa. Hi fanele hi va djondzisa ku tirhisa leswi va swi djondzaka ka Bibele siku ni siku. (Lerha Yohane 14:15; 1 Yohane 2:3.) Hi xikombiso, hi nga va komba swaku va nga swi tirhisisa ku yini leswi va swi djondzaka loko va li xikola, a ntirhweni kumbe a ku tlangeni. Hi nga va kontarela leswi nga hi humelela swaku hi va pfuna ku vona swaku ku tirhisa leswi hi swi djondzaka ka Bibele swi nga hi pfuna ku yentxa swiboho swa swinene swi tlhela swi hi vhikela. Hi fanele hi khongela na vona, hi kombela swaku Yehovha a va pfuna hi ku tirhisa moya wa ku kwetsima. — Yoh. 16:13.

6. I yini swin’wana hi nga swi yentxaka swaku hi pfuna lava hi djondzaka na vona, va landzela minawu ya Yesu?

⁶ Ku laveka yini swaku hi djondzisa vanhu ku landzela leswi Yesu a nga hi rhuma swona? Hi fanele hi va pfuna swaku na vona va navela ku djondzisa van’wana ntiyiso. Phela van’wana va chava ku yentxa ntirho lowu. Hi mhaka leyo, hi fanele hi lehisa mbilu swaku hi va pfuna ku twisisa mintiyiso ya Bibele a ku va va ta kota ku tiyisa lipfumelo la vona. Loko hi yentxa leswo, hi ta khumba timbilu ta vona naswona va ta swi navela ku chumayela mahungu ya ku tsakisa. Hi nga yentxa yini swaku hi va pfuna swaku va navela ku chumayela mahungu ya ku tsakisa?

7. Hi nga mu pfunisa ku yini lweyi hi djondzaka na yena swaku a navela ku chumayela?

⁷ Hi nga ha vutisa lava hi djondzaka na vona Bibele swivutiso swa ku fana ni leswi: “Ku tiva mahungu ya ku tsakisa swi li yampsisise ku yini wutomi la wena? U vona swaku van’wana a swi nge va pfuni loko va twa mahungu lawa? U nga yentxa yini swaku u va pfuna?” (Swi. 3:27; Mat. 9:37, 38) Mu kombi mafolhetu lawa hi ma tirhisaka loko hi chumayela. Mu byeli swaku a langa lin’we leli a nga li tirhisaka swaku a chumayela vanghanu, lava a tirhaka na vona kumbe maxaka. Mu nyiki mafolhetu ya manyingi u gama u ensayara na yena swaku a vona leswi a nga ma nyikelisaka xiswona. Phela hambiloko a pfumeleliwa swaku a va muchumayeli, swi ta lava hi va na yena swaku hi mu pfuna. — Ekl. 4:9, 10; Luk. 6:40.

8. Hi mhaka muni swi li swa lisima swaku lava hi djondzaka na vona Bibele va rhandza Xikwembu ni vanhu van’wana? (Vona kwadru leli nge: “ Hi Nga Va Pfunisa Ku Yini Lava Hi Djondzaka Na Vona Bibele Swaku Va Rhandza Xikwembu?”)

⁸ Khumbuka swaku Yesu a hi rhume ku djondzisa vanhu swaku ‘vahlayisa hinkwaswu leswi a hi byeleke swona’. Leswo swi patsa ku rhandza Xikwembu ni vanhu van’wana. (Mat. 22:37-39) Loko hi pfuna lweyi hi djondzaka na yena ku yingisa minawu leyi, hi ta va hi mu pfuna swaku a kota ku chumayela. Hi  mhaka muni? Hi mhaka ku rhandza Xikwembu ni vanhu van’wana swi ta mu yentxa a lava ku chumayela. I ntiyiso swaku van’wana ka lava hi djondzaka na vona Bibele va nga ha chava ku chumayela. Kambe hi nga va tiyisekisa swaku hi ku pfuniwa hi Yehovha va nga swi kota ku tshika ku chava vanhu hi kutsongo kutsongo. (Pis. 18:1-3; Swi. 29:25) A kwadru leli fambisanaka ni nhlokomhaka leyi, li kombisa leswi hi nga swi yentxaka swaku hi pfuna lava hi djondzaka na vona kuva va rhandza Xikwembu. Kambe i mpsini leswi vamakwerhu abandleni va nga swi yentxaka swaku va pfuna lava hi djondzaka na vona Bibele akuva va tama va rhandza Xikwembu?

9. Ka xikombiso xa munhu lweyi a djondzaka ku fambisa movha, i mpsini leswi nga mu djondzisaka swilo swa lisima?

⁹ Tlhela u pimisa hi xikombiso xa munhu lweyi a djondzisiwaka ku fambisa movha. A nkama a fambisaka movha na a ni mudjondzisi wa yena a tlhelweni, i yini leswi a nga swi djondzaka? A nga djondza hi ku twa leswi mudjondzisi wa yena a mu byelaka swona ni ku vona van’wana lava fambisaka mimovha. Hi xikombiso, mudjondzisi a nga ha mu komba van’wana lava fambisaka kahle movha va tlhela va pfulela van’wana ndlela. Kumbe a nga ha mu komba mun’wana lweyi a finaraka maghezi ya movha wa yena swaku a nga tsunyi van’wana matihlu. Swikombiso leswo swi nga ha mu djondzisa swilo swa lisima leswi a nga swi tirhisaka loko a fambisa movha.

10. I yini leswi nga pfunaka lweyi hi djondzaka na yena Bibele swaku a rhandza Yehovha?

¹⁰ Hi xikombiso, loko munhu lweyi a djondzeliwaka Bibele a sungula ku tirhela Yehovha, a nga djondzisiwe ntsena hi lweyi a mu djondzelaka, kambe a nga djondza swin’wana ka vanhu van’wana lava tirhelaka Yehovha. Se, i yini leswi nga mu pfunaka ku rhandza Yehovha? I kuva kona mintlhanganwini. Hikusa leswi a nga ta swi djondza a mintlhanganwini swi ta yentxa swaku a va ni wutivi, a tiyisa lipfumelo la yena a tlhela a rhandza Yehovha. (Mint. 15:30-32) Naswona loko a li mintlhanganwini, lweyi a mu djondzelaka Bibele, a nga ha mu komba vamakwerhu lava nga humeleliwa hi swilo swa ku fana ni leswi mu humelelaka. Vona leswi vamakwerhu va nga mu pfunisaka xiswona lweyi u djondzaka na yena ka swiyimu swa ku fana ni leswi swi landzelaka.

11. I yini leswi lava hi djondzaka na vona va nga swi vonaka abandleni, naswona leswo swi nga va pfunisa ku yini?

¹¹ Loko ku li swaku lweyi u djondzaka na yena Bibele a nga na nuna naswona a wundla vana na a li yexe, a nga ha vona vamakwerhu van’wana abandleni lava nga ka xiyimu xa ku fana ni xa yena. Swi nga ha mu tsakisa ku vona makwerhu wansati lweyi a wundlaka vana na a li yexe, a ta ni vana va yena ka Yindlo ya Wugandzeli. Loko lweyi u djondzaka na yena a lwela ku tshika ku dzaha, u nga ha mu komba makwerhu abandleni lweyi a nga swi kota ku tshika ku dzaha. Makwerhu lweyo a nga ha mu byela swaku ku rhandza Yehovha swi mu pfunise ku yini ku landzela minawu ya yena. (2 Kor. 7:1; Filp. 4:13) Loko se a mu byelile leswi a nga swi kotisa xiswona ku tshika ku dzaha a gama a mu tiyisa a ku: “Na wena u nga swi kota.” Leswo swi yentxa swaku lweyi a djondzeliwaka Bibele a tiyiseka swaku na yena a nga swi kota ku tshika ku dzaha. Minina lweyi a djondzeliwaka Bibele a nga ha vona swaku va minina van’wana va tsakile hileswi va nga Timboni ta Yehovha naswona leswo swi mu yentxa a lava ku tiva swaku hi mhaka muni va tshama na va tsakile.

12. Hi mhaka muni hi nga vulaka swaku vamakwerhu hinkwavu abandleni va nga pfuna lweyi hi djondzaka na yena Bibele?

¹² Loko lweyi hi djondzaka na yena Bibele a tiva vamakwerhu va ku hambanahambana  abandleni, swi ta mu pfuna ku vona swaku a nga wu yingisisa ku yini nawu wa Yesu wa ku rhandza Xikwembu ni vanhu van’wana. (Yoh. 13:35; 1 Tim. 4:12) Hi lani hi nga swi vona hi kona, lweyi hi djondzaka na yena Bibele a nga pfuniwa hi vamakwerhu lava nga kumana ni swiyimu swa ku fana ni swa yena. Leswo swi nga mu pfuna ku vona swaku na yena a nga swi kota ku txintxa wutomi la yena a sungula ku tirhela Yehovha. (Det. 30:11) Leswi vulaka swaku vamakwerhu hinkwavu abandleni va nga pfuna lweyi hi djondzaka na yena Bibele swaku a yingisa minawu ya Yehovha. (Mat. 5:16) Se, wena u yentxa yini swaku u pfuna lava djondzeliwaka Bibele lava taka mintlhanganwini?

13-14. Yesu a va pfunise ku yini vapostolo va yena lava a va heli ntamu?

¹³ Hi lava ku pfuna vamakwerhu lava nga tshika ku chumayela swaku va tlhela va sungulisa. Leswi Yesu a nga swi yentxa swaku a pfuna vapostolo lava a va heli ntamu, swi kombisa leswi na hina hi nga swi yentxaka namuntlha.

¹⁴ A nkama Yesu na a li kusuhi ni ku fa, vapostolo va yena ‘hinkwavu vamusiyile, vabaleka.’ (Marka 14:50; Yoh. 16:32) I mpsini leswi Yesu a nga swi yentxa a nkama vapostolo va yena a va heli ntamu? A nkama a nga pfuxiwa a byele valandzeli va yena van’wana a ku: ‘Mingachaveni, fambani miyabyela vamakwerhu [swaku ni pfuxiwile].’ (Mat. 28:10a) Yesu a nga va tshikanga vapostolo va yena. Hambileswi va nga mu baleka a tame a ku “i vamakwerhu.” Ku fana na Yehovha, Yesu a ni timpsalu funtshi wa rivalela. — 2 Tiho. 13:23.

15. U titwisa ku yini hi vamakwerhu lava nga tshika ku chumayela?

¹⁵ Na hina ha va rhandza vamakwerhu lava nga tshika ku chumayela funtshi hi ni mhaka na vona. Ha ha wu khumbuka ntirho lowu va nga wu yentxela Yehovha naswona van’wana va vona va mu tirheli malembe ya manyingi. (Hev. 6:10) Phela ha va xuva vamakwerhu lava! (Luk. 15:4-7) Ku fana na Yesu hi nga yentxa yini swaku hi kombisa swaku ha va rhandza?

16. Hi nga yentxa yini swaku hi kombisa swaku ha va rhandza vamakwerhu lava nga tshika ku chumayela?

¹⁶ Va rhambi swaku va ta mintlhanganwini. Xin’we xa leswi Yesu a nga swi yentxa swaku a pfuna vapostolo va yena lava a va heli ntamu, i ku va rhamba swaku va ya tlhangana na yena. (Mat. 28:10b; 1 Kor. 15:6) Na hina namuntlha hi nga pfuna lava nga tshika ku chumayela hi ku va rhamba swaku va ta mintlhanganwini, loko ku li swaku ni mintlhanganwini a va ha ti. Swi nga ha yentxeka ku laveka hi va rhamba makhambi ya manyingi. Ha tiyiseka swaku Yesu a tsake hintamu a nkama vadjondzisiwa va yena va nga pfumela swaku va ya tlhangana na yena. — Fananisa ni Matewu 28:16 na Luka 15:6.

17. Hi fanele hi yentxa yini loko lweyi a nga tshika ku chumayela a sungula ku ta mintlhanganwini?

¹⁷ Va yamukeli hi lirhandzu. A nkama Yesu a nga kumana ni vadjondzisiwa va yena a yentxi swaku va titwa kahle. A nga nyimelanga swaku va ta ka yena, kambe hi yena a nga sungula a ya ka vona, a ya vulavula na vona. (Mat. 28:18) Se, hi ta yentxa yini loko munhu lweyi a nga tshika ku chumayela a sungula ku ta mintlhanganwini? Hi fanele hi mu yamukela hi lirhandzu. Minkama yin’wana hi nga ha chava hi nga swi tivi swaku hi ta yentxa yini. Kambe a hi fanelanga hi mu danisa. Hi fanele hi mu byela swaku ha tsaka hileswi a nga ta mintlhanganwini.

18. Hi nga yentxa yini swaku hi tiyisa vamakwerhu lava nga tshika ku chumayela?

¹⁸ Va tiyisi. Swi nga yentxeka vadjondzisiwa  va Yesu a va pimisa swaku a va nge swi koti ku yentxa ntirho lowu Yesu a nga va rhuma wona, wa ku chumayela a misaveni hinkwayu. Yesu a va tiyisile a ku: “Ni na n’wina masiku hinkwawu.” (Mat. 28:20) Swa tikomba swaku marito lawa ma va tiyisile, hikusa va game “va ya mahlweni vanga tshiki kudjondzisa ni kuchumayela mahungu yotsakisa.” (Mint. 5:42) Vamakwerhu lava nga tshika ku chumayela na vona va lava ku tiyisiwa. Swi nga ha yentxeka va chava ku tlhela va chumayela. Hi nga va tiyisekisa swaku hi ta va pfuna hi ku chumayela na vona loko se va lunghile. Hikakunene loko hi va pfuna, va ta swi tsakela ku tlhela va chumayela. Loko hi vona lava nga tshika ku chumayela na va li vamakwerhu, swi ta yentxa swaku va tlhela va sungulisa ku chumayela naswona a bandla hinkwalu li ta tsaka.

19. I mpsini leswi hi swi navelaka naswona hi mhaka muni?

¹⁹ Hi fanele hi djondzisa vanhu anze ku helisiwa misava leyi ya ku biha. (Mat. 28:20) I ndje hi ta swi kota ku tama hi chumayela vanhu anze ku fika nkama lowo? Hi tinyimiselile ku yentxa swoleswo! Hi tirhisa nkama, ntamu ni swilo swa hina swaku hi pfuna lava nga ni “kutiyimisela lokunene ka wutomi lelinga heliki.” (Mint. 13:48, NM) Loko hi yentxa leswo hi va hi tekelela Yesu lweyi a nga te: ‘Swakudla swa mina i kuyendla kurhandza ka lweyi anirhumeke, ni kuheta ntirho wa yena.’ (Yoh. 4:34; 17:4) Hi leswi na hina hi swi lavaka. Hi lava ku hetisisa ntirho lowu hi nga nyikiwa wona swaku hi wu yentxa. (Yoh. 20:21) Hi lava swaku vanhu van’wana va tirha na hina ka ntirho lowu, ku patsa ni vamakwerhu lava nga tshika ku chumayela. — Mat. 24:13.

20. Hi ku ya hi Vafilipiya 4:13, hi mhaka muni hi tiyiseka swaku hi nga swi kota ku yentxa ntirho lowu Yesu a nga hi rhuma?

²⁰ Ku yentxa leswi Yesu a nga hi rhuma a swi vevuki. Kambe a hi hoxe, hikusa Yesu a hi tshembise swaku a ta va na hina. Loko hi yentxa ntirho lowu wa ku djondzisa vanhu, hi ta va ‘vatirhikuloni ni Xikwembu’ ‘na hili va ka Kriste.’ (1 Kor. 3:9; 2 Kor. 2:17) Hi mhaka leyo, hi nga swi kota ku wu hetisisa. Swi tsakisa hintamu ku yentxa leswi Yesu a nga hi rhuma swona ni ku pfuna van’wana swaku na vona va swi yentxa! — Lerha Vafilipiya 4:13.